1
सानजानि सुदेम बारा
सोनाबहा बिरलांदोँ-
दाउसिन दाउला बिफांआव मोसादोँ
मिनिसुलु जोँनि गोसोजोँ
दे लोगो जोँबो रंजानि-
दैमाखौ सानस्रिनानै
हरै जोँबो थांखियाव थांनि-

जोँ गोसोथोनो सोलोँजेन्दोँमोन
रावना रावनिनि सल'बाथानिफ्राय
थावनिया जोमै गेजेराव
खुरखाहां मारुंनि सेराव
.
मानोना मिथिगौ जोँ
हारिनि बाथ्राखौ
बर' हारिनि
बेखायनो जोँ सिरि सिरि-
रावनोबो दाखिन्था सना
.
हारिनि खोथाखौ मा बुंबावनो?
गासैबो फैमाल
नाजाग्राया नाजागासिनो थेवबो
जेथो सिफाय सिफाय
.
अफ्रि लखब्बाय
दाबखा दुमसु बुख्रुब्बाय
थेवबो-
गुरुदेबा जौखौ फोजोबनो हायाखिसै!
.
हायेननि सुफिनजोँ
दै बाज्रुमदोँमोन
थेग्दाव बेग्दाव
खाम जथानि देँखोजोँ
.
निलुआबो बुंलांदोँमोन-
"हनै सानजाहा सोरां बोगौ"
थगायनाय बादिसो जाबाय
.
चरणआबो बुंदोँ-
"अनारु थु सिगां"
उन जाखो ना सिगां जाखो
बुंनो हालिया जोँ
.
बिग्रायारि जानानै
बर'फाया बिग्रायलांबाय
"आं बिग्रायारि" होन्नानै
नारा नाथा जुजिलांबाय
.
दिमाफुर बायनायनि दुखुआव
पद्मस्रि ब्रह्मआबो
बेसेबा गाबलांबाय
सोनाबनि बारखौ आसि थुनानैबो
.
गुणेस्वर मोसाहारि खोनानाय
"हा फिसा हौवा दाउ"आ
दाबो गाबदोँ
दाबो खोनादोँ जोँ बयबो
.
मा बुंबावनो सना?
बिक्रमा नुलांबाय
"वार्ड नाम्बार फाइभ"
सिमांबो दंमोन निलकमलहा-
.
इन्दी इम्फौनि
मुलुग मुंदांखा इन्दाष्ट्री बानायनो
बहा जाबावनोसै?
बर'नि राजखान्थियानो सार्कासनि खसाबब्ला?
.
दिनै राजखान्थिखौ माबोरै दैदेनदोँ
नायहरदोँ जानांगौ
रुपनाथ ब्रह्मआ
बर'नि राजखान्थिगिरिफोरखौ
.
जानो हागौ बेखायनो-
इसान मोनाबिलिमोनहा
दैसा सेराव लोगो हमलायदोँ गले गले-
.
नोँ जेरै-
नोँ आरो आंजोँ
मागो बैसागु
.
नाथाय थेवबो-
जुजिग्राया जुजिगासिनो दं
होख्रावग्राया होख्रावगासिनो दं
नाथ्रोदग्राया नाथ्रोदगासिनोबो दं
.
बिबानखौ गथायलांबाय
मेंनो रोङै मावथि जोहोलावमोनहा
प्रजि ब्रह्ममोनहा
रायजोनि थान्दै गोबां मुंख्लं जाबाय
खायसे मासिखौनो गारबायबो
.
अब्लाबो-
नेनानै दं ब्रजेन ब्रह्म सारआ
"अख्रां गंसे नांगौ" होन्नानै
जेराव गुसेब सिमानि हाबिलास गैया

खेबसेनो बारनानै फ्लाइं-किक् होयो।
इंगिनिया फोद्दा खांग्राङो।
नाथाय इंगिनिया सालाख्।
बेयो बुंनायसै-
रथ' फंबाय रथ',
फंसे बाथ्रा बुंनोसो फैदोँमोन आं।
खुसेँग्राया हां थिफुं थिफुं रागाजोँ सोँफिनो-
मा बाथ्रा? आंनो मानो खिन्थानो नांगोन?
- खोनासं फंबाय, खोनासं खैफोद जेरैबो खैफोद।
दै बानाया आंनि देराखौ सिलिँखार खालाम जोबथारबाय।
बे बाथ्राखौनो नोँनो खिन्थानो आरो नोँखौबो रैखा खालामनो थाखाय आं नोँनि दरजा सौब्लाना हाबफैनाय जादोँ।
नाथाय आं फांथेना गारबोफिन्दोँ फंबाय।
- हो नोँ आंनि दरजाखौ बोरै सौब्लाना फैनो हाखो?
आंथ' गिनांगौ गैयामोन।
खैफोदखौ नोँनो आंनि खाथियाव बोना लाबोबाय।
आंथ' आंनि बिसिखौ लानानै गोजोन एमावसो दंमोन।
नोँ जोबोद इनाय मावबाय।
ओँखारलां नोँ गोख्रै।
नोँनि मददनि सोलाय आं थैनायानो मोजां जागोन।
खैफोदखौ आंनि थाखाय नोँसो लाबोदोँब्ला बे खैफोदखौ होबथाना नोँनि गियानि हाबाखौ दादिन्थि नोँ।
बारनानै जोबावो फंनैसो।
इंगिनिया राहा गैयै जायो।
- निमाहा हो फंबाय।
आंखौ नोङो रैखा खालामथार।
आं नोँनि सिं जाना थाथारगोन फंबाय।
गाबो सिबाय गिनायजोँ आखाय खबजबै इंगिनिया।
- नाङा ओँखारलां।
जोरन हरो।
इंगिनिया गिनायजोँ हाखु-दाखु थंब्लेट बार'नो।
लोगो लोगो दरजाजोँ दैया बुर बुर हाबो।
इंगिनिया सानस्रि सानस्रि फांसे फिसा लाइफांआव गाखोयो।
दसे उनाव खसेँग्रानि देरा फारसे नायहरबाय-
खुसेँग्राया खांग्रांना दं।
हां दंना गैया मिथिनो हालिया।

नंखायनि थाखाय सोरबा घोरोमिया
खुगाजोँ सोरखौबा
साव होयो।
दायनि थाखाय सोरबा घोनिया
सोरखौबा आखायजोँ
साजा होयो।
बेयोकि मानसिनि मोनसे गियान?
एबा जोनोम जोनोम सुबुंनि घोरोम?
घोरोमनि बोसोन जाय फालिया
नरकआव गोग्लैनाय बिनि जाहोना।
घोरोमनि बोसोन सोर फालिदोँ-
जाम्बाया ना सियाना?
बबाया ना खानाया?
घोनिया ना गोरिबा?
सादुआ ना सिखावआ?
राजाया ना फोर्जाया?
गुरुआ ना सोलोँसाया?
सोरनियाव दं गियाना-
गुरुनाव ना सोलोँसानियाव?
जाम्बानाव ना सियाननियाव?
नाथाय बयबो समान
बयबो जिउ महर मोनसे
बेयो माब्रै जानो हायो?
सोलेर लानानै जिउ जादोँब्ला
सोलेरखौ अनसायनायाबो मोनसे जिउ घोरोम
देहा सोलेरखौ मान होनांगोन
देहा सोलेरानो जोँनि घोनब्ला
देहा सोलेरखौ अनसाय नांगोन
देहा सोलेराबो बेसेन दंब्ला
अब्ला जागोन घोरोम गोथार
साननाय होननाय मोजां
जोनोमनि बेसेन बेनो जागोन।

दिनै गोदान बोसोरनि
गोदान बारजोँ
दिनै गोदान बोथोरनि
गोगो अखाजोँ
दुलाराइ मिथिँगाया रंजादोँ
आंनि जोँनाय मेगनाव।

आं मोजां मोन्दोँ, मादि आं नुदोँ
आं मोजां बिजिरदोँ, मादि आं मोन्दाङो
लामा लामा गेङो दर्जाया
मोनो आं गोदान लामा
बारलाङो लैथो आरो लैथो।
जाम्बा आं सासे
गोग्लैबोयो हाज्रिजोँ गियानाव?
नाथाय आं मोजां मोनो
बेसेबा आं गोदान मोन्दाङो
आं मोजां मोन्दोँ, बेसेबा मिनिस्लुयो
जेब्ला आं मिथिँगाखौ रंजायो
बेसे समायना, गोमो-गोथां मोन्दांथिया
नाथाय बियोदि जाथावना?
बेयो नंगुबै सैथो नङाना?
आं मिथिया, आं जोबोद मिजिँथियो-
आं थारै बिजिरनो नाजायो
नाथाय आंनि गोरोन्थि जायो
आरोबाव बेखौनो बिजिरो
बेयोदि फैनो हागौ देलायना
नाथाय बियो बेयोनो
जेब्लाबो आंनि गोरबोआव
नोङो मादि राय होयो?
आंदि आरोबाव जाम्बा,
जाम्बा आं सासे
जायखौ मोन्दांथियो-
नाथाय बियो बेयोनो
जेब्लाबो आंनि गोरबोआव
आंनि गोफार जोनोम मोनसे।

आं बुजि मोनस्लाबा मानो
नोँदि आंखौ गाबनो होयो,
आंखौ बिखा खैसिब मोनो
थैनायखौदि आं एसेबां गियो।
मानो आंनि मोदैखौ होबथायो
जिरि बोनाय मेगननिफ्राय,
नोँ आंखौ रंजाहोयो-
बेयावनोदि आं हार्थखिजोँ रुजुफ्लाङो।
आं मुलुगखौ आन्दायो जेब्ला
खोमसिखौ नोँनो हरो
अब्ला मानोदि जोँसार बोयो हार्थखि
बिजिरख'नो हायै जौमा अख्रांआव।
नोँखि मिथिया जिउनि गिरि
आंनि बिखायादि फांथेनाय
नाथाय बेनि राहाखौदि नोँनो होयो
नोँ जेब्लाबो आंखौ दैदेनो
अब्ला आं नोँखौ खुलुमो।
मानो मानो नांबावगौ नोँखौ
नाथाय अनसुला नोँखौ नांगौ
सोरबा, नोँ माब्लाबा जुदा नङा।
फोरमायना आंनि सिमां रोबैखौ
आं बेखौ दाफुंनि
माब्रै माब्रै आं बैहाय-
नोँ मिथिगौ लामाखौ।
आं मिथिया, मानो आंनि जोनोमा
लोगोसे नोँखौ सिबिनानै
जोँ सानैबो मिथिलायगौ-
नोँजोँ आंजोँ बिफा-फिसा।
आं थारैनो मिथिया
माब्रै आंनि सेराव नोँदि थायो
मानो आंनि उन्दुनाय-सिरि मोन्नाय,
साननि उनाव आरो सान जाखो।
दा लोगोसे बे रेबगन,
आंनि नंगौ सोँनायनि हांखो-
बेयो आंनि मोन्दांथिफोर
नङा सावगारिनि थाखायल' महर।
आं लासै लासै थांगोन-
बुंनांगौ आंनि आं बुंगोन
आंनि सोलेरा गोग्लैसोब्ला, गोसोआव हो
नोँ आरो आं रावबो नङा
नोँनि आं लोगो, आं लोगो।

थुरि उखुमनि गिजि देरायाव
थरथिँ थरथिँ अखा गसरब्लाबो
आं खाफाल हमाखै,
रुम्बां रुम्बां मायदां जावरिनायाव
आंनि गोसोआ बेसेबा खुसियावसो।
थखन थुनो सम सनाय
खामानियाव उदायै आबौ हान्थुआ
जौनि अफ्रियाव गोजोमना दुब्ला थैलांबाय
आंहा बेयाव खहा जायाखै
खहाया मोनसेल', आबौआ सल' रोँगौमोन
थेवबो खिन्थानो अलसिया थारब्ला?
गियाखै आं मोफ्लाम-मोसि
जोमैजोँ जोमै अखा खोरोमनायखौ
बाग्दाव-फ्लांदोँ ए.के 47नि
मान सन्मान गैयै गाबज्रि हरनायखौसो।
मेगन खानाबादि गोसो खाना
मोन्नैजोँ मोनसेयानो रुजुनाय नङा
मेगन नुनानैबो सान्नो रोङैया खानासिन
फंसे रावै मुगैथावसिन (जाम्बा)
जाय अन्नाय गैया मुलुगनि।

बेसेबा खुसि आं बे समाव
बेनो नामा आंनि जिउआव?
गुर गुर खारलाङो फरायसालियाव
फिन बेबादिनो फैयो न'आव।
बेसेबा समायना बुहुमा
बेनो नामा आंनि जोनोमा?
दावबायारि आं लामानि
हरै बेसेबा लैथो मोनहैनायनि।
आंनि आफाया बोसोन होयो
दाय मोनब्ला बियो बुयो
आंनि आयआ बोर सास्रियो
गोरोन्थि मोनब्ला बेबो रायो
आय' बेसे गोजान आंनि थांखिया-
आदा-आब'आ आंखौ लेङो
थौ सोलोँ बिघ्दा मोजां नोङो।
बेसेबा समायना अखानि दैस्लुंआ
सावगारि नुनाय सोमखोर अख्रांनि
नायहरो आं खुन्थेँहां गोदोना फोलावना
बेसेबा गिना बिखा हमना।
रंगिना-संगिना बोथोरासो थाङो
हालो-दैलो बैसोआ थाङो
आंनि सिमांआ अख्रांआव
आंनि मिजिँआ बुहुमाव
गोसोआ मोन्दां हरा रोमै रोमै
दावबायनाय अब्लाबो बे समाव।

ख्लाब-ख्बिब मोदान फैयो
नोँनि लिप्सटिकनि...
मेव मेव मोनखांफैयो
थेनथौलांब्लाबो आंहा
बेसेदि बिरो बेरे सिखिरि
नोँनि फारनै गुसुथिनि नोजोर...।

