दुंबुर साननि बिलिरनाय
रैसुमै बारनाय बारजोँ
बिलिरदोँ सुदेम
सुदेम आंनि सोलेराव
.
बेसे गोजोन
रैसुमै दाउनि मेथायाव
बिफांनि गोरलै गोरलै बिलाइ
रोजाबदोँ दाउसिन बायदि गारांआव
.
आं गोमोहाबो
गोदान जाबोबाय मिथिँगा
रंगिना समायना जेरैबो
नायनो बेसेबा मुहिनां
.
सोमखोर मोकथां
निला अख्रांआव
फुरसब जोमै माखा
बिरबायदोँ मानसि लांखार
बेसेबा खुसि बे समाव

फुंबिलि गुसु बोथोराव
उन्दुनाय खथानिफ्राय सिखारना नुबाय
जोँमा जारौनि दुंब्रुद बिलिदनाय
- आबै बिलाइया सान्दुं सायदोँ।

जेब्ला फेलेँनि खोथाखौ सानो
मोदै बोहैबोयो मेगनाव,
सौग्राव फैयो आंनि बिखायाव
हाजोनि दाहारजोँ दुद्रुनाय अन्थाइफ्रा।

नंखायनि थाखाय सोरबा घोरोमिया
खुगाजोँ सोरखौबा
साव होयो।
दायनि थाखाय सोरबा घोनिया
सोरखौबा आखायजोँ
साजा होयो।
बेयोकि मानसिनि मोनसे गियान?
एबा जोनोम जोनोम सुबुंनि घोरोम?
घोरोमनि बोसोन जाय फालिया
नरकआव गोग्लैनाय बिनि जाहोना।
घोरोमनि बोसोन सोर फालिदोँ-
जाम्बाया ना सियाना?
बबाया ना खानाया?
घोनिया ना गोरिबा?
सादुआ ना सिखावआ?
राजाया ना फोर्जाया?
गुरुआ ना सोलोँसाया?
सोरनियाव दं गियाना-
गुरुनाव ना सोलोँसानियाव?
जाम्बानाव ना सियाननियाव?
नाथाय बयबो समान
बयबो जिउ महर मोनसे
बेयो माब्रै जानो हायो?
सोलेर लानानै जिउ जादोँब्ला
सोलेरखौ अनसायनायाबो मोनसे जिउ घोरोम
देहा सोलेरखौ मान होनांगोन
देहा सोलेरानो जोँनि घोनब्ला
देहा सोलेरखौ अनसाय नांगोन
देहा सोलेराबो बेसेन दंब्ला
अब्ला जागोन घोरोम गोथार
साननाय होननाय मोजां
जोनोमनि बेसेन बेनो जागोन।

बर' थुनलाइनि गोरबोआव एब्रेना जोँ मोनो
गिबिसिन लाइसि 'बिबार' मुंनि मुं गोनां बिजाबखौ।
बेनो बर' हारिनि गेजेराव सिगांसिन ओँखार गोदान लाइसि।
बिजाबआ फिसा महरनि नाथाय बिनि गोरबोआ समायना रमायना।
बिनि लिरबिदांफ्रा जोबोद गोथौ ओँथि गोनां
जोबोद थुलुंगा, बोसोनथि गोनां।
बियो गिबिसिनै साफायनाय महरै ओँखारो इं 1924 मायथायाव।
सुजुगिरिया सतीश चन्द्र बसुमतारी।
रोखायै मिथिनाय जायोदि बिबारआ बै समनि 'बर' सात्र सन्मिलन'नि खुगा लाइसिमोन।
........
.......
बिबार लाइसिआव ओँखारदोँमोन खन्थाइ आरो रायथाय मोन्नैबो।
बिबारआव ओँखारनाय माखासे लिरबिदांफोरनि सानस्रिखौ जोँ मोनो-
: गसाइनि सेराव आर' गाबनाय (मिष्तिट सानस्रि)।
: रमान्टिक एबा गोसोथोनाय (मिथिँगा अनसायनाय)।
: हारि फोजाखांनाय आरो बोसोनथिनाय।

बर'फोर, जोँ दिनै दावगाबाय
जोँ दिनै खौसेथि साजायबाय
फै सिबिनि जोहोलाव-
आलारि फोजोँना मान होनि
जोबोद अनसायनायजोँ मान बावनि
गुरुदेब, बर'फा, आरो
आवलुरि बर' बिमानि फिसा
जोहोलाव सोमदोन, दैमालु
मुगानि थान्दै बिनेस्वर
जोहोलाव नीलु आरो जोहोलावजो
बिरगोस्रि, गाम्बारि, थिँफाख्रि आरोबाव
मुंख्लं आगोमा जोहोलाव- जोफोरनो
बारसे बिबार, आलारि फोजोँनि।
जोँनि अख्रांआव थाथोँ खुसियै
जोँनि हाबायाव सोरां होनानै,
जोँनि बाथौ गुदियाव
जोँनि मन्दिर सालियाव
जोँनि गिर्जा सालियाव।
गुरुदेबा जोँनो लामा होबाय
बर'फाया जोँखौ खौसेयै दैबाय
मिनिस्लु दान्दिसे नोँसोरनि मिनिनाय
नाथाय अखा मोफ्लामगासे जिउ।
आवगाय नांगोन दिनै गावस्राया
ज' ज' ग्रिद ग्रिद
माखा माखा हानजा हानजा
सैथो आरो बिजिरनाय आगानजोँ
ब्रह्म, बाथौ, खृष्टान आरो
गोबां जोँ बर' आनो।
जोँ गोसोआव लानांगोन
उदांस्रियानो जोँनि गासैनिबो मोनसे गिदिरथार
जुदि जोँ हारि माहारि जिउ दंङब्ला
बर'फोर, जोँ दिनै खौसे जाबाय।

सानसे जोङो उन्दै समाव
बेसे रंजायोमोन
बेसे गेलेयोमोन
बेसेबांदि मिनि खुसियाव,
बहा थांखो बेफोर दिनै?
बबाव गोबा जोबखो?
समनि बाबेन्नाय गान्थियाव।
आंनि लोगोफोर
आंनि आबै आबौमोना
बहा थांखो दिनै हाबाब!
गोदान बोथोराव?
आंखौ गासैबो नागार नागार
रंजानो आंजोँ रावबो गैलिया।
हय हय खोनासंना
बेसेदि आं गोजोनोमोन
आबै आबौनि खुगायाव
सल'बाथा;
आय आफानि खुगायावबो आद्रियै
गोमालांबाय हाबाब!
गोमालांबाय,
बहा थांखो दिनै-
बबाव गोमा जोबखो?

साना फापर बल्दार फेयास
नेमखि किजुर लबं मिष्टि
गोदै गोथाव रसगल्ला
मा जानोलै नोँलाइ?
बायबानो मोनो गलायाव
नोगोद रां खरसानि।
फिथा सिथाव सौराय
एन्थाब सौराय लारु बान्दारु
बहा मोनबावनोलै लुबैमालाय??
बहा थांखोलै ओइ आबै
बहा थांखोलै-
फिथा सिथाव सोर जाहोनो
आदै-मादै मोनाबो माहाजोन जाबायनो!
बहा थांखोलै ओइ आबै
बहा थांखोलै-
आय-आफाहाबो उवाल गायहेन गैलानो!
दाउखि आबैया बुङो-
गैले फिसौ गैले
नोमबौ संफ्ला बोराया
गोदोनो नोँ गैयैयावनो
थुब्ला थुब्लि रुवाजोँ सिनखावजोब्बाय।
नाथाय मानो आबै??
सम मोनोब्ला खिन्थागोन फिसौ।

मालायजोँ मुगैजानाय
जेरावबो- जेरैबो गोग्लैसोनानै थानाय,
बोखां हादोँ गुरुदेब नोँ हारिखौ,
दुलाराय बर' फिसाफोरखौ।
हारिनि जेँनाफोरखौ सुस्रांनानै
आन्दायनाय हारिनो सोरां होआब्ला
जौगानाय लामायाव दैबायाब्ला
सिनायथिनि मुस्रियाव आगान सुरनो
हानाय नङा अरायबो।
बेयो नोँनि गासैबो गुदि,
घोरोमारि, रांखान्थि, राजखान्थि
बायदि बायदि सोलोँथाइ बिथिँ
गासैबो बर'नि जेँना नोँ सुस्रांगिरि।

बिरथिँ बिरथिँ बिरथिँ
बिबार नागिरो...
- नै आंनि गोसो सिखिरि
- नै मेगन आंनि जावलिया।

दुम- दुम दाम- दाम
आगै नागालिनि अन देनायालाय
खारलाङाखै हाबाब
उवाल सौनायालाय गोमगायाखै।
बैसागु बोथोरनि मायब्रा बिदैयालाय हाबाब
खर'खौ नागाराखै
बुंजाफा रद' रद' बेदर खाजिलै हाबाब
बावाखै नोँलाय होफैनायखौ।
नै सना मायनाव जिरख'नाय मायसालिनि
बावालै सना
बावाखै सानैजोँ रायज्लायनायखौ।
नै दाखालि लेलां गावबुरानि
सुखुबार बेलासियाव
रायज्लायनायखौ मायनाव
सानैजोँ फख्रिनि हाब्रां सेराव
बावालै सना बावाखै आं
थर'रद थर'रद एम्बुआ जंखायनायखौ।

नोँ हरनाय लाइजामा
दं दाबो मोदैआव
सना गोजोमनानै,
नोँ आखिनाय जरासे दावथुआ
दं दाबो मेगनाव मोसानानै,
बावनो हायाखै रैसुमै गारांखौ
रोजाबनाय नोँनि-
जुलि सानैनि,
गोरबोआव मोदै सना आंनि
नोँखौ बावगारनो हाया मानोबा
रैसुमै गासैबो गोदै
नोँनि खोमायाव,
बेयो सोरनि गावस्रानाय
सिमांनि ना मोकथांनि-
नोँजोँ गोजान जानाय मेगनाव
आनज्रायलायनाय दाहा बिखासे जिउआव।
गोरबोआव निहोर बोहैयो
सानबायना नोँनि-
नाथाय नोँबोदि आंखौ-
नोँनि रादाबा फैयो दिनै
खुसियाव नङा,
नोँबो जेरै आंनो;
बावाखै नोँ आरो आं।
सानै सम रं बिरंनि।

