गोसोआव साजायनाय मिजिँफ्रा
बारदोँ समायना देमलो मोजां,
मिथिँगानि महर-
दिनै हाबाब नायनो मोजां।

गोजा जारौ बिबार
हायला हुयला सिखिरि
बैसागु सोमखोर अखोरां।

मिनियै मिनियै मोदै बोहैबाय
जोबोद मिनिथाव बियो गोग्लैबाय,
जेब्ला बियो मोदै हुगारबाय
दुखुनि देँखो खोमायाव रिँबाय;
फुवा फुवा दैलो देँखो खुगानि
सोमहाब समायना मोखां बिनि।

मादि मुहिनाय बेयो हायना गोनां,
इनायनो आंनि गोसोखौ आवलि होनाय;
नायहोर नायहोर आंनिबो गोसोआ रंजालु,
इसारा दं मोजां मोन्नायनि बेवहाय नोँनि।
सना नों--
लाजिगुसु जोबोद इनायनो,
उखुमब्रेनि जोमैयाव थाखोमाबायनाय बादि;
नायहर खोमायो नों आंखौ बेबादिनो।
आंखौ नों मोजां मोनो?
यै सैनाय मिनिस्लुनाय खानाय-बानाय।

ख्लाब-ख्बिब मोदान फैयो
नोँनि लिप्सटिकनि...
मेव मेव मोनखांफैयो
थेनथौलांब्लाबो आंहा
बेसेदि बिरो बेरे सिखिरि
नोँनि फारनै गुसुथिनि नोजोर...।

1
जावलिया बिरगोस्रीनि सिमांआ
सिमांआनो जाना थाबाय
सिमां जावलिया बर'फानि सल'
आरोबाव फरायबावनांगौ दा?
2
आब' बिरगोस्री---
मेच रायजो दानो
जोँ बेसेबां गोबाव थांनानै थागोन?
हारिनि इयुना जोँनि आखायावनोमारथ?
3
नै आदा बासिराम आब' गाम्बारि
आखायाव थुंग्रि दैनानै
गराय दाब्राय दाब्राय
बेसेबां दावहा नांनो?
4
गानजंनि हेडकवाटारखौ सावनानै
जोँहा खैफोदाव गोग्लैबाय
आदा सोमदोन---
सोर होफैगोन ओँखाम खबसे?
5
थांनानै थानो लुबैयो जोँ
नै थफेन आफा---
जोँ आरो माबादि जांख्रिखांबावगोन?
नोँनि अहिंसाखौ सुथुरा मनबाय!
6
आरो आं सहायनो हालिया
मुंख्लं दावहारुनि थै रेजेद रेजेद
आं बिग्रायखाङो जोबथा दावहानि थाखाय
थै आरो थैनो हो

हाबानि बेम फार्टिनि रिँनाय देँखोआ
बयनिबो गोसोखौ सिमब्रेना होयो।
बियो हाजासे हिनजाव गोदानखौ
मानोबा सोगाबो।
हिनजाव गोदानखौ हाबानि समाव
हिनजाव लागोआ गाबनाय नुयोब्ला
रावबो गाबा लासे थानो हाया।
बयबो फे- फु हाजासे गाबो।
हिनजाव गोदाननि बिफा आरो बिनि बिब' बिनानावफ्राथ'
गोगो थरथिँ थरथिँ मोदै फसरना गाबो बाराद्रायबाव।
अनसुलाजोँ फैसालिजोँनि जुलिया दिनै जै जै है है जाना थांबाय।
हिनजाव गोदान महरै फैसालिया
हाजासे गाबलांबाय।
बिनि मेगना मोदै गनानै रानथाबलांनाया गोब्राब जालांबाय।
हाबानि समाव अनसुलाया हिनजाव गोदाना
एसेबां गाबसेयावबो गाबाखै।
बियो सान्दोँसो नामाथाय-
हाबानि समाव हिनजाव गोदाना गाबोब्ला
बांसिन जुलिनि साजायनाया बांसिन समायो।
जुलिनि अराबो रोहो रोहो मिनिस्लुयो।
गोथार गोसोजोँ होनाय
गोदै गोथाव फ्रसादखौ मिनिस्लुयैनो जायो।
ओजोँ बेम फार्टि दामग्राफ्राबो मुजिनाय मोनो।
बिसोरहा बिदिब्ला बानाय मेँनाय नागोबोर लाङो।
बैराथिफ्रा गोदै गारांजोँ साबसिन
ललिनो खहाबो।
नाथाय फैसालिया एसेबां गाबनो माब्रै हाखो?
बियोथ' बुंदोँमोन-
आंनि हाबायाव आं मोसागोन।
हौवा गोदानखौ आथिँआव गुगुरुब खुलुमना मिनिसुलु अर सेराव
आर'ज गाबगोन।
सुखु- दुखुनि संसार जानो समाय लागोन।
नाथाय! नाथाय! गासैबो बिनि उल्टा।
हाबानि जोबनाय समावबो बियो मोसायाखिसै।
एसेबां आहुजानि बोदोर गाबखांनायाव
बिखायादि दुरलुब दुरलुब मावदोँ।
अब्लाबो बियो मानो मोसानो गोसो जायाखिसै?
आरो मोनसे जानाङै जाथायाबोदि जालांबाय,
बेयो माब्रै?
मानो जानो मोनखो?
खुंगुर फंबाय मेटरा बिखौथ' मोसानोसो बोदोँमोन।
बिखौ मानो लाजि फोनांनो हिनजाव गोदाना सोबाखो?
बेथ' लाजिनांथाव हाबानि जाफैरै जाथाय।
नाथाय हिनजाव गोदाना मानो सोबाखो
बेखौ सोँनायानो मोजां जागोन।
बिबारि एमाव गाबै गाबै
हांमा सुरदोँ फैसालिया।
सानफा हाबायाव हिनजाव लागो,
हिनजाव गोदान आरो मेटरिनि गाबनायावबो गाबाखै अनसुलाया।
नाथाय दा मानोबा गाबनो ओँखारदोँ।
गाबदोँबो सिरि सिरि।
गाबब्रुं गारांजोँ बियो हिनजाव गोदाननाव सोङो-
सना, बिबारि एमाव बेबादि हांमा सुरनाया
मोजां नाङाखै।
दे सना जालांनाय नंखाय नंखाय
जाथायफोरखौ बावलांदो।
- अनसुला! आंहा नोँनो फंनैसो
बाथ्रा बुंनांगौ दं।
- नाङा सना दिनै हरथौबाय।
उनाव बुंबाबो जागोन।
- ओहो, दिनैनो आं नोँनो फोरमायगोन।
आंनि फेरलेबसे बिसम्बिफोरखौ।
जायनि थाखाय दिनै आंनि मेगनाव
मोदैया सानफा हानाय अखानिफ्रायबो
साननो गोनांसिन मोदै गदोँ।
- बिदिब्ला बुंदो।
आं खोनासंलांगोन।
- खोनासं,
आं बांद्राय सान्नायावनो दिनै
हाबायाव बांद्राय गाबबाय।
बिनि जाहोना हाबानि मेटर
खुंगुरानो बुंजायो।
दिनै थांनाय फुंआव आं खुंगुरखौ नुजेनदोँमोन।
थांनाय बोसोरथामनि उनाव।
बिनि मोखां आरो मेगनानो आंखौ गोजाम बिसम्बिखौ एरखांदोँ।
आंखौ बांद्राय सोगाबदोँ।
थांनाय जानाङै जाथायाबो एसेल' लाजिनांथाव नङा।
नोँबो नुनायमोनब्ला मा सानगौमोन आं मिथिया।
आं सानैसो आलासिनो साहा
लुना होदोँमोन।
बेयावनो बियो आंखौ मोसानो
बोना लायदोँ।
बेयाव बिजिरनांगौ गैया नाथाय
आं मोसाया होनना सिमब्रेनायाव बियो आंखौ
मुगैथावै बिखायाव दांना थिखोदोँमोन।
बेयावसो आं बेखौ गोसायै सोबानाय जादोँ।
- थारैनो नंमारगौ?
- नंगौ नंखाय खुगानि राव नङा।
बोसोरथामनि सिगां जोँ बंङाइगाव कलेजाव फरायनाय समाव
मोजां मोनलायदोँमोन।
बियो आंखौ गावनि सान्नायखौ फोरमायदोँमोन।
आंबो गोरोबलायदोँमोन।
जोँ मोजां मोनलायदोँमोन।
नाथाय लाइमोन गोरबो सोलेरनि अख्रा लुबैनाय।
बियो सानसेखालि आंखौ गावनि लजिँआव लेँलांना
गाज्रि सोमोन्दैयै गोरोबनो
हाबिला जादोँमोन।
बेयाव आंहा सानै हयै
बिनि उल्टा बाथ्रा बुंदोँमोन।
बै साना बेबादिनो फैमाल थांदोँमोन।
नाथाय बियो बांद्राय लाजिदोँमोन आंखौनो।
सिख्ला जानानै आं सिख्लायैनो
गोसो गोरबो सोलेर गोथारैनो
थाबोदोँ।
बे समनिफ्राय बियो आंखौ जेबो खौरां लायाखैमोन।
सानसेखालि बियो आंखौ सोमोन्दो नागारनायनि मिसेस लिरहरो।
- थारैनो बेयो नंगौ फैसालि!?
- नंगौ, बेयो गासैबो सैथो।
नाथाय खुंगरा नोँ मा जायो?
- बियो आंनि लोगो, फैसालि!
आंनि असेथार लोगो बादि।
गोजौ फरायसालियाव फरायनाय समनिफ्रायनो जोँ लोगो।
उनाव जोँ गावगाबाव कलेजनि सोलोँथायखौ लायो।
गावगाबागाव गोसोयै।
- अनसुला, बियो थारैनो गोसोआ मोजां नङा।
गोगो गोरबोआ बेनाव गैया।
बियो सिख्लाफोरनि सोलेरखौ गाज्रि खालामनो नाजायो।
नाजानायल' नङा बियो साब्रैसो सिख्लाफोरखौ मोजां मोन्ना
नागारबाय।
मुगैथाव बिनि आखुआ
आंनि खोमायाव गोग्लैबाय।
- फैसालि थारैनो बाथ्राया सैथो?
आंनि लोगोआ एसेबां गाज्रि?
बिदिब्ला गाज्रि लोगोजोँ गोरोबनानै
आंबोदि गाज्रि!
- अनसुला नोँ- थारैनो नङा।
हरथौबाय सना,
अनसुला जिउ आंनि।
फैदो- आं गोथारैनो दं।
- फैसालि!
नोँ- नोँ -नोँ- !

जोहोलाव नीलेस्वर ब्रह्म।
बर' मेथाइ जारिमिनाव बिनि मुंङा जेब्लाबो सिगां।
नाथाय बियो सासे मेथाइगिरिल' नङामोन।
थुनलाइ, राजखान्थि गुबुन गुबुन बिथिँआव बिनि आखाय दं।
नाथाय आं मेथाइगिरि बादिल' गोसोखांनो नागिरदोँ।
बे दिनै आं बे जोहोलावखौ गोसोखांदोँ।
जाय जोहोलाव मुं मोननाय बर'नि जारिमिनाव।
नीलु होनना बर' फरायसाफोर आरो बर' लेखा गोरोँ जारिमिन फरायग्राफ्रा मिथिगौ।
1927 मायथाइ (11पेब्रुवारी) याव जोनोम मोननाय
नीलु आरो आंनि गेजेराव बेसेबा फाराग दं।
आं उन्दै, नाथाय नीलुआ?
बियो नैजि जौथाइनि सासे गेदेमा।
मेथाइ मुलुगाव बर' हारिखौ गिबिसिन फोजाखांग्रा बुंनांगोन।
बियो बर'नि खुगा मेथाइ,
सल', सलबाथाफोरखौ बुथुमना मेथाइ रोजाबदोँमोन।
बियो गोसो गोथारै बर' हारिखौ सिबिदोँमोन,
बर' हारिखौ जौगानाय लामाजोँ दैबायनो नाजाथारदोँमोन।
जारिमिना बुङो-
बियो बर'फोरनि गेजेराव सिगांसिनथार मेथाइ रोजाबगिरि।
उन्दैनिफ्रायनो मेथाइ रोजाबनो मोजां मोनग्रा
जोहोलाव नीलुआ दुलाराय मुलुगावनो बर'नि मेथाइखौ रेडिअ'नि गेजेरजोँ रोजाबना फोसावग्रोदोँमोन।
बियो बै समनि बर'नि अनसाइ आफादनि मददजोँ
1952 मायथाइयाव गिबिसिन मेथाइनि केसेत दिहुनदोँमोन।
1954 मायथाइयाव बियो लक्ष्णौ भातकान्देयाव  गोजौ थाखोनि (खाम, जथा, सेर्जानि गुबुन) दामनाय-देनाय सोलोँनो थांदोँमोन।
1984 मायथाइयाव जानाय दुलाराइ बर' थुनलाइ आफादनि जथुम्मायाव (गसाइगाव) बियो हारिमु आयदानि दैदेनगिरि बादि गावनि गियान मेँरोङै मावगोरोँ दिन्थिलांदोँमोन।
बयखौबो दाख्राय दाख्राय खावलायनानै गावनि सिमांआ जाफुंनो लामा लानाय समावनो बियो अब'थिरा जिउ गोमानायसै।
1 जानुवारी 1986 मायथाइयाव बियो मुलुग संसारखौ नागारलाङो।
नाथाय थालांबाय जारिमिन, मेथाइ देँखो गारां बिनि।
अराय थुलुंगागोनां बिनि सोरजि रोजाबथिनाय रैसुमै देँखो।

सोराङा खोमसि दिनै,
नुहरा अखोरांआव-
जोँलारि हार्थखि हाला;
जोमै साग्लोबनाय फुर्णिमा दिनै,
अखा मोफ्लामनाय अम्बासि हर
सोराङा खोमसि दिनै।
जमनि थान्दै खाल फेसा,
हरनि रंजालि सांग्रेमा एम्फौ,
गैया गैया आबुं सोराङा गैया।
अखोरां नायदावनानै साननो गैया,
गैया गैया थरसेबो हार्थखि हाला;
जोमै साग्लोबनाय फुर्णिमा दिनै,
अखा मोफ्लामनाय अम्बासि हर
सोराङा खोमसि दिनै,
नुहरा अखोरांआव-
जोँलारि हार्थखि हाला।
जोँलारि हार्थखि हाला।

