148
खेबसेल' खुदुमनायजोँ गावखौ
गोजोन्नाय मोनो गोजोन्नाय मोनो,
रादाबा सिरि सिरि
- गोसोनि साननायाव।
149
जिउआव थाखोमादोँ बे मोनसेल'
जौमोननि बासा गोरबोआव,
मोजां मोन्नाय आं नोँखौ।
150
नोँ गावखौ बुजियाखै
खौरां लानाय आंनि नोँखौ-
मादि सानदोँ सिरि सिरि-
नोँनि आंनि इयुननि।
151
नोँजोँ अराय सावरायनायखौ
थिसनबाय गोरबो दाइरियाव,
मादि समायना मिथिँगायाव,
मोजां मोनो आं नोँखौ।
152
निहोर सिग्लाबनाय गोरबोआव
बोजबना लादोँ साननायखौ-
नोँ आंनि।नोँ आंनि।
153
नोँजोँ सावरायनाय बाथ्राखौ
आरो बावनो हालिया,
मोनफिनगोन आं गोरबोआव-
नङाब्ला आंनि दाइरियाव।
154
बाबोरै फोरमायनो साननानै
थाफिन्दोँ आं बिजिरनानै,
नोँदि सावरायदोँ मिनिस्लुयै आंजोँ-
नोँदि लाजिनायाव थागोन सिरियै।
155
आंनि गासैबो नोँनो
बावदो सिरि सिरि सिरि-
मोजां मोनना; साननानै अरायनि।
156
बाथ्राखौ फोजोबनो हायाखै खुसियाव
रैसुमै सना-
सावरायो लाजिस्लुनाय सोदोबाव,
आंनि बेरखांथोँ गोरबोआव
रंजानाय मोनफा मोनफा ओँथियाव।
157
गिदिँबायो नोँखौ लानानै
साया माया, साया माया
मुहिनां गासैबो मेगनआव।
158
बेरखाङो गासैबो मेथाइयाव
- गोरबो खन्थाइयाव आबुंङै,
रैसुमै सोदोब गोरबोआव।
159
मिथिगौ आं गासैखौबो
मानिनाय गैया जौमोना,
मोजां मोनो नोँखौनो-
सिरि सिरि सिरि।
160
जाय आंनि खोमायाव रिङो
मोजां मोनो बेखौनो बिजिरना,
रैसुमै मुं नोँनि गोरबोआव
रिङो जेब्लाबो रिङो।
161
नोँनि अननायखौ मोनाब्लाबो
मोनदोँ आं रादाबखौ
- मोजां मोनो नोँखौनो जिउआव।
162
लाजिब्लाबो गले गले नायफ्लाङो
जेराव- मेरावनो नोँखौ नुयो;
गोसोआव मोननो हास्थायो।
163
साननायनि गोमो- गोथां
जायख्लं सावगारियाव
गोदोहाबो आंनि गोरबोआ,
जोमै सिँखावना बिरलाङो-
बार जाना गोजोन बिलिरो,
नुयो सना साया माया मेगनाव।
164
जोबोद गोहो लानानै नोँनि सेराव
गासै आंनि मोजां मोननायखौ
सानो आं बेखेवना फोरमायनो,
नाथाय नोँ साफिया हार्सिँङै।
165
आंनि लाजिनाय गोरबोआनो
लाखोमाना दोन्दोँ आन्दोयै जेब्लाबो,
आं सानो फोरमायनो-
रैसुमै आं नोँखौ हास्थायो।
166
जानो हागौ नोँनि थाखाय
सानबोलावरियावनो आं-
सानस्रिबाय थादोँ मुखुबथियाव।
167
आं मिथिगौ-
आंनि थाखाय नोँ
- माबा सानो नङा,
अब्लाबो आंनि हास्थायनाया गोथार।
168
रैसुमै, नोँखौ आन्दोयै
- मोजां मोनखोमानायानो
आंनो अराय समाव गुबुननि-
बाफबफैनाय सोदोबखौ खोमादोँ।
169
आं मिथिगौ-
आं नोँखौ मोजां मोनो,
बे बाथ्राखौनो आं दोनखोमादोँ
सिरि सिरि सिरि।
170
आंनि गोरबोआव हाबना नायब्ला
नोँ नुगोन सना-
आंनि गासै गोरबोआव गलिनानै
नोँनि गोरबोआव बोहैनो लामा नागिरदोँ।
171
गोरबोआव बोहैनाय मोदैया
लुफावदोँ जेब्लाबो सानहाबना
खन्थाइ बेयो रमान्सनि।
172
जेब्ला नोङो आंनि गोरबो हमदाङा
थागोन अब्लासिम आन्दोआव;
मोजां मोननाय बेयो जौमोननि।
173
मोजां बिबारनि बारियाव
जेब्ला बेरायो सिमांङाव
नोँखौ गोसोखाङो आं हरखाबनो
गैया सिमाङावबो लोगो मोना नोँखौ।
174