नै अनजालु फरायसाफोर-
एबार आं नोँसोरनो फंनैसो खिन्थानि।
जिब-जुनारा जोँनि आंगो लोगो।
जोँनि बेसेबा बानजायग्रा अनजाथाव माहि।
जिब-जुनारखौ नेहाथ सान्ना
बुथारनो नाङा।
बिसोरहा दाय गैया।
अब्ला जोँहा मानि हिंसानाय?
माहारिनि बिफा गान्दीया बुंदोँमोन-
अहिंसा परम घर्म।
अदेबानि हिंसा खालामियानो सोरजिगिरि
जिउमानि गियान।
बेनो नंगैबै दोहोरोम।
जोँ मानसि माहारिया बुजिनो हायो
अब्लाबो मानोदि उन्दै उन्दै
जिब-जुनार आरो दाउसिन-दाउलाखौ बुथारो?
बिनि जाहोनखौ दिनै नोँसोरनो खिन्थानि।
जिब-जुनारा जोबोद बुजि गोरोँ जिबि
बिसोरो गियानि नाथाय राव रोङा।
राव रोङैनि थाखायनो बिसोरखौ सुबुंआ नेहाथ सानो।
बिसोरो राव रोङैनि थाखायनो उदांस्रि गैयै बादि जायो।
बिसोरो जेब्लाबो मानसिनि बादि राव रोङैनि थाखाय
लाजियो थाखोमाबायो
अब्लाबो बुजि रोङै मानसिया बिसोरखौ
होसोयो गावथारो, बुथारो बायदि
हिंसा खालामो।
फंबायफोर नोँसोर दिनैनिफ्राय
बेबादि हिंसा सान्नायखौ दाला
मोजां आखु सोलोँ गियानि जानो सोलोँ।
रामायाण खन्थाइमायाव मखनाय रामचन्द्र
आरो लक्षन मोना
गिलु बालु फोजोबस्रांनो हानाय
गोहोआ दंमोन अब्लाबो बिसोर
जिब-जुनारखौ हाग्रायाव थानाय समावबो बुथाराखै।
अर्जुनमोनबादि हाथियारनि बिगोमाफोरा
जिब हिंसा खालामामोन
बिसोरबादि अनसुला घोरोमिनि सल'खौ खोनासं।
बिसोरनि जिउमिन फराय।
हायोबा सम सम नोँसोरनि फोरोँगिरिफोरनाव सोँना ला।
गावनि जिउआ जेसेबां अनजाथाव
गुबुननि जिउखौबो अन।
जिउआ महर गैया जेरै
बयनिबो जिउआ समान अनजाथाव।

फंबाय-बिनानावमोन आं दिनै मानसिनि गोसोआ
माबादि खाना बेखौ नोँसोरनो खिन्थानि।
ओरैबादि दं जाय मानसिया
बेसादनि सायाव मेगन खोख्लैयो
बियो गुबुन आरो जेबोखौनो नुआ।
नाथाय ओरैबादि मानसिबो जाय माखौबा नुदोँ
बियो बेसाद होन्नाय
जेखौनो सिनाया।
फंबाय-बिनानावमोन फंसे बाथ्राखौ नोँसोर
खोनाबाय नङा ने?
'फिसा सिमां नुनाया फाफ'
भारतनि रुंग' हादरगिरि आरो सासे
बेसेबा गिदिर बिगियानगिरि
आब्दुल खालामा बुंदोँमोन बाथ्राखौ।
जोँ गिदिर मिजिँ लानांगौ, फिसा नङा।
सिमां नुनांगौ- बेखौ दाफुंनांगौ।
मानोना नोँ जेसे हास्थायो
बिदि नोँ मोनद्रायनाय नङा।
अब्लाबो जोँहा गिदिर सिमां; बिनि मिजिँआ थायोब्ला
गिदिर सिमांआबो नाजानायनि बोलोआव गावनो गाव फैयो।
सरासनस्रा मानसिया गासैबो जिरादखौनो मेगनजोँ नुयो
नाथाय बिसोरो ओरैबादि खाना थायोदि-
सासे आबादारि, थेला बोग्रानि
फिसाफ्राबोदि सासे दाक्टार जानो हायो।
सासे हादरगिरि जानो हायो
बेखौ बेसोर गोसोजोँ
सान्नोनो हाया।
जाय गोसो गियानजोँ सान्नो हाया
बिसोरखौनो गोसो खाना होन्ना बुंनाय जादोँ।
जाय उन्दै गेदेर सिनायनाबो,
गोरिब- हावरिया, खैफोद-आफोद नुनानैबो मदद होआ
बैसोर बादि गोरोँखौनो
गोसो जाम्बा एबा गोसो खाना बुंनाय जायो।
फंबाय-बिनानावमोन जोँ गोसोखौ बेमा
सोँहोनो नाङा।
बयखौबो नायनो सोलोँ,
बयखौबो अनसाय मानसि महरै
मानसिबादि गेदेमा आखल गियान दाफुं।

बिफां-लाइफांआ आदार होयो ने?
थारैनो बाथ्राया नंमारगौसै?
होयो थारैनो।
जोँनि राफोद गोहो बोलोयै आरो
गोसोयै थांना थानायानो
बिफां-लाइफांनिफ्राय जोँ मोन्नाय आदार।
बिफां-लाइफांखौ जोँ जेब्लाबो जायो
जोँनि मेगनजोँ,
जोँनि गोसोजोँ, जोँनि बिगुरजोँ, जोँनि सोलेरजोँ।
बिफांआ हगारनाय अक्सिजेन गेसखौ जोँ जोँनि
हां लाग्रा अंगजोँ जायो।
नै उन्दै उन्दै फंबाय-बिनानावमोन,
आंनि अनजालु-अनजालिफोर।
जानाय बुङोब्ला खुगायाव सोनायखौल' बुङा।
मोन्नाय माखासे जामुंखौल' खुगायाव
होनायाल'नो नङा।
जोँनि माखासे सान्दांथि-मोन्दांथिजोँ अनसायनायाबो
मोनसे रोखोमनि जानाय।
बेखौ साबसिन होन्नाबो बुंनाय जायो।
खुगाजोँल' जाबानो जोँ थांना थाया।
जोँ जोँनि गियानजोँबो माखासे
खुगाजोँ जानो हायैखौ जायो।
बिफां-लाइफांआ जेब्ला
सोमखोर समायना जागोन अब्लासो
जोँनि गोरबो आरो सोलेराबो बोलो जागोन।
नै फंबाय-बिनानावमोन बेखायनो जोँ
बिफां-लाइफांखौ अन्नांगौ।
बिफां गायनांगौ, दै लुनांगौ जोँनो थोजासे
हेफाजाब होगोन।
बिफां-लाइफांआ जोँनि मेगनाव समायना
नुजायोब्ला जोँ गोजोन मोनगोन।
जोँनि गोसोआ रंजागोन।
नांगौसेबां अखाया हागोन,
खोलो खोलो गुसु बारा बारगोन।
साया सायख्लुम जोँनो मोनगोन।
गेदेमाफ्रा बुङो- फांथाम गाय नांथारगौ जाब्लासो
फांसेखौ दान।
जानला-मोनला बिफां दाननो नाङा,
दाननो दाहो।
मानोना बिफां-लाइफांआ जोँनो आदार होयो।

मेगननि गोफार जिलिदजोँ
थुफ्लंहरो दाखा दाखा जोमैखौ
दसेनो ज्रय ज्रय
सोर्गोनि निजोरा बोहैबोयो
.
मिथिँगा थिलियाव नोजोर फोलाव हरना
बेसेबा रिउ रिउ
खोमसि बिखाजोँ
सिमब्रे लांदोँ गोरबोनि मिजिँआ
.
जिउनि बायजाबथु खन्थाइफ्रा
लामा एवस्रांदोँ दैलो खबामनि
जिउनि देरा गोजोन सायख्लुमाव
.
हाबिलास
महर होनो गंसे मुलुगाव
गोथां मिथिँगानि बेसेबा फैलाव
बेसेबा गोजोन सुदेम

आंबो सासे गथ'मोन
जायनि जोनोमा गोरान सिलायाव।
दाउस्रि बासा गाखोनाय एबा थुख्लायनाय
बेरे, गुमा हमनाय नागिरनाय
सेसा नेवलाइ नागिरनाय
दाउ-दाउसिन गावबायनाय
एन्जर जावनाय खुसेंग्रा लुनाय
आंनिबो मोनसे गिदिर हुदामोन।
आंबो सासे गथ'मोन
जायनि जोनोमा उनफिन्नाय बर' गामियाव
गस्ला गोदान मोनब्ला
सान्नै रंजायो आरो
बिजाब गोदान मोनब्ला
सान्नै बोद्लायो
बेयो उन्दै समनि दोहौमोन।
सिलर गोबाथुम गोबाथुम मेँख्ल'-ख्ल'
फरायसालियाव थाङोमोन
खसर-मसर एदावलायोमोन
दुब-दुब दाब-दाब बुलालायोमोन
आमाय-जुमाय थाखोमालायनाय
जल्दं-माल्दं आरो बाथा बुलायनाय
आंबो गेलेयोमोन लोगोफोरजोँ
बायदि गोमो-गोथां आब'मोन-आदा फोरोँनाय।

दाखोर दाखोर जेरैबो
हावासिनि दरसे सायख्लुमावबो।
आथिखालाव सुबुंनि गोसोआव मैला
नागिरना मोनो जेरैबो खना-खनला।
थिख हे गसाइ!
आंनि गोरबोआवबो साबफादोँ जेला
नै गसाइ! हर जोबस्रांनाय जानला।
माखौ लानानै आं थांना थानो?
मिजिँ ना थांखि
सिमां ना मोकथांखौ
ना थांनो.. देहा-सोलेर लानानै?
हे गसाइ!
हर आंनो लैथो मोनसे
जेसे हायो आं थब्लनि
जिउ जोनोमनि ओँथि नागिरनि।
हे गसाइ!
आंनि फाफखौबो बेयावनो होदो सुस्रांनायखौ
आंनि गोरोन्थिखौबो बेयावनो होदो सिनायनो।
हे गसाइ!
नोँखौ इसोर सिबिनाय
नोँखौ लोगो सिनायनाय
बेनो आंनि जिउ बावनायब्ला
हे गसाइ!
सुबुंखौ अन्नाय
जिउ-जिबिखौ मदद होनायाबो
आंनि देहा-सोलेर बावनाय।
हे गसाइ!
माखौ लानानै आं थांना थानो?
नोँखौ सिबिनानै आंनि जिउब्ला
जिउ-जिबिखौ अन्नानै आंनि घोरोम
नोँनि थाखाय जिउ होनानैब्ला
जिउ-जिबिनि थाखाय देहा-सोलेर।
हे गसाइ!
नोँ गासैनिबो देरसिन बिजिरगिरिब्ला
आंनि बरादखौ बेखेवदो नोँ
माखौ लानानै आं थांना थानो?