मेंग्लियो गोसो-
मोकथांनि सेर सेर
नागिरो दैसा जिरि बोहैनाय

सल'खौ आं लिरनोनो सानाखैमोन।
लिरनांगौ जाथारबाय।
बिरगोस्रिनि लोगो सुजुगिरि
हांफुला गयारी आदाया
लिरथार लिरथार नारसोमबाय थानायावनो।
सानसे साननै सानथाम सानब्रै रुंगलांब्लासो
मिनिस्लु नंद्रायै सोमब्ला सोमब्ला मोखांङै।
सल'आथ सल'आनो जाबाय
सल'नि माबा माबि
गान्नाय जोमनायखौसो
आदा खावया लिरगिरिया आन्दायथारबायबादि।
सुजुगिरि आदाया सान्नो हासिगौ खोमा
लिमारिक खन्थाइखौनो लिरबानो जागौमोनना।
माब्लानिफ्रायथो सल' लिरफेरखो बेलाइ?
आं गोसो थोखोमानाय रैसुमै मायनावाबो हले
मिनिया नङा देँखो होआब्लाबो
खुगा मुथेथारखासिगोन।
आंहा सन्देह गैया।
हे रैसुमै मायनाव आंनि सल'खौ फरायदो!!...
मानसिखौ नुग्रोमोन्ना गाबज्रिहरदोँ आं
- ओइ मैदा नाग्रा। होन्नानै।
आसरिद मानसिया लाजिसुलु आंनि मोखां थोँजोँ आवगायबोयो।
बियो आंखौ थारैनो बावथाराखै।
आंनि लोगो सिख्लाफ्रा
बेखौनो खे, खे, खै, खै,
हि: हि: हि: जाय हागौ जेरैनो मिनिदोँ।
बिसोर सान्दोँ जानांगौ
- मानसिनि मुंङानो मैदा नाग्रा!
मा नामसै बेलाइ?
बेनो मिनिनायनि आसोल मुलिया।
पि. इउ. आनजादखौ फोजोबनानै
बेंगालरआव थांदोँमोन आं।
बेयावनो जोगोर माहल्डारनि गंसे हटेलाव
बिथांजोँ आंजोँ लोगो मोनलायो।
माहल्डारनि बेसेबा गिदिर हटेलाव जोँ
खामानिखौ रानना लालायदोँमोन।
बिथांआ लादोँमोन मैदा नानाय खामानिखौ।
बियो बेखौनो मोजां मोनोमोन।
आं जानाय लोँनायनि बायदि
थोरसि लटा सुग्रा जादोँमोन।
नै बोसोर बंङाइगामियाव लजिँ थानाय
आं गोरोँखामोन।
दरमाहाया दानफायाव थाम रोजाफ्राम।
बेनोबा मबाइल रिसार्ज सोनो आग्लाय थारबावो।
आं बांसिनै रं नंबर रायज्लायामोन।
थानाय Facebook आव हले
जायखौनो बेखौनो आइ लाभ इउ होन्नाया हुदाथारमोन।
सिख्लाफोरनि सावगारिखौ मोजां मोजां
नुब्ला डाउनलड खालामना लायोमोन।
आरो सोरनिबा गाड़ि मटर गोदान गोदानाव
सावगारि खेबजानानैबो गावनि
फ्रफाइलखौ सानफा मोनफा
गोदान सोलायनो बावखा थारामोन।
नाथाय बिथांआ माब्ला सोरांङै हरथौओ
मिथिस्लाब लायै रं नंबर रायज्लायोमोन।
बांसिन गावनि कक्राझारखौ बाखोनाय बाखोनाय
खिन्थाहरनो लाजिथारामोन।
फोथाय जायो फोथाय जाया गावसो मिथिगौ।
आंखौ हले सिख्लाफ्रा मुम्बाइआव
आमिर नङाबा सलमान आरो
सारुक खान मोनजोँ फाइटिँ खालामग्राबादि
नुदोँ होन्नानै सिख्लाफ्रा कमेन होनो
बावथारखायामोन।
आदाया मा साख्रि मावो होन्नाबो
गोबांआनो सोँफ्लायबाय थायोमोन।
सिगां समाव जोँ मैदा नाग्राजोँ आंजो
मिथिलायामोन।
बेयो बर' ना आं बर' जोँ
गाव गावनो सिनायथि गैलायामोन।
स्नि- डाइननि उनावसो जोँ
सिनायलायदोँ माने रायथिलायदोँ।
जोँजोँ लोगोसे आरो सासे हारया दंबावोमोन।
बिनि मुंखौ बिकास सिं होन्ना बुंदोँमोन।
सानसेखालि जोँ हटेलावनो ओँखाम जानाय समाव रायज्लायदोँ।
सिगां सिगां मैदा नाग्रायानो गावनि सिनायथिखौ होदोँ
ओरै होन्नानै
- आं कक्राझारनि।
आंनि मुंखौ बुंख ब्रह्म होनोलै।
बि टि सि नि गाहाय मन्ट्रि हाग्रामा महिलारिखौ सिनायोदा?
बिनि नसुंसेब्रा जोँनि न'आ।
उर्खाउआ आंनि आदै असेथार जायो।
नंगौना नङा आं मिथिया
थेवबो आं फोथायदोँ।
बिथांआ आरो बुंबावदोँमोन
जोँना आफायाबो सासे माष्टार।
आंखौ हगार हरथारामोन बेँगालरआव।
आंसो हिन्दी सोलोँनो होन्नानै
अख्रायै फैथारदोँ लोगोफोरजोँ।
लोगोफ्रा दा सिकुरिटि थालाबायदोँ।
हारसा बिकासाबो गावनि सिनायथिखौ होदोँ ओरै
- जोँना न'आव माहाजोनथारलै
आंसो जोबोद अख्रा।
आं बेयाव बैयाव थालाबायनो मोजां मोनो।
गाव गाबागाव खामायनांगौलै।
बिथांआ बुंबावदोँमोन
- ससिन हेनदुलकारखौ सिनायगौदा?
बिसिनि खाथियावब्रा जोँनि न'आ।
ज ज हनि सिँ मेँथाइगिरिया
आंनि आदा जायो।
बायदि बायदि।
आंबो खिन्थाना लादोँमोन
- जोँना आफाया जौ फाग्लाथार।
दाहार सुखनो थाखाय आंखौ
बेँगालरआव थिनहरदोँ होन्नानै।
दान मोनसे जालांलायबाबो बुंखआ हिन्दी रायज्लायनो रोङाखै।
आंबो रोङा।
थेवबो आं एसे गोरोँसिन।
सानसेखालि मोनसे जाथायखौ आं दाबो
उदै बिगुर सालायो गोसो खांब्ला।
माहाजोना मोनसे मेगं थाइगंनि थफ्ला
थिखोनो होदोँमोन।
बियो मिनिस्लु माहाजोननि मोखांआवनो बुङो
- सार, बेखौ देखोनोके लिए
आदमी चायि क्या?
मा होन्नाय जाखो गावसो मिथिगौ।
माहाजोना हले ससमा बखनानै दिउ दिउ मोसेरसेर रागा जोँदोँमोन।
बेराफारसे आं आरो बिकास सानैजोँ
गोन्दो गोन्दो मिनिदोँमोन।
सानफ्रामबो सोरांस्लाब मोनै मैदा
नानांबाय थानायखायनो
आंनि जंखायनाय रावै बुंखनि मुंङा
मैदा नाग्रायानो जालांदोँ।
फारसे आंखौबो बुखंआ लाय लथर सुग्राखाय
लटर होन्ना गाबज्रिदोँमोन।
मैदा नाग्राया आंखौ रायदाव फैयो
- मा नोँथाङा बेयाव?
- औ आं बेयावनो फरायखायोमोन।
- आं नोँखौ जोबोद थगायफ्लांदोँलै नोँथां।
गाज्रि दामोन।
आंबो सिरांनिसो,
दागगिरि भुटान खाथिनि आंबो।
- आं नोँखौ बेबादिनो सानखादोँमोन।
मोजाङैनो दङ ने?
- औ मोजाङानो खौरांआ।
सानैजोँ मिनि मिनि आखाय दाख'लायो।
सिख्लाफ्रा दाबो सिरियै मिनिदोँ।
जारौ जारौ मिनिसुलु मिनिसुलु
गावजोँगाव मोखां मोखां नायलायदोँ।

हाफालिया सिला सिबबाय थायो।
लावथि लानानै जुंगाल बोराया
खाथियाव फैयो।
जुंगाल बोराय- आं थांनोसै बुरै।
मै होनो।
हाफालि- हा थांदो आरोमा।
बैसागुआबो फैथारबायानो।
आं हले एबाराव होख्लाय थारगोनहाय
बोराय।
जुंगाल बोराय- आं थांबाय।
दाखामानिया थाम थिम
खालामदो।
आरो एबाराव सोरबा सोरबा
फैयोनो।
मायब्रानिबो संनो थिनहरदोँ
नोँसालाया।
ओँखार लाङो।
सोरांआ दान्दिसे उनाव हाबबोयो।
सिला सिबनाय हाफालिखौ
रायदावो।
सोरां- मादै।
हाफालि- ए, आदै सोरांसो।
जिराय आदै।
सोरां- नाङा मादै।
फुंखामोना बैसागु जानो फैयानो
मादै?
हाफालि- फैगोन।फैगोन,
खौरां हरदोँ।
सोरां- आदैयालाय गैया नामा?
बहाबा थांदोँ?
हाफालि- दासो ओँखार लांदोँ आदै।
बोथोर मोजांखाय
मै होनो होन्ना
लावथि लाना दासो
हाखु दाखु थांबाय।
बैसागु बोथोरबो सौफैलायबाय
नालाय।
सोरां- हाब आंबो थांगौमोन मादै।
मै होनो।
होनो मोनफेर थाराखै आं मैखौ।
र' र' आंबो थांनि।
खारलाङो गावसिनि न' फारसे।
दान्दिसे उनाव बाथुल लाना
फैयो।
हाफालि- हा मा जानायनि नै
खारलांनानै दानो
सौफैखो?
मेँगुलायनाय।
सोरां- बाथुल लायनायानो आं।
बाथुलखौ दिन्थियो।
हा आदैयालाय बोरायराय बोरै लावथि
लानानै मै होनो
थांनांगौ जाखो?
हाफालि- जाम्बा।
दा नङाबा बहा दुब्लियाव
लावथि मोन्नांगौ जाखो?
न'निफ्रायनो लाना थांखाबाय आरो।
सोरां- बबेजोँ थांखो मादै आदैया?
आंबो थांनि थाथ'दो मादैया।
मोनथ्राबाबो दाउखौनो मानैसो
मोनबानो जायो।
खारलाङो।
हाफालि- मिनियो आरो हार्सिँङैनो बुङो।
उन्दैयावनो बै हष्टेल
बै हष्टेल इंराजि मेडियाम
फरायनाय गथ'।
माखौ मै होनाय,
माखौ सामार होनाय,
बाव होनाय बोरै
मिथिबावनो?
जोँबादि जाम्बिनि फोरोँनायखौ बिसोर
बहा गनायना लानो?
बुजिनोथ' हाखाया।
मिनियै मिनियै न'सिंङाव
हाबलाङो।

आं सिमांखौ नुवाखिसैमोन
एमावनो सिरिमोन्ना दंमोन
फुंनि 6 रिँगा जाबाय
आब'आ आंखौ फोजाफैबाय
दर्जा खोरखि बुयै बुयै
सिखार सोरांबाय होन्नानै
मावथि जोँमा सानजानि आंनि खोरखिजोँ
बेरलाव मेगनजोँ नायहरदोँसै जोँ जोँ
सिखारना गुदुं गस्ला जोमना
दुब्लियाव मोसौखौ खाहैबाय
फैना दैखरआव मोखां सुबाय
फुंनि जानायखौ जाबाय
7:30 रिँगायाव बेसरथिलियाव थांबाय
बेसर फुयै फुयै 11 रिँगायाव फैफिनबाय
12:30 रिँगायाव साननि जानाय
1:45 रिँगायाव बेसर फुनो थांफिनदोँ
आं आय आरो आफाजोँ
3:37 रिँगायाव फैफिनदोँ न'आव
दुगैयै साजायै दान्दिसे बेरायदोँ आं
गोजोनै गोजोनै न'सिम फैफिन्ना
दुब्लियाव मोसौ लायना खाफैदोँ गलियाव
मोनाबिलि मोनाबिलि दिनै सान्तिफुरनि आमायमोन फैदोँ
8 रिँगायाव मोनाबिलिनि जानाय
9:25 रिँगायाव आं उन्दुनो एमाव गोलाङो

दिनै फुंआवनो सिखारदोँ आं
5 रिँगा 30 मिनिट गोग्लैबायमोन
फुंनि जानायखौ थाबैनो जादोँ
साननि जानायखौबो थाबैनो जादोँ
जोँ आय-आफा आब' आं जयैनो
दिनै आं जेरावबो थांनाय जायाखिसै
सानसे न'आवनो थाबाय
जाया जाया दोँनैसो खन्थाइ लिरनो हादोँ आं दिनै
मोखां लाइसिनि गेजेरजोँ फोसावनाय जादोँ
बेलासियाव जोँना दिनै माय मारा होदोँ
6 रिँगानिफ्राय 7 रिँगासिम आंबो गोसो जाना आफाजोँ मदद होफादोँ
माय मारा होनाय समाव आब'आ गायखेरनि साहा फुदुंना स्राय लोँहोदोँमोन
लोगोआव गुरनै गुरनै बिसुखुद
मोनाबिलिनि जानायखौ थाबैनो जानाय जादोँ
7-30 रिँगायावनो जाखांदोँ आं
ओंख्रिया सबाय बिमासोमोन
ओँखाम जाखांनानै दान्दिसे जिरायबाय
बिजाब फरायनाय जायाखिसै दिनै
दान्दिसेनि उनाव उन्दुनो एमाव गाखोयो आं
मानोना दासान्दि जोबोद गुसुनिफ्राय गुसुसिनथार बोथोरा।

