उन्दै समनिफ्रायनो आंहा सासे मोजां गेलेगिरि जानायनि थांखि आरो मिजिँ दंमोन।
बे मिजिँ खानाय गोरबोनि दुमायनाय मोनसे जिरादआ आंखौ उसु-खुथु खालामबाय थायोमोन।
आं सम सम बेबादिनो गामिनि लोगोफोरजोँ बायदि रोखोमनि गेलेनाय आयदाखौनो गेलेयोमोन।
नाथाय आं जेरावबो रोँद्रायै नङा।
मोनफ्रोम गेलेनाय आयदाखौनो आं मोजांबो मोननो हायोमोन।
नाथाय थेवबो आं बांसिन मोजां मोन्नाय गेलेनाया केरेत् (सौनाय, जोनाय, बारनाय बायदि) मोन।
उन्दै समनिफ्रायनो आं बे रोखोम गेलेनायखौ टि. भि. सेनेमा (सावथुन) फोराव सम सम नायनो खाबु मोन्दोँमोन।
बे इसेल' खाबुआनो आंखौ आरोबाव बांसिन मोजां मोन्नो गोसोखौ होबावदोँमोन।
आंहा बारा बारा सासे मार्टियेल आर्टिस (Martial Artist) गेलेगिरि जानो गोसो थौहाबसिनदोँमोन।
बेबादिनो आं सानसेखालि आमटेकानि फुर्णिमा फोथाराव गेलेग्रा Wushu मुंनि गेलेनायाव गेलेजेन्नायसै।
आरो उनाव आं 2 अक्ट 2010 मायथाइनि नबेम्बर (2/11/2010) आव बेँटलाव थानाय Wushu Assiociation of Chirang आव गावनि माखासे लोगोमफोरजोँ मुं थिसन्नायसै।
नाथाय एसेबां गोसो थासेयावबो आं फुरायै बे गेलेनायखौ गेलेनो मोनाखिसै।
इं 2012 मायथाइआव गोजौ फरायसालिखौ उथ्रिनाय लोगो लोगो बङांइगामियाव लजिँ थानानै फरायनांनायाव नागारनो गोनां जाबाय।
लोगो लोगो आं सान्नायसै आंनि मोनसे मिजिँआनो बायबाय।
मानोना आं फरायनायखौबो खम खालामनो हाया।

दिनै आं 5-40 रिँगायाव सिखारदोँ
खेबसे सिखारनायनै उन्दुफिन्दोँ
मानोना दामानि जोबोद गुसु
आरो 6-20 रिँगायावसो सिखारफिन्दोँ
सिखारनायनि उनाव आङो दुब्लियाव
माथाम मोसौखौ खाहैदोँ
फैफिननानै देहानि थाखाय दान्दिसे गेलेदोँ
हाथाइ मानजिना मोखां सुनानै
8-25 रिँगायाव फुंनि ओँखाम जादोँ
बिजाब फरायदोँ दोँनैसो खन्थाइ लिरदोँ
11-36 रिँगायाव साननि ओँखाम जादोँ
बिनि उनावबो आङो बिजाब फरायदोँ
1-16 रिँगायाव आफाजोँ खामानि मावफादोँ
मारा होनो थाखाय माय बजा जाबदोँ
बिनि उनाव दुगैनानै गानै जोमै
दुब्लिनि मोसौखौ लायनानै
न'नि गलियाव खाफैदोँ
बिनि उनाव बिजाब फरायदोँ
7-30 रिँगायावनो मोनानि ओँखामखौ जादोँ
बिनि उनाव आङो बिजाब फरायदोँ
9-40 रिँगायाव उन्दुनो एमसिम।

गोरबोनि थाखाय
जोँ गोरबोखौ मागियो
गुबुन मोनसे गोरबोआव
गोदान गोरबो
.
जोँनि गोरबोजोँ
दुखुनि बार बारलाङो
सुखुनि बार बारलाङो
बोथोरनि उनाव बोथोर
.
गोरबोनि थाखाय
गोरबोनि थाखायनो
जोँ थांनानै थायो
थांना नाथाय जिउनि थाखाय
.
मिजिँ सुजुयो
खबाम गोबां खन्थाइबादि
सिमां रनसायो
रंजानाय गोबां मोकथांबादि
.
गोरबोनि थाखाय
गोरबोनि थाखायनो जोँ जेनो
गोरबोनि थाखायनो
जोँ मिनि खुसि देरहायो
.
थांनाय आरो थैनाय
गोरबोनि थाखायनो
जिउ आरो सिमां
गोरबोनि थाखायनो
.
गोरबोखौ जोनोम होयो गोरबोआ
बेसेबा समायना समायना
मिजिँ गोबां सिमां गोबां

दुंबुर साननि बिलिरनाय
रैसुमै बारनाय बारजोँ
बिलिरदोँ सुदेम
सुदेम आंनि सोलेराव
.
बेसे गोजोन
रैसुमै दाउनि मेथायाव
बिफांनि गोरलै गोरलै बिलाइ
रोजाबदोँ दाउसिन बायदि गारांआव
.
आं गोमोहाबो
गोदान जाबोबाय मिथिँगा
रंगिना समायना जेरैबो
नायनो बेसेबा मुहिनां
.
सोमखोर मोकथां
निला अख्रांआव
फुरसब जोमै माखा
बिरबायदोँ मानसि लांखार
बेसेबा खुसि बे समाव

You should be lively flowers, the heart
How I will be quiet;
My happiness my crossovers.
O flower stay lively
Cool, the sun, shine on
In my heart garden in my heart.
Just like that laugh out lively
Give me the calm come on you,
Me to bloom also learned in this world.

रंजाखाङो आंनि बिबार गोसोआ
गियान फैयोब्ला गोरबोआव
नायनो गोमोथाव मुलुगाव।
संसारनि जेथो जेङाजोँ जुजिनानै
गिबां जिउआव बोलो फैयो
नाग्लि जानाय मिजिँआ उदां जायो।

जब' जब'
दैज्लांनि दुब्लियाव
माय गायनो बोथोरा फैलायबाय
ओइ बाजै नायना होदोलै
माय गायनो गोरोँखौ
~
नागिरना मोनलिया आं
दखना गानग्राखौ
जेरावबो नुलिया आंलाय खानाय गोलावखौ
बाजै जेरावबो नुलिया खानाय गोसोमखौ
~
बेँफोर हाद्रि नांफैबाय
बै गामियाव
महर मुस्रि गुस्लायबाय
बै हायेनाव
सिनायनो हालिया आंलाय बर' सिख्लाखौ।

मुं गाबज्रिनाय लोगो
लोगो
जौसांआव गाखोबाय
बिलिफांआ।
दसे उनाव घन्टा थिँ थिँ
देना होबाय।
रान्थेँ रान्थेँ।
नुमारै बिलिफांआ फेजेन्नो
हागोन सानबाय।
गोसो सिङाव सिरि
सिरि
देरहानायनि मिजिँजोँ
सेम्पियन जागोन
गावखौनो थि
खालामबाय।
ओरै नङा ओरै।
ओरै नङा ओरै।
स्लाइट किक् जोलाय
टाइट् किक् जोलाय
जोनो हमबाय बिलिफांआ।
खेबफ्रोमावबो नाथाय
आखाय आरो
आथिँजोँ दान्थे जाबाय।
बिलिफांनि जोनाया
बारावनो थांबाय।
खेबथामसो जोनायावनो
लोरला
मेँग्लिथारबाय
बिलिफांआ।
हां गहां गहां सेफ' सेफ'
देहाया बायबाय।
बे खाबुआवनो बोरैबा
सान्स लानानै
एगेन्श सेम्पियनआ
खौखाबाव जोबाय।
सांग्रेमा बिरबाय
अखा मोफ्लामनानै
हरखाब सार-अन्थाइ
गावबाय।
मिथिस्लाब मोनै दुब्ला
गोग्लैबाय बिलिफांआ
- आ-! फंसेल' सोदोब
होनानै।
- ओइ मा जाखो?
- होद सुनि सुनि थु: थु:
होननानै
बिसिनानिफ्राय
गोग्लैनाय
बिलिफांआ लाजिस्लु
लाजिस्लु बुङो।
- मा जाखो? मानो
सौखिनिफ्राय
गोग्लैनाय?
आंसो जोख्लाय हरफ्लांबाय
नामा?
- होद उन्दुफिन्दो सिरि
सिरि।
सिमांसो नुदोँमोन आं।

दद्रेद्रे मिनि लाजिसुलुलु
ओँखाम थफ्ला रुजुनबोला
समायनासिन नुबावो फ्रि फ्रि अखायाव।
रांखो दाहोनाया नायगोमोयो
बेसे समायना देमबारिया!
खाफालाव दंना गैया आंहा??
हे गसाइ! हे गसाइ!
मोसौ हग'बासो सुथि मोनो
मोसौ आथिँआव नांगोल फाला अख्लाबो
बिखा खायसिब देमबारिया।
बेसे मिनिथाव जादोँ सल'आ
हाब्रु गदा गदि मोसौ आथिँआव
रांखो दाहोनानि बुदिया
मा इसे दुखु गोनां फालाय!
मोसौनि थै रना रनि आथिँआव
मलम फोननाया-
देमबारिया मिनियोसो
बहाबा दुखुखौ दोनहरना
नाथाय रागा खरा बुदांआ
रांखोनि सायाव मा बिसार?
गबावगोन दाबि रांखो दाहोनाया??

