गां गोनां सना गां
सिखोला बैसोआ गां गोनां
ददेरे बैसोआ बिरहां बिरहां
हाबाब अनजालि-
आंनि अन्नायखौलाय दा बावलां
~
अखा हाहां हाहां
दैज्लांआ फैहां फैहां
बैसागुनि बारजोँलाय बिखा फांदां
बिलाइ गोरलैनि बार मोजां
~
दाउ खौऔआसो जंखाय हरदोँ
जंखाय हरदोँ सनालै-
जोँ लागोनि टेक्टर बोरायालाय फाम नांहां
~
खानाय बानाय आगैलै सैनाय
आंखौ दालां दाबावगारलां
इनाय बानाय
इनाय बानाय सना
आंनि अन्नायखौलाय दाबावलां।

आं उन्दैमोन गुदि फरायसालियाव
गोर गोर बिथ'राइ बिजाब फानोखंआव खिथेबना लानानै
हुरुद खुगाजोँ मटर साइकेल साखावलांनो हानाय।
निसिमा रायजो नाङैनो मुंदांखा नायल' जाल' दतमा गामिनि रनजिद माहाजोननि
"गैया मा खालामनो?" मुंनि टियाटारआ।
सानफ्रोमबो  नङा सम सम मोना मोनायाव जायो एबा दिन्थियो।
गोसो गुदुं जोँ गामिनि बोरायसा बुरैसाफ्रा सोरां बारां ओँखाम जानानै
मोनानाय लोगो लोगो नायनो हांखुर जालायथारो।
गान गोलाव जाथ्रा माबा माबि मानसि सावथुन होनब्लाथाय बारलायग्राखा।
आरोबाव सेंग्रा सिख्लाफोरखौ ओरैनोब्लाबो बुङाब्लाबो जाखासै।
आंनि सानै सनजिमा रनजिमा आब'मोनाबो बाज्ल' लायथारदोँ सानसेखालि
बिसोरनि सेर सेर आरो आंबो खम नङा।
आय आरो आफाया गावसोर नायनो ओँखाराखैब्लाबो आंखौ लाखिनो हायाखै ओइदिनखालि
"नाया मोना गुना,
देनां देरबा नायगोन होन्नानै।"
दैज्लां बोथोरा थांबाय
रावहाबो माय गायबावनांगौ दंब्लाबो बोथोर बारग'बाय।
अदेबानि  मायआ मोदोम गोरलै जासावनाय समसै।
मोनाबिलिनि जानाय लोँनायखौ थाबै जादोँब्लाबो थाबैनो मोनाबावदोँ ओइदिनखालि।
दतमा गामिसिम थांनांगौ जायोब्ला सालगुरि बालागारि मोन्नै गामिखौ बारना
आरोबाव दुब्लि मोनसे बारनांगौ जायो।
मोले मोले लेम आरो खायसे फाथि सिनजायाव अर ब्लाव ब्लाव लानानै
जोङो ज' जयै थांबाय लाफेर माहाजोननि माय दुब्लि गेजेरजोँ।
गाब्र' गुब्र आलि गेजेरनि लामाजोँ थाबाय लांनायनि सोरबा सोरबा गोलैगु लायदोँ।
गालुन गुलुन हाब्रुबो जालायबाय लामा (आलि) या।
जोँनि हानजानि सोरबा सोरबा लेवार बाजादोँ
सोरबा सोरबा गाहे गुहेजोँ हाब्रु गदा गदि जादोँ आथिँफोरा।
आंबो सेन्डेलखौ आखायाव लानानै थाबायदोँब्लाबो हाब्रुजोँ बोकथा जालायदोँमोन।
हराव थाबायब्ला गोजाबो खाथि जायो होन्नाय बाथ्रा दं।
जोँबो जेन' थाबैनो सहैनायसै रनजिद माहाजोननि सायनासालिसिम।
गोजौ जौसांआव दिन्थिनाय जायो
लान्दां फादां फैसालि बोलानो खोबनो थाखायबो जेबो गैया।
अदेबानि दिन्थिनांगौ जायोब्ला फावगिरिया गोजौआव गाखोयो
गावनि फावथिनाया जोबोब्ला गाहायाव ओँखारबोयो फिन उननि दिन्थिनांगौनि थाखाय थियारि जाना थायो।
सौहैबाय जोँ फालोसे मानि मिनि खुसि नायनो थाखाय।
आंबो नुफेरै गथ'ना
नुसिगोन एबार लोगोफोरजोँ सावरायनो हासिगोन
सान्नानै जोबोद खुसि।
नाथाय मा जाखो मिथिगौना?
"गैया मा खालामनो?" जानो गोनां फावखुंग्रिया अरजोँ खामजादोँ।
एसेयावनो थुंगेनायसै सिबाय फालोसे मानि उल्था मोखाङै
गैया मा खालामनो गिदिँफिननांबाय।

हार्सा फैदोँ हार्सा होन्नानै गामिनि गथ'फोर दोँ दोँ जोँनिसिम खारबोदोँ।
हार्सा नुफेरै गामिनि गथ'फोर सान्नानै फैथोँ फैथोँ सान्दोँ आंबो।
साफानि उनाव साफा सा जिनिबो बारा जाफैदोँ जोँनि सिलायाव गथ'फोरा होँगो दोँगो।
दारि गाबस्रेँस्रेँ मोलंलं हार्सा बोरायखौ गल' गल' नायफैदोँ।
लेब थोसब रोग्राना फानबायग्रा हार्सा।
बर'नि फंसे रावजोँबा मा होनगोनथाय? मिथिलाय लांला आं।
जाबखोसे मानि लेब थोसब लाबोदोँ।
(हार्सानि रावजोँ) जोँहानोबो गांनै नांगौहाय होन्ना आयआ बुंनायाव जोँनियाव हाबफैदोँ हार्साया।
मोजां मोजांखौ आयआ नागिरदोँ उन थाराव गांनैखौ फसायना लाखिबाय।
रांखौ मोनखांनानै हार्साया गांथामसो फान्नो आद्रा थाबावनायखौ हानिफ्राय दुबफुं थिखोना साइकेलाव थिखोबाय।
गल'ल' नायना थानाय साल'नि फंबाय गालरा
"थोस फालुवान बायदिल' थिखोखायो" होन्ना बुंब्ला बयबो मिनिदोँ।
हार्सायाबो खर' थिखिनि जौसिनलायनाय मिनि हादे मिनियो।
एसेयावनो सावख्लानि फिसाला उन्दैसिन बिथराया जावथेबाय-
"बे थुलाखौ थिखोबानो फालुवान जायो नामा?"
आं खोनामोनै मा मा नांलायखोथाय बिसोर बुलायगुलायबायसो उनाव।
नाथाय फंनै फंनैसोल' सौलायनो मोन्दोँमोन जानांगौ बिसोर, एसेयावनो आं बोखानो मोनबाय बिसोरखौ।
अब्ला माब्लाबानो हार्साया गोमोरलांबायसो मिथिस्लाब मोनै।
गथ'फोरखौ थिनहरना आं सान्दोँ-
"नंगौ बिथरायनि फंसे बाथ्राया सैथो।
हार्साफ्रा जोँनिफ्राय माब्लाबाबो बोलो गोरासिन नङा नाथाय बिसोर सालागसिन।
जोँनि नांगोल गंसे बान्नायजोँ बिसोरनि मुरि थफ्लाथाम रुजुन्नायजोँ समान नङा।
जोँनि बावखाजोँ माय बजाब्रै बान्नायजोँ
बिसोरनि लेब थोसब गांस्नि रुजुन्नायजोँ समान नङा।
नाथाय जोँनि माय बजाब्रैनिफ्राय लेब थोसब गांबाजोँ बिसोर बांसिन बोलो नाङै खामायनो हागौ।"

दै बाना जादोँ
दैज्लांनि दुब्लियाव
ना बाथोन जादोँ
आदै लांहानि दुब्लियाव
-
दा बेयाव रावबो गैया
आं आरो बाथोन मोनसे
ना खान्दा
हाजो मावरियानिफ्राय ओँखारबोनाय
-
जेसेबां ना हमनो हायो
एसेबांनो बाखोनाय जागौ
आमोखाया जि बुरजा ना मोन्दोँ
मालाय बेहासो-
बायदि बायदि
-
लान्थिया मोदोम
थाफ्लि फैखोनाय गामसा गान्दोँ
खुसिया बाग्ला जादोँ
कातिकनि आलियाव सबाय बेन्दोँआनो जेन'
माफा माफा हमजोबथारगोन ना
-
बिसोर आंजोँ काबादिसो गेलेदोँ?
लानजाइ सोमावना गिदिँदोँ आरो
गिदिँदोँ
हालि हालि सारि सारि
दुब्लिनि दब्लायसेल'
बोहैनाय दैखौ दान्थेदोँ
दालाबसे हाब्रुजोँ Sluise बानायदोँ
-
माफानि उनाव माफा हमदोँ
मिनि खुसि
गस्ला हिजोँ बोन्ना लाबोदोँ
मुगाया मोसा-मोसि दा
फालोसे दाउलिँआ सिख'दोँ
-
फालो फालो आंखौ खेबफैदोँ
खेबै खेबै
सुमलि दंफांसिम बोखोदोँ
आं आरो बिसोरजोँ बुलायनो हायाखिसै
-
रना-रनि थैजोँ
मोनसे दैसा बोहैयो
जिरि जिरि सुमलि दंफांनि सेरजोँ
-
इनाय-बानाय खेबै खेबै
बिसोर आंखौ बुङो-
नोँनि मावनां बेवहायनो जाबाय
थैनाया फैयो जेब्ला फैबाय
नंगौ थैनाया फैयो खेबसे
बेनो जायोब्ला जिउनि गोजोन्नाय??