दिनै आं 5-40 रिँगायाव सिखारदोँ
खेबसे सिखारनायनै उन्दुफिन्दोँ
मानोना दामानि जोबोद गुसु
आरो 6-20 रिँगायावसो सिखारफिन्दोँ
सिखारनायनि उनाव आङो दुब्लियाव
माथाम मोसौखौ खाहैदोँ
फैफिननानै देहानि थाखाय दान्दिसे गेलेदोँ
हाथाइ मानजिना मोखां सुनानै
8-25 रिँगायाव फुंनि ओँखाम जादोँ
बिजाब फरायदोँ दोँनैसो खन्थाइ लिरदोँ
11-36 रिँगायाव साननि ओँखाम जादोँ
बिनि उनावबो आङो बिजाब फरायदोँ
1-16 रिँगायाव आफाजोँ खामानि मावफादोँ
मारा होनो थाखाय माय बजा जाबदोँ
बिनि उनाव दुगैनानै गानै जोमै
दुब्लिनि मोसौखौ लायनानै
न'नि गलियाव खाफैदोँ
बिनि उनाव बिजाब फरायदोँ
7-30 रिँगायावनो मोनानि ओँखामखौ जादोँ
बिनि उनाव आङो बिजाब फरायदोँ
9-40 रिँगायाव उन्दुनो एमसिम।

गुसु बारा बारदोँ
मोदोमाव साजायदोँ समायना
बेसेदि गोरलै गोसोआ।

से सेकेण्ड समावनो मानसिनि उजिनाय
बेयावनो थैनायबो।
- - - - - - - - - - - - -
नै बोसोरनि उनावसो बिथां
हांखुला नार्जारीखौ दिनै
आमटेका बाजाराव लोगो मोन्दोँ आं।
दिनै समबार।
आमटेका हाथाय।
होंगो दोँगो हारसानि
गस्ला सुटार गलायाव
हांखुला आरो आं
सानैजोँ थाख थिख
लोगो मोनलायदोँ।
होँगो दोँगोनि गेजेरावनो हांखुलाया
लेँग्रा लेँग्रा थखन लानानै हाया
हाया एब्रे बोथारदोँ।
खृष्टानफोरनि बड़'दिन रंजानाय साना
खाथियाव मोनफै थारबाय।
हांखुलाया गस्ला सुटार बायनो बेसेबांबा
मानसिनि होँगो दोँगोआव
हाबसनफैनायखौ आं गोमोदोँ।
सिरि सिरि सान्दोँबो आं-
सालाया सिगांआव जेरै दुगा
दाबो बेबादिनो दुगा।
मोखांजोँ मोखां सौग्राव लायथारनायाव
हांखुलायानो आंखौ
सिनाय हाना मिनिसुलु रायदावग्रोदोँ ओरै-
मा लांफैदोँब्रा बा?होननानै।
आंबो मिनिसुलु बुंफिनदोँ-
नै गोजां बोथोरनि टेकसुइट् लंफेन
बायना लांनो नागिरदोँ।
होननानै।
आखायाव लानाय जलंगाखौ लुन्दाव दाव
नुनानैबो सोँफ्लांगारदोँ बिथां
हांखुलाया-
हा माथो लाखो बा?होननानै।
आंबो फिनदोँ-
नै अमा बेदर लानायानो सेरथाम।
दा मोनायाव ओँखाम गोरलैनि
एसे लोँनाय जानाय।
बाथ्राखौ आं फोजोबदोँलमोन।
बिथांआ सिरि गंस्रिना थादोँ।
गावनि आथिँ गज'खौ
नायनानै माबा सानहाबदोँ।
दसे समावनो आं हमनो हादोँ
बिथांखौ मानो दासो आंनि
सेराव मिनिग्लाब खुसि फैनाया
हथाद मोखांआव खोमसि जाफैखो।
दान्दिसे उनाव आं थेकसुइट् लंफेनखौ लानानै
थाथ'दो नोँथांआ
होननानै ओँखारबोयो।
लामा थारैनो बिथांनि फारसेल'
न'आव सौफैजासिम मेँगुलायनाय
सानफ्लांबाय थादोँ आं।
आरो न'आव सौफैनानैबो बेदरखौ
दोन्नानै आंनि खटायाव हाबना
टेबिलाव गुफुर बिलाइ,
रेबगन नुनानै
बिथांनि जालांनाय जाथायखौनो सल'
लिरजागोन सान्ना जुरिबायबो।
बावैसो समनिफ्रायनो जाया जाया
दिन आरो बोथोरनि खारि बुथुमनानै
सल' लिरनाय हुदाया जाहांथारबाय
आंहाबो।
दिनैबो नागारथारनाय नङा
गोसोआव थि सानखाबाय।
नै बोसोर सिगां हांखुला आं
समान थाखोआवनो फरायलायदोँमोन
बंङाइगाव कलेजाव।
जोँ मोजाङैनो लोगोबादि लोगो।
रायज्लायनाय सानज्लायनाय गासैबो
फेस्लायैनो गोरोबलायथारनायमोन।
माखासे बिथिँआवल' जोँ सम सम
लोगो जालायनो हायामोन।
मानोना बिथांआ सोरनिबा फार्टि,
लोँनाय-जानाय, सोबनायफ्राव बाहागो
लानो मोजां मोनोमोन।
लोँनाय-जानायाव बिथांआ रावनिबो
खमबो नंखाथारामोन।
दा माब्रै मिथिया।
आं दिनै लोगोमोनब्लाबो बिथांआ
हले सिगां जेरै दा एरै
रायज्लायनाया दं।
हांखुलानि आथिँआ दा फारसे गज'
आगदानिया।
बेखौ लानानै बिथांआ दिनै मेगन
थासेयावबो खाना बादि मोनो।
गोसो थासेयावबो लामा गैयै बादि।
मानोना गाव जेरै थांगोन
थांनो हाया।
रावबो दैबायग्रा गैया।
उनफिन्नो गोनां जायो हांखुलाया।
फरायनायाव मोजांथारमोन हांखुलाया
सिबाय लोँग्रा, जाग्रा बेरायग्राब्लाबो
फरायनायाव गोसो होग्रामोन।
दा बिनि आथिँआनो बेखौ
हरैबो थांनो हाया
फावसयलांथारनोबो हाया
खालामना दोनबाय अराय।
फरायनायखौ आथिँ लेंग्रा
जानाय लोगो लोगो
फोजोबदोँखौनो होनना
बुंनांसिगोन हांखुलाखौ।
नाथाय बिनि आथिँआ बोरै
लेँग्रा जाखो?
फरायगिरिया आंनिफ्राय खोनासंदोँ-
सानसेखालि।
कलेजनि सिगां आनजादखौ फोजोबनानै
हांखुला मोननियाव
आलासि जानो थांदोँमोन आं।
ओइदिनखालि दा बादिनो
बर'दिननि खाथि खाथि हांखुला बिबथैनि
न'आव ओँखाम गोरलैनि जानाय।
गामिनि सेंग्राफोर आरो
माखासे बोरायसाफोरखौ
खुमब्रा गुफुर जानायजोँ हांसोजोँ
जानाय लोँनायमोन।
न'सुं सेरावनोलाय हांखुलायाबो
लेँहर जादोँ बिमादैजोँ।
थांदेरदोँ आंबो लोगोसे हांखुलाजोँ।
गामिनि सावरि बादालियाव
मावा दाङाबाबो खाबसे-खाबनै,
दरसे दरनैया
बाहाग गोमाथारा हांखुलाया।
बे बारावलाय न'सुं सेर
आरोबाव असेथार बिबथै।
सेँग्राफोरा ग्रोन बेरेन्सि बना
लोँग्रोबाय थानायाव जिरायदेरदोँ हांखुलाया।
लोगो लोगोनो लुग्राफ्रा लुबायबो
मोनामग्लुंलायनाय।
बिमादैयाबो थालिर बिलाइयाव
खुमब्रा बोरायजोँ लगायना एवनाय
हांसो बेदरखौ होफैबाय।
खाथियावनो आंबो सियाराव जिरायना दंमोन
आंनोबो होफैबाय बेदरखौ।
नाथाय खाबखौ आं नाङा होनना बुंनायाव
सेँग्राफोरनो हरफिनबाय।
माब्लाबानो लोँनाय बोरायसा आरो
माखासे सेंग्राफ्रा फेदबनानै
नोँबा नोँ आंबा आं
गाव गाबागाव बाथरिखौ होगासिनो थायो।
सोरबाया गबथब गबथब खोनासंदोँ।
सेँग्राफोरनिजोँ बोरायसाफोरनिजोँ
बाथ्राया गोरोबलाया।
सेँग्राफोरना बांसिन गोसोथोलायनायनि
बोरायसाफोरना एसे
लगाय लथाय संसार जानायनि।
बांसिन नांलाय- खमलायनि
सोँखारि लायनाय।
सोरबा सोरनिबा गोजाम
जाथायखौ एरखांदोँ।
सोरबाया लुदोँ आरो गोदावदोँ।
सोरबाना बेदरा लाइयाव दरसेबो गैला
सोरबाना दासो दरसे जामदोँ।
हांखुलायाबो लोँनाय जानायाव खम नखाथारा।
बिनाबो माब्लाबानो उनसिन फैनायानो
लाइयाव दरसेबो गैला।
खाबखौ गोदावखांनाया
खेबबासो बारलांबाय रोखा रोखा
आं नुथारदोँ।
आरो आं गुबुनजोँ मेगन खोख्लैनायाव खेबबेसे जाखो आं मिथिला।
खाबावथ' जोबबानो जोबबानो
लुनो हायो।
नोगोद बाजौ रांनि लाबोखादोँ
हांखुला बिबथै गुलार नार्जारीया।
आवगायाव गावनो बुंखादोँ।
बेदरासो गैया जाबाय दा
हांखुलानि थालिर लाइयाव।
गल' गथ' जाबाय थानाय बोरायदब
हागोरामनि दरसेल'
जामनाय लाइयाव
आखाय फोलावहरबाय हांखुलाया।
सोरबा नायसनहरनाया थब्र खिन्थाहरबाय।
मानसिया सुथि मोनखांना
नायबा माब्लाबानो दरथामसो खुगायाव
होबायानोमोन हांखुलाया।
मानसिया रागा जागारबाय।
ओरैनोबाबो बियो एसेयावनो
एसे रागा जोँग्राखानो।
बे समावनो आं हासुनो
बाह्रायाव थांदोँमोन।
मा मा जालायखौ?
बोरै बोरै जालायखो?

सान्नायखौ हमथा हायै
जौनि निसायाव
नंखाय गोसोनिनो सानथ्रि जानाङो।
जायखौ सानो बेखौनो मावफ्लाङो।
बेलासि समाव हांसो गोदाना
खामसालियाव
दोन्नाय सिखा खुख्रि गोबौजोँ
आगदा आथिँनि हान्थु जरायाव
गोब्राबै दान्ना होयो
हागोरामा।

लिलि लाला थै बोहैयो।

थिँ थिँ दुंखावनाय सान्दुंजोँ
गोलोम बोथोराव गोलोमखायो
फ्रि फ्रि बारनाय बारजोँ
गोजोँ बोथोराव गोजांखायो
.
मोनैखौ गाबाखै आं
बिनाय मोन्नायजोँबो
गोजोना दिनै जोबथायाखै
मुलुगाव बेबादिनो दिनै नोँनि गाबोन आंनि
.
मिनिनाय रंजानाय
थैनाय उजिनाय
नोँनि आरो आंनि आंगोनि
दागाब नोङो बेनो जोबथा नङा
.
सैथो सोरां आरो सैथो खोमसिया
सैथो सैथो सान अखाफोरा
बै अखोरां बे बुहुमा
बेबादिनो थांनानै थायो
.
मोनैखौ गाबाखै आं
मोननायजोँ अराय गोग्गायाखै
रंजानायजोँ रावखौबो फेजेनाखै
दुखुखौ लानानै अराय जेनाखै
.
बेबादिनो बार बारबोगोन
बेबादिनो सान्दुं दुंबोगोन
थिवरिया सानब्लाबो जोबथा सानाखै
अनसुला सानब्लाबो जोबथा सानाखै
.
नोँ आंखौ मुगैयो
बेबादिनो आं नोँखौ मोजां मोनो
आं नोँखौ सुथुर सानोब्लाबो
नोङो आंखौ आंगो सानथारो
.
जिउ जोनोम जोनोम
थैनाय आरो थांना थानाय
बेबादिनो हर आरो खोमसि
दिनै नोँनि गाबोन आंनि।

बावगारगौमोन आं नोँखौ
आखायाव जुदि गदांआ थायोबा
सान्दोआ जेरै बावदिया;
नाथाय आंनि आखायाव दिनै रेबगन
गोसोखांनोल' होयो रमान्सनि निजोरा
बिलिर बिलिर गोरबोआव।