आं लुबैयो बिरलांनो उदाङै
गां फुवारना दाउसिनबादि उदां गोसोजोँ-
हिमालय हाजोनि थिखिनियाव,
बर'फजोँ बुंफबनाय खोला मेरुआव।
आं लुबैयो बिरलांनो उदाङै
जोबोद गोख्रै मेंनाय गैयैबादि-
सोरांजोँ बुंफबनाय गोजोनफुरियाव,
रिथि-रिथाव ग्रह-नक्षत्रनि रायजोआव।
मुलुगनि गासैखौबो गुमुर संदान्नानै
मुलुगनि गासैनोबो फोरमायना होनो-
आं गोसो जायो लैथोमा सानस्रिनो,
जोबोद रंजासुला ना जानानै।
सिमां बुंफबनाय आंनि गोरबो गंसे
जेसेबां हास्थायो एसेबांनो सिमां-
नाथाय मोकथांआव गां गैया आंहा,
उदां अखोरांआव एसेबां बिरदावनो।
लैथोमाजोँ बुंफबनाय गंसे मुलुग
होँगो-दोँगो रंजानायजोँ बुंफबनाय,
बेवहायनो आं रंजायो लोगोसे।
एखमबा गावदां जायो अखाफोर
एखमबा बियो खोमसियाव थाखोमायो-
दिनै रंजानाय गाबोन गाबनाय,
बेसेबांदि गेलेनाय आंनि जिउआव बिनि!
थेवबो थांनानै थानो लुबैयो बेबादिनो
मिनिनाय आरो गाबनायनि गेजेराव,
बेसेबा मिजिँ आरो सिमांजोँ-
आं लुबैयो बिरलांनो उदाङै

गोथार जिउमानि गोख्रोँ गेदेमाफोरा
गोगो मिहि सिमां नुनायबादिनो
आंबो सिमां नुयो लैथोमानि सिङाव
साम' खिँखिरिनि गोसो होसारना जिउ सुजुनायबादि
बयनिबो जोबोद गोजौआव एभारेष्टनि थिखिनियाव
आं गाखोहैनो लुबैयो अरन सिँखावनानै
बयनिबो गोथारसिन अख्रांनि जोमै जानानै
आं बुहुमखौ फिसिनो जोबोद लुबैयो
गोगो आरो गोथार मिथिँगा सोरजिनो
आं सिमां नुयो बयनिबो गोजोँसिन गावदांसिन
सोरां फुर्णिमा अखाफोराव बिरखं गाखोनो
नाथाय आं दिनै जोबोद गुदु अरन गेजेराव दं
आं जाय अरनाव दुखु-हांमाजोँ गाबदोँ
बे अरना रुगुंमोनै लैथोमा गेजेराव
बिनिफ्रायनो आंनि दावबायनाया जागायजेन्दोँ
आं थांखियाव सहैथारगोन आं फोथायो
मानोना आं जुजिगासिनो दं जेँनाजोँ
आंनि गोसोनि गिनाय-बानायफोरखौ
आं होखारगासिनो दं आंनिनो गियानजोँ
आं थांगोन आंनि गोथार थांखियाव
समायना बेसेबा गोजोन उदां थिलियाव
जेराव रोजाबनो हायो गावनिनो मेथाइ
बिबारनि गुरै फाइलि गेवलांनायनि

लामाया हाद्रि जायोब्ला
अखा जाना नोङो फै
थिँ थिँ सान्दुं जायोब्ला
बार नोङो फै लामायाव
.
गोसोनि देँखो बोनानै
मुलुगनि गारां हगारनानै
बेबादिनो जोँ थाबाय लांगोन
थांना थानायनि खबाम गानानै
.
थांना थागोन सैथोबादि
दिनै दुखु गाबोन सुखुजोँ
बारहो हरगोन खोमसिखौ
फिन सोरांखौ हांख्रायनानै
.
सोरजिगिरि मुंखौ लानानै
गोथार सिबिनायजोँ
बेबादिनो जोँ थाबाय लांगोन
गोथार गोरबो गोगो गोसोजोँ
.
संसारनि मैया मैया
जिउनि मोकथां मिथिनायजोँ
मुलुगखौ बेबादिनो अनगोन
जोँ बयबो बेबादिनो साननांगोन
.
समायना मोकथांनि महरजोँ
गोरबोखौ गुवारै फुवारगोन
गोथौ सानस्रिनि गोथौ लैथोजोँ
जोँ बयबो लोहाबनांगोन
.
जोँ मुलुगनि दावबायारि
गोथार बिजिरगिरि जानानै
गोसोखौ गोजोन खालामगोन
बेबादिनो जोँ थाबाय लांगोन
.
जोनोम बेनो मोकथांनि
गाबनाय आरो मिनिनायजोँ
बेबादिनो गेलेयो जोँ दान्दिसे
नोँ आंनिनो आंगो सान्नायजोँ।

बोदोर जायो फुंबिलिनि
ओँखार बोनाय साननि सोरांजोँ
थं गसंना मुलुगखौ नायहरै नायहरै
ओंखार बोनाय हाजोनि निज्राबादि
रोमै रोमै दैसा गाथोनाव रोजाबनो
नेनानै थानांगौ जानाय जिउनि मेथाइ
इनायनो रैसुमै बोथोरनि मेथाइ
मोसाखावरि दाउसिन-दाउलाबादि
एसेबांदि बोदोर जायो आंहा बिरदावनो
थाथिरनाय गैयै गोसोआव बाज्लखांनाय
आरो बेसेबांदि लुबैनाय दं जिउआव
इनायनो गोबां गोगो आरो गोथार

सानजानि साना सोनाब फैसालियाव
लासै लासै दोबै लांनायनि उनाव
दाउसिन-दाउलाफोरा गावसोरनि बासायाव उन्दुयो
बेबादिनो खोमसियाव उन्दुस्रियो बयबो
गोजां बोथोरनि बे हर गेजेराव
आं जेब्ला बायजोआव ओँखारो
अख्रांआव जोँदोँ रिथि-रिथाव
सोरगिदिँ जेरैबो समायना हाथर्खि
सोरबा अनजालिनि मिहि हाथाइबादि
हाथर्खिनि गेजेराव सना गाबनि अखाफोर
जोबोद खुसि जेन'बा बियो रंजालि
बिखौ दिनै समायनासिन नुदोँ
बिनि खुसियानो सोरांनि महर लादोँ
सानखौ गावनि बिखुंजोँ फांथेनानै
बुहुमा दा जोबोद खोमसि
नाथाय अखाफोरा सोरां होनो नाजायो
बेसेबा सुदेम गोजोन मोखांजोँ
निहिर गोग्लैयो बे हराव थर थर
दा बिफां-लाइफांआ जोबोद सिजायो
गोदान फुंखौ नेनानै थायो बयबो

नोँनि मोदैयाव आङो गब'बाय
आंनि गोलोमदैयाव नोँनो गाद्लिनबाय
बिलाइ जानानै-
गोजाव गोजोनै मिनि नोँ
~
सियालनि हाबायाव
सानैजोँ रंजाथोँसै सना
नोँनि आंनि मोदैयाव
ना खुरस्रा जावरिथोँसै
~
लाथिख' मिथिँगा मुलुगाव
अन्थाइ बिखा बांग्रिँ सिमब्रेलांबाय
जुलिया जालांबाय गोरबोनि
गोसो लानाय होनायनि
~
नोँ दैसा आं दैमा
बोहैबो गोबाफै खुदुमफै
आं बार नोँ मिथिँगा
बिलिर बिलिर लागोन गोरबो
~
नोँ मुलुग आं सान
मिनि होगोन
रंजा होगोन
नोँखौ आं सोरां होगोन।