दिनै आं 5-40 रिँगायाव सिखारदोँ
खेबसे सिखारनायनै उन्दुफिन्दोँ
मानोना दामानि जोबोद गुसु
आरो 6-20 रिँगायावसो सिखारफिन्दोँ
सिखारनायनि उनाव आङो दुब्लियाव
माथाम मोसौखौ खाहैदोँ
फैफिननानै देहानि थाखाय दान्दिसे गेलेदोँ
हाथाइ मानजिना मोखां सुनानै
8-25 रिँगायाव फुंनि ओँखाम जादोँ
बिजाब फरायदोँ दोँनैसो खन्थाइ लिरदोँ
11-36 रिँगायाव साननि ओँखाम जादोँ
बिनि उनावबो आङो बिजाब फरायदोँ
1-16 रिँगायाव आफाजोँ खामानि मावफादोँ
मारा होनो थाखाय माय बजा जाबदोँ
बिनि उनाव दुगैनानै गानै जोमै
दुब्लिनि मोसौखौ लायनानै
न'नि गलियाव खाफैदोँ
बिनि उनाव बिजाब फरायदोँ
7-30 रिँगायावनो मोनानि ओँखामखौ जादोँ
बिनि उनाव आङो बिजाब फरायदोँ
9-40 रिँगायाव उन्दुनो एमसिम।

1
जावलिया बिरगोस्रीनि सिमांआ
सिमांआनो जाना थाबाय
सिमां जावलिया बर'फानि सल'
आरोबाव फरायबावनांगौ दा?
2
आब' बिरगोस्री---
मेच रायजो दानो
जोँ बेसेबां गोबाव थांनानै थागोन?
हारिनि इयुना जोँनि आखायावनोमारथ?
3
नै आदा बासिराम आब' गाम्बारि
आखायाव थुंग्रि दैनानै
गराय दाब्राय दाब्राय
बेसेबां दावहा नांनो?
4
गानजंनि हेडकवाटारखौ सावनानै
जोँहा खैफोदाव गोग्लैबाय
आदा सोमदोन---
सोर होफैगोन ओँखाम खबसे?
5
थांनानै थानो लुबैयो जोँ
नै थफेन आफा---
जोँ आरो माबादि जांख्रिखांबावगोन?
नोँनि अहिंसाखौ सुथुरा मनबाय!
6
आरो आं सहायनो हालिया
मुंख्लं दावहारुनि थै रेजेद रेजेद
आं बिग्रायखाङो जोबथा दावहानि थाखाय
थै आरो थैनो हो

आं आजै आबैमोनखौ गोसोखांलिया
बै समनि गाम्बारि बिरगोस्रिमोनखौ
दाउरि सिख्लामोनखौ गोसोखांलिया
बिसोरनि गोसो आरो मेगना गुबुनखा
-
सिनाय जानाय दानि साकिरा बियनसे
अन्जलिना जलि
मादुरि इस्वरियामोनखौ
मख'यैआनो गाहाम जागोन
-
आं नोँखौ सोनाबारिजोँ रुजुनो नागिराखै
मानोना बिसोरहा मान दं
आं चिन तिब्बेत करियान
माल्दीब मालायसिया नेपालखौ मख'नो नागिराखै
बिसोरहा मुलुगनि जौसां सोमावनो गोहोआ दं
-
आं सोर्गोनि मेन'का
उर्बसि मेन'का तिल'त्तमामोन
बै समनि नांगोल सिड़ाजोँ एरखांजानाय
सति सीता
साबा पाण्डबनि बिसि
द्रौपद राजानि फिसाजो
द्रौपदिजोँ रुजुवा
फाप एबा दायफोर नांनो हागौ
-
नाथाय पष्ट-मर्दाननि सायनासालियाव
गल'ल' नायहोनो हायो नोँबो
नोँ नकल सोनाबारिनि देलायमांग्रि
अब्लाबो आखाय खबनोसै आङो
ख्रब ख्रब ख्रब
दाउखा सिगुणफोरा फोर फोर बिरलांथोँसै।

सिमांखौ आंनो नुदोँमोन
नोँजोँ आंजोँ मोनसे दैमायाव
दैमाखौ जोँ सानस्रिदोँमोन
नोँजोँ आंजोँ हांगार गोसोम हराव
.
मोनसे सोर्गोखौ मोनहैदोँ
मोनसे सोर्गोनि उनावबो
बेयावनो जोँ सानसे संसार जादोँ
सोर्गो नागारनांदोँमोन थेवबो
.
मोनसे हाजोखौ गाखोदोँ आरो
जेराव साना ओँखारो
जेराव खोलो खोलो बार बारो
नोँनि आंनि गोरबो गेजेराव
.
बेसेबा समायना जादोँमोन
नोँ मिनिदोँमोन जेब्ला
जेब्ला आं गोजोनदोँमोन अब्ला
जेराव जोँ सानैजोँमोन माब्लाबा

खन्थाइखौ आं लिरो
आंनि बुजिनाय आंनि मोन्दांथिजोँ
खेबसे खेबनै आवरायना नायो
बिनि देँखो खबाम सानस्रिखौ
-
आंनि खन्थाइखौ नोँसोर बुजिगोन
बुजियाब्ला आं बुजिहोनो हाया
सम आरो बोथोरानो फोरोँगोन
थिक थिक खारनाय घड़िनि खाथाखौ
नोँसोर मोजाङै खोनासंनांगोन
-
रंजायो नंगौ गाबोबो आंनो
नाथाय आंनि सोलेरा नङा
आंनि गोसोआसो गाबो
सम सम गोरबोआव बांग्रिँ मावो
-
थोलौ थोफौ खर'नि मेलेमा
सम सम मोन्दांथिजोँ सोमावग्लुंजायो
गोसोआदि आदुवा समाव
गोरबोनि गियानजोँ समाव
साप्रेलाय मेफबलाय खालामजायो
-
हाथाय बायलायनाय सोदोबजोँ
एबा दैबादि लाव लाव गुरै
एखमबा एखमबा मोनसे आयदा
खन्थाइखौ आं लिरो।

खन्थाइगिरि नङा बियो
उन्दै समफोराव लिरदोँमोन नामा
दिनैसिम आं मिथिया खिन्थायाखैबो
अदेबानि आं फरायनो मोनफेराखै
-
सानथामसो सिगांआवसो
गांसे बिजाब साफायदोँ बियो
दुलाराय सुबुंनो फरायनो थाखाय
गावनि रोँनाय आरो स्टाइलखौ मिथिहोनो
-
बिजाब मुङा दिन्थिना
गिदिर महरनि बिजाब
सलमा नङाबा जारिमिनानो जानो हागौ
नायनि मा बिजाब बेलाइ
फरायनि-
-
आरांगायाव बिजाबखौ मोन्ना
मिनिसुलु मिनिना सान्दोँ निला
रोजा खोमसि हरा मेगन सोरखि हायै
हरथौबाय जेरैबो सिरिसै
खोरखिखौ फाङो बियो
-
ससमाखौ आरामै हमना लायो मेगनाव
बिजाबखौ बोद्लाना फरायनो सिगां
बियो-
-
बिजाबनि समायना बिखं महरखौ नायबावो
समायना आलायारननि सावगारि
फुंनि जारां सान ओँखारनाय बुब्लि
गेवलां गेवथां बिबार बारनाय
-
आरामै जिरायो निला
बिजाबखौ मेगन सेराव लायो
सिरि सिरि फरायलाङो--
-
बयजोँबो बाखोनाय जायो
रावबो बाखोनाया लाबा थानो हाया
जोबोद समायना मेगन बिनि
बिखा गुवार गोसो गुदुं
-
जाय जाय सोलोँथाइ मोनो
बियो हमनो हायो बबे मोजांसिन?
एबा बबे सोर गाज्रिसिन
बेबादि सोलोँथाइ बेयो फोरोङो
-
हायना गोनां एबा हायनामुलिबादि
बिनि फोरोँनाया गासैबो गेबेँ
सोरबा नेवसिनो हागौ?
रावबो हाया बिनि रोँमोन गियानखौ
-
बिनि महर मुस्रिया समायना
बिनि गोगो गोसो आरो
बिखा गुवार गोथौ गियाननि थाखाय
बोलो दं बेहा सोलेराव आरो
गावनि मोन्दांथि गोहोखौ लानानै
-
बेयो एसेबां गुरैदि
सना बाना रावखौबो सोँखारिया
बियो थुलुंगा गोनां
समान सोलोँथाइ होनो लुबैयो
आंगोबादि बयखौबो आंगो सानो बियो
-
से दान बारा जालांबायमोन आं
बिनि सेर सेर मागिबायनाया
अन्नाय मोन्नाय आय'
फाग्लिबादि जालांदोँ आं
-
नाथाय हमथायो हमथाथारो
अब्लाबो जौमोना मानिया
आं बिनि खाथियाव थांगौ थांगौ
सान हर बेबादिनो थांदोँमोन
-
बिनि आयदाखौ आं मोजां मोन्दोँ
मानोना आं बिखौ गोसो थोबाय
गोसो थोनाया बेनो नामा?
जायखौ मोजां मोनो
बिनि फंफ्रोमबो रावखौनो गोदै मोनो
-
आं बिखौ हास्थायो
नाथाय जाम्बिनि हास्थायनाय बादि?
बियो सासे फ्रपेसार
आरो आं सासे फरायसा
निला सारनि सासे फरायसा
-
फारागआ बेसेबा गोजौ गाहाय
लाजिनांगौ जाब्लाबो लाजिया आं
मानोना मोजां मोन्नाया बेनो
आंनि बैसोआ नैजिल'मोन अब्ला
जानो हागौ बिनि बैसोआ थामजिबा
-
आरिमु जालिया सेथि खोन्दोआव
बे सारखौ लोगो मोन्दोँ आं
आं जेन'बा खाफाल गोनां
नाथाय आं सानफ्राङो-
-
सुदेम आं निजोरा अब्लाबो
बियोदि गोजोम फैगोन?
बियो जोमै जाब्लाबो
थमेन्नाय आं बिबार जाब्लाबो
बियो बिलिर फैमारगोन?
-
गोरबोआव बेखौल' जायगा होदोँ
बेनो आंनि गासैबो
आं आरो रावखौबो नुवाखै
दैमा-दैसा बिफां-लाइफां
-
बिनो गासैबो आंनि
हा-दै-अर-बार-अख्रां
बिनि सेराव थांब्लानो
सानसे बिखौ नुब्लानो गोजोनो आं
-
आं बिखौ मोजां मोनो
बिखौनो मोजां मोनबाय था होन्ना
सान हरा आंखौ खारदिँबाय थादोँ
समबार मंगलबारमोना जंखायबाय थादोँ
-
हे गसाइ!
आंनि थांखिया जाफुंबाय दिनै
बै रजेया दिनै आंनिसै
बियो दिनै आंनि सिन्दुर
-
दिन्थिनानि सल'खौ जागायनोसै-
गोसो गुदुं निला
समबादि गावनि पेरियटखौ फोजोबदोँ
समा नै रिँगासो जाबायमोन
-
लामायाव लासै लासै थाबायदोँ
नायफा नायफा उनथिँ नायहरदोँ
गोजोन्नाय गैयामोन दिन्थिनाहा
जोमैना निजोरामोन बिनि गोसोआ
रावबो हमनो हानाय नङामोन
-
बियो सोरखौबा लामा नायदोँ
लानो बाबांसिन बेन'टि बेग
फाफ्लियाव नङा आखायावनो लादोँ
रावबो लोगो गैया बिजोँ
-
गावनि मारुटि सुजुखिखौ
लासै लासै सालायबाय निला
लामायाव थाथे थाथे लासै थाबायनाय
दिन्थिनाखौ बेल होदोँ
-
दिन्थिनाखौ निला सिनायगौ
सानफ्रोमबो रायज्लायोआनो लोगो मोनब्ला
माबादि फरायसा दिन्थिनाया
मोजाङैनो निला मिथिगौ
-
लामाखौ हगाराखै बियो
लासैनिफ्राय लासैसिन थाबायदोँ
बेप बेप बेलखौ दामदोँ निलाबो
गले गले बेल दामब्लाबो फेलेँ
-
गाड़िखौ लाखिदोँ आरो
मिज्लौ मिज्लो नायदोँ दिन्थिनाखौ
दिन्थिनायाबो मिजोलौ नायदेरदोँ
सोमोनांथाव बिजिरख' हायै ओँथि