बुरखायै बुरखायै बेसेबा गोबाव,
बेसेबा खष्टनि उनावसो फुथुनो हाबाय रमालिया फिसालाखौ।
माबादि मानसि जागोन बेखौबो मिजिँ खालामनोनो हालिया रमालिया।
जोबोद बायगर जाथारबाय गथ'आ।
दिनै गिबि खेबनि थाखाय बांङाइगामियाव फिसालाखौ बानानै
गामिनि इंगिनिजोँ मायाफुरियाव बेरायहैदोँमोन।
गथ'खौ लांफाना जिबायदि खष्ट मोनबाय
गावसो  मिथिसिगौ।
हाया हायाब्लाबो बाजौ रांनि माबा बाबि जिराद बायना होथारनांबाय।
गथ'आनो माबादि जागोनथाय-
सोरनि लाखो?
ना बिबै बिबौफ्रासो फोरोँखो सानबाबो सानस' हालिया!
गथ'नि मोखांआव मोनसेबो
गोदान जिराद दिन्थि जाया
बेयो ओरैबादि गथ'दि बेनि गोजोन्नायाबो दान्दिसेल'।
बेनो रां खरसा खालामना
माबा गेलेग्रा बुष्टफोर बायना होनायाबो नंखायसो जायो।
उन्दैनिफ्रायनो गारि गाखोफेरनो मोनै गथ'-
अथ'आव गाखोना गोजोन्नाय मोनबाय
नाथाय आरोबाव बियो गावनो सालायनो बुंबाय।
बहा सालायनो हानो
थोजासे बिमाया बुरखाय नांबाय थगाय थसि।
लामायाव पुलिसखौ सिलाय लानाय नुबाय
सिलायखौ दांनायनो बुंबाय।
बिमाया बुरखायनो थोबाय।
एसे खाथियावनो सासे बांगाल बोरायखौ
बिरि सोबनाय नुबाय,
सोँनायाव बिमाया बुंबाय बिरि सोबदोँ।
गावबो सोबनायनो बिबाय।
फाग्ला स्टेन खाथियाव रेलगारिखौ नुबाय।
मा बेलाइ होन्नानै सोँनायाव
बिमाया गारि गोलाव होन्ना बुंबाय।
गथ'आ गाखोनायनो बोदोर जाबाय।
नाथाय मोनसे गलायाव थांफ्रांना
बाजौ रांसो खरसा खालामनो
गोनां जाथारबाय रमालिया।

दद्रेद्रे मिनि लाजिसुलुलु
ओँखाम थफ्ला रुजुनबोला
समायनासिन नुबावो फ्रि फ्रि अखायाव।
रांखो दाहोनाया नायगोमोयो
बेसे समायना देमबारिया!
खाफालाव दंना गैया आंहा??
हे गसाइ! हे गसाइ!
मोसौ हग'बासो सुथि मोनो
मोसौ आथिँआव नांगोल फाला अख्लाबो
बिखा खायसिब देमबारिया।
बेसे मिनिथाव जादोँ सल'आ
हाब्रु गदा गदि मोसौ आथिँआव
रांखो दाहोनानि बुदिया
मा इसे दुखु गोनां फालाय!
मोसौनि थै रना रनि आथिँआव
मलम फोननाया-
देमबारिया मिनियोसो
बहाबा दुखुखौ दोनहरना
नाथाय रागा खरा बुदांआ
रांखोनि सायाव मा बिसार?
गबावगोन दाबि रांखो दाहोनाया??

जायै जायै जानानै रांआनो जोबगुलायनोसैमोन
गुब्लां फंबायनिया,
आदै मेब्लानियाथ' दहायनो जोबबाय।
दंथारोब्लाबो थायबा गथा (खुस्रा)
गरसेल'सो दंसै खोमा।
फैसाया सना गाबनि सनाबादिथार
बेखौबा बाहायनो हालिया बियो।
गाड़ी गाखोनायाव आंसो अनथाव-बाथाव
बाजि रांखौ होथ'नांलायदोँ।
गलाघाटनि मायनाव फोथारखौ गिदिँनानै
आब' लांहेमोननियाव थांगोन जोँ।
बोसोरसे सिगां आब'आ रं नाम्बारजोँ जुलि जाफैदोँ।
गाड़ीथारैनो मोथो मोथो रौता सारिआलिनि
फुरिखौसो गोसोखांफ्लांदोँ गुब्लांआ।
बियो बुंदोँबो-
- आदै मेब्ला,
हाब रौता सारिआलिनि फुरिया गोथावब्रा,
माब्लाबा फैबावथारगोन दे जानो।
बियो आंखौ नायनानै बुंबावो-
- हाब, आदा जोँथ' बुरलुंबुथुरखौ बारबोथारबाय,
बेयोथ' सानजा जाबाय।
सानजानि मानसिफोरखौ सानजारि होनो नङाहोनबा?
माथो फुरियालाय खारदैजोँ संनाय नङा नामाब्रा?
ना खारदैजोँनो संनायमार फालाय??
- खारदैब्रा खारदैसो,
- हाब, बिदिब्ला खारदैजोँ फुरिया गोथाव जायोब्रा।
नसिम गिदिँफिनबा खारदैखौनो
जगसे लांनांगौ जाबायलै।
-----------

रंजाखाङो आंनि बिबार गोसोआ
गियान फैयोब्ला गोरबोआव
नायनो गोमोथाव मुलुगाव।
संसारनि जेथो जेङाजोँ जुजिनानै
गिबां जिउआव बोलो फैयो
नाग्लि जानाय मिजिँआ उदां जायो।

बिग्राय दानि मेथाइया रिँफैयो
मुहिहाबो जेखाय थुनिया दाउनि मुसुरनाय;
मिथिँगानि फैलाव फोथाराव
(बिफां-लाइफां जिबि-जिराद
दाउसिन दाउलानि गासैबो दुब्लि)
जारां जोँमानि मिनिस्लु हरनाया
गोदो हाबो आंनि लाजिस्लु गोजोन्नाया।
जोँमानि रिफिनाय आंनि इन्जुराव
समायनायै सिरि सिरि बिबारफोरा
लामा नायदोँ सिखिरिखौ,
समायनायै दाउसिनफोरा देँखो हगारदोँ
अब्लाबो रिँफैयो बिग्राय दानि मेथाइया
(नेथ' जारां सान दान्दिसे
.......दसे नेथ')
खोमसिया साग्लोबफैब्ला सानसुनि उनाव
दाउसिना बिरलांगोन बासायाव
लह्रायलांगोन बिबारनि गोसोआ।

मानसिया साननो रोँगौ
आरो बुजिनोबो रोँगौ मानसिया
जेब्लासिम मानसिया बुजि रोङा
बे समाव बियो थारैनो लाजिया
देलायनो सोलोँनाया मानसिनि मोनसे रोँनाय
देलायनो रोँनाय लोगो लोगो
मानसिनाव मोनसे गियान सोमजियो
अब्लानो बियो लाजियो
लाजिनायानो मानसिनि मोनसे समायनाय
समायनाया मानसिनि मोनसे रोँनाय
बे बाथ्राखौ गोथौयै बुंनो हायोदि
जेसेबां रोङो बिनि आखल आखु गासैबो समायखाङो
लाजिनाया माखासेमानि रोखोमनि जायो
मोनसे नंखायनि थाखाय
आरो मोनसे रोङैनि थाखाय
अदेबानि मानसिया नंगौ नङाखौ लानानैबो
मोनसे गिनाय फैयो
बेयावनो लाजिनायबो थायो
मानसिफोरा गावखौ फुरायै बिजिरनो सोलोङाखै
नंगौ नङा बेखौ थि खालामनो हायैयाव
गुबुननो फोरमायनांगौ जायोब्ला
मानसिनाव लाजिनाया फैयो
नैबे बाथ्राखौबो साननो होयोदि
लाजिनाया मानसिखौ समायना खालामो
आरो बेनो गाज्रिबो नुहोयो
अदेबानि बियो मानसिनो गासै
गुण गियान आरो जाम्बाथिनि सायावनो
सोनारनोबो हागौ नंगुबैआव।

बुदां बोरायनि ग्रौ ग्रौ लावआ
थाइसेल' फिथया थाइदोँ।
सोमदोन बिमाया बुदांखौ थगाय हरबाय
मोजांथार गिदिर गिदिर थायथारो
बैसांआनो बायलायदोँ जोँना थांनाय बोसोराव।
बायदि गोदै गोदै रावजोँ।
बुदांआ सोमदोन बिमाखौ रागा जोङाखै।
बियो सिरि सिरि सोमदोन बिमाखौ-।
बिहा आरो दुखु गैया।
नाथाय बिसिया फिसायनि थगाय जानाय खौरां मोननानै
उवाल गाइहेननि खोथासो सानबायमोन।
थांनाय बोसोरावनो मिलन बाजाराव लाव बेगरखौ बायना लाबोदोँमोन बुदांआ।
सोमदोन बिमानिफ्राय।
सोमदोन बिमाया रान्दि।
सोमदोना बिमानि सासेल' फिसा होवा।
सोमदोन बिमानि लाबोनाय दजनसे लाव बेगरा
बेरनानै ग्रौ ग्रौ बिफां-
बिलाइनि महर मोनबाय।
बोथोरा फैबाय फिथाय नायनायनि सम जाबाय।
सोमखोर बैसां गंसे बेन्दोँ।
नाथाय साननो गोनां थाइसेल' फिथाय।
देरै देरै राबाय लावथाइया।
मोननो आरो सम दं।
गोरलैआव जानो बुदांआ खुगा सिदोँमोन।
बिसिया जानो होआखै।
बियो बुंदोँ थाइसेल' थायजेन्नाय
लावथायखौ जानो हामा।
बिफांआ बोराबो आरोबाव थाया।
नाथाय बिफांआ बोरायनो हमबाय।
थाइसेल' फिथाय।जोलैनो दोननांगौ।
अनथाव बाथाव गिदिर आरो गोलाव।
लावथाय।
---
मिलन बाजार।
बेलासि, सोनाब फैसालियाव सान।
होंगो दोँगो बायदि मैगं।
थास' आथिँ, खुमब्रा फिथाय,
जोगोनाथ, नाथुर जुनाय,
नास्राय गोरै, बालाबोथिया
आरो इलांसि मैगं।
थास'बारिनि सिलानि, लावदांगि
आरो गोमोबिलिनि हासिनि
आरो थिलेबमोना दुब्रि बिलाइ सायाव सि मयै बयै फानदोँ।
सोमदोन बिमायाबो लाव फिथाय, जोगोनाथ
आरो दैज्लांनि लाव बेगर फानदोँ।
बुदां बिसिया नास्राय गोरैजोँ
थास' आथिँखौ लाबाय।
लावदांगि बुरैसानिफ्राय।
बुदां बिसि जलंगिजोँ थांफानाय मोनास्रियाबो
लाबाय नाथुर जुनाय इलांसि मैगंखौ।
हासिनि बुरैनिफ्राय।
दैज्लांआव जारला जायोहाय ओँख्रिनि
लाव बेगरखौनो लांसां गायनो।
देनां मोनजाबायो खोमा होन्नानै
लाव बेगर बायनो गंदोँ मोनास्रिया।
बाहाग बाहाग खालामना फानदोँ।
बेसेथो बेसेनालाय?
होन्ना सोँदोँल मोनास्रिया
दांहरबाय खुगाजोँनो जलंगिया।
अबे फिथाय थायनो रोङै लावखौ लानो?
फिथायानोबा थाया बे बैथालिनि लावआ।
दाला फै-
माब्लाबा साफागुरियाव लाबो मेल्ला मोनो।
सोमदोन बिमाखौ फंसे रावआ दुखु होबाय।
बियो सहायथाव रैसुमै राव नङा।
बाथ्राया बुंब्लानो जाया
सालायखौ हमथानो नांगौ।
गुरैयैनो बुंबाय सोमदोन बिमाया।
जलंगिया लाजिबाय।
जेन्नाया बिनि गंग्लायथाव जिउ नङा।
बियो देरहासादनायखौनो लुबैयो।
फिसाय बुदांआ माब्लाबाबो देरहाया।
नाथाय बुदांआ दबथायनो हायो बिसिखौ।
बियो दाइलग रोँगौ।
फेस्ला रावजोँ लोगोसे फावबो खालामनो रोँगौ।
आगोलाव गावनबो सोलोँदोँमोन बुदांआ।
रनजिद अस्तात फोरोँनाय 'गैया माखालामनो' थियेथाराव
फावखुंगुरनि भावखौ मोनदोँमोन।
जलंगिया लागाम गैयै सालायखौ
थाव फुनज्लेदबावना बुंबाय-
ए बाजारिया बैथालि होन्नायखौनो लाजियाखैबे?
रान्दि जोहोलाव बिमा
मान सन्मान लुबैबावोबा
मानोथो थगाय थगाय मैगं फानबावो नोँलाय?
सोमदोन बिमाया दुपफुं सिखारबाय।
जलंगिनि खानायाव हमना फंनैसो
दाम-दाम-दुम सौबाय।
आयलि जायलि मिथिस्लाबै
माब्लाबानो सानैजोँ बुलायबाय।
खानायाव बेबो हमो बेबो हमो।
दाम्पेर-फेर लाद्रा लुद्रा हायाव गोग्लैबाय जलंगिया।
सेन्देलजोँ खावलायाव सोबा बावबाय सोमदोन बिमाया।
सालि गाव गाज्रिखायनो मालायखोबो
गाज्रि सानो बियो।
नोँखौ थै-थै-थै सालि।
होन्नानै खावलायाव बुदोँ आरो बुदोँ सोमदोन बिमाया।
एसेयावनो मोनास्रि सोरबा सोरबा
मैगं बायग्रा आरो फानग्रा
हिनजावफ्रा हमथाबाय।
सिमब्रा बावदोँमोन सोमदोन बिमाया।
ज' ज' हमथानायाव बोलोआ थोआखिसै।
जलंगिया लुथुर फुथुर
गाबख्रावना थाबाय।
खुगायाव अब्लाबो खोनासंथावै रावआ
गोमायाखैमोन बिनियाव।
सिलानिनि मैगं फाननायाव गोग्लैदोँ।
थास' आथिँ आरो इलांसि मैगंफ्रा आदानि
लेथेर फिथेर जादोँमोन बाब्राबला बायनायाव।
जलंगिया गाबै गाबै सिखारबाय
खावलाय गोजा गोजा बुलुब बुलब।
सेन्देलजोँ खमैबो जि बारसो सोबाजादोँ।
लुन्दुन बुबायबो।
गान्नाय दखनाया मैला जाजोब्बाय।
बाब्राबनायाव दबाया गेँजोबथारदोँमोन।
नायथावथारै बेखायनो हौवा मानसिफ्रा
गोजाननिफ्राय नुहर खानानै खाथियाव थांनो हायाखै।
मोनास्रिया जलंगिखौ हाजासे मदद खालामबाय।
उनथाराव गाबगु खुगुयै रागा लानानै
जलंगिया बुंबावो-
बैथालि रान्दि थगायसुलि।
मोनगोन नोँखौ र'।
गाबोन बिसार जानांगौ।
सिलानियाबो बुंबाय-
आंनोबो मैगंनि बेसेनखौ दानो होखाहाय।
सोर होयो।