हारां हाथां गोरान हाजोनि
हायेन फारसे बोहैयो दैसा
अनसुला गोरबो सिंनि
हारां हाथां गोरान हाजोनि
बेसेबा गोजोन फुंखानि
बिफांनि रोदा सा सा
जिउ मोनखाङो बिफां लाइफांनि
थांनानै थायो जिउ जिबि
बिनि गेजेर गेजेर बार
सुदेम गोगो गोथार सोमखोर

प्र'जि।बे खन्थाइयारि पेन-नेइम लानाय सासे सुबुं
'जायनि बाथ्रा बुंनाइयानो खन्थाइ जायो' (नीलकमल ब्रह्म बुंनाय),
बिथांआ जाबाय जोँ बयजोँबो सिनायजानाय प्रसेनजित ब्रह्म।
जखानि गोजौ, माजिला देहा।
फुरसबसब।
गन्थं-मोखां गेबेँ।
गोदनाखं गुदिसिम बाग्लायनाय
मोनज्लां जाइला खानाय।
मोखांआव हुमासे दारि।
बेबो मोनग्लांनाय।
मोदोमआव गुफुर पायजामा- पानजाबि।
फाफ्लियाव सम नायै सम एखनबा आर'नाइ,
एखनबा हारसा गामसा।
मेगन थाइनैखौ मोजाङै नोजोर होआब्ला मंग'लियान फोलेरनि
बर' होननानै हमनो गोब्राब।
माबा मोनसे नङा माबा मोनसे बाथ्रा लानानै
जेन' गोर्बो सिं-सिं सावलिनायआव हरदम मुखुब-
निजोम गोमजोर।
नाथाय जाबब्रुं दारिनि गेजेरजोँ जेबोला स्राय मिनियो,
अब्ला बेयो जेन' ग्रौ ग्रौ रज'नाय गांसोबारिआव बारगोमानानै थानाय
साइलाख बारसे आजोला बिबारसो।
मेथेँ- दावथेन जायनि बिबुंसार होनायाव नाइजाबारि गारां रिँखाङो;
जायनि रायज्लायनायाव खन्थाइ सेरेबनि आखाय बेरखाङो।
बिनो जाबाय प्रसेनजित ब्रह्म।
खन्थाइयारि साद गोनां मुङै- 'प्रजि'।
(रायथाइहाला: ब्रजेन्द्र कुमार ब्रह्म निफ्राय)

1
जावलिया बिरगोस्रीनि सिमांआ
सिमांआनो जाना थाबाय
सिमां जावलिया बर'फानि सल'
आरोबाव फरायबावनांगौ दा?
2
आब' बिरगोस्री---
मेच रायजो दानो
जोँ बेसेबां गोबाव थांनानै थागोन?
हारिनि इयुना जोँनि आखायावनोमारथ?
3
नै आदा बासिराम आब' गाम्बारि
आखायाव थुंग्रि दैनानै
गराय दाब्राय दाब्राय
बेसेबां दावहा नांनो?
4
गानजंनि हेडकवाटारखौ सावनानै
जोँहा खैफोदाव गोग्लैबाय
आदा सोमदोन---
सोर होफैगोन ओँखाम खबसे?
5
थांनानै थानो लुबैयो जोँ
नै थफेन आफा---
जोँ आरो माबादि जांख्रिखांबावगोन?
नोँनि अहिंसाखौ सुथुरा मनबाय!
6
आरो आं सहायनो हालिया
मुंख्लं दावहारुनि थै रेजेद रेजेद
आं बिग्रायखाङो जोबथा दावहानि थाखाय
थै आरो थैनो हो

अनजालु अनजालि फरायसाफोर
दिनै आं नोँसोरनो सोमो गोनां दोँसे बानायलु सल' खिन्थागोन।
सल'आ ओरै-
मोनसे गामियाव सानै सिखोलाफोर दंमोन।
बिसोरनि मुङा बैसागि आरो सासेनिया सनास्रि।
सानैबो ओरैबादि आखाफाखामोनदि रावबो फेजेननो हाया बुंजाबायनायमोन बयजोँबो।
दानाय-लुनाय, गायनाय-फुनाय,
रायज्लायनाय-फरायनाय बिसोर सानैबादि
सिख्ला जेरावबो नागिरना मोन्नो थाङामोन।
बै सानै सिख्लाया ओरैबादि समायनामोनबोदि
रावबो सेँग्राफ्रा हास्थाया लासे नुब्लानो थानो हायामोन।
सानसेखालिनि बाथ्रा-
बै सानै सिख्लानि गेजेरावबो दानिया सासे नङा सासेथ' सेथियाव थाथारनांगोन।
नाथाय सानैबो नैथियाव थानो गोसो गैया।
बेबादिनो जेरावबो जेरैबो मोनफ्रोम बिथिँआवनो बादायलायनाय जानायसै।
थेवबो सानैबो समान समान।
फेजेन लायनो हायै सानैहाबो जेन्नाय गैया।
सासे ओरैबादि मिनिनो रोँगौदि
बेबादि दासिमबो मिनिनो गोरोँ मोदाय
उजियाखै होन्नानैनो बयबो सानोमोन।
बिनि मुङा बैसागि।
जै बे मिनिबाय बयबो सेंग्रा मा बोराय
दंनायमानि हौवाफ्रानो फाग्ला जाजोबनो नागिरोमोन।
थफिँहां थफिहां बिबारफोरानो समायना गेवलांजोबथारोमोन।
सानसेखालि सानैनि गेजेराव मिनिनायनि बादायलायनाय जाबाय।
बेयाव गोरलैयैनो बैसागिया देरहाबाय।
बेयो ओरैबादि देरगाबायदि सनास्रिया थानो हायाखिसै।
सान हर गाबबाय थाबाय।
नाथाय बेहा अब्लाबो जेन्नाय गैया।
मोजां सान नायना सानसेखालि
लाजिनायनि बादायलायनाय जानायसै।
बेयाव ओरैबादि लाजिनायनि फाव खालामबायदि
सनास्रिया थारैनो देरहामारबाय।
बिनि रोँगौ आखुखौ बयबो बाखोनायबाय।
बियो देरहाबाय थेवबो बैसागियाबो जेनाखै।
मानोना बियो मिनिनायाव देरहाखांबायमोन।
दा सानैबो समान समान।
नाथाय सनास्रिया सिगांआव जेनग्रोखाबायमोन
बे बाथ्राखौ लानानै बैसागिया सनास्रिनि सायाव सोँखारिबाय।
नाथाय बेबादि नङा सनास्रिया बुंबाय-
लाजिनायनि बादायलायनाया जाग्रोबा आंनो देरहाग्रोगौमोन सिगां।
नांज्लाय नांज्लाय उनथाराव सानैनि गेजेराव गिदिर दावहायानो जामारबाय।
ओरैबादि बार बारनायसै,
सार-अन्थाइ दैबाना बायदि बुंफबनाय।
नाथाय बेल' नङा जोबोद खोमसि,
जोबोद खोमसिथार जानायसै।
रावबो सहायनो हायै बे दावहाखौ
नायना थानो हायैनि बयबो रायजोफ्रा
गाव गावनि न'आव एब्रेजोबनायसै।
बैसागि आरो सनास्रि सानैबो जेना जेना।
जोबथारनायाव सासेनि उनाव सासेया
सोर्गोआव थांजोबनायसै।
सोर सिगां थांखो,
सोर उनावसो थांखो,
रावबो रायजोफ्रानो मिथिनो मोनाखिसै।
नङाब्ला जोँ मिथिगौमोन-
जायनो सिगां थांदोँ बियो सेथि
एबा जायनो उनावसो थांदोँ बेनो सेथि।
अदेबानि सासे नङा सासेथ'
सेथि जाखाथारगोन नङा होनबा??

