I.
गोदै बिमा नोँनि रावआ
रिङो गिदिँ गिदिँ खोमायाव
आं रंजायो आयै
आं रंजायो मिनिस्लुयो।
II.
आयै आं गाबनो ओँखारो
नोँनि खुसि नुनानै
मानोना आंदि मेँग्लियो
नोँनि अननाय बेसे सान्नानै।
III.
मा होननानै बावहरगोन आयै
मोदै बोहैयो नोँनि अननायाव
बेसेबांदि हुरा हुरा गोसोखाङो
आयै नोँ थैया गोरबोआव।
IV.
नोँ फेदेरबाय आयै फिसाखौ
मानबायै मानबायै
थाबायै थाबायै
आं गाखोबाय मिजिँआव।
V.
आं गाबो आयै दिनैबो
नोँनि मिजिँआव रंजानाय सुखिखौ
आयै मादि अननाय नोँनि!
आं फिसियो उजियाव।
VI.
गोसोआव रंजानाय आरो
आयै मादि नोँनि फिसाखौ
जिउ जोनोम मोनसेनि अननाय
बावनाय नङा आंलाय गोरबोजोँ।
VII.
आथिँ जोकथोँ बिखुंआव
मिनि मिनि मोसानाय
आयै नोँ बावनो हाया फिसाखौ
मा दं आं नोँनि अनगायै?
आयै नोँ गोजोनै थागोन।
VIII.
जिरि जिरि बोहैनाय मोदैया
दिनै लिरो खन्थाइखौ
आयै मुंजोँ नोँनि लेखा बिलाइयाव
मादि अननाय आयै नोँहा
जिउ जोनोम सानसे।
IX.
नोँ आंनि थसे लेम्प
मिनिस्लु फुथुयो गोजोन समाव
आयै नोँ सोरां आंनि।
X.
आं नोँखौ नुदोँ आयै
आं मिनिस्लुदोँ मोखांआव।
नोँनि आखायाव दिन्दौनाय
आं होमब्ला उन्दैमोन।
XI.
आं गाबदोँमोन अब्ला
हायाव आखाय सुंनानै।
आं नोँखौ नागिरदोँमोन
अब्ला नोँ बामखांफैदोँ।
XII.
साना ओँखारबायमोन आयै
खोमसिया खारलांबायमोन।
आंनि मेगनाव मैखि खानाय
बिलिरो आयै नोँ दुंब्रुद दै।
XIII.
नोँखौ साबायखर होयो आयै
हायना लाबोबाय मिथिँगा नोँ
आं गोग्गा आयै नायहरै-
आं गाबज्रि हरो आयै होन्ना।
XIV.
नोँ आंखौ मोजां मोनो आयै
नोँ आंखौ बोजबना लायो,
आं मिथिगौ नोँ फोरोँङो रायनो
नोँ फोरोँङो नायनो लामाखौ।
XV.
सोर आंखौ नागिरदोँ?
सोर आंखौ खुदुमदोँ?
रावबो नङा सिगां
नोँल' आयै, नोँ आंनि
जेब्ला आं उन्दै गथ'मोन।
XVI.
आं खोनादोँ आयै, आं
नोँदि आंखौ मानो गाबज्रिदोँ,
नोँनि गोदै गारांखौ
बुजिदोँ आं गेलेनाय समावबो।
XVII.
आंखौ बिखुंआव बानानै
थांनो होआखै अखायाव
आयै अनसुलि नोँ
आं मिथिगौ, आं मिथिगौ
बेसे सांग्रां नोँ लामायाव।
XVIII.
जेब्लाबो आंजोँनो लोगोसे
जोँनि बोथोरा गुस्लायलांदोँ,
नायहरो अखाफोर हार्थखि
आयै नोँ आंनो सल' खिन्था खिन्था।
XIX.
मेगननि मोदै हुगारनानै
मिनिस्लु मोखांआ बिबार बारो
आं खुसियै रंजायो आयै
बाज्ल' खाङो नोँनि बिखायाव।
**.
दाउखा बिदै जोमैनि खोमसियाव
फ्लाम अखा मोफ्लामनाय
एरसोदोँमोन आयै आं
ग्रुम खोरोमनाय अखा समाव
अनसुलि आयै गोबादोँमोन बिखायाव।
XXI.
समायना जायख्लंनि गाबखौ
बिजिरख'नो हायै नायहरो आं
आसि थुहाबना सोमो नाङो
आयै नोँ आंनो फोरमायो
दोँसे नोङो सल' खिन्थायो।
XXII.
मोदै रय रय बोहैबोयो
हब्रा हब्रा गाबख्रावो
आयै नोँनो आयै अनसुलि
नोँ आंखौ बामखांना गोबायो।
XXIII.
नोँनि मेगना सान आयै
नोँनि गोसोआ अखाफोर
दै, बार, मिथिँगा अख्रां
नोँ आंनि जिउ सोलेर।
XXIV.
मोदै बोहैयो अख्रांनि
आं सोङो अब्ला
आयै नोँनि गाबनाय मानि?
XXV.
आं दिनै सानो अराय
साबसिन गैया अनसुलि नोँनि,
जायखौ नोँ होदोँ आंनो
राव, फाव गोसो आरो
जिउ सोलेर मेगन।
XXVI.
नोँनि मिनिनायखौ मोजां मोनो
मानोना आंहा गोसोआव दं
नोँनि रंजानाया गोजोन होयो
मानोना आं नुदोँ बेखौ
आयै बहा बावनो बोरै?
अनसुलि जिउ नोँनि।
XXVII.
आखायाव हमनानै थाबायनो फोरोँनाय
नुदोँ मिनिस्लु सायखंखौबो,
फिसा आं नोँनि अनजालु
गाबनाय मिनिनाय लोगोसे।
XXVIII.
बोसोर बोसोर थांबाय
दैज्लां- मेसेँ माघ फागुन
बोथोरा गोबां रुंगलांबाय
आं मोन्दोँ अब्लाबो गोरबो
नोँनि रंजानाय- मिनिनाय
गोसोआव दं आयै आंहा।
XXIX.
आं दिनै गोसो खांदोँ-
आं जेब्ला नायहरो अखोरां
सिलानि दैस्लुंआव गोमोनानै
नोँ खिन्थायो बिलिर बिलिर सल'बाथा।
***.
आयै, नोँ जोबोद समायना आयै
जोबोद अनसुलि,
नंगौ नोँ बोलोगोरा
आं नुबाय आंखौ दबथायबाय।
XXXI.
जेब्लाबो आंखौ सान्नो होयो
नोँ अनसुलि, जेब्ला आं दुष्ट,
नोँ आंखौ दैबायो
जेब्ला थाबायनो साजायो।
XXXII.
नोँ आंखौ गोबा फैयो
जेब्लानो आं लेँहरो,
नोँ आंखौ साबसिन अनो
जायखौ आं मिथिगौ सान्नानै।
XXXIII.
आं नोँखौ साबायखर होयो
जेब्ला आंनो नोँखौ खुलुमो,
नोँनो सासेल' आयै गोहोनि
अनसुलि जायखौ सायख'दोँ।
XXXIV.
बहा मोना नोँ आयै
जेब्लाबो अन्नो गावनि फिसाखौ?
बेसेबा गोहो गोसोआव
गावनि फिसाखौ फोरोँनो।
XXXV.
जायखौ आं नाजादोँ
बेखौनो सान्दोँ नोँ आयै
जोँथि माथि हार्थखि रुजुननो,
नोँ आंनि फोरोँगिरि
नोँनो आंनि जोथोनगिरि नार्स।
XXXVI.
दैबायगिरि सोरां बाथि आयै
आं दिनै लाइमोननि लामायाव,
आं मिथिगौ आयै
रावबो गैलिया गोहोनि नोँनि अनगा।
XXXVII.
जाय जेब्लाबो नायहरो
जाय आंखौ रैखा होयो
जाय जेब्लाबो लोगोसे
नोँ आयै आंनि लोगोथार।
XXXVIII.
नोँ आंखौ फोरोँङो आयै
बबे सैथो बबे गोरोन्थि
सायखयो मोजां गाज्रि आं
नोँनि फोरोँनाय बेनिफ्रायनो।
XXXIX.
आं लोमजायो आं बोराबो
नोँ आंखौ मदद खालामो मोजांङै,
नोँहा आयेन दं-
बेनिफ्रायनो आं लामायाव।
XL.
नोँ जेब्लाबो जेरैबो
दैबायो आंखौ सोरां जिउआव
आंनि बिखायाव दा आबुं आयै
नोँखौ अराय मोजां मोन्नाय।
XLI.
आंनि आयै नोँनो
आंनि लोगो, आंनि फोरोँगिरि
आंनि अबं आरो अराय
अनसायजाथाव मिथिँगा मुलुग।
XLII.
नागिरबायो आयै नोँनि रंजानायखौ
जेब्ला आं सिमां नुयो मोजां,
नंगौ आयै सैथो मोकथांआ।
XLIII.
नोँ आंखौ मदद होगोन मिथिँगा
जोबलांजासे आंनि सोलेरा,
आरो समायना जिउ बिरग' जासे।
नांगौ मदद साननि उनाव सान।
XLIV.
आयै नोँनि अनसायनाय
माजोँ रुजुनो हागौ आंङो?
गैया आयै रुजुथाव नोँनि-
बेसे समायना मुलुग मिथिँगा
होयो आरो लायो बोथोरादि।
XLV.
नोँनि अन्नाय बिलिरनाय बेनो
मोनसे मिजिँ आरो सान्दांथि,
उन्दै समनि थाबायनाय
गोहो होनाय सांग्रांथि।
XLVI.
दिनै नोँ मिनिदोँ,
आयै नोँ उन्दुलांदोँ।
नोँ मा सिमां नुदोँ आयै?
नोँनि मोदैया मानि साथि?
मोजां मोन्नायनि आयै-
नै सना आंनि?
XLVII.
बेसे खुसि, बेसे मिजिँ
बेसे सिमां, बेसे आसा
आयै नोँनि आंनि मोकथां
आं सानो आं रनसायो।

बयबो रंजानायनि गेजेराव
आं रंजागोन---
दुखुखौ दोनगोन आं
नुयै बबेबा आन्दो खनायाव
.
संसार मानसिनि गेजेराव
बिखासे बिखा अननाय लानानै
अननायखौ होगोन आं---
थांना थानायनि रायजोआव
.
जुब जुब अखा फैथोँ
बै समा फैयोब्ला
रंजासुला मिथिँगानि रायजोआव
बयबो रंजानाय जायोब्ला
.
जिउनि बारग्लांनाय रैरुब
मुलुगनि रंगिना बिबार बारियाव
देलाइनाय जाथोँ मिथिँगानि
गोथां बाथ'गां दखनाजोँ
.
गोजोँ मिनिनाय निजोरानि
अखोरांसे गुवार अननाय
जाथोँ खुदुमनाय सिदोब सिदोब
गेवलांनाय गोदान बोसोर
.
समायना सिखिरिनि बिरबायनाय
जायोब्ला मोदोमनाय बिबारनि
हालि हालि बारग्लांनाय बिनि---
.
मेथाइ रोजाबथोँ दाउसिन
बिफां-लाइफांनि मोसानाय
बेजों गोजोन बारा थाबायबोथोँ
औवा बिजौआ सिफुं दामनानै
.
दैमा-दैसा बोहैनायजोँ
दाउबोथोँ हालि हालि ना
बेजोँ फैथोँ गोदान बोसोर---
बिफां-बेन्दोँनि रोदोमनायजोँ

बिब'जोँ नंनाय नङैनि
नांलायग्राखा फिँखिया बुंफिनो
- आंनो ओँखामखौनो एसेल' दोनदोँ।
बेबादियाव थाब उखैया जायो?
अनिमाया जेबो बुङाखिसै।
बियो माब्लाबाबो बिनानावजोँ
देरहा फेरखाया।
दे संदो होननानैल' गावहा टि.भि. सो मिनिग्लाबलायनाय नायबाय।
बिमा बिफाया मोनाबिलि 8 रिँगायाव सौफैबा
फिँखिया माब्लाबानो ना बेदर नेया लासेनो
दालि जहलजोँनो जानानै
आं दाहाय जाला होननानै
खथायाव हाबहैबाय।
ना बेदर संनाया अनिमानि बाहागो
गोग्लैबाय।
बिमा बिफाया सानैजोँ बाथ'रि नायबाय।
ओजोँ फिँखि आरो सिकेन सानैजोँ
गाव गाबागाव खथायाव थानानैनो
दुमथेनाय सिमनायाव थालायनानै
रायज्लायबाय थाबाय।
मादि मादि रायज्लायदोँ मा आयदाखौ लानानै
आं मिथिया।
नाथाय आं सिरि सिरि सिकेननि खथायाव
लासै हाबहैबा खोनाबाय
फिँखिनि गोदै रावखौ
- नोँ आंखौ थारैनो गावनि सानमारोना?
एसेयावनो आं सिकेनखौ जाम्बा बादि
इन्जुराव खोमा होथाबनायखौ
नुनानै बुंबाय
- मा खालामदोँ नोँलाय?
- नै दहायनि Homework खौ बेबादि लिर
बेबादि लिर होननानै
खिन्थाहरनायानलाय आं।
बियो आंखौ सोँफिनो
- मा खौरां?
- नोँनाव बुमसु दंमोन दा?
नांगौमोन आंनो।
- अ' दंङ लां नो होननानै
आंनो गावनो गथायो।
आंबो लानानै थंब्लेद बारनबोयो।
अखानायै फुंआव सिकेननि मबाइल सार्जारखौ
हैफिनब्ला बिनि खथायाव
लेखा फरायग्रा टेबिलाव बेदर हारा
ज्राव नुदोँमोन आं मोन्थामसो।
मेगन आलौना सानफ्लांदोँमोनबो आं।
साला बेखौ माहाजोना गोगोम अनथारो।
बेदर होफैलायदोँ।
आंनोबा?
अलसियानोसो- बायदि बायदि साननानै
ब्लद ओँखारफिनो।
आरोबा दानसेनि उनावनो PU आनजादआ जोबलांबाय।
आंबो नआव फैनो थि खालामबाय
बिथां सिकेन बाबुआबो।
अखानायै फैगोन नआव।
मोनायाव नायै बेदरै
जाहोस्राबाय आंखौ।
थांखिया सिकेन आरो आं सानैखौनोमोन।
नाथाय सिकेना लोगोफोर लेँहरदोँ फार्टि दंनो होननानै थांदोँ।
हाजासे हार्सिँङै गेन्द्रा-द्रा जालायबाय आं।
माबा गोजा बियार बायदि
बथलखौसो रायखांदोँमोन माहाजोन
माग्लां आदैया।
नाथाय आंहा खहाबनाय गैयालै आदै होननायावसो जादोँ।
अखानायै फुंआव न  फारसे जोँ
सिकेन आरो आंजोँ फैनो
आगान होब्ला सिरि सिरि
फिँखिया गाबखोमादोँमोन।
बिमा बिफाया गाबनायखौ नुदोँ।
बिनि गोगो मोदै गसरनायखौबो
मेगनावनो नुथारदोँ।
नाथाय मानि मोदै बियोदि बिजिरनो हायाखै।

दुखुआ फैयो आरो थाङो
जिउजोँ गेलेनाय आरो सावरायनायाव
जिउखौ आं मोजां मोनो
आं गोसो जाब्ला गाबो
सेरजा हुनाय दुखुनि राङियाव
खाम दामनाय दावबायनाय हान्थिनायनि
गासै मेथाइ आंनि खोमायाव रिँफैयो
गोदान आरो गोदान जेब्लाबो
आगर फालि मेगन बिलाइयाव
बायदि बायदि गाब समायना
आंनि गोरबोआव गेलेफैयो
रिउ रिउ सुफिननि देँखोआव
खोलो खोलो बार बारनायाव
बेखायनो गले गले जेब्लाबो
आं गोसो जाब्ला गाबो

1
दाद्रा-दुद्रा अन्थाइफ्रानो
मोसायै मोसायै स्लिम जायोब्ला,
नंखायथार सान्नायनि बोलोजोँनो
गोसोनि मिजिँआ जाफुंबायोब्ला?
2
खिग्राया लाजिया
नुग्रायासो लाजियो,
हाय हाय-
आंलाय मानो गाबफ्रांङासै
मानोथो लायो मिनिबायसै?
3
जेथ' जाबाय गासैबो
जोनोमानो फोरोँबाय मानसि सान्नो,
मेगन मोदै जायालासै
हर- सान थाबायनो हायोमोनब्ला?
4
आदुआनि खियाव थाम्फैयानो
बाया होनो,
सियाननि आगानाव लेवारानो गियोनो,
हाखरानो लेँहरदोँसो नामा
आंखौ गोबानो?
ना -गोदोना सेरथेनो बिफांआसो?
5
अब्लाबो
सानफ्लांबायो सिमां-मोकथां
गोजाननि हाजोआ नायनो समायना
खाफालाव थायोब्ला ना खान्दाया
बालाबारियावनो दावो होन्नायबादि।
6
आरोबाव जेब्ला सिरि मोनो
बुजिबायसै गोनो-गोथो
"दैस्लुंआवबो अख्रां थायो जाम्बा
बुजिगोन गोथौ मोजां सान्ना नायबा"।