कलेजनिफ्राय सफैग्रो मोनना
ओँखाम गोजांखौनो जाबाय आं।
जाखांनानैबो दमकल सेराव जानाय
खालाय दैफोन थोरसि लथाखौ सुबाय।
मोनायाव माखासे जाहोननि थाखाय
ओँख्रिया खामथाबथारदोँ।
दा बेखौनो मानजिगासिनो दंमोन आं
जोबोद खस्टयै।
थावजोँ माजोँ मिलिखा-मिलिखि
गोखाम अरथाब थारदोँ।
खुनुरुखुम 30 मिनिटसोनि उनाव
फोरला बेजेजोँ नाद्लुनबायनानै सुखांबाय।
न'आव हाबनाय लोगो लोगो
बिलिफांआबो राव होबाय
- दाबो जायाखै नामा?
हमनो हानानै न'सिंनिफ्राय बुंहरो आं
- फैबायानो माब्लाबानो?
सिंआव बिलिफांआ हाबदेरो।
आं आरो बेखौ गल'सो नायफ्राङो।
सान्दोँबो आं
- मालाय गोदान गोदान गानना फैलायबाय।
बोरैलाय आं मेँख्ल ख्ल
खलार जिलायनाय गस्ला सार्ट गानना
थांफा बावनो?
लासिँसिं- बायदि बायदि।
खुसिजोँनो बिलिफांआ बुंबावबाय आंखौ
आंनि सानबोलावरि सिफायनानै
- गोख्रै फाग्ला गोख्रै
थाइमा जाबायानो।
- दे दे नोँ थाथ होन्नानैल'
दुगैनो हाखु दाखु
दमकलसिम थांबाय आं।
माब्लाबानो आंबो मिथिस्लाब मोनै दुगैखांबाय।
देलायै साजायै थावन फारसे
बिलिफांनि 180 फाल्सार गाखोना आंबो थांफाबाय।
बिलिफांआ दिनै गावनि रं नाम्बार
मोजां मोनलायनायखौ लोगो हमगोन।
सानथामसो सिगांआवनो बियो आंखौ
कलेजाव क्लास लानायमानि बुंबाय
थानानैनो दंमोन।
सिख्लानि मुंआ निजोरा।
निजोरा ब्रह्म। बबेनि जाखोथाय
आं मोजांङै मिथिया।
गारांआ खोब गोदै।
बैसागु बोथोरनि जेन' दाउ खौऔआनो।
आंबो बिलिफांनि फनजोँनो खेबथामसो
रायज्लायबाय।
बिलिफांआनो आंखौ रायज्लाय होदोँ।
बिलिफांनि आन्दो आन्दो माब्लाबा
बुंफ्लांबायबो आं ओरै
- बिलिफांआ नोँखौ थगायब्ला
आंनो लागोनलै सना होन्नानै।
दिनै लोगो हमगोन निईर लआर आसाम
हष्टपिटालनि बाजै हटेलाव।
बेसेबा गोबावनिफ्राय गोसो थोलायनाय
नाथाय मोजां गाज्रि
माब्लाबाबो नुलायाखै।
दिनै लोगो हमलायगोन।
गासैबो फाइनाल जाजोबगोन।
मानि फरायनाय फसायै
गावनि मेगननि बाथ्राखौ फोरमायलायगोन।
आंहाबो नाखोमानो एबा
बिसोरनि रायज्लायनायखौ खोनासंखोमानो गोसोआनो जाथारदोँ।
दसे उनावनो बाजै हटेलाव
सहैबायानो जोँ।
लोगो लोगो बिलिफांआ रिँहो-हरबायानो आरो
बुंहरबाय
- फैदो गोख्रै जोँ दंफैसै नै।
आरसा नोँसोर फैबाय थादो गोख्रै
जोँ सिङावनो थागोन होन्नानै।
सिङाव हाबना जिरायहैबाय जोँ।
ओँखाम जाहोहरगोन सिख्लाफोरखौ।
बेयावनो लासै लासै रायज्लायनांगौ
बुंनांगौखौ रायफोर लायगोन।
मालाय रायज्लायगोन
गोरबोनि बाथ्रा, मोजां मोनलायनाय राव
मोखां नायलाय नायलाय।
आंहासो जाबाय लासिँसिं।
आरो आंनि गान्नायफ्रा?
सि सि लंफेना जांलाब लाब
आजिखालि बेखौ अमिताभ बसनाथ' गानलानो
गामियारि बोरायसाफ्राबो गानबावला।
गस्ला सार्टआ खलार जिलायनाय
खानायाबो लावबायमोन
सिनजानो दामानि रां थोस्लाबाखै।
गोसो सिङाव सान्दोँ आं
- बिलिफांनि लोगोआ नायजाथारा
गोरिबमालाय एफा गोरिब?
होन्ना बिनि गोसो थोनाया सानबा!
बिलिफांआथ' बासि जाया।
हेनसामबो हेनसाम 180 फाल्सारबो दं।
न'आवबो मालाय बिफाया फोरोँगिरि।
बायदि सिना सानफ्लांनानै गावखौनो
लासिंसिं सानबाय थादोँ आं।
हटेलनि खारिकलफ्रा
दाहालागै नायै बेदरै
ओँखाम लाना फैसिगौ खोमा?
नाथाय आंथ' जाखांबायानो
मोनानि ओँखाम गोजां आरो
दालि ओँख्रि गोजांजोँ।
नं नाम्बार सिख्लायाबो
सफैसिगौ खोमा।
देलाइस्रि मोदोमफ्रु सेन सारफबनानै।
एसेयावनो बिलिफांनि फनाव
गाबखां होहरबाय।
मा मा होनहरखो गावसो मिथिसिगौ।
नाथाय बिलिफांनि रावखौ हले आं खोनादोँ।
'ओरै फै खनाजोँ जोँ सानै जिरायगासिनो दं।'
लोगो लोगो आं बाहेरा
दरखं फारसे नायहरो।
सानै सिख्लाफोर हाबहांल' जादोँ।
आं बिसोरखौ सिनायदोँ।
उसु खुथु मोननानै आं बिलिफांखौ
बुंदोँ
- थाथ'दे आं बायजोआव
थांना फैनि दसेल'।
होन्नानै थंब्लेद गुबुन लामाजोँ
बारन बोदोँ आं।
आरो अट' गाखोनानै
लजिँ न'फारसे फैयो।
गोजावना सानबोलावरिजोँ
लजिँआव सफैनानैबो सान्नायनि
दाहारा बारासिन जालांदोँ आंहा।
आं सान्दोँ
- बिलिफांआ आंनि जोबोद लोगो।
नखराव जोबोद माहाजोन।
गावनो फिसाज्ला सासेल'खा।
नाथाय माहाजोननि फिसाज्लाबाबो
मालायबादि नङा।
आंबादि गोरिबनि जोलैखौ
गावनि असे लोगो
सायखना लानायाबो साननो गोनां।
नाथाय बेयो रं नाम्बार जानानै
गोसो थोलायनाय जाथाया
सिखावै बोरै जाखो?
आंहा गोसोआव फैदोँ
सानसेखालि आं मानिबा थाखाय
बिनि फनजोँ रायज्लायनो सान्दोँमोन।
नाथाय रिँनानैल'नो थादोँमोन
रायज्लायनो मोनलायनाय जायाखैमोन।
बिलिफांआ आंखौ रागा जोँसिगोन
मानोना आं थगायना बेखौ
हारसिँङै गारबोबाय।
मा मा रायज्लायखौ गावसो मिथिसिगौ।
बिसिनायाव गोलांना आं
सानबाय थानायावनो
गारिखौ लाखिना बियो
बेल दामख्राव फैयो।
आरो आंनि खथायाव
थ्रोब बारसन फैयो।
बे समाव आं गुरलाब मानोबा
बागदाव खांदोँबो।
बियो बोराबनायजोँ बुङो
- मानो थगायनानै फैखो नोँ?
आं सिरियैनो थायो।
आरोबाव बियो गावनो फोरमायो
- सिख्लायाथ' मोजांआनो।
- मा सानखौ नोँ? होन्नानै
एसे गोमजोरै सोङो आं।
- आं बिनो खोथा होबाय।
थैस थांसनि होन्नानै।
बियो आंखौबो बेबादिनो सानबाय।
जोँ जिउ मोनसे गोरोबलायनाय
बाथ्रा बुंलायबाय।होन्ना
दसे थाद'यो बिलिफांआ आरो मिनिसुलु बियो बुंबावो
- साफागुरिसिम दोन्ना फैबाय आं।
नोँखौबो नायनो लुबैदोँमोननो।
नोँ मानो खारखुमा बोआ?
अब्लासो आंबो बुंबाय
- बिलिफां नोँ आंनि जोबोद लोगो।
नोँनि मोजां मोनलायनायखौ
आं हेँथा होआ।
नोँसोरनि जुलिया सानसे जागोन।
नाथाय बे बैसोआव नोँसिनि
सोमोन्दोआ गाज्रिथारै
आंनि खोमायाव नाङोब्लासो आंहा दुखुमोनगोन।
बे बैसोआव आं नोँसोरखौ
जुलि जानो होआ।
बिलिफांआ गल'ल' मोखांङै बुङो
- मानि आं बारा बुजियाखै।
- बिलिफां निजोराखौ आं सिनायगौ।
आरो सिनायनायल' नङा
बियो आंनि असे बिनानाव।
बिलिफांआ सान्दोँ जानांगौ 'लासिँसिं'-
आरो आंबो सान्दोँ एरैनो।

हाब लावां मा खालामनो
सानखो नोँ फिसाफोरखौ?
गासैबो बेखार
जाजोबथारबाय माथो।
साब्रै गाहाम।
- गोरिबलै आदा।
मा खालामनो?
थाव- संख्रि फानलुआवनो
थांजोबथारो गासैबो।
- हाब लावां नोँ बेबादि।
सानफ्रामबो लोङो जायो
नोङो।
माब्लानिफ्राय
थाव- संख्रि फानलु
बायफेरखो नोँलाय?
हिनजावआनो सानफ्रामबो
दखना रोबै फिसि फिसि
मोदैजोँ गोलोमदैजोँ
संसार सालायगासिनो।
लाजियाखिसै नोँ?
- आं उन्दैसिनखौ एबाराव
फोरोँसिगोनलै आदा।
- दे दे, मोजाङै फोरोँ।
सरकारा गोरिब
गुन्द्राफोरनि थाखाय
बेयो मोजां गामियावनो
रां नाङा मा नाङा स्कुल
खुलिना होदोँ।
नोँहा मेगन थानानैबो
फिसाफोरखौ रोनाव
होदोँ।
मोना मोना हरना- गुना
अन्थाइ जोथ्रोदनोल'
रोँसिगौ नोँ।
- जाबायलै आदा।
जाबाय।
उन्दैसिनखौ
हामथि दुमथि
फोरोँसिगोन आं।
इंराजि मेडियामआवसो
माथो लिटार लानो
हालायो।
- मा लिटार बेलाय?
- बुरजा नाम्बार
मोन्नायखौ बुङोब्रा
आदा।
लिटार।
- हा: हा: हा:।
लिटार होनालै फंबाय।
लेर्टा।
लेर्टा होन्ना बुं।
- हे: हे: हे:।
जोँ जौ लोँनायाव
लिटारखौनो बुङो।
बिदिब्ला जोँना जौ
लोँनायाव इंराजि
रायज्लायनाया जायानो।

हाब लावां मा खालामनो
सानखो नोँ फिसाफोरखौ?
गासैबो बेखार
जाजोबथारबाय माथो।
साब्रै गाहाम।
- गोरिबलै आदा।
मा खालामनो?
थाव- संख्रि फानलुआवनो
थांजोबथारो गासैबो।
- हाब लावां नोँ बेबादि।
सानफ्रामबो लोङो जायो
नोङो।
माब्लानिफ्राय
थाव- संख्रि फानलु
बायफेरखो नोँलाय?
हिनजावआनो सानफ्रामबो
दखना रोबै फिसि फिसि
मोदैजोँ गोलोमदैजोँ
संसार सालायगासिनो।
लाजियाखिसै नोँ?
- आं उन्दैसिनखौ एबाराव
फोरोँसिगोनलै आदा।
- दे दे, मोजाङै फोरोँ।
सरकारा गोरिब
गुन्द्राफोरनि थाखाय
बेसे मोजां गामियावनो
रां नाङा मा नाङा स्कुल
खुलिना होदोँ।
नोँहा मेगन थानानैबो
फिसाफोरखौ रोनाव
होदोँ।
मोना मोना हरना- गुना
अन्थाइ जोथ्रोदनोल'
रोँसिगौ नोँ।
- जाबायलै आदा।
जाबाय।
उन्दैसिनखौ
हामथि दुमथि
फोरोँसिगोन आं।
इंराजि मेडियामआवसो
माथो लिटार लानो
हालायो।
- मा लिटार बेलाय?
- बुरजा नाम्बार
मोन्नायखौ बुङोब्रा
आदा।
लिटार।
- हा: हा: हा:।
लिटार होनालै फंबाय।
लेर्टा।
लेर्टा होन्ना बुं।
- हे: हे: हे:।
जोँ जौ लोँनायाव
लिटारखौनो बुङो।
बिदिब्ला जोँना जौ
लोँनायाव इंराजि
रायज्लायनाया जायानो।