सान्दुं नोँ आंखौ गोलोम होयो
आं नागिरो बिफांनि साया
हाबायाव गोदोना आं मेंग्लियो
सान्दुं नोँ आंखौ गोलोम होयो
गोमोथाव बुहुमाव साना मिनियो
जोँख्लाब जोँख्लिब बायदि मैया
सान्दुं नोँ आंखौ गोलोम होयो
आं नागिरो बिफांनि साया

गिदिँ गिदिँ सारि गिदिँ
सेजौनिबो बांसिन माय बजाखौ जाबनानै
दा आफाया माय मारा होदोँ
-
मानै जारसि मोसौखौ
दोँसे दिरुंजोँ संग्रायनानै
लासै लासै गंसे लावथिजोँ बुनानै
दा आफाया माय मारा होदोँ
-
लावथिजोँ बुस्रिबावदोँ
माय बिदां
सम सम सुखेनजोँ खायखांदोँ
गिदिँ गिदिँ बियो मारा होदोँ।

आफाथालाल' आज्लंनाय
सुमलि थप्टानि जलस्कियाव
हेन्दां बोराया बेवहायनो लेक्सार होदोँ
सोर्गो नोरोकनि उल्टां फाल्थां
-
जावैसो बिमाया हेबदोँ
मालाय जेरबासे गोजौआवसो लेक्सार होयो
नोँहा आरो खामफ्लाय सायाव
खुरै लथा दामै दामै-
राजानि सियार राजायानो जिरायनो हाया
मा बेलाइ?
-
एमावजोँ उन्नाय मेलेम
माखौथो हाया?
सोरनि गोजोन जाबावनो?
आंनो राजा आंनो
दं दं थांमारदोँ हेन्दांआ
-
गामसानि सारामाय
थाफ्लि नुजालायनाय लेन्सा थेबनानै
राजानि सियाराव
जिरायमारदोँ बियो
नाथाय---।

सिरिमोन्ना मोकथांआव
मेगन बिलिरब्लानो नुवा नोँखौ
साया-माया सिमांआबो गोमालाङो
.
गले गले रायज्लायफैयो नोँ
सिमां आरो सिमांआवल' नोङो गेलेफैयो
गोमा लाङो बबेबा नुयै आन्दोआव
.
आं आन्दायो
आं आन्दायो
मेगनाव बेबादिनो---
बहा नोँ गोमोरलाङो
बहा नोँ आनज्रायलाङो
.
नोँ जंखाय फैयो
नोँ गेलेफैयो
नोँ खुदुम फैयो
जिउ बहा नोँ गोमोरलाङो।

I heard the voice of the world,
The color of the ocean I saw by my heart,
The sky very surprise but beautiful,
Life is guilty but its true meaning.
O smile! You stay always on my lips,
Sadness to make happiness and peaceful life,
As the sun, give the light in my journey,
O song! Come on sweetly my mouth.
You order to keep in mind and heart,
Birth I grow up with feet,
Think all the country to travel,
I dream like the river and hope.
O rhythm! My birth is for you,
Soft in your heart beautiful flowers bloom,
Happily flows rivers and wind,
O sun! You give light every my days,
I write a poem to my cutie,
And sing the songs for all mates,
I write the story to my world,
And to live for the childrens.
Like the clouds of heaven and sky,
I hope to see the world,
We born alone, we all die alone,
But I will die like the river.

सुखे नोङो एवथु एवथु खालामो
नंखायनो आं एब्रेनायनिफ्राय एब्रेसिनो
लेब थांगासुरि फानफ्रेनानै थायो
-
लोगो नोङो एवथु एवथु खालामो
आंखौ गोदो उन्दुलांहोयो
हरसेमानि थानाङो आं उन्दुनानैनो
-
हे सुखे नोँखौ साबायखर
गोमानाय अनजालिनि सावगारिखौ
सिमांनि सिमांआव आं मोनफिनबाय
-
नाथाय थरथिँ थरथिँ निहोरासो
आंखौ फोजाखाङो आरो
लोगो खावलाबसेल' एमावनो
नोङो आंजोँ उन्दुफायो
गांसे कम्बल सानैजोँनो सेलायनाङो
-
हाबाब सुखे
नोङो जोबोद अख्रालै सयथिबो
हरावबो उन्दुफायो हरसे
एवथुलाय बिलिरलाय खालामो
-
दाबो सोरांब्लाबो नै नोङो
आंखौनो गारनो हाया
आंखौ गोबायो नोङो
जेराव आं बेयावनो नोङोथार।

1.माय जिगाब होन्ना बुंब्ला
फिथाइ गास्रि जानाय माय बिफांखौ बुजियो
2. माय जिगाबखौ जोँ गोदानै मोनो
गोजां बोथोर समहालागै
3. माय जिगाबखौ जोँ गोबां खामानियाव बाहायनो हागौ
मख'जायो थारुन गायनाय
हायजेँ गायनाय
आलु गायनाय आरो गोबां खामानियाव
5. माय जिगाबखौ जोँ
मायहुं हुंना दोन्नानै
गोबां समसिम मोसौनि थाखाय आदार हिसाबै लाखिनो हागौ
6. गोजां बोथोराव जोँ जिगाबाव दुंबुर उन्दुनो हागौ
7. गोदोनि समाव जिगाबजोँ बुन्था सानानै
थाम्फै अरनायनिफ्राय रैखा मोननो हागौमोन।

जेखाय आरो खबाया बर'फोरनि जरासे आयजेँ
बर'फोरा बेखौ औवाजोँ बानायो
जेखाया खुगा गुवार महरनि
आरो लानजाइ बादि देन्था गोनां
बे देन्थायावनो आखायखौ हमगोन
ना गुरनाय समाव जेखायजोँ लोगोसे
दिरुं दोँसे थाफायो
ना गुरनायाव बर' आयजोफोरा
जेखायजोँ लोगोआव लाफायो खबाय
बिसोर ना गुरनाय समाव
गावसोरनि जानजियाव खाना लायो
आरो जेखायजोँ ना हायखांना मोन्नायखौ
खबायाव सोना लायो
जोङो जेखाय होनना बुंब्ला
खबायनि मुंखौनो थाब गोसो खांफायो
अदेबानि बेयो थारदि
जेखायनि मुंखौल' गोसोखांनानै
खबायखौ गोसो खाङा लाबानो थानो हाया
बर'फोरहा जेसेबां संसार जानायाव
मुंख'नो गोनां आयजेँफोर दं
बैफोरनि गेजेराव जेखाय आरो खबायनि मुंआबो मख' गोनां
आथिखालाव जेखाय खबायजोँ ना गुरनाया
खम जालांबाय
जानो हागौ बिनि जाहोना
1. होँगो-दोँगो नानि अनजिमाया सेंलांनाय
2. दैमा-दैसानि दैया मेसेँआव थाब थाब रानलांनाय
3. गोबां नाखौ खेबसेनो मोन्नो हास्थायना मुलि होनाय
4. इलेकट्रिक मोब्लिबनि गेजेरजोँ ना हमनाय
5. सोदोमस्रि गुस्लायनाय लोगो लोगोनो
बर' हिनजावफोरनि गोरबोआव लाजिनाय फैबाय
मानोना ना गुरग्रा मानसिखौ आथिखालाव गोरिब थाखोआव दोननो लुबैयो

दिनै बर'फोरा हारिमुनि आयजेँ महरै
मोसानाय एबा मेलाफोराव
जेखाय आरो खबायखौ दिन्थियो
मानोना बर'फोरा गावनि असे सोदोमस्रि हारिमु दं।
============

मानसिया साननो रोँगौ
आरो बुजिनोबो रोँगौ मानसिया
जेब्लासिम मानसिया बुजि रोङा
बे समाव बियो थारैनो लाजिया
देलायनो सोलोँनाया मानसिनि मोनसे रोँनाय
देलायनो रोँनाय लोगो लोगो
मानसिनाव मोनसे गियान सोमजियो
अब्लानो बियो लाजियो
लाजिनायानो मानसिनि मोनसे समायनाय
समायनाया मानसिनि मोनसे रोँनाय
बे बाथ्राखौ गोथौयै बुंनो हायोदि
जेसेबां रोङो बिनि आखल आखु गासैबो समायखाङो
लाजिनाया माखासेमानि रोखोमनि जायो
मोनसे नंखायनि थाखाय
आरो मोनसे रोङैनि थाखाय
अदेबानि मानसिया नंगौ नङाखौ लानानैबो
मोनसे गिनाय फैयो
बेयावनो लाजिनायबो थायो
मानसिफोरा गावखौ फुरायै बिजिरनो सोलोङाखै
नंगौ नङा बेखौ थि खालामनो हायैयाव
गुबुननो फोरमायनांगौ जायोब्ला
मानसिनाव लाजिनाया फैयो
नैबे बाथ्राखौबो साननो होयोदि
लाजिनाया मानसिखौ समायना खालामो
आरो बेनो गाज्रिबो नुहोयो
अदेबानि बियो मानसिनो गासै
गुण गियान आरो जाम्बाथिनि सायावनो
सोनारनोबो हागौ नंगुबैआव।