हाबानि बेम फार्टिनि रिँनाय देँखोआ
बयनिबो गोसोखौ सिमब्रेना होयो।
बियो हाजासे हिनजाव गोदानखौ
मानोबा सोगाबो।
हिनजाव गोदानखौ हाबानि समाव
हिनजाव लागोआ गाबनाय नुयोब्ला
रावबो गाबा लासे थानो हाया।
बयबो फे- फु हाजासे गाबो।
हिनजाव गोदाननि बिफा आरो बिनि बिब' बिनानावफ्राथ'
गोगो थरथिँ थरथिँ मोदै फसरना गाबो बाराद्रायबाव।
अनसुलाजोँ फैसालिजोँनि जुलिया दिनै जै जै है है जाना थांबाय।
हिनजाव गोदान महरै फैसालिया
हाजासे गाबलांबाय।
बिनि मेगना मोदै गनानै रानथाबलांनाया गोब्राब जालांबाय।
हाबानि समाव अनसुलाया हिनजाव गोदाना
एसेबां गाबसेयावबो गाबाखै।
बियो सान्दोँसो नामाथाय-
हाबानि समाव हिनजाव गोदाना गाबोब्ला
बांसिन जुलिनि साजायनाया बांसिन समायो।
जुलिनि अराबो रोहो रोहो मिनिस्लुयो।
गोथार गोसोजोँ होनाय
गोदै गोथाव फ्रसादखौ मिनिस्लुयैनो जायो।
ओजोँ बेम फार्टि दामग्राफ्राबो मुजिनाय मोनो।
बिसोरहा बिदिब्ला बानाय मेँनाय नागोबोर लाङो।
बैराथिफ्रा गोदै गारांजोँ साबसिन
ललिनो खहाबो।
नाथाय फैसालिया एसेबां गाबनो माब्रै हाखो?
बियोथ' बुंदोँमोन-
आंनि हाबायाव आं मोसागोन।
हौवा गोदानखौ आथिँआव गुगुरुब खुलुमना मिनिसुलु अर सेराव
आर'ज गाबगोन।
सुखु- दुखुनि संसार जानो समाय लागोन।
नाथाय! नाथाय! गासैबो बिनि उल्टा।
हाबानि जोबनाय समावबो बियो मोसायाखिसै।
एसेबां आहुजानि बोदोर गाबखांनायाव
बिखायादि दुरलुब दुरलुब मावदोँ।
अब्लाबो बियो मानो मोसानो गोसो जायाखिसै?
आरो मोनसे जानाङै जाथायाबोदि जालांबाय,
बेयो माब्रै?
मानो जानो मोनखो?
खुंगुर फंबाय मेटरा बिखौथ' मोसानोसो बोदोँमोन।
बिखौ मानो लाजि फोनांनो हिनजाव गोदाना सोबाखो?
बेथ' लाजिनांथाव हाबानि जाफैरै जाथाय।
नाथाय हिनजाव गोदाना मानो सोबाखो
बेखौ सोँनायानो मोजां जागोन।
बिबारि एमाव गाबै गाबै
हांमा सुरदोँ फैसालिया।
सानफा हाबायाव हिनजाव लागो,
हिनजाव गोदान आरो मेटरिनि गाबनायावबो गाबाखै अनसुलाया।
नाथाय दा मानोबा गाबनो ओँखारदोँ।
गाबदोँबो सिरि सिरि।
गाबब्रुं गारांजोँ बियो हिनजाव गोदाननाव सोङो-
सना, बिबारि एमाव बेबादि हांमा सुरनाया
मोजां नाङाखै।
दे सना जालांनाय नंखाय नंखाय
जाथायफोरखौ बावलांदो।
- अनसुला! आंहा नोँनो फंनैसो
बाथ्रा बुंनांगौ दं।
- नाङा सना दिनै हरथौबाय।
उनाव बुंबाबो जागोन।
- ओहो, दिनैनो आं नोँनो फोरमायगोन।
आंनि फेरलेबसे बिसम्बिफोरखौ।
जायनि थाखाय दिनै आंनि मेगनाव
मोदैया सानफा हानाय अखानिफ्रायबो
साननो गोनांसिन मोदै गदोँ।
- बिदिब्ला बुंदो।
आं खोनासंलांगोन।
- खोनासं,
आं बांद्राय सान्नायावनो दिनै
हाबायाव बांद्राय गाबबाय।
बिनि जाहोना हाबानि मेटर
खुंगुरानो बुंजायो।
दिनै थांनाय फुंआव आं खुंगुरखौ नुजेनदोँमोन।
थांनाय बोसोरथामनि उनाव।
बिनि मोखां आरो मेगनानो आंखौ गोजाम बिसम्बिखौ एरखांदोँ।
आंखौ बांद्राय सोगाबदोँ।
थांनाय जानाङै जाथायाबो एसेल' लाजिनांथाव नङा।
नोँबो नुनायमोनब्ला मा सानगौमोन आं मिथिया।
आं सानैसो आलासिनो साहा
लुना होदोँमोन।
बेयावनो बियो आंखौ मोसानो
बोना लायदोँ।
बेयाव बिजिरनांगौ गैया नाथाय
आं मोसाया होनना सिमब्रेनायाव बियो आंखौ
मुगैथावै बिखायाव दांना थिखोदोँमोन।
बेयावसो आं बेखौ गोसायै सोबानाय जादोँ।
- थारैनो नंमारगौ?
- नंगौ नंखाय खुगानि राव नङा।
बोसोरथामनि सिगां जोँ बंङाइगाव कलेजाव फरायनाय समाव
मोजां मोनलायदोँमोन।
बियो आंखौ गावनि सान्नायखौ फोरमायदोँमोन।
आंबो गोरोबलायदोँमोन।
जोँ मोजां मोनलायदोँमोन।
नाथाय लाइमोन गोरबो सोलेरनि अख्रा लुबैनाय।
बियो सानसेखालि आंखौ गावनि लजिँआव लेँलांना
गाज्रि सोमोन्दैयै गोरोबनो
हाबिला जादोँमोन।
बेयाव आंहा सानै हयै
बिनि उल्टा बाथ्रा बुंदोँमोन।
बै साना बेबादिनो फैमाल थांदोँमोन।
नाथाय बियो बांद्राय लाजिदोँमोन आंखौनो।
सिख्ला जानानै आं सिख्लायैनो
गोसो गोरबो सोलेर गोथारैनो
थाबोदोँ।
बे समनिफ्राय बियो आंखौ जेबो खौरां लायाखैमोन।
सानसेखालि बियो आंखौ सोमोन्दो नागारनायनि मिसेस लिरहरो।
- थारैनो बेयो नंगौ फैसालि!?
- नंगौ, बेयो गासैबो सैथो।
नाथाय खुंगरा नोँ मा जायो?
- बियो आंनि लोगो, फैसालि!
आंनि असेथार लोगो बादि।
गोजौ फरायसालियाव फरायनाय समनिफ्रायनो जोँ लोगो।
उनाव जोँ गावगाबाव कलेजनि सोलोँथायखौ लायो।
गावगाबागाव गोसोयै।
- अनसुला, बियो थारैनो गोसोआ मोजां नङा।
गोगो गोरबोआ बेनाव गैया।
बियो सिख्लाफोरनि सोलेरखौ गाज्रि खालामनो नाजायो।
नाजानायल' नङा बियो साब्रैसो सिख्लाफोरखौ मोजां मोन्ना
नागारबाय।
मुगैथाव बिनि आखुआ
आंनि खोमायाव गोग्लैबाय।
- फैसालि थारैनो बाथ्राया सैथो?
आंनि लोगोआ एसेबां गाज्रि?
बिदिब्ला गाज्रि लोगोजोँ गोरोबनानै
आंबोदि गाज्रि!
- अनसुला नोँ- थारैनो नङा।
हरथौबाय सना,
अनसुला जिउ आंनि।
फैदो- आं गोथारैनो दं।
- फैसालि!
नोँ- नोँ -नोँ- !

दाखोर दाखोर जेरैबो
हावासिनि दरसे सायख्लुमावबो।
आथिखालाव सुबुंनि गोसोआव मैला
नागिरना मोनो जेरैबो खना-खनला।
थिख हे गसाइ!
आंनि गोरबोआवबो साबफादोँ जेला
नै गसाइ! हर जोबस्रांनाय जानला।
माखौ लानानै आं थांना थानो?
मिजिँ ना थांखि
सिमां ना मोकथांखौ
ना थांनो.. देहा-सोलेर लानानै?
हे गसाइ!
हर आंनो लैथो मोनसे
जेसे हायो आं थब्लनि
जिउ जोनोमनि ओँथि नागिरनि।
हे गसाइ!
आंनि फाफखौबो बेयावनो होदो सुस्रांनायखौ
आंनि गोरोन्थिखौबो बेयावनो होदो सिनायनो।
हे गसाइ!
नोँखौ इसोर सिबिनाय
नोँखौ लोगो सिनायनाय
बेनो आंनि जिउ बावनायब्ला
हे गसाइ!
सुबुंखौ अन्नाय
जिउ-जिबिखौ मदद होनायाबो
आंनि देहा-सोलेर बावनाय।
हे गसाइ!
माखौ लानानै आं थांना थानो?
नोँखौ सिबिनानै आंनि जिउब्ला
जिउ-जिबिखौ अन्नानै आंनि घोरोम
नोँनि थाखाय जिउ होनानैब्ला
जिउ-जिबिनि थाखाय देहा-सोलेर।
हे गसाइ!
नोँ गासैनिबो देरसिन बिजिरगिरिब्ला
आंनि बरादखौ बेखेवदो नोँ
माखौ लानानै आं थांना थानो?

आफाया जौ लोङो।
ओरैबादि लोङोदि थारैनो जोबोद गोदै गोथाव।
उन्दै समनिफ्रायनो आंनो दौआब्लाबो लुबैथि लुबैथि आंनि मेगन सिगाङाव लोँबोदोँमोन।
आंबो नायै नुयैनो लुबैनाया बांनायनिफ्राय बांबोदोँमोन।
सानसेखालि आं लोँबाय।
ओरैबादि लोँबाय आंबो ग्रद ग्रद ग्रद।
आंनि खर'आ गिदिँदोँमोन।
आं थावनाय मोनाखै एसेबां गोदैबो मोनाखै।
नाथाय ओरैबादि खुसि मोनबायदि-
आंनि गोसो, आंनि सोलेर गासैबो रंजाबाय मोसाबायबो।
आंनि खुगाजोँ मेथाइ ओँखारबोबाय।
मोसायै मोसायै आं मेंग्लिबाय।
लोरला जाबाय, आरो आंनि खर'आ गिलिरसिन जाबाय।
आं आरो सहायनो हालिया जानाय लोँनाय आं गोबाफिनबाय।
आंनाव दुखुआ फैबाय मानोना आं लोरबां जाबाय।
नंखायसो जौनि निसाया खहा खालामग्रा मेलेमनि सानस्रिखौ।
मेलेमनि एम्फौ फिसिग्रा जौ।
जौआ गोजौ नङा, बेयो नंगुबै सिंजौ।
फाथाल फुरिनि लामा दिन्थिग्रा सिंजौ राजा।
आंनि थाखाय नङा, नाथाय सोरनि थाखाय दाबो गोदै गोथाव जौआ?
थारैनो बिसोर मेलेम उनग्रा नङा,
मेलेमनि एम्फौ फिसिग्रा गोसोनि नेहाथ बान्दा।
जौआ जोँनि नङा, असुरफोरनिसो जौ।

जायै जायै जानानै रांआनो जोबगुलायनोसैमोन
गुब्लां फंबायनिया,
आदै मेब्लानियाथ' दहायनो जोबबाय।
दंथारोब्लाबो थायबा गथा (खुस्रा)
गरसेल'सो दंसै खोमा।
फैसाया सना गाबनि सनाबादिथार
बेखौबा बाहायनो हालिया बियो।
गाड़ी गाखोनायाव आंसो अनथाव-बाथाव
बाजि रांखौ होथ'नांलायदोँ।
गलाघाटनि मायनाव फोथारखौ गिदिँनानै
आब' लांहेमोननियाव थांगोन जोँ।
बोसोरसे सिगां आब'आ रं नाम्बारजोँ जुलि जाफैदोँ।
गाड़ीथारैनो मोथो मोथो रौता सारिआलिनि
फुरिखौसो गोसोखांफ्लांदोँ गुब्लांआ।
बियो बुंदोँबो-
- आदै मेब्ला,
हाब रौता सारिआलिनि फुरिया गोथावब्रा,
माब्लाबा फैबावथारगोन दे जानो।
बियो आंखौ नायनानै बुंबावो-
- हाब, आदा जोँथ' बुरलुंबुथुरखौ बारबोथारबाय,
बेयोथ' सानजा जाबाय।
सानजानि मानसिफोरखौ सानजारि होनो नङाहोनबा?
माथो फुरियालाय खारदैजोँ संनाय नङा नामाब्रा?
ना खारदैजोँनो संनायमार फालाय??
- खारदैब्रा खारदैसो,
- हाब, बिदिब्ला खारदैजोँ फुरिया गोथाव जायोब्रा।
नसिम गिदिँफिनबा खारदैखौनो
जगसे लांनांगौ जाबायलै।
-----------

1
रलिँ मिलनि दैमु हटेलाव
सानसेखालि फरटा जानाय
बादिलायदोँमोन जोँ।
बे समावनो सासे सिख्लाखौ लोगो मोन्दोँमोन।
बेयो ओरैबादि नायदोँमोन
जेराव जोँनि फरटा जानायानो
नायथाव-थाव आरो
सान्नो गोनाङै मिनिथावमोन।
गुरबासो जानानै जेब्ला
फानलु गोसा ओँख्रिखौ खुगायाव
सोगासिनो सोयो अब्ला बियो
मिनिया लाबानो थानो हायाखै।
बियो ओरैबादि मिनिबायदि
मिनिदोँबो मिनिदोँ खुगा हमथेनानै खे,हि, खे,हि.., मिनिबाय।
माब्रै जाखोथाय- आंबो
मिथिगुना थाबथा लायबाय।
2
बारा बोरै बारबोखो 15 बोसोरनि
बै सिख्लाया दिनै 16 बोसोर बैसोआव
आंनि बेवाइ जाफैबाय।
खाफाला मोजां, हाबा जाब्लाबो आफाया
एसे माहाजोनखाय फरायनो होबावबाय।
आंबो अन्नानै बंङाइगाव कलेजाव
देग्लाय H.S. 1st Commerce आव
मुं लागायना होबाय।
हाबा जाखांबाय।
उन्दै गथ; आंखौ दाबो जि लाजियो लाजियो।
आंनि खाथियाव मोखांजोँ मोखां
2 मिनिटनि बारा थानो हाया।
कुनुरुखुम सोमोन्दोआ आय आफा,
जोँ जेरैबादि बुङो बेखौनो बुङो।
नाथाय आंखौ?
आंखौ बेवाइ होन्ना बुङा।
आदा होन्नासो बुङो।
सम सम कलेजाव लोगो मोनब्ला
लाजिगुसुयै- जाबावनांगौ पेरियद गैलामोन आदाना?
होन्ना सोङो।
माब्लाबा बेबादिनो फुंफ्राव नुब्ला
- गुड् मर्नीँ आदा होन्नाबो बुङो।
3
बाथ्राया एसे सान्नो गोनां।
आं गोसो थोनाय सिख्लाया
बेवाइनिफ्राय बा बोसोर उन्दैसिन।
बियो दा 11 बोसोराव।
बेवाइया थाखो 11 आव फरायदोँब्ला
देग्लाय आं गोसो थोनाया
स्नि थाखोआवनो फरायदोँ।
बाथ्राखौ सानै हयै आं थि
खालामखादोँ।
20 बोसोर जायोब्ला आंनि गोसो थोनाया
फरायसालिमाखौ बारग'ना मुलुग सोलोँसालि
मोनहैगोन।
बे समाव आंजोँ हाबाया जागोन।
नाथाय आंसो बोरायद्रायगोन नामा
सानफ्लांबायसै आंबो।
थांनाय बैसागु बोथोराव
गोसोथोनायखौ आलासि जानो लाबोदोँमोन आं न'आव।
नाथाय बेवाइया?
मा सानखोथाय- दाना आंखौ नायनो
हाथारैसो जालांबाय।
सोमोन्दोआथ' आजिखालि बोरैबा जाखाबाय।
उल्टां- फाल्टां गासैबो।
गुबुंबाय होन्ना बुंब्लाबो
फंसेनो बुंजासै।
बोरैबा बोरैबि बेवाइनि खुरमासो जायोनो
जाय आंखौ मोजां मोन्दोँ।
आंखौ गोसोथोनायजोँ आरो बेवाइनि बिमाजोँ
असेथार बिब' बिनानाव
जायोनो।
बेखायनो बेवाइया मा सानखोथाय....!!