बिफां-लाइफांआ आदार होयो ने?
थारैनो बाथ्राया नंमारगौसै?
होयो थारैनो।
जोँनि राफोद गोहो बोलोयै आरो
गोसोयै थांना थानायानो
बिफां-लाइफांनिफ्राय जोँ मोन्नाय आदार।
बिफां-लाइफांखौ जोँ जेब्लाबो जायो
जोँनि मेगनजोँ,
जोँनि गोसोजोँ, जोँनि बिगुरजोँ, जोँनि सोलेरजोँ।
बिफांआ हगारनाय अक्सिजेन गेसखौ जोँ जोँनि
हां लाग्रा अंगजोँ जायो।
नै उन्दै उन्दै फंबाय-बिनानावमोन,
आंनि अनजालु-अनजालिफोर।
जानाय बुङोब्ला खुगायाव सोनायखौल' बुङा।
मोन्नाय माखासे जामुंखौल' खुगायाव
होनायाल'नो नङा।
जोँनि माखासे सान्दांथि-मोन्दांथिजोँ अनसायनायाबो
मोनसे रोखोमनि जानाय।
बेखौ साबसिन होन्नाबो बुंनाय जायो।
खुगाजोँल' जाबानो जोँ थांना थाया।
जोँ जोँनि गियानजोँबो माखासे
खुगाजोँ जानो हायैखौ जायो।
बिफां-लाइफांआ जेब्ला
सोमखोर समायना जागोन अब्लासो
जोँनि गोरबो आरो सोलेराबो बोलो जागोन।
नै फंबाय-बिनानावमोन बेखायनो जोँ
बिफां-लाइफांखौ अन्नांगौ।
बिफां गायनांगौ, दै लुनांगौ जोँनो थोजासे
हेफाजाब होगोन।
बिफां-लाइफांआ जोँनि मेगनाव समायना
नुजायोब्ला जोँ गोजोन मोनगोन।
जोँनि गोसोआ रंजागोन।
नांगौसेबां अखाया हागोन,
खोलो खोलो गुसु बारा बारगोन।
साया सायख्लुम जोँनो मोनगोन।
गेदेमाफ्रा बुङो- फांथाम गाय नांथारगौ जाब्लासो
फांसेखौ दान।
जानला-मोनला बिफां दाननो नाङा,
दाननो दाहो।
मानोना बिफां-लाइफांआ जोँनो आदार होयो।

2
गगेरे ग'-
गामियाव दाउज्ला गेसेरबाय
हालुवा लागोआ दर्जा खेंबाय ग्रे-
हैहा हैसा हाल होलांबाय
फोजा हरबाय फेरेँगा गोबोरलादा दाउसिन
"अलसिया दाजा रसा नांगोन"

1
सानजानि सुदेम बारा
सोनाबहा बिरलांदोँ-
दाउसिन दाउला बिफांआव मोसादोँ
मिनिसुलु जोँनि गोसोजोँ
दे लोगो जोँबो रंजानि-
दैमाखौ सानस्रिनानै
हरै जोँबो थांखियाव थांनि-

बिबार नोँ बारोब्ला गोसोआ
बेसे गोजोन जायो आंनि,
आंनि हान्थिनाय आंनि रंजानायाव।
गेवलांबाय था नै बिबार
साननि रैरुब सुदेम सोरांजोँ,
आंनि बारियाव गोसोनि गियानाव।
बेबादिनो मिनि गेवलांङै
आंखौ गोजोन होफै नोङो,
आंखौबो गेवलांनो फोरोँ मुलुगाव।

बिबारि गावदां बिबार
नायगोमोदोँ सिखिरि गोदान
लाजिस्लु गोसो बिनि मेगन।

बियो सिरियैनो गिदिँफिनबाय
नाथाय मा रादाबमोन बिनि
- सोरनि?
मिथिँगाया सोलायदोँ बेबादिनो।

गोथां मिथिँगानि बिलाइ
सिरिदोँ दालाइ मानख्लाय दालाइ
आंनि मेगन सिगांआव।

नोँ आंनि सान, आंनि अखाफोर
नोँ आंनि समायना, सोदोबफोर,
नोँ आंनि देँखो।
आंनि मुलुग, आंनि अख्रां
आंनि लैथो।
नोँ जेब्लाबो आंनि।
नोँ आंनि सोरां, खोमसिनि।
नोँ आंनि रोजोबथि आरो मिनिस्लु।
आंनि मिजिँ, आंनि जेब्लाबो अनजाथाव।
नोँनि थाखाय,
आंनि मोजां मोन्नाय...
नोँखौ हास्थायो गोरबोआव,
नै गिरि गंग्लायो मानिजाथाव
जोँमा सान सोरां
आंनि गोरबोआव लामा गेबेँ
बिलिर अन्नायजोँ सोरां।

आंनि गुदुं सोलेराव
बिलिरलां नोँ बार
सुदेम अननायखौ होलां
गोरबोआव गोजोन लुफावलां
.
नोँल' गोजोन होयो गोसोखौ
सुदेम गुसु बिलिरनायजोँ
आंनि गोरबो बिखाखौ
नोङो सुग्लाय होयो दुंहाव सोलेरखौ
.
फुंआव नोँ मोसायो
रैरुब निहोर बिलाइजोँ
मिथिँगानि समायना---
गोथां सोमखोर बिफां बेन्दोँ
.
नोङो बिलिरलांफै खर'खौ
अननायखौ होनानै आंनो---
थाजिम होलां आंनो---
गोरबोनि खुसिखौ होनानै
.
बार नोङो आंनि हां
नोँनिनो मोजां मोन्नायजोँ
हगारो आं मेथाइ---
हगारो आं देँखो---
.
बेसे गोजोन मोनो
बिलिर फैयोबोला गोसोआ
नोँ आंनि सोलेर गोबाफैयोबोला
बेसेबा समायना जायो गोरबोआ
.
दैमा-दैसा बेसेबांदि बाज्लयो
नोँनि अननायनि खुदुमनायजोँ
बेसेबा समायना नुयो---
बिफां-लाइफांनि देमलो मोसानायजोँ
नोँ बेबादिनो लाबो खुसिखौ---

खोमसि जानायखाय
सांग्रेमा गांफौफोरा बिरदोँ,
नै बिसोरो रंजाथोँ।

बुहुमाव उजिनानै
मेगनजोँ आं नायनो सोलोँदोँ
बेसे गोग्लैदोँ आं समायनायै।
रं बिरं आं जेरैबो नुयो
आं आरो आंनि मोखां
गोरबोआव मोजां मोनो।
मेगनजोँल' आं मोजां मोन्दोँ
बे नङा गोरबो मोन्दांथि
आं सानस्रियै नायहाबो
मोजां मोन्ना मोन्दांथिफोरखौ
नोँनि महर जेब्ला नोँ-
आंनि गोरोन्थि खालामो
नङाब्ला बेसेबा आंनि गोग्लैनाय।
दा आंनि मेगना नुहरो
बेसेबा खोमसि साग्लोबदोँ बिसोरखौ
आरो आंनि मोन्दांथिया गुस्लायो
बेसेबा रिमोनद्ला मुलुगा
गिदिँदोँ सोरां जोँमानि अराय
आं बुंनो हायादि जेब्ला
गोजा जोँमानि सोरांआव गुफुर
जाथावै गिदिँनाय गोसोआव
गोसोम संसारि गोसोआव।

बुंथि बायदोँ सुबुंनो
नाथाय बहा फोथायनो सल'खौ?
आवनायनायसो जादोँ खन्थाइया
बाहां बिरहां ओरैनो थादोँ गहेना
दिन्दां फादां खबामफ्रा?

बेनो बोथोरा गोदान
बायदेमलाय रुम्बां रुम्बां बिफां,
बेनो मिथिँगाया हायना
मोकथांखोर आंनि मिथिँगा।

लामाया हाद्रि जायोब्ला
अखा जाना नोङो फै
थिँ थिँ सान्दुं जायोब्ला
बार नोङो फै लामायाव
.
गोसोनि देँखो बोनानै
मुलुगनि गारां हगारनानै
बेबादिनो जोँ थाबाय लांगोन
थांना थानायनि खबाम गानानै
.
थांना थागोन सैथोबादि
दिनै दुखु गाबोन सुखुजोँ
बारहो हरगोन खोमसिखौ
फिन सोरांखौ हांख्रायनानै
.
सोरजिगिरि मुंखौ लानानै
गोथार सिबिनायजोँ
बेबादिनो जोँ थाबाय लांगोन
गोथार गोरबो गोगो गोसोजोँ
.
संसारनि मैया मैया
जिउनि मोकथां मिथिनायजोँ
मुलुगखौ बेबादिनो अनगोन
जोँ बयबो बेबादिनो साननांगोन
.
समायना मोकथांनि महरजोँ
गोरबोखौ गुवारै फुवारगोन
गोथौ सानस्रिनि गोथौ लैथोजोँ
जोँ बयबो लोहाबनांगोन
.
जोँ मुलुगनि दावबायारि
गोथार बिजिरगिरि जानानै
गोसोखौ गोजोन खालामगोन
बेबादिनो जोँ थाबाय लांगोन
.
जोनोम बेनो मोकथांनि
गाबनाय आरो मिनिनायजोँ
बेबादिनो गेलेयो जोँ दान्दिसे
नोँ आंनिनो आंगो सान्नायजोँ।

बेयो मानसिनि जिउ
नाथाय सिमां आरो मोकथां
बेयो मा जोँ मिथिगौ
मिथिगोन जोँ मिथिगोन।
बेयो गोरबोनि सानस्रियाव
बिजिर जानाय मेलेमाव
बिबार बारियाव समायना
जेरैबादि सिखिरि बिरबोयो।

बोथोर बोथोर सोलायो महर नोंनि
एंखोर बिरना लाइफांफोरबादि,
लासै लासै जारौ साना हाबलाङो,
आंनि गोसोआव आद्रा थालाङो माबा गोबां;
रजे आरो आंनि रायज्लायनाय,
ओरैबादि गुस्लायलाङोदि गोसोनि खोथा;
मादि गोमोथाव बियो नोंबादिनो गोमालाङो!