आंनि मिनिस्लु मोखांआव
आंनि रंजालु गारांआव
नोँ मोननाय नङा सानफ्लांना
आंदि सिरि सिरि मा हास्थायो।
175
सोदोब बह्रा रमान्सनि लैथोआव
गोजोनना थानानै जिउआव
मोनबाय आं फोरमायस' हायै-
दोरफो दोरफो खामग्लिनाय बिखा,
राननो रोङै गोरबोआव मोदै,
फुवा मुवा निजोरा बोहैनाय।
176
आंनि नोँखौ मोजां मोननाया
- सैथोबादि समायना,
नोँखौ गोथार गोरबोजोँ हास्थायनायाव
माबा साननांगौ एबा
लाजिनांगौ दं
- होनना आं सानाखै।
177
आं नोँनो खुगा खेवनानै फोरमायाखै-
बेसेबांदि आं मोजां मोनदोँ;
नाथाय गोरबोआव
नोँनि रादाबा जेब्लाबो-
थांलाय फैलाय खालामदोँ।
178
आंनि अन्नायजोँ बुंफबनाय बिखायाव
नोँ नुआखै साजायनाय,
बे अननायखौ आं सानो-
नोँनो होनो,
नेवसिनाय नङा जुग जुगामि।
179
बेयो जौमोननि मोनसे आन्दो हास्थायनाय
फोरमायनो हायाखै खुगाजोँ;
सिरि सिरिल' फोरमायो मिथिस्लाबै।
180
नोँनि हायनानि सारफावनाय सोरांआ
आंखौ मुहि होयो मेगनाव,
मोजां मोनो आं।मोजां मोनो।
181
नैबे आंनि गोरबोआव
दाखा दाखा जाबाय थैसाम,
नोँनि मुं मुस्रि एब्रेना।
182
बिखा बुंजासे अननाया
गलिदोँ आंनि गोरबोआव,
लामा मोनाखै एब्रेनो नोँनि-
थेवबो नागिरो लामा नोँनि।
183
मिथिगोन मिथिगोन नोङो
आंनि राव फाव गासैबो,
सान्नाय होन्नाय गुमुर-
आंदि नोँखौ सिरि सिरि।
184
जेरैबादि थायो आं सानहाबना
गोरबोआव नोँनि अननाय मागिना
होदो आंनो नोँनि-
अननाय गोरोबनाय गुमुरखौ।
185
सोर मिथियो आंखौ?
नोँखौ हास्थायनाय सिरि सिरि
निजोम सानसुथिर समाव
- दान्दिसे सानहाबो गोरबोआव।
186
जेसेबां सानो फोरमायनो
हमथाफिनो बोलोगोरा लाजिनाया,
हांमानि दैसा सेरजोँ हार्सिँनो
एरायलाङो सिरि सिरि सिरि।
187
लैथोनि फेँफोनाया खुसियाव
जेरैबादि रंजायो बिखायाव,
आंबो सना नोँनि मुस्रियाव
आंनि मिथिँगानि गोरबो बिखायाव।
188
नोँनि गारांजोँ सिरि मोनो आं,
नोँनि मुस्रियाव सानहाबो।
189
नोँखौ मोजां मोननानै
गोमाना थाङा रादाबा,
हार्सिँङै गेवलांनाय बिबारा
लरहायलाङा हार्सिँङै खुसियाव।
190
दिनै मादि साजायनाय मेथाइया
नोँ आरो आंनि-
मिथिया नोङो ओँथिखौ
आंनि साजायनाय खबामखौ
थाखोमाना दं नोँनि आंनि।
191
सान्नानै गोदौनाय सोलेराव
रुख'जादोँ सोदोब खन्थाइयाव
ओँखारबोयो गासैबो ओँथियाव
साजायनाय खालिनि बिलाइयाव।
192
दिनै लाइमोननि दखना रोबैयाव
मोदोमनाय बाफबदोँ सोलेराव
बिरफायाखै गोसोआ बोदोराव
सान्नाल' लादोँ साजायनाय इयुननि
रैसुमै आं सिरि सिरि।
193
नोँनि फांदां बिखानि अख्रांआव
गोबानो सानो गोसोआ,
नोँनि गोरबो गुसु बिलोआव
गोजोमनो सानो सोलेरा;
सना मिथिया थेवबो बिलिरनाय।
194
जारौ गुसुथिनि रिमोन्नाय
बोथोरनि मेथाइ दाउसिननि,
आंनि खोमायाव देँखो मोनसेल'
रैसुमै सिरि सिरि हास्थायो
मोजां मोनो नोँखौ जेब्लाबो।
195
हाथ'फ्ला जानाय नङा आंनि
- गासैबो समाव हास्थायनाय
बोहैबाय दुंब्रुद निजोरा बिखायाव।

148
खेबसेल' खुदुमनायजोँ गावखौ
गोजोन्नाय मोनो गोजोन्नाय मोनो,
रादाबा सिरि सिरि