फुंनि गु रिँगासो समावनो
आदा हासुंजोँ आंजोँ
मादै गालिस्रिनाव हाबहैदोँ जोँ।
थांखिया जाबाय लिरबिदां बोखांनाय।
बावैसो डाइन-गु साननि सिगांआव
मादै गालिस्रिनोबो एसे लेखा-फरा
रोँखागौलाय बेनोबो खन्थाइ नङाबा
संसार जानायनि सुंद' सल' दोँसे
लिरनो नारसिन थाबदोँ।
मादैया सर' गैफेर थारा
बेबादि खन्थाइ,रायथाय आरो सलफोर लिरना
लाइसि एबा बिसम्बिफोराव
फोसावनाय।
गोदोबा आदैजोँ रमान्टिक सोलिबा लाइजामखौ
खुनुरुखुमसो लिरसाब बायोमोननो आरो।
मादैया थाखो ब्रैखौ उथ्रिनाय।
बर'लेण्ड सोमावसारनाय समाव
फरायनायखौ नागारनो गोनां जादोँ।
बेखौनोबा सोरबा सोरबा दानि मेट्रिक फास जानायानो गादबनो हाया होनलायबावोसो।
उनाव रुवाथि थाबाय थाबाय
आदै गालरजोँ ग्रोब सालगुरि गामियाव
जुलि मोनफ्रां फैनायानोसै।
मादैया बैसागु बोथोराव मेथाइखौबो
खना नङा खनो।
रैसुमैथार गारांआ।
थाइजौ बिफांआव बाफैनाय खौऔआनबा गल' खोनासंनो
गोनां जाबावो।
थांनाय सालगुरि लाइमोन आफादनि ब्रैथि
खुंनाय रंजालि बैसागुनि साजायफबनाय
जौसांआवनोबा मेथाइ खन्नानै
सेजौ थाइनैसो बारा रां बान्थाबो मोन्नो
हालायदोँ मादैया।
आदा हासुंजोँ आंजोँ मादैनि सिलायाव
मोनहैब्ला मादैया हले
थिलेब-लेब थुलावनो माबा
हिसाब-खिथाब खालामगासिनो दंमोन।
आंनि सेन्देल गाबलायनाय
थाबायनायखौ थाल मोन्ना माब्लाबानो नायहरखादोँ।
सिला गाग्रोमोना बियो बुंबाय-
ए आदैमोन फैबाय।
(न' फारसे नायहरनानै) नै बिसन आय
सियार लाबो नोँदामोन फैदोँ।
माब्लाबानो बिसना सियारखौ लाना फैबाय।
जिराय आदामोन होन्ना ब्लद थांफिन गारबाय।
जिराय आदैमोन होन्ना मादैयाबो
रेबगनखौसो सोमावबाय थाबाय।
मादैखौ खुनुबेला बेबादि नुफेरामोन आं।
जेन'बा मादैया हिसाब-खिथाबनि
साख्रि मोनबायसै।
- हाब मानि हिसाब-खिथाब मादै होन्नानै
आं सोङो।
मादैयाबो मिनिसुलु बुंफिनो-
नोँसोर फैनानै आद्रासो जाबायहाय
आदैमोन।
बाथ्रायानो फैयाखिसै सान्नायाव।
- मानि हिसाब-खिथाब मादै? हासुंआ सोङो।
- ए दाखालि नोँसोर मेगाजिनाव होनो
होन्नायालाय माथो जाखो?
बेखौनो लिरनो सोलाबथारैखाय दिनै लिरनायानो आं।
दिनैबो बाथ्रायानो गोमाबावबायसो थारलानो।
हा' समाबो जाबायानो।
आंनि लिरबिदांखौ नोँसोर मोनलांनाय नंलिया।
- नङा मादै,
जोँ नोँनि लिरबिदांखौ लांथारगोन।
आंनो बुंबाय।
नोँनि लिरबिदांखौ लाइसियाव सोसनथारगोन।
- आयौ बोरै जाबायगोनसै!
जाया गारानो।
सानबाबो सानबाबो बाथ्रायानो फैया बेखायनो
डाइन सान मानि लिरनाय जायाखिसै।
समाबो जालाय लांबाय।
आं देग्लाय हानाय नंला आदैमोन।
फैगोन बोसोरनियाव हले हरथारगोन आं।
- ओहो मादै देग्लायनो हरथारनांगौ।
फैगोन बोसोरना आरो
फैगोन बोसोराव जालायगोन गोदान।
आं बुंबाय।
मादैया हले खैफोदाव गोग्लैनाय बायदि
जाथारबाय।
बियो मोखां खोमसि जानानै बुंबाय-
लेखा-फरा रोङाबाथाय बिदिनो आगैमोन।
लिरनो सानब्लाबो लिरनोनो हाया।
लिरनाय हुदा गैयाब्लाबो
आखायानो मेवा।
आंबो दहमैनो हाबा जानायनिफ्राय
दिनैसो रेबनो दैफिनदोँ।
बेबो नोँसोर फिसाफोरनि नारसिन नायावसो।
- दे मादै समाबो जाबाय नोङो दिनै
फुं खिनियाव जा लिरबाय
बेखौनो हरदो।
जोँ बेखौनो साफायथारगोन।
- आयौ!जाया गारा
बोरै जानोसै?
मिनि जानायसो जागोनहाय।
- मिनिया मादै, मानो मिनिनो?
मिनिग्राया गावनो रोङा बियो।
गोरोँफ्राथ' नोँखौ साबसिन लिरनो
थुलुंगासो होगोन।
हासुं आदाया मिनिस्लु बुंबाय।
- बोरो आं फरायनि होन्नानै हानहरदोँमोन आं।
मादैया लाजिना लाखुमा गारबायसो।
- दे फरायला मादै फरायला।
होन्ना आदा हासुंआ बुंब्लासो
आदानो बाबांसिन हरबाय।
- दे फिसाफोर,
जोँ रोङा रोङा नोँसोर मोजाङै
सोलोँबानो जाबाय।
आरो नोँसोर जा रोँबाय जोँनि उन्दै
गथ'फोरखौ फोरोँ।
नोँसोरनि मोजां खामानिया जाफुंथोँ फिसाफोर होन्नानै
मादैया उनाव सेजौ रांबो अनसुंथाइ हरबावदोँमोन लाइसिनि गिबि
जाफुंसारनायनि आसायै।
बैसागुआव रोजाबनाय मेथाइफ्रानो एसेबां
ओँथि गोनां जायो खन्थाइबाथ'....
बायदि बायदि सानो आं।
उनथाराव मादैनि लिरजोबै खन्थाइखौ फरायनो मोन्दोँमोन-

अनसुला गोसोनि रजे देहा थरसेनि
नोँनो आंनि इस्वोर, जिउ सायखं
आंनि अराय घियाना
नोँनि आथिँ नोजोरावनो
नोँनि अनगा आंहा लामा गैया
बेनो सुवामे आंनि थार गियाना।

आं बायजोआव, खोमसि हर
थरथिँ थरथिँ अखा
बिलिरदोँ गुसु सोलेराव,
सुदेम जेन' अनजालि एमाव।
सुहाबना फैयो सिँङाव उन्दुनो
बबे मोनसेया आंनि आन्दायनाय
थाबायो आं उल्टायै
मानोना समा अखाफोर थैहाबनाय।

हुरा हुरा सानफ्लाङोमोन आं-
हाबावगोन दा बायग्लिनाय आंनि गोसोखौ
फागुननि बारजोँ जरा फोनांनो,
बिखा गावनायनि गुथाला
दैदेनबायसो जोँमा साना,
गोरबोनि लाथिख' नोजोरजोँ
नायहरो जेब्ला गोबौ मेगनजोँ।
गोजाम बिसम्बि खामग्लिनायनि आलौनायाव
आं मोन्दांदोँमोन मुगैनायनि अर लगायनाय।
. . . . . . . . . . . . . . . .
दिनै गोदान अखाफोरनि सोरांआव
नोँदि हाबावगोन जोँनाय अराव सालाइ एरनो?
गोदान नोँनि आखायाव आंनि नोजोरा,
- बै थाइनै आखाया माबा बुंदोँ
जेराव लाजिगुसु थाइनै आखायजोँ जंखायलायदोँ
बेखौ बुंनो हागौदा
मोनसे रोखोमनि फावल'।
मोदै हुगारदोँ गामसानि दौबाजोँ
नाथाय फेलेँनिल' गाबनाय नङा
फैगोन रंजानायनि मोजोमसे मिनिनानैसो।
मोबायजोँ नायनानै जेब्ला नुयो
सुथि मोन्नायबादि अखाफोर ओँखारबोयो,
सोरांसि दरखंनि आन्दोआव
लाजि गुसु नोङो आमाय-जुमाय गेलेदोँ।

नंगौ नङा आं हले मिथिया
बाथ्राया नाथाय खुगानिल' नङा।
आयंनि आयंआ सानसेखालि
सानफा-थोलो खिन्थादोँमोन फुजाखालि
आंहा गोसोआव दं
मानोना आंनि दाइरियावनो दाबो दं।
आयंनि आयंआ बुंदोँमोन-
1
सैमा नुब्ला सैमाया
हमथा हायै गारमा मानो
बेखायनो नामा सोङालाबा थाया।
2
मोसौ दामब्राया मोसौ दामब्रा नुब्ला
सिथोर-बाथोर गं मानो
बेखायनो आलि सौखुनो मोजां मोनो।
3
दाउला थाइगिर दाउला गेरगेरे
हर जाब्लाथाय गोदोना थाबथायो
बेसोर माब्ला सोराङो लामा नायो
ग- गेरे- ग सोरांस्लाब मोना।
4
हाब्रु नुब्ला अमायालायनो
गोलोमस्राव लायो
बेखायनो बिसोर हाब्रुखौ अनो (नागिर बायो)।
5
मैसोआबो एसेल' रागा गैया
गोदो बाथौ बोराया मैसोनो
गलि, माबा जेबो हाउजिँ होआखैलायनो!
बेखायनो अनथाव-बाथाव थालिर लाइफांआ...
सिबाय दाना मैसोनि नंबर 1।
6
मानसिखौ सोरबाया गाज्रिसिन सोरजिदोँ।
नाथाय मोजां मानसियाबो,
थोदस् थोदस् बुङाब्लाबो जागोन
अब्लाबो बुंजायो-
सिख्ला गोदान नुब्ला सेँग्राफ्रा
मेव मेव मोनलायो नो
नंखायनो जंखायनो हांखुर जायो
आरो
....... सिख्लाफ्रालाय??

आंनि सोलेरखौ नेवसिनानै
आंनि मुस्रिखौ बावगारलांब्लाबो,
नोँखि हादोँ दाबि आंनि गोसोखौ..!
आंनि समायखौ सिफायनानै
आंनि गोजान जालांब्लाबो
नोँखि हादोँ दाबि दुखुखौ फोजोबनो..!
मिथिगौ आंबो सना-
नोङो मोखांआव रंजादोँब्लाबो
उन्दुना दं नोँबो गोरबो सौखियाव,
जेराव मोदै; गान्दु सिग्लाबनाय।
बैसागु बोथोरनि गोरलै बिलाइजोँ
सोलेरा मिनिसुलु मोसाब्लाबो
सार अन्थाइनि सोगोमनायाव
नोँखि आंखौ गोसोखाङाखै-?
गोदानाल'नो सिबिजाथाव नङा
गोजामखौ थाल्ला बावगारना,
नोँखि सना बेखौ मिथिया?
हाबाब सना आंबो थांङाखै बावनानै।
नोँबो आंखौ थाल्ला बावगाराखै।

बोरायखौ आंबो सिरि सिरि
रागा जोँदोँमोन।
नाथाय बांसिन मिनिथावसोमोन
जाथायनि गासैबो सावगारियानो।
. . . . . . . . . .
आमटेका हाथाय।
हाथाय बारायब्लाथाय होँगो-दोँगो,
सिथिँ-सिथा।
एरायलायनो जायगाखौनो मोना।
हाथाय बाजारा बिदिनोखा
बायलाय-फानलायनि होँगो-दोँगो।
बेखौ दोनथ'दो,
खानाय सिनग्रा गलायानो दिनै
बाराबाव।
खानाया जाइला-ला जाथारनायखाय
सिनजानो सान्दोँ आं।
नायनो साबा नुथारबाय होन्ना
गोसो थोनाय बालेवा बुंबाय
थानायखाय सिनजानो नांबाय।
खुसेँग्रा लानजाया लावना गोदोना
बाग्लायनानै फाफ्लि मोनबायानोमोन।
अब्लाबो आं सिनजानो गोसो गैथारामोन।
आं सिरि सिरि सानखोमादोँसोमोन
खानाय गोलाव लानानै
दुगा देखायनो।
आरो फैगोन बोसोराव सिराज बाग्लारि आदैया
गुन्दानि फार्टआव होयोब्ला...
बायदि साननायमोन।
नाथाय थबस्र सान्नायखौनो सिफायगारबाय
बालेव मायनावआ।
गोसो थोनाय थाब्ला बिदिनो,
आंनि गोसोबादि ना बिनि गोसोबादि
जानो बेखौनो मिथिस्लाबा।
खानाय सिनग्रायाव दिनै होँगो-दोँगो मानसिनि मानसि।
सियार खामफ्लाय जिरायनो
मोनलाया।
थाग थिग 9.30 रिँगायावसो
नायदावग्रा अदेबानि नायदावना
सिनग्राजोँ सिनजानो मोन्दोँ आं।
मानसिफ्रा बेखौ मोजां मोना
माने बियो बारा मोजाङै सिननो रोङाखाय।
गुबुनखौ नेबाय थानो बाना
बेजोँनो सिनजाबाय आं।
थेनथ'लायजासे खानाय सिनजाबा सासे
खानाय फुरनाय बोराया
गिदिँ फैदोँ आंनि सेर सेर।
खानाय सिनग्राखौ बियो बुंदोँ-
आंनेबो लावबाय खानाया।
आंबो सिनजानांगौ।
बाथारदोँमोन आं।
बेवाइयानो हाजादो हाजादो होनबाय थायो।
बेखायनो फैबाय आं।
दान्दिसे सिरि थानानै मानसिया
गावनो बुंगासिनो बुङो।
जेन'बा खांख्राय गुदुंनिफ्राय
दैया थपा थफा फेँफोना महरै
ओँखारदोँसो-
जोँनि खाथियाव सासे खानाय
सिनग्रा दंमोन।
दाखालहाय लेमसनाव हादान
खुलिदोँ होन्नायखाय खारलांबाय।
आंखौ खानाय सिनबा बेसाराया
रां गरसेबो लायामोन।
बे समावनो खानाय सिनग्राया बुङो-
गामिनि ओरैनो सिननायावलाय मय फैसा लानाय?
- खानायाबो मोनजोब्बाय आंने।
गोसोम खालामनांगौनो।
बेवाइया बेखौनो बुंबाय थायो।
दाखालहाय बुंदोँमोन आं-
बोरायनानैलाय खानाया मोनाला
माथो होन्नानैहाय।
खानाय सिनग्राया आंखौ गोसो
होना सिनथारनायखाय 45
मिनिटजोँनो हाबाय।
ब्लेडजोँ माखौबा माखौबा
गोदोना सेर सेर,
खोमानि सेर सेर हबाय।
उनथाराव मोजाङै हदोँब्लाबो
साबदारियानो फारसे गोलाव
फारसे गुसुं थाबावनायाव
समान खालाम होबाय आं।
गोदोना, मोखांफ्राव खानाय
सिथाबनायखौ खिथाब बायदि फिसा
सिजोँ बुस्रि स्रांबा खानाय
फुरनाय बोराया खामफ्लायाव खावब'
जिरायना सिनजाबाय।
बाथ्राया जोबनाय गैया
बोरायनि खुगायाव।
मादि मादि खोथा बरनदोँथाय
आं नालाखौनो मोनाखै।
माबा दाखालिनि सावथाल दावरावआव
गसाइगामिनि बबेबा बादायाव
गावनि बिसि बुरैयालायनो
माबा माबि जादोँनो
सोरबा बोरायजोँ।
आलासि जाहैनाया जोबोद
गिथाव बाथाव खैफोदाव
गोग्लैदोँलायनो।
बोराया दसेनो गावनि,
दसेनो बेवाइनि बायदि
मुहिथाव सलसो खिन्थाफ्रांबाय।
आंबो फैनोसो बागारबाय
खानाय सिनग्रा गलानिफ्राय।
बोराया खानाय सिनखांना
माष्टार ब्लेडजोँ हजाब्लाबो
जोबाखै बोरायनि सलआ।
थिख समावनो गामिनि सासे बोरायसाया
बेदर लानानै बुंहरबाय-
नै आदै नोँ थांथ'गोना थांथ'आ।
थांनायसै र' र'... हाबायानो।
- माथो माथो लाखो?
नायाखै?
बोराया बेबाराव रायज्लाय
हरालासेनो
खर'खौसो सोमावबाय।
माने लाथ'वाखै होन्नाय जादोँ।
ओजोँ खानाय सिनग्राया
हमथा थारनो हायाखिसै।
गोदानथार माष्टार ब्लेडआ होख्लायबाय।
खोमाया बेसेबा गोजा जाहाबलायनाय
थै बोहैबाय।
थरथिँ थरथिँ मोखांजोँबो बेसेबा
समायना बोहैबाय।
थखन थुनो बैसो जाहांनाय बोराया
रागाया अरखि जोँना खानाय
सिनग्राखौसो थाव सोबाबाय।
खानाय सिनग्रा माखासेफ्रा
नायगोमोना थाबाय।
बोराया खम नंखाथारा
नायखोनानै खानाय सिनग्राखौ बुंथावथारै बाथ्राखौबो बुंगारबाय।