खन्थाइगिरि नङा बियो
उन्दै समफोराव लिरदोँमोन नामा
दिनैसिम आं मिथिया खिन्थायाखैबो
अदेबानि आं फरायनो मोनफेराखै
-
सानथामसो सिगांआवसो
गांसे बिजाब साफायदोँ बियो
दुलाराय सुबुंनो फरायनो थाखाय
गावनि रोँनाय आरो स्टाइलखौ मिथिहोनो
-
बिजाब मुङा दिन्थिना
गिदिर महरनि बिजाब
सलमा नङाबा जारिमिनानो जानो हागौ
नायनि मा बिजाब बेलाइ
फरायनि-
-
आरांगायाव बिजाबखौ मोन्ना
मिनिसुलु मिनिना सान्दोँ निला
रोजा खोमसि हरा मेगन सोरखि हायै
हरथौबाय जेरैबो सिरिसै
खोरखिखौ फाङो बियो
-
ससमाखौ आरामै हमना लायो मेगनाव
बिजाबखौ बोद्लाना फरायनो सिगां
बियो-
-
बिजाबनि समायना बिखं महरखौ नायबावो
समायना आलायारननि सावगारि
फुंनि जारां सान ओँखारनाय बुब्लि
गेवलां गेवथां बिबार बारनाय
-
आरामै जिरायो निला
बिजाबखौ मेगन सेराव लायो
सिरि सिरि फरायलाङो--
-
बयजोँबो बाखोनाय जायो
रावबो बाखोनाया लाबा थानो हाया
जोबोद समायना मेगन बिनि
बिखा गुवार गोसो गुदुं
-
जाय जाय सोलोँथाइ मोनो
बियो हमनो हायो बबे मोजांसिन?
एबा बबे सोर गाज्रिसिन
बेबादि सोलोँथाइ बेयो फोरोङो
-
हायना गोनां एबा हायनामुलिबादि
बिनि फोरोँनाया गासैबो गेबेँ
सोरबा नेवसिनो हागौ?
रावबो हाया बिनि रोँमोन गियानखौ
-
बिनि महर मुस्रिया समायना
बिनि गोगो गोसो आरो
बिखा गुवार गोथौ गियाननि थाखाय
बोलो दं बेहा सोलेराव आरो
गावनि मोन्दांथि गोहोखौ लानानै
-
बेयो एसेबां गुरैदि
सना बाना रावखौबो सोँखारिया
बियो थुलुंगा गोनां
समान सोलोँथाइ होनो लुबैयो
आंगोबादि बयखौबो आंगो सानो बियो
-
से दान बारा जालांबायमोन आं
बिनि सेर सेर मागिबायनाया
अन्नाय मोन्नाय आय'
फाग्लिबादि जालांदोँ आं
-
नाथाय हमथायो हमथाथारो
अब्लाबो जौमोना मानिया
आं बिनि खाथियाव थांगौ थांगौ
सान हर बेबादिनो थांदोँमोन
-
बिनि आयदाखौ आं मोजां मोन्दोँ
मानोना आं बिखौ गोसो थोबाय
गोसो थोनाया बेनो नामा?
जायखौ मोजां मोनो
बिनि फंफ्रोमबो रावखौनो गोदै मोनो
-
आं बिखौ हास्थायो
नाथाय जाम्बिनि हास्थायनाय बादि?
बियो सासे फ्रपेसार
आरो आं सासे फरायसा
निला सारनि सासे फरायसा
-
फारागआ बेसेबा गोजौ गाहाय
लाजिनांगौ जाब्लाबो लाजिया आं
मानोना मोजां मोन्नाया बेनो
आंनि बैसोआ नैजिल'मोन अब्ला
जानो हागौ बिनि बैसोआ थामजिबा
-
आरिमु जालिया सेथि खोन्दोआव
बे सारखौ लोगो मोन्दोँ आं
आं जेन'बा खाफाल गोनां
नाथाय आं सानफ्राङो-
-
सुदेम आं निजोरा अब्लाबो
बियोदि गोजोम फैगोन?
बियो जोमै जाब्लाबो
थमेन्नाय आं बिबार जाब्लाबो
बियो बिलिर फैमारगोन?
-
गोरबोआव बेखौल' जायगा होदोँ
बेनो आंनि गासैबो
आं आरो रावखौबो नुवाखै
दैमा-दैसा बिफां-लाइफां
-
बिनो गासैबो आंनि
हा-दै-अर-बार-अख्रां
बिनि सेराव थांब्लानो
सानसे बिखौ नुब्लानो गोजोनो आं
-
आं बिखौ मोजां मोनो
बिखौनो मोजां मोनबाय था होन्ना
सान हरा आंखौ खारदिँबाय थादोँ
समबार मंगलबारमोना जंखायबाय थादोँ
-
हे गसाइ!
आंनि थांखिया जाफुंबाय दिनै
बै रजेया दिनै आंनिसै
बियो दिनै आंनि सिन्दुर
-
दिन्थिनानि सल'खौ जागायनोसै-
गोसो गुदुं निला
समबादि गावनि पेरियटखौ फोजोबदोँ
समा नै रिँगासो जाबायमोन
-
लामायाव लासै लासै थाबायदोँ
नायफा नायफा उनथिँ नायहरदोँ
गोजोन्नाय गैयामोन दिन्थिनाहा
जोमैना निजोरामोन बिनि गोसोआ
रावबो हमनो हानाय नङामोन
-
बियो सोरखौबा लामा नायदोँ
लानो बाबांसिन बेन'टि बेग
फाफ्लियाव नङा आखायावनो लादोँ
रावबो लोगो गैया बिजोँ
-
गावनि मारुटि सुजुखिखौ
लासै लासै सालायबाय निला
लामायाव थाथे थाथे लासै थाबायनाय
दिन्थिनाखौ बेल होदोँ
-
दिन्थिनाखौ निला सिनायगौ
सानफ्रोमबो रायज्लायोआनो लोगो मोनब्ला
माबादि फरायसा दिन्थिनाया
मोजाङैनो निला मिथिगौ
-
लामाखौ हगाराखै बियो
लासैनिफ्राय लासैसिन थाबायदोँ
बेप बेप बेलखौ दामदोँ निलाबो
गले गले बेल दामब्लाबो फेलेँ
-
गाड़िखौ लाखिदोँ आरो
मिज्लौ मिज्लो नायदोँ दिन्थिनाखौ
दिन्थिनायाबो मिजोलौ नायदेरदोँ
सोमोनांथाव बिजिरख' हायै ओँथि

आं सिमांखौ नुवाखिसैमोन
एमावनो सिरिमोन्ना दंमोन
फुंनि 6 रिँगा जाबाय
आब'आ आंखौ फोजाफैबाय
दर्जा खोरखि बुयै बुयै
सिखार सोरांबाय होन्नानै
मावथि जोँमा सानजानि आंनि खोरखिजोँ
बेरलाव मेगनजोँ नायहरदोँसै जोँ जोँ
सिखारना गुदुं गस्ला जोमना
दुब्लियाव मोसौखौ खाहैबाय
फैना दैखरआव मोखां सुबाय
फुंनि जानायखौ जाबाय
7:30 रिँगायाव बेसरथिलियाव थांबाय
बेसर फुयै फुयै 11 रिँगायाव फैफिनबाय
12:30 रिँगायाव साननि जानाय
1:45 रिँगायाव बेसर फुनो थांफिनदोँ
आं आय आरो आफाजोँ
3:37 रिँगायाव फैफिनदोँ न'आव
दुगैयै साजायै दान्दिसे बेरायदोँ आं
गोजोनै गोजोनै न'सिम फैफिन्ना
दुब्लियाव मोसौ लायना खाफैदोँ गलियाव
मोनाबिलि मोनाबिलि दिनै सान्तिफुरनि आमायमोन फैदोँ
8 रिँगायाव मोनाबिलिनि जानाय
9:25 रिँगायाव आं उन्दुनो एमाव गोलाङो

बंङाइगामि।बिअ'सि गेट्।
जेरैबो जोँथि जोँथा इलेक्ट्रिकनि खावब्ला-सिब्ला सोरां।
मोनथाम मोखां जानाय लामायाव आं थं गसंना नायहरो शहरनि फारसे-
हेब्रे-माब्रे थांलाय-फैलाय बायदि उन्दै गिदिर मटरनि मेलाखौ।
जाया फाम्रा खन्थाइ लिरनाय हुदाया जाखाबाय आंहा।
खन्थाइखौनो आवरायदोँमोन आं सिरियै-
"नैबे मोनाबिलि सिखोलानि-
जोमै बारलांनाय फैसालियाव,
आं आन्दायदोँ मिथिँगानि बिखायाव;
नायनानै दं सुबुंनि मेलेम बेरसावनायखौ।
बायदि बायदि महर मुस्रि।"
बुदुं-बुदुं स्कुटिखौ लाखियो।
- मा, हार्सिँ नामा आदा?
बाग्दाव गारदोँ आं।
बाग्दावआ मा जानो?
आं जोमै नङाबा लैथोआवसो गोजोमना दंमोन जानांगौ,
आंनो मिथिया।
ब्लद थांफिन गारबाय बेसारा।
सिख्लाय मोजांमोन बियो सोरमोनथाय???
आं.......
गोसोजोँ गोसो सानबाय, गोजोना गोजोना दाबो आं।
आंहाबोथ'............।

नै दाउखा- दारोजाबसै दुखुनि मेथाइ
गोदान आलायारननि सोरांआव,
बिफांनि दालाइयाव बानानै
दा रोजाबसै गा गा होन्नानै।
जेबो गैया हावरिया आङो
नोँनो बेदर दरसे हरनो,
नै दाउखा थांदो बहाबा
नागिरना आदार उदै सुफुंदो।
दिनै गोदान फुंनि सोरांआव सानदुं सायदोँ आं
साननि सोरां रोदाजोँ- मुलुगखौ खेबसे दावबायनो सान्दोँ
उनजोँ दागाबज्रिसै आंनि हान्थिनायाव।
नै दाउखा- दारोजाबसै दुखुनि मेथाइ
खबाम गोनां आंनि दावबायनायाव,
नै दाउखा थांदो बहाबा
नागिरना आदार उदै सुफुंदो।

आं सान्दोँ- गोनोखोनि सेर सेर
जोँ खारफानो रोँदोँ।
बिसोरजोँ सिनायथि जानो हायाखै।
आं सानो जोँ खारफायै खारफायै
सहैनो हागौ नाथाय
जोँनि सेन्डेल मोनसेनिबो समायना आगान थालाङाब्ला?
बहा जागोन जोँनि सिनायथिया?
नै बर' लाइमोनफोर जोँहा समा जाबाय।
सेकेन्ड मोनसेल' सम दंसै।
जोँ सल' खिन्थाग्रा रोखा रोखा जारिमिन खिन्थाग्रा
आबै आबौमोना गैलिया।
जोँ मोननाय थफ्लाखौ
जोँनो बुथुमना आरोबाव जथायाब्ला?
गोनोखोनि साग्लोबनायाव
सोर नागिरगोन गोदानै
आबै आबौनि बारियाव?
आरो आबै आबौनि बारिया थाबावगोनदा?
बिल्दीँनि होँगो-दोँगोआव।
सांग्रां जादो;
जोँनि मावनांगौ जोँनो मावनांगौ।

थुरि उखुमनि गिजि देरायाव
थरथिँ थरथिँ अखा गसरब्लाबो
आं खाफाल हमाखै,
रुम्बां रुम्बां मायदां जावरिनायाव
आंनि गोसोआ बेसेबा खुसियावसो।
थखन थुनो सम सनाय
खामानियाव उदायै आबौ हान्थुआ
जौनि अफ्रियाव गोजोमना दुब्ला थैलांबाय
आंहा बेयाव खहा जायाखै
खहाया मोनसेल', आबौआ सल' रोँगौमोन
थेवबो खिन्थानो अलसिया थारब्ला?
गियाखै आं मोफ्लाम-मोसि
जोमैजोँ जोमै अखा खोरोमनायखौ
बाग्दाव-फ्लांदोँ ए.के 47नि
मान सन्मान गैयै गाबज्रि हरनायखौसो।
मेगन खानाबादि गोसो खाना
मोन्नैजोँ मोनसेयानो रुजुनाय नङा
मेगन नुनानैबो सान्नो रोङैया खानासिन
फंसे रावै मुगैथावसिन (जाम्बा)
जाय अन्नाय गैया मुलुगनि।

आफाया देग्लाय द्लाम बोरायबाय
मै- जुंगालखौ बानखांनोनो हालिया
बोथोरावनो आयआबो थाबद्राय बुरैबाय
दैहु थाइसेखौनो फाफेर हालिया;
लाइमोन सनाखि- सनास्रिमोनजोँ
एदावजा- जंखायजा आबौआ हले
बियो दाना अमिताभ बसन बाराबा
दरमेन्दर बादिसै गोसोआव।
दैहु फाफेरना दुहु दुहु
सुरि जालांनाय दखना सुरिया आयनि,
थावोनाव लजिँ थाबायनाय आब'मोनहा
सोरनि बिघ्दा मोनखोथाय-
आयनि दखना सुरिखौल' नङा
लाइटार लगायबाय सालामाटानिखौनो,
बुरै आयाबो गानसै दाना सिख्रि मेगन
नङाबा हारसा मेलेमनि आर्टिँ आगर।
मोसौ दामब्राजोँबो रुजु जायै
आंनि देरसिन आदाया
लावमुरा आफानि मोसौ हालुवाखौ
मानोबा खेब खेब नायनो हालिया,
मुम्बाइ- बेँलरनि बारा बेनाव नांदोँ।
थिफुद्लीलि आयनि फिसाजो
बैसोआव बेसेबा आंनि उन्दै
बियो जोनोमावनो उल्टाखा नामाथाय-
दाउखि हनाय एबा गोबोर गारनाय
दैहु फाफेरनाय
बाराबा दैज्लांआव बिसन फुनाय
माय गायनायखौनो बाद हो,
संग्रा अकदाबाव ओँखाम दो जाननो
सि: सि: बियो लाजियो;
मिसनाव फरायना सोरनि रोँबोखोथाय-
खाल्साराल' नङा
आसार आखु थाल्ला सोलायबाय।
सासे फंबाय दं
बेबो राव रोँनाय मेडियामाव
मेडियाम माने स्पेसियाल मेडियाम,
नांगोल जुंगालखौथ' सिनाया सिनाया
खोमायावनो खोना बावथ्राखैनो-
उन्दैयावनो दोनहर जानायथ'-।
आय आफानि आंबो सासे
बयनिबो गेजेर फिसा हौवा
गन्थं दाब्ला, मोदोम बन्दा
मेँख्ल'-ख्ल, मोखां खावब्ला- ब्ला,
नांगोल जुंगालखौथ' रोङा नङा
लाइजामखौबो लिरनो रोङा नङा
सुखु- दुखु हास्थायनाय- बोराबनाय
मबाइलजोँ खौरांबो हरनो हागौ आं
आंनि सोमोन्दोआव नाबोथिनो आरो
सोरबा सोरबा खुरमा आमाय- आनैमोननो,
लावख्रिगुरि- बाथारमारि- बिरहांगामि
नङाबा कक्राझार, बंङाइगामि, बिजनि
Hero Honda एबा टेक्टरबो सालायनो हागौ
सान्नांगौआ बेसो जाबाय टेनसना
बादायलायनाय गोनोखोनि मुगायाव
कमफुटार- इन्टारनेटखौ सिनायनो
हाबावगोनदाबि?
जाहाज- इर'प्लेन गाखोनायनि
सिमांथ' गैयानो।

गावनि गोसोबादिनो
नोँ गाबो आरो रंजायो
हास्थायो नोँ आरो मुगैयो
आंबो आं बादिनो
सिमां नुयो आं बेसेबा गिदिर
बयनिबो गोजौसिन आरो गोथारसिन
बयनिबो गोफारसिन आरो गोबौसिन
हमथा जायै आं आंबादिनो

कलेजनिफ्राय सफैग्रो मोनना
ओँखाम गोजांखौनो जाबाय आं।
जाखांनानैबो दमकल सेराव जानाय
खालाय दैफोन थोरसि लथाखौ सुबाय।
मोनायाव माखासे जाहोननि थाखाय
ओँख्रिया खामथाबथारदोँ।
दा बेखौनो मानजिगासिनो दंमोन आं
जोबोद खस्टयै।
थावजोँ माजोँ मिलिखा-मिलिखि
गोखाम अरथाब थारदोँ।
खुनुरुखुम 30 मिनिटसोनि उनाव
फोरला बेजेजोँ नाद्लुनबायनानै सुखांबाय।
न'आव हाबनाय लोगो लोगो
बिलिफांआबो राव होबाय
- दाबो जायाखै नामा?
हमनो हानानै न'सिंनिफ्राय बुंहरो आं
- फैबायानो माब्लाबानो?
सिंआव बिलिफांआ हाबदेरो।
आं आरो बेखौ गल'सो नायफ्राङो।
सान्दोँबो आं
- मालाय गोदान गोदान गानना फैलायबाय।
बोरैलाय आं मेँख्ल ख्ल
खलार जिलायनाय गस्ला सार्ट गानना
थांफा बावनो?
लासिँसिं- बायदि बायदि।
खुसिजोँनो बिलिफांआ बुंबावबाय आंखौ
आंनि सानबोलावरि सिफायनानै
- गोख्रै फाग्ला गोख्रै
थाइमा जाबायानो।
- दे दे नोँ थाथ होन्नानैल'
दुगैनो हाखु दाखु
दमकलसिम थांबाय आं।
माब्लाबानो आंबो मिथिस्लाब मोनै दुगैखांबाय।
देलायै साजायै थावन फारसे
बिलिफांनि 180 फाल्सार गाखोना आंबो थांफाबाय।
बिलिफांआ दिनै गावनि रं नाम्बार
मोजां मोनलायनायखौ लोगो हमगोन।
सानथामसो सिगांआवनो बियो आंखौ
कलेजाव क्लास लानायमानि बुंबाय
थानानैनो दंमोन।
सिख्लानि मुंआ निजोरा।
निजोरा ब्रह्म। बबेनि जाखोथाय
आं मोजांङै मिथिया।
गारांआ खोब गोदै।
बैसागु बोथोरनि जेन' दाउ खौऔआनो।
आंबो बिलिफांनि फनजोँनो खेबथामसो
रायज्लायबाय।
बिलिफांआनो आंखौ रायज्लाय होदोँ।
बिलिफांनि आन्दो आन्दो माब्लाबा
बुंफ्लांबायबो आं ओरै
- बिलिफांआ नोँखौ थगायब्ला
आंनो लागोनलै सना होन्नानै।
दिनै लोगो हमगोन निईर लआर आसाम
हष्टपिटालनि बाजै हटेलाव।
बेसेबा गोबावनिफ्राय गोसो थोलायनाय
नाथाय मोजां गाज्रि
माब्लाबाबो नुलायाखै।
दिनै लोगो हमलायगोन।
गासैबो फाइनाल जाजोबगोन।
मानि फरायनाय फसायै
गावनि मेगननि बाथ्राखौ फोरमायलायगोन।
आंहाबो नाखोमानो एबा
बिसोरनि रायज्लायनायखौ खोनासंखोमानो गोसोआनो जाथारदोँ।
दसे उनावनो बाजै हटेलाव
सहैबायानो जोँ।
लोगो लोगो बिलिफांआ रिँहो-हरबायानो आरो
बुंहरबाय
- फैदो गोख्रै जोँ दंफैसै नै।
आरसा नोँसोर फैबाय थादो गोख्रै
जोँ सिङावनो थागोन होन्नानै।
सिङाव हाबना जिरायहैबाय जोँ।
ओँखाम जाहोहरगोन सिख्लाफोरखौ।
बेयावनो लासै लासै रायज्लायनांगौ
बुंनांगौखौ रायफोर लायगोन।
मालाय रायज्लायगोन
गोरबोनि बाथ्रा, मोजां मोनलायनाय राव
मोखां नायलाय नायलाय।
आंहासो जाबाय लासिँसिं।
आरो आंनि गान्नायफ्रा?
सि सि लंफेना जांलाब लाब
आजिखालि बेखौ अमिताभ बसनाथ' गानलानो
गामियारि बोरायसाफ्राबो गानबावला।
गस्ला सार्टआ खलार जिलायनाय
खानायाबो लावबायमोन
सिनजानो दामानि रां थोस्लाबाखै।
गोसो सिङाव सान्दोँ आं
- बिलिफांनि लोगोआ नायजाथारा
गोरिबमालाय एफा गोरिब?
होन्ना बिनि गोसो थोनाया सानबा!
बिलिफांआथ' बासि जाया।
हेनसामबो हेनसाम 180 फाल्सारबो दं।
न'आवबो मालाय बिफाया फोरोँगिरि।
बायदि सिना सानफ्लांनानै गावखौनो
लासिंसिं सानबाय थादोँ आं।
हटेलनि खारिकलफ्रा
दाहालागै नायै बेदरै
ओँखाम लाना फैसिगौ खोमा?
नाथाय आंथ' जाखांबायानो
मोनानि ओँखाम गोजां आरो
दालि ओँख्रि गोजांजोँ।
नं नाम्बार सिख्लायाबो
सफैसिगौ खोमा।
देलाइस्रि मोदोमफ्रु सेन सारफबनानै।
एसेयावनो बिलिफांनि फनाव
गाबखां होहरबाय।
मा मा होनहरखो गावसो मिथिसिगौ।
नाथाय बिलिफांनि रावखौ हले आं खोनादोँ।
'ओरै फै खनाजोँ जोँ सानै जिरायगासिनो दं।'
लोगो लोगो आं बाहेरा
दरखं फारसे नायहरो।
सानै सिख्लाफोर हाबहांल' जादोँ।
आं बिसोरखौ सिनायदोँ।
उसु खुथु मोननानै आं बिलिफांखौ
बुंदोँ
- थाथ'दे आं बायजोआव
थांना फैनि दसेल'।
होन्नानै थंब्लेद गुबुन लामाजोँ
बारन बोदोँ आं।
आरो अट' गाखोनानै
लजिँ न'फारसे फैयो।
गोजावना सानबोलावरिजोँ
लजिँआव सफैनानैबो सान्नायनि
दाहारा बारासिन जालांदोँ आंहा।
आं सान्दोँ
- बिलिफांआ आंनि जोबोद लोगो।
नखराव जोबोद माहाजोन।
गावनो फिसाज्ला सासेल'खा।
नाथाय माहाजोननि फिसाज्लाबाबो
मालायबादि नङा।
आंबादि गोरिबनि जोलैखौ
गावनि असे लोगो
सायखना लानायाबो साननो गोनां।
नाथाय बेयो रं नाम्बार जानानै
गोसो थोलायनाय जाथाया
सिखावै बोरै जाखो?
आंहा गोसोआव फैदोँ
सानसेखालि आं मानिबा थाखाय
बिनि फनजोँ रायज्लायनो सान्दोँमोन।
नाथाय रिँनानैल'नो थादोँमोन
रायज्लायनो मोनलायनाय जायाखैमोन।
बिलिफांआ आंखौ रागा जोँसिगोन
मानोना आं थगायना बेखौ
हारसिँङै गारबोबाय।
मा मा रायज्लायखौ गावसो मिथिसिगौ।
बिसिनायाव गोलांना आं
सानबाय थानायावनो
गारिखौ लाखिना बियो
बेल दामख्राव फैयो।
आरो आंनि खथायाव
थ्रोब बारसन फैयो।
बे समाव आं गुरलाब मानोबा
बागदाव खांदोँबो।
बियो बोराबनायजोँ बुङो
- मानो थगायनानै फैखो नोँ?
आं सिरियैनो थायो।
आरोबाव बियो गावनो फोरमायो
- सिख्लायाथ' मोजांआनो।
- मा सानखौ नोँ? होन्नानै
एसे गोमजोरै सोङो आं।
- आं बिनो खोथा होबाय।
थैस थांसनि होन्नानै।
बियो आंखौबो बेबादिनो सानबाय।
जोँ जिउ मोनसे गोरोबलायनाय
बाथ्रा बुंलायबाय।होन्ना
दसे थाद'यो बिलिफांआ आरो मिनिसुलु बियो बुंबावो
- साफागुरिसिम दोन्ना फैबाय आं।
नोँखौबो नायनो लुबैदोँमोननो।
नोँ मानो खारखुमा बोआ?
अब्लासो आंबो बुंबाय
- बिलिफां नोँ आंनि जोबोद लोगो।
नोँनि मोजां मोनलायनायखौ
आं हेँथा होआ।
नोँसोरनि जुलिया सानसे जागोन।
नाथाय बे बैसोआव नोँसिनि
सोमोन्दोआ गाज्रिथारै
आंनि खोमायाव नाङोब्लासो आंहा दुखुमोनगोन।
बे बैसोआव आं नोँसोरखौ
जुलि जानो होआ।
बिलिफांआ गल'ल' मोखांङै बुङो
- मानि आं बारा बुजियाखै।
- बिलिफां निजोराखौ आं सिनायगौ।
आरो सिनायनायल' नङा
बियो आंनि असे बिनानाव।
बिलिफांआ सान्दोँ जानांगौ 'लासिँसिं'-
आरो आंबो सान्दोँ एरैनो।