- गोसोनि साननायाव।
149
जिउआव थाखोमादोँ बे मोनसेल'
जौमोननि बासा गोरबोआव,
मोजां मोन्नाय आं नोँखौ।
150
नोँ गावखौ बुजियाखै
खौरां लानाय आंनि नोँखौ-
मादि सानदोँ सिरि सिरि-
नोँनि आंनि इयुननि।
151
नोँजोँ अराय सावरायनायखौ
थिसनबाय गोरबो दाइरियाव,
मादि समायना मिथिँगायाव,
मोजां मोनो आं नोँखौ।
152
निहोर सिग्लाबनाय गोरबोआव
बोजबना लादोँ साननायखौ-
नोँ आंनि।नोँ आंनि।
153
नोँजोँ सावरायनाय बाथ्राखौ
आरो बावनो हालिया,
मोनफिनगोन आं गोरबोआव-
नङाब्ला आंनि दाइरियाव।
154
बाबोरै फोरमायनो साननानै
थाफिन्दोँ आं बिजिरनानै,
नोँदि सावरायदोँ मिनिस्लुयै आंजोँ-
नोँदि लाजिनायाव थागोन सिरियै।
155
आंनि गासैबो नोँनो
बावदो सिरि सिरि सिरि-
मोजां मोनना; साननानै अरायनि।
156
बाथ्राखौ फोजोबनो हायाखै खुसियाव
रैसुमै सना-
सावरायो लाजिस्लुनाय सोदोबाव,
आंनि बेरखांथोँ गोरबोआव
रंजानाय मोनफा मोनफा ओँथियाव।
157
गिदिँबायो नोँखौ लानानै
साया माया, साया माया
मुहिनां गासैबो मेगनआव।
158
बेरखाङो गासैबो मेथाइयाव
- गोरबो खन्थाइयाव आबुंङै,
रैसुमै सोदोब गोरबोआव।
159
मिथिगौ आं गासैखौबो
मानिनाय गैया जौमोना,
मोजां मोनो नोँखौनो-
सिरि सिरि सिरि।
160
जाय आंनि खोमायाव रिङो
मोजां मोनो बेखौनो बिजिरना,
रैसुमै मुं नोँनि गोरबोआव
रिङो जेब्लाबो रिङो।
161
नोँनि अननायखौ मोनाब्लाबो
मोनदोँ आं रादाबखौ
- मोजां मोनो नोँखौनो जिउआव।
162
लाजिब्लाबो गले गले नायफ्लाङो
जेराव- मेरावनो नोँखौ नुयो;
गोसोआव मोननो हास्थायो।
163
साननायनि गोमो- गोथां
जायख्लं सावगारियाव
गोदोहाबो आंनि गोरबोआ,
जोमै सिँखावना बिरलाङो-
बार जाना गोजोन बिलिरो,
नुयो सना साया माया मेगनाव।
164
जोबोद गोहो लानानै नोँनि सेराव
गासै आंनि मोजां मोननायखौ
सानो आं बेखेवना फोरमायनो,
नाथाय नोँ साफिया हार्सिँङै।
165
आंनि लाजिनाय गोरबोआनो
लाखोमाना दोन्दोँ आन्दोयै जेब्लाबो,
आं सानो फोरमायनो-
रैसुमै आं नोँखौ हास्थायो।
166
जानो हागौ नोँनि थाखाय
सानबोलावरियावनो आं-
सानस्रिबाय थादोँ मुखुबथियाव।
167
आं मिथिगौ-
आंनि थाखाय नोँ
- माबा सानो नङा,
अब्लाबो आंनि हास्थायनाया गोथार।
168
रैसुमै, नोँखौ आन्दोयै
- मोजां मोनखोमानायानो
आंनो अराय समाव गुबुननि-
बाफबफैनाय सोदोबखौ खोमादोँ।
169
आं मिथिगौ-
आं नोँखौ मोजां मोनो,
बे बाथ्राखौनो आं दोनखोमादोँ
सिरि सिरि सिरि।
170
आंनि गोरबोआव हाबना नायब्ला
नोँ नुगोन सना-
आंनि गासै गोरबोआव गलिनानै
नोँनि गोरबोआव बोहैनो लामा नागिरदोँ।
171
गोरबोआव बोहैनाय मोदैया
लुफावदोँ जेब्लाबो सानहाबना
खन्थाइ बेयो रमान्सनि।
172
जेब्ला नोङो आंनि गोरबो हमदाङा
थागोन अब्लासिम आन्दोआव;
मोजां मोननाय बेयो जौमोननि।
173
मोजां बिबारनि बारियाव
जेब्ला बेरायो सिमांङाव
नोँखौ गोसोखाङो आं हरखाबनो
गैया सिमाङावबो लोगो मोना नोँखौ।
174

1
नोँखौ मोजां मोनो
नाथाय मिथिया
मानो मोजां मोनो।
2
गोसोआ सानो-
मानो हास्थायो आं नोँखौ?