थाखो 10 खौ उट्रिनानै
कलेज फरायनाय समाव
सासे सेँग्राजोँ रं नाम्बार जादोँमोन आब'आ।
बेयो बेँलराव माबा खामानि मावोमोन
मोजाङै मिथिनायनि सुलुं गैया।
मिथिनोबो गोब्राबै नाजानाय जायाखै।
से बोसोर मोजां मोनलायनाय
फुरा जाया नङा जादोँमोन।
बेनो उनाव जानायसै
आफानि बिजामादै।
बेँलरनिफ्राय फैनाय समाव
बेयो जानांगौ बाथ्राखौ थिक सान्दोँ-
एसे साननि उनावनो
जोँहानि न'आव बियो सासे आलासि।
जायै- सावरायै आब'खौ लानानै थाङो
आलासि महरैसो,
हिनजाव गोदान नङा,
नाथाय बहा?
आब'आ फैफिननो बोलो गैया
बेजों बिनि जुलिया जालांबाय
आय- आफा आरो आंनि
सोरबा रायजोनि हेँथा बहा?
गैया गैया हेँथा गैया;
नाथाय जुलिया गमामायै जालांबाय।
घोरोमबादि गिर्जायाव जुलि
रायजो राजानि बोर आरो दान
हाजासे मदद।
दिनै बियो गोग्गा
गावनि फेरलेबसे गियानखौ लानानै।
आं मिथिगौ बेखौ
बिजिरनोबो हागौ
रायजो राजा बयबो मिथिगौ
बिसोरो नुदोँबो अराय।
बियो सोरनिबा रोँदोँ
बियो नाथाय मोनसे दाहारसो
सुखुनांगौ बे दाहारखौ
सोरखौबा फोरोँफिन्नानै मोजां।
मानोना बाथ्रा दं-
नोँनि रोँनाया नोँनि नङा
सोरबा सासेनिसो फोरोँनायाव।
बियो जौ लोङा
सिगारेड् बिरिबो सोबा?
नाथाय मोजोमसे गोग्गा
रावनिबो उन्दै नङा
रावनिबो गेजेन नङा
रावनिबो रोँसिनै नङा।
नुग्राया गोरोँखौ गोरोँ बुङो
रोङैखौ रोङै बुङो
फुं, सानजौफु, बेलासि, मोनाबिलि
सान- हर होन्नायबादि।
नाथाय खोनायोब्ला?
नंगौ नङा, जादोँ जायाखै
गियानजोँ बिजिरनांगौ जायो।
घोरोमजोँ नागिरनांगौ जायो।

इं 2012 मायथाइनि जोबनो दानाव
आयं मेब्लाया रौमारि
गामिनिफ्राय रुंसारि
जालांबाय।
गोब्राब खानो रोङै बेरामानो
आयंनि थैनायनि जाहोन।
गोबां रां गारनानैबो
दाक्टारनाव नायदोँमोन
नांगौबादि मुलि जादोँमोन।
अजाबो हमदोँमोन रां खरसा
खालामनानै।
नाथाय बाराद्राय हामनो रोङै
बादि जानानै
2012 मायथायाव रुंसारि जालांबाय।
आं दिनै गोसो खांदों आयंखौ
बेयोदि आंखौ उन्दै समाव
बेसे बेयो जंखायोमोन।
बाराद्राय गोसोखांनायनि जाउनावनो
आयं मेब्लानि सावगारि
एरखांना दोननो लानाय
जाबाय।
आयंआ आंनि गामि रौमारिनि
गागिथार सासेमोन।
आं गोसो खांदोँ उन्दैनि
जेब्ला आं उन्दैमोन।
आयंआ आंखौ जंखायोमोन
'मासुमला' होननानै।
(आनै) जान'खि होननाय सासे
रान्दि दंमोन
बिहा सासे फिसाजौ लोगोआव
दंमोन।
आयंआ सम सम लामायाव नुब्ला
आंखौ
'जोँनो नांगौ फ्रेजिलेन फ्रेजिनेन'
होनना बुङोमोन।
बे समाव बर'फोरनि
गोब्राब आलादा हादोद
सोमावसारनि समा
थाद' हांबायमोन।
बेनिनो साया बे जंखायनाय
रावआ।
आनै जान'खिनि फिसाजौआ
प्रेजि मुंनिमोन।
आं नाथाय बे समाव बाराद्राय
रागा जोँफ्लाङोमोन।
एखमबा अन्थाइजोँ खुबैना
होयोमोन।
उन्दै समाव आयंआ
बाराद्रा जंखायोमोन।
बियो बांसिन जंखायोमोन जेब्ला
आं
न'आवनि मोसौखौ गामिनि
साहा थानाय
फोथाराव खानो लामायाव
फैयो होयोमोन।
बे समाव आयंआ लामायाव थाना
जंखायोमोन।
आयंआ थैनाय सानखालि आं
गामियाव गैयामोन।
बे समाव आं बंङाइगामिनि
लजिँआवनो दंमोन।
आयंनि हरखाब रुंसार जानाय
समाव
बिखा खायसिब आं खौरांखौ
मोनदोँमोन।
आरो फारि फारि आयं उन्दै
समाव आंखौ जंखायनाय
रावफोरानो
गोसोआव हरखाब बोहैबोदोँमोन।
सारादु समाव आं सानदोँमोन
आयंआ रौमारिनि बिखानिफ्राय
नैथि रुंसार जानाय सालगुरिनि
फेँखा।
रौमारिनि गाहाय थागिबि।
बेनि सिगाङाव आदै जाथिया
हरखाबै रुंसार जादोँमोन।
सिगांथाराव एम्बु होन्नाय
आं उन्दै समथाराव रुंसार
जादोँमोन।
दा बिनि रौमारियाव रोदा
फेँखा गैलिया।
आनै जान'खियानो बिनि
बिसिमोन होनना बुङो।
बेबो दा रौमारिनिफ्राय
खारलांबाय।
आय' मानसिनि सोलेर!
जिउखौबो हमथा हाया
सोलेरखौबो बेसे गोबाव
अनसायनो
जुदि अबंआ गोसो जायो।
बे समाव आं सान्दोँ-
आयंआ सानफ्रामबो
एसे एसे जौ लोङोमोन।
बियो नाथाय दुगायामोन।
आयंहा मोनसे गोसो दंमोन
बियो गावनि हायाव
मोसौ खाहोआमोन गुबुनखौ।
हाया गोरा जायो होनना
बियो बुङोमोन।
गामिनि अनलायना रायजो
जालायनाय गोजोनै
गावजोँगाव खर' सुंबोलायनाय
बयबो बिहा बिनि
बेयो बिनि मदद नागिरो।
माब्लाबा समाव आयंआ नुस्लाबै
मोसौखौ सोरबा सोरबा
खायोमोन।
नाथाय आयंआ उनाव नुब्ला
मोसौखौ खुन्थिया बुखुना
हगार हरोमोन।
बेयो आयंनि मोनसे
जोबोद गिदिर गोरोन्थिमोन।
जाहोनाव बायदि रोखोम
बाथ्राबो सावराय जायोमोन
सिरि सिरि।
मानोना जोबनाय गैयै अबंनि
सोरजिनायाव
सोरजिजानाय अबंनि फिसा
बयहाबो
थांना थानो
मदद नागिरो, अनसायो
मोन्थाय थायो।
नोँ आं जोँ गासैबो
सासेल' बिफा अबंनिब्ला
जोँहा सुंथालायनायनि गोनांथिया
दं।
मानोना जोँ थांगोन-
फिन सोरबा गोदान फैगोन।
थागिबि रौमारि गामिनि आयंआ
अन्थाव बाथाव बोरायसानि महर
मोनस्लाबैयावनो
हरखाब अबंनि लेँहरनायाव
थांनो गोनां जाबाय सोरगोआव।

जेब्ला घड़िनि समा गोग्लैयो
कलेज फारसे आं आगान सुरो,
जेब्लाबो सहरनि गोमफबनाय सोदोब
लामायाव मटरनि होँगो दोँगो बेल।

बे हादोरनि गासैबो हाब्रु-हाद्रिखौ
गावनि मोदोमाव फुन्नानै लागोन
आरो गोगो बे हादोरनि दैसानि दैजोँ
गावनि मैलाखौ गावनो सुनानै लागोन
समाय लायो आयै आंबो
नोँनि दुखुनि मेगननि मोदैखौ
आरो नोँनि गोसो-गोरबोनि मोदैखौ
आंनिनो आखायजोँ हानायमानि हुगारनो
बे हादोरनि मोनजारोङै हावरियाफोरनि
दुखुनि गाबनायखौ जेरैबाबो होखारनानै
हालुवाफोरनि नांगोलजोँ सुजुनाय जारिमिनखौ
मुलुगाव जेरैबाबो फोसावना होगोन
जाय मोन्थाइखौ सेखनानै लादोँ सुसिगिरिया
जेरैबाबो हा बिगोमानो गथायना होगोन
जोबोद सैथोथार बे जारिमिनखौ
माब्लाबाबो सोबखग्राया खोमोरनो हाया
बे हादोरनि बार आरो दैसाया रोजाबो
बे हादोरनि जिबि आरो दाउसिना रोजाबो
बे हादोरनि मिथिँगाया सल' खिन्थायो
समाय लायो आयै आंबो
बिगोमानो गथायना होगोन गासै मोन्थाइ
थिखोना होगोन गादब जानाय गिरिनो
बिसोरनि मोखांआव मिनिनाय लाबोगोन
आरो समायना खालामगोन आबाद दुब्लिखौ
जेराव रसा नाङा बे हादोरनि फिसाफोर

फिसा- आयै, आयै!
जोँना फोरोँगिरिया
आंखौ अ आ खौनो फोरोँला।
बिमा- हा माथो जाखो?
फिसा- नायसाय आयआ
बुजियानो
फोरोँगिरिया अ आ खौनो
फोरोँला।
मैयाबो आरो दिनैबो खालि
1+ 1=2
1+ 2=3
1+ 3=4
1+ 4=5
बेबादिल' फोरोँङो।
बिमा- जाम्बासो नोङो।
दाजाब दानख' फरायाबा
बोरैथो गोरोँ जानांगौ जाखो?
फिसा- आरोबाव ओरै होननासो
फोरोँ
बावदोँ-
ब+ ल= बल
द+ र= दर
ब+ थ+ ल= बथल
फोरोँगिरिया आंखौ अ आ खौनो
फोरोँला आयै।
बिमा- जाम्बा नोँ गोरोँसिन
जाबाय नालाय।
फिसा- आयै, आयै-
द+ र= दर
ब+ ल= बल
जायोब्ला
अ+ क= मा जागोन?
बिमा- अ+ क= अक जागोन
जाम्बालाय।
फिसा- आयै, अक मानि मा
जाखो?
बिमा- अक मानि
गिबि गारां हांखो
आरो
गिबि खौरां हांखो।
फिसा- नोँ रोङालै आयै।
अक मानि आंनिबा
'सराय'ख' सो जागोन।
बिमा- जाववव माब्रै...
जाबायनांगौ जाखो???।

रंजाखाङो खुसिजोँ
जोबोद गोजोनग्लायना
समायना सुदेम सुदेम गोरबोआ
नोँनि मिनिसुलु सोरांजोँ
.
बे सोरांजोँ बार बारबोयो
बे बारजोँनो-
दालाइ बिलाइफोरा मोसायो
बेसेबा रंगिना संगिना बिबारि
.
बेसे समायना नुयो
गोसोनि खुसिजोँ
गोरबो गोजोन्नाय मिनिनायजोँ
गोगो गोजोँ आलायारन
रैरुब फुंबिलि सनाबिलि
.
जोँमा नोँखौ खुलुमो आं
नोँनि अननायनि फिन होना
जोबोद मान होनायजोँ
जोँमा आंदि बोर आजावो
.
बेबादिनो नोङो फै
बयनोबो गोथार बिलिरनायजोँ
बयनोबो गोरबोखौ सोरां होनानै
दाउसिन दाउला सिरि मोनना
.
बेसे गोजोन मिथिँगाया
मिथिँगानि गासै खुसिजोँ
बेसे समायना बुहुमा
दुंबुर गोरबो दुंखाङो निजोरा
.
फुरसब जोमै अखोरांआव
हाथर्खिखौ नुयै फांथेयो
बेसे समायना जायो
फैलाव सोमखोर अखोरांआ
.
गोजोन मोनो बुहुमनि गासैबो
रंजाखाङो बाज्लखाङो
बेसेदि समायखाङो गोसोआ
खुसि जायो आं गेवलां मिथिँगानि
मिनिखैरो मिनिनायाव।

नै सोरजिगिरि आंनि!
नोँखौ खुलुमो गुबुन नङै गियानजोँ।
साबायखर नोँखौ आफा गोरबोजोँ।
बिनायमानि होनाय बान्थानि।
मेगन बेखेवबाय नोँ आंनि।
गासैबो नुबाय आं मेगनजोँ मोजांङै
आरो होबाय नोँ मोजां।
मोन्दां- हमदांनो गोरबो दाखा।
जोँमा नोँखौ खुलुमो आफा।
नै सोरजिगिरि आंनि!
नोँखौ खुलुमो जेब्लाबो।

सान्दुं नोँ आंखौ गोलोम होयो
आं नागिरो बिफांनि साया
हाबायाव गोदोना आं मेंग्लियो
सान्दुं नोँ आंखौ गोलोम होयो
गोमोथाव बुहुमाव साना मिनियो
जोँख्लाब जोँख्लिब बायदि मैया
सान्दुं नोँ आंखौ गोलोम होयो
आं नागिरो बिफांनि साया