थिँ थिँ दुंखावनाय सान्दुंजोँ
गोलोम बोथोराव गोलोमखायो
फ्रि फ्रि बारनाय बारजोँ
गोजोँ बोथोराव गोजांखायो
.
मोनैखौ गाबाखै आं
बिनाय मोन्नायजोँबो
गोजोना दिनै जोबथायाखै
मुलुगाव बेबादिनो दिनै नोँनि गाबोन आंनि
.
मिनिनाय रंजानाय
थैनाय उजिनाय
नोँनि आरो आंनि आंगोनि
दागाब नोङो बेनो जोबथा नङा
.
सैथो सोरां आरो सैथो खोमसिया
सैथो सैथो सान अखाफोरा
बै अखोरां बे बुहुमा
बेबादिनो थांनानै थायो
.
मोनैखौ गाबाखै आं
मोननायजोँ अराय गोग्गायाखै
रंजानायजोँ रावखौबो फेजेनाखै
दुखुखौ लानानै अराय जेनाखै
.
बेबादिनो बार बारबोगोन
बेबादिनो सान्दुं दुंबोगोन
थिवरिया सानब्लाबो जोबथा सानाखै
अनसुला सानब्लाबो जोबथा सानाखै
.
नोँ आंखौ मुगैयो
बेबादिनो आं नोँखौ मोजां मोनो
आं नोँखौ सुथुर सानोब्लाबो
नोङो आंखौ आंगो सानथारो
.
जिउ जोनोम जोनोम
थैनाय आरो थांना थानाय
बेबादिनो हर आरो खोमसि
दिनै नोँनि गाबोन आंनि।

साना फापर बल्दार फेयास
नेमखि किजुर लबं मिष्टि
गोदै गोथाव रसगल्ला
मा जानोलै नोँलाइ?
बायबानो मोनो गलायाव
नोगोद रां खरसानि।
फिथा सिथाव सौराय
एन्थाब सौराय लारु बान्दारु
बहा मोनबावनोलै लुबैमालाय??
बहा थांखोलै ओइ आबै
बहा थांखोलै-
फिथा सिथाव सोर जाहोनो
आदै-मादै मोनाबो माहाजोन जाबायनो!
बहा थांखोलै ओइ आबै
बहा थांखोलै-
आय-आफाहाबो उवाल गायहेन गैलानो!
दाउखि आबैया बुङो-
गैले फिसौ गैले
नोमबौ संफ्ला बोराया
गोदोनो नोँ गैयैयावनो
थुब्ला थुब्लि रुवाजोँ सिनखावजोब्बाय।
नाथाय मानो आबै??
सम मोनोब्ला खिन्थागोन फिसौ।

How cool is the wind flowing
Blooming flowers in the garden
Sweet sing flying branch of the tree
Happiness is my heart and soul
Plants is dancing in my eyes beautiful
How cool is the wind flowing
Everyone is beautiful in this season
Sun shine on the east sky
Cattles in the field and eat grass
Target in road has welcomed me
How cool is the wind flowing
Happiness is my heart and soul

नोंखौ नुनानै आंनि गोसोआ
एखेबारे नोँखौल' नायनो लुबैयो,
ओरैबादि लुबैयो नोङो आंनि मेगन सेराव
अरायबो थाबाय थाथोँ; आं नुबाय थाथोँ।
नोँ बबेनि आंनि गोसोखौ बोग्रा
आरो नोँनि मुस्रियाव नोजोर नांबाय आंनि मेगन,
दा आं नोँखौ बेसेबा मोजांमोनो
ओरैबादि नोँजोँ गासै जिउखौ खुसिजोँ दैदेनगोन।
लामायाव नोँखौ साया-माया नुयो
माब्लाबा नुनायनिफ्राइनो आं गोसोथोयो,
दैसा बोहैनायबादि नोँनि मिनिनायखौ
आं गले गले खोनाबाय थायो।
बिबारबादि गेवलांनाय महरावनो नुदोँमोन आं
नोँखौ नुजेन्नायाव गोमोहाबदोँमोन गोसोआ,
नोँखौ लोगोमोन्नाय सानसेखालिनि आगान
आरो नोँनि थाबायनायनि आगानखौ
आं दाबो नागिरबावो दिनैबो।

मुगासे सिमां नुनानै सिरिमोन्ना
आरोबाव आं मुगासे कम्बल सिङाव
सिरि मोनहां मोनहां जाब्लानो
बियो बिरबोदोँमोन गांखं फुवारनानै
बेसेबा गुसु दोमैलु बारजोँ लोगोसे
दा बियो बिरलांबाय सोनाब फारसे
बिनि सायखंआ आंनाव नांदोँ
आरो गासै आंनि सोरगिदिँ खोमसि जादोँ
हांसो सिलारिया माब्ला बिरलांखो?
आं उदिस मोनस्लाबाखिसै
जानजि हमलाय खेबफा सानेरलाय
बाबांसिन आंनि बेसर फुनायखौ बियो नायदोँमोन
आं मुसुरदाव मुसुरदाव दुब्लियाव मोसौ लायना
नआवनि गेग्रेब गलियाव खाफैनायखौबो
बियो नायहरदोँमोन आं उदिस मोनै
दा बियो बिरलांबाय सोनाब फारसे
बिनि सायखंआ आंनाव नांदोँ
आरो गासै आंनि सोरगिदिँ खोमसि जादोँ

गिदिर गोलाव लोदो लोदो गुफुं।
नायनो समायना खोमा फायला ला
गारां गिदिर सोँब्ला गामि गंसे गोमफबलायथारो।
नै बोसोर सिगां थेफा बिजामादैया भुटाननिफ्राय लाना फैदोँमोन।
दमासि मागोनि समाव बोसोर गोदान (इंराजि)नि मुंङै
ना मा मानि जाखोथाय-
गिप बायदि होलांनायानोसै।
सिगांआव थेफानि फिसालाया सैमाखौ खाना दोनोमोन।
सोरबाफोर खावना लांनो हागौ होननानै।
दा गिदिर जानायखाय खालिया।
सैमानि मुंआ थनि
आगोलावनो थेफानि बिजामादैया मुंखौ दोनखा लांदोँ।
दा गामियाव बे मुंआनो मुंदांखा
गुबुन आरो नामा गैलिया।
थेफानि बिसि बिखंस्रि।
बिखंस्रिनि खिबु खिबु जेब्लाबो सैमायाबो।
फिसालाया सहराव फरायहैबाय।
दा बुंनो थाङोब्ला थेफाहा न'आव बिसि फिसाय सानैल'सो जायो।
एखमबा बाजाराव एबा हाथायाव थांब्ला
रावबो गैया जायो।
बे समाव सैमाया बिगोमाजोँ थांफानो गाबलायथारो।
नाथाय मा जानो?
हाथायाव थांफाब्ला लामायाव
दैखरगुरिनि सेँग्राफोरखौ बेदर जानो लाखिगोनसो सानो।
बेखायनो लांफाया।
अन्थाइ बन्थफोरजोँ खुइख्रुबबायनानै न' फारसे होहरफिनो।
सैमाया माब्लाबाबो हार्सिँङै थानो बायो।
थेफामोननि न'सुंसे सिँगिनि मोननि न'आ।
बेयावनो थांना थाहैयो सैमा थनियाबो।
लाजिया फांजिया बेयावनो ओँखामबो जायो
मेथाइबो जायो।
दा बेसेबा दानै दान सानै सान बारलांनायाव
थनिनि न'आ गंनै जाबाय।
बिखंस्रिनावबो थायो सिँगिनि मोननियावबो थायो।
थारमाने बेनाव जालाय बेनाव जालाय।
हाथायनिफ्राय बिगोमाया फैयोब्ला
लानजाय फायखन फायखन
मेथाइ बिनोबो लाजिथारा थनिया।
सिबाय मोनजायो गंनै न'आवनो।
बेखायनो लोदो लोदो जालायथारबाय।
दिनै बेसेबा स्रां अखाफोरनि सोरांजोँ।
डाइन रिँगा जाबाय
मोनाबिलिनि जानाय सम।
ओँखामखौ बिखंस्रिमोनहानिया सिगांसिन जायो।
उन्दुनावबो सिगांसिन उन्दुयो।
सिँगिनि मोनहानिया बांसिन सानफ्रोमबो बेदर जाग्राखाय
उनसिन उन्दुग्रा जाबाय।
बिखंस्रिया ओँखाम जाखांनानै दर्खँआव जमबाय थानाय
थनिनोबो ओँखाम होबाय।
सिबायाबो बाबांसिन जाबाय।
गोथाव नङा नामाथाय सोलाबायल'।
एसेयावनो सिँगिनिया गाबज्रिहरबाय-
थनि-थनि-थनि।
खोनानाय लोगो लोगो थनियाबो
ब्लद खारगार लांबाय।
ओरै बिखंस्रिया होनाय ओँखाम दालि ओँख्रि
लगायनाया लुन्दुन थालांबाय।
दिउ दिउ रागा जोँगारबाय बिखंस्रिया
सिँगिनिनि सायाव।
बेदर हारा, अमानि खोमोन ब्रेव ब्रेव गोनां बिगुर,
जानो हायै मेजेम थनिनो ज्राव गारना होबाय सिँगिनिया।
थनियाबो बेखौनो जानानै स्लिम खालामबाय।
उदै गेन्द्रा द्रा जालायबा
सिलायावनो दान्दिसे जिरायना थाबाय।
जाखां लोँखां सिँगिनियाबो
खामसालियाव थनिनि थाखाय बष्टा बना होबाय।
दा उन्दुथोँसै होननानै।
गावस्रा दर फांथेना दो उन्दुलांबाय।
थनियाबो ब्लदसो बिगोमानि फारसे थांबाय।