दिनै फुंआवनो सिखारदोँ आं
5 रिँगा 30 मिनिट गोग्लैबायमोन
फुंनि जानायखौ थाबैनो जादोँ
साननि जानायखौबो थाबैनो जादोँ
जोँ आय-आफा आब' आं जयैनो
दिनै आं जेरावबो थांनाय जायाखिसै
सानसे न'आवनो थाबाय
जाया जाया दोँनैसो खन्थाइ लिरनो हादोँ आं दिनै
मोखां लाइसिनि गेजेरजोँ फोसावनाय जादोँ
बेलासियाव जोँना दिनै माय मारा होदोँ
6 रिँगानिफ्राय 7 रिँगासिम आंबो गोसो जाना आफाजोँ मदद होफादोँ
माय मारा होनाय समाव आब'आ गायखेरनि साहा फुदुंना स्राय लोँहोदोँमोन
लोगोआव गुरनै गुरनै बिसुखुद
मोनाबिलिनि जानायखौ थाबैनो जानाय जादोँ
7-30 रिँगायावनो जाखांदोँ आं
ओंख्रिया सबाय बिमासोमोन
ओँखाम जाखांनानै दान्दिसे जिरायबाय
बिजाब फरायनाय जायाखिसै दिनै
दान्दिसेनि उनाव उन्दुनो एमाव गाखोयो आं
मानोना दासान्दि जोबोद गुसुनिफ्राय गुसुसिनथार बोथोरा।

(मायथाइ मोनसेनि उनाव)
दिनैलाय मानि मिनिनाय
मोनजारोङै आबै फावगिनि?
थाफ्लि फेन्दा दामै दामै
मेथाइ रोजाबनाय बिनि
-
(आद्रि आद्रि गन्द्राय बोराया थैबाय
थखन थुना
मायरं बिबाय बिबाय
फावगि बुरैखौ फोथांबाय बियो
-
मोन्नाय मानि
दान बिबाननि
सानफानि
बुरैनो गथाय फैबाय)
-
बोराय
थैदोँना थैदोँ
मायरं फेन्दासे एरदोँ होन्ना
खरलेब मनालिसानि मिनिबावो बियो
थांखु लाजानाय खावलाय
-
सिलिम खुगायाव बावगोमायो
म' म' थांखु आलुवा-
सोमो नाङो दाउखा दन्दा लागोआ
फोर फोर गाव गाबागाव बिरलाङो।
===========

दैज्लांआ अलसिया हालुवाफोरनि थाखाय
जोबोद सुनिबादि बोथोर।
बिसोरो सानो मानो फैलायखो दैज्लां?
एबा माब्ला थांबावोब्रा दैज्लांआ?
गायनो फुनो अलसियाफ्रा बायो।
बिसोरनि बादिब्ला दैज्लांआ
जोबोद दुखु गोनां बोथोर।
अलसियाफ्रा लामा सामा थाबायना
सम खाथायनो मोजां मोनो।
आलो गोजोन उन्दुना सान हर
जायै लोँङैनो बिसोर
रंजाना बोथोर थांहोनो लुबैयो।
नाथाय जायफोर मावनो दांनो अलसिया
जानो लोँनो थाखाय बिसोर अलसिया नङा।
बिसोरो ओरैनोसो मोनजानो
ओरैनोसो मोनलोँनो लुबैयो।
बिसोरनि बादिब्ला जानाय लोँनाय उन्दुनायनि
जेबो देरसिन गैया।
बेखौनो बिथांमोना घोरोम आरो
बेनो सोर्गो होन्नाबो सान्ना लायो।
अलसिया जाबानो मानसिया सिखाव जायो।
बिसोरो मालायनि जिराद बेसाद
मुवाफोरखौ ओरैनो मोनजानो लुबैयो।
बिसोरनि गोसोआ जेब्लाबो
सिखाव लामा फारसे आवगायलाङो।
थगायनाय नासयनाय हुदाया
बिसोर बादि सुबुंनाव सोमजियै नङा।
नाथाय बिसोर बादि मानसिया
थांनानै थादोँब्लाबो जेबो ओँथि गैया।
बिसोर बादि मानसिया
गोथार मोनसेबो मिजिँ थाया।
थायो होन्ना बुंथारोब्लाबो
बिसोरनियाव सोरखौबा थगायनाय एबा नासयनाय।
मिथिस्लाबै सोरनिबा गोसो आरो
मोकथां घोन खावनाय।
माफ्रोम जुनारानो अलसिया नङा,
माफ्रोम जुनारानो माबा मोनसे मिथिँगानि
आरो गियानि मानसिनि नोजोराव लोगो
मददगिरि आरो थार सम्फद।
नाथाय मानसि अलसियानि आखल आखु
हाबा गासैबो बिष गोनांथार।
बिसोरनि रावआ सुबुंनि गोरबोखौ
गुनजेर अरनायबादि नोरजिया खालामो।
बिसोरो गावसोरनि गुबुंले सोलेरनि गेजेरजोँ
मिथिँगाखौ गोरान खालामनो हागौ।
अदेबानि बेखौ बुंजायोदि मासे जुनारा
बेसेबां मोजां बानजायो
अलसिया मानसिया उदायथारा।
बिसोरो गाज्रिसो खालामथारो।
गोसोआनो गाज्रिथारबा बिनि देहायाबो
सम्फद जागोन होन्ना सानजाया।
जायनि गोसो मिजिँ गासैबो गाज्रि,
बिनि देहा सोलेर गुबुन आरो जानो हाथावा।
गोसोआनो गाज्रिब्ला बियो
माब्लाबाबो मोजां हाबा मावनो हाया।
नायै बेदरै जाब्लाबो बिसोरनि
खियानो हासार गैया।
अदेबानि दखरसे हायानो
उल्थायै गोरान जानो हागौ।
दखरसे मानि मोनामनायजोँ
माखासे बिफां बेन्दोँफोरा सहायनो हायैयाव
लरहायगोनबो साननो गोनां जायो।
जेसेबांखि बाथ्रा बुङा
बिसोरनि रावआ मोजां खामानियाव सौहाया।
मानोना मोजां खामानिखौ माबोरै मावनांगौ
बिसोर मोजाङै मिथिया।
बेखौनो बुंनो हायोदि
अलसियानि आखायजोँ बिफांनि फुलिया
गेरेमसा जाया जेसेबांखि हासार होआ।
जेसेबांखि बाथ्रा बुङा बिसोरनि बाथ्राया
मोजांनि थाखाय थुलुंगा होनायनि ओँथि गैया।
हासार गैयै हाजोँ बिसोरनि सोलेर,
थुलुंगा गैयै बाथ्राजोँ बिसोरनि गोरबो।
न' लेरनाय मुथि दानायावबो सोलिथारै
बिरथिँबायनायबादिसो हाद्रि बिसोरो।

लावदुमा जा मिनिदोँ मिनिदोँ
खखाबानो हायाव नांनो नागिरलायनाय
आंबो मिनिफानो गोसो जादोँमोन
नाथाय मिथिया हसिया
मिनिफानायावबो दाय थानो हागौ
बेखायनो सोँबाय आं
- माखौ मिनिखोब्रा?
- नायहरलाय नायहरलाय
- माब्रा माखौ बुंदोँ?
- नायहर हनै आलि सौखानायखौ
बेखि सौखानो हायो?
- नोँ जोबोद जाम्बालै
सावगारिखौ नायनानै मिनिबानो जाया
बिजिरनो रोँनांगौ।
मानोथो मानसि जाथारखो?
बियो आलिखौ सौखायाखैब्रा
आखाय गैयैखायसो खुरदोँ
खर'आ मानदोँ जानो हागौ बिनिया।
- हा हा हा...।

गावदां अखाफोरा
मिनिसुलु नुजाफैबाय,
नायहरदोँ आंखौ
आं अखाफोरखौ।

खोमसि जानायखाय
सांग्रेमा गांफौफोरा बिरदोँ,
नै बिसोरो रंजाथोँ।

नोँ दागाब आयै
आंथ' मोजाङैनो दङ'ना
नोँ माखौ जिँगा सियो?
आं थांना थागोन आयै।

गोथां मिथिँगानि बिलाइ
सिरिदोँ दालाइ मानख्लाय दालाइ
आंनि मेगन सिगांआव।

बे बाराव फाथो दांनायाव
लरग'नि आखाया बौदोँ।
फिसायजोँ हाखु-दाखु
बोरमा दारि नागिरनो थिनजानायाव
गामि फारसे खारलांदोँ बियो सिमालिया
दखना जोगथोँ जोगथोँ।
शहरनि हिनजाव गोदान बेसारा-
बेनि उनाव बेनाव सोँबाय हैदोँ-
" बोरमा दारि दं नामाबाल आब',
बाजै, आयै?"
बायदि सोमोन्दो लायै लायै।
सिबाय मोनमारदिया बियो बोरमा दारिखौ!!
फाथो दांनो समा बारग'लांनायाव
लरग'आ रागा दिउ दिउ।

जायै जायै जानानै रांआनो जोबगुलायनोसैमोन
गुब्लां फंबायनिया,
आदै मेब्लानियाथ' दहायनो जोबबाय।
दंथारोब्लाबो थायबा गथा (खुस्रा)
गरसेल'सो दंसै खोमा।
फैसाया सना गाबनि सनाबादिथार
बेखौबा बाहायनो हालिया बियो।
गाड़ी गाखोनायाव आंसो अनथाव-बाथाव
बाजि रांखौ होथ'नांलायदोँ।
गलाघाटनि मायनाव फोथारखौ गिदिँनानै
आब' लांहेमोननियाव थांगोन जोँ।
बोसोरसे सिगां आब'आ रं नाम्बारजोँ जुलि जाफैदोँ।
गाड़ीथारैनो मोथो मोथो रौता सारिआलिनि
फुरिखौसो गोसोखांफ्लांदोँ गुब्लांआ।
बियो बुंदोँबो-
- आदै मेब्ला,
हाब रौता सारिआलिनि फुरिया गोथावब्रा,
माब्लाबा फैबावथारगोन दे जानो।
बियो आंखौ नायनानै बुंबावो-
- हाब, आदा जोँथ' बुरलुंबुथुरखौ बारबोथारबाय,
बेयोथ' सानजा जाबाय।
सानजानि मानसिफोरखौ सानजारि होनो नङाहोनबा?
माथो फुरियालाय खारदैजोँ संनाय नङा नामाब्रा?
ना खारदैजोँनो संनायमार फालाय??
- खारदैब्रा खारदैसो,
- हाब, बिदिब्ला खारदैजोँ फुरिया गोथाव जायोब्रा।
नसिम गिदिँफिनबा खारदैखौनो
जगसे लांनांगौ जाबायलै।
-----------