बोरायखौ आंबो सिरि सिरि
रागा जोँदोँमोन।
नाथाय बांसिन मिनिथावसोमोन
जाथायनि गासैबो सावगारियानो।
. . . . . . . . . .
आमटेका हाथाय।
हाथाय बारायब्लाथाय होँगो-दोँगो,
सिथिँ-सिथा।
एरायलायनो जायगाखौनो मोना।
हाथाय बाजारा बिदिनोखा
बायलाय-फानलायनि होँगो-दोँगो।
बेखौ दोनथ'दो,
खानाय सिनग्रा गलायानो दिनै
बाराबाव।
खानाया जाइला-ला जाथारनायखाय
सिनजानो सान्दोँ आं।
नायनो साबा नुथारबाय होन्ना
गोसो थोनाय बालेवा बुंबाय
थानायखाय सिनजानो नांबाय।
खुसेँग्रा लानजाया लावना गोदोना
बाग्लायनानै फाफ्लि मोनबायानोमोन।
अब्लाबो आं सिनजानो गोसो गैथारामोन।
आं सिरि सिरि सानखोमादोँसोमोन
खानाय गोलाव लानानै
दुगा देखायनो।
आरो फैगोन बोसोराव सिराज बाग्लारि आदैया
गुन्दानि फार्टआव होयोब्ला...
बायदि साननायमोन।
नाथाय थबस्र सान्नायखौनो सिफायगारबाय
बालेव मायनावआ।
गोसो थोनाय थाब्ला बिदिनो,
आंनि गोसोबादि ना बिनि गोसोबादि
जानो बेखौनो मिथिस्लाबा।
खानाय सिनग्रायाव दिनै होँगो-दोँगो मानसिनि मानसि।
सियार खामफ्लाय जिरायनो
मोनलाया।
थाग थिग 9.30 रिँगायावसो
नायदावग्रा अदेबानि नायदावना
सिनग्राजोँ सिनजानो मोन्दोँ आं।
मानसिफ्रा बेखौ मोजां मोना
माने बियो बारा मोजाङै सिननो रोङाखाय।
गुबुनखौ नेबाय थानो बाना
बेजोँनो सिनजाबाय आं।
थेनथ'लायजासे खानाय सिनजाबा सासे
खानाय फुरनाय बोराया
गिदिँ फैदोँ आंनि सेर सेर।
खानाय सिनग्राखौ बियो बुंदोँ-
आंनेबो लावबाय खानाया।
आंबो सिनजानांगौ।
बाथारदोँमोन आं।
बेवाइयानो हाजादो हाजादो होनबाय थायो।
बेखायनो फैबाय आं।
दान्दिसे सिरि थानानै मानसिया
गावनो बुंगासिनो बुङो।
जेन'बा खांख्राय गुदुंनिफ्राय
दैया थपा थफा फेँफोना महरै
ओँखारदोँसो-
जोँनि खाथियाव सासे खानाय
सिनग्रा दंमोन।
दाखालहाय लेमसनाव हादान
खुलिदोँ होन्नायखाय खारलांबाय।
आंखौ खानाय सिनबा बेसाराया
रां गरसेबो लायामोन।
बे समावनो खानाय सिनग्राया बुङो-
गामिनि ओरैनो सिननायावलाय मय फैसा लानाय?
- खानायाबो मोनजोब्बाय आंने।
गोसोम खालामनांगौनो।
बेवाइया बेखौनो बुंबाय थायो।
दाखालहाय बुंदोँमोन आं-
बोरायनानैलाय खानाया मोनाला
माथो होन्नानैहाय।
खानाय सिनग्राया आंखौ गोसो
होना सिनथारनायखाय 45
मिनिटजोँनो हाबाय।
ब्लेडजोँ माखौबा माखौबा
गोदोना सेर सेर,
खोमानि सेर सेर हबाय।
उनथाराव मोजाङै हदोँब्लाबो
साबदारियानो फारसे गोलाव
फारसे गुसुं थाबावनायाव
समान खालाम होबाय आं।
गोदोना, मोखांफ्राव खानाय
सिथाबनायखौ खिथाब बायदि फिसा
सिजोँ बुस्रि स्रांबा खानाय
फुरनाय बोराया खामफ्लायाव खावब'
जिरायना सिनजाबाय।
बाथ्राया जोबनाय गैया
बोरायनि खुगायाव।
मादि मादि खोथा बरनदोँथाय
आं नालाखौनो मोनाखै।
माबा दाखालिनि सावथाल दावरावआव
गसाइगामिनि बबेबा बादायाव
गावनि बिसि बुरैयालायनो
माबा माबि जादोँनो
सोरबा बोरायजोँ।
आलासि जाहैनाया जोबोद
गिथाव बाथाव खैफोदाव
गोग्लैदोँलायनो।
बोराया दसेनो गावनि,
दसेनो बेवाइनि बायदि
मुहिथाव सलसो खिन्थाफ्रांबाय।
आंबो फैनोसो बागारबाय
खानाय सिनग्रा गलानिफ्राय।
बोराया खानाय सिनखांना
माष्टार ब्लेडजोँ हजाब्लाबो
जोबाखै बोरायनि सलआ।
थिख समावनो गामिनि सासे बोरायसाया
बेदर लानानै बुंहरबाय-
नै आदै नोँ थांथ'गोना थांथ'आ।
थांनायसै र' र'... हाबायानो।
- माथो माथो लाखो?
नायाखै?
बोराया बेबाराव रायज्लाय
हरालासेनो
खर'खौसो सोमावबाय।
माने लाथ'वाखै होन्नाय जादोँ।
ओजोँ खानाय सिनग्राया
हमथा थारनो हायाखिसै।
गोदानथार माष्टार ब्लेडआ होख्लायबाय।
खोमाया बेसेबा गोजा जाहाबलायनाय
थै बोहैबाय।
थरथिँ थरथिँ मोखांजोँबो बेसेबा
समायना बोहैबाय।
थखन थुनो बैसो जाहांनाय बोराया
रागाया अरखि जोँना खानाय
सिनग्राखौसो थाव सोबाबाय।
खानाय सिनग्रा माखासेफ्रा
नायगोमोना थाबाय।
बोराया खम नंखाथारा
नायखोनानै खानाय सिनग्राखौ बुंथावथारै बाथ्राखौबो बुंगारबाय।

जेरैबो जांख्रिखांदोँसै सोरगिदिँ बुहुमाव
सिखारदो आंनि उन्दुसोनाय लोगो
मेगन हुब्लिरदो मोखांखौ नोङो सुदो
दाउज्ला गेसेरनायखौ फेलेँ दाखालामसै।
जेरैबो मेथाइ रिँखांदोँसै बे मुगानि
बेसेबा जांख्रिखांनाय गोदान सोदोमस्रिनि
लोगो सिखारदो माबार नोङो
दाउसिनफोरबादि बिरनो माबार जुजिदो
समखौ नोँनो गथायनानै होफैबाय
सानजानि गोजोँ सोरां आलायारना।
समखौ लोगोआव लानानै नोङो
लोगो लोगो खारफादो गोख्रै
बिबारनि गेवलांनाय जेरैबो मोदोमनाय
नोँ दिनैनि फुंआव नुगोन मेगनजोँ
गोख्रै सिखारदो नै लोगो नोङो
जांख्रिखांनायनि मेथाइ रोजाबदोँ मिथिँगाया
गोदान बोथोरनि बारा बारबोदोँ
बे बाराव रंजानो नोङो सिखारदो
अख्रांआव नोँनिनो मेथाइ खनो दाउसिनफोरा
साननि सोरां रोदाजोँ बाज्लखाङो
दैमा-दैसानि दैया गुथाल दिखाङो,
बेसेबा गोजान थांखियाव दावगानायनि-
सिखार लोगो नोङो बुहुमखौ नायहर।
साना गोख्रैनो फैसालियाव गोमायोब्ला
नोङो आन्दायगोन बेसेबा खोमसियाव
सानजोँ गेलेनो दिनै नोङो सिखार
साननि सोरांखौ हमथानो सिखार।

सोरबा लामाजोँ फैदोँ
गिथाव- बाथाव मुस्रिया
फौ फौ सैमाया सोँदोँ
सान्दोँ आं, बियो जानो हागौ सिखाव।

मिथिस्लाबै गुमुरजोँ
नेवसिलांनाया गोसोजोँ
जायाखै सिखाव गोरबो-
गोसोनि;
सिखावआ आंसो-
गावनि खालामनो मिजिँजोँ
हास्थायखोमानाया गोरबोजोँ।

गोसो हाथास बिखायाव
दं बिरो मेगनाव
सिमानि फैसालि मोना मोना
गोसोम आरो गुफुर लामानि
थांनाय फैनाय गैया अनजिमानि
बिरोल' मेगनाव सिनाय मोनैबादि
सुजुलां सोरखिलां मिजिँजोँ
गिदिँ गिदिँ बुङो गोसो सक्रआ
खरलेब आयनानि मोदाननाय
फ्लां- प्लिँ गोसो बायगर मोनसे
हायाखै सिनायनो बहानि
खामखोन्दा अरनि बियोदि हांगारसो?
एबा जिगाबनि फ्राव सान्दुंजोँ
बिजिर जायै बेरफ्रावनाय फाग्ला मैखुनसो?
दंङ फिसिनाय मिजिँ
बुग्लि जाना दैज्लांनि अखाजोँ
एबा सावोननि गोसा दुंनाय सान्दुंजोँ
नुहरो रोमै रोमै
सिनाय मोना उदां मेगनजोँ।

सिमां दं आंहा मोकथां जिउनि
इनाय-अदखारनिफ्राइ अराय बारगनो
मिथिँगाया आंनो बोलो होयो
आं बारगगोन बे फानजारिनिफ्राइ

गोथार जिउमानि गोख्रोँ गेदेमाफोरा
गोगो मिहि सिमां नुनायबादिनो
आंबो सिमां नुयो लैथोमानि सिङाव
साम' खिँखिरिनि गोसो होसारना जिउ सुजुनायबादि
बयनिबो जोबोद गोजौआव एभारेष्टनि थिखिनियाव
आं गाखोहैनो लुबैयो अरन सिँखावनानै
बयनिबो गोथारसिन अख्रांनि जोमै जानानै
आं बुहुमखौ फिसिनो जोबोद लुबैयो
गोगो आरो गोथार मिथिँगा सोरजिनो
आं सिमां नुयो बयनिबो गोजोँसिन गावदांसिन
सोरां फुर्णिमा अखाफोराव बिरखं गाखोनो
नाथाय आं दिनै जोबोद गुदु अरन गेजेराव दं
आं जाय अरनाव दुखु-हांमाजोँ गाबदोँ
बे अरना रुगुंमोनै लैथोमा गेजेराव
बिनिफ्रायनो आंनि दावबायनाया जागायजेन्दोँ
आं थांखियाव सहैथारगोन आं फोथायो
मानोना आं जुजिगासिनो दं जेँनाजोँ
आंनि गोसोनि गिनाय-बानायफोरखौ
आं होखारगासिनो दं आंनिनो गियानजोँ
आं थांगोन आंनि गोथार थांखियाव
समायना बेसेबा गोजोन उदां थिलियाव
जेराव रोजाबनो हायो गावनिनो मेथाइ
बिबारनि गुरै फाइलि गेवलांनायनि

अनजालि
दिनैनि नोँनो फोरमायनो गोनांआ बेनो
माने बाथ्राया जाहैबाय
जोँ जुलिसे सानैजोँनि
.
ओरैबादि
जोँ सानैनि जुलिया जादोँमोन
जेराव थोरसि आजावफैदोँमोन
हाग्रानि गासै जिउ जिबि
मिथिँगानि दाउसिन दाउलाफोर
.
मिथिगौना
जोँलायनो सानैजोँ संसार जादोँ
ओरैबादि गोजोन संसार
समायना मिथिँगानि खान्थिबादियै
.
जेरै
फेरेँगा गाबोब्ला
सिरि मोनो हाल हुरनो
नोँबो आंनो ओँखाम संङो
.
जेरै
एम्बुनि गाबनायजोँ
अखा खोरोमनायजोँ
बेसेबा मोजां आबाद मावो
.
अनजालि
ओरैबादि सानैजोँ
मिनि खुसि जोँनि अनलायनाय
बेसरथिलि सिबिँ सबायथिलि
मायबारि फाथोबारि दैज्लां मेसेँ
.
मिथिगौना
सिमां नुदोँमोन आं सिमांआव
नोँजोँ आंजोँ संसार जानाय
बोथोरनि उनाव बोथोर

सिमांखौ आंनो नुदोँमोन
नोँजोँ आंजोँ मोनसे दैमायाव
दैमाखौ जोँ सानस्रिदोँमोन
नोँजोँ आंजोँ हांगार गोसोम हराव
.
मोनसे सोर्गोखौ मोनहैदोँ
मोनसे सोर्गोनि उनावबो
बेयावनो जोँ सानसे संसार जादोँ
सोर्गो नागारनांदोँमोन थेवबो
.
मोनसे हाजोखौ गाखोदोँ आरो
जेराव साना ओँखारो
जेराव खोलो खोलो बार बारो
नोँनि आंनि गोरबो गेजेराव
.
बेसेबा समायना जादोँमोन
नोँ मिनिदोँमोन जेब्ला
जेब्ला आं गोजोनदोँमोन अब्ला
जेराव जोँ सानैजोँमोन माब्लाबा

सिख्लाया आंखौ जोबोद गोसो थोयो,
नाथाय आंबो बिखौ बांसिन गोसो थोयो।
आं जेसेबां बिनो फोरमायना लानो सानो,
बिबो एसेबांनो फोरमायना लानो सानो।
नाथाय हाया हाया रावबो फोरमायलायनो हाया।
जेन'बा बियो बबि आं बबा।
नाथाय मोजां मोन्नाया मोनसे जिराद,
बियो सानसे बेरफ्रुगोनखि बेरफ्रुगोन।
थेवबो बेरफ्रुनो बा सेकेण्ड सम थाबावनायावनो आं सानसेखालि अनजालिनि खाथिसिम थांबाय।
थोर थोर मोदोम मावदोँ,
गन्थंआ बारा बारा मेवसिन्दोँ।
बे समाव रावबो गैयामोन,
दङ होनोब्ला बबेबा बिफां दालाइयाव दाउसिनफोर दंमोन जानो हागौ।
नायहरखोमादोँ एबा नायहराखै मिथिस'वा।
लासै लासै आं अनजालिनि खाथिसिम सहैबाय।
आं जोबोद गिबायबो माब्रै बुंगोन।
गोसोनि बाथ्रा,
गोरबो सिंथारनि बाथ्रा।
जेखियानो जाया जुथानि लेसखौ गोरायै खाखादोँ।
सोबानोबो हागौ,
माथो थिक सिख्लाफोरजोँ?
बेखायनो हुसियार जाखादोँ आं।
"आइ लाभ इउ" बुंना खारगासिनो खारबाय आं।
नाथाय अनजालिया आंखौ होसोमारबायसो।
खारै खारै राहा मोन्थारै हार्सानि न'आव थ्रोब।
दरजा ख्रे।
अनजालिया दरखौ नारदोँ आरो नारदोँ।
खोरखि खनायाव थाखोमाना थादोँमोन आं।
खोमा होनानै मा मा बुङो खोनासंनि सान्ना खोमा बिसिनानै।
खेबसे अनजालिया खोरखियाव दां बुफैबाय,
आं ओरैबादि बाग्दावबायदि
"आययै.........."
दुबफुं सिखारबा थारैनो आयआ आंखौ खोरखि बुना फोजामारदोँसो।
मानोना समा फुंनि 7-30 रिँगा जाबायमोनानो।
बंङाइगामिनि लजिँ फारसे आगान होनो समा जाबाय।
9 रिँगायाव कलेजआवबो सेथि साननि फेरियडआ जागायगोन, सहैथारनांगौ।