जोँनि आबादथिलिनि सेराव
जेराव जोँ थायो
बेयावनो गोजा लैथोआबो
गोजाव लाङो आबादारिफोर
-
सोमखोर जानाय आबादफोरा
गल' गल' नायहरो
लेवार बेलावनि गोजोमनाय
आबादारिनि गोथै सोलेर
-
सिगुण सिलानि होँगो दोँगो
अख्रां गंसे अखाफोर नुहरै
साना सौसिख' हायै
खोमसि बे मोनसे दुब्लि
-
मोकथां सिमां नुग्रानि जोनोम जालिया
सिमांबादिसो जाबाय
सिमांनिफ्राय मोकथां जालिया
गोजा लैथोनि सेर सेर

आं गोसो जायो
जिबौ फिथिगम जानानै
एखमबा बिखौ सौथारहैनो,
बिनि जिउखौ ग्लब मननो।
आं गोसो जायो
ददेरे ददेरे बिनि लाइमोन सोलेरखौ
बेन्दोँ जानानै फानफ्रेना लानो,
गोरबो हासुंआव माथेना लानो।
आं बिखौ मोजां मोनो
ओरैबायदि मोजां मोनोदि
आं बिखौ आंनि जिउ खालामथारगौ,
एबा आं बिखौ आंनि हां सानथारो।
सिबाय दुखु जायो गावनो गाव
अख्रां जानो हाया आं
बार जानो हाया आं
दै जानो हाया।
हा जानो हाया
आं अर जानो हाया
गोसोबायदि गोसो जानो हाया आं।

आं मोजां मोन्दोँ, मादि आं नुदोँ
आं मोजां बिजिरदोँ, मादि आं मोन्दाङो
लामा लामा गेङो दर्जाया
मोनो आं गोदान लामा
बारलाङो लैथो आरो लैथो।
जाम्बा आं सासे
गोग्लैबोयो हाज्रिजोँ गियानाव?
नाथाय आं मोजां मोनो
बेसेबा आं गोदान मोन्दाङो
आं मोजां मोन्दोँ, बेसेबा मिनिस्लुयो
जेब्ला आं मिथिँगाखौ रंजायो
बेसे समायना, गोमो-गोथां मोन्दांथिया
नाथाय बियोदि जाथावना?
बेयो नंगुबै सैथो नङाना?
आं मिथिया, आं जोबोद मिजिँथियो-
आं थारै बिजिरनो नाजायो
नाथाय आंनि गोरोन्थि जायो
आरोबाव बेखौनो बिजिरो
बेयोदि फैनो हागौ देलायना
नाथाय बियो बेयोनो
जेब्लाबो आंनि गोरबोआव
नोङो मादि राय होयो?
आंदि आरोबाव जाम्बा,
जाम्बा आं सासे
जायखौ मोन्दांथियो-
नाथाय बियो बेयोनो
जेब्लाबो आंनि गोरबोआव
आंनि गोफार जोनोम मोनसे।

अखा बेबादिनो हाबाय था नोङो
बुहुम मिथिँगाया देलाइदोँ दुगैनानै
मुलुगनि मैलाखौ सुस्रां नोङो
अखा बेबादिनो हाबाय था नोङो
दाखोरखौ फोजावनो दैबाना लाबो नोङो
द्राम द्राम आरोबाव हानानै
अखा बेबादिनो हाबाय था नोङो
बुहुम मिथिँगाया देलाइदोँ दुगैनानै

सिरिमोन्ना मोकथांआव
मेगन बिलिरब्लानो नुवा नोँखौ
साया-माया सिमांआबो गोमालाङो
.
गले गले रायज्लायफैयो नोँ
सिमां आरो सिमांआवल' नोङो गेलेफैयो
गोमा लाङो बबेबा नुयै आन्दोआव
.
आं आन्दायो
आं आन्दायो
मेगनाव बेबादिनो---
बहा नोँ गोमोरलाङो
बहा नोँ आनज्रायलाङो
.
नोँ जंखाय फैयो
नोँ गेलेफैयो
नोँ खुदुम फैयो
जिउ बहा नोँ गोमोरलाङो।

सान्दुं नोँ आंखौ गोलोम होयो
आं नागिरो बिफांनि साया
हाबायाव गोदोना आं मेंग्लियो
सान्दुं नोँ आंखौ गोलोम होयो
गोमोथाव बुहुमाव साना मिनियो
जोँख्लाब जोँख्लिब बायदि मैया
सान्दुं नोँ आंखौ गोलोम होयो
आं नागिरो बिफांनि साया

बयनिबो गोबां गामि मुलुगाव,
जोँनि गामिया बयनिबो उन्दै।
आंनि गामिया दाबो सिबस्राङाखै,
जोँनि गामिया दाबो नायसन जायै।
जोँहा गय बागान दं,
लारि- लारि सारि सारि
खान्थाल- थाइजौ फाथैनि बारि।
ग्रोम ग्रोम बागान
फालो फालो मोसौ, मैसो बोरमा फालो।
दाउ, फारौ, हांसो फालो।
जोँनि गामिया खन्थाइनि गहेना
समायना रमायना आवनायनाय सोदोबनि
जोँनि गामिया दाबो जुमायनि हाखर।
जोँ सिबियो गोजोन नागिरनानै
बाथौ, सिजौ गुदियाव
ब्रह्म, मन्दिर फुर्णिमा अमाबस्याव
आरो गिर्जा सालियाव।
जोँनि गामिया दाबो खारो
अप्रि दो आरो खोमोन गैयै बेदरा।
जोँहा दाबो गोग्गानो गोनां गैया
जेब्लाबो जोँ उरि हाफावनिनो सिं
जोँनि गामिया बयनिबो उन्दै।
जोँ दाबो दुगायै फोरमायो
जौगानाय मुलुगाव आंगो हारिमु,
नाथाय जोँहा दाबो गोहो गोलोन्दां
उरि, मोस्रोम, खुसेँग्रा जोँखो अरदोँ
जोँनि रोदा बिलाइफोराव
जोँनि गामिया बयनिबो उन्दै।
अप्रि दोआ दाबो थायोब्ला,
गय, खान्थाल थाइजौ फाथैनि बारि
मोसौ- मैसो, बोरमा लारि
माय- बेसर, फाथो
फैलाव फोथार आबाद दुब्लि स्राय-
गासैबो गोमालाङोब्ला
जोँनि गामिया थाबावगोन दाबि?

मोजां मोनो होननानैनो
सना जिउ ददेरे
बेबादिनो बेसेबा बाखोनायो
रंगिना संगिना होननानै
.
मेगन बेस्रां
जानजि सेरेरे सैनाय
जोनोम जोनोमनि नोङो
बेसेबां अनो जिउ नोँखौ
.
थांना थानाय जिउ मोनसे
एबा जोनोम मोनसेयाव
नोँखौ बेसेबांदि हास्थायो
गोथार गोरबोजोँ गोरबो
.
अब्लाबो
नोँ आंखौ सोगाबो
आंखौ जंखायो नोङो
सनालै बेबादिनोथार नोङो

सिमां दं आंहा मोकथां जिउनि
इनाय-अदखारनिफ्राइ अराय बारगनो
मिथिँगाया आंनो बोलो होयो
आं बारगगोन बे फानजारिनिफ्राइ

उरायदोँ आलाइ-सिलाइ दिनैबो
दाउफ्रि जरासे
आंगोनि गंसे अख्रांनि जोमै गेजेराव
सान्दुं खामजा अखा सिजा सिजा
रुरु मेगननि मोदैजोँ दाहायाव
इनायनो नागिरदोँ सासे दावहारु

दाउ खौऔआ गाबफैदोँ
आंनि गोसोआ बोदोर जादोँ
जुथा लंफेन गान्नानै
देलाखब देलाखब देलायनानै
आंनि अनजालिजोँ मोसाफानो
बै ददेरेजोँ रंजाफानो
~
थोरसि लथा दामनानै
मिनिखैरो गोजोन मिनिनानै
फोरमायनो गोसो जायो
आमायसो खायलाबनि आलासिनो
थारला थुरलानो
फोरमायनो गोसो जायो
~
आयै-
आयैलै सयथिबो
गुफुर गावदां दां
मा मुं जाखो।