1
रलिँ मिलनि दैमु हटेलाव
सानसेखालि फरटा जानाय
बादिलायदोँमोन जोँ।
बे समावनो सासे सिख्लाखौ लोगो मोन्दोँमोन।
बेयो ओरैबादि नायदोँमोन
जेराव जोँनि फरटा जानायानो
नायथाव-थाव आरो
सान्नो गोनाङै मिनिथावमोन।
गुरबासो जानानै जेब्ला
फानलु गोसा ओँख्रिखौ खुगायाव
सोगासिनो सोयो अब्ला बियो
मिनिया लाबानो थानो हायाखै।
बियो ओरैबादि मिनिबायदि
मिनिदोँबो मिनिदोँ खुगा हमथेनानै खे,हि, खे,हि.., मिनिबाय।
माब्रै जाखोथाय- आंबो
मिथिगुना थाबथा लायबाय।
2
बारा बोरै बारबोखो 15 बोसोरनि
बै सिख्लाया दिनै 16 बोसोर बैसोआव
आंनि बेवाइ जाफैबाय।
खाफाला मोजां, हाबा जाब्लाबो आफाया
एसे माहाजोनखाय फरायनो होबावबाय।
आंबो अन्नानै बंङाइगाव कलेजाव
देग्लाय H.S. 1st Commerce आव
मुं लागायना होबाय।
हाबा जाखांबाय।
उन्दै गथ; आंखौ दाबो जि लाजियो लाजियो।
आंनि खाथियाव मोखांजोँ मोखां
2 मिनिटनि बारा थानो हाया।
कुनुरुखुम सोमोन्दोआ आय आफा,
जोँ जेरैबादि बुङो बेखौनो बुङो।
नाथाय आंखौ?
आंखौ बेवाइ होन्ना बुङा।
आदा होन्नासो बुङो।
सम सम कलेजाव लोगो मोनब्ला
लाजिगुसुयै- जाबावनांगौ पेरियद गैलामोन आदाना?
होन्ना सोङो।
माब्लाबा बेबादिनो फुंफ्राव नुब्ला
- गुड् मर्नीँ आदा होन्नाबो बुङो।
3
बाथ्राया एसे सान्नो गोनां।
आं गोसो थोनाय सिख्लाया
बेवाइनिफ्राय बा बोसोर उन्दैसिन।
बियो दा 11 बोसोराव।
बेवाइया थाखो 11 आव फरायदोँब्ला
देग्लाय आं गोसो थोनाया
स्नि थाखोआवनो फरायदोँ।
बाथ्राखौ सानै हयै आं थि
खालामखादोँ।
20 बोसोर जायोब्ला आंनि गोसो थोनाया
फरायसालिमाखौ बारग'ना मुलुग सोलोँसालि
मोनहैगोन।
बे समाव आंजोँ हाबाया जागोन।
नाथाय आंसो बोरायद्रायगोन नामा
सानफ्लांबायसै आंबो।
थांनाय बैसागु बोथोराव
गोसोथोनायखौ आलासि जानो लाबोदोँमोन आं न'आव।
नाथाय बेवाइया?
मा सानखोथाय- दाना आंखौ नायनो
हाथारैसो जालांबाय।
सोमोन्दोआथ' आजिखालि बोरैबा जाखाबाय।
उल्टां- फाल्टां गासैबो।
गुबुंबाय होन्ना बुंब्लाबो
फंसेनो बुंजासै।
बोरैबा बोरैबि बेवाइनि खुरमासो जायोनो
जाय आंखौ मोजां मोन्दोँ।
आंखौ गोसोथोनायजोँ आरो बेवाइनि बिमाजोँ
असेथार बिब' बिनानाव
जायोनो।
बेखायनो बेवाइया मा सानखोथाय....!!

नोङो जारौ समायना फैयोब्ला
नोजोर खुबैहरनानै आं सानो-
मोखांनि अख्रांआव जेन' समायनाया
मिनिसुलु गावदां अखाफोर।
इसेबांदि नायबाय आं गोमोनानै
आलौनाय गैया थाइनै मेगना लाजिनायाव,
आंनि गोसोआ थांगौ
नोँनि बिखानि सेराव
नोँनि मोखांनि सेराव मोखां दैखांना।
नै सना सोरां जिउनि
लामा गियान गोसो मेगननि,
नै लोगो सान्नाय हाबा सोलेरनि
हर बोलोखौ नाजानायाव।
बेवनो बेवनो लोगो आंनि
नोँनि दिन्थिनाय हाबायाव
नोङो मिनिसुलु बिबानखौ होबायब्ला
नै लोगो होदो आंनो हाबाखौबो।
मावनो हानाय गियानजोँ
गोबौ जानाय सानस्रि मेलेमजोँ
नै सना होदो आंनो जाफुंनाय
आंनो मावनो गिदिर हाबाखौ।

2
गगेरे ग'-
गामियाव दाउज्ला गेसेरबाय
हालुवा लागोआ दर्जा खेंबाय ग्रे-
हैहा हैसा हाल होलांबाय
फोजा हरबाय फेरेँगा गोबोरलादा दाउसिन
"अलसिया दाजा रसा नांगोन"

मावजिया गाबो
मेव मेव मेव
मोसौआ गाबो
अमम अमब अमम
अमाया गाबो
अये अये अये
सैमाया सोङो
फौ फौ फौ
मानसियाबो गाबो
हौ हौ हौ।

सखि खनायाव मावजिया
सिरि सिरि थाखोमादोँ
आं सोँबा बुंदोँ आया
बियो एन्जर इंगिनि बारसिन्नो जमदोँ।

गाबदोँ एम्बु एब अं एब अं
दैज्लां हांख्रायना हाखर हाब्रां,
जोमै दाखा दाखा अख्रांआव
आंनि गोसोआ सान्नायाव
नंगौ एम्बुआ अखा लेँहरदोँ।

O our savior, Kalicharan Brahma
We remember you, candle to burn
To accept your contribution by
We give thanks to you
O our teacher, we remember you
Taking the light from dark
You are inspiring for us
Hands on with the torch
You show a road for us
O Gurudev, we remember you

उन्दै समनिफ्रायनो आं नुदोँ
आं मोन्दांथियो जेब्लाबो
बेसेबा रंजाथाव सानफोरा
अनसुलि बिमानि अन्नाया।
बियो जेब्लाबो मिथिगौ
माब्रै अन्नांगौ?
बोरै बुरखायनांगौ?
आरो गोनां आंनोदि।
बियो जेब्लाबो आंखौ बुङो
बेसेबा समा बारलांबायबो,
जोबोद रंजाथाव आरो रुइदोब।
आयै नोँ आरो आं
रागा आरो गाबनाय
नाथाय मोदै हुगारनो नोँदि फोरोँदोँ।
मोजां मोनो आयै
गोरबो गोसो गासैबो आंनि।
नोङो सानफ्रोमबो आंखौ नुयो
आंहा गोसोआव दं,
उन्दैनिफ्राइ लाइमोन दिनैबो,
सुंद' सम आरो बोथोरा थांबाय।
नोँ समायना आंनि आय
नोङो जेब्लाबो मिनिसुलि
नोङो जेब्लाबो गोहो गोनां
मोजां मोनो नोँखौ बिमा
नोँनो आंनि जिउ मुलुग।
साबायखर गोरबोनि गासैबो
मिनिसुलि रंजानायजोँ,
आं मिथिया नोँ मानो मोदै हुगारो!
आरो मानो हरखाब गंस्रियो
नाथाय मिथिगौ आं
नोँनि मोजां मोन्नाय
नोँनि आंखौ खुदुमनाय।

बेलासि जोमै साग्लोबनाय समाव
नायहरो बिदाय जोँमाखौ।

1
दाद्रा-दुद्रा अन्थाइफ्रानो
मोसायै मोसायै स्लिम जायोब्ला,
नंखायथार सान्नायनि बोलोजोँनो
गोसोनि मिजिँआ जाफुंबायोब्ला?
2
खिग्राया लाजिया
नुग्रायासो लाजियो,
हाय हाय-
आंलाय मानो गाबफ्रांङासै
मानोथो लायो मिनिबायसै?
3
जेथ' जाबाय गासैबो
जोनोमानो फोरोँबाय मानसि सान्नो,
मेगन मोदै जायालासै
हर- सान थाबायनो हायोमोनब्ला?
4
आदुआनि खियाव थाम्फैयानो
बाया होनो,
सियाननि आगानाव लेवारानो गियोनो,
हाखरानो लेँहरदोँसो नामा
आंखौ गोबानो?
ना -गोदोना सेरथेनो बिफांआसो?
5
अब्लाबो
सानफ्लांबायो सिमां-मोकथां
गोजाननि हाजोआ नायनो समायना
खाफालाव थायोब्ला ना खान्दाया
बालाबारियावनो दावो होन्नायबादि।
6
आरोबाव जेब्ला सिरि मोनो
बुजिबायसै गोनो-गोथो
"दैस्लुंआवबो अख्रां थायो जाम्बा
बुजिगोन गोथौ मोजां सान्ना नायबा"।

गाबै गाबै हालिया फरायनो
अनजालिनि जार्ला,
एसेबां सहायै खाफालनि लिरनाय
सोरजिनि मोनसे गेलेनाय;
खालिबोल' बिखासे दाहा,
हालिया आं सहायनो।

इं 2012 मायथाइनि जोबनो दानाव
आयं मेब्लाया रौमारि
गामिनिफ्राय रुंसारि
जालांबाय।
गोब्राब खानो रोङै बेरामानो
आयंनि थैनायनि जाहोन।
गोबां रां गारनानैबो
दाक्टारनाव नायदोँमोन
नांगौबादि मुलि जादोँमोन।
अजाबो हमदोँमोन रां खरसा
खालामनानै।
नाथाय बाराद्राय हामनो रोङै
बादि जानानै
2012 मायथायाव रुंसारि जालांबाय।
आं दिनै गोसो खांदों आयंखौ
बेयोदि आंखौ उन्दै समाव
बेसे बेयो जंखायोमोन।
बाराद्राय गोसोखांनायनि जाउनावनो
आयं मेब्लानि सावगारि
एरखांना दोननो लानाय
जाबाय।
आयंआ आंनि गामि रौमारिनि
गागिथार सासेमोन।
आं गोसो खांदोँ उन्दैनि
जेब्ला आं उन्दैमोन।
आयंआ आंखौ जंखायोमोन
'मासुमला' होननानै।
(आनै) जान'खि होननाय सासे
रान्दि दंमोन
बिहा सासे फिसाजौ लोगोआव
दंमोन।
आयंआ सम सम लामायाव नुब्ला
आंखौ
'जोँनो नांगौ फ्रेजिलेन फ्रेजिनेन'
होनना बुङोमोन।
बे समाव बर'फोरनि
गोब्राब आलादा हादोद
सोमावसारनि समा
थाद' हांबायमोन।
बेनिनो साया बे जंखायनाय
रावआ।
आनै जान'खिनि फिसाजौआ
प्रेजि मुंनिमोन।
आं नाथाय बे समाव बाराद्राय
रागा जोँफ्लाङोमोन।
एखमबा अन्थाइजोँ खुबैना
होयोमोन।
उन्दै समाव आयंआ
बाराद्रा जंखायोमोन।
बियो बांसिन जंखायोमोन जेब्ला
आं
न'आवनि मोसौखौ गामिनि
साहा थानाय
फोथाराव खानो लामायाव
फैयो होयोमोन।
बे समाव आयंआ लामायाव थाना
जंखायोमोन।
आयंआ थैनाय सानखालि आं
गामियाव गैयामोन।
बे समाव आं बंङाइगामिनि
लजिँआवनो दंमोन।
आयंनि हरखाब रुंसार जानाय
समाव
बिखा खायसिब आं खौरांखौ
मोनदोँमोन।
आरो फारि फारि आयं उन्दै
समाव आंखौ जंखायनाय
रावफोरानो
गोसोआव हरखाब बोहैबोदोँमोन।
सारादु समाव आं सानदोँमोन
आयंआ रौमारिनि बिखानिफ्राय
नैथि रुंसार जानाय सालगुरिनि
फेँखा।
रौमारिनि गाहाय थागिबि।
बेनि सिगाङाव आदै जाथिया
हरखाबै रुंसार जादोँमोन।
सिगांथाराव एम्बु होन्नाय
आं उन्दै समथाराव रुंसार
जादोँमोन।
दा बिनि रौमारियाव रोदा
फेँखा गैलिया।
आनै जान'खियानो बिनि
बिसिमोन होनना बुङो।
बेबो दा रौमारिनिफ्राय
खारलांबाय।
आय' मानसिनि सोलेर!
जिउखौबो हमथा हाया
सोलेरखौबो बेसे गोबाव
अनसायनो
जुदि अबंआ गोसो जायो।
बे समाव आं सान्दोँ-
आयंआ सानफ्रामबो
एसे एसे जौ लोङोमोन।
बियो नाथाय दुगायामोन।
आयंहा मोनसे गोसो दंमोन
बियो गावनि हायाव
मोसौ खाहोआमोन गुबुनखौ।
हाया गोरा जायो होनना
बियो बुङोमोन।
गामिनि अनलायना रायजो
जालायनाय गोजोनै
गावजोँगाव खर' सुंबोलायनाय
बयबो बिहा बिनि
बेयो बिनि मदद नागिरो।
माब्लाबा समाव आयंआ नुस्लाबै
मोसौखौ सोरबा सोरबा
खायोमोन।
नाथाय आयंआ उनाव नुब्ला
मोसौखौ खुन्थिया बुखुना
हगार हरोमोन।
बेयो आयंनि मोनसे
जोबोद गिदिर गोरोन्थिमोन।
जाहोनाव बायदि रोखोम
बाथ्राबो सावराय जायोमोन
सिरि सिरि।
मानोना जोबनाय गैयै अबंनि
सोरजिनायाव
सोरजिजानाय अबंनि फिसा
बयहाबो
थांना थानो
मदद नागिरो, अनसायो
मोन्थाय थायो।
नोँ आं जोँ गासैबो
सासेल' बिफा अबंनिब्ला
जोँहा सुंथालायनायनि गोनांथिया
दं।
मानोना जोँ थांगोन-
फिन सोरबा गोदान फैगोन।
थागिबि रौमारि गामिनि आयंआ
अन्थाव बाथाव बोरायसानि महर
मोनस्लाबैयावनो
हरखाब अबंनि लेँहरनायाव
थांनो गोनां जाबाय सोरगोआव।