मागो बैसागु बोथोरब्लाथाय सान हर
माब्ला सोरांङो,
माब्ला मोनायो,
मिथिनाय गैया।
जेराव मोनायो बेवहानो थायो।
जेराव मोनलोङो बेवहानो गोदोयो।
सोरांस्लाब मोनै थेफानि सिलायाव दिनै
सोरला- लोरला फेग्लिनाय सोलेरा।
मेथाइ खनै खनै लावांआ हाबबोयो-
'गोरोन्थि जालांबाय आगै सब'लिन...'
थेफानि फिसाजो थिख्रिया बागदावो
बियो थोरसि सुदोँ।
बियो लावांनि मोखां बुंहरो-
- हाब आमाया बेरे फुंजानि।
- लाबो जौआ लाबो लाबो
जौआ आंजोँ हाया।
(सोरगिदिँ बेँखन्नाय खुवाया नै दासो
सिरि सिरि सोरनिबा होख्रावनायाव
खारखुमा लांनायबादि गोमालांबाय।
जोँमा जारौआ सानजा फैसालि नुजाबोगौ
गोजा जारौ मिनिस्लु मिनिस्लु।
लोरला फेग्लिनाय देहाखौ लानानै
साजायनाय सिलानि बेरेन्सियाव जिरायो लावांआ।
सोरगिदिँ खना- खनला नायहरो-
खेबसे गारमा हब्राना रिँहोयो गामि गंसे।)
- 'दमासि दमासि दमासि'
मागो दमासिब्लाथाय बेबादिनो जायो
गासैबो हनै- अमासि;
गोरान मिथिँगा, बिफां- लाइफां
दाउसिन दाउलाफ्रा बहाबा बिरलांदोँ,
दाउ खौऔनिथ' रादाब गैया,
हनै हनै फालोसे दाउस्रि हाजि-
बिसोरो गोजा जाहाब सुमलि बिबाराव
गिदिँ गिदिँ मोसाबायदोँ।
(लावांआ गोसो सिङाव खन्थाइ आवरायो
लिरनाया मिनि हबि नङा
लिरनोबो रोङा,
फिसाजोँ, फिसाज्लाफोरखौ फोरोँनोबो रोङा।
बबाव जौ?
बबाव बेदर?
गन्थं फोलावनाया बिनि सर'
लोगोसे रादाबा गन्थंआव फैब्ला
बिनि आथिँआबो उन नङा।
आगदा आगसि बादिलायगोन
थेवबो मेँनाय गैया बिनि।
दुब्लियाव फैयो खाना नै-
दासो सफैदोँ थेफाया,
थांनाय- साननिफ्राय मोनाबिलियाव
बारा जादोँ बेहा लोँनाया
नै खर'आ सादोँ दाबो थिँ थिँ।
सिलायाव सफैयो थेफाया,
नुग्रोन नुग्रोन रायदावो लावांआ।)
- हाबाब बैसागु बोथोर
बेबादिनो मागो बोथोर
खारखुमा नोँसोर अमासि अमासि,
नोँसिनि बाहागोखौ आं मोनलोँबानो जाबाय।
- थारला बारा जाथारदोँ मैयाना,
खर' सागासिनो थिँखाव थिँखाव,
हरनि गु रिँगायावसो सफैनायानो।
- बोसोराव खेबसे रंजानाय
मागो- बैसागुआव खेबसेल' मोसानायावनो
खारखुमा नोँसोर,
हाबसो हाबसो था न'आव।
- बे फाग्ला हंलायानो लाबोदोँ
गावहा बारा जाना लेँखार बोदोँ।
(गुसु गोजांनाय लानानै
खाब आरो जग लोगोआव
मल मल मोदोमनाय जौ लाबोयो
लासै लासै सुमित्राया।)
- हाब लावां, बेरे फुंजानि,
- जेबो नङा आब',
बोसोराव खेबसेल'सो,
गाज्रि जादोँ नामा बोसोराव खेबसेया?
- बेबादि नङा,
सम थानांगौ मानसिनाव
बेसे गुसु बोथोर बे
बेसेबा गुसु हर थांनाय मोनायाव
रोनाव बायनाय,
सोरमोन बेलाइ?
गावनि देहाखौ जोथोन गैयै
लोँबायबायनाय गुसु गुसा हरथौहाब हरथौहाब
मोजां जादोँ बेयो?
सानाव रंजानांगौ- मोनाबिलिसिम
जेब्ला साना सोनाब फैसालियाव थाङो
थिक समाव न'आव थानांगौ।
मागो बैसागु होनबा बेबादि
हर सान फेनानै रोनावनाय नामा?
लामा सामा उन्दुसोना नाथाय नामा?
- दे आब' बेलाय बे,
- बेलाय बे नङाहाय लावां,
गावखौनो गाव सांग्रां जानांगौ।
रंजानांगौबो-
सानहाबब्ला गलियाव मोसौ मोसा
दुब्लियाव लायना खाफैनांगौ,
मानसिया रंजानानै,
मानसिया हरफा सानफा
गारमा सिग्लाब सिग्लाब मोसानानै
दुब्लियाव हरफा गोजांनानै
मोसौ मोसाया थानांगौ नामा?
ओरैनोबाबो सावरि बादालि
सोरनिबा हाबा खेराय
मोसानाय रंजानाय,
जानाय- लोँनाय
गोमाखायानो माथो नोँस्रा?
(ग्रद ग्रद गोदावो जौ बिदैखौ,
नायगोमोयो सुमित्राया,
बियो जोँ नायना बुङो)
-  सिथाव सावदोँमोन आं,
जानोबा लायनि आं र'
- थोद जाया आं,
जौ लोँग्रा मानसिया बेबादि
फिथा सौराय एनथाब सिथाव
माबा माबि लारु जायो नामा
मागो बैसागुआव?
लाबो खाजिफोर दंब्ला,-
- गैया ओँखामखौनो संङाखै दाबो,
खफि हानाय दं,
र' थाथ' बिदिब्ला
एवनि आं र'।
(हार्सिँङै लोँबाय लावांआ
सिरि सिरि बियो सानबाय-
आयै मागो गैला नोङो!
जौ गारै गारै दिनै बर'फ्रा
नोँखौबो गारहरसिगोन बर'फ्रा।
हनै बैसोर खृष्टान माखाया-
बिसोरथ' सैखालानो,
सोनाबारि बर'दिन,
जीसुनि जोनोम सान
रंजाबाय बिसोर सानब्रै सानबा
दा बर'नि सोलिबोनाय मागोखौ सिरि सिरि
ख्रेब ख्रेब रागायाव मेगन मोख्रेबबाय।
मोजां जादोँ दाबि!?
बर'नि 1905 मायथायाव उजिनाय
ब्रह्म घोरोमारि बर'फ्रा
दिनै जौखौ मुगैयो
बांसिना बर'निखा लेट्रा हारिमु मिथिसेयावबो मुगैया
आंबो मुगैया।
ब्रह्म घोरोम सिबियारि गेदेमाफ्रा मिथिगौ
बर'नि जौ थागौमानि जेब्लाबो
माब्लाबाबो जौगानाय नङा।
जेरैबादि बै समाव-
कालिचरण ब्रह्मआ जौ दाबखा दुमसु
फारि फारि बुख्रुब होदोँ
गावनि हारियाव उजिनाय देरनाय
गावनि आंगोखौ देरसिनाय
गाहाम जादोँ दाबि?
जौखौ बयबो गाज्रि बुङो
थेवबो मानो लोङो?
जौ लोँना बेमार आजार
जौ लोँना गारि मटर एक्षिदेन
गोबां गोबां थैलांबाय।
थैबावगोन होनना बुङो-
जायफोरा दुखु खालामो घोरोमनि थाखाय
बिदिब्ला जौ दाबखा दुमसु बुख्रुबनाय
लेट्रा घोरोमखौ नेवसिनाय
बै गुरुदेबहा दाय दंना गैया?
दिनै सोरबा सोरबा बुङो-
बाथौ घोरोमनि हेँथागिरि गुरुदेबा
मोनसे घोरोमखौ नेवसिनाय
नंखाय होनना गाख्रेबनाय गारजा बादि
बेहा दाय गैया नामा?
बेयो बुंबावदोँसोनो
मन्दिर सभा बायदियाव परिहितफ्रा बुंसोयो-
"दाउसा फारौ हाथारनानै इसोर सिबिनाया महाफाफ जायो।
दाउसा फारौ होयो,
थैया रानलाङो,
खर' मोदोम मानसियानो जायो,
बोर बिनानैबो मोना जायो।
निदान आफोदआवबो इसोरखौसो सिन्थियो।
जायहा जेसे मोदाय होयो
बिहा निदानासो जोबनो गैयासो जायो।"
नाथाय...
बाथौ घोरोमारिफ्रा फुजा होयो
बिसोरो दाउसा फारौ हाथारो, दासिमबो
दाउसा फारौ होनो हायाब्ला
इसोरानो बिसोरखौ लाङो होनना फोथायो।
नाथाय...
दाउसा फारौनि जिउ होनानै
मानसिनि जिउ रैखा खालामनाया
बेखि घोरोम दाबि?
मानसियाल' थांना थानांगौ बिदिब्ला
मानसिया मि जुनारनि देरसिन हिसाबै?
ब्रह्म घोरोमारिफ्रा सोरबा सोरबा बुङो-
जिब जुनार, मानसि मि
समान बयबो समान
गासिबो आंगो ब्रह्मनिनो फिसा।
सानसुमै गेदेमाफ्रा बुङो-
"नोँनि जिउआ जेरैबादि अनजाथाव
गुबुननि जिउआबो एसेबांनो अनजाथाव।")

नै जिउ आंनि लोगो
आं बुंनो हागौ जायखौ आं बुंबाय
बेनो ओँथिया हम आंनि आखायाव
बेसेबा मोजां, जिउ अनसुला नोँ
आंखौ साजायो बेसेबा समायना मोन्दांनाय
जेब्ला लोगोसे आं नोँजोँ, आंहा मिजिँ
नोँनो मिथिगौ, बेसे गोथौदि आर'जआ
थारैनो ओँथि नोँ बिजिरो-
नोँनो गासैबो जाहोना मानोदि आं
सिखारो एमनिफ्राय फुंआव
बेनो जाहोना गासैबो
मावनोदि गासैबो साजायो सान्ना
मानोना बेसेबां नोँदि दैबायो।
नोँ आंनि अनसुला सोलेरनि
लोगोसे नोँ जिउ आंनि गोरबोआव
सैथो बियो आंदि सासे नोँनि।
आं मोन्दांथियो जेबो समफोराव
बेनिखायनो नै नोँखौ मोजां मोनो
नोँनो आंनि जिउ बिसुखे,
आंनि जेरैबो नोँनि
आंनि सोलेर थासान्दि मुलुग,
नोँनो सासेल' जाय गासैबो,
नै जिउ आंनि लोगो
हो गोजोँ लामा सोरां
नोँखौ मोजां मोन्नो अराय
नोँनि बोसोन सोलेर फालिनो।

दाउखा, दाउखा गाबदोँ
नोँलाइ मानो दिखार नांदोँ?
हाबाब जोँनि बारियाव गैया बेदर
मावजि सैमायानो दं सान हर।
दाउखा, दाउखा गाबदोँ
नोँलाइ मानि रादाब लाबोदोँ?
हाबाब आय- आफाया गैया दिनै
थांफिन्दो नोङो गोख्रैनो अन्नानै।

हुरा हुरा सानफ्लाङोमोन आं-
हाबावगोन दा बायग्लिनाय आंनि गोसोखौ
फागुननि बारजोँ जरा फोनांनो,
बिखा गावनायनि गुथाला
दैदेनबायसो जोँमा साना,
गोरबोनि लाथिख' नोजोरजोँ
नायहरो जेब्ला गोबौ मेगनजोँ।
गोजाम बिसम्बि खामग्लिनायनि आलौनायाव
आं मोन्दांदोँमोन मुगैनायनि अर लगायनाय।
. . . . . . . . . . . . . . . .
दिनै गोदान अखाफोरनि सोरांआव
नोँदि हाबावगोन जोँनाय अराव सालाइ एरनो?
गोदान नोँनि आखायाव आंनि नोजोरा,
- बै थाइनै आखाया माबा बुंदोँ
जेराव लाजिगुसु थाइनै आखायजोँ जंखायलायदोँ
बेखौ बुंनो हागौदा
मोनसे रोखोमनि फावल'।
मोदै हुगारदोँ गामसानि दौबाजोँ
नाथाय फेलेँनिल' गाबनाय नङा
फैगोन रंजानायनि मोजोमसे मिनिनानैसो।
मोबायजोँ नायनानै जेब्ला नुयो
सुथि मोन्नायबादि अखाफोर ओँखारबोयो,
सोरांसि दरखंनि आन्दोआव
लाजि गुसु नोङो आमाय-जुमाय गेलेदोँ।

आंनि मेगननि गोफार नोजोरा
नोँनि बिखायाव नांबाय
मानोना आंनि गोसोआ
नोँखौ मोन्नो हास्थायथारो
नोँनि खबाम गोनां आगान
आरो नोँनि मिलौहाब गारां देँखो
आं बेसेबा मोजां मोनो
बेवहायनो आंनि मेगननि सु
नोँनि मिनिखैरौ मिनिनाय आरो
नोँनि समायना देलाइनाय मुस्रि
आं गासैखौबो मोजां मोनो
बेखायनो आं गावनि खालामनो
नोँखौ जोखोम खालामनो लुबैयो
बिनिखायनो आंनि मेगननि सुआ
नोँनि गोरबो आरो गोथार आगानाव

आं सिमां नुदोँमोन
अनजालिखौ लानानै सान बारहोनाय
रावबो फैयै लैथोमा गेजेराव
बेसेबा गोजोन बेसेबा रंजानायजोँ
सिमा गैयै गोजानाव मिजिँ खालामनानै
जिउनि दिङाखौ हगारनानै
नाथाय आंखौ फोजाफैयो होस्रिख्रावनाय
सोबखजानाय बे हानि हावरिया आबादारिफोर
गोमालांबाय गासैबो उन्दुनाय
आं आरोबाव मेसेबनो हालिया
अनजालिखौ लानानै सिमां नुलिया आं
बे होस्रिख्रावनायखौ आथिँ गासिन्नानै
बेसेबा मोजांमोनबाय आं बे जांख्रिथाइखौ
जोबोद गोथार दाबिनाय
बेसेबा गोगो लुबैनाय बियो
बे हानजानिनो आंबोदि दिनै सासे
बिग्रायारिफोर बियो गोथार दाबि
जोँ उदां जानो लुबैयो
समान बाहागो लुबैयो जोँ
बे हानिनो जोँ बिगोमा आबादारि