1
रलिँ मिलनि दैमु हटेलाव
सानसेखालि फरटा जानाय
बादिलायदोँमोन जोँ।
बे समावनो सासे सिख्लाखौ लोगो मोन्दोँमोन।
बेयो ओरैबादि नायदोँमोन
जेराव जोँनि फरटा जानायानो
नायथाव-थाव आरो
सान्नो गोनाङै मिनिथावमोन।
गुरबासो जानानै जेब्ला
फानलु गोसा ओँख्रिखौ खुगायाव
सोगासिनो सोयो अब्ला बियो
मिनिया लाबानो थानो हायाखै।
बियो ओरैबादि मिनिबायदि
मिनिदोँबो मिनिदोँ खुगा हमथेनानै खे,हि, खे,हि.., मिनिबाय।
माब्रै जाखोथाय- आंबो
मिथिगुना थाबथा लायबाय।
2
बारा बोरै बारबोखो 15 बोसोरनि
बै सिख्लाया दिनै 16 बोसोर बैसोआव
आंनि बेवाइ जाफैबाय।
खाफाला मोजां, हाबा जाब्लाबो आफाया
एसे माहाजोनखाय फरायनो होबावबाय।
आंबो अन्नानै बंङाइगाव कलेजाव
देग्लाय H.S. 1st Commerce आव
मुं लागायना होबाय।
हाबा जाखांबाय।
उन्दै गथ; आंखौ दाबो जि लाजियो लाजियो।
आंनि खाथियाव मोखांजोँ मोखां
2 मिनिटनि बारा थानो हाया।
कुनुरुखुम सोमोन्दोआ आय आफा,
जोँ जेरैबादि बुङो बेखौनो बुङो।
नाथाय आंखौ?
आंखौ बेवाइ होन्ना बुङा।
आदा होन्नासो बुङो।
सम सम कलेजाव लोगो मोनब्ला
लाजिगुसुयै- जाबावनांगौ पेरियद गैलामोन आदाना?
होन्ना सोङो।
माब्लाबा बेबादिनो फुंफ्राव नुब्ला
- गुड् मर्नीँ आदा होन्नाबो बुङो।
3
बाथ्राया एसे सान्नो गोनां।
आं गोसो थोनाय सिख्लाया
बेवाइनिफ्राय बा बोसोर उन्दैसिन।
बियो दा 11 बोसोराव।
बेवाइया थाखो 11 आव फरायदोँब्ला
देग्लाय आं गोसो थोनाया
स्नि थाखोआवनो फरायदोँ।
बाथ्राखौ सानै हयै आं थि
खालामखादोँ।
20 बोसोर जायोब्ला आंनि गोसो थोनाया
फरायसालिमाखौ बारग'ना मुलुग सोलोँसालि
मोनहैगोन।
बे समाव आंजोँ हाबाया जागोन।
नाथाय आंसो बोरायद्रायगोन नामा
सानफ्लांबायसै आंबो।
थांनाय बैसागु बोथोराव
गोसोथोनायखौ आलासि जानो लाबोदोँमोन आं न'आव।
नाथाय बेवाइया?
मा सानखोथाय- दाना आंखौ नायनो
हाथारैसो जालांबाय।
सोमोन्दोआथ' आजिखालि बोरैबा जाखाबाय।
उल्टां- फाल्टां गासैबो।
गुबुंबाय होन्ना बुंब्लाबो
फंसेनो बुंजासै।
बोरैबा बोरैबि बेवाइनि खुरमासो जायोनो
जाय आंखौ मोजां मोन्दोँ।
आंखौ गोसोथोनायजोँ आरो बेवाइनि बिमाजोँ
असेथार बिब' बिनानाव
जायोनो।
बेखायनो बेवाइया मा सानखोथाय....!!

रसा नाङै नाङै आरो बेसेबां थैनो?
बेसेबां उन्दुनो मेगन मोदैजों?
हांमा आरो दाहाखौ बेसेबां गोबानो-
आरोबाव गादब जानो मुगा मोनबेसे?
जों सुथुरखौ सिनायबाय दिनै
सुसिगिरि गादबगिरि खुंगुरिखौ सिनायबाय,
बेखायनो सोंनो गोसो जायो दिनै
सिखावखौ सैमा बथाया सोंनायबादि।
ओँखार ओंखार बे हानि फिसाफोर
सुसिग्रानि अन्थाइ बिखा गलि होनो,
बे हादोरनि आयेन बस'ग्रा खुंगुरिखौ
राजमासिनिफ्राइ दिनै बोख्लायना होनो।
रोजाब मेथाइ बिखा फोरदान्नानै
थांनानै थानायनि मोन्थाइनि थाखाय,
उदांस्रिनि गोलाव लामा हान्थिनायनि
रोजाब मेथाइ बिख्लो सोमावनायनि।
हाखर सिङाव अख्रां नायदाव नायदाव
आरोबाव दिनै थानो हालिया,
सिमां मिजिंखौ फेलें खालामजालिया
बिरखांनो अख्रांआव फानजारि सिफायदो।
जों लुबैया अराय मुगा खोमसिखौ
इनाय-अनागार आरोबाव हाया सहायनो,
बिखा फोरदानदो गादबग्रानि हेंथायै
बे हानि फिसाखौ जोथोनै दोननो।
ओंखार आदार सिख'जानाय फिसाफोर
रोजाब जुजिनायनि बिग्राइलु मेथाइ,
उदांस्रिखौ लाबोनो बयनिबो सेराव
रोजाब जिउ जारिमिननि मोन्थाइ।
जों बे हानि मावथि आबादारि
बे हानि रैखा खबसआ जोंनि
आजै-आजौनि देहा हासारजों रजनाय बे मिथिंगा
बुं सुसिगिरि बे हादोरा सोरनि?

बयबो रंजानायनि गेजेराव
आं रंजागोन---
दुखुखौ दोनगोन आं
नुयै बबेबा आन्दो खनायाव
.
संसार मानसिनि गेजेराव
बिखासे बिखा अननाय लानानै
अननायखौ होगोन आं---
थांना थानायनि रायजोआव
.
जुब जुब अखा फैथोँ
बै समा फैयोब्ला
रंजासुला मिथिँगानि रायजोआव
बयबो रंजानाय जायोब्ला
.
जिउनि बारग्लांनाय रैरुब
मुलुगनि रंगिना बिबार बारियाव
देलाइनाय जाथोँ मिथिँगानि
गोथां बाथ'गां दखनाजोँ
.
गोजोँ मिनिनाय निजोरानि
अखोरांसे गुवार अननाय
जाथोँ खुदुमनाय सिदोब सिदोब
गेवलांनाय गोदान बोसोर
.
समायना सिखिरिनि बिरबायनाय
जायोब्ला मोदोमनाय बिबारनि
हालि हालि बारग्लांनाय बिनि---
.
मेथाइ रोजाबथोँ दाउसिन
बिफां-लाइफांनि मोसानाय
बेजों गोजोन बारा थाबायबोथोँ
औवा बिजौआ सिफुं दामनानै
.
दैमा-दैसा बोहैनायजोँ
दाउबोथोँ हालि हालि ना
बेजोँ फैथोँ गोदान बोसोर---
बिफां-बेन्दोँनि रोदोमनायजोँ

बोदोर जायो फुंबिलिनि
ओँखार बोनाय साननि सोरांजोँ
थं गसंना मुलुगखौ नायहरै नायहरै
ओंखार बोनाय हाजोनि निज्राबादि
रोमै रोमै दैसा गाथोनाव रोजाबनो
नेनानै थानांगौ जानाय जिउनि मेथाइ
इनायनो रैसुमै बोथोरनि मेथाइ
मोसाखावरि दाउसिन-दाउलाबादि
एसेबांदि बोदोर जायो आंहा बिरदावनो
थाथिरनाय गैयै गोसोआव बाज्लखांनाय
आरो बेसेबांदि लुबैनाय दं जिउआव
इनायनो गोबां गोगो आरो गोथार

बे बाराव फाथो दांनायाव
लरग'नि आखाया बौदोँ।
फिसायजोँ हाखु-दाखु
बोरमा दारि नागिरनो थिनजानायाव
गामि फारसे खारलांदोँ बियो सिमालिया
दखना जोगथोँ जोगथोँ।
शहरनि हिनजाव गोदान बेसारा-
बेनि उनाव बेनाव सोँबाय हैदोँ-
" बोरमा दारि दं नामाबाल आब',
बाजै, आयै?"
बायदि सोमोन्दो लायै लायै।
सिबाय मोनमारदिया बियो बोरमा दारिखौ!!
फाथो दांनो समा बारग'लांनायाव
लरग'आ रागा दिउ दिउ।