से सेकेण्ड समावनो मानसिनि उजिनाय
बेयावनो थैनायबो।
- - - - - - - - - - - - -
नै बोसोरनि उनावसो बिथां
हांखुला नार्जारीखौ दिनै
आमटेका बाजाराव लोगो मोन्दोँ आं।
दिनै समबार।
आमटेका हाथाय।
होंगो दोँगो हारसानि
गस्ला सुटार गलायाव
हांखुला आरो आं
सानैजोँ थाख थिख
लोगो मोनलायदोँ।
होँगो दोँगोनि गेजेरावनो हांखुलाया
लेँग्रा लेँग्रा थखन लानानै हाया
हाया एब्रे बोथारदोँ।
खृष्टानफोरनि बड़'दिन रंजानाय साना
खाथियाव मोनफै थारबाय।
हांखुलाया गस्ला सुटार बायनो बेसेबांबा
मानसिनि होँगो दोँगोआव
हाबसनफैनायखौ आं गोमोदोँ।
सिरि सिरि सान्दोँबो आं-
सालाया सिगांआव जेरै दुगा
दाबो बेबादिनो दुगा।
मोखांजोँ मोखां सौग्राव लायथारनायाव
हांखुलायानो आंखौ
सिनाय हाना मिनिसुलु रायदावग्रोदोँ ओरै-
मा लांफैदोँब्रा बा?होननानै।
आंबो मिनिसुलु बुंफिनदोँ-
नै गोजां बोथोरनि टेकसुइट् लंफेन
बायना लांनो नागिरदोँ।
होननानै।
आखायाव लानाय जलंगाखौ लुन्दाव दाव
नुनानैबो सोँफ्लांगारदोँ बिथां
हांखुलाया-
हा माथो लाखो बा?होननानै।
आंबो फिनदोँ-
नै अमा बेदर लानायानो सेरथाम।
दा मोनायाव ओँखाम गोरलैनि
एसे लोँनाय जानाय।
बाथ्राखौ आं फोजोबदोँलमोन।
बिथांआ सिरि गंस्रिना थादोँ।
गावनि आथिँ गज'खौ
नायनानै माबा सानहाबदोँ।
दसे समावनो आं हमनो हादोँ
बिथांखौ मानो दासो आंनि
सेराव मिनिग्लाब खुसि फैनाया
हथाद मोखांआव खोमसि जाफैखो।
दान्दिसे उनाव आं थेकसुइट् लंफेनखौ लानानै
थाथ'दो नोँथांआ
होननानै ओँखारबोयो।
लामा थारैनो बिथांनि फारसेल'
न'आव सौफैजासिम मेँगुलायनाय
सानफ्लांबाय थादोँ आं।
आरो न'आव सौफैनानैबो बेदरखौ
दोन्नानै आंनि खटायाव हाबना
टेबिलाव गुफुर बिलाइ,
रेबगन नुनानै
बिथांनि जालांनाय जाथायखौनो सल'
लिरजागोन सान्ना जुरिबायबो।
बावैसो समनिफ्रायनो जाया जाया
दिन आरो बोथोरनि खारि बुथुमनानै
सल' लिरनाय हुदाया जाहांथारबाय
आंहाबो।
दिनैबो नागारथारनाय नङा
गोसोआव थि सानखाबाय।
नै बोसोर सिगां हांखुला आं
समान थाखोआवनो फरायलायदोँमोन
बंङाइगाव कलेजाव।
जोँ मोजाङैनो लोगोबादि लोगो।
रायज्लायनाय सानज्लायनाय गासैबो
फेस्लायैनो गोरोबलायथारनायमोन।
माखासे बिथिँआवल' जोँ सम सम
लोगो जालायनो हायामोन।
मानोना बिथांआ सोरनिबा फार्टि,
लोँनाय-जानाय, सोबनायफ्राव बाहागो
लानो मोजां मोनोमोन।
लोँनाय-जानायाव बिथांआ रावनिबो
खमबो नंखाथारामोन।
दा माब्रै मिथिया।
आं दिनै लोगोमोनब्लाबो बिथांआ
हले सिगां जेरै दा एरै
रायज्लायनाया दं।
हांखुलानि आथिँआ दा फारसे गज'
आगदानिया।
बेखौ लानानै बिथांआ दिनै मेगन
थासेयावबो खाना बादि मोनो।
गोसो थासेयावबो लामा गैयै बादि।
मानोना गाव जेरै थांगोन
थांनो हाया।
रावबो दैबायग्रा गैया।
उनफिन्नो गोनां जायो हांखुलाया।
फरायनायाव मोजांथारमोन हांखुलाया
सिबाय लोँग्रा, जाग्रा बेरायग्राब्लाबो
फरायनायाव गोसो होग्रामोन।
दा बिनि आथिँआनो बेखौ
हरैबो थांनो हाया
फावसयलांथारनोबो हाया
खालामना दोनबाय अराय।
फरायनायखौ आथिँ लेंग्रा
जानाय लोगो लोगो
फोजोबदोँखौनो होनना
बुंनांसिगोन हांखुलाखौ।
नाथाय बिनि आथिँआ बोरै
लेँग्रा जाखो?
फरायगिरिया आंनिफ्राय खोनासंदोँ-
सानसेखालि।
कलेजनि सिगां आनजादखौ फोजोबनानै
हांखुला मोननियाव
आलासि जानो थांदोँमोन आं।
ओइदिनखालि दा बादिनो
बर'दिननि खाथि खाथि हांखुला बिबथैनि
न'आव ओँखाम गोरलैनि जानाय।
गामिनि सेंग्राफोर आरो
माखासे बोरायसाफोरखौ
खुमब्रा गुफुर जानायजोँ हांसोजोँ
जानाय लोँनायमोन।
न'सुं सेरावनोलाय हांखुलायाबो
लेँहर जादोँ बिमादैजोँ।
थांदेरदोँ आंबो लोगोसे हांखुलाजोँ।
गामिनि सावरि बादालियाव
मावा दाङाबाबो खाबसे-खाबनै,
दरसे दरनैया
बाहाग गोमाथारा हांखुलाया।
बे बारावलाय न'सुं सेर
आरोबाव असेथार बिबथै।
सेँग्राफोरा ग्रोन बेरेन्सि बना
लोँग्रोबाय थानायाव जिरायदेरदोँ हांखुलाया।
लोगो लोगोनो लुग्राफ्रा लुबायबो
मोनामग्लुंलायनाय।
बिमादैयाबो थालिर बिलाइयाव
खुमब्रा बोरायजोँ लगायना एवनाय
हांसो बेदरखौ होफैबाय।
खाथियावनो आंबो सियाराव जिरायना दंमोन
आंनोबो होफैबाय बेदरखौ।
नाथाय खाबखौ आं नाङा होनना बुंनायाव
सेँग्राफोरनो हरफिनबाय।
माब्लाबानो लोँनाय बोरायसा आरो
माखासे सेंग्राफ्रा फेदबनानै
नोँबा नोँ आंबा आं
गाव गाबागाव बाथरिखौ होगासिनो थायो।
सोरबाया गबथब गबथब खोनासंदोँ।
सेँग्राफोरनिजोँ बोरायसाफोरनिजोँ
बाथ्राया गोरोबलाया।
सेँग्राफोरना बांसिन गोसोथोलायनायनि
बोरायसाफोरना एसे
लगाय लथाय संसार जानायनि।
बांसिन नांलाय- खमलायनि
सोँखारि लायनाय।
सोरबा सोरनिबा गोजाम
जाथायखौ एरखांदोँ।
सोरबाया लुदोँ आरो गोदावदोँ।
सोरबाना बेदरा लाइयाव दरसेबो गैला
सोरबाना दासो दरसे जामदोँ।
हांखुलायाबो लोँनाय जानायाव खम नखाथारा।
बिनाबो माब्लाबानो उनसिन फैनायानो
लाइयाव दरसेबो गैला।
खाबखौ गोदावखांनाया
खेबबासो बारलांबाय रोखा रोखा
आं नुथारदोँ।
आरो आं गुबुनजोँ मेगन खोख्लैनायाव खेबबेसे जाखो आं मिथिला।
खाबावथ' जोबबानो जोबबानो
लुनो हायो।
नोगोद बाजौ रांनि लाबोखादोँ
हांखुला बिबथै गुलार नार्जारीया।
आवगायाव गावनो बुंखादोँ।
बेदरासो गैया जाबाय दा
हांखुलानि थालिर लाइयाव।
गल' गथ' जाबाय थानाय बोरायदब
हागोरामनि दरसेल'
जामनाय लाइयाव
आखाय फोलावहरबाय हांखुलाया।
सोरबा नायसनहरनाया थब्र खिन्थाहरबाय।
मानसिया सुथि मोनखांना
नायबा माब्लाबानो दरथामसो खुगायाव
होबायानोमोन हांखुलाया।
मानसिया रागा जागारबाय।
ओरैनोबाबो बियो एसेयावनो
एसे रागा जोँग्राखानो।
बे समावनो आं हासुनो
बाह्रायाव थांदोँमोन।
मा मा जालायखौ?
बोरै बोरै जालायखो?

सान्नायखौ हमथा हायै
जौनि निसायाव
नंखाय गोसोनिनो सानथ्रि जानाङो।
जायखौ सानो बेखौनो मावफ्लाङो।
बेलासि समाव हांसो गोदाना
खामसालियाव
दोन्नाय सिखा खुख्रि गोबौजोँ
आगदा आथिँनि हान्थु जरायाव
गोब्राबै दान्ना होयो
हागोरामा।

लिलि लाला थै बोहैयो।

सासे जाम्बा आरो सासे शहरनि सियान?
- - - - - - - - - - - - - -
लामायाव बुदांखौ बिरफुं
माहाजोना लोगो मोनो।
बियो सिनायै बुदांखौ रायदावो।
बिरफुं- नै फंबाय,
आंनो बैसागुनि बोरमा मासे
नांगौ जादोँमोन।
बुदां- ए, बुन्दा ना खासि?
ना बुन्दि?
बिरफुं- बुन्दाबाबो जागोन,
खासिबाबो जागोन फंबाय।
बुदां- ए, जोँहानि आदा बेरग'नाव
मेल्ला बोरमा दं।
र थाथ' सोँहैनां।
(खारलाङो फैफिनो)
फानोनो आदा।
बिरफुं- मा खावसेल' फानो!
बुदां- नङा आदा,
मानि गोरोन्थिया आंनि।
फानोनो।
बिरफुं- अ' मोजाङानो जाबाय बिदिब्ला।
हा बुन्दाना खासि जाखो फंबाय?
बुदां- र र नायनां..
(खारलाङो फैफिनो)
आदा बुन्दा।
बिरफुं- खोनासंनो एसे बोरैबा मोनो।
बुन्दाल' होन्नानै आदाखौ
बुङाब्लाबो जागोन फंबाय।
बुदां- माने आदा...
बैसोआवथ' नोँ आंनिफ्राय
देरसिन जागोन आदा।
बिरफुं- आरसा जाथोँसै बिदिब्ला।
हा बोरमाया माबादि जाखो?
बुदां- बोरमायाथ' लोदो लोदो आदा।
बिरफुं- माने एसे फुंहांनाय नामा?
बुदां- नङा आदा,
एकदम लोदो लोदो।
बिरफुं- मा गाबनि जाखो बोरमाया?
बुदां- ए, बावलायबायसो।
र र नायनां...
(खारलाङो फैफिनो)
गोजालै आदा बोरमाया।
बिरफुं- माने गोजाहां नामा?
बुदां- नङा, एकदम गोजाथार।
बिरफुं- अह' माने फंबाय...
आंखौ आदा होना लसेनो
गिदिर होनबा मोजां
जागौनामा?
बुदां- जागोन जागोन,
महर मुस्रिखौ नायोबा
आरो सोलेरखौ नायोबा
नोँसोरबादिखौ बुंजायो।
बिरफुं- अनुमान बेसे जागोन फंबाय
अजना?
बुदां- ए र र,
(खारलाङो फैफिनो)
सेरबासो जागोन गिदिर।
बिरफुं- दामाबा बेसे जागोनथाय?
रायज्लाय हैनांसिगोन फंबाय।
बुदां- ए र र, थांनि...
(खारलाङो फैफिनो)
15जौसो नांगोन होन्ना
बुंदोँ गिदिर।
बिरफुं- हाब फंबाय माबादि 15जौ जाखो?
नुफेरा खोनाफेरा मुंनि
जौ जाखो बेलाइ?
1000बियार जौआनो जाया होनबा?
बुदां- र र आं रायलाय फैनि...
(खारलाङो फैफिनो)
मानिथारानो गिदिर।
15जौ नांथारगौ होन्ना बुंदोँ।
बिरफुं- हा बहा मोननांगौ जाखो फंबाय?
बुदां- र र आं मोजाङै सोँहैबावनि...
(खारलाङो फैफिनो)
मानिथारानो गिदिर।
बिरफुं- हा बहा मोन्नांगौ जाखो फंबाय?
15जौआलाय भुटाननि ना लण्डनि जाखो?
ना ना आसामनिनो जाखो?
बर'फोरनि?
बुदां- (मिनियो) ए...
हा: हा: हा;-
15जौ मानि फन्द्रस'खौसो
होन्दोँलै आदा।
बिरफुं- ए..., हा: हा: हा;-
थौ फन्द्रस'आलाय आंनाव दंखायो।
थौ नायना लाना फैनि।
नोँनो 1000बियार जौ लोँहो थारगोन आं।
बुदां- 1000गाहाम बियारखौ आं लोँनो
हानाय नङालै आदा।
गंनैसो बारा बियार लोँहोबानो जायो।
मोनलोँफेरथाराखौ आं माबादि
बियार जौ बेलाय?
गिदिर गोलावफ्रासो सालाफ्रा....।