नै बेयो बादायथिलि गंसे मुलुग
सेक्सपीयेरनि सायनासालि,
मेलेम-गियान गोहो-बोलो
थुननाय (सोरजि)
बिजिरनायनि जुजिलायनाय,
बेयाव रावबो देरहाया
बेयाव रावबो जेनाबो
नाथाय
जेनो जायफोर बाहागो लाया
दुखु-हांमा मोदैखौ जाय सहाय हाया।
हनै बेयो- बेबो बेबादिनो बादायथिलि
ग्रह'-नख'थ्र अख्रांमा मुलुग,
बेयाव दं गोमोथाव बादिलायनाय
सान-हर आमाय-जुमाय गेलेनाय,
बेयाव दा बाहागो मोनो
सेक्सपीयेरनि आनजाद उथ्रियो जाय...।

बंङाइगामि।बिअ'सि गेट्।
जेरैबो जोँथि जोँथा इलेक्ट्रिकनि खावब्ला-सिब्ला सोरां।
मोनथाम मोखां जानाय लामायाव आं थं गसंना नायहरो शहरनि फारसे-
हेब्रे-माब्रे थांलाय-फैलाय बायदि उन्दै गिदिर मटरनि मेलाखौ।
जाया फाम्रा खन्थाइ लिरनाय हुदाया जाखाबाय आंहा।
खन्थाइखौनो आवरायदोँमोन आं सिरियै-
"नैबे मोनाबिलि सिखोलानि-
जोमै बारलांनाय फैसालियाव,
आं आन्दायदोँ मिथिँगानि बिखायाव;
नायनानै दं सुबुंनि मेलेम बेरसावनायखौ।
बायदि बायदि महर मुस्रि।"
बुदुं-बुदुं स्कुटिखौ लाखियो।
- मा, हार्सिँ नामा आदा?
बाग्दाव गारदोँ आं।
बाग्दावआ मा जानो?
आं जोमै नङाबा लैथोआवसो गोजोमना दंमोन जानांगौ,
आंनो मिथिया।
ब्लद थांफिन गारबाय बेसारा।
सिख्लाय मोजांमोन बियो सोरमोनथाय???
आं.......
गोसोजोँ गोसो सानबाय, गोजोना गोजोना दाबो आं।
आंहाबोथ'............।

बर' थुनलाइनि गोरबोआव एब्रेना जोँ मोनो
गिबिसिन लाइसि 'बिबार' मुंनि मुं गोनां बिजाबखौ।
बेनो बर' हारिनि गेजेराव सिगांसिन ओँखार गोदान लाइसि।
बिजाबआ फिसा महरनि नाथाय बिनि गोरबोआ समायना रमायना।
बिनि लिरबिदांफ्रा जोबोद गोथौ ओँथि गोनां
जोबोद थुलुंगा, बोसोनथि गोनां।
बियो गिबिसिनै साफायनाय महरै ओँखारो इं 1924 मायथायाव।
सुजुगिरिया सतीश चन्द्र बसुमतारी।
रोखायै मिथिनाय जायोदि बिबारआ बै समनि 'बर' सात्र सन्मिलन'नि खुगा लाइसिमोन।
........
.......
बिबार लाइसिआव ओँखारदोँमोन खन्थाइ आरो रायथाय मोन्नैबो।
बिबारआव ओँखारनाय माखासे लिरबिदांफोरनि सानस्रिखौ जोँ मोनो-
: गसाइनि सेराव आर' गाबनाय (मिष्तिट सानस्रि)।
: रमान्टिक एबा गोसोथोनाय (मिथिँगा अनसायनाय)।
: हारि फोजाखांनाय आरो बोसोनथिनाय।

बर'नि गिबिसिन लाइसि 'बिबार' ओँखारनायनि बोसोरसे सिगां इं 1923 मायथायाव रुपनाथ ब्रह्म आरो मदाराम ब्रह्मआ जथायै सुजुना दिहुनदोँमोन।
बिजाबखौ गेदेमा गुरुदेब कालिचरण ब्रह्मनि मुंआव बावनाय जादोँमोन।
खन्थाइ आरो मेथाइजोँ जथायनाय बे 'खन्थाइ-मेथाइ' बिजाबा गांसे फिसा महरनि।
बेयाव साबा खनथाइगिरिनि खनथाइफोर दं।
बिसोर खनथाइगिरिफोरा जाबाय फारियै-
रुपनाथ ब्रह्म, मदाराम ब्रह्म, सतिश चन्द्र बसुमतारी,
सुरेन्द्रनाथ ब्रह्म आरो रथिराम ब्रह्म।
खन्थाइ-मेथाइ बिजाबा फिसा बिजाब थेवबो आबुं बिजाब होनना बुंनो नांगोन।
खनथाइ आरो मेथाइ मोननै बाहागोआव रान्नाय बे बिजाबआव दं दोँगु........
.......
फिसा महरनि ओँखार गिबि बर' बिजाबनि माखासे खनथाइ आरो मेथाइनि सानस्रिफोरा जाबाय-
: गसाइनि अबंलावरिखौ आर'ज गाबनाय।
: बोसोन होनाय एबा हारि फोजाखांनाय।

प्र'जि।बे खन्थाइयारि पेन-नेइम लानाय सासे सुबुं
'जायनि बाथ्रा बुंनाइयानो खन्थाइ जायो' (नीलकमल ब्रह्म बुंनाय),
बिथांआ जाबाय जोँ बयजोँबो सिनायजानाय प्रसेनजित ब्रह्म।
जखानि गोजौ, माजिला देहा।
फुरसबसब।
गन्थं-मोखां गेबेँ।
गोदनाखं गुदिसिम बाग्लायनाय
मोनज्लां जाइला खानाय।
मोखांआव हुमासे दारि।
बेबो मोनग्लांनाय।
मोदोमआव गुफुर पायजामा- पानजाबि।
फाफ्लियाव सम नायै सम एखनबा आर'नाइ,
एखनबा हारसा गामसा।
मेगन थाइनैखौ मोजाङै नोजोर होआब्ला मंग'लियान फोलेरनि
बर' होननानै हमनो गोब्राब।
माबा मोनसे नङा माबा मोनसे बाथ्रा लानानै
जेन' गोर्बो सिं-सिं सावलिनायआव हरदम मुखुब-
निजोम गोमजोर।
नाथाय जाबब्रुं दारिनि गेजेरजोँ जेबोला स्राय मिनियो,
अब्ला बेयो जेन' ग्रौ ग्रौ रज'नाय गांसोबारिआव बारगोमानानै थानाय
साइलाख बारसे आजोला बिबारसो।
मेथेँ- दावथेन जायनि बिबुंसार होनायाव नाइजाबारि गारां रिँखाङो;
जायनि रायज्लायनायाव खन्थाइ सेरेबनि आखाय बेरखाङो।
बिनो जाबाय प्रसेनजित ब्रह्म।
खन्थाइयारि साद गोनां मुङै- 'प्रजि'।
(रायथाइहाला: ब्रजेन्द्र कुमार ब्रह्म निफ्राय)

दाबो आं गोसो खाङो,
मानो गोसो खाङा जानो?
गोसोआवदि फैयो।
बेब-बेब बब-बब खिबु उन उन रिक्सा।
ब्लड थांदोँ फिन गुबुन बेबादिनो बेल दामलांदोँ।
सिख्लाया बनरगावनि, जोबोद समायना, गोसोथोथावथार।
बिजोँ ससे लामायाव लोगो मोनलायनायावनो गोबां रायलायदोँ आं।
मा मादि रायलायदोँ जोँसो मिथिसिगौ।
थेवबो रमान्टिकनि बाथ्राया हले गोसोआव फैफ्लां बायाखै।
कक्राझार सोरकारि फरायसालिमानि एइस एस नैथि बोसोरनि फरायसा।
मुङा निजोरा ब्रह्म मोन।
नाथाय बिनि रावदायलु नंबर लानो हानायमोनब्ला दाहालागै जोँनि बर'लेण्ड मोखां साफागुरियाव
लोगो हमलायनो हालायसिगौमोन खेबथामसो।
जेखियानो जाया उनफ्राव लोगो मोनफ्लांबा
आं बेखौ " आइ लाभ इउ" होन्नासो खारगोन।
थाबाय थाबाय फारलंगासेफ्राम जोँ सानैजोँ रायलायदोँ खालि सिनायथिनि थाखायल'।
उनाव बियो आंखौ बुंबाय-
" नोँ थांदो, माब्लाबा बहाबा नुबा रायलाय।
आं जारौमोनाव थांनोसै-"
" जागोन" होन्ना बियो थांनाय फारसे नायहरो आं।
गोमोथाव ना-मा होन्नांगौ जाखोथाय.....
एफा समायना सिख्लाया थांबावबाय 'जारौ बिउथि फार्लार' आवसो।
थाबाय थाबाय बिदिनो साथाम बोरायसा लोगो मोन्दोँ आं।
स्निजि, स्निजिबा आरो स्निजिद' बैसोनि बोरायसाफोर।
सासेया बुंबाय-
" ओँखाम उखैबायलै बुदां,
सोरनाव जाहैनोब्रा?"
आरो सासे नैथिया बुंबाय-
" मादैमोनाव जाहैनो नामा?
ना बिनानावमोननियाव जाहैनो?"
थामथिया बुंबाय-
" मादैमोनाव जाहैदिनैलै आदा दाबदं-"
थांबाय बिसोर खुसियैनो,
बिसोरनि उन उन आं।
मा फाग्ला मानसिफोर-रा बिसोरलाय!
सानबाय आं गोसोजोँ गोसो।
गावसोरनो एफा बोराय बोराय जाबाय बिसोरहाखि दासिमबो बिमादै दंबावो?
दंङब्ला माबादि जागोनफालाय?
नाथाय दान्दिसे उनाव नुबाय,
बिसोर 'मादै हटेल' आवसो थ्रोब।
इसस.....!! गोमोबाल' आं।

मानसि खिखौ मुगैनायबादि रांखोखौ बुगालिया मुगैथारो।
जाहोना जाबाय रांखोनि महरा साबा,
आरो सासे नंखाय बैनानै जाग्रा दाहोनाबावसो।
बुगालिया बिउथि, जोबोद बिउथि।
भुटाननि नांदेरनायबादि गुफुर।
आखल आखुखौ बुङाब्लाबो जागोन।
गोसोथोनायाबो गैया नङा दंखायो बेहा।
सोरबा माहाजोननि फिसाफोरबो जानो हागौ।
नाथाय गोजाननिफ्रायनो रांखोखौ नुब्ला नायनो हाया बुगालिया।
थेवबो सान्नांगौआ बेसो जाबाय-
सानसेखालि बुगालिया रावबो गैयै समाव (हरनि सममोन) रांखोखौ बुंबाय-
" आदा आं जोबोद गिदोँ!
दामानि आर्मिफोर फैगासिनोथार।
आं दिनै नोँजोँसो उन्दुगोन।"
उन्दुमारदोँबो नंखाय नङा दर फांथेलायनानै।