सासे जाम्बा आरो सासे शहरनि सियान?
- - - - - - - - - - - - - -
लामायाव बुदांखौ बिरफुं
माहाजोना लोगो मोनो।
बियो सिनायै बुदांखौ रायदावो।
बिरफुं- नै फंबाय,
आंनो बैसागुनि बोरमा मासे
नांगौ जादोँमोन।
बुदां- ए, बुन्दा ना खासि?
ना बुन्दि?
बिरफुं- बुन्दाबाबो जागोन,
खासिबाबो जागोन फंबाय।
बुदां- ए, जोँहानि आदा बेरग'नाव
मेल्ला बोरमा दं।
र थाथ' सोँहैनां।
(खारलाङो फैफिनो)
फानोनो आदा।
बिरफुं- मा खावसेल' फानो!
बुदां- नङा आदा,
मानि गोरोन्थिया आंनि।
फानोनो।
बिरफुं- अ' मोजाङानो जाबाय बिदिब्ला।
हा बुन्दाना खासि जाखो फंबाय?
बुदां- र र नायनां..
(खारलाङो फैफिनो)
आदा बुन्दा।
बिरफुं- खोनासंनो एसे बोरैबा मोनो।
बुन्दाल' होन्नानै आदाखौ
बुङाब्लाबो जागोन फंबाय।
बुदां- माने आदा...
बैसोआवथ' नोँ आंनिफ्राय
देरसिन जागोन आदा।
बिरफुं- आरसा जाथोँसै बिदिब्ला।
हा बोरमाया माबादि जाखो?
बुदां- बोरमायाथ' लोदो लोदो आदा।
बिरफुं- माने एसे फुंहांनाय नामा?
बुदां- नङा आदा,
एकदम लोदो लोदो।
बिरफुं- मा गाबनि जाखो बोरमाया?
बुदां- ए, बावलायबायसो।
र र नायनां...
(खारलाङो फैफिनो)
गोजालै आदा बोरमाया।
बिरफुं- माने गोजाहां नामा?
बुदां- नङा, एकदम गोजाथार।
बिरफुं- अह' माने फंबाय...
आंखौ आदा होना लसेनो
गिदिर होनबा मोजां
जागौनामा?
बुदां- जागोन जागोन,
महर मुस्रिखौ नायोबा
आरो सोलेरखौ नायोबा
नोँसोरबादिखौ बुंजायो।
बिरफुं- अनुमान बेसे जागोन फंबाय
अजना?
बुदां- ए र र,
(खारलाङो फैफिनो)
सेरबासो जागोन गिदिर।
बिरफुं- दामाबा बेसे जागोनथाय?
रायज्लाय हैनांसिगोन फंबाय।
बुदां- ए र र, थांनि...
(खारलाङो फैफिनो)
15जौसो नांगोन होन्ना
बुंदोँ गिदिर।
बिरफुं- हाब फंबाय माबादि 15जौ जाखो?
नुफेरा खोनाफेरा मुंनि
जौ जाखो बेलाइ?
1000बियार जौआनो जाया होनबा?
बुदां- र र आं रायलाय फैनि...
(खारलाङो फैफिनो)
मानिथारानो गिदिर।
15जौ नांथारगौ होन्ना बुंदोँ।
बिरफुं- हा बहा मोननांगौ जाखो फंबाय?
बुदां- र र आं मोजाङै सोँहैबावनि...
(खारलाङो फैफिनो)
मानिथारानो गिदिर।
बिरफुं- हा बहा मोन्नांगौ जाखो फंबाय?
15जौआलाय भुटाननि ना लण्डनि जाखो?
ना ना आसामनिनो जाखो?
बर'फोरनि?
बुदां- (मिनियो) ए...
हा: हा: हा;-
15जौ मानि फन्द्रस'खौसो
होन्दोँलै आदा।
बिरफुं- ए..., हा: हा: हा;-
थौ फन्द्रस'आलाय आंनाव दंखायो।
थौ नायना लाना फैनि।
नोँनो 1000बियार जौ लोँहो थारगोन आं।
बुदां- 1000गाहाम बियारखौ आं लोँनो
हानाय नङालै आदा।
गंनैसो बारा बियार लोँहोबानो जायो।
मोनलोँफेरथाराखौ आं माबादि
बियार जौ बेलाय?
गिदिर गोलावफ्रासो सालाफ्रा....।

मोनगोन साजा नंखाय फोलाबोला
इनाय गुबुनखौ खालामबोला,
इयुन समा फोरमान जाबोला।
हाबाब! फै लामाजोँ जेरै सोरांजोँ
नंखाय माया अगेन नेवसिनायजोँ,
होदो आगानखौ गेबेँ सान्नायजोँ।
फांथेनाय गैयै गोगो गोसोनि
हगार बाना देँखो निजोरा
रुगुं गैयै अनसायनायजोँ
बे जिउआ गोथार गोजोँ समायना।
बे दिन्थिगासे सायना सालियाव
थाबायनो हानायबादि सोरबा सायाजोँ
नुनाय लामा जोँखोल मेगनजोँ
देँखो बोनाय सोरां लामायाव
थाया जिनिद मोनसेबो गियानाव।
दावबायलु बे मुगाया दिनै
मिथिँगानि सोलायसुलि मुस्रियाव
होदो सोरां गोसो आगानखौ
सोरांनि थखनजोँ दावबायनायखौ।

Black Topनि बाला स्राव स्राव
अन्थाइ सेरेपनि लामाजोँ
Bolero Scorpio सिमब्रेलांदोँ
लाइ लाफा मुलानि मोदोमाव हाद्रि फोन्नानै
लारि लारि
संख्रि फानलु बोथ्रोदग्रा फोरनि गाड़ि
~
मन्थ्रि एम एल ए फोर
बिसोरनोथ'मोन जोँनि सिफाइ
जोँनि हारिनि रैखानि थाखाय
बिसोरनोथ'मोन मोनजारोङैनि थाखाय
ओँखाम दै गरतसे जगायनो
~
मायसा दांनाय
लान्थिरामा गल' नायहरदोँ
आरो नायहरदोँ हानजासे
हाजिरा खामला मावग्रा
मिजिँ गोनां हामख्रं सोलेरनि मावथिफ्रा
~
होँगो दोँगो गथ'फोर
मेँब्रां-मेँब्रिँ नायनो सेलायदोँ
बहाथो मानसि गिदिरा?
बैलाय बैनो फिथा हास'नाया
ए बेनो बेनो
उदै गिदिरा नामा?
~
दांखालियाव गोदानाय
सानफ्रामबो जायै जायै
अमा बोरमा बेदर बेसे जानो?
हाउजिं गंसेनि मुंआव
बुरखाव लांहानियाव बोथिसे जालांदोँ
साम'जोँ सबायजोँ
दाउला खासि अनला खारै
नाथुरजोँ लाफाजोँ मोननो गैयै नाफाम
जाबाबो जाथ्र हायै फ्लेट खुरै बुंजाफा
~
खुसियैनो जाहोहरदोँ बुरखावआ
नाथाय जाला सिफिया लाथिम
थायसेबो थायाखिसै
नोगोद नैरोजा बाजौ खरसा थांबाय
बेखौ मालाय बहा मोनखो
रां दाहार गोनांखा-
देवबार माहाजोननियावसो दाहार.....।

दाखोर दाखोर जेरैबो
हावासिनि दरसे सायख्लुमावबो।
आथिखालाव सुबुंनि गोसोआव मैला
नागिरना मोनो जेरैबो खना-खनला।
थिख हे गसाइ!
आंनि गोरबोआवबो साबफादोँ जेला
नै गसाइ! हर जोबस्रांनाय जानला।
माखौ लानानै आं थांना थानो?
मिजिँ ना थांखि
सिमां ना मोकथांखौ
ना थांनो.. देहा-सोलेर लानानै?
हे गसाइ!
हर आंनो लैथो मोनसे
जेसे हायो आं थब्लनि
जिउ जोनोमनि ओँथि नागिरनि।
हे गसाइ!
आंनि फाफखौबो बेयावनो होदो सुस्रांनायखौ
आंनि गोरोन्थिखौबो बेयावनो होदो सिनायनो।
हे गसाइ!
नोँखौ इसोर सिबिनाय
नोँखौ लोगो सिनायनाय
बेनो आंनि जिउ बावनायब्ला
हे गसाइ!
सुबुंखौ अन्नाय
जिउ-जिबिखौ मदद होनायाबो
आंनि देहा-सोलेर बावनाय।
हे गसाइ!
माखौ लानानै आं थांना थानो?
नोँखौ सिबिनानै आंनि जिउब्ला
जिउ-जिबिखौ अन्नानै आंनि घोरोम
नोँनि थाखाय जिउ होनानैब्ला
जिउ-जिबिनि थाखाय देहा-सोलेर।
हे गसाइ!
नोँ गासैनिबो देरसिन बिजिरगिरिब्ला
आंनि बरादखौ बेखेवदो नोँ
माखौ लानानै आं थांना थानो?