आं उन्दैमोन गुदि फरायसालियाव
गोर गोर बिथ'राइ बिजाब फानोखंआव खिथेबना लानानै
हुरुद खुगाजोँ मटर साइकेल साखावलांनो हानाय।
निसिमा रायजो नाङैनो मुंदांखा नायल' जाल' दतमा गामिनि रनजिद माहाजोननि
"गैया मा खालामनो?" मुंनि टियाटारआ।
सानफ्रोमबो  नङा सम सम मोना मोनायाव जायो एबा दिन्थियो।
गोसो गुदुं जोँ गामिनि बोरायसा बुरैसाफ्रा सोरां बारां ओँखाम जानानै
मोनानाय लोगो लोगो नायनो हांखुर जालायथारो।
गान गोलाव जाथ्रा माबा माबि मानसि सावथुन होनब्लाथाय बारलायग्राखा।
आरोबाव सेंग्रा सिख्लाफोरखौ ओरैनोब्लाबो बुङाब्लाबो जाखासै।
आंनि सानै सनजिमा रनजिमा आब'मोनाबो बाज्ल' लायथारदोँ सानसेखालि
बिसोरनि सेर सेर आरो आंबो खम नङा।
आय आरो आफाया गावसोर नायनो ओँखाराखैब्लाबो आंखौ लाखिनो हायाखै ओइदिनखालि
"नाया मोना गुना,
देनां देरबा नायगोन होन्नानै।"
दैज्लां बोथोरा थांबाय
रावहाबो माय गायबावनांगौ दंब्लाबो बोथोर बारग'बाय।
अदेबानि  मायआ मोदोम गोरलै जासावनाय समसै।
मोनाबिलिनि जानाय लोँनायखौ थाबै जादोँब्लाबो थाबैनो मोनाबावदोँ ओइदिनखालि।
दतमा गामिसिम थांनांगौ जायोब्ला सालगुरि बालागारि मोन्नै गामिखौ बारना
आरोबाव दुब्लि मोनसे बारनांगौ जायो।
मोले मोले लेम आरो खायसे फाथि सिनजायाव अर ब्लाव ब्लाव लानानै
जोङो ज' जयै थांबाय लाफेर माहाजोननि माय दुब्लि गेजेरजोँ।
गाब्र' गुब्र आलि गेजेरनि लामाजोँ थाबाय लांनायनि सोरबा सोरबा गोलैगु लायदोँ।
गालुन गुलुन हाब्रुबो जालायबाय लामा (आलि) या।
जोँनि हानजानि सोरबा सोरबा लेवार बाजादोँ
सोरबा सोरबा गाहे गुहेजोँ हाब्रु गदा गदि जादोँ आथिँफोरा।
आंबो सेन्डेलखौ आखायाव लानानै थाबायदोँब्लाबो हाब्रुजोँ बोकथा जालायदोँमोन।
हराव थाबायब्ला गोजाबो खाथि जायो होन्नाय बाथ्रा दं।
जोँबो जेन' थाबैनो सहैनायसै रनजिद माहाजोननि सायनासालिसिम।
गोजौ जौसांआव दिन्थिनाय जायो
लान्दां फादां फैसालि बोलानो खोबनो थाखायबो जेबो गैया।
अदेबानि दिन्थिनांगौ जायोब्ला फावगिरिया गोजौआव गाखोयो
गावनि फावथिनाया जोबोब्ला गाहायाव ओँखारबोयो फिन उननि दिन्थिनांगौनि थाखाय थियारि जाना थायो।
सौहैबाय जोँ फालोसे मानि मिनि खुसि नायनो थाखाय।
आंबो नुफेरै गथ'ना
नुसिगोन एबार लोगोफोरजोँ सावरायनो हासिगोन
सान्नानै जोबोद खुसि।
नाथाय मा जाखो मिथिगौना?
"गैया मा खालामनो?" जानो गोनां फावखुंग्रिया अरजोँ खामजादोँ।
एसेयावनो थुंगेनायसै सिबाय फालोसे मानि उल्था मोखाङै
गैया मा खालामनो गिदिँफिननांबाय।

हांगारनि दामोल जानाय हरआ
नोँनि मोखांखौ लाखोमाबोला
आं लेँहरगोन आंनि लोगो सोरांखौ
हाथर्खि अखाफोरजोँ बुंफबनाय अखोरांखौ
त्रिपाल गोसोम जोमैया
नोँनि मिनिनायखौ फरायजायै खालामबोला
आं लेँहरगोन आंनि लोगो बारहुंखाखौ
नोँनि मिनिनाय सुजुगोन मेथाइजोँ
हार्सिँङै जेरै आं फबजाया हाखराव
नोँखौ एंगारना थाङा खैफोदाव
अनजालि आंनि आखायाव हम
आंखौ गोबाना ला बिखायाव
नोँ थायोब्ला बालाहामायाव बोहैयो निजिरा
नोँ थायोब्ला सिमांआ सिमां जाया
हार्सिँङै जेरै आं फबजाया हाखराव
नोँखौ एंगारना थाङा खैफोदाव

उखैनायजोँ आं गाबो
मेगननि मोदै हुगारै हुगारै
अलसियाखौ फेजेन्नो हायाखै
गसाइ बिनिनो गोरबो नागिरनाय
.
अन्थायनि हाजोखौ
बारलांनो जेरै जुजियो
गोहो नागिरना मोना
बेबादिनो गाबो आं
.
आंखौ आं सिनायनो
बेखौल' नायनो होदो नोङो
जेरै नोँखौ आं नुयो
आंनि गोरबो इसिँआव
.
निदान गोनां जिउआ
नोँखौ जेरैहाय नागिरो
आंनि मोखांआव खुसियै
नोँखौ आं जेब्लाबो जेरै नुयो
.
बेबादिनो नोँनि गोरबोखौ
मोन्थि मोनै जायो आं
सुखु मोना गावखौ सिनायै
नै गिरि नागिरो दिनै
.
सहायनो हायै जायो
मोन्दांङै गोरबोआव
बेखायनो खेँखाय बायो आं
नोँ फैदो बेखायनो सिगांआव
.
खालौ बिलौ गोसोआ
नोँखौ मोननो हास्थायथारो
नोँ आंखौ गोबाफै गसाइ
आंनि गाबनायखौ हमथानानै
.
नोँनि बिथोन फालिनो
आं गोसो जायोब्ला
बेखौनो होदो गिरि आंनो
जेरै नेवसिनो हायो दुगानायखौ
.
नोङो गोसोआव खोख्लैना हो
जेरै आं बावनो हालिया
जिउआ जेराव अनसायो
मोकथां संसारनि रंजानायजोँ।

खोमसि खोमसि जोबोद सान बारलांबाय
दिनैबो खोमसिया आनज्रायलाङाखै
जोबोद बैसो जानाय आयनि मोखांआव
आयनि मेगननि मोदैया रानलाङाखै
बेखायनो खोमसिखौ बोरै बुस्रांनो हागोन
दैसारि आं दिनै उन्दुलाङा
जोँनि गोथार जुलिया जागोन होन्नानै
गोजोनै संसार जालांगोन होनोब्लाबो
आं फोथायो अनजालि दैसारि
बे खोमसिखौ होखार हरनो थाखाय
आंनो नोँनि आखाय नांगौ
नोँनि दुंबुर गोरबोनि बावनाय नांगौ
आरो नांगौ नोँनि रोजाबनाय मेथाइ
मेंनाय गैयै उदांस्रिनि रोजाबनाय
बानाय गैयै आखायनि हेफाजाब
हिंसानाय गैयै गोरबोनि थुलुंगा
आरो आंगायनाय गैयै रैसुमै खबाम
अनजालि नोँ हुगारनांगोन आयनि मोदै
गावनि गोथार गुरै आखायजोँ
बे खोमसिखौ सोरां होनो
नोँबो दैनांगोन मुथासे बनजार
दैसारि दिनै आं उन्दुलाङा
सोरांखौ जेब्लाबो गाबज्रि गाबज्रि
उदां आरो गोजोनखौ गाबज्रिनानै
दाबो मेँङाखै उदांनि मेथाइ रोजाबनानै

सुखे नोङो एवथु एवथु खालामो
नंखायनो आं एब्रेनायनिफ्राय एब्रेसिनो
लेब थांगासुरि फानफ्रेनानै थायो
-
लोगो नोङो एवथु एवथु खालामो
आंखौ गोदो उन्दुलांहोयो
हरसेमानि थानाङो आं उन्दुनानैनो
-
हे सुखे नोँखौ साबायखर
गोमानाय अनजालिनि सावगारिखौ
सिमांनि सिमांआव आं मोनफिनबाय
-
नाथाय थरथिँ थरथिँ निहोरासो
आंखौ फोजाखाङो आरो
लोगो खावलाबसेल' एमावनो
नोङो आंजोँ उन्दुफायो
गांसे कम्बल सानैजोँनो सेलायनाङो
-
हाबाब सुखे
नोङो जोबोद अख्रालै सयथिबो
हरावबो उन्दुफायो हरसे
एवथुलाय बिलिरलाय खालामो
-
दाबो सोरांब्लाबो नै नोङो
आंखौनो गारनो हाया
आंखौ गोबायो नोङो
जेराव आं बेयावनो नोङोथार।

जिउनि गासै गुमुरखौ संदान्नो
इसोरनि गोथार मुं दहाय लायो आं
उदां अखोरांआव साननि खौरांखौ लायो
नुयै मोखांनि खोमसिखौ होखारनो
इसोरनि मुं गाबज्रियै गाबज्रियै
मांखरसालिया जेब्ला फावसायलाङो गोजानाव
एसेबांदि आरो हाथासि गोसोआ
थाथिरनाय गैयै नागिरो गोसो मेगननि नोजोर
आरोबाव आं लुबैयो रोजाबनो-
इसेबां जिउनि रंगिना सानफोरजोँ गेलेनो!