सिख्लाया आंखौ जोबोद गोसो थोयो,
नाथाय आंबो बिखौ बांसिन गोसो थोयो।
आं जेसेबां बिनो फोरमायना लानो सानो,
बिबो एसेबांनो फोरमायना लानो सानो।
नाथाय हाया हाया रावबो फोरमायलायनो हाया।
जेन'बा बियो बबि आं बबा।
नाथाय मोजां मोन्नाया मोनसे जिराद,
बियो सानसे बेरफ्रुगोनखि बेरफ्रुगोन।
थेवबो बेरफ्रुनो बा सेकेण्ड सम थाबावनायावनो आं सानसेखालि अनजालिनि खाथिसिम थांबाय।
थोर थोर मोदोम मावदोँ,
गन्थंआ बारा बारा मेवसिन्दोँ।
बे समाव रावबो गैयामोन,
दङ होनोब्ला बबेबा बिफां दालाइयाव दाउसिनफोर दंमोन जानो हागौ।
नायहरखोमादोँ एबा नायहराखै मिथिस'वा।
लासै लासै आं अनजालिनि खाथिसिम सहैबाय।
आं जोबोद गिबायबो माब्रै बुंगोन।
गोसोनि बाथ्रा,
गोरबो सिंथारनि बाथ्रा।
जेखियानो जाया जुथानि लेसखौ गोरायै खाखादोँ।
सोबानोबो हागौ,
माथो थिक सिख्लाफोरजोँ?
बेखायनो हुसियार जाखादोँ आं।
"आइ लाभ इउ" बुंना खारगासिनो खारबाय आं।
नाथाय अनजालिया आंखौ होसोमारबायसो।
खारै खारै राहा मोन्थारै हार्सानि न'आव थ्रोब।
दरजा ख्रे।
अनजालिया दरखौ नारदोँ आरो नारदोँ।
खोरखि खनायाव थाखोमाना थादोँमोन आं।
खोमा होनानै मा मा बुङो खोनासंनि सान्ना खोमा बिसिनानै।
खेबसे अनजालिया खोरखियाव दां बुफैबाय,
आं ओरैबादि बाग्दावबायदि
"आययै.........."
दुबफुं सिखारबा थारैनो आयआ आंखौ खोरखि बुना फोजामारदोँसो।
मानोना समा फुंनि 7-30 रिँगा जाबायमोनानो।
बंङाइगामिनि लजिँ फारसे आगान होनो समा जाबाय।
9 रिँगायाव कलेजआवबो सेथि साननि फेरियडआ जागायगोन, सहैथारनांगौ।

उन्दै समनिफ्रायनो आंहा सासे मोजां गेलेगिरि जानायनि थांखि आरो मिजिँ दंमोन।
बे मिजिँ खानाय गोरबोनि दुमायनाय मोनसे जिरादआ आंखौ उसु-खुथु खालामबाय थायोमोन।
आं सम सम बेबादिनो गामिनि लोगोफोरजोँ बायदि रोखोमनि गेलेनाय आयदाखौनो गेलेयोमोन।
नाथाय आं जेरावबो रोँद्रायै नङा।
मोनफ्रोम गेलेनाय आयदाखौनो आं मोजांबो मोननो हायोमोन।
नाथाय थेवबो आं बांसिन मोजां मोन्नाय गेलेनाया केरेत् (सौनाय, जोनाय, बारनाय बायदि) मोन।
उन्दै समनिफ्रायनो आं बे रोखोम गेलेनायखौ टि. भि. सेनेमा (सावथुन) फोराव सम सम नायनो खाबु मोन्दोँमोन।
बे इसेल' खाबुआनो आंखौ आरोबाव बांसिन मोजां मोन्नो गोसोखौ होबावदोँमोन।
आंहा बारा बारा सासे मार्टियेल आर्टिस (Martial Artist) गेलेगिरि जानो गोसो थौहाबसिनदोँमोन।
बेबादिनो आं सानसेखालि आमटेकानि फुर्णिमा फोथाराव गेलेग्रा Wushu मुंनि गेलेनायाव गेलेजेन्नायसै।
आरो उनाव आं 2 अक्ट 2010 मायथाइनि नबेम्बर (2/11/2010) आव बेँटलाव थानाय Wushu Assiociation of Chirang आव गावनि माखासे लोगोमफोरजोँ मुं थिसन्नायसै।
नाथाय एसेबां गोसो थासेयावबो आं फुरायै बे गेलेनायखौ गेलेनो मोनाखिसै।
इं 2012 मायथाइआव गोजौ फरायसालिखौ उथ्रिनाय लोगो लोगो बङांइगामियाव लजिँ थानानै फरायनांनायाव नागारनो गोनां जाबाय।
लोगो लोगो आं सान्नायसै आंनि मोनसे मिजिँआनो बायबाय।
मानोना आं फरायनायखौबो खम खालामनो हाया।

हारां हाथां गोरान हाजोनि
हायेन फारसे बोहैयो दैसा
अनसुला गोरबो सिंनि
हारां हाथां गोरान हाजोनि
बेसेबा गोजोन फुंखानि
बिफांनि रोदा सा सा
जिउ मोनखाङो बिफां लाइफांनि
थांनानै थायो जिउ जिबि
बिनि गेजेर गेजेर बार
सुदेम गोगो गोथार सोमखोर

अनजालु अनजालि फरायसाफोर
दिनै आं नोँसोरनो सोमो गोनां दोँसे बानायलु सल' खिन्थागोन।
सल'आ ओरै-
मोनसे गामियाव सानै सिखोलाफोर दंमोन।
बिसोरनि मुङा बैसागि आरो सासेनिया सनास्रि।
सानैबो ओरैबादि आखाफाखामोनदि रावबो फेजेननो हाया बुंजाबायनायमोन बयजोँबो।
दानाय-लुनाय, गायनाय-फुनाय,
रायज्लायनाय-फरायनाय बिसोर सानैबादि
सिख्ला जेरावबो नागिरना मोन्नो थाङामोन।
बै सानै सिख्लाया ओरैबादि समायनामोनबोदि
रावबो सेँग्राफ्रा हास्थाया लासे नुब्लानो थानो हायामोन।
सानसेखालिनि बाथ्रा-
बै सानै सिख्लानि गेजेरावबो दानिया सासे नङा सासेथ' सेथियाव थाथारनांगोन।
नाथाय सानैबो नैथियाव थानो गोसो गैया।
बेबादिनो जेरावबो जेरैबो मोनफ्रोम बिथिँआवनो बादायलायनाय जानायसै।
थेवबो सानैबो समान समान।
फेजेन लायनो हायै सानैहाबो जेन्नाय गैया।
सासे ओरैबादि मिनिनो रोँगौदि
बेबादि दासिमबो मिनिनो गोरोँ मोदाय
उजियाखै होन्नानैनो बयबो सानोमोन।
बिनि मुङा बैसागि।
जै बे मिनिबाय बयबो सेंग्रा मा बोराय
दंनायमानि हौवाफ्रानो फाग्ला जाजोबनो नागिरोमोन।
थफिँहां थफिहां बिबारफोरानो समायना गेवलांजोबथारोमोन।
सानसेखालि सानैनि गेजेराव मिनिनायनि बादायलायनाय जाबाय।
बेयाव गोरलैयैनो बैसागिया देरहाबाय।
बेयो ओरैबादि देरगाबायदि सनास्रिया थानो हायाखिसै।
सान हर गाबबाय थाबाय।
नाथाय बेहा अब्लाबो जेन्नाय गैया।
मोजां सान नायना सानसेखालि
लाजिनायनि बादायलायनाय जानायसै।
बेयाव ओरैबादि लाजिनायनि फाव खालामबायदि
सनास्रिया थारैनो देरहामारबाय।
बिनि रोँगौ आखुखौ बयबो बाखोनायबाय।
बियो देरहाबाय थेवबो बैसागियाबो जेनाखै।
मानोना बियो मिनिनायाव देरहाखांबायमोन।
दा सानैबो समान समान।
नाथाय सनास्रिया सिगांआव जेनग्रोखाबायमोन
बे बाथ्राखौ लानानै बैसागिया सनास्रिनि सायाव सोँखारिबाय।
नाथाय बेबादि नङा सनास्रिया बुंबाय-
लाजिनायनि बादायलायनाया जाग्रोबा आंनो देरहाग्रोगौमोन सिगां।
नांज्लाय नांज्लाय उनथाराव सानैनि गेजेराव गिदिर दावहायानो जामारबाय।
ओरैबादि बार बारनायसै,
सार-अन्थाइ दैबाना बायदि बुंफबनाय।
नाथाय बेल' नङा जोबोद खोमसि,
जोबोद खोमसिथार जानायसै।
रावबो सहायनो हायै बे दावहाखौ
नायना थानो हायैनि बयबो रायजोफ्रा
गाव गावनि न'आव एब्रेजोबनायसै।
बैसागि आरो सनास्रि सानैबो जेना जेना।
जोबथारनायाव सासेनि उनाव सासेया
सोर्गोआव थांजोबनायसै।
सोर सिगां थांखो,
सोर उनावसो थांखो,
रावबो रायजोफ्रानो मिथिनो मोनाखिसै।
नङाब्ला जोँ मिथिगौमोन-
जायनो सिगां थांदोँ बियो सेथि
एबा जायनो उनावसो थांदोँ बेनो सेथि।
अदेबानि सासे नङा सासेथ'
सेथि जाखाथारगोन नङा होनबा??