मागो बैसागु बोथोरब्लाथाय सान हर
माब्ला सोरांङो,
माब्ला मोनायो,
मिथिनाय गैया।
जेराव मोनायो बेवहानो थायो।
जेराव मोनलोङो बेवहानो गोदोयो।
सोरांस्लाब मोनै थेफानि सिलायाव दिनै
सोरला- लोरला फेग्लिनाय सोलेरा।
मेथाइ खनै खनै लावांआ हाबबोयो-
'गोरोन्थि जालांबाय आगै सब'लिन...'
थेफानि फिसाजो थिख्रिया बागदावो
बियो थोरसि सुदोँ।
बियो लावांनि मोखां बुंहरो-
- हाब आमाया बेरे फुंजानि।
- लाबो जौआ लाबो लाबो
जौआ आंजोँ हाया।
(सोरगिदिँ बेँखन्नाय खुवाया नै दासो
सिरि सिरि सोरनिबा होख्रावनायाव
खारखुमा लांनायबादि गोमालांबाय।
जोँमा जारौआ सानजा फैसालि नुजाबोगौ
गोजा जारौ मिनिस्लु मिनिस्लु।
लोरला फेग्लिनाय देहाखौ लानानै
साजायनाय सिलानि बेरेन्सियाव जिरायो लावांआ।
सोरगिदिँ खना- खनला नायहरो-
खेबसे गारमा हब्राना रिँहोयो गामि गंसे।)
- 'दमासि दमासि दमासि'
मागो दमासिब्लाथाय बेबादिनो जायो
गासैबो हनै- अमासि;
गोरान मिथिँगा, बिफां- लाइफां
दाउसिन दाउलाफ्रा बहाबा बिरलांदोँ,
दाउ खौऔनिथ' रादाब गैया,
हनै हनै फालोसे दाउस्रि हाजि-
बिसोरो गोजा जाहाब सुमलि बिबाराव
गिदिँ गिदिँ मोसाबायदोँ।
(लावांआ गोसो सिङाव खन्थाइ आवरायो
लिरनाया मिनि हबि नङा
लिरनोबो रोङा,
फिसाजोँ, फिसाज्लाफोरखौ फोरोँनोबो रोङा।
बबाव जौ?
बबाव बेदर?
गन्थं फोलावनाया बिनि सर'
लोगोसे रादाबा गन्थंआव फैब्ला
बिनि आथिँआबो उन नङा।
आगदा आगसि बादिलायगोन
थेवबो मेँनाय गैया बिनि।
दुब्लियाव फैयो खाना नै-
दासो सफैदोँ थेफाया,
थांनाय- साननिफ्राय मोनाबिलियाव
बारा जादोँ बेहा लोँनाया
नै खर'आ सादोँ दाबो थिँ थिँ।
सिलायाव सफैयो थेफाया,
नुग्रोन नुग्रोन रायदावो लावांआ।)
- हाबाब बैसागु बोथोर
बेबादिनो मागो बोथोर
खारखुमा नोँसोर अमासि अमासि,
नोँसिनि बाहागोखौ आं मोनलोँबानो जाबाय।
- थारला बारा जाथारदोँ मैयाना,
खर' सागासिनो थिँखाव थिँखाव,
हरनि गु रिँगायावसो सफैनायानो।
- बोसोराव खेबसे रंजानाय
मागो- बैसागुआव खेबसेल' मोसानायावनो
खारखुमा नोँसोर,
हाबसो हाबसो था न'आव।
- बे फाग्ला हंलायानो लाबोदोँ
गावहा बारा जाना लेँखार बोदोँ।
(गुसु गोजांनाय लानानै
खाब आरो जग लोगोआव
मल मल मोदोमनाय जौ लाबोयो
लासै लासै सुमित्राया।)
- हाब लावां, बेरे फुंजानि,
- जेबो नङा आब',
बोसोराव खेबसेल'सो,
गाज्रि जादोँ नामा बोसोराव खेबसेया?
- बेबादि नङा,
सम थानांगौ मानसिनाव
बेसे गुसु बोथोर बे
बेसेबा गुसु हर थांनाय मोनायाव
रोनाव बायनाय,
सोरमोन बेलाइ?
गावनि देहाखौ जोथोन गैयै
लोँबायबायनाय गुसु गुसा हरथौहाब हरथौहाब
मोजां जादोँ बेयो?
सानाव रंजानांगौ- मोनाबिलिसिम
जेब्ला साना सोनाब फैसालियाव थाङो
थिक समाव न'आव थानांगौ।
मागो बैसागु होनबा बेबादि
हर सान फेनानै रोनावनाय नामा?
लामा सामा उन्दुसोना नाथाय नामा?
- दे आब' बेलाय बे,
- बेलाय बे नङाहाय लावां,
गावखौनो गाव सांग्रां जानांगौ।
रंजानांगौबो-
सानहाबब्ला गलियाव मोसौ मोसा
दुब्लियाव लायना खाफैनांगौ,
मानसिया रंजानानै,
मानसिया हरफा सानफा
गारमा सिग्लाब सिग्लाब मोसानानै
दुब्लियाव हरफा गोजांनानै
मोसौ मोसाया थानांगौ नामा?
ओरैनोबाबो सावरि बादालि
सोरनिबा हाबा खेराय
मोसानाय रंजानाय,
जानाय- लोँनाय
गोमाखायानो माथो नोँस्रा?
(ग्रद ग्रद गोदावो जौ बिदैखौ,
नायगोमोयो सुमित्राया,
बियो जोँ नायना बुङो)
-  सिथाव सावदोँमोन आं,
जानोबा लायनि आं र'
- थोद जाया आं,
जौ लोँग्रा मानसिया बेबादि
फिथा सौराय एनथाब सिथाव
माबा माबि लारु जायो नामा
मागो बैसागुआव?
लाबो खाजिफोर दंब्ला,-
- गैया ओँखामखौनो संङाखै दाबो,
खफि हानाय दं,
र' थाथ' बिदिब्ला
एवनि आं र'।
(हार्सिँङै लोँबाय लावांआ
सिरि सिरि बियो सानबाय-
आयै मागो गैला नोङो!
जौ गारै गारै दिनै बर'फ्रा
नोँखौबो गारहरसिगोन बर'फ्रा।
हनै बैसोर खृष्टान माखाया-
बिसोरथ' सैखालानो,
सोनाबारि बर'दिन,
जीसुनि जोनोम सान
रंजाबाय बिसोर सानब्रै सानबा
दा बर'नि सोलिबोनाय मागोखौ सिरि सिरि
ख्रेब ख्रेब रागायाव मेगन मोख्रेबबाय।
मोजां जादोँ दाबि!?
बर'नि 1905 मायथायाव उजिनाय
ब्रह्म घोरोमारि बर'फ्रा
दिनै जौखौ मुगैयो
बांसिना बर'निखा लेट्रा हारिमु मिथिसेयावबो मुगैया
आंबो मुगैया।
ब्रह्म घोरोम सिबियारि गेदेमाफ्रा मिथिगौ
बर'नि जौ थागौमानि जेब्लाबो
माब्लाबाबो जौगानाय नङा।
जेरैबादि बै समाव-
कालिचरण ब्रह्मआ जौ दाबखा दुमसु
फारि फारि बुख्रुब होदोँ
गावनि हारियाव उजिनाय देरनाय
गावनि आंगोखौ देरसिनाय
गाहाम जादोँ दाबि?
जौखौ बयबो गाज्रि बुङो
थेवबो मानो लोङो?
जौ लोँना बेमार आजार
जौ लोँना गारि मटर एक्षिदेन
गोबां गोबां थैलांबाय।
थैबावगोन होनना बुङो-
जायफोरा दुखु खालामो घोरोमनि थाखाय
बिदिब्ला जौ दाबखा दुमसु बुख्रुबनाय
लेट्रा घोरोमखौ नेवसिनाय
बै गुरुदेबहा दाय दंना गैया?
दिनै सोरबा सोरबा बुङो-
बाथौ घोरोमनि हेँथागिरि गुरुदेबा
मोनसे घोरोमखौ नेवसिनाय
नंखाय होनना गाख्रेबनाय गारजा बादि
बेहा दाय गैया नामा?
बेयो बुंबावदोँसोनो
मन्दिर सभा बायदियाव परिहितफ्रा बुंसोयो-
"दाउसा फारौ हाथारनानै इसोर सिबिनाया महाफाफ जायो।
दाउसा फारौ होयो,
थैया रानलाङो,
खर' मोदोम मानसियानो जायो,
बोर बिनानैबो मोना जायो।
निदान आफोदआवबो इसोरखौसो सिन्थियो।
जायहा जेसे मोदाय होयो
बिहा निदानासो जोबनो गैयासो जायो।"
नाथाय...
बाथौ घोरोमारिफ्रा फुजा होयो
बिसोरो दाउसा फारौ हाथारो, दासिमबो
दाउसा फारौ होनो हायाब्ला
इसोरानो बिसोरखौ लाङो होनना फोथायो।
नाथाय...
दाउसा फारौनि जिउ होनानै
मानसिनि जिउ रैखा खालामनाया
बेखि घोरोम दाबि?
मानसियाल' थांना थानांगौ बिदिब्ला
मानसिया मि जुनारनि देरसिन हिसाबै?
ब्रह्म घोरोमारिफ्रा सोरबा सोरबा बुङो-
जिब जुनार, मानसि मि
समान बयबो समान
गासिबो आंगो ब्रह्मनिनो फिसा।
सानसुमै गेदेमाफ्रा बुङो-
"नोँनि जिउआ जेरैबादि अनजाथाव
गुबुननि जिउआबो एसेबांनो अनजाथाव।")

सुबुंफोरा उजिदोँ एबा थैदोँ
जिबिफ्रा गाबदोँ एबा मोसादोँ
जोँनो आदार नांगौ जादोँ
जोँ गावनो थैनो ओँखारदोँ
नै अबं मादि मैया मैया
सोरजिबोल' गासैबो नोँनि।