नाथाय
बे जौमोनआ मानिनाय गैया।
3
उन्दै समावनो सानोमोन आं
बियो आंखौदि मा सानोथाय-
दिनैबो मिथिया मोजां
मादि सानो गोरबोजोँ।
4
नोँनि रादाबा दुखु होयो,
गोरबोजोँ सानहाबो आं-
अब्लाबो नोँखौनो मोजां मोनो।
5
आं फोरमायाखै नोँनो-
आंदि नोँखौ सिरि सिरि...
नाथाय नोँबोदि नाजायाखै
बेखौ मिथिनो?
6
आं जोबोद सानो-
खालि नोँनि थाखायल;
जेबो जेबो समाव गोरबोजोँ।
7
गोदान बिबार बारोब्ला
सिखिरिया जेरैबादि खौरां लायो,
आंबो थायो जेब्लाबो सानबायना-
नोँनि थाखाय सना।
8
नोँ मा सानो?
आं मिथिया,
आं बुंनो हायाखै खुगाजोँ;
अब्लाबो गोरबो
गोरबोआव बुङो-
आं नोँखौ मोजां मोनो।
9
नोँ मा बुंगोनथाय?
आं बेखौनो सानो...
अब्लाबो आं फावस'या मोनसे
रंजालु गोरबोआ।
10
नोँ खोनायाखै खोमाजोँ,
मानोना आं बुङाखै खुगाजोँ;
नोँ जेबो सानाखै,
थारैनो आं फोरमायाखै।
11
आं रायदावदोँमोन मिनिस्लु,
नोँ फिन्नाय होदोँ लाजिस्लु;
गोसोआव दङ नोँनि गोदै मिनिस्लु।
12
आं थाबायदोँमोन-
नोँ गोजान लामा सेराव
जिरायना दंमोन,
माबा सानना नायहरो
खेबसेबाव आं।
13
नोँनि सावगारि जावले फैयो
मिनिस्लु गोरबोआ सानहाबो-
नोँ आंखौ मा सानो?
सोँलुवा गोरबोआव फैयो।
14
जिरि बोहैनाय जाम्फैयाव
दुगैदोँमोन नोँ जोबोद खुसियाव
लामा सेरजोँ आं एरायदोँ
मिनिस्रयु मिनिनायाव।
15
दिनै आं खन्थाइ सुजुदोँ
नोँनि मुं लानानै;
गोरबोआ सना मिनिस्लु जाखांदोँ।
16
जोबनो गैयै लुबैनाय जिउआव
नोँखौ साजायो आं-
गोरबोआव अराय हिनजाव
गोदान महराव।
17
आं थाबायदोँमोन मेँग्लिनायजोँ,
नोँ दैहु फाफेरदोँमोन हार्सिँङै
जेबो रायज्लायाखै
सानैजोँ सिगाआव।
18
सानबाय थायो सिरि सिरि
हाजोनि निजोरा-
बोहैनायबादि जिरि जिरि
गोरबोआव हास्थायो एब्रेनो।
19
मादि खालामो मुं आरो मुस्रिया
नोँखौनो सानबाय थायो गोरबोआ,
सना नोँनि अननाय गैया थेवबो।
20
गोबां रंजानाय गोरबोआव
बाज्ल'दोँ आं माबा ओँथियाव,
बरायनाय गोसोयै बैसागुखौ-
नोँ नायखोमादोँ मिनिस्लु आंखौ।
21
रादाबा आंखौ उसु खुथु खालामो
नोँ बुंदोँमोन-
गाजा नोँनि सावगारिखौ थारै...