मानसिया ना बेदर जायो।
बिसोरो बुजिनो गोरोँ, साननो बिजिरनो गोरोँ।
मालायनि जिउ फोजोबना दानख्लाब हाख्लाब सावनानै एबा रुनानै।
आयनि बिमाया आयखौ फोरोँदोँ,
आयनि बिफायानो आयखौ फोरोँदोँ।
बोराय बुरैहाबो दाय दं।
आयआ आंखौ फोरोँदोँ।
जिबनि मोदोम नानि मोदोम दानख्लाब हाख्लाब सावजानो- रुजानो आरो एवजानो।
आयआ जायखौ मोजां मोन्दोँ, आंबो बेखौनो।
आयआ जायखौ फोरोँदोँ आंबो बेखौनो सोलोँदोँ।
नाथाय आयआनो गासैबो नङा,
थांना थासान्दिल'सो आय।
बेनि उनाव रुंसारि आय?
सोर दंबावो रुंसारिनि आरोबाव?
आं देरबाय बुजिबायबो,
इयुनखौ आं मिथिबायबो थारैनो।
ना बेदरजोँ आङो थांना थायाखै।
नाथाय थांना थादोँ जायखिजाया गुबुन साबसिन आदारजोँ।
आं सानो आरो फोथायोबो।
जिबनि दरसे बेदरजोँ आंनि जिउआ रुजुजाया।
रुजुजायो होनोब्ला आंनि गुफुं आबुं सोलेर मोनसेजोँसो।
दा आं ना बेदर जालिया।
फाप जायो होननाबो आं सानाखै।
सान्दोँ आं- जायनि दाहार लानानै बे दाहारखौ सुखुफिन्नो हायाब्ला?
एबा दरसे बेदर जानायनि उनाव गावनि गासै गुफुं सोलेरखौनो गथायना होनो हायाब्ला?
गावनिखौ सना साननानै गुबुननिखौ नंथारै माबा मोनसे सान्नायानो जागोन।
आं दिनै समायलानोसो आवगायदोँ 'जायखौ आङो सोरजिनो हाया बेखौ आं खहा खालामा'।
अदेबानि 'जायनि जिउ आं होनो हाया बेनि थै आरो जिउखौ आंनो नाङा'।

आं नुनायमानि बुहुम मिथिँगानि गासैखौबो मोजां मोनबाय।
बुहुम मिथिँगानि बिफां-लाइफां, जिबि-जुनार, दाउसिन-दाउला,
दैमा-दैसा, हाजो-हायेन,
हारि-माहारि सुबुं गासैखौबो।
मोजां मोनबाय दंनायमानि नुनायमानि सान-अखाफोर-ख्रां,
हार्थखि-अलंबार, जोमै अखा सान्दुं।
मोजां मोनबाय मानसिनि राव फाव महर मुस्रि।
मोजां मोनबाय जिब जुनारनि गाबनाय रोजाबनाय गासैखौबो।
नाथाय अब्लाबो जायखौ आं दासिमबो नुवाखै।
जायखौ खोनादोँ मिथिदोँ बैयो सोर बेलाइ?
सोर बेलाइ माबादि जाखो?
एसेबां नुबाय बुहुमाव गोजोनबाय रंजाबायबो।
थेवबो सोरखौबा दाबो नुवाखै।
दा आं नुनायखौ नङा नुयैखौसो।
गोसो जादोँ नायनो, गोसो जादोँ बिजोँ मोखांजोँ मोखां रायज्लायनो।
जायनि बाथ्रा खोनाब्लानो गोजोन्नाय मोनो।
जायनि माया महिमा गोमो नाङो।
सोर बेलाइ?
बेसे अनसुला बेयो?
गोसो जायो आं बिनि आथिँआव।

आफाया जौ लोङो।
ओरैबादि लोङोदि थारैनो जोबोद गोदै गोथाव।
उन्दै समनिफ्रायनो आंनो दौआब्लाबो लुबैथि लुबैथि आंनि मेगन सिगाङाव लोँबोदोँमोन।
आंबो नायै नुयैनो लुबैनाया बांनायनिफ्राय बांबोदोँमोन।
सानसेखालि आं लोँबाय।
ओरैबादि लोँबाय आंबो ग्रद ग्रद ग्रद।
आंनि खर'आ गिदिँदोँमोन।
आं थावनाय मोनाखै एसेबां गोदैबो मोनाखै।
नाथाय ओरैबादि खुसि मोनबायदि-
आंनि गोसो, आंनि सोलेर गासैबो रंजाबाय मोसाबायबो।
आंनि खुगाजोँ मेथाइ ओँखारबोबाय।
मोसायै मोसायै आं मेंग्लिबाय।
लोरला जाबाय, आरो आंनि खर'आ गिलिरसिन जाबाय।
आं आरो सहायनो हालिया जानाय लोँनाय आं गोबाफिनबाय।
आंनाव दुखुआ फैबाय मानोना आं लोरबां जाबाय।
नंखायसो जौनि निसाया खहा खालामग्रा मेलेमनि सानस्रिखौ।
मेलेमनि एम्फौ फिसिग्रा जौ।
जौआ गोजौ नङा, बेयो नंगुबै सिंजौ।
फाथाल फुरिनि लामा दिन्थिग्रा सिंजौ राजा।
आंनि थाखाय नङा, नाथाय सोरनि थाखाय दाबो गोदै गोथाव जौआ?
थारैनो बिसोर मेलेम उनग्रा नङा,
मेलेमनि एम्फौ फिसिग्रा गोसोनि नेहाथ बान्दा।
जौआ जोँनि नङा, असुरफोरनिसो जौ।

गोदोनि बोखावै गवालफारा दानि सिरां जिल्ला सिलिकागुरियाव आयनि जोनोम जादोँमोन।
1972 मायथाइयाव बुंथिनाय जादोँ (भट होनाय बैसोजोँ गोरोबो)।
बिफानि मुंङा (आबौ) लक'नाथ बसुमतारी आरो बिमानि मुंङा (आबै) समबारि बसुमतारी।
गोदोनि सिख्ला समनि गांनैसो सावगारिनिफ्राय साननो हायो
बियो (आयआ) महर गोनां नायनो समायना सिख्लामोन (मादै-आयंमोनाबो सम सम रायखाङो सिख्ला समनि बाथ्रा बे रावैनो)।
खामानि, हाबा हुखा गोरोँ जाथ बर' सिख्लाथारमोन।
मानसिया जोनोम जायो,
खेबसे जुलि जायो,
जिउ थाजासे संसार जायो।
संसारनि मावनां हाबा मावो।
आयफानिफ्राय मिथिनाय जायो बिसोर 1989 (सो) मायथाइयाव जुलि जादोँमोन।
आफानि मुंआ लहेन: लहेन ब्रह्म।
बे बोसोरनि (जून,जुलाई,आगष्टसिम) सोदांनाय
लेगेसी डाटानिफ्राय मिथिनाय जायो आयनि बिफा लकनाथ।
जायखौ आं आबौ जायो।
बिनि बिफा बिष्टि।
जायखौ आं आजौ जायो।
आयनि थाखाय आबौ सोमोन्दो।
1972 मायथाइनि उन उन आमटेकायाव (दा आं-जोँ जेराव दं) गोदान हादान खुलिदोँमोन।
आफामोनहा गामि फसंफैयो सालगुरि।
आयनिया जमनागुरियाव।
बेनि उनावनो आयफानि जुलिया जादोँ।
दासिम आबौ लक'नाथआ दं।
बिनि बैसोआ दा स्नि-जिस्नि सो फ्राम जाबाय।
दाबो थखन थुवाखै,
लामा गोजान थाबायनो हानायनि अनगायैबो
साइकेल सालायनो हाबावो।
आबै समबारिया थैबाय।
2005-06 मायथाइनि बबेबा दानआव।
आबौनि न'आ आमायजोँ लोगोसे दासान्दि सान्तिफुराव।

जोहोलाव नीलेस्वर ब्रह्म।
बर' मेथाइ जारिमिनाव बिनि मुंङा जेब्लाबो सिगां।
नाथाय बियो सासे मेथाइगिरिल' नङामोन।
थुनलाइ, राजखान्थि गुबुन गुबुन बिथिँआव बिनि आखाय दं।
नाथाय आं मेथाइगिरि बादिल' गोसोखांनो नागिरदोँ।
बे दिनै आं बे जोहोलावखौ गोसोखांदोँ।
जाय जोहोलाव मुं मोननाय बर'नि जारिमिनाव।
नीलु होनना बर' फरायसाफोर आरो बर' लेखा गोरोँ जारिमिन फरायग्राफ्रा मिथिगौ।
1927 मायथाइ (11पेब्रुवारी) याव जोनोम मोननाय
नीलु आरो आंनि गेजेराव बेसेबा फाराग दं।
आं उन्दै, नाथाय नीलुआ?
बियो नैजि जौथाइनि सासे गेदेमा।
मेथाइ मुलुगाव बर' हारिखौ गिबिसिन फोजाखांग्रा बुंनांगोन।
बियो बर'नि खुगा मेथाइ,
सल', सलबाथाफोरखौ बुथुमना मेथाइ रोजाबदोँमोन।
बियो गोसो गोथारै बर' हारिखौ सिबिदोँमोन,
बर' हारिखौ जौगानाय लामाजोँ दैबायनो नाजाथारदोँमोन।
जारिमिना बुङो-
बियो बर'फोरनि गेजेराव सिगांसिनथार मेथाइ रोजाबगिरि।
उन्दैनिफ्रायनो मेथाइ रोजाबनो मोजां मोनग्रा
जोहोलाव नीलुआ दुलाराय मुलुगावनो बर'नि मेथाइखौ रेडिअ'नि गेजेरजोँ रोजाबना फोसावग्रोदोँमोन।
बियो बै समनि बर'नि अनसाइ आफादनि मददजोँ
1952 मायथाइयाव गिबिसिन मेथाइनि केसेत दिहुनदोँमोन।
1954 मायथाइयाव बियो लक्ष्णौ भातकान्देयाव  गोजौ थाखोनि (खाम, जथा, सेर्जानि गुबुन) दामनाय-देनाय सोलोँनो थांदोँमोन।
1984 मायथाइयाव जानाय दुलाराइ बर' थुनलाइ आफादनि जथुम्मायाव (गसाइगाव) बियो हारिमु आयदानि दैदेनगिरि बादि गावनि गियान मेँरोङै मावगोरोँ दिन्थिलांदोँमोन।
बयखौबो दाख्राय दाख्राय खावलायनानै गावनि सिमांआ जाफुंनो लामा लानाय समावनो बियो अब'थिरा जिउ गोमानायसै।
1 जानुवारी 1986 मायथाइयाव बियो मुलुग संसारखौ नागारलाङो।
नाथाय थालांबाय जारिमिन, मेथाइ देँखो गारां बिनि।
अराय थुलुंगागोनां बिनि सोरजि रोजाबथिनाय रैसुमै देँखो।