फुंनि गु रिँगासो समावनो
आदा हासुंजोँ आंजोँ
मादै गालिस्रिनाव हाबहैदोँ जोँ।
थांखिया जाबाय लिरबिदां बोखांनाय।
बावैसो डाइन-गु साननि सिगांआव
मादै गालिस्रिनोबो एसे लेखा-फरा
रोँखागौलाय बेनोबो खन्थाइ नङाबा
संसार जानायनि सुंद' सल' दोँसे
लिरनो नारसिन थाबदोँ।
मादैया सर' गैफेर थारा
बेबादि खन्थाइ,रायथाय आरो सलफोर लिरना
लाइसि एबा बिसम्बिफोराव
फोसावनाय।
गोदोबा आदैजोँ रमान्टिक सोलिबा लाइजामखौ
खुनुरुखुमसो लिरसाब बायोमोननो आरो।
मादैया थाखो ब्रैखौ उथ्रिनाय।
बर'लेण्ड सोमावसारनाय समाव
फरायनायखौ नागारनो गोनां जादोँ।
बेखौनोबा सोरबा सोरबा दानि मेट्रिक फास जानायानो गादबनो हाया होनलायबावोसो।
उनाव रुवाथि थाबाय थाबाय
आदै गालरजोँ ग्रोब सालगुरि गामियाव
जुलि मोनफ्रां फैनायानोसै।
मादैया बैसागु बोथोराव मेथाइखौबो
खना नङा खनो।
रैसुमैथार गारांआ।
थाइजौ बिफांआव बाफैनाय खौऔआनबा गल' खोनासंनो
गोनां जाबावो।
थांनाय सालगुरि लाइमोन आफादनि ब्रैथि
खुंनाय रंजालि बैसागुनि साजायफबनाय
जौसांआवनोबा मेथाइ खन्नानै
सेजौ थाइनैसो बारा रां बान्थाबो मोन्नो
हालायदोँ मादैया।
आदा हासुंजोँ आंजोँ मादैनि सिलायाव
मोनहैब्ला मादैया हले
थिलेब-लेब थुलावनो माबा
हिसाब-खिथाब खालामगासिनो दंमोन।
आंनि सेन्देल गाबलायनाय
थाबायनायखौ थाल मोन्ना माब्लाबानो नायहरखादोँ।
सिला गाग्रोमोना बियो बुंबाय-
ए आदैमोन फैबाय।
(न' फारसे नायहरनानै) नै बिसन आय
सियार लाबो नोँदामोन फैदोँ।
माब्लाबानो बिसना सियारखौ लाना फैबाय।
जिराय आदामोन होन्ना ब्लद थांफिन गारबाय।
जिराय आदैमोन होन्ना मादैयाबो
रेबगनखौसो सोमावबाय थाबाय।
मादैखौ खुनुबेला बेबादि नुफेरामोन आं।
जेन'बा मादैया हिसाब-खिथाबनि
साख्रि मोनबायसै।
- हाब मानि हिसाब-खिथाब मादै होन्नानै
आं सोङो।
मादैयाबो मिनिसुलु बुंफिनो-
नोँसोर फैनानै आद्रासो जाबायहाय
आदैमोन।
बाथ्रायानो फैयाखिसै सान्नायाव।
- मानि हिसाब-खिथाब मादै? हासुंआ सोङो।
- ए दाखालि नोँसोर मेगाजिनाव होनो
होन्नायालाय माथो जाखो?
बेखौनो लिरनो सोलाबथारैखाय दिनै लिरनायानो आं।
दिनैबो बाथ्रायानो गोमाबावबायसो थारलानो।
हा' समाबो जाबायानो।
आंनि लिरबिदांखौ नोँसोर मोनलांनाय नंलिया।
- नङा मादै,
जोँ नोँनि लिरबिदांखौ लांथारगोन।
आंनो बुंबाय।
नोँनि लिरबिदांखौ लाइसियाव सोसनथारगोन।
- आयौ बोरै जाबायगोनसै!
जाया गारानो।
सानबाबो सानबाबो बाथ्रायानो फैया बेखायनो
डाइन सान मानि लिरनाय जायाखिसै।
समाबो जालाय लांबाय।
आं देग्लाय हानाय नंला आदैमोन।
फैगोन बोसोरनियाव हले हरथारगोन आं।
- ओहो मादै देग्लायनो हरथारनांगौ।
फैगोन बोसोरना आरो
फैगोन बोसोराव जालायगोन गोदान।
आं बुंबाय।
मादैया हले खैफोदाव गोग्लैनाय बायदि
जाथारबाय।
बियो मोखां खोमसि जानानै बुंबाय-
लेखा-फरा रोङाबाथाय बिदिनो आगैमोन।
लिरनो सानब्लाबो लिरनोनो हाया।
लिरनाय हुदा गैयाब्लाबो
आखायानो मेवा।
आंबो दहमैनो हाबा जानायनिफ्राय
दिनैसो रेबनो दैफिनदोँ।
बेबो नोँसोर फिसाफोरनि नारसिन नायावसो।
- दे मादै समाबो जाबाय नोङो दिनै
फुं खिनियाव जा लिरबाय
बेखौनो हरदो।
जोँ बेखौनो साफायथारगोन।
- आयौ!जाया गारा
बोरै जानोसै?
मिनि जानायसो जागोनहाय।
- मिनिया मादै, मानो मिनिनो?
मिनिग्राया गावनो रोङा बियो।
गोरोँफ्राथ' नोँखौ साबसिन लिरनो
थुलुंगासो होगोन।
हासुं आदाया मिनिस्लु बुंबाय।
- बोरो आं फरायनि होन्नानै हानहरदोँमोन आं।
मादैया लाजिना लाखुमा गारबायसो।
- दे फरायला मादै फरायला।
होन्ना आदा हासुंआ बुंब्लासो
आदानो बाबांसिन हरबाय।
- दे फिसाफोर,
जोँ रोङा रोङा नोँसोर मोजाङै
सोलोँबानो जाबाय।
आरो नोँसोर जा रोँबाय जोँनि उन्दै
गथ'फोरखौ फोरोँ।
नोँसोरनि मोजां खामानिया जाफुंथोँ फिसाफोर होन्नानै
मादैया उनाव सेजौ रांबो अनसुंथाइ हरबावदोँमोन लाइसिनि गिबि
जाफुंसारनायनि आसायै।
बैसागुआव रोजाबनाय मेथाइफ्रानो एसेबां
ओँथि गोनां जायो खन्थाइबाथ'....
बायदि बायदि सानो आं।
उनथाराव मादैनि लिरजोबै खन्थाइखौ फरायनो मोन्दोँमोन-

अनसुला गोसोनि रजे देहा थरसेनि
नोँनो आंनि इस्वोर, जिउ सायखं
आंनि अराय घियाना
नोँनि आथिँ नोजोरावनो
नोँनि अनगा आंहा लामा गैया
बेनो सुवामे आंनि थार गियाना।

फंबाय-बिनानावमोन आं दिनै मानसिनि गोसोआ
माबादि खाना बेखौ नोँसोरनो खिन्थानि।
ओरैबादि दं जाय मानसिया
बेसादनि सायाव मेगन खोख्लैयो
बियो गुबुन आरो जेबोखौनो नुआ।
नाथाय ओरैबादि मानसिबो जाय माखौबा नुदोँ
बियो बेसाद होन्नाय
जेखौनो सिनाया।
फंबाय-बिनानावमोन फंसे बाथ्राखौ नोँसोर
खोनाबाय नङा ने?
'फिसा सिमां नुनाया फाफ'
भारतनि रुंग' हादरगिरि आरो सासे
बेसेबा गिदिर बिगियानगिरि
आब्दुल खालामा बुंदोँमोन बाथ्राखौ।
जोँ गिदिर मिजिँ लानांगौ, फिसा नङा।
सिमां नुनांगौ- बेखौ दाफुंनांगौ।
मानोना नोँ जेसे हास्थायो
बिदि नोँ मोनद्रायनाय नङा।
अब्लाबो जोँहा गिदिर सिमां; बिनि मिजिँआ थायोब्ला
गिदिर सिमांआबो नाजानायनि बोलोआव गावनो गाव फैयो।
सरासनस्रा मानसिया गासैबो जिरादखौनो मेगनजोँ नुयो
नाथाय बिसोरो ओरैबादि खाना थायोदि-
सासे आबादारि, थेला बोग्रानि
फिसाफ्राबोदि सासे दाक्टार जानो हायो।
सासे हादरगिरि जानो हायो
बेखौ बेसोर गोसोजोँ
सान्नोनो हाया।
जाय गोसो गियानजोँ सान्नो हाया
बिसोरखौनो गोसो खाना होन्ना बुंनाय जादोँ।
जाय उन्दै गेदेर सिनायनाबो,
गोरिब- हावरिया, खैफोद-आफोद नुनानैबो मदद होआ
बैसोर बादि गोरोँखौनो
गोसो जाम्बा एबा गोसो खाना बुंनाय जायो।
फंबाय-बिनानावमोन जोँ गोसोखौ बेमा
सोँहोनो नाङा।
बयखौबो नायनो सोलोँ,
बयखौबो अनसाय मानसि महरै
मानसिबादि गेदेमा आखल गियान दाफुं।

बोथोर हमै हमै बिबार बारग्रा
मान्दार बिबारा बारबाय
फागुणनि गुसु आरो दुंब्रुद बिलिरनायजोँ
जोँनि गामिखौ बेसेबा समाय होबाय
मिलौहाब गारां लानानै दाउलुर दाउसिनफोरा
हानजा हानजा बिबाराव बिदै सोबफैबाय
जोबोद खुसि जिउनि मेथाइ रोजाब्बाय
मिथिँगानि गोरान गोरान बिफांनि बिलाया
दिनै ज्रय ज्रय सिरि गारबाय
गोदान महर लानानै बिलाइ खिलिदोँसै
फिसा फिसा दुब्लियाव बायदि गांसोफोर
गाम्बारि बिबारा बारबाय समायनायै
थाइजौआ गोसो खुसियै मावलिबाय
जेरैबो बेरे बेरेमा ब्रंब्रं बिरबोबाय
बैसागुआ फैयोब्ला बेसेबा खुसिजोँ
जोँनि गामिया सोमखोर महर लागोन
गोरबो बुंफबनाय जिउनि खुसिजोँ
जोँ बयबो बैसागु रंजागोन

दिनैसो नोँखौ लोगो मोनदोँ
नाथाय माब्लानिफ्रायनो
बेसेबा मोजां मोनदोँ
बेखौ आं बेखेवनो हालिया
.
सैनाय
सिमांनि बाथ्राखौ फोरमायना
दुखु होनो साना आं
सिमांआ सिमाङैनो थाथोँ
.
मोकथांनि बाथ्रासो
मोजां मोन्नाया
नोँखौ लोगो मोन्नाया
बेबादिनो मोकथांआव नागिरो
.
दिनै जोँ रादाय खानि
नोँनि थाखाय आं
आरो आंनि थाखाय नोँ
जोँ थांनानै थालायनि
.
सना बाथ्राया बेनो
जोँनि जिउ मोनसे
गोथार मोजां मोनलायनायनि
नोँबो फै आंबो थांगोन
.
आंनि दुखुयाव फै
नोँनि उखैनायाव आं थांगोन
जिउ मोनसे बेबादिनो
जोँ गोजोनै थागोन

1.माय जिगाब होन्ना बुंब्ला
फिथाइ गास्रि जानाय माय बिफांखौ बुजियो
2. माय जिगाबखौ जोँ गोदानै मोनो
गोजां बोथोर समहालागै
3. माय जिगाबखौ जोँ गोबां खामानियाव बाहायनो हागौ
मख'जायो थारुन गायनाय
हायजेँ गायनाय
आलु गायनाय आरो गोबां खामानियाव
5. माय जिगाबखौ जोँ
मायहुं हुंना दोन्नानै
गोबां समसिम मोसौनि थाखाय आदार हिसाबै लाखिनो हागौ
6. गोजां बोथोराव जोँ जिगाबाव दुंबुर उन्दुनो हागौ
7. गोदोनि समाव जिगाबजोँ बुन्था सानानै
थाम्फै अरनायनिफ्राय रैखा मोननो हागौमोन।