हिराबायदि गोजोँ गोजोँ थरथिँ
फ्रि फ्रि हानाय अखानि,
थरथिँ थरथिँ गसरदोँ समायनायै
गेरेमसा बिफांनि बिलाइनिफ्राय।
नोँ जोबोद समायना मोदैबायदि
मिनिजि मिनिजि गेलेदोँ बिलाइयाव,
आंनि आसि फारनैजोँ आजावो आं
फुंनि गुसु बाराव गोरोबफानानै।
फ्रि फ्रि अखा नोँ समायना
दुलाराइ मुलुगनि अरनाव,
रंजाखाङो मिथिँगानि गासै जिउ-जिबिया
दाउसिन-दाउला बिफां-लाइफांआ।
हे जोमै आंखौबो देनां लोगोआव लाफा
गोरान जाब्ला सोमखोर मिथिँगाया,
मुलुगाव गले गले बाज्रुमनो आं
थरथिँ थरथिँ थरथिँ।

ख्लाब-ख्बिब मोदान फैयो
नोँनि लिप्सटिकनि...
मेव मेव मोनखांफैयो
थेनथौलांब्लाबो आंहा
बेसेदि बिरो बेरे सिखिरि
नोँनि फारनै गुसुथिनि नोजोर...।

से सेकेण्ड समावनो मानसिनि उजिनाय
बेयावनो थैनायबो।
- - - - - - - - - - - - -
नै बोसोरनि उनावसो बिथां
हांखुला नार्जारीखौ दिनै
आमटेका बाजाराव लोगो मोन्दोँ आं।
दिनै समबार।
आमटेका हाथाय।
होंगो दोँगो हारसानि
गस्ला सुटार गलायाव
हांखुला आरो आं
सानैजोँ थाख थिख
लोगो मोनलायदोँ।
होँगो दोँगोनि गेजेरावनो हांखुलाया
लेँग्रा लेँग्रा थखन लानानै हाया
हाया एब्रे बोथारदोँ।
खृष्टानफोरनि बड़'दिन रंजानाय साना
खाथियाव मोनफै थारबाय।
हांखुलाया गस्ला सुटार बायनो बेसेबांबा
मानसिनि होँगो दोँगोआव
हाबसनफैनायखौ आं गोमोदोँ।
सिरि सिरि सान्दोँबो आं-
सालाया सिगांआव जेरै दुगा
दाबो बेबादिनो दुगा।
मोखांजोँ मोखां सौग्राव लायथारनायाव
हांखुलायानो आंखौ
सिनाय हाना मिनिसुलु रायदावग्रोदोँ ओरै-
मा लांफैदोँब्रा बा?होननानै।
आंबो मिनिसुलु बुंफिनदोँ-
नै गोजां बोथोरनि टेकसुइट् लंफेन
बायना लांनो नागिरदोँ।
होननानै।
आखायाव लानाय जलंगाखौ लुन्दाव दाव
नुनानैबो सोँफ्लांगारदोँ बिथां
हांखुलाया-
हा माथो लाखो बा?होननानै।
आंबो फिनदोँ-
नै अमा बेदर लानायानो सेरथाम।
दा मोनायाव ओँखाम गोरलैनि
एसे लोँनाय जानाय।
बाथ्राखौ आं फोजोबदोँलमोन।
बिथांआ सिरि गंस्रिना थादोँ।
गावनि आथिँ गज'खौ
नायनानै माबा सानहाबदोँ।
दसे समावनो आं हमनो हादोँ
बिथांखौ मानो दासो आंनि
सेराव मिनिग्लाब खुसि फैनाया
हथाद मोखांआव खोमसि जाफैखो।
दान्दिसे उनाव आं थेकसुइट् लंफेनखौ लानानै
थाथ'दो नोँथांआ
होननानै ओँखारबोयो।
लामा थारैनो बिथांनि फारसेल'
न'आव सौफैजासिम मेँगुलायनाय
सानफ्लांबाय थादोँ आं।
आरो न'आव सौफैनानैबो बेदरखौ
दोन्नानै आंनि खटायाव हाबना
टेबिलाव गुफुर बिलाइ,
रेबगन नुनानै
बिथांनि जालांनाय जाथायखौनो सल'
लिरजागोन सान्ना जुरिबायबो।
बावैसो समनिफ्रायनो जाया जाया
दिन आरो बोथोरनि खारि बुथुमनानै
सल' लिरनाय हुदाया जाहांथारबाय
आंहाबो।
दिनैबो नागारथारनाय नङा
गोसोआव थि सानखाबाय।
नै बोसोर सिगां हांखुला आं
समान थाखोआवनो फरायलायदोँमोन
बंङाइगाव कलेजाव।
जोँ मोजाङैनो लोगोबादि लोगो।
रायज्लायनाय सानज्लायनाय गासैबो
फेस्लायैनो गोरोबलायथारनायमोन।
माखासे बिथिँआवल' जोँ सम सम
लोगो जालायनो हायामोन।
मानोना बिथांआ सोरनिबा फार्टि,
लोँनाय-जानाय, सोबनायफ्राव बाहागो
लानो मोजां मोनोमोन।
लोँनाय-जानायाव बिथांआ रावनिबो
खमबो नंखाथारामोन।
दा माब्रै मिथिया।
आं दिनै लोगोमोनब्लाबो बिथांआ
हले सिगां जेरै दा एरै
रायज्लायनाया दं।
हांखुलानि आथिँआ दा फारसे गज'
आगदानिया।
बेखौ लानानै बिथांआ दिनै मेगन
थासेयावबो खाना बादि मोनो।
गोसो थासेयावबो लामा गैयै बादि।
मानोना गाव जेरै थांगोन
थांनो हाया।
रावबो दैबायग्रा गैया।
उनफिन्नो गोनां जायो हांखुलाया।
फरायनायाव मोजांथारमोन हांखुलाया
सिबाय लोँग्रा, जाग्रा बेरायग्राब्लाबो
फरायनायाव गोसो होग्रामोन।
दा बिनि आथिँआनो बेखौ
हरैबो थांनो हाया
फावसयलांथारनोबो हाया
खालामना दोनबाय अराय।
फरायनायखौ आथिँ लेंग्रा
जानाय लोगो लोगो
फोजोबदोँखौनो होनना
बुंनांसिगोन हांखुलाखौ।
नाथाय बिनि आथिँआ बोरै
लेँग्रा जाखो?
फरायगिरिया आंनिफ्राय खोनासंदोँ-
सानसेखालि।
कलेजनि सिगां आनजादखौ फोजोबनानै
हांखुला मोननियाव
आलासि जानो थांदोँमोन आं।
ओइदिनखालि दा बादिनो
बर'दिननि खाथि खाथि हांखुला बिबथैनि
न'आव ओँखाम गोरलैनि जानाय।
गामिनि सेंग्राफोर आरो
माखासे बोरायसाफोरखौ
खुमब्रा गुफुर जानायजोँ हांसोजोँ
जानाय लोँनायमोन।
न'सुं सेरावनोलाय हांखुलायाबो
लेँहर जादोँ बिमादैजोँ।
थांदेरदोँ आंबो लोगोसे हांखुलाजोँ।
गामिनि सावरि बादालियाव
मावा दाङाबाबो खाबसे-खाबनै,
दरसे दरनैया
बाहाग गोमाथारा हांखुलाया।
बे बारावलाय न'सुं सेर
आरोबाव असेथार बिबथै।
सेँग्राफोरा ग्रोन बेरेन्सि बना
लोँग्रोबाय थानायाव जिरायदेरदोँ हांखुलाया।
लोगो लोगोनो लुग्राफ्रा लुबायबो
मोनामग्लुंलायनाय।
बिमादैयाबो थालिर बिलाइयाव
खुमब्रा बोरायजोँ लगायना एवनाय
हांसो बेदरखौ होफैबाय।
खाथियावनो आंबो सियाराव जिरायना दंमोन
आंनोबो होफैबाय बेदरखौ।
नाथाय खाबखौ आं नाङा होनना बुंनायाव
सेँग्राफोरनो हरफिनबाय।
माब्लाबानो लोँनाय बोरायसा आरो
माखासे सेंग्राफ्रा फेदबनानै
नोँबा नोँ आंबा आं
गाव गाबागाव बाथरिखौ होगासिनो थायो।
सोरबाया गबथब गबथब खोनासंदोँ।
सेँग्राफोरनिजोँ बोरायसाफोरनिजोँ
बाथ्राया गोरोबलाया।
सेँग्राफोरना बांसिन गोसोथोलायनायनि
बोरायसाफोरना एसे
लगाय लथाय संसार जानायनि।
बांसिन नांलाय- खमलायनि
सोँखारि लायनाय।
सोरबा सोरनिबा गोजाम
जाथायखौ एरखांदोँ।
सोरबाया लुदोँ आरो गोदावदोँ।
सोरबाना बेदरा लाइयाव दरसेबो गैला
सोरबाना दासो दरसे जामदोँ।
हांखुलायाबो लोँनाय जानायाव खम नखाथारा।
बिनाबो माब्लाबानो उनसिन फैनायानो
लाइयाव दरसेबो गैला।
खाबखौ गोदावखांनाया
खेबबासो बारलांबाय रोखा रोखा
आं नुथारदोँ।
आरो आं गुबुनजोँ मेगन खोख्लैनायाव खेबबेसे जाखो आं मिथिला।
खाबावथ' जोबबानो जोबबानो
लुनो हायो।
नोगोद बाजौ रांनि लाबोखादोँ
हांखुला बिबथै गुलार नार्जारीया।
आवगायाव गावनो बुंखादोँ।
बेदरासो गैया जाबाय दा
हांखुलानि थालिर लाइयाव।
गल' गथ' जाबाय थानाय बोरायदब
हागोरामनि दरसेल'
जामनाय लाइयाव
आखाय फोलावहरबाय हांखुलाया।
सोरबा नायसनहरनाया थब्र खिन्थाहरबाय।
मानसिया सुथि मोनखांना
नायबा माब्लाबानो दरथामसो खुगायाव
होबायानोमोन हांखुलाया।
मानसिया रागा जागारबाय।
ओरैनोबाबो बियो एसेयावनो
एसे रागा जोँग्राखानो।
बे समावनो आं हासुनो
बाह्रायाव थांदोँमोन।
मा मा जालायखौ?
बोरै बोरै जालायखो?

सान्नायखौ हमथा हायै
जौनि निसायाव
नंखाय गोसोनिनो सानथ्रि जानाङो।
जायखौ सानो बेखौनो मावफ्लाङो।
बेलासि समाव हांसो गोदाना
खामसालियाव
दोन्नाय सिखा खुख्रि गोबौजोँ
आगदा आथिँनि हान्थु जरायाव
गोब्राबै दान्ना होयो
हागोरामा।

लिलि लाला थै बोहैयो।

जेसेबां गोदानै सोलोँदोँ
थेवबो थाबोनाय गोजामखौबो
थैजासिम जोँ गोसोखाङो।
दिनै आंहा गोसोआव फैदोँ
गासैबो रोखा रोखा बेरखांदोँ।
थालिर बिफां।
उन्दै समाव थालिर मादाखौ
साखा साखा हानानै
गारि मटर बानायोमोन जोँ।
टेक्टर, ट्राक, लाइलन ट्राक
बायदि रोखोमनि गारि।
आंनि गामिनि लोगोफ्रा
गासैबो रोँजोबथारगौमोन।
थालिर बिफांखौ जोफायनाय
(जोना सिफायनाय)
सम सम सौफायनाय
जोँनि हुदा नंथारगौमोन।
गुना लानानै गान्थि गान्थि
खालामनानै
ओरै सासे ओरै सासे
दंफां हानाय बादि हाफायोमोन।
जोँनाव मोनसे गोसो दंमोन
अब्ला आयं देवबारहा
ग्रोम ग्रोम थालिर बागान दंमोन।
थालिर फिथाइ गोमोन थाब्ला
जोँ बांद्राय लुबैयोमोन
समाव जोँ खावनानै एब्रे खोमायोमोन
जिगाब नङाबा बहाबा
हाग्रायाव आरो
हाखर जावनानै जिगाब होना
फबना फोमोनोमोन।
बेसेबा गिदिर गिदिर
आदै दाबदं लांहानाव
थालिर आथिया दंमोन,
सम सम जोँ बेखौनो
जोफायनो बादि लायोमोन।
माब्लाबा होसो जानायबो
जायोमोन।
दिनै नाथाय थालिर मुराखौनो
सोरनावबा नुलिया,
सोरनावबा फांनै फांथामसो दं।
जाहुहा नङाबा आथियानि
फस्लाखौ ओंख्रि जायो,
बांसिन अमा बेदरजोँ लुबैयो
सोरनिबा सारादु जायोब्ला
अमाजोँ नङाब्ला दाउजोँ
थालिर फस्ला जायो
आंनि गामियाव दाबो
बेजों गोजोनो।

आंनि सोलेरखौ नेवसिनानै
आंनि मुस्रिखौ बावगारलांब्लाबो,
नोँखि हादोँ दाबि आंनि गोसोखौ..!
आंनि समायखौ सिफायनानै
आंनि गोजान जालांब्लाबो
नोँखि हादोँ दाबि दुखुखौ फोजोबनो..!
मिथिगौ आंबो सना-
नोङो मोखांआव रंजादोँब्लाबो
उन्दुना दं नोँबो गोरबो सौखियाव,
जेराव मोदै; गान्दु सिग्लाबनाय।
बैसागु बोथोरनि गोरलै बिलाइजोँ
सोलेरा मिनिसुलु मोसाब्लाबो
सार अन्थाइनि सोगोमनायाव
नोँखि आंखौ गोसोखाङाखै-?
गोदानाल'नो सिबिजाथाव नङा
गोजामखौ थाल्ला बावगारना,
नोँखि सना बेखौ मिथिया?
हाबाब सना आंबो थांङाखै बावनानै।
नोँबो आंखौ थाल्ला बावगाराखै।

The sun resing in the east curtain
Flowers blooming, in the song of birds
To proceed, and proceed
A mile ahead don't get forward
The end of life lake,
The flowers of being complited
Trying to be as much blossom,
The sun's light by root
Pretty much decorations of flowers,
The meaning of the poem in the inside
Beautiful sun, always shine
Gave me a world to show you
The world gave me a poem

Age and is facing each other in
Broken in my eyes
Sometimes cluster of snow
Sometimes twice a time bomb
It's a new season in the world
In the lap of mother
Flowers, stars, rainbow face
The moon's face had me play
Weather wrap in diary
Season be like colors as the footprint
I have reached in the struggle
Edge of the sea highland for catching
I am the itinerant of sky
Which sky is broken
I'm riding to the ocean
Shark in the ocean and crocodile

बेसेबा खुसि आं बे समाव
बेनो नामा आंनि जिउआव?
गुर गुर खारलाङो फरायसालियाव
फिन बेबादिनो फैयो न'आव।
बेसेबा समायना बुहुमा
बेनो नामा आंनि जोनोमा?
दावबायारि आं लामानि
हरै बेसेबा लैथो मोनहैनायनि।
आंनि आफाया बोसोन होयो
दाय मोनब्ला बियो बुयो
आंनि आयआ बोर सास्रियो
गोरोन्थि मोनब्ला बेबो रायो
आय' बेसे गोजान आंनि थांखिया-
आदा-आब'आ आंखौ लेङो
थौ सोलोँ बिघ्दा मोजां नोङो।
बेसेबा समायना अखानि दैस्लुंआ
सावगारि नुनाय सोमखोर अख्रांनि
नायहरो आं खुन्थेँहां गोदोना फोलावना
बेसेबा गिना बिखा हमना।
रंगिना-संगिना बोथोरासो थाङो
हालो-दैलो बैसोआ थाङो
आंनि सिमांआ अख्रांआव
आंनि मिजिँआ बुहुमाव
गोसोआ मोन्दां हरा रोमै रोमै
दावबायनाय अब्लाबो बे समाव।