हाफालिया सिला सिबबाय थायो।
लावथि लानानै जुंगाल बोराया
खाथियाव फैयो।
जुंगाल बोराय- आं थांनोसै बुरै।
मै होनो।
हाफालि- हा थांदो आरोमा।
बैसागुआबो फैथारबायानो।
आं हले एबाराव होख्लाय थारगोनहाय
बोराय।
जुंगाल बोराय- आं थांबाय।
दाखामानिया थाम थिम
खालामदो।
आरो एबाराव सोरबा सोरबा
फैयोनो।
मायब्रानिबो संनो थिनहरदोँ
नोँसालाया।
ओँखार लाङो।
सोरांआ दान्दिसे उनाव हाबबोयो।
सिला सिबनाय हाफालिखौ
रायदावो।
सोरां- मादै।
हाफालि- ए, आदै सोरांसो।
जिराय आदै।
सोरां- नाङा मादै।
फुंखामोना बैसागु जानो फैयानो
मादै?
हाफालि- फैगोन।फैगोन,
खौरां हरदोँ।
सोरां- आदैयालाय गैया नामा?
बहाबा थांदोँ?
हाफालि- दासो ओँखार लांदोँ आदै।
बोथोर मोजांखाय
मै होनो होन्ना
लावथि लाना दासो
हाखु दाखु थांबाय।
बैसागु बोथोरबो सौफैलायबाय
नालाय।
सोरां- हाब आंबो थांगौमोन मादै।
मै होनो।
होनो मोनफेर थाराखै आं मैखौ।
र' र' आंबो थांनि।
खारलाङो गावसिनि न' फारसे।
दान्दिसे उनाव बाथुल लाना
फैयो।
हाफालि- हा मा जानायनि नै
खारलांनानै दानो
सौफैखो?
मेँगुलायनाय।
सोरां- बाथुल लायनायानो आं।
बाथुलखौ दिन्थियो।
हा आदैयालाय बोरायराय बोरै लावथि
लानानै मै होनो
थांनांगौ जाखो?
हाफालि- जाम्बा।
दा नङाबा बहा दुब्लियाव
लावथि मोन्नांगौ जाखो?
न'निफ्रायनो लाना थांखाबाय आरो।
सोरां- बबेजोँ थांखो मादै आदैया?
आंबो थांनि थाथ'दो मादैया।
मोनथ्राबाबो दाउखौनो मानैसो
मोनबानो जायो।
खारलाङो।
हाफालि- मिनियो आरो हार्सिँङैनो बुङो।
उन्दैयावनो बै हष्टेल
बै हष्टेल इंराजि मेडियाम
फरायनाय गथ'।
माखौ मै होनाय,
माखौ सामार होनाय,
बाव होनाय बोरै
मिथिबावनो?
जोँबादि जाम्बिनि फोरोँनायखौ बिसोर
बहा गनायना लानो?
बुजिनोथ' हाखाया।
मिनियै मिनियै न'सिंङाव
हाबलाङो।

सावगारि: दैज्लां दुब्लिनि मोनसे लामायाव
- - - - - - - - - - - - - - -
आसि- हा बहा ना मोनबायनांगौ जाखो फाग्लि?
खोमास्रि- आयौ फाग्लिया बहा थांनो ओँखारदोँ?
बेन'थि लालायनानै?
आसि- (मिनिस्लुयै) नै फाग्लि!
इ.एम लेँहरदोँहाय।
जोँनि सेल्प- हेल्प आफादनि आर'जलाइ होनाय दंमोन।
50 रोजा मोन्नांगौ दं।
हा बेखौनो लायनो थांनो आरो।
खोमास्रि- फाग्लि नोँहा आफादारि(आफादगिरि)
जाबायनालाय।
आसि- औ हाय; जेरैबो प्रलेम(फ्रब्लेम)।
फा नोँहालाय बहा जेखाय लानानै
ना गुरहैनांगौ जाखो?
खोमास्रि- माबाहाय आगै,
थावथाल दुब्लियाव ना
रोनावसो गारदोँनो।
बेखौनो दाहाय मायरं सेरनैसो
मोनोखोमा गुरनो थांनां।
आसि- फाग्लि! बेलाव
ओँखारसो गारदोँनोहाय।
गिथाव बाथाव गिदिर गिदिर थारनो।
फाग्लि बेलावनिसो आदार जाहैगोन नोँ।
खोमास्रि- बेलावखौनो गिबाय आगै?।
आसि- फाग्लिया लेखा रोङैखायनो जेबो बुजिथारा।
बेलाव मानि गुन्दाफोर ओँखारसो गारदोँनोहाय।
दाखालि बुगालियानबा
जेखाय खबाय गारना खारबाबो आगोर मोनाखैनो।
खोमास्रि- आयौ नंमारगौ आगै!?
आसि- औ हाय आब'।
गुरहैयैआनो
मोजां जासिगोन।
खोमास्रि- आयौ थु,थु,थु।
मायरंआनो गैयामोन आंहा।
माखौ जागोनदे फिसाफ्रा?
बिफायाबो नै बोसोर जाहैबाय
मेगालयआव,
गदसेबो रांखौनो हरा।
आसि- ना गुरनाय, मेगं खानाय,
खामला- हाजिरा
मावनायखौ गारनांगौसिगौहाय
बर' आयजोफ्रा।
नङाब्ला देभाब(देबलप)
जानो रोँथारनाय नंला।
नायहरसाय आब'
मालाय हेनथामनि बिसि आरो
लामबुनि बिसिमोनखौ-
मालाय सुथुटि (स्कुटि)
सालायलायनायखौ।
खोमास्रि- जोँ गोरिबफ्रालाय बहा सालायनो
हानोबाल आगै'?
गावनि जानायखौनो सुफुंनो हायाखै।
न' बां गलि गग्राफ्रानो गैजाबाया।
गारि मटरनि सिमांखौ
हांगुबुर जानाय एमाव बहा नुनो?
फिसा फिसौफोर लानानैनो
बेसेबांबा जिँगा आंहा।
फोरोँनो हायाखै,
मोजाङै फेदेरनो हायाखै।
आसि- गिदिर गिदिर सिमां नुनांगौहाय आब'।
बयजोँबो सिनायथि
जानांगौ।
जोँफोरखौथ' रावबो सिनायि गैला आब'।
इ.एमनि बडिगार्ड, बिसि फिसा
आंखौ गासैबो सिनायगौ।
खोमास्रि- नोँ आफादारि जाबाय नालाय आगै।
आसि- आं बायदिनो जानो नाजादोहाय आगै।
सिनाय जानायनि सास(सान्स)
दं।बेफोरबादि
ना गुरनाय, मेगं खानायखौ
गारदोहाय आब'।
बादायारि मुगायाव जाम्बि नुसो गारो।
आयौ समासो बाराजाथारबाय
थांनोसैहाय आब'।
खोमास्रि- दे आगै आंबो न'आवनो
थांफिननोसै।
(साफा-फारफा मोखां जायो।)

आंनि जोनोमा आयनि मिजिँ
नंखाय नङा आयनि मोदैया
फैमाल नङा आयनि दाबिया
बेसेबा दैज्लां- मेसेँ
बेसेबा फागुन- बैसागु
सिमां साजायनाय गिदिर
मिजिँ सुजुनाय गोथार
बहा आंनि रंजानाया?
आयखौ गारनानै-
आयनि मिनिनायाव हाद्रि सारनानै।
फिसा जानानै असे बिमानि
रंजानाय- मिनिनाय थांना थानायनिब्ला
आंनि जोनोमा आयनि मिजिँ
सिमां- मिजिँ जिउनि आबिर
आयनि गासैबो सोरांब्ला
आंनोथ' आयनि नङा होनब्ला साथि?
बेनो जोनोम नङा होनब्ला आंनि?
अब्लानोथ' आं बिजिर मोनो
गुसु मेलेमजोँ हमना मोनो
आंनि जोनोमा आयनिनो जिउ खावसे।

गोबाय गिजि गंसे देरायाव
फेरलेब फेरथेब हिनि साब्रै हावरिया
बोसोर बोसोर जाबाय गामियाव।
सानै गथ'आ गय दनायखं बुथुमो
हराव हरफा बिजाब फरायो
बिसोरो बेखौ मिथिगौ
- फिसा सिमां नुनाया फाफ।
सासेया सिबाय रुवाथि थाहैबाय
बिफाया सुथुरनि गुलियाव थैलांबाय
खोनायो सानसे हादर सिबियारिमोन।
हावरियाखौ हावरियानो मुगैयो
घोनिया घोनिसिनखौ मेगन सायो।
सोलायाखै दाबो सुबुंनि सानस्रिया
घोरोम बुजिनाय गियाना हाब्रुआवसो
गोदोदोँ दाबो गोदो गोदो।
सियाल मासेबो फैया
दाउ अमाया गैयाब्ला बहा फैनो?
सैमा मावजि मासेबो फैया
ओँखाम खालाय मोनजायाब्ला
बहा फैनो बिसोरलाय?
सोर दं खाथियावलाय
गासैबोसो गरसे हावरिया
घोनिया गोरिबखौ सिनाया
हावरियाखौ हावरियानो मुगैयो।

आंनि आय आंनि आफा
बेसेबां अनो गावनि आंखौ
बेसेबांनि अख्रा अब्लाबोदि आं।
आंनि गोरोन्थि आयै
आंनि नंखाय दाख्रायनाय आफा
नोँसोरनि गोलोमदै बेसेन मोन्दांथियैआ।
बेसेबा सिमां आयै नोँहा
गिदिरथार मिजिँ दं आफा नोँनि
गासैबो मिजिँ जोनोम आंनि।
आंनि गोरोन्थि आयै
आंनि नंखाय साजायनाय आफा
बेसेबा अख्रा दाबो आं।
नोँसोर गोथार मिजिँआव
गोथार मेगन थांखियाव
सोमखे नुवाखै सोरांआव
अलसिया आं बोरै बिजिरनो?
गाबदोँ दिनैसो थेवबो
अन्थाइया मोदै हुगारनायबादि,
दुखु- दाहा नोँसोरनि सहायनाय
नोँसोरनि मेगन देग्रं जालांनाय
हामख्रेँ सोलेरनि सावगारिया
आबाद दुब्लिनि गोरान फसलाव।
साननो होदोँ उल्टायै आंखौ
जेरै बेसेबा गुबुनथारमोन
आंदि बेसेबा जाम्बा
बेसेबा मेलेम गुद्राथारमोन
दिनै मेलेमखौ बेखायनो
उनै उनै फोजोँनो नाजाथारदोँ
अलसिया गोलाव सोलेरखौ
गोख्रोँ राफोद खालामनो।

आंनि आय आंनि आफा
बेसेबां अनो गावनि आंखौ
बेसेबांनि अख्रा अब्लाबोदि आं।
आंनि गोरोन्थि आयै
आंनि नंखाय दाख्रायनाय आफा
नोँसोरनि गोलोमदै बेसेन मोन्दांथियैआ।
बेसेबा सिमां आयै नोँहा
गिदिरथार मिजिँ दं आफा नोँनि
गासैबो मिजिँ जोनोम आंनि।
आंनि गोरोन्थि आयै
आंनि नंखाय साजायनाय आफा
बेसेबा अख्रा दाबो आं।
नोँसोर गोथार मिजिँआव
गोथार मेगन थांखियाव
सोमखे नुवाखै सोरांआव
अलसिया आं बोरै बिजिरनो?
गाबदोँ दिनैसो थेवबो
अन्थाइया मोदै हुगारनायबादि,
दुखु- दाहा नोँसोरनि सहायनाय
नोँसोरनि मेगन देग्रं जालांनाय
हामख्रेँ सोलेरनि सावगारिया
आबाद दुब्लिनि गोरान फसलाव।
साननो होदोँ उल्टायै आंखौ
जेरै बेसेबा गुबुनथारमोन
आंदि बेसेबा जाम्बा
बेसेबा मेलेम गुद्राथारमोन
दिनै मेलेमखौ बेखायनो
उनै उनै फोजोँनो नाजाथारदोँ
अलसिया गोलाव सोलेरखौ
गोख्रोँ राफोद खालामनो।