जेखाय आरो खबाया बर'फोरनि जरासे आयजेँ
बर'फोरा बेखौ औवाजोँ बानायो
जेखाया खुगा गुवार महरनि
आरो लानजाइ बादि देन्था गोनां
बे देन्थायावनो आखायखौ हमगोन
ना गुरनाय समाव जेखायजोँ लोगोसे
दिरुं दोँसे थाफायो
ना गुरनायाव बर' आयजोफोरा
जेखायजोँ लोगोआव लाफायो खबाय
बिसोर ना गुरनाय समाव
गावसोरनि जानजियाव खाना लायो
आरो जेखायजोँ ना हायखांना मोन्नायखौ
खबायाव सोना लायो
जोङो जेखाय होनना बुंब्ला
खबायनि मुंखौनो थाब गोसो खांफायो
अदेबानि बेयो थारदि
जेखायनि मुंखौल' गोसोखांनानै
खबायखौ गोसो खाङा लाबानो थानो हाया
बर'फोरहा जेसेबां संसार जानायाव
मुंख'नो गोनां आयजेँफोर दं
बैफोरनि गेजेराव जेखाय आरो खबायनि मुंआबो मख' गोनां
आथिखालाव जेखाय खबायजोँ ना गुरनाया
खम जालांबाय
जानो हागौ बिनि जाहोना
1. होँगो-दोँगो नानि अनजिमाया सेंलांनाय
2. दैमा-दैसानि दैया मेसेँआव थाब थाब रानलांनाय
3. गोबां नाखौ खेबसेनो मोन्नो हास्थायना मुलि होनाय
4. इलेकट्रिक मोब्लिबनि गेजेरजोँ ना हमनाय
5. सोदोमस्रि गुस्लायनाय लोगो लोगोनो
बर' हिनजावफोरनि गोरबोआव लाजिनाय फैबाय
मानोना ना गुरग्रा मानसिखौ आथिखालाव गोरिब थाखोआव दोननो लुबैयो

दिनै बर'फोरा हारिमुनि आयजेँ महरै
मोसानाय एबा मेलाफोराव
जेखाय आरो खबायखौ दिन्थियो
मानोना बर'फोरा गावनि असे सोदोमस्रि हारिमु दं।
============

My darling make in her dokhona
The design of blooming roses,
O rose! Why do you bloom?
My heart ask, as a bee and butterfly
But answered my sweet darling.
With the design of the roses dokhona
If I look her in the evening, my her has
Somewhere in the sea to sink
I get deep like a dream.
Peaceful and lovely in the morning
You communicate with attraction,
And dancing blonde with the wind
O rose! Make smile on the lips
Darling and I both of us meet.
Let sing the birds in the branch of trees
White clouds in the sky,
From the mountain to see the trees
Rose and I to my darling.

फुंनि गु रिँगासो समावनो
आदा हासुंजोँ आंजोँ
मादै गालिस्रिनाव हाबहैदोँ जोँ।
थांखिया जाबाय लिरबिदां बोखांनाय।
बावैसो डाइन-गु साननि सिगांआव
मादै गालिस्रिनोबो एसे लेखा-फरा
रोँखागौलाय बेनोबो खन्थाइ नङाबा
संसार जानायनि सुंद' सल' दोँसे
लिरनो नारसिन थाबदोँ।
मादैया सर' गैफेर थारा
बेबादि खन्थाइ,रायथाय आरो सलफोर लिरना
लाइसि एबा बिसम्बिफोराव
फोसावनाय।
गोदोबा आदैजोँ रमान्टिक सोलिबा लाइजामखौ
खुनुरुखुमसो लिरसाब बायोमोननो आरो।
मादैया थाखो ब्रैखौ उथ्रिनाय।
बर'लेण्ड सोमावसारनाय समाव
फरायनायखौ नागारनो गोनां जादोँ।
बेखौनोबा सोरबा सोरबा दानि मेट्रिक फास जानायानो गादबनो हाया होनलायबावोसो।
उनाव रुवाथि थाबाय थाबाय
आदै गालरजोँ ग्रोब सालगुरि गामियाव
जुलि मोनफ्रां फैनायानोसै।
मादैया बैसागु बोथोराव मेथाइखौबो
खना नङा खनो।
रैसुमैथार गारांआ।
थाइजौ बिफांआव बाफैनाय खौऔआनबा गल' खोनासंनो
गोनां जाबावो।
थांनाय सालगुरि लाइमोन आफादनि ब्रैथि
खुंनाय रंजालि बैसागुनि साजायफबनाय
जौसांआवनोबा मेथाइ खन्नानै
सेजौ थाइनैसो बारा रां बान्थाबो मोन्नो
हालायदोँ मादैया।
आदा हासुंजोँ आंजोँ मादैनि सिलायाव
मोनहैब्ला मादैया हले
थिलेब-लेब थुलावनो माबा
हिसाब-खिथाब खालामगासिनो दंमोन।
आंनि सेन्देल गाबलायनाय
थाबायनायखौ थाल मोन्ना माब्लाबानो नायहरखादोँ।
सिला गाग्रोमोना बियो बुंबाय-
ए आदैमोन फैबाय।
(न' फारसे नायहरनानै) नै बिसन आय
सियार लाबो नोँदामोन फैदोँ।
माब्लाबानो बिसना सियारखौ लाना फैबाय।
जिराय आदामोन होन्ना ब्लद थांफिन गारबाय।
जिराय आदैमोन होन्ना मादैयाबो
रेबगनखौसो सोमावबाय थाबाय।
मादैखौ खुनुबेला बेबादि नुफेरामोन आं।
जेन'बा मादैया हिसाब-खिथाबनि
साख्रि मोनबायसै।
- हाब मानि हिसाब-खिथाब मादै होन्नानै
आं सोङो।
मादैयाबो मिनिसुलु बुंफिनो-
नोँसोर फैनानै आद्रासो जाबायहाय
आदैमोन।
बाथ्रायानो फैयाखिसै सान्नायाव।
- मानि हिसाब-खिथाब मादै? हासुंआ सोङो।
- ए दाखालि नोँसोर मेगाजिनाव होनो
होन्नायालाय माथो जाखो?
बेखौनो लिरनो सोलाबथारैखाय दिनै लिरनायानो आं।
दिनैबो बाथ्रायानो गोमाबावबायसो थारलानो।
हा' समाबो जाबायानो।
आंनि लिरबिदांखौ नोँसोर मोनलांनाय नंलिया।
- नङा मादै,
जोँ नोँनि लिरबिदांखौ लांथारगोन।
आंनो बुंबाय।
नोँनि लिरबिदांखौ लाइसियाव सोसनथारगोन।
- आयौ बोरै जाबायगोनसै!
जाया गारानो।
सानबाबो सानबाबो बाथ्रायानो फैया बेखायनो
डाइन सान मानि लिरनाय जायाखिसै।
समाबो जालाय लांबाय।
आं देग्लाय हानाय नंला आदैमोन।
फैगोन बोसोरनियाव हले हरथारगोन आं।
- ओहो मादै देग्लायनो हरथारनांगौ।
फैगोन बोसोरना आरो
फैगोन बोसोराव जालायगोन गोदान।
आं बुंबाय।
मादैया हले खैफोदाव गोग्लैनाय बायदि
जाथारबाय।
बियो मोखां खोमसि जानानै बुंबाय-
लेखा-फरा रोङाबाथाय बिदिनो आगैमोन।
लिरनो सानब्लाबो लिरनोनो हाया।
लिरनाय हुदा गैयाब्लाबो
आखायानो मेवा।
आंबो दहमैनो हाबा जानायनिफ्राय
दिनैसो रेबनो दैफिनदोँ।
बेबो नोँसोर फिसाफोरनि नारसिन नायावसो।
- दे मादै समाबो जाबाय नोङो दिनै
फुं खिनियाव जा लिरबाय
बेखौनो हरदो।
जोँ बेखौनो साफायथारगोन।
- आयौ!जाया गारा
बोरै जानोसै?
मिनि जानायसो जागोनहाय।
- मिनिया मादै, मानो मिनिनो?
मिनिग्राया गावनो रोङा बियो।
गोरोँफ्राथ' नोँखौ साबसिन लिरनो
थुलुंगासो होगोन।
हासुं आदाया मिनिस्लु बुंबाय।
- बोरो आं फरायनि होन्नानै हानहरदोँमोन आं।
मादैया लाजिना लाखुमा गारबायसो।
- दे फरायला मादै फरायला।
होन्ना आदा हासुंआ बुंब्लासो
आदानो बाबांसिन हरबाय।
- दे फिसाफोर,
जोँ रोङा रोङा नोँसोर मोजाङै
सोलोँबानो जाबाय।
आरो नोँसोर जा रोँबाय जोँनि उन्दै
गथ'फोरखौ फोरोँ।
नोँसोरनि मोजां खामानिया जाफुंथोँ फिसाफोर होन्नानै
मादैया उनाव सेजौ रांबो अनसुंथाइ हरबावदोँमोन लाइसिनि गिबि
जाफुंसारनायनि आसायै।
बैसागुआव रोजाबनाय मेथाइफ्रानो एसेबां
ओँथि गोनां जायो खन्थाइबाथ'....
बायदि बायदि सानो आं।
उनथाराव मादैनि लिरजोबै खन्थाइखौ फरायनो मोन्दोँमोन-