गिदिर गोलाव लोदो लोदो गुफुं।
नायनो समायना खोमा फायला ला
गारां गिदिर सोँब्ला गामि गंसे गोमफबलायथारो।
नै बोसोर सिगां थेफा बिजामादैया भुटाननिफ्राय लाना फैदोँमोन।
दमासि मागोनि समाव बोसोर गोदान (इंराजि)नि मुंङै
ना मा मानि जाखोथाय-
गिप बायदि होलांनायानोसै।
सिगांआव थेफानि फिसालाया सैमाखौ खाना दोनोमोन।
सोरबाफोर खावना लांनो हागौ होननानै।
दा गिदिर जानायखाय खालिया।
सैमानि मुंआ थनि
आगोलावनो थेफानि बिजामादैया मुंखौ दोनखा लांदोँ।
दा गामियाव बे मुंआनो मुंदांखा
गुबुन आरो नामा गैलिया।
थेफानि बिसि बिखंस्रि।
बिखंस्रिनि खिबु खिबु जेब्लाबो सैमायाबो।
फिसालाया सहराव फरायहैबाय।
दा बुंनो थाङोब्ला थेफाहा न'आव बिसि फिसाय सानैल'सो जायो।
एखमबा बाजाराव एबा हाथायाव थांब्ला
रावबो गैया जायो।
बे समाव सैमाया बिगोमाजोँ थांफानो गाबलायथारो।
नाथाय मा जानो?
हाथायाव थांफाब्ला लामायाव
दैखरगुरिनि सेँग्राफोरखौ बेदर जानो लाखिगोनसो सानो।
बेखायनो लांफाया।
अन्थाइ बन्थफोरजोँ खुइख्रुबबायनानै न' फारसे होहरफिनो।
सैमाया माब्लाबाबो हार्सिँङै थानो बायो।
थेफामोननि न'सुंसे सिँगिनि मोननि न'आ।
बेयावनो थांना थाहैयो सैमा थनियाबो।
लाजिया फांजिया बेयावनो ओँखामबो जायो
मेथाइबो जायो।
दा बेसेबा दानै दान सानै सान बारलांनायाव
थनिनि न'आ गंनै जाबाय।
बिखंस्रिनावबो थायो सिँगिनि मोननियावबो थायो।
थारमाने बेनाव जालाय बेनाव जालाय।
हाथायनिफ्राय बिगोमाया फैयोब्ला
लानजाय फायखन फायखन
मेथाइ बिनोबो लाजिथारा थनिया।
सिबाय मोनजायो गंनै न'आवनो।
बेखायनो लोदो लोदो जालायथारबाय।
दिनै बेसेबा स्रां अखाफोरनि सोरांजोँ।
डाइन रिँगा जाबाय
मोनाबिलिनि जानाय सम।
ओँखामखौ बिखंस्रिमोनहानिया सिगांसिन जायो।
उन्दुनावबो सिगांसिन उन्दुयो।
सिँगिनि मोनहानिया बांसिन सानफ्रोमबो बेदर जाग्राखाय
उनसिन उन्दुग्रा जाबाय।
बिखंस्रिया ओँखाम जाखांनानै दर्खँआव जमबाय थानाय
थनिनोबो ओँखाम होबाय।
सिबायाबो बाबांसिन जाबाय।
गोथाव नङा नामाथाय सोलाबायल'।
एसेयावनो सिँगिनिया गाबज्रिहरबाय-
थनि-थनि-थनि।
खोनानाय लोगो लोगो थनियाबो
ब्लद खारगार लांबाय।
ओरै बिखंस्रिया होनाय ओँखाम दालि ओँख्रि
लगायनाया लुन्दुन थालांबाय।
दिउ दिउ रागा जोँगारबाय बिखंस्रिया
सिँगिनिनि सायाव।
बेदर हारा, अमानि खोमोन ब्रेव ब्रेव गोनां बिगुर,
जानो हायै मेजेम थनिनो ज्राव गारना होबाय सिँगिनिया।
थनियाबो बेखौनो जानानै स्लिम खालामबाय।
उदै गेन्द्रा द्रा जालायबा
सिलायावनो दान्दिसे जिरायना थाबाय।
जाखां लोँखां सिँगिनियाबो
खामसालियाव थनिनि थाखाय बष्टा बना होबाय।
दा उन्दुथोँसै होननानै।
गावस्रा दर फांथेना दो उन्दुलांबाय।
थनियाबो ब्लदसो बिगोमानि फारसे थांबाय।

बिब'जोँ नंनाय नङैनि
नांलायग्राखा फिँखिया बुंफिनो
- आंनो ओँखामखौनो एसेल' दोनदोँ।
बेबादियाव थाब उखैया जायो?
अनिमाया जेबो बुङाखिसै।
बियो माब्लाबाबो बिनानावजोँ
देरहा फेरखाया।
दे संदो होननानैल' गावहा टि.भि. सो मिनिग्लाबलायनाय नायबाय।
बिमा बिफाया मोनाबिलि 8 रिँगायाव सौफैबा
फिँखिया माब्लाबानो ना बेदर नेया लासेनो
दालि जहलजोँनो जानानै
आं दाहाय जाला होननानै
खथायाव हाबहैबाय।
ना बेदर संनाया अनिमानि बाहागो
गोग्लैबाय।
बिमा बिफाया सानैजोँ बाथ'रि नायबाय।
ओजोँ फिँखि आरो सिकेन सानैजोँ
गाव गाबागाव खथायाव थानानैनो
दुमथेनाय सिमनायाव थालायनानै
रायज्लायबाय थाबाय।
मादि मादि रायज्लायदोँ मा आयदाखौ लानानै
आं मिथिया।
नाथाय आं सिरि सिरि सिकेननि खथायाव
लासै हाबहैबा खोनाबाय
फिँखिनि गोदै रावखौ
- नोँ आंखौ थारैनो गावनि सानमारोना?
एसेयावनो आं सिकेनखौ जाम्बा बादि
इन्जुराव खोमा होथाबनायखौ
नुनानै बुंबाय
- मा खालामदोँ नोँलाय?
- नै दहायनि Homework खौ बेबादि लिर
बेबादि लिर होननानै
खिन्थाहरनायानलाय आं।
बियो आंखौ सोँफिनो
- मा खौरां?
- नोँनाव बुमसु दंमोन दा?
नांगौमोन आंनो।
- अ' दंङ लां नो होननानै
आंनो गावनो गथायो।
आंबो लानानै थंब्लेद बारनबोयो।
अखानायै फुंआव सिकेननि मबाइल सार्जारखौ
हैफिनब्ला बिनि खथायाव
लेखा फरायग्रा टेबिलाव बेदर हारा
ज्राव नुदोँमोन आं मोन्थामसो।
मेगन आलौना सानफ्लांदोँमोनबो आं।
साला बेखौ माहाजोना गोगोम अनथारो।
बेदर होफैलायदोँ।
आंनोबा?
अलसियानोसो- बायदि बायदि साननानै
ब्लद ओँखारफिनो।
आरोबा दानसेनि उनावनो PU आनजादआ जोबलांबाय।
आंबो नआव फैनो थि खालामबाय
बिथां सिकेन बाबुआबो।
अखानायै फैगोन नआव।
मोनायाव नायै बेदरै
जाहोस्राबाय आंखौ।
थांखिया सिकेन आरो आं सानैखौनोमोन।
नाथाय सिकेना लोगोफोर लेँहरदोँ फार्टि दंनो होननानै थांदोँ।
हाजासे हार्सिँङै गेन्द्रा-द्रा जालायबाय आं।
माबा गोजा बियार बायदि
बथलखौसो रायखांदोँमोन माहाजोन
माग्लां आदैया।
नाथाय आंहा खहाबनाय गैयालै आदै होननायावसो जादोँ।
अखानायै फुंआव न  फारसे जोँ
सिकेन आरो आंजोँ फैनो
आगान होब्ला सिरि सिरि
फिँखिया गाबखोमादोँमोन।
बिमा बिफाया गाबनायखौ नुदोँ।
बिनि गोगो मोदै गसरनायखौबो
मेगनावनो नुथारदोँ।
नाथाय मानि मोदै बियोदि बिजिरनो हायाखै।