54
जौमोना बारग'ब्ला बेखौनो
हादोँ खोमायाव सारस्रिनो,
बुंगोन नङा फोरमायगोन-
गासिबो गोथौ ओँथियाव।
55
गोरबोआव सिखोमाना दोनो सोदोबखौ
एब्रेयो बियो अराय लाजिनायाव,
रैसुमै हाया फोरमायनो-
नोँनि लामा सोँनाय गैयाब्ला।
56
दिँग्रायनानै दङ लामाया
एब्रेनानै थानो सानो खाथियाव,
हाद्रि जानाय खोमसियाव
सोरबा दङ दरखंआव,
बोलो गैया आखायाव, मोजांल' मोनो।
57
नोँखौ बजबनानै गोरबोआव
सिरि सिरि सानो लामायाव,
थैनायनि बै फैसालियाव
नोँजोँ आंजोँ लोगोआव।
58
एसेबांदिन नुबाय सानाव
माला जाबाय सावगारिया,
बेसेबांदि साजायबाय
खन्थाइ जाबाय सोदोबफ्रा।
59
नोङोदि खालामो आंजोँ फारागखौ
खोमायाव नांफैयो बारजोँ,
नोङो आंखौ नेवसियो,
थेवबो आं मोजां मोनो।
60
आंनि अन्नायखौ नुवाब्लाबो
बिजिरनो हायो गोरबोजोँ,
नोँनि मुस्रिया बोलाङो खाथियाव
नोँदि सानो नामा गोजानाव।
61
आंहा मोजां मोनो नोँखौ
बेनिखायनो थाङो नायनो खाथियाव,
गिनाया गैया गोरबोआव
लाजिनाय मेवखाङो मोखांआव।
62
हर जाबोला मेसेबो आं
नोँजोँ लोगोआव बिबार बारि,
गैया गैया सिमांनि नोँ-
आंनि रानि नङा।
63
बेखौनो बुंगोन आं-
जुदि नोङो सोँबायोब्ला,
आं नोँखौ बावनो हाया।
64
आं सोँदोँमोन-
माबोरै दं?
बेखौनो नोँ फिनदोँ-
मोजां।मोजाङैनो दं,
आं गोजोनदोँमोन हरसे सान्नानै।
65
नोँनि सावगारिखौ आं नायदोँ,
आं गोजोनदोँ
नोँनि खौरां लानानै।
66
नोँ लोगो सान्नायाव
आं लाजिदोँमोन
बेनिखायनो बुंदोँ आं-
नोँ आंखौ आदा बुंफिनदोँ;
आं रंजादोँमोन सान्नानै।
67
आंखौ बावबाय नामा नोँ?
जेबो खौरां गैया,
बेखौ आं बुंदोँमोन;
नोँ लाजिदोँ?
आरोबाव आं सोँफिन्नायाव
नोँ नुदोँ-
लाजियाखै;
आं सिरि सिरि सानदोँ थारै...।
68
मोजां मोन्नायखौ मानसि
सुबुंङाल' मिथिगौ,
बे नङा;
मिथिँगानि बिफां-लाइफां
आरो...
दंमानियानो थारै मिथिगौ,
नोँबो बारजोँ मिथिबाय,
सानदोँ दिनै गोरबोआव।
69
नोँखौ मोजां मोन्नाया
दिनै लामा आंनि
सोरां आरो खोमसिनि अराय लोगो।
70
बावनाय जाया माब्लाबा
समनि मोनफ्रोम उदांआव,
मेथाइ खनो नोँनिनो-
मोजां मोनो नोँखौ।मोजां मोनो।
71
गोजाम बोथोरनि गोजाम बिलाइफोरा,
ज्रय ज्रय सिरिलाङो...
सानफ्लाङो आंनि गोसोआबो-
गोबालांगोन नामा?
मोजां मोनहाबनाय मिजिँफोरा।
72
बेनो आंनि मोजां मोन्नाय
फोरमायनो राव गैया खुगायाव
मोजां मोनोल' नोँखौ-
गोथौनिफ्राय गोथौसिन।
73
जिउनि गोबां ओँखारनाय सोदोबफोराव
नोँनि मुं ओँथियाव,
बेनो बावनो हायै आंनि
मोजां मोन्नायनि गनाय निजोरा।
74
मिथिँगानि गुसु बाराव
बिलिर जायै गोरबोआव,
मोजां मोन्नाय बेनो गोथार साजायनाय।
75
नोँनि अननाय मागियो,
नाथाय सिरि सिरि...
नोँनि गोरबोनि लुफावनाय गैया;
गोरबोआव बोजबनो मोनाखै-
सिदोब सिदोब थाजिम
अननाय नोँनिखौ।
76
रैसुमै मोजां मोननाय बे सना
मोदै हुगारो आं गावनो,
मादि जाखो हार्सिँङै...
सोरजिनि बे मोनसे सानो गोरबोआ।
77
खौरां लाबोदोँसो नामा-
सानो सिरियै...
बिरनाय आंनि मोखांजोँ
हानजासे दाउसिनखौ।
78
बे आंनि मोजां मोननायखौ
अनसायनाय नङा नोँ?
बेनिखायनो सिरि सिरि।
79
गोसोआव फैयो हरखाब सावगारिया
सानसे लायो सना गोरबोआव
फै गोरबोआव सिरियै।
80
गोरबो साग्लोब्बाय मोजां मोननाय
सिरि सिरिबोल' जिउ मोनसेआ।
81
दिँग्रायनानै दङ लामायाव
सौसि सौसि थांनो हाया गोसोआ
रैसुमै मोजां मोनो नोँखौ।
82
मोनफा मोनफा नोँनि सोदोबा
माला जाबाय आंनि गोरबोनि,
सुजुयो खन्थाइखौ नोँनि मुंजोँ।
83
आंनि उदां अख्रां गोसोनिफ्राय
नोँ बिरथिङो हार्सिँङै
बोजबो सना जोमै
गोरबोआव मिनिस्लुनायाव।
84
जेसे दं आंनि बे गोरबोआव
नोँनि मुं।सिँआव साजायनाय;
मोजां मोनो नोँखौ।बे सोदोब।
85
गोरबोखौ सानना खेवना होदोँ
हाबलांथोँ मोजां मोननाय सोदोबा
आंनि हादो हमदांना थारै-
बेखौनो सानो सना गोरबोआव।
86
माब्लादि फैखो सौग्रावना मुंआ
मोजां मोनबाय बेखौनो हास्थायना,
नोँनि अननायखौ मागियो-
बेखौ हमदांना बुंफै खोमायाव।
87
नोँनि अन्नायखौ हास्थायना थायो
खालिबोल' सिरि सिरि सिरि-
रैसुमै जौमोन बैसोनि सिङाव गोसो
- बे आंनि,
गोहो गैया खुसियाव फोरमायनो।
88
आन्दोनिफ्राय जेब्लाबो फोरमायो
फुथिया थेवबो खुगायाव,
लाजिनाय-गिनाय बे मा?
फोरमायो गोरबोजोँ
गोरबोआव सिरियै।
89
आंनि अन्नायखौ नोँनोनो होयो,
समायना नोँनि गोरबोआव बिजिरनाय,
नेयो सना लाजिस्लु खोमायाव आंनि
गोदै रैसुमै सोदोब नोँनि खुगानि।
90
रैसुमै, नोँखौ नुदोँमोन आं-
साजायनाय महर मोखांआव,
बेरायग्लां नोङो खुसियाव
सान्दोँमोन आं नोँखौ गोसोआव
बियोदि समायना आंनि जिउआव।
91
मिनिनानै नोङो लाजिस्लु
जेरैबादि सावरायदोँ आंजोँ,
एरायलांफिन्दोँ दान्दिसेनि उनाव-
मोजां मोनो आं रैसुमै;
सोरजिनो दैथारहरदोँ रादाबखौ।
92
नोँनि मोखांआव गोग्लैदोँमोन
खावलाबसे आंनि मोखांआव,
लोगोसे-
सना बेरलाव मेगन फारनैया।
93
गोसोआ सौसिलांदोँमोन आंनिया-
दाखा जोमै सिँखावना,
रैसुमै साजायना इयुन संसार मोनसे।
94
जौमोननि बारा बिलिरनायाव
सानहाबना बिजिरो गोरबोआव
सना सानो आं नोँखौल'-
मोजां मोनो।मोजां मोनो मानिया।
95
मिथिगोन मिथिगोन नोँ मिथिगोन
आंनि गासैबो सिखाव गोरबोखौ
आंखौ सानना नोङो बिजिरगोन।
96
नोँनि मुं मुस्रिया
बिजिरनो होया जेब्ला गोरबोखौ,
बिजिरना नायो गावनो साननायखौ।
97
आंनि जिउआव नोँनि गोरोबनाय
थाबथायो मोदोम बिगुराव,
एरायलाङो मुं मोनसे फारागआ
बेखौनो नोँ सानो दा नङो गोसोआ।
98
आंनि साननाय लोगो मोनसेया
आंनि लिरनाय दोँसे खन्थाइयाव
आंनि सौग्रावनाय सोदोब लामा मोनसेयाव
नोँ रैसुमै नोँ-
मोजां मोनो मुं बेखौनो।
99
नोँखौ आंनो मोजां मोनोब्ला
बेखौ आंनो बोजबगोन,
नोँखौ जिउआव हास्थायोब्ला
बेखौ आंनो साजायगोन
रैसुमै नोँनि खाफालाव सिन्दुर
आंनो फुनगोन।

(जोँ नोँखौ गोसो खाङो
फै जोँखौ फोरोँफै खुसियै।)

दिनै फिसाफोरा आन्दायनानै
लेम्प साथि नागिरदोँ सोरांआव,
खावलायो दिनै गथ'फोरा
फैफिन गुरुदेब खेबसे आरोबाव,
नै गुरुदेब ब्रह्म आफा!
फोरोँगुरु नोँ घोरोम आरो
सोलोँथाइ, राजखान्थि, रांखान्थि
जौगानाय हारिनि सोदोमस्रि सिनायथि।
बाखनायथाव आरोबाव गले गले
खौसेथि आरो जौगाथायनि
नोँनि हारिनि होनाय मोनफ्रोम दलिलफ्रा।
फोरोँनाय खौसेथि, अनसायनाय आरो
गासैबो समानथाइ,
मिथिँगा घोरोम गोथार सिबिनाय।
नै गुरुदेब ब्रह्म गुरु!
नायहर जोँनि आखाय खबजबनायखौ
बावाखै नोँनि फोरोँनाय आयदाखौ,
नायहर जोँनि आगान लामाखौ।
नै गुरुदेब सोरांहर नोँ आफा!
बर'नि थरसे गिदिरथार सोरां
जोँनाय अलंबार जानानै।
दिनै फिसाफोरा आन्दायनानै
लेम्प साथि नागिरदोँ सोरांआव,
सुबुंफ्रा जाबाय आरोबाव गोदोनाय
बावगारबाय बयनिबो समानथायखौ।
नै गुरुदेब ब्रह्म आफा!
खावलायो दिनै गथ'फोरा
फैफिन गुरुदेब खेबसे आरोबाव।
नै सिबिजाथाव गेदेमा गुरुदेब!
जोँ नोँखौ गोसो खाङो
फै जोँखौ फोरोँफै खुसियै।

1
नोँखौ मोजां मोनो
नाथाय मिथिया
मानो मोजां मोनो।
2
गोसोआ सानो-
मानो हास्थायो आं नोँखौ?
नाथाय
बे जौमोनआ मानिनाय गैया।
3
उन्दै समावनो सानोमोन आं
बियो आंखौदि मा सानोथाय-
दिनैबो मिथिया मोजां
मादि सानो गोरबोजोँ।
4
नोँनि रादाबा दुखु होयो,
गोरबोजोँ सानहाबो आं-
अब्लाबो नोँखौनो मोजां मोनो।
5
आं फोरमायाखै नोँनो-
आंदि नोँखौ सिरि सिरि...
नाथाय नोँबोदि नाजायाखै
बेखौ मिथिनो?
6
आं जोबोद सानो-
खालि नोँनि थाखायल;
जेबो जेबो समाव गोरबोजोँ।
7
गोदान बिबार बारोब्ला
सिखिरिया जेरैबादि खौरां लायो,
आंबो थायो जेब्लाबो सानबायना-
नोँनि थाखाय सना।
8
नोँ मा सानो?
आं मिथिया,
आं बुंनो हायाखै खुगाजोँ;
अब्लाबो गोरबो
गोरबोआव बुङो-
आं नोँखौ मोजां मोनो।
9
नोँ मा बुंगोनथाय?
आं बेखौनो सानो...
अब्लाबो आं फावस'या मोनसे
रंजालु गोरबोआ।
10
नोँ खोनायाखै खोमाजोँ,
मानोना आं बुङाखै खुगाजोँ;
नोँ जेबो सानाखै,
थारैनो आं फोरमायाखै।
11
आं रायदावदोँमोन मिनिस्लु,
नोँ फिन्नाय होदोँ लाजिस्लु;
गोसोआव दङ नोँनि गोदै मिनिस्लु।
12
आं थाबायदोँमोन-
नोँ गोजान लामा सेराव
जिरायना दंमोन,
माबा सानना नायहरो
खेबसेबाव आं।
13
नोँनि सावगारि जावले फैयो
मिनिस्लु गोरबोआ सानहाबो-
नोँ आंखौ मा सानो?
सोँलुवा गोरबोआव फैयो।
14
जिरि बोहैनाय जाम्फैयाव
दुगैदोँमोन नोँ जोबोद खुसियाव
लामा सेरजोँ आं एरायदोँ
मिनिस्रयु मिनिनायाव।
15
दिनै आं खन्थाइ सुजुदोँ
नोँनि मुं लानानै;
गोरबोआ सना मिनिस्लु जाखांदोँ।
16
जोबनो गैयै लुबैनाय जिउआव
नोँखौ साजायो आं-
गोरबोआव अराय हिनजाव
गोदान महराव।
17
आं थाबायदोँमोन मेँग्लिनायजोँ,
नोँ दैहु फाफेरदोँमोन हार्सिँङै
जेबो रायज्लायाखै
सानैजोँ सिगाआव।
18
सानबाय थायो सिरि सिरि
हाजोनि निजोरा-
बोहैनायबादि जिरि जिरि
गोरबोआव हास्थायो एब्रेनो।
19
मादि खालामो मुं आरो मुस्रिया
नोँखौनो सानबाय थायो गोरबोआ,
सना नोँनि अननाय गैया थेवबो।
20
गोबां रंजानाय गोरबोआव
बाज्ल'दोँ आं माबा ओँथियाव,
बरायनाय गोसोयै बैसागुखौ-
नोँ नायखोमादोँ मिनिस्लु आंखौ।
21
रादाबा आंखौ उसु खुथु खालामो
नोँ बुंदोँमोन-
गाजा नोँनि सावगारिखौ थारै...
हमथा हायै खुसियाव मिनिदोँ।
22
नोँनि मिनिनायखौ आं नुदोँ,
नाथाय आं-
जोबोद गोथौयै सानहाबदोँ।
23
आं फोरमायनो हायाखै
फोरमायनो लामा गैया,
मानोना नोँ आंजोँ साफिया।
24
सिमां नागिरो आं नोँजोँ
समायना बेराय बेराय सावरायनाय,
सिमाङावबो साफिया मानोबा।
25
दिनै नोँखौ लाजिनाय नुदोँ
नोङो लाजिदोँ सोरखौबा?
मेगनाव जोबोद मुहिदोँ।
26
गोरबोखौ बोनानै लांबाय
ना नोँ बिरथिँ होबाय?
अराय समाव सानबाय आं नोँनिल'।
27
मोजां मोनखोमानाया गेङाखै,
बयबो रावबो मिथियाखै;
आंल' मिथिगौ, फेलेँ थाङाखै।
28
नोँखौ सान्नानै समा बाग्लायो
खाथि खाथि सोरां फुंआ फैयो,
माब्लादि साना हाबलाङो
नोँखौ नागाराखै
मोजां मोनो आं।
29
नोँनि अनगा मेगना गेवा,
खोमसियाव थायो मेसेब्ला;
रैसुमै बेरला बेरथा जायो गोसोआ
हुफ्लेयो मैखि खानाय मेगन मुं खोनाब्ला।
30
गोरबोनि लामा नागिरनानै
मेगननि सिखाव गोसोआ
मेँग्लिना थायो सानसेबा दिनै।
31
गोजावलाङाखै आंनि गोसोआ
गोगो बोहैलांदोँसो निजोरा;
सुदेम लुफावनो नोँनि गोरबोआव
नागिरो गोसोआ,
खाबुखौ मोनाखै।
32
गोरबो सिङाव मादि सान्नाय
गासैबो ओँथिया नोँखौ सिरि सिरि
खालिबोल' गोथौ मोजां मोन्नाय।
33
मोजां मोन्नाय सोदोबा गलिदोँ
सिउ सिउ बारजोँ बुग्लेम जाया
गिथाव जौमोननि बिलोआव
दं दिमोल जानानै;
बोहैयाखै नोँनि गोरबोआव।
34
सोनाब फैसालियाव जोँमा सान
मिनिस्लु मोखांजोँ नायहरो-
अनजालि गोजोन लामाजोँ।
35
नोँखौ साननानै नायहरो-
फैगोन थाबायनाय लामाजोँ...
मिनिस्लु साजायनाय गोरबोआव।
36
नोँखौ हास्थायनाया गोमानाय नङा आंनि
जेब्लासिम थागोन जौमोन समा
नोँखौ मोजां मोनखोमाना थागोन
जेब्लासिम जाया जुलि नोँनि।
37
थागोन सिरि सिरि सिरि
मोजां मोनना गोथार नोँखौ,
सानगोन आं नोँनि दुखुखौ
बेरखांनाय लाइमोन जिउ मायाखौ।
38
जेब्ला नुयो मोखांङाव नोँखौ
सानो आं जिउनि संसारखौ।
39
जेसे समाव नोँ मिथिगोन
एसे समाव आं फोरमायगोन,
एसे मिनिस्लु लाजिगोन
गावनि गोहोखौ फोरमायगोन।
40
जेब्ला नोँ हमदां हागोन
आं नोँखौ बुजि होगोन,
आबुं हास्थायना मोजां मोन्नायखौ
थरथिँसे मोदैजोँ फोरमायगोन।
41
हसारनाय खानायखौ फाफ्लियाव लाना
थाबायग्लांदोँ नोङो गोजोन्ना-
मुहियो मेगनाव,
सानो आं गुथालाव मानोबा।
42
आंनि गोरबोआ नोँनाव एब्रेदोँ
गासैबो हादोँ हमदांना
बेखौनो सान्ना मोजां मोनो।
43
नोङो मिथिया बेखौनो?
नोङो हास्थाया नामा?
सिरि सिरि आंदि थेवबोनो।
44
नोङो आंखौ मुगैगारब्लाबो
थागोन आं दखना रोबैयाव,
समा फैयो अब्लासिम;
मिजिँ आरो गोरबो लानानै।
45
जा मोजां मोनहाबबाय जिउआव
लिरनाय थाबाय हांखोजोँ,
दुखु गैया नोँ नेवसिब्लाबो।
46
हरसान जेसेबांदि सानो
सिरि सिरि मोजां मोनहाबो,
बेसेदि मेथाइ गोरबोआव
खन्थाइ लिरो नोँनिनो।
47
नंथारगौ।नोँखौ बरायाखै अख्रायै
मोजां मोन्दोँ बेखौल' बुंगोन;
गोजोन होयो बेनो आबुं जोनोमाव।
48
गोसो आरो गोरबोखौ
नागिरो आं नोँजोँ गोरोबनो,
गोजोन सानसे गोजोमहैनो।
49
नोँ आंनि सान्नायखौ-
मोन्नायखौ नङा जेथो,
बुजिगोन खोनाब्ला देँखो गैयै गारांखौ,
बोखारनानै नायब्ला सोदोबखौ।
50
फारागनि सिगां सोदोबखौ
खोनानोल' मोनथोँ, बे बाथ्राखौ-
आंदि नोँखौ साजायो गावनिबादि;
मोजां मोनो आं।मोजां मोनो।
51
जाय बिबाराव थायो समायना
बेनि ओँथि मोनबाय आं,
सानो आं बिनिखायनो
मोजां सिरि थेवबोनो।
52
बेसेबांदि थाबोबाय दिन मेला
महर मुस्रि नुबाय आं नोँनि,
सानना नायबाय आं गावनि
थाइनै मेगन।
गोरबो दरजा खेवना।
53
जायखौ आं सानबायदोँ
बुंनो बुंनो गोरबोआव-
सोदोबा फुथिया ओँथियाव
गासैबो समायनाय थाखोमायो।