अनसुला गोसोनि रजे देहा थरसेनि
नोँनो आंनि इस्वोर, जिउ सायखं
आंनि अराय घियाना
नोँनि आथिँ नोजोरावनो
नोँनि अनगा आंहा लामा गैया
बेनो सुवामे आंनि थार गियाना।

अनबाय अनबायथागोन
अनसुलि बिमा मिथिँगा आंनि
देलाइस्रि हायनास्रि।
गोबादोँ नोँ आंखौ
गोबागोन नोँ गोबाय थागोन
नोँनि बिखायाव आंबो एब्रेगोन।
बिमा अनसुलि आंनि
नोँ गाबो
नाथाय नोँबो रंजायो,
फिसा आं नोँनि
आं रंजायो
नाथाय आंबो गाबो।
एसेबां अनबाय नोँ आंखौ
थेवबो एसेबां आंदि अख्रा
एसेबां आंदि बुजिया,
दिनै गाबो सानबा
नोँनि अननायनि ओँथि
नोँनि महर बिजिरस' हायैआव
नोँनि गोसोखौबो आं मिथिगौ
आंनि गोसोखौबो नोँ मिथिगौ
नाथाय बेसेबांदि फाराग
बिमा नोँनि आंनि।
आं मिथिगौ आं बुजिया
आं सिनायगौ आं सिबिया
बेसे अख्रा आं दाबो-
नोँनो होखार आंनि आखुखौ
खोमसि गोसो गोजाम आखलखौ।
नै मिथिँगा बिमा आंनि
नै आयै अनसुलि आंनि
खुलुमगोन नोँखौ दिनै
अनसुलि होनना जिउ गोरबो।

मानसिया साननो रोँगौ
आरो बुजिनोबो रोँगौ मानसिया
जेब्लासिम मानसिया बुजि रोङा
बे समाव बियो थारैनो लाजिया
देलायनो सोलोँनाया मानसिनि मोनसे रोँनाय
देलायनो रोँनाय लोगो लोगो
मानसिनाव मोनसे गियान सोमजियो
अब्लानो बियो लाजियो
लाजिनायानो मानसिनि मोनसे समायनाय
समायनाया मानसिनि मोनसे रोँनाय
बे बाथ्राखौ गोथौयै बुंनो हायोदि
जेसेबां रोङो बिनि आखल आखु गासैबो समायखाङो
लाजिनाया माखासेमानि रोखोमनि जायो
मोनसे नंखायनि थाखाय
आरो मोनसे रोङैनि थाखाय
अदेबानि मानसिया नंगौ नङाखौ लानानैबो
मोनसे गिनाय फैयो
बेयावनो लाजिनायबो थायो
मानसिफोरा गावखौ फुरायै बिजिरनो सोलोङाखै
नंगौ नङा बेखौ थि खालामनो हायैयाव
गुबुननो फोरमायनांगौ जायोब्ला
मानसिनाव लाजिनाया फैयो
नैबे बाथ्राखौबो साननो होयोदि
लाजिनाया मानसिखौ समायना खालामो
आरो बेनो गाज्रिबो नुहोयो
अदेबानि बियो मानसिनो गासै
गुण गियान आरो जाम्बाथिनि सायावनो
सोनारनोबो हागौ नंगुबैआव।

मानसि खिखौ मुगैनायबादि रांखोखौ बुगालिया मुगैथारो।
जाहोना जाबाय रांखोनि महरा साबा,
आरो सासे नंखाय बैनानै जाग्रा दाहोनाबावसो।
बुगालिया बिउथि, जोबोद बिउथि।
भुटाननि नांदेरनायबादि गुफुर।
आखल आखुखौ बुङाब्लाबो जागोन।
गोसोथोनायाबो गैया नङा दंखायो बेहा।
सोरबा माहाजोननि फिसाफोरबो जानो हागौ।
नाथाय गोजाननिफ्रायनो रांखोखौ नुब्ला नायनो हाया बुगालिया।
थेवबो सान्नांगौआ बेसो जाबाय-
सानसेखालि बुगालिया रावबो गैयै समाव (हरनि सममोन) रांखोखौ बुंबाय-
" आदा आं जोबोद गिदोँ!
दामानि आर्मिफोर फैगासिनोथार।
आं दिनै नोँजोँसो उन्दुगोन।"
उन्दुमारदोँबो नंखाय नङा दर फांथेलायनानै।

जेसेबांखि बारहुंखायानो बारा मानो
थांनानै थानो लुबैयो जोँ
जेसेबांखि सार-अन्थायानो गावा मानो
जेसेबांखि दैबानायानो फैयाथोँ मानो
थांनानै थानो लुबैयो जोँ
बे मुलुगानो मोनसे दावहाथिलि जेराव
बे दावहाथिलि दावहा फोथारनिनो
जोँ साफा साफा उदांस्रिनि फायखि
जुजिनाय आरो देरहानायानो जोँनि गुबै थांखि
मोन्नो लुबैनाय आरो होनो लुबैनाय
बेबादिनो थांनानै थानो लुबैयो जोँ
एसेल' नङा मोजोमसे जिउनि बेसेना
जोँनि दुखु आरो दाहाजोँ सिथाबनाय
एसेल' नङा मोदै आरो गोलोमदैनि बेसेना
जोँनि गोजोन आरो रंजानायजोँ सिथाबनाय
नंखाय नङा जोँनि खुसि आरो बाज्लनायनि ओँथिया
गोथारै होनाय आरो खुसियै आजावनाय
बेबादिनो थांनानै थानो लुबैयो जोँ
गोरबोनि रैसुमै मेथाइ रोजाबै रोजाबै
जिउनि थांखिखौ गायसन्नो लुबैयो
मोजोमसे जिउमानि गोथार खनायाव
थांनाय आरो फैनायनि गेजेराव
सुदेम खोलो खोलो बारनाय बारनि
मिलौहाब दाउसिननि गोदै गारांआव
थांनानै थानानै लुबैयो जोँ
बेसेबा उदां आरो खौसेथिनि गेजेराव

गिदिँ गिदिँ सारि गिदिँ
सेजौनिबो बांसिन माय बजाखौ जाबनानै
दा आफाया माय मारा होदोँ
-
मानै जारसि मोसौखौ
दोँसे दिरुंजोँ संग्रायनानै
लासै लासै गंसे लावथिजोँ बुनानै
दा आफाया माय मारा होदोँ
-
लावथिजोँ बुस्रिबावदोँ
माय बिदां
सम सम सुखेनजोँ खायखांदोँ
गिदिँ गिदिँ बियो मारा होदोँ।