I.
गोदै बिमा नोँनि रावआ
रिङो गिदिँ गिदिँ खोमायाव
आं रंजायो आयै
आं रंजायो मिनिस्लुयो।
II.
आयै आं गाबनो ओँखारो
नोँनि खुसि नुनानै
मानोना आंदि मेँग्लियो
नोँनि अननाय बेसे सान्नानै।
III.
मा होननानै बावहरगोन आयै
मोदै बोहैयो नोँनि अननायाव
बेसेबांदि हुरा हुरा गोसोखाङो
आयै नोँ थैया गोरबोआव।
IV.
नोँ फेदेरबाय आयै फिसाखौ
मानबायै मानबायै
थाबायै थाबायै
आं गाखोबाय मिजिँआव।
V.
आं गाबो आयै दिनैबो
नोँनि मिजिँआव रंजानाय सुखिखौ
आयै मादि अननाय नोँनि!
आं फिसियो उजियाव।
VI.
गोसोआव रंजानाय आरो
आयै मादि नोँनि फिसाखौ
जिउ जोनोम मोनसेनि अननाय
बावनाय नङा आंलाय गोरबोजोँ।
VII.
आथिँ जोकथोँ बिखुंआव
मिनि मिनि मोसानाय
आयै नोँ बावनो हाया फिसाखौ
मा दं आं नोँनि अनगायै?
आयै नोँ गोजोनै थागोन।
VIII.
जिरि जिरि बोहैनाय मोदैया
दिनै लिरो खन्थाइखौ
आयै मुंजोँ नोँनि लेखा बिलाइयाव
मादि अननाय आयै नोँहा
जिउ जोनोम सानसे।
IX.
नोँ आंनि थसे लेम्प
मिनिस्लु फुथुयो गोजोन समाव
आयै नोँ सोरां आंनि।
X.
आं नोँखौ नुदोँ आयै
आं मिनिस्लुदोँ मोखांआव।
नोँनि आखायाव दिन्दौनाय
आं होमब्ला उन्दैमोन।
XI.
आं गाबदोँमोन अब्ला
हायाव आखाय सुंनानै।
आं नोँखौ नागिरदोँमोन
अब्ला नोँ बामखांफैदोँ।
XII.
साना ओँखारबायमोन आयै
खोमसिया खारलांबायमोन।
आंनि मेगनाव मैखि खानाय
बिलिरो आयै नोँ दुंब्रुद दै।
XIII.
नोँखौ साबायखर होयो आयै
हायना लाबोबाय मिथिँगा नोँ
आं गोग्गा आयै नायहरै-
आं गाबज्रि हरो आयै होन्ना।
XIV.
नोँ आंखौ मोजां मोनो आयै
नोँ आंखौ बोजबना लायो,
आं मिथिगौ नोँ फोरोँङो रायनो
नोँ फोरोँङो नायनो लामाखौ।
XV.
सोर आंखौ नागिरदोँ?
सोर आंखौ खुदुमदोँ?
रावबो नङा सिगां
नोँल' आयै, नोँ आंनि
जेब्ला आं उन्दै गथ'मोन।
XVI.
आं खोनादोँ आयै, आं
नोँदि आंखौ मानो गाबज्रिदोँ,
नोँनि गोदै गारांखौ
बुजिदोँ आं गेलेनाय समावबो।
XVII.
आंखौ बिखुंआव बानानै
थांनो होआखै अखायाव
आयै अनसुलि नोँ
आं मिथिगौ, आं मिथिगौ
बेसे सांग्रां नोँ लामायाव।
XVIII.
जेब्लाबो आंजोँनो लोगोसे
जोँनि बोथोरा गुस्लायलांदोँ,
नायहरो अखाफोर हार्थखि
आयै नोँ आंनो सल' खिन्था खिन्था।
XIX.
मेगननि मोदै हुगारनानै
मिनिस्लु मोखांआ बिबार बारो
आं खुसियै रंजायो आयै
बाज्ल' खाङो नोँनि बिखायाव।
**.
दाउखा बिदै जोमैनि खोमसियाव
फ्लाम अखा मोफ्लामनाय
एरसोदोँमोन आयै आं
ग्रुम खोरोमनाय अखा समाव
अनसुलि आयै गोबादोँमोन बिखायाव।
XXI.
समायना जायख्लंनि गाबखौ
बिजिरख'नो हायै नायहरो आं
आसि थुहाबना सोमो नाङो
आयै नोँ आंनो फोरमायो
दोँसे नोङो सल' खिन्थायो।
XXII.
मोदै रय रय बोहैबोयो
हब्रा हब्रा गाबख्रावो
आयै नोँनो आयै अनसुलि
नोँ आंखौ बामखांना गोबायो।
XXIII.
नोँनि मेगना सान आयै
नोँनि गोसोआ अखाफोर
दै, बार, मिथिँगा अख्रां
नोँ आंनि जिउ सोलेर।
XXIV.
मोदै बोहैयो अख्रांनि
आं सोङो अब्ला
आयै नोँनि गाबनाय मानि?
XXV.
आं दिनै सानो अराय
साबसिन गैया अनसुलि नोँनि,
जायखौ नोँ होदोँ आंनो
राव, फाव गोसो आरो
जिउ सोलेर मेगन।
XXVI.
नोँनि मिनिनायखौ मोजां मोनो
मानोना आंहा गोसोआव दं
नोँनि रंजानाया गोजोन होयो
मानोना आं नुदोँ बेखौ
आयै बहा बावनो बोरै?
अनसुलि जिउ नोँनि।
XXVII.
आखायाव हमनानै थाबायनो फोरोँनाय
नुदोँ मिनिस्लु सायखंखौबो,
फिसा आं नोँनि अनजालु
गाबनाय मिनिनाय लोगोसे।
XXVIII.
बोसोर बोसोर थांबाय
दैज्लां- मेसेँ माघ फागुन
बोथोरा गोबां रुंगलांबाय
आं मोन्दोँ अब्लाबो गोरबो
नोँनि रंजानाय- मिनिनाय
गोसोआव दं आयै आंहा।
XXIX.
आं दिनै गोसो खांदोँ-
आं जेब्ला नायहरो अखोरां
सिलानि दैस्लुंआव गोमोनानै
नोँ खिन्थायो बिलिर बिलिर सल'बाथा।
***.
आयै, नोँ जोबोद समायना आयै
जोबोद अनसुलि,
नंगौ नोँ बोलोगोरा
आं नुबाय आंखौ दबथायबाय।
XXXI.
जेब्लाबो आंखौ सान्नो होयो
नोँ अनसुलि, जेब्ला आं दुष्ट,
नोँ आंखौ दैबायो
जेब्ला थाबायनो साजायो।
XXXII.
नोँ आंखौ गोबा फैयो
जेब्लानो आं लेँहरो,
नोँ आंखौ साबसिन अनो
जायखौ आं मिथिगौ सान्नानै।
XXXIII.
आं नोँखौ साबायखर होयो
जेब्ला आंनो नोँखौ खुलुमो,
नोँनो सासेल' आयै गोहोनि
अनसुलि जायखौ सायख'दोँ।
XXXIV.
बहा मोना नोँ आयै
जेब्लाबो अन्नो गावनि फिसाखौ?
बेसेबा गोहो गोसोआव
गावनि फिसाखौ फोरोँनो।
XXXV.
जायखौ आं नाजादोँ
बेखौनो सान्दोँ नोँ आयै
जोँथि माथि हार्थखि रुजुननो,
नोँ आंनि फोरोँगिरि
नोँनो आंनि जोथोनगिरि नार्स।
XXXVI.
दैबायगिरि सोरां बाथि आयै
आं दिनै लाइमोननि लामायाव,
आं मिथिगौ आयै
रावबो गैलिया गोहोनि नोँनि अनगा।
XXXVII.
जाय जेब्लाबो नायहरो
जाय आंखौ रैखा होयो
जाय जेब्लाबो लोगोसे
नोँ आयै आंनि लोगोथार।
XXXVIII.
नोँ आंखौ फोरोँङो आयै
बबे सैथो बबे गोरोन्थि
सायखयो मोजां गाज्रि आं
नोँनि फोरोँनाय बेनिफ्रायनो।
XXXIX.
आं लोमजायो आं बोराबो
नोँ आंखौ मदद खालामो मोजांङै,
नोँहा आयेन दं-
बेनिफ्रायनो आं लामायाव।
XL.
नोँ जेब्लाबो जेरैबो
दैबायो आंखौ सोरां जिउआव
आंनि बिखायाव दा आबुं आयै
नोँखौ अराय मोजां मोन्नाय।
XLI.
आंनि आयै नोँनो
आंनि लोगो, आंनि फोरोँगिरि
आंनि अबं आरो अराय
अनसायजाथाव मिथिँगा मुलुग।
XLII.
नागिरबायो आयै नोँनि रंजानायखौ
जेब्ला आं सिमां नुयो मोजां,
नंगौ आयै सैथो मोकथांआ।
XLIII.
नोँ आंखौ मदद होगोन मिथिँगा
जोबलांजासे आंनि सोलेरा,
आरो समायना जिउ बिरग' जासे।
नांगौ मदद साननि उनाव सान।
XLIV.
आयै नोँनि अनसायनाय
माजोँ रुजुनो हागौ आंङो?
गैया आयै रुजुथाव नोँनि-
बेसे समायना मुलुग मिथिँगा
होयो आरो लायो बोथोरादि।
XLV.
नोँनि अन्नाय बिलिरनाय बेनो
मोनसे मिजिँ आरो सान्दांथि,
उन्दै समनि थाबायनाय
गोहो होनाय सांग्रांथि।
XLVI.
दिनै नोँ मिनिदोँ,
आयै नोँ उन्दुलांदोँ।
नोँ मा सिमां नुदोँ आयै?
नोँनि मोदैया मानि साथि?
मोजां मोन्नायनि आयै-
नै सना आंनि?
XLVII.
बेसे खुसि, बेसे मिजिँ
बेसे सिमां, बेसे आसा
आयै नोँनि आंनि मोकथां
आं सानो आं रनसायो।

XLVIII.
आंनि लोगो जेब्लाबो आयै
बिबार हाजो नोँ आयै
आं गाबनो मोजां मोनो
गोथार गोरबोजोँ मिनियो।
XLIX.
अनसुलि बिमा आयै
बेसे समायना गोसो नोँनि!
मिनिसुलु गावदां अखाफोर
फुंनि सोरां सान गोरलै।
L.
जोँथि सना फिथर
मैला गैया नोँनि अन्नाया आयै,
बेस्रां मेगन नोँनि दिन्थिनाय लामा
जोँथि माथि आसिया हार्थखि
गलाब बिबार मोदोमफ्रु खुदुमनाय।
LI.
अनसुलि बिमा आयै
नोँ होबाय आंनो सोरां,
आयै बहा मिनिनाय खुसिया-
गोमा लाङा आयै जिउआव।
LII.
आयै नोँनो सानफोरखौ सुस्रांबाय,
गोमो गोथां बायदि जायख्लं,
सल'बाथा, गोदै सिमां
आंनि मोदैयाव बिलिर बिलिर।
LIII.
साबायखर होयो नोँनि अनसायनायखौ
मोदैनि हिरा बिलिर दानायखौ,
आं मिथिबाय आयै दिनै-
मादि मिजिँ दं नोँहा आंनि।
LIV.
नोँनि मोजां मोन्नायखौ
बिजिरखनो हाया आयै
बियो लैथोबादि गोथौ
गोगो हाजोनि निजोरा बादि।
LV.
नोँनि थुलुंगाखौ नेवसि हाया आयै
आरो हाया बावनो अन्नाय...
बेयो समायना निजोरा
बहा मोन्नो आरो नागिरना आं?
XVI.
बुहुमा आंखौ गावनि बिखायाव
नोँनि उदैयाव आं गेलेदोँ...
समायना आयै नोँनि गोसोआ
गोथार गोजोँ जिउआ नोँनि।
LVII.
आयै नोँनि गोदै रावआ
रिङो रिँदोँ रिँगोन
नांगौ आंनो जेब्लाबो दिनैबो,
आयै आंनि मिथिँगा अनसुलि।
LVIII.
नोँ एसेबां अनसुलि आयै
उन्दैनिफ्राय अनबाय आंखौ दाबो,
आं गाबबाय रंजाबाय दिनैबो
नोँ फोरोँबाय थाबायनो आरो
रायज्लायनो, सोलोँनो।
LIX.
बेनो आंहा मोनसे बिखा
नोँखौ अनसायनो बिमा,
बुजिगौ नोँनि मोदैखौ
मिथिगौ अन्नायखौ नोँनि गासै।

नै बेयो बादायथिलि गंसे मुलुग
सेक्सपीयेरनि सायनासालि,
मेलेम-गियान गोहो-बोलो
थुननाय (सोरजि)
बिजिरनायनि जुजिलायनाय,
बेयाव रावबो देरहाया
बेयाव रावबो जेनाबो
नाथाय
जेनो जायफोर बाहागो लाया
दुखु-हांमा मोदैखौ जाय सहाय हाया।
हनै बेयो- बेबो बेबादिनो बादायथिलि
ग्रह'-नख'थ्र अख्रांमा मुलुग,
बेयाव दं गोमोथाव बादिलायनाय
सान-हर आमाय-जुमाय गेलेनाय,
बेयाव दा बाहागो मोनो
सेक्सपीयेरनि आनजाद उथ्रियो जाय...।