आं बुजि मोनस्लाबा मानो
नोँदि आंखौ गाबनो होयो,
आंखौ बिखा खैसिब मोनो
थैनायखौदि आं एसेबां गियो।
मानो आंनि मोदैखौ होबथायो
जिरि बोनाय मेगननिफ्राय,
नोँ आंखौ रंजाहोयो-
बेयावनोदि आं हार्थखिजोँ रुजुफ्लाङो।
आं मुलुगखौ आन्दायो जेब्ला
खोमसिखौ नोँनो हरो
अब्ला मानोदि जोँसार बोयो हार्थखि
बिजिरख'नो हायै जौमा अख्रांआव।
नोँखि मिथिया जिउनि गिरि
आंनि बिखायादि फांथेनाय
नाथाय बेनि राहाखौदि नोँनो होयो
नोँ जेब्लाबो आंखौ दैदेनो
अब्ला आं नोँखौ खुलुमो।
मानो मानो नांबावगौ नोँखौ
नाथाय अनसुला नोँखौ नांगौ
सोरबा, नोँ माब्लाबा जुदा नङा।
फोरमायना आंनि सिमां रोबैखौ
आं बेखौ दाफुंनि
माब्रै माब्रै आं बैहाय-
नोँ मिथिगौ लामाखौ।
आं मिथिया, मानो आंनि जोनोमा
लोगोसे नोँखौ सिबिनानै
जोँ सानैबो मिथिलायगौ-
नोँजोँ आंजोँ बिफा-फिसा।
आं थारैनो मिथिया
माब्रै आंनि सेराव नोँदि थायो
मानो आंनि उन्दुनाय-सिरि मोन्नाय,
साननि उनाव आरो सान जाखो।
दा लोगोसे बे रेबगन,
आंनि नंगौ सोँनायनि हांखो-
बेयो आंनि मोन्दांथिफोर
नङा सावगारिनि थाखायल' महर।
आं लासै लासै थांगोन-
बुंनांगौ आंनि आं बुंगोन
आंनि सोलेरा गोग्लैसोब्ला, गोसोआव हो
नोँ आरो आं रावबो नङा
नोँनि आं लोगो, आं लोगो।

लावदुमा जा मिनिदोँ मिनिदोँ
खखाबानो हायाव नांनो नागिरलायनाय
आंबो मिनिफानो गोसो जादोँमोन
नाथाय मिथिया हसिया
मिनिफानायावबो दाय थानो हागौ
बेखायनो सोँबाय आं
- माखौ मिनिखोब्रा?
- नायहरलाय नायहरलाय
- माब्रा माखौ बुंदोँ?
- नायहर हनै आलि सौखानायखौ
बेखि सौखानो हायो?
- नोँ जोबोद जाम्बालै
सावगारिखौ नायनानै मिनिबानो जाया
बिजिरनो रोँनांगौ।
मानोथो मानसि जाथारखो?
बियो आलिखौ सौखायाखैब्रा
आखाय गैयैखायसो खुरदोँ
खर'आ मानदोँ जानो हागौ बिनिया।
- हा हा हा...।

आंबो सासे गथ'मोन
जायनि जोनोमा गोरान सिलायाव।
दाउस्रि बासा गाखोनाय एबा थुख्लायनाय
बेरे, गुमा हमनाय नागिरनाय
सेसा नेवलाइ नागिरनाय
दाउ-दाउसिन गावबायनाय
एन्जर जावनाय खुसेंग्रा लुनाय
आंनिबो मोनसे गिदिर हुदामोन।
आंबो सासे गथ'मोन
जायनि जोनोमा उनफिन्नाय बर' गामियाव
गस्ला गोदान मोनब्ला
सान्नै रंजायो आरो
बिजाब गोदान मोनब्ला
सान्नै बोद्लायो
बेयो उन्दै समनि दोहौमोन।
सिलर गोबाथुम गोबाथुम मेँख्ल'-ख्ल'
फरायसालियाव थाङोमोन
खसर-मसर एदावलायोमोन
दुब-दुब दाब-दाब बुलालायोमोन
आमाय-जुमाय थाखोमालायनाय
जल्दं-माल्दं आरो बाथा बुलायनाय
आंबो गेलेयोमोन लोगोफोरजोँ
बायदि गोमो-गोथां आब'मोन-आदा फोरोँनाय।

आं माब्लाबाबो नुफेराखैमोन।
अनथाव बाथाव, नायबाय- थाथाव।
आंनि गोसोआ गलिलांदोँमोन।
थारैनो आं बेखौ
मोजां मोन्दोँमोन।
(16 नबेम्बरनि सान)

" बावनो हाया... नोँनि आंनि
थैस' थांस' सतबांसा लानायखौ
नेवसि हाया नोँनि होनाय
जिउ थुलुंगा गासैबो
बावगार लांनाय नङा
जिउ थुलुंगा गासैबो"
..............
मेथाइखौ फोजोबनानै जौसांनिफ्राइ
लाजिसुलु ओँखार बोयो।
बियो बिखायाव बिखासे दाहा
लानानै सोमब्रोम गाबब्रुं मोखांङै
जिरायग्रा मासियाव जिरायफैयो।
बिनि मेथाइ खन्नायाव
बयबो सिरि थाहाबदोँमोन।
बाज्ल' बायनानै खुगाजोँ फेम्फा सुनो
आरो आखाय खबनोनो गासैबो
बावगारलांदोँमोन खोनासंग्राफ्रानो।
सोरबा सोरबाथ' आरो
मोदै ज्राम ज्राम सिरिदोँमोन मेगननिफ्राय।
सिख्लाया जौसांनिफ्राय ओँखार बोबासो
बयबो गोमलायनाय आखायखौ खबदोँमोन।
सिख्ला मेथाइ खन्नायाव
आंनि मेगननिफ्राय थरथिँ थरथिँ
मोदै बोहैदोँमोन।
सिख्लानि मेथाइखौ जागायनायनिफ्राय आं मोदै मोदै फसरैनो
बेसेबनोबो हायाखैमोन।
मोदै गदोँब्लाबो आं मेथाइखौ
मोजांङैनो खोनासंदोँमोन।
गोसोआव लानोबो नाजाथारदोँमोन।
नाथाय खोनासंनायजोँ लोगोसे
सिख्लाखौ लानानै आं बिबार
बारियावसो बिरलांदोँमोन।
गोदान संसार साजायनो
थि खालामदोँमोन।
जायनि थाखाय आं मेथाइखौ
आबुंङै गोसोआव सेबखांनो हायाखिसै।
सिख्लाया मासियाव गाबहां फावदुर फावदुर
मोखांखौ लानानै
जिरायब्लासो
आं मोदै हुगारनानै नायहरदोँ।
बेयो आरो फरायनो हाथावै खोमसि नङा।
गोसोआव गोजाम मिजिँआ
हाथासि महर रिफिनायसो।
बेयो दा आंनि मेगनाव
समायनासिनसो जादोँ।
सिख्लाखौ नायबाय थानानै आं
बिनि मेथाइनि गुबै रावखौनो
साननो हमदोँमोन।
थारैनो बिनि मेथाइया
गोथौ बिलोनिफ्राय सिखारनाय
मोदैनि खुवा आमै मै
सिखारनाय दं।
बेयो दुखु गोनां गोलाव रमान्टिकनिसो
सेबखांना रोजाबनाय मेथाइसो।
नाथाय मेथाइखौ रोजाबनानै
सिख्लाया मानो गाबखो?
बियो गावनि अंगुबै सल' नङाथ'?
आरो खोनासंग्रा गासैबो
फरायसा- फोरोँगिरि गासैबोनो
बिनि मेथाइआव दुखु जाफादोँ।
सोरबा सोरबा मोदै हुगारदोँ।
आंबोथ' आरो बारग'नो हायाखै।
जानांगौ बिनि दुखुआ बिनि सल'आनो।
गोसोआव बायदि सानबाय आं,
सानबाय थानायावनो आंनि लोगो
बिलिफांआ बायजोआव हासुनो होननानै लेँबाय।
जोबोरैनो लोगो बायदियै
आंबो बिनि रावखौ फेलेँ खालामाखिसै।
खेबसे मोजांङै मोखांआव नोजोर होनानै
सिख्लानि सेरजोँनो थाबायो आं।
बे समाव सिख्लाया एसेबांमानि हाथासि जानाय
खोमसि मोखां गैलियामोन।
बियो एसे मिनिसुलु मिनिसुलु
लोगोफोरजोँ सावरायदोँसैमोन।
कलेजनि साहाजोँ थानाय जिरायग्रायाव
जिरायनानै जोँ बायदि
खोथा रायज्लायदोँमोन।
सासे लोगो सोमदोनाव सोँदोँमोन आं
- सोरनावबा दहाय सिख्लानि मेथाइ
रिकर्ट खालामबायनाय दं नामा?
होननानै।
लोगो लोगोनो बागदावखांलायजासे बिरना बुङो
- आंनाव दंलै।
दाम खमनि मबाइलखाय बारा मोजां खोनायाखै।
- जागोन दे।
खोमायाव होथाबनानै खोनासंबा खोनायाबे।
मिनिसुलुनानै आं बुंदोँमोन।
बिरना आंनो ब्लुटुतनि गेजेरजोँ
सेन्दिँ खालामना होयो।
खुसिजोँनो आं बिरनखौ रोजासेमानि
साबायखर होदोँमोन।
दान्दिसे उनाव जोँ
अडटरियाव सिंआव हाबहैफिनो।
बेलासिथार समाबो जाबोनो हमबायमोन।
बे समाव हारिमुयारि दिन्थिग्लांनाया गेवसारबायमोन।
लाइटा साथिनायजोँ
सिख्लाखौ आं मेगन फिदिँब्लाबो नुआखिसै।
गोसोआव सानबाय बियो थांबाय जानांगौ।
बियो नंगौ मोनाजाफामानि जेरावबो
थानो मोजां मोना।
सोरांबारां जेब्लाबो बियो सांग्रांखा।
सिख्लाखौ आं नागिरबाबो नुयिलाय आं गोजोन्नाय मोनाखिसै।
थाथिरनो गोसोआ मानोबा
खहाबा खहाबा आंहा।
समायना रमायना सिनायजोबनो हायि
सिख्लाफोरा हायलालाय हुयलालाय मोसादोँब्लाबो
नायबाय थानो गोजोनाखिसै आं।
बे समावनो बिलिफांआबो गोजान
जाथारनायलाय आंखौ थांदिनो
होननानै लिँनायाव जोँ
अडटरियाम सिंनिफ्राय
ओँखारो।
लजिँ न'आव सफैब्ला
सिख्लाया माब्लाबानो साजाय आजाय
बिजाब फरायबायमोन जानांगौ।
बिनि खोथा सानबाय सानबायैनो
मोनाबिलिनि जानांगौ आदारखौ जाखांनानै
दो उन्दु लांबाय आं।
मबाइलाव बिनि मेथाइआ रिँबाय थाबाय।

इं 2012 मायथाइनि जोबनो दानाव
आयं मेब्लाया रौमारि
गामिनिफ्राय रुंसारि
जालांबाय।
गोब्राब खानो रोङै बेरामानो
आयंनि थैनायनि जाहोन।
गोबां रां गारनानैबो
दाक्टारनाव नायदोँमोन
नांगौबादि मुलि जादोँमोन।
अजाबो हमदोँमोन रां खरसा
खालामनानै।
नाथाय बाराद्राय हामनो रोङै
बादि जानानै
2012 मायथायाव रुंसारि जालांबाय।
आं दिनै गोसो खांदों आयंखौ
बेयोदि आंखौ उन्दै समाव
बेसे बेयो जंखायोमोन।
बाराद्राय गोसोखांनायनि जाउनावनो
आयं मेब्लानि सावगारि
एरखांना दोननो लानाय
जाबाय।
आयंआ आंनि गामि रौमारिनि
गागिथार सासेमोन।
आं गोसो खांदोँ उन्दैनि
जेब्ला आं उन्दैमोन।
आयंआ आंखौ जंखायोमोन
'मासुमला' होननानै।
(आनै) जान'खि होननाय सासे
रान्दि दंमोन
बिहा सासे फिसाजौ लोगोआव
दंमोन।
आयंआ सम सम लामायाव नुब्ला
आंखौ
'जोँनो नांगौ फ्रेजिलेन फ्रेजिनेन'
होनना बुङोमोन।
बे समाव बर'फोरनि
गोब्राब आलादा हादोद
सोमावसारनि समा
थाद' हांबायमोन।
बेनिनो साया बे जंखायनाय
रावआ।
आनै जान'खिनि फिसाजौआ
प्रेजि मुंनिमोन।
आं नाथाय बे समाव बाराद्राय
रागा जोँफ्लाङोमोन।
एखमबा अन्थाइजोँ खुबैना
होयोमोन।
उन्दै समाव आयंआ
बाराद्रा जंखायोमोन।
बियो बांसिन जंखायोमोन जेब्ला
आं
न'आवनि मोसौखौ गामिनि
साहा थानाय
फोथाराव खानो लामायाव
फैयो होयोमोन।
बे समाव आयंआ लामायाव थाना
जंखायोमोन।
आयंआ थैनाय सानखालि आं
गामियाव गैयामोन।
बे समाव आं बंङाइगामिनि
लजिँआवनो दंमोन।
आयंनि हरखाब रुंसार जानाय
समाव
बिखा खायसिब आं खौरांखौ
मोनदोँमोन।
आरो फारि फारि आयं उन्दै
समाव आंखौ जंखायनाय
रावफोरानो
गोसोआव हरखाब बोहैबोदोँमोन।
सारादु समाव आं सानदोँमोन
आयंआ रौमारिनि बिखानिफ्राय
नैथि रुंसार जानाय सालगुरिनि
फेँखा।
रौमारिनि गाहाय थागिबि।
बेनि सिगाङाव आदै जाथिया
हरखाबै रुंसार जादोँमोन।
सिगांथाराव एम्बु होन्नाय
आं उन्दै समथाराव रुंसार
जादोँमोन।
दा बिनि रौमारियाव रोदा
फेँखा गैलिया।
आनै जान'खियानो बिनि
बिसिमोन होनना बुङो।
बेबो दा रौमारिनिफ्राय
खारलांबाय।
आय' मानसिनि सोलेर!
जिउखौबो हमथा हाया
सोलेरखौबो बेसे गोबाव
अनसायनो
जुदि अबंआ गोसो जायो।
बे समाव आं सान्दोँ-
आयंआ सानफ्रामबो
एसे एसे जौ लोङोमोन।
बियो नाथाय दुगायामोन।
आयंहा मोनसे गोसो दंमोन
बियो गावनि हायाव
मोसौ खाहोआमोन गुबुनखौ।
हाया गोरा जायो होनना
बियो बुङोमोन।
गामिनि अनलायना रायजो
जालायनाय गोजोनै
गावजोँगाव खर' सुंबोलायनाय
बयबो बिहा बिनि
बेयो बिनि मदद नागिरो।
माब्लाबा समाव आयंआ नुस्लाबै
मोसौखौ सोरबा सोरबा
खायोमोन।
नाथाय आयंआ उनाव नुब्ला
मोसौखौ खुन्थिया बुखुना
हगार हरोमोन।
बेयो आयंनि मोनसे
जोबोद गिदिर गोरोन्थिमोन।
जाहोनाव बायदि रोखोम
बाथ्राबो सावराय जायोमोन
सिरि सिरि।
मानोना जोबनाय गैयै अबंनि
सोरजिनायाव
सोरजिजानाय अबंनि फिसा
बयहाबो
थांना थानो
मदद नागिरो, अनसायो
मोन्थाय थायो।
नोँ आं जोँ गासैबो
सासेल' बिफा अबंनिब्ला
जोँहा सुंथालायनायनि गोनांथिया
दं।
मानोना जोँ थांगोन-
फिन सोरबा गोदान फैगोन।
थागिबि रौमारि गामिनि आयंआ
अन्थाव बाथाव बोरायसानि महर
मोनस्लाबैयावनो
हरखाब अबंनि लेँहरनायाव
थांनो गोनां जाबाय सोरगोआव।

नंखायनि थाखाय सोरबा घोरोमिया
खुगाजोँ सोरखौबा
साव होयो।
दायनि थाखाय सोरबा घोनिया
सोरखौबा आखायजोँ
साजा होयो।
बेयोकि मानसिनि मोनसे गियान?
एबा जोनोम जोनोम सुबुंनि घोरोम?
घोरोमनि बोसोन जाय फालिया
नरकआव गोग्लैनाय बिनि जाहोना।
घोरोमनि बोसोन सोर फालिदोँ-
जाम्बाया ना सियाना?
बबाया ना खानाया?
घोनिया ना गोरिबा?
सादुआ ना सिखावआ?
राजाया ना फोर्जाया?
गुरुआ ना सोलोँसाया?
सोरनियाव दं गियाना-
गुरुनाव ना सोलोँसानियाव?
जाम्बानाव ना सियाननियाव?
नाथाय बयबो समान
बयबो जिउ महर मोनसे
बेयो माब्रै जानो हायो?
सोलेर लानानै जिउ जादोँब्ला
सोलेरखौ अनसायनायाबो मोनसे जिउ घोरोम
देहा सोलेरखौ मान होनांगोन
देहा सोलेरानो जोँनि घोनब्ला
देहा सोलेरखौ अनसाय नांगोन
देहा सोलेराबो बेसेन दंब्ला
अब्ला जागोन घोरोम गोथार
साननाय होननाय मोजां
जोनोमनि बेसेन बेनो जागोन।

गोथां मिथिँगानि बिलाइ
सिरिदोँ दालाइ मानख्लाय दालाइ
आंनि मेगन सिगांआव।

गाबदोँ एम्बु एब अं एब अं
दैज्लां हांख्रायना हाखर हाब्रां,
जोमै दाखा दाखा अख्रांआव
आंनि गोसोआ सान्नायाव
नंगौ एम्बुआ अखा लेँहरदोँ।