गिदिर गोलाव लोदो लोदो गुफुं।
नायनो समायना खोमा फायला ला
गारां गिदिर सोँब्ला गामि गंसे गोमफबलायथारो।
नै बोसोर सिगां थेफा बिजामादैया भुटाननिफ्राय लाना फैदोँमोन।
दमासि मागोनि समाव बोसोर गोदान (इंराजि)नि मुंङै
ना मा मानि जाखोथाय-
गिप बायदि होलांनायानोसै।
सिगांआव थेफानि फिसालाया सैमाखौ खाना दोनोमोन।
सोरबाफोर खावना लांनो हागौ होननानै।
दा गिदिर जानायखाय खालिया।
सैमानि मुंआ थनि
आगोलावनो थेफानि बिजामादैया मुंखौ दोनखा लांदोँ।
दा गामियाव बे मुंआनो मुंदांखा
गुबुन आरो नामा गैलिया।
थेफानि बिसि बिखंस्रि।
बिखंस्रिनि खिबु खिबु जेब्लाबो सैमायाबो।
फिसालाया सहराव फरायहैबाय।
दा बुंनो थाङोब्ला थेफाहा न'आव बिसि फिसाय सानैल'सो जायो।
एखमबा बाजाराव एबा हाथायाव थांब्ला
रावबो गैया जायो।
बे समाव सैमाया बिगोमाजोँ थांफानो गाबलायथारो।
नाथाय मा जानो?
हाथायाव थांफाब्ला लामायाव
दैखरगुरिनि सेँग्राफोरखौ बेदर जानो लाखिगोनसो सानो।
बेखायनो लांफाया।
अन्थाइ बन्थफोरजोँ खुइख्रुबबायनानै न' फारसे होहरफिनो।
सैमाया माब्लाबाबो हार्सिँङै थानो बायो।
थेफामोननि न'सुंसे सिँगिनि मोननि न'आ।
बेयावनो थांना थाहैयो सैमा थनियाबो।
लाजिया फांजिया बेयावनो ओँखामबो जायो
मेथाइबो जायो।
दा बेसेबा दानै दान सानै सान बारलांनायाव
थनिनि न'आ गंनै जाबाय।
बिखंस्रिनावबो थायो सिँगिनि मोननियावबो थायो।
थारमाने बेनाव जालाय बेनाव जालाय।
हाथायनिफ्राय बिगोमाया फैयोब्ला
लानजाय फायखन फायखन
मेथाइ बिनोबो लाजिथारा थनिया।
सिबाय मोनजायो गंनै न'आवनो।
बेखायनो लोदो लोदो जालायथारबाय।
दिनै बेसेबा स्रां अखाफोरनि सोरांजोँ।
डाइन रिँगा जाबाय
मोनाबिलिनि जानाय सम।
ओँखामखौ बिखंस्रिमोनहानिया सिगांसिन जायो।
उन्दुनावबो सिगांसिन उन्दुयो।
सिँगिनि मोनहानिया बांसिन सानफ्रोमबो बेदर जाग्राखाय
उनसिन उन्दुग्रा जाबाय।
बिखंस्रिया ओँखाम जाखांनानै दर्खँआव जमबाय थानाय
थनिनोबो ओँखाम होबाय।
सिबायाबो बाबांसिन जाबाय।
गोथाव नङा नामाथाय सोलाबायल'।
एसेयावनो सिँगिनिया गाबज्रिहरबाय-
थनि-थनि-थनि।
खोनानाय लोगो लोगो थनियाबो
ब्लद खारगार लांबाय।
ओरै बिखंस्रिया होनाय ओँखाम दालि ओँख्रि
लगायनाया लुन्दुन थालांबाय।
दिउ दिउ रागा जोँगारबाय बिखंस्रिया
सिँगिनिनि सायाव।
बेदर हारा, अमानि खोमोन ब्रेव ब्रेव गोनां बिगुर,
जानो हायै मेजेम थनिनो ज्राव गारना होबाय सिँगिनिया।
थनियाबो बेखौनो जानानै स्लिम खालामबाय।
उदै गेन्द्रा द्रा जालायबा
सिलायावनो दान्दिसे जिरायना थाबाय।
जाखां लोँखां सिँगिनियाबो
खामसालियाव थनिनि थाखाय बष्टा बना होबाय।
दा उन्दुथोँसै होननानै।
गावस्रा दर फांथेना दो उन्दुलांबाय।
थनियाबो ब्लदसो बिगोमानि फारसे थांबाय।

दद्रेद्रे मिनि लाजिसुलुलु
ओँखाम थफ्ला रुजुनबोला
समायनासिन नुबावो फ्रि फ्रि अखायाव।
रांखो दाहोनाया नायगोमोयो
बेसे समायना देमबारिया!
खाफालाव दंना गैया आंहा??
हे गसाइ! हे गसाइ!
मोसौ हग'बासो सुथि मोनो
मोसौ आथिँआव नांगोल फाला अख्लाबो
बिखा खायसिब देमबारिया।
बेसे मिनिथाव जादोँ सल'आ
हाब्रु गदा गदि मोसौ आथिँआव
रांखो दाहोनानि बुदिया
मा इसे दुखु गोनां फालाय!
मोसौनि थै रना रनि आथिँआव
मलम फोननाया-
देमबारिया मिनियोसो
बहाबा दुखुखौ दोनहरना
नाथाय रागा खरा बुदांआ
रांखोनि सायाव मा बिसार?
गबावगोन दाबि रांखो दाहोनाया??

साना फापर बल्दार फेयास
नेमखि किजुर लबं मिष्टि
गोदै गोथाव रसगल्ला
मा जानोलै नोँलाइ?
बायबानो मोनो गलायाव
नोगोद रां खरसानि।
फिथा सिथाव सौराय
एन्थाब सौराय लारु बान्दारु
बहा मोनबावनोलै लुबैमालाय??
बहा थांखोलै ओइ आबै
बहा थांखोलै-
फिथा सिथाव सोर जाहोनो
आदै-मादै मोनाबो माहाजोन जाबायनो!
बहा थांखोलै ओइ आबै
बहा थांखोलै-
आय-आफाहाबो उवाल गायहेन गैलानो!
दाउखि आबैया बुङो-
गैले फिसौ गैले
नोमबौ संफ्ला बोराया
गोदोनो नोँ गैयैयावनो
थुब्ला थुब्लि रुवाजोँ सिनखावजोब्बाय।
नाथाय मानो आबै??
सम मोनोब्ला खिन्थागोन फिसौ।

बुरखायै बुरखायै बेसेबा गोबाव,
बेसेबा खष्टनि उनावसो फुथुनो हाबाय रमालिया फिसालाखौ।
माबादि मानसि जागोन बेखौबो मिजिँ खालामनोनो हालिया रमालिया।
जोबोद बायगर जाथारबाय गथ'आ।
दिनै गिबि खेबनि थाखाय बांङाइगामियाव फिसालाखौ बानानै
गामिनि इंगिनिजोँ मायाफुरियाव बेरायहैदोँमोन।
गथ'खौ लांफाना जिबायदि खष्ट मोनबाय
गावसो  मिथिसिगौ।
हाया हायाब्लाबो बाजौ रांनि माबा बाबि जिराद बायना होथारनांबाय।
गथ'आनो माबादि जागोनथाय-
सोरनि लाखो?
ना बिबै बिबौफ्रासो फोरोँखो सानबाबो सानस' हालिया!
गथ'नि मोखांआव मोनसेबो
गोदान जिराद दिन्थि जाया
बेयो ओरैबादि गथ'दि बेनि गोजोन्नायाबो दान्दिसेल'।
बेनो रां खरसा खालामना
माबा गेलेग्रा बुष्टफोर बायना होनायाबो नंखायसो जायो।
उन्दैनिफ्रायनो गारि गाखोफेरनो मोनै गथ'-
अथ'आव गाखोना गोजोन्नाय मोनबाय
नाथाय आरोबाव बियो गावनो सालायनो बुंबाय।
बहा सालायनो हानो
थोजासे बिमाया बुरखाय नांबाय थगाय थसि।
लामायाव पुलिसखौ सिलाय लानाय नुबाय
सिलायखौ दांनायनो बुंबाय।
बिमाया बुरखायनो थोबाय।
एसे खाथियावनो सासे बांगाल बोरायखौ
बिरि सोबनाय नुबाय,
सोँनायाव बिमाया बुंबाय बिरि सोबदोँ।
गावबो सोबनायनो बिबाय।
फाग्ला स्टेन खाथियाव रेलगारिखौ नुबाय।
मा बेलाइ होन्नानै सोँनायाव
बिमाया गारि गोलाव होन्ना बुंबाय।
गथ'आ गाखोनायनो बोदोर जाबाय।
नाथाय मोनसे गलायाव थांफ्रांना
बाजौ रांसो खरसा खालामनो
गोनां जाथारबाय रमालिया।

गोदो खोनायोमोन
मिना दैमारिनि गारांआव जावले जावले
- सानसेदि सम सफैगोन
आं होनबा गोमोरलांफिनगोन-
निलुआ हुरा हुरा रोजाबोमोन
- बिबारि मोनबारि बिबोनां गदाय
.....
फै मोसानि बयबो सारि सारि-
सानजारां आयंआबो सानसेखालि
अल-इन्डीया-रेडिअ सेन्टाराव
मेथाइ दैथारहरदोँमोननो-
दाउ खौऔ दीपाली बरटाकुरा
रोजाबदोँमोन-
साल सिरिनि गायहेनजोँ
दुमबुर खावसानि उवालजोँ
सौलायबाय हनै आनावमोनहा।
निलुनि सेर सेर बिग्राय दायाबो रोजाबदोँ
- दाया आंनि नङा रजे
आंनि नङा.....
गोदो जानजि सेरे सेरे बर' सिख्लाफ्रा
बिसन फुयोमोन
गंस्रो गंस्रो मायखौ गायोमोन।
दानिया- बुंथाव जालिया.....
दाहोनाफ्रानो गैलिया जेराव
गोदान दाहोनाफ्रा बेन्दोँ लाना
हाब्रु नांसि नांसि आलि खोनाय।
सोनाबनि बार बारबोदोँ
अब्लाबो साफ्रे सुफ्रे मडेला सोमोनांसिन
बहाबा खोनादोँमोन आं-
सेक्सि सेक्सि नोँनि सोलेर
.....
खालाव खासाव सना-
बेयो मा मेथाइ?
बेयो मा मुगा??
दानि सेंग्रा सिख्लाफोरा बिजिरनो हाया
थार्ला बुङो जाबा दाजा
बादायलायनायनि मुगा; जा हायो।