लजिँआव दानथाम लोगो मोनलायनाय
सिकेन मोसाहारिया
दिनै आंनो खौरां हरदोँ।
आंनि हाबायाव फैथार होननानै।
बेबादि उन्दै बैसोआव
मा हाबानि खौरांब्रा बाबु?
होननानै खैखायै बुंहरो आंबो।
थगायाखैलै नोँथां फैथार।
फैगोन बरदिननि सिगां सिगां
जाथारगोन हाबाया।
नंगौना नङा खैखायै सोँबाय थानायाव बियो
नंगौ नंगौ नंगौ बुंथारबाय।
- हा बहानिथो लाबोखो?
रं नाम्बार नामा?
- नङालै रं नाम्बार नङा।थिगानो।
- बहानि जाखो खिन्थाया मानो?
- लजिँआव लोगो मोननाय नोँथां।
- अ'... फिँकिया!??
लामा थारैनो सानबोयो आं।
सेथि थाखोनि जायगायाव नङा।
रोजा रोजा फरायसानि अनजिमायाव मुंखौनो
मोनाखै सिकेन बाबुआ।
-----
सिकेन बाबुआ ओरैनो बिसिनायाव
गोलांनानै दंमोन।
खोमायाव बेन्दोँ लानाया बिनि सरखा।
बांसिन इंराजि पप मेथाइखौनो खोनासङो।
ओँखाम जानायनि समबो जाबाय।
बियो दाबो ओँखाम सङाखै मेगंबो हायाखै।
ओरैनोबाबो नआव खेबसेबो ओँखाम संफेर
बायखायाखैमोन।
दिनै लजिँ लाफैनानै दानसे बारलांबाय।
समाव संना जायो समाव जाया
बानायानो बेखौ ओँखाम उखैनो होआ?
नाथाय बियो दामानि हामख्रेँ जालायलांबाय।
लेखाखौबो बांद्राय फराया।
उन्दुनाय आरो बेरायनायनि बांसिन समा रुटिन जाबाय।
सम सम आं संनायखौ
थाव-बा-दाथाव जासाब बायो।
बांसिन गोथावखौनो होनफेर बाया।
ना बेदर ओंख्रिब्ला बांद्राय जायो।
नाथाय खुगा लावहाब लायनाय
सिबाय आलौ जानोबो थोयो।
सिकेन बाबु आरो आं सानैजोँ
सासे माहाजोन्नावनो बोरैबा
लोगो मोनफ्लां फैदोँ।
सिगाङाव जोँ माब्लाबाबो सिनायलायफेराखैमो।
दिनै दानसे बारलांनायनि उनावसो मोजाङै
सोँलाय- फिनलाय मिथिलायनाय जाबाय।
सिकेन बाबुआ आमगुनि।
गावलाय होन्दोँ बिमा- बिफानि सासेल'
नायल'- जाल' फिसा हौवा।
गावनि आरो उनबो गैला
सिगांबो गैया।
मेट्रिक आनजादखौ कैला मैला सेन्ट पिटार
इंराजि मेडियामनिफ्राय
सेथि थाखोआव उथ्रिदोँमोन।
बिथांआ आमगुरि गोजौसिन गेजेरारि
फरायसालियावनो फरायनायमोन।
बिथांआनि सोँनायाव आंबो थगायनानै खिन्थादोँमोन ओरै होननानै-
मेट्रिक आनजादखौ आंबो 359 नंबराव उट्रिदोँमोन।
बिमानि रावआव लेर्टा लानानै।
नंगौ नङा जोँ सानैबो फोथायलायदोँ।
बियो आमगुरियाव फरायनाय आरो
आं बिजनी कलेजआव।
नै बोसोर जानोसैआनो आं माग्लां
माहाजोननि साथाय बेरा नआव लजिँ लानाया।
एसे माहाजोनबावबा गोसोआ RCC नआवनो
थानो थारमोन।
सिकेन बाबुआबो लजिँ नखौनो मोनथाराखिसै
नागिरबाबो होननानै आं थानाय
साथाय बेरानि नआवनो ग्रोब।
PU आनजादखौ सेथि थाखोआवनो उट्रिगोन।
आंबो सिरि सिरि सेथिखौ
हाथाराबाबो नैथिखौ नाजाथारदोँ।
सिकेन बाबुआ माहाजोननि फिसाजोफोर उन्दुग्रा खथानि दुमथेनाय
फारसेजोँ नखौ मोन्दोँ।
नआ बारा मोजां नंलामोन
अब्लाबो थानांबाय।
आंहा सिला बारनानै सोनाब फारसेजोँ
सिगांनिफ्रायनो दं।
सिकेन बाबुआ अलसियानि थाखायनो
गावनि उदैखौनो गावनो
सुथेना लानानै फिसिनायाव
गोलांना दाबो दं।
बेलासि 3 रिँगायानो जानोसै।
माहाजोननि फिसाजो उन्दैसिन फिँखिया
फरायसालिनिफ्राय गना फैबाय।
लासै सिकेन बाबुखौ दंना गैया
दरजोँ नायखंख्रे हरो।
गावनि खथायाव हाबा लासे सिकेननि खथायाव हाबना सोङो
- मा ओंख्रि जाखो?
- जायाखै
- मानो? उखैयाखै?
- बानानैनो संजायाखिसै।
गोलाव हांमा सुरनानै
फिँखिया रैसुमै गारांजोँ बुङो
गोरबोनि बाथ्रा।
- लोगोफ्रा लाखियाबा आं दहायनो फैदोँमोन।
अख्रा लोगोफोरजोँ आंबो
थाबोनांबाय।
आं थाबै फैयोमोनब्ला नोँ
उखैजानाय नङामोन।
र' थाथ' होननानैनो ब्लद ओँखार लांफिनबाय फिँखिया।
सिकेन बाबुआ गल' नायहरबाय थाबाय
खोमानि बेन्दोँखौ सोफिन्ना।
बियो माबा साननो लामा नागिरदोँमोन
समावनो फिँखिया ओँखाम लानानै
हाबफैबाय।
लाजि गुसु जारौ मिनिसुलु मोखांङै
बियो बुङो
- आं नोँनो ओँखाम लाबोबाय जादो।
- थाइम बारा जानायखाय आं
उखैयाखिसैमोन।
मानो ओँखाम लाना फैलायखो?
- जादो नाबो दंखायो नै।मेगननि फावजोँ।
- नोँलाय माखौ जाखो?
- आंनि बाहागोखौ आं गारबो खादोँ।
- थगायाखैथ'?
- नोँखौलाय आं मानो थगायनो?
दे जादो।होननानै गावहा
दलत बिसिना सायावनो जिरायबाय।
अलसिया सिकेन बाबुआ आखाय सुनानै
गोथाव जागारबाय।
मालाय संनाय मालाय।
बेनि सायाव आरो नाबो दंबावोसो।
फिँखिया जोबोद गोसो होनानै नायबाय
सिकेन बाबुनि ओँखाम जानायखौ।
फुरागासे ना फ्राय एवनायखौ
सोलास्लिब लायनाय जानायखौबो मिनिनोसो
ओँखारगु लायबाय।
गावनि फिसायखौ रानथाब फोनथाब गाव थानानैबाबो
सिबिनाया हिनजाव हारिनि घोरोम।
फिसायनि दान दोन लायालासे गोथार
सिबिनायजोँ अननाय मोजां मोननाय
आजावनायानोथ' हिनजाव माहारिनि जोनोम।
खौखाबखौ आखायजोँ सुंथानानै
बायदि सिमां मोकथां सान्दोँ फिँखिया।
एसे समावनो गेन्द्राद्रा
जालायनाय जाखांनानै सिखारो सिकेन बाबुआ।
उथै बिलिरनानै आ'....
होननानै बुंब्लासो थाल मोनलायबाय फिँखियाबो।
लोगो लोगो दानो जाखांबायबो होननानै थोरसि खुरैखौ लानानै
गोख्रै ओँखार लांबाय।
माबार माबार थोरसि खुरैफोरखौ सुस्रांनानै
सिकेननि खथायाव थ्रोब
हाबफैबावबाय फिँखिया।
बाथ्राखौ सानैजोँ जुरिनो थियारिल' जाहांदोँमोन
लाजिसुलु मिनिसुलु मोखांजोँ मोखां नायदेरलायनानै।
एसेयावनो आंबो थ्रोब हाबदेरो।
लोगो लोगो सिकेननि खाथाखौ
लानानै ब्लद ओँखार लांफिनो फिँखिया।
फिँखिया ओँखार लांथारनायनि उनावसो
सिकेन बाबुनाव सोँबाय आं
- मानो फैयामोन बेलाय?
- Homework हरदोँनो माष्टारा।
बेखौनो आंखौ गाव हायिनि
आंनो होफैनायानो।
बाथ्राखौ आं सिकेन बुंनायबादि सानाखै।
मानोना सिकेननि खाथाखौसो टिबिलनिफ्राय लांनाय
नुथारदोँ आं फिँखिखौ।
दसे उनावनो आंबो थगायसुला
सिकेननि नखिया मबाइल सार्जारखौ लाना फैयो।
आंना गाज्रि जादोँमोन बोरैबा।
मबाइल बेटारि सार्ज गैला
आंनि बिखा बर'नि फ्लिम
नायना गोजा जालांबाय।
बेलासियाव 4.30 रिँगायावनो ओँखाम संनो
नागिरबाय फिँखिया।
संफेरा संफेरा।
मानो हांगादावरा जादोँ मिथिया।
बिब' अनिमाया बुंबाय नुनानै
- दिनै मा जादोँ?
सैमा खिफिदेरदोँ नामा?
ओरैनोबा माथो 7-8
जालायबाबो नांगौबा जायाबो होनलाय लाङो।

मिथिगौ बेसे उन्दै आं
आंनि आथिँआ दाबो हाब्रुआव गब्रयो,
आंनि आखाया हाद्रियाव थाबथायो,
खोमसिया साग्लोबनाय मेगनाव
बुबथिँ जादोँ हाद्रिनि बाराव,
जेथो गोनां लाइमोन समा
सानबायो आं आगोर गोमा गोमा,
नारसिनथायनि लिरथाइया आंनि गोरोन्थि?
आंनि खाना बिजिरथि?
आं दाबो गिदिँफिन्नो हाया उल्टायै
आंनि गंगार गोसोआ फायखनो,
आंनि गुसु आखाया हमथुमनो हायाखै
खोल खोल जोँनाय सोरांनि थखनखौ,
नाथाय नागिरदोँ एरायलांनो-
मिथिगौ बेसे उन्दै आं।
आंनि आथिँआ मिजौ हाबनाय
गिदोँ आं नै इंसिनि गोथौ हाखरखौ,
आं दिनै गोरोन्थियै उन्दुआखै ने?
आरो थैनाय जागोन बेजोँनो?
आं गिदिँफिन्नो हायो-
आंनि गुसु आखायजोँ हमनानै थखन
लासै लासै सोरां लामाजोँ
जुदि आं अख्रां फारसे नायहरो।

महर-मुस्रि आंदि नुयो नोँनि
इनायनो गोमोथाव जोबोद मुहिनां
थारैनो एखमबा जिउ गोनांबादि
इनायजों सोबखजानाय जिउ गैयैबादि एखमबा
गासै नोंनि बिखायावनो मिथिंगा
आंनि थैनाय आरो थांनानै थानो लुबैनाय

अनबाय अनबायथागोन
अनसुलि बिमा मिथिँगा आंनि
देलाइस्रि हायनास्रि।
गोबादोँ नोँ आंखौ
गोबागोन नोँ गोबाय थागोन
नोँनि बिखायाव आंबो एब्रेगोन।
बिमा अनसुलि आंनि
नोँ गाबो
नाथाय नोँबो रंजायो,
फिसा आं नोँनि
आं रंजायो
नाथाय आंबो गाबो।
एसेबां अनबाय नोँ आंखौ
थेवबो एसेबां आंदि अख्रा
एसेबां आंदि बुजिया,
दिनै गाबो सानबा
नोँनि अननायनि ओँथि
नोँनि महर बिजिरस' हायैआव
नोँनि गोसोखौबो आं मिथिगौ
आंनि गोसोखौबो नोँ मिथिगौ
नाथाय बेसेबांदि फाराग
बिमा नोँनि आंनि।
आं मिथिगौ आं बुजिया
आं सिनायगौ आं सिबिया
बेसे अख्रा आं दाबो-
नोँनो होखार आंनि आखुखौ
खोमसि गोसो गोजाम आखलखौ।
नै मिथिँगा बिमा आंनि
नै आयै अनसुलि आंनि
खुलुमगोन नोँखौ दिनै
अनसुलि होनना जिउ गोरबो।