खुगायाव बुंदोँ हारि हारि
जानाय समाव बिसिनाव सोँखोमादोँ मा इंख्रि?
सोरखार जालाय हाबाब सोरखार जालाय
बैसागु बोथोराव बाराबाव देलाखब देलाखब।
थाव नालेँखरखौ दाफबलिया हाबाब
मल मल मोदोमनाय अइलसो दाम दाफब
बुंनो थांब्ला बियो बारिनि मैखुन थंग्ला
ओरैनो हनै लरला लरथा।
हाबाब हाबाब आदैया
बिखायाव बुयै बुयै बुंना लायो
आंनि समान संसाराव सोरो दं
जौ बेदर खाफालाव मोन्नो गोनां।
लेखाबो फुद्दा रोङा
अ आ क ख सिनाय रोङा
सानस्रिया बुङो हाबाब
गोदोनाय हारिया उदै बुङा
नोँबोथ' आदै जेबो रोङा।

थाखो 10 खौ उट्रिनानै
कलेज फरायनाय समाव
सासे सेँग्राजोँ रं नाम्बार जादोँमोन आब'आ।
बेयो बेँलराव माबा खामानि मावोमोन
मोजाङै मिथिनायनि सुलुं गैया।
मिथिनोबो गोब्राबै नाजानाय जायाखै।
से बोसोर मोजां मोनलायनाय
फुरा जाया नङा जादोँमोन।
बेनो उनाव जानायसै
आफानि बिजामादै।
बेँलरनिफ्राय फैनाय समाव
बेयो जानांगौ बाथ्राखौ थिक सान्दोँ-
एसे साननि उनावनो
जोँहानि न'आव बियो सासे आलासि।
जायै- सावरायै आब'खौ लानानै थाङो
आलासि महरैसो,
हिनजाव गोदान नङा,
नाथाय बहा?
आब'आ फैफिननो बोलो गैया
बेजों बिनि जुलिया जालांबाय
आय- आफा आरो आंनि
सोरबा रायजोनि हेँथा बहा?
गैया गैया हेँथा गैया;
नाथाय जुलिया गमामायै जालांबाय।
घोरोमबादि गिर्जायाव जुलि
रायजो राजानि बोर आरो दान
हाजासे मदद।
दिनै बियो गोग्गा
गावनि फेरलेबसे गियानखौ लानानै।
आं मिथिगौ बेखौ
बिजिरनोबो हागौ
रायजो राजा बयबो मिथिगौ
बिसोरो नुदोँबो अराय।
बियो सोरनिबा रोँदोँ
बियो नाथाय मोनसे दाहारसो
सुखुनांगौ बे दाहारखौ
सोरखौबा फोरोँफिन्नानै मोजां।
मानोना बाथ्रा दं-
नोँनि रोँनाया नोँनि नङा
सोरबा सासेनिसो फोरोँनायाव।
बियो जौ लोङा
सिगारेड् बिरिबो सोबा?
नाथाय मोजोमसे गोग्गा
रावनिबो उन्दै नङा
रावनिबो गेजेन नङा
रावनिबो रोँसिनै नङा।
नुग्राया गोरोँखौ गोरोँ बुङो
रोङैखौ रोङै बुङो
फुं, सानजौफु, बेलासि, मोनाबिलि
सान- हर होन्नायबादि।
नाथाय खोनायोब्ला?
नंगौ नङा, जादोँ जायाखै
गियानजोँ बिजिरनांगौ जायो।
घोरोमजोँ नागिरनांगौ जायो।

आयै बिमाबो लष्ट जाबाय
हिर' हन्दायावबो गाखोआमोन
फाल्सार बुलेटआवबो गाखोआमोन
ब्लद फाग्लि फाग्लि
साइनिस मबाइलजोँसो बियो खारफालांबाय।
फैमाल जाबाय गासैबो
ओरैनो माइनास थांबाय।
थांनाय दामासियाव दखना बायना हरबाय
फैगौ बैसागुआव जुलिनि खोथा होबाय
थांनाय फागुन दानाव फार्कआव थांबाय
फैगौ सानाव सेनेमा नायनो बुंबाय
फेलेँ थांबाय आय'
ओरैनो निलाम थांबाय।

बिब'जोँ नंनाय नङैनि
नांलायग्राखा फिँखिया बुंफिनो
- आंनो ओँखामखौनो एसेल' दोनदोँ।
बेबादियाव थाब उखैया जायो?
अनिमाया जेबो बुङाखिसै।
बियो माब्लाबाबो बिनानावजोँ
देरहा फेरखाया।
दे संदो होननानैल' गावहा टि.भि. सो मिनिग्लाबलायनाय नायबाय।
बिमा बिफाया मोनाबिलि 8 रिँगायाव सौफैबा
फिँखिया माब्लाबानो ना बेदर नेया लासेनो
दालि जहलजोँनो जानानै
आं दाहाय जाला होननानै
खथायाव हाबहैबाय।
ना बेदर संनाया अनिमानि बाहागो
गोग्लैबाय।
बिमा बिफाया सानैजोँ बाथ'रि नायबाय।
ओजोँ फिँखि आरो सिकेन सानैजोँ
गाव गाबागाव खथायाव थानानैनो
दुमथेनाय सिमनायाव थालायनानै
रायज्लायबाय थाबाय।
मादि मादि रायज्लायदोँ मा आयदाखौ लानानै
आं मिथिया।
नाथाय आं सिरि सिरि सिकेननि खथायाव
लासै हाबहैबा खोनाबाय
फिँखिनि गोदै रावखौ
- नोँ आंखौ थारैनो गावनि सानमारोना?
एसेयावनो आं सिकेनखौ जाम्बा बादि
इन्जुराव खोमा होथाबनायखौ
नुनानै बुंबाय
- मा खालामदोँ नोँलाय?
- नै दहायनि Homework खौ बेबादि लिर
बेबादि लिर होननानै
खिन्थाहरनायानलाय आं।
बियो आंखौ सोँफिनो
- मा खौरां?
- नोँनाव बुमसु दंमोन दा?
नांगौमोन आंनो।
- अ' दंङ लां नो होननानै
आंनो गावनो गथायो।
आंबो लानानै थंब्लेद बारनबोयो।
अखानायै फुंआव सिकेननि मबाइल सार्जारखौ
हैफिनब्ला बिनि खथायाव
लेखा फरायग्रा टेबिलाव बेदर हारा
ज्राव नुदोँमोन आं मोन्थामसो।
मेगन आलौना सानफ्लांदोँमोनबो आं।
साला बेखौ माहाजोना गोगोम अनथारो।
बेदर होफैलायदोँ।
आंनोबा?
अलसियानोसो- बायदि बायदि साननानै
ब्लद ओँखारफिनो।
आरोबा दानसेनि उनावनो PU आनजादआ जोबलांबाय।
आंबो नआव फैनो थि खालामबाय
बिथां सिकेन बाबुआबो।
अखानायै फैगोन नआव।
मोनायाव नायै बेदरै
जाहोस्राबाय आंखौ।
थांखिया सिकेन आरो आं सानैखौनोमोन।
नाथाय सिकेना लोगोफोर लेँहरदोँ फार्टि दंनो होननानै थांदोँ।
हाजासे हार्सिँङै गेन्द्रा-द्रा जालायबाय आं।
माबा गोजा बियार बायदि
बथलखौसो रायखांदोँमोन माहाजोन
माग्लां आदैया।
नाथाय आंहा खहाबनाय गैयालै आदै होननायावसो जादोँ।
अखानायै फुंआव न  फारसे जोँ
सिकेन आरो आंजोँ फैनो
आगान होब्ला सिरि सिरि
फिँखिया गाबखोमादोँमोन।
बिमा बिफाया गाबनायखौ नुदोँ।
बिनि गोगो मोदै गसरनायखौबो
मेगनावनो नुथारदोँ।
नाथाय मानि मोदै बियोदि बिजिरनो हायाखै।

लजिँआव दानथाम लोगो मोनलायनाय
सिकेन मोसाहारिया
दिनै आंनो खौरां हरदोँ।
आंनि हाबायाव फैथार होननानै।
बेबादि उन्दै बैसोआव
मा हाबानि खौरांब्रा बाबु?
होननानै खैखायै बुंहरो आंबो।
थगायाखैलै नोँथां फैथार।
फैगोन बरदिननि सिगां सिगां
जाथारगोन हाबाया।
नंगौना नङा खैखायै सोँबाय थानायाव बियो
नंगौ नंगौ नंगौ बुंथारबाय।
- हा बहानिथो लाबोखो?
रं नाम्बार नामा?
- नङालै रं नाम्बार नङा।थिगानो।
- बहानि जाखो खिन्थाया मानो?
- लजिँआव लोगो मोननाय नोँथां।
- अ'... फिँकिया!??
लामा थारैनो सानबोयो आं।
सेथि थाखोनि जायगायाव नङा।
रोजा रोजा फरायसानि अनजिमायाव मुंखौनो
मोनाखै सिकेन बाबुआ।
-----
सिकेन बाबुआ ओरैनो बिसिनायाव
गोलांनानै दंमोन।
खोमायाव बेन्दोँ लानाया बिनि सरखा।
बांसिन इंराजि पप मेथाइखौनो खोनासङो।
ओँखाम जानायनि समबो जाबाय।
बियो दाबो ओँखाम सङाखै मेगंबो हायाखै।
ओरैनोबाबो नआव खेबसेबो ओँखाम संफेर
बायखायाखैमोन।
दिनै लजिँ लाफैनानै दानसे बारलांबाय।
समाव संना जायो समाव जाया
बानायानो बेखौ ओँखाम उखैनो होआ?
नाथाय बियो दामानि हामख्रेँ जालायलांबाय।
लेखाखौबो बांद्राय फराया।
उन्दुनाय आरो बेरायनायनि बांसिन समा रुटिन जाबाय।
सम सम आं संनायखौ
थाव-बा-दाथाव जासाब बायो।
बांसिन गोथावखौनो होनफेर बाया।
ना बेदर ओंख्रिब्ला बांद्राय जायो।
नाथाय खुगा लावहाब लायनाय
सिबाय आलौ जानोबो थोयो।
सिकेन बाबु आरो आं सानैजोँ
सासे माहाजोन्नावनो बोरैबा
लोगो मोनफ्लां फैदोँ।
सिगाङाव जोँ माब्लाबाबो सिनायलायफेराखैमो।
दिनै दानसे बारलांनायनि उनावसो मोजाङै
सोँलाय- फिनलाय मिथिलायनाय जाबाय।
सिकेन बाबुआ आमगुनि।
गावलाय होन्दोँ बिमा- बिफानि सासेल'
नायल'- जाल' फिसा हौवा।
गावनि आरो उनबो गैला
सिगांबो गैया।
मेट्रिक आनजादखौ कैला मैला सेन्ट पिटार
इंराजि मेडियामनिफ्राय
सेथि थाखोआव उथ्रिदोँमोन।
बिथांआ आमगुरि गोजौसिन गेजेरारि
फरायसालियावनो फरायनायमोन।
बिथांआनि सोँनायाव आंबो थगायनानै खिन्थादोँमोन ओरै होननानै-
मेट्रिक आनजादखौ आंबो 359 नंबराव उट्रिदोँमोन।
बिमानि रावआव लेर्टा लानानै।
नंगौ नङा जोँ सानैबो फोथायलायदोँ।
बियो आमगुरियाव फरायनाय आरो
आं बिजनी कलेजआव।
नै बोसोर जानोसैआनो आं माग्लां
माहाजोननि साथाय बेरा नआव लजिँ लानाया।
एसे माहाजोनबावबा गोसोआ RCC नआवनो
थानो थारमोन।
सिकेन बाबुआबो लजिँ नखौनो मोनथाराखिसै
नागिरबाबो होननानै आं थानाय
साथाय बेरानि नआवनो ग्रोब।
PU आनजादखौ सेथि थाखोआवनो उट्रिगोन।
आंबो सिरि सिरि सेथिखौ
हाथाराबाबो नैथिखौ नाजाथारदोँ।
सिकेन बाबुआ माहाजोननि फिसाजोफोर उन्दुग्रा खथानि दुमथेनाय
फारसेजोँ नखौ मोन्दोँ।
नआ बारा मोजां नंलामोन
अब्लाबो थानांबाय।
आंहा सिला बारनानै सोनाब फारसेजोँ
सिगांनिफ्रायनो दं।
सिकेन बाबुआ अलसियानि थाखायनो
गावनि उदैखौनो गावनो
सुथेना लानानै फिसिनायाव
गोलांना दाबो दं।
बेलासि 3 रिँगायानो जानोसै।
माहाजोननि फिसाजो उन्दैसिन फिँखिया
फरायसालिनिफ्राय गना फैबाय।
लासै सिकेन बाबुखौ दंना गैया
दरजोँ नायखंख्रे हरो।
गावनि खथायाव हाबा लासे सिकेननि खथायाव हाबना सोङो
- मा ओंख्रि जाखो?
- जायाखै
- मानो? उखैयाखै?
- बानानैनो संजायाखिसै।
गोलाव हांमा सुरनानै
फिँखिया रैसुमै गारांजोँ बुङो
गोरबोनि बाथ्रा।
- लोगोफ्रा लाखियाबा आं दहायनो फैदोँमोन।
अख्रा लोगोफोरजोँ आंबो
थाबोनांबाय।
आं थाबै फैयोमोनब्ला नोँ
उखैजानाय नङामोन।
र' थाथ' होननानैनो ब्लद ओँखार लांफिनबाय फिँखिया।
सिकेन बाबुआ गल' नायहरबाय थाबाय
खोमानि बेन्दोँखौ सोफिन्ना।
बियो माबा साननो लामा नागिरदोँमोन
समावनो फिँखिया ओँखाम लानानै
हाबफैबाय।
लाजि गुसु जारौ मिनिसुलु मोखांङै
बियो बुङो
- आं नोँनो ओँखाम लाबोबाय जादो।
- थाइम बारा जानायखाय आं
उखैयाखिसैमोन।
मानो ओँखाम लाना फैलायखो?
- जादो नाबो दंखायो नै।मेगननि फावजोँ।
- नोँलाय माखौ जाखो?
- आंनि बाहागोखौ आं गारबो खादोँ।
- थगायाखैथ'?
- नोँखौलाय आं मानो थगायनो?
दे जादो।होननानै गावहा
दलत बिसिना सायावनो जिरायबाय।
अलसिया सिकेन बाबुआ आखाय सुनानै
गोथाव जागारबाय।
मालाय संनाय मालाय।
बेनि सायाव आरो नाबो दंबावोसो।
फिँखिया जोबोद गोसो होनानै नायबाय
सिकेन बाबुनि ओँखाम जानायखौ।
फुरागासे ना फ्राय एवनायखौ
सोलास्लिब लायनाय जानायखौबो मिनिनोसो
ओँखारगु लायबाय।
गावनि फिसायखौ रानथाब फोनथाब गाव थानानैबाबो
सिबिनाया हिनजाव हारिनि घोरोम।
फिसायनि दान दोन लायालासे गोथार
सिबिनायजोँ अननाय मोजां मोननाय
आजावनायानोथ' हिनजाव माहारिनि जोनोम।
खौखाबखौ आखायजोँ सुंथानानै
बायदि सिमां मोकथां सान्दोँ फिँखिया।
एसे समावनो गेन्द्राद्रा
जालायनाय जाखांनानै सिखारो सिकेन बाबुआ।
उथै बिलिरनानै आ'....
होननानै बुंब्लासो थाल मोनलायबाय फिँखियाबो।
लोगो लोगो दानो जाखांबायबो होननानै थोरसि खुरैखौ लानानै
गोख्रै ओँखार लांबाय।
माबार माबार थोरसि खुरैफोरखौ सुस्रांनानै
सिकेननि खथायाव थ्रोब
हाबफैबावबाय फिँखिया।
बाथ्राखौ सानैजोँ जुरिनो थियारिल' जाहांदोँमोन
लाजिसुलु मिनिसुलु मोखांजोँ मोखां नायदेरलायनानै।
एसेयावनो आंबो थ्रोब हाबदेरो।
लोगो लोगो सिकेननि खाथाखौ
लानानै ब्लद ओँखार लांफिनो फिँखिया।
फिँखिया ओँखार लांथारनायनि उनावसो
सिकेन बाबुनाव सोँबाय आं
- मानो फैयामोन बेलाय?
- Homework हरदोँनो माष्टारा।
बेखौनो आंखौ गाव हायिनि
आंनो होफैनायानो।
बाथ्राखौ आं सिकेन बुंनायबादि सानाखै।
मानोना सिकेननि खाथाखौसो टिबिलनिफ्राय लांनाय
नुथारदोँ आं फिँखिखौ।
दसे उनावनो आंबो थगायसुला
सिकेननि नखिया मबाइल सार्जारखौ लाना फैयो।
आंना गाज्रि जादोँमोन बोरैबा।
मबाइल बेटारि सार्ज गैला
आंनि बिखा बर'नि फ्लिम
नायना गोजा जालांबाय।
बेलासियाव 4.30 रिँगायावनो ओँखाम संनो
नागिरबाय फिँखिया।
संफेरा संफेरा।
मानो हांगादावरा जादोँ मिथिया।
बिब' अनिमाया बुंबाय नुनानै
- दिनै मा जादोँ?
सैमा खिफिदेरदोँ नामा?
ओरैनोबा माथो 7-8
जालायबाबो नांगौबा जायाबो होनलाय लाङो।