हमथा हायै खुसियाव मिनिदोँ।
22
नोँनि मिनिनायखौ आं नुदोँ,
नाथाय आं-
जोबोद गोथौयै सानहाबदोँ।
23
आं फोरमायनो हायाखै
फोरमायनो लामा गैया,
मानोना नोँ आंजोँ साफिया।
24
सिमां नागिरो आं नोँजोँ
समायना बेराय बेराय सावरायनाय,
सिमाङावबो साफिया मानोबा।
25
दिनै नोँखौ लाजिनाय नुदोँ
नोङो लाजिदोँ सोरखौबा?
मेगनाव जोबोद मुहिदोँ।
26
गोरबोखौ बोनानै लांबाय
ना नोँ बिरथिँ होबाय?
अराय समाव सानबाय आं नोँनिल'।
27
मोजां मोनखोमानाया गेङाखै,
बयबो रावबो मिथियाखै;
आंल' मिथिगौ, फेलेँ थाङाखै।
28
नोँखौ सान्नानै समा बाग्लायो
खाथि खाथि सोरां फुंआ फैयो,
माब्लादि साना हाबलाङो
नोँखौ नागाराखै
मोजां मोनो आं।
29
नोँनि अनगा मेगना गेवा,
खोमसियाव थायो मेसेब्ला;
रैसुमै बेरला बेरथा जायो गोसोआ
हुफ्लेयो मैखि खानाय मेगन मुं खोनाब्ला।
30
गोरबोनि लामा नागिरनानै
मेगननि सिखाव गोसोआ
मेँग्लिना थायो सानसेबा दिनै।
31
गोजावलाङाखै आंनि गोसोआ
गोगो बोहैलांदोँसो निजोरा;
सुदेम लुफावनो नोँनि गोरबोआव
नागिरो गोसोआ,
खाबुखौ मोनाखै।
32
गोरबो सिङाव मादि सान्नाय
गासैबो ओँथिया नोँखौ सिरि सिरि
खालिबोल' गोथौ मोजां मोन्नाय।
33
मोजां मोन्नाय सोदोबा गलिदोँ
सिउ सिउ बारजोँ बुग्लेम जाया
गिथाव जौमोननि बिलोआव
दं दिमोल जानानै;
बोहैयाखै नोँनि गोरबोआव।
34
सोनाब फैसालियाव जोँमा सान
मिनिस्लु मोखांजोँ नायहरो-
अनजालि गोजोन लामाजोँ।
35
नोँखौ साननानै नायहरो-
फैगोन थाबायनाय लामाजोँ...
मिनिस्लु साजायनाय गोरबोआव।
36
नोँखौ हास्थायनाया गोमानाय नङा आंनि
जेब्लासिम थागोन जौमोन समा
नोँखौ मोजां मोनखोमाना थागोन
जेब्लासिम जाया जुलि नोँनि।
37
थागोन सिरि सिरि सिरि
मोजां मोनना गोथार नोँखौ,
सानगोन आं नोँनि दुखुखौ
बेरखांनाय लाइमोन जिउ मायाखौ।
38
जेब्ला नुयो मोखांङाव नोँखौ
सानो आं जिउनि संसारखौ।
39
जेसे समाव नोँ मिथिगोन
एसे समाव आं फोरमायगोन,
एसे मिनिस्लु लाजिगोन
गावनि गोहोखौ फोरमायगोन।
40
जेब्ला नोँ हमदां हागोन
आं नोँखौ बुजि होगोन,
आबुं हास्थायना मोजां मोन्नायखौ
थरथिँसे मोदैजोँ फोरमायगोन।
41
हसारनाय खानायखौ फाफ्लियाव लाना
थाबायग्लांदोँ नोङो गोजोन्ना-
मुहियो मेगनाव,
सानो आं गुथालाव मानोबा।
42
आंनि गोरबोआ नोँनाव एब्रेदोँ
गासैबो हादोँ हमदांना
बेखौनो सान्ना मोजां मोनो।
43
नोङो मिथिया बेखौनो?
नोङो हास्थाया नामा?
सिरि सिरि आंदि थेवबोनो।
44
नोङो आंखौ मुगैगारब्लाबो
थागोन आं दखना रोबैयाव,
समा फैयो अब्लासिम;
मिजिँ आरो