सिख्लाया आंखौ जोबोद गोसो थोयो,
नाथाय आंबो बिखौ बांसिन गोसो थोयो।
आं जेसेबां बिनो फोरमायना लानो सानो,
बिबो एसेबांनो फोरमायना लानो सानो।
नाथाय हाया हाया रावबो फोरमायलायनो हाया।
जेन'बा बियो बबि आं बबा।
नाथाय मोजां मोन्नाया मोनसे जिराद,
बियो सानसे बेरफ्रुगोनखि बेरफ्रुगोन।
थेवबो बेरफ्रुनो बा सेकेण्ड सम थाबावनायावनो आं सानसेखालि अनजालिनि खाथिसिम थांबाय।
थोर थोर मोदोम मावदोँ,
गन्थंआ बारा बारा मेवसिन्दोँ।
बे समाव रावबो गैयामोन,
दङ होनोब्ला बबेबा बिफां दालाइयाव दाउसिनफोर दंमोन जानो हागौ।
नायहरखोमादोँ एबा नायहराखै मिथिस'वा।
लासै लासै आं अनजालिनि खाथिसिम सहैबाय।
आं जोबोद गिबायबो माब्रै बुंगोन।
गोसोनि बाथ्रा,
गोरबो सिंथारनि बाथ्रा।
जेखियानो जाया जुथानि लेसखौ गोरायै खाखादोँ।
सोबानोबो हागौ,
माथो थिक सिख्लाफोरजोँ?
बेखायनो हुसियार जाखादोँ आं।
"आइ लाभ इउ" बुंना खारगासिनो खारबाय आं।
नाथाय अनजालिया आंखौ होसोमारबायसो।
खारै खारै राहा मोन्थारै हार्सानि न'आव थ्रोब।
दरजा ख्रे।
अनजालिया दरखौ नारदोँ आरो नारदोँ।
खोरखि खनायाव थाखोमाना थादोँमोन आं।
खोमा होनानै मा मा बुङो खोनासंनि सान्ना खोमा बिसिनानै।
खेबसे अनजालिया खोरखियाव दां बुफैबाय,
आं ओरैबादि बाग्दावबायदि
"आययै.........."
दुबफुं सिखारबा थारैनो आयआ आंखौ खोरखि बुना फोजामारदोँसो।
मानोना समा फुंनि 7-30 रिँगा जाबायमोनानो।
बंङाइगामिनि लजिँ फारसे आगान होनो समा जाबाय।
9 रिँगायाव कलेजआवबो सेथि साननि फेरियडआ जागायगोन, सहैथारनांगौ।

नेना थादोँ फैसालि गोग्लैनायसिम
अखाफोर ज'हाबनाय खोमसि हर
हाथासि हार्सिँङै।

उन्दै समनिफ्रायनो आं नुदोँ
आं मोन्दांथियो जेब्लाबो
बेसेबा रंजाथाव सानफोरा
अनसुलि बिमानि अन्नाया।
बियो जेब्लाबो मिथिगौ
माब्रै अन्नांगौ?
बोरै बुरखायनांगौ?
आरो गोनां आंनोदि।
बियो जेब्लाबो आंखौ बुङो
बेसेबा समा बारलांबायबो,
जोबोद रंजाथाव आरो रुइदोब।
आयै नोँ आरो आं
रागा आरो गाबनाय
नाथाय मोदै हुगारनो नोँदि फोरोँदोँ।
मोजां मोनो आयै
गोरबो गोसो गासैबो आंनि।
नोङो सानफ्रोमबो आंखौ नुयो
आंहा गोसोआव दं,
उन्दैनिफ्राइ लाइमोन दिनैबो,
सुंद' सम आरो बोथोरा थांबाय।
नोँ समायना आंनि आय
नोङो जेब्लाबो मिनिसुलि
नोङो जेब्लाबो गोहो गोनां
मोजां मोनो नोँखौ बिमा
नोँनो आंनि जिउ मुलुग।
साबायखर गोरबोनि गासैबो
मिनिसुलि रंजानायजोँ,
आं मिथिया नोँ मानो मोदै हुगारो!
आरो मानो हरखाब गंस्रियो
नाथाय मिथिगौ आं
नोँनि मोजां मोन्नाय
नोँनि आंखौ खुदुमनाय।

' आथोनानि सख्लेट बिरि
मोनो'
उन्दै समाव फंबाय सिरना
मेथाइखौ रोजाबोमोन।
आथिखालाव बेनि खुगायाव
बे मेथाइखौ खोनाया।
बावैसो 5/6 बोसोरनि सिगां
25 फैसा 50 फैसाया
गोबां बिनि आखाय
बिनि आखायाव गेलेदोँमोन।
दिनै 25 फैसाखौथ' दोन
(सोलिला)
50 फैसाखौबो नुनो थांलिया।
आमटेका गेजेर फरायसालियाव
जेब्ला आं (जोँ) फरायोमोन
50 फैसाखौ मेथाइ जानो मोनोमोन
अनसुलि आयनिफ्राय।
आफायाबो एखनबा बिथारोब्ला
बांसिन 2 रांखौ होयोमोन।
बेजोँनो आं (जोँ) साना गोरान
बुद खालाय गथाखौ
गोजोनै जानो हागौमोन।
आथोनानि बै समाव
सख्लेट मोनसे मोन्नानै
आरोबाव बिरि
(साल बिलाइनि थन्नाय)
मोननो हाबावोमोन।
जानांगौ फंबाय सिरननि खुगायाव
गोजौनि मेथाइया
गावनि खुगायावनो बेरखांग्रोयो।
(बेखौ मिथिया जे-
बेनो सोरबासो फोरोँदोँ
ना फोरोँङाखै?)
आथिखालाव जोनोम जाना
रायज्लायस्लिँनो रोँनाय उन्दै
गथ'नि आखायावनो 10 निफ्राय
50 रांसिम गोग्लैयो।
बिसोरो 25 आरो 50 फैसा
मेगनजोँ नुनांगौआबो गोब्राबसै।
जानो हागौ बेखायनो
फंबाय सिरननि मेथाइ जेन'
गोमालांथारसिगोनस?
बेनिखायनो लिरखांनाय जाबाय
जायखौआं खोमाजोँ खोनादोँ
गावनि मेगनजोँ नुथारदोँ।

100
साननायजोँनो बुंफबनाय सोदोब आंनि
अननाय जासिगोन जिउ मोनसे
हास्थायनाया जासिगोन हां मोनसे,
नोँनोनो होयो रैसुमै आंनि
बावबाय।
101
दिनै नोँनि दखनायाव
जोमग्रा फास्रा रोबैयाव
दङ आंनो सिरि सिरि...
आंगायनाय गैया नायनो महराव।
102
खाफालाव मोनसे लिरनाय दं
बे मोजां मोननाय सिखावै,
हास्थायो आन्दोआव-
नोँखौ साजायनो गावनिबादि।
103
नोँनि रागाया जोँखांथोँ गोरबोआव
हेँथा आंनि अख्रा हास्थायनायाव,
अब्लाबो बुंगोन गोरबोआ-
नोँ आंनि।नोँ आंनि।
104
फेनाय नङा आंनि मोजां मोनहाबनाय
जागायनायसे जौमोननि-
नोँ आंनि
नोँ आंनि
साजायो बेखौनो मोनसे लामायाव।
105
जेसे दं सोदोबा
गासैबो फानफ्रेनाय बिखानि,
मोजां मोननाय बेयो,
मोजां मोननाय आंनि-
थबस्र' जलाङा सानसेनो,
बेरफ्रुथोँ सानसे जाबासो समा
बेसो आर'ज जिउनि।
106
नोँ जेब्ला सिगां रायदावो-
आं सानग्रोयो बाथ्राखौ,
रैसुमै नोँनो फिन्नायखौ होयो;
मिनिस्लु मोखाङाव मेगना।
107
नोँनि अननाय मोनाखै आं
गोसोजोँ सानो बेखौनो,
नोँनि फिन्नाय मोनाखै आं
सोँनायखौ आंनो होआखै,
रैसुमै गोजोनो आं अब्लाबो।
108
बेबादि नोँखौ सानै सानै
उन्दुलाङो आं गोजोनै,
मोजां मोनो सना नोँखौनो।
109
नोँनि मुं लानानै सुजुयो खन्थाइखौ
नोँनि देँखो बोनानै रोजाबो-
आं मेथाइखौ।
110
मिथिया मिथिया आं
नोँदि मा सानो आंखौबा-
मोजां मोनो रैसुमै आं।
111
दिनै आं हमदांबाय गावखौ
नंखाय नङा गावनि हास्थायनाया,
जिउनि बाना मोजां मोननाया।
112
फुर्णिमा दिनै अखाफोरा गावदां दां,
रुजुयो समायना खावलाय फावदुर
रैसुमै, खन्थाइ सुजुयो गोरबोआव।
113
माब्ला हमदांगोन सना नोँ?
आंनि सिखाव गोरबोखौ,
सिरि सिरि मोजां मोननायखौ।
114
गोबां बाना जिउनि-
- आंनि मोजां मोननायखौ,
हागोन माबे समाव?
फोरमायनो खाबु गेबेँङै-
बेखौनो सानदोँ दिनै गोरबोआ।
115
सुखुआव-दुखुआव-मिजिँआव
थायो नोङो गोरबो इसिँआव,
रैसुमै बावगारा दिनै नोँखौ जिउआव।
116
गाज्रि मोजां बिजिरनायखौ
सान्नो हागौ आंनि गोरबोखौ-
मानोदि बियो मोजां मोनखोमायो।
117
जेब्ला नोँ साफियो आंजोँ-
- सोँगोन आं नोँनाव,
जिउआव सायख'खो सोर लोगोआव
आंखौ दोनगोन गोजानाव?
118
जिउआ आंनि लाइजौ बिखुंआव?
गोसोआ आंनि बांग्रिँ गाथोनाव?
सोङो आं अबंनाव-
मोजां मोनो नोँखौ मानो जिउआव?
119
गोरबोआ आंनि रमान्टिक रायजोआव
नोँखौ फोरमायनाय बह्रा सोदोबाव
मोजां मोननाय राव गोरबोआव
गैया फोरमायनाय खुगायाव।
120
माब्ला नोँनि जुलि समा फैगोन
सोरनि गोरबोजोँ गोरोबनायाव
सानो दुखु गोरबोआव।
121
बै आंनि मोजां मोननायखौ
फोथांना लाखिथोँ नोँनि-
गासैबो आंनि गनाय सोदोबा।
122
नोँ दुखुआव गाबगोन-
अख्रा आंनि मोजां मोननायखौ,
बेनिखायनोसो आं फोरमायाखै?
गावनि गोथार हास्थायनाय-
जिउनि मोजां मोननायखौ।
123
नोँ आंनि मोखांआव खोमसि
- आं नोँखौ लुबैयाखै;
नोँनि मिनिस्लु महर-
बेखौनो लुबैदोँ नायनो,
समायना मुं मुस्रि मोजां मोन्नो
सिरि सिरि सिरि।
124
सानदोँ आं नोँनि सायखंआव
सिरि सिरि नोँखौ-
नायना गोजोन्नो
जेराव नोँनि खुसि आंदि दुखुआव
गोजोनो आं बेवहानो।
125
आं लाइजाम नोँनो फोरमायगोन
गोबाव जाबाय समा-
गोजाम सोदोब दिनै खोमायाव
रिँबाय थायो गोरबोआव।
126
सेरेफुन्जियाव नोँजोँ आंजोँ-
बेवनो मिथिगोन गासैखौबो
सोदोब बह्रा बिखायाव।
127
मोजां मोन्नाया बिबार बादि
थफियो गेवलाङो-
मोदोमफ्रु बारजोँ गिदिङो
गोरबोनि बारसे बिबारा
- दा गेवलाङाखै,
खाबुखौ आंनो होआखै,
दै नोँनो लुवाखै बिथ'आव;
बेयो थाखोमादोँ बारि आंनि
- गोथौ हाखर गोरबोआव।
128
जेरैबादि नोँ सानो लामायाव
आं साना बेबादि मिजिँआव
बिबारबादि महरै नोँ मिनियो-
दुखु गोनां सानहाबो आं मुस्रियाव।
129
बारसे बिबारा आंखौ सानहोयो
सम गैया बेहा आरोबाव-
लरहायो सिरियै...
दुखु नाङो मालिया;
आंहा दुखु फैयो ने?
130
मिनिनाय जेबो गैया मोखांआव
फैगोन फेलेँ फारागआव,
बेखौनो सानहाबो लामायाव।
131
आंनि जिउआव मोजां मोननाय
बेयो सानसे रुगुं गैयैआव-
बेरखांनाय गोरबोआव सोदोब
- अरायसमनि जागोन हास्थायनायाव।
132
गाबनो नागिरो गोरबोआ
जागोन जाया इयुननि
- सना साननानै नोँखौनो।
133
आबुं जाबाय अननायजोँ
सोदोब बह्रा ओँथियाव?
मादि सानगोन मिथिया नोँनो।
134
मिजिँ बाफबनाय जिउआव
साजायो साजायो महर नोँनि-
लु गोरबोनि मुं सुना।
135
सानबाय थाना लुबैनायनि थाखाय
दाखोन जाबाय गोरबोआव,
खेबख्लाब जाया अननाय।
136
नोँनि गोरबो दांग्रोम बायनानै
मोनबाय आं गोथौ निजोरा-
बिरखांनो हाया खुवा महराव
मोजां मोनो बेवनो गोजोमनानै।
137
नोँखौ आं गोसो खाङो मुंआव
बावनो हाया मुस्रियाव,
मोजां मोनो हाबायाव।
138
मोखांआवनो नायहाबो सानना
नोँ फैब्ला मोखांसे मेगननाव,
आंनि गोरबोनिफ्राय ओँखारनाय रावआ
सोदोब गैया बुंफोरनाय हास्थायनायाव।
139
नोँनि मिनिस्लु मिनिनाय
गोजोन होयो गोरबोनि सोदोबाव
- गोरबोजोँ गोरबोआव।
140
बेबादिनो आं सानहाबो
नोँनि साननायखौ बिजिरना,
नोँनि दरखंआव थाङो-
आंनि गोसो बायगर मेगना।
141
बिखानि खामग्लिनाय अरा
जोँखांफिनो साननायनि बारजोँ
लाजिनाय मेवखाङो उनफिनब्ला
गोरबो सिङाव गोथौ नागिरो।
142
खोमसि हराव मिनिग्लाबो
उन्दै उन्दै एम्फौफोरा,
गोसोआव फैयो आंहा-
जुलिनि ललिनाय गोरबोआव।
143
हेँथा नङा नोँनि साननायनि
गोरोबनो लुबैयो जिउ गोरबोआव,
अरायबो हास्थायो सानैजोँ-
दुगा नङा गोसो मिजिँआव।
144
होदो नोँनि गोरोबनाय
साननायखौ
सिरियै सानहाबनो बेखौ,
अरायबो मोजां मोनहाबनो।
145
नोँनो फोरमायनो मानोबा
आंहा फैयो गिनाय-
फिसियो मोजां मोननायखौ,
देरबाय हालो- दैलो जिउआव।
146
जिउआव जेसेबां सान
लोगो मोनबाय मेगन लामायाव
जायाखिसै फोरमायनाय-
आं नोँखौ मोजां मोनो।
147
जिउआव दिनै जाय थाखोमादोँ
बेनो जादोँ नोँनो-
आं फोरमायाखै बेखेवना,
आं बुङाखै खोमा बिलाइयाव।

सासे जाम्बा आरो सासे शहरनि सियान?
- - - - - - - - - - - - - -
लामायाव बुदांखौ बिरफुं
माहाजोना लोगो मोनो।
बियो सिनायै बुदांखौ रायदावो।
बिरफुं- नै फंबाय,
आंनो बैसागुनि बोरमा मासे
नांगौ जादोँमोन।
बुदां- ए, बुन्दा ना खासि?
ना बुन्दि?
बिरफुं- बुन्दाबाबो जागोन,
खासिबाबो जागोन फंबाय।
बुदां- ए, जोँहानि आदा बेरग'नाव
मेल्ला बोरमा दं।
र थाथ' सोँहैनां।
(खारलाङो फैफिनो)
फानोनो आदा।
बिरफुं- मा खावसेल' फानो!
बुदां- नङा आदा,
मानि गोरोन्थिया आंनि।
फानोनो।
बिरफुं- अ' मोजाङानो जाबाय बिदिब्ला।
हा बुन्दाना खासि जाखो फंबाय?
बुदां- र र नायनां..
(खारलाङो फैफिनो)
आदा बुन्दा।
बिरफुं- खोनासंनो एसे बोरैबा मोनो।
बुन्दाल' होन्नानै आदाखौ
बुङाब्लाबो जागोन फंबाय।
बुदां- माने आदा...
बैसोआवथ' नोँ आंनिफ्राय
देरसिन जागोन आदा।
बिरफुं- आरसा जाथोँसै बिदिब्ला।
हा बोरमाया माबादि जाखो?
बुदां- बोरमायाथ' लोदो लोदो आदा।
बिरफुं- माने एसे फुंहांनाय नामा?
बुदां- नङा आदा,
एकदम लोदो लोदो।
बिरफुं- मा गाबनि जाखो बोरमाया?
बुदां- ए, बावलायबायसो।
र र नायनां...
(खारलाङो फैफिनो)
गोजालै आदा बोरमाया।
बिरफुं- माने गोजाहां नामा?
बुदां- नङा, एकदम गोजाथार।
बिरफुं- अह' माने फंबाय...
आंखौ आदा होना लसेनो
गिदिर होनबा मोजां
जागौनामा?
बुदां- जागोन जागोन,
महर मुस्रिखौ नायोबा
आरो सोलेरखौ नायोबा
नोँसोरबादिखौ बुंजायो।
बिरफुं- अनुमान बेसे जागोन फंबाय
अजना?
बुदां- ए र र,
(खारलाङो फैफिनो)
सेरबासो जागोन गिदिर।
बिरफुं- दामाबा बेसे जागोनथाय?
रायज्लाय हैनांसिगोन फंबाय।
बुदां- ए र र, थांनि...
(खारलाङो फैफिनो)
15जौसो नांगोन होन्ना
बुंदोँ गिदिर।
बिरफुं- हाब फंबाय माबादि 15जौ जाखो?
नुफेरा खोनाफेरा मुंनि
जौ जाखो बेलाइ?
1000बियार जौआनो जाया होनबा?
बुदां- र र आं रायलाय फैनि...
(खारलाङो फैफिनो)
मानिथारानो गिदिर।
15जौ नांथारगौ होन्ना बुंदोँ।
बिरफुं- हा बहा मोननांगौ जाखो फंबाय?
बुदां- र र आं मोजाङै सोँहैबावनि...
(खारलाङो फैफिनो)
मानिथारानो गिदिर।
बिरफुं- हा बहा मोन्नांगौ जाखो फंबाय?
15जौआलाय भुटाननि ना लण्डनि जाखो?
ना ना आसामनिनो जाखो?
बर'फोरनि?
बुदां- (मिनियो) ए...
हा: हा: हा;-
15जौ मानि फन्द्रस'खौसो
होन्दोँलै आदा।
बिरफुं- ए..., हा: हा: हा;-
थौ फन्द्रस'आलाय आंनाव दंखायो।
थौ नायना लाना फैनि।
नोँनो 1000बियार जौ लोँहो थारगोन आं।
बुदां- 1000गाहाम बियारखौ आं लोँनो
हानाय नङालै आदा।
गंनैसो बारा बियार लोँहोबानो जायो।
मोनलोँफेरथाराखौ आं माबादि
बियार जौ बेलाय?
गिदिर गोलावफ्रासो सालाफ्रा....।