मोनगोन साजा नंखाय फोलाबोला
इनाय गुबुनखौ खालामबोला,
इयुन समा फोरमान जाबोला।
हाबाब! फै लामाजोँ जेरै सोरांजोँ
नंखाय माया अगेन नेवसिनायजोँ,
होदो आगानखौ गेबेँ सान्नायजोँ।
फांथेनाय गैयै गोगो गोसोनि
हगार बाना देँखो निजोरा
रुगुं गैयै अनसायनायजोँ
बे जिउआ गोथार गोजोँ समायना।
बे दिन्थिगासे सायना सालियाव
थाबायनो हानायबादि सोरबा सायाजोँ
नुनाय लामा जोँखोल मेगनजोँ
देँखो बोनाय सोरां लामायाव
थाया जिनिद मोनसेबो गियानाव।
दावबायलु बे मुगाया दिनै
मिथिँगानि सोलायसुलि मुस्रियाव
होदो सोरां गोसो आगानखौ
सोरांनि थखनजोँ दावबायनायखौ।

नै जिउ आंनि लोगो
आं बुंनो हागौ जायखौ आं बुंबाय
बेनो ओँथिया हम आंनि आखायाव
बेसेबा मोजां, जिउ अनसुला नोँ
आंखौ साजायो बेसेबा समायना मोन्दांनाय
जेब्ला लोगोसे आं नोँजोँ, आंहा मिजिँ
नोँनो मिथिगौ, बेसे गोथौदि आर'जआ
थारैनो ओँथि नोँ बिजिरो-
नोँनो गासैबो जाहोना मानोदि आं
सिखारो एमनिफ्राय फुंआव
बेनो जाहोना गासैबो
मावनोदि गासैबो साजायो सान्ना
मानोना बेसेबां नोँदि दैबायो।
नोँ आंनि अनसुला सोलेरनि
लोगोसे नोँ जिउ आंनि गोरबोआव
सैथो बियो आंदि सासे नोँनि।
आं मोन्दांथियो जेबो समफोराव
बेनिखायनो नै नोँखौ मोजां मोनो
नोँनो आंनि जिउ बिसुखे,
आंनि जेरैबो नोँनि
आंनि सोलेर थासान्दि मुलुग,
नोँनो सासेल' जाय गासैबो,
नै जिउ आंनि लोगो
हो गोजोँ लामा सोरां
नोँखौ मोजां मोन्नो अराय
नोँनि बोसोन सोलेर फालिनो।

हाबानि बेम फार्टिनि रिँनाय देँखोआ
बयनिबो गोसोखौ सिमब्रेना होयो।
बियो हाजासे हिनजाव गोदानखौ
मानोबा सोगाबो।
हिनजाव गोदानखौ हाबानि समाव
हिनजाव लागोआ गाबनाय नुयोब्ला
रावबो गाबा लासे थानो हाया।
बयबो फे- फु हाजासे गाबो।
हिनजाव गोदाननि बिफा आरो बिनि बिब' बिनानावफ्राथ'
गोगो थरथिँ थरथिँ मोदै फसरना गाबो बाराद्रायबाव।
अनसुलाजोँ फैसालिजोँनि जुलिया दिनै जै जै है है जाना थांबाय।
हिनजाव गोदान महरै फैसालिया
हाजासे गाबलांबाय।
बिनि मेगना मोदै गनानै रानथाबलांनाया गोब्राब जालांबाय।
हाबानि समाव अनसुलाया हिनजाव गोदाना
एसेबां गाबसेयावबो गाबाखै।
बियो सान्दोँसो नामाथाय-
हाबानि समाव हिनजाव गोदाना गाबोब्ला
बांसिन जुलिनि साजायनाया बांसिन समायो।
जुलिनि अराबो रोहो रोहो मिनिस्लुयो।
गोथार गोसोजोँ होनाय
गोदै गोथाव फ्रसादखौ मिनिस्लुयैनो जायो।
ओजोँ बेम फार्टि दामग्राफ्राबो मुजिनाय मोनो।
बिसोरहा बिदिब्ला बानाय मेँनाय नागोबोर लाङो।
बैराथिफ्रा गोदै गारांजोँ साबसिन
ललिनो खहाबो।
नाथाय फैसालिया एसेबां गाबनो माब्रै हाखो?
बियोथ' बुंदोँमोन-
आंनि हाबायाव आं मोसागोन।
हौवा गोदानखौ आथिँआव गुगुरुब खुलुमना मिनिसुलु अर सेराव
आर'ज गाबगोन।
सुखु- दुखुनि संसार जानो समाय लागोन।
नाथाय! नाथाय! गासैबो बिनि उल्टा।
हाबानि जोबनाय समावबो बियो मोसायाखिसै।
एसेबां आहुजानि बोदोर गाबखांनायाव
बिखायादि दुरलुब दुरलुब मावदोँ।
अब्लाबो बियो मानो मोसानो गोसो जायाखिसै?
आरो मोनसे जानाङै जाथायाबोदि जालांबाय,
बेयो माब्रै?
मानो जानो मोनखो?
खुंगुर फंबाय मेटरा बिखौथ' मोसानोसो बोदोँमोन।
बिखौ मानो लाजि फोनांनो हिनजाव गोदाना सोबाखो?
बेथ' लाजिनांथाव हाबानि जाफैरै जाथाय।
नाथाय हिनजाव गोदाना मानो सोबाखो
बेखौ सोँनायानो मोजां जागोन।
बिबारि एमाव गाबै गाबै
हांमा सुरदोँ फैसालिया।
सानफा हाबायाव हिनजाव लागो,
हिनजाव गोदान आरो मेटरिनि गाबनायावबो गाबाखै अनसुलाया।
नाथाय दा मानोबा गाबनो ओँखारदोँ।
गाबदोँबो सिरि सिरि।
गाबब्रुं गारांजोँ बियो हिनजाव गोदाननाव सोङो-
सना, बिबारि एमाव बेबादि हांमा सुरनाया
मोजां नाङाखै।
दे सना जालांनाय नंखाय नंखाय
जाथायफोरखौ बावलांदो।
- अनसुला! आंहा नोँनो फंनैसो
बाथ्रा बुंनांगौ दं।
- नाङा सना दिनै हरथौबाय।
उनाव बुंबाबो जागोन।
- ओहो, दिनैनो आं नोँनो फोरमायगोन।
आंनि फेरलेबसे बिसम्बिफोरखौ।
जायनि थाखाय दिनै आंनि मेगनाव
मोदैया सानफा हानाय अखानिफ्रायबो
साननो गोनांसिन मोदै गदोँ।
- बिदिब्ला बुंदो।
आं खोनासंलांगोन।
- खोनासं,
आं बांद्राय सान्नायावनो दिनै
हाबायाव बांद्राय गाबबाय।
बिनि जाहोना हाबानि मेटर
खुंगुरानो बुंजायो।
दिनै थांनाय फुंआव आं खुंगुरखौ नुजेनदोँमोन।
थांनाय बोसोरथामनि उनाव।
बिनि मोखां आरो मेगनानो आंखौ गोजाम बिसम्बिखौ एरखांदोँ।
आंखौ बांद्राय सोगाबदोँ।
थांनाय जानाङै जाथायाबो एसेल' लाजिनांथाव नङा।
नोँबो नुनायमोनब्ला मा सानगौमोन आं मिथिया।
आं सानैसो आलासिनो साहा
लुना होदोँमोन।
बेयावनो बियो आंखौ मोसानो
बोना लायदोँ।
बेयाव बिजिरनांगौ गैया नाथाय
आं मोसाया होनना सिमब्रेनायाव बियो आंखौ
मुगैथावै बिखायाव दांना थिखोदोँमोन।
बेयावसो आं बेखौ गोसायै सोबानाय जादोँ।
- थारैनो नंमारगौ?
- नंगौ नंखाय खुगानि राव नङा।
बोसोरथामनि सिगां जोँ बंङाइगाव कलेजाव फरायनाय समाव
मोजां मोनलायदोँमोन।
बियो आंखौ गावनि सान्नायखौ फोरमायदोँमोन।
आंबो गोरोबलायदोँमोन।
जोँ मोजां मोनलायदोँमोन।
नाथाय लाइमोन गोरबो सोलेरनि अख्रा लुबैनाय।
बियो सानसेखालि आंखौ गावनि लजिँआव लेँलांना
गाज्रि सोमोन्दैयै गोरोबनो
हाबिला जादोँमोन।
बेयाव आंहा सानै हयै
बिनि उल्टा बाथ्रा बुंदोँमोन।
बै साना बेबादिनो फैमाल थांदोँमोन।
नाथाय बियो बांद्राय लाजिदोँमोन आंखौनो।
सिख्ला जानानै आं सिख्लायैनो
गोसो गोरबो सोलेर गोथारैनो
थाबोदोँ।
बे समनिफ्राय बियो आंखौ जेबो खौरां लायाखैमोन।
सानसेखालि बियो आंखौ सोमोन्दो नागारनायनि मिसेस लिरहरो।
- थारैनो बेयो नंगौ फैसालि!?
- नंगौ, बेयो गासैबो सैथो।
नाथाय खुंगरा नोँ मा जायो?
- बियो आंनि लोगो, फैसालि!
आंनि असेथार लोगो बादि।
गोजौ फरायसालियाव फरायनाय समनिफ्रायनो जोँ लोगो।
उनाव जोँ गावगाबाव कलेजनि सोलोँथायखौ लायो।
गावगाबागाव गोसोयै।
- अनसुला, बियो थारैनो गोसोआ मोजां नङा।
गोगो गोरबोआ बेनाव गैया।
बियो सिख्लाफोरनि सोलेरखौ गाज्रि खालामनो नाजायो।
नाजानायल' नङा बियो साब्रैसो सिख्लाफोरखौ मोजां मोन्ना
नागारबाय।
मुगैथाव बिनि आखुआ
आंनि खोमायाव गोग्लैबाय।
- फैसालि थारैनो बाथ्राया सैथो?
आंनि लोगोआ एसेबां गाज्रि?
बिदिब्ला गाज्रि लोगोजोँ गोरोबनानै
आंबोदि गाज्रि!
- अनसुला नोँ- थारैनो नङा।
हरथौबाय सना,
अनसुला जिउ आंनि।
फैदो- आं गोथारैनो दं।
- फैसालि!
नोँ- नोँ -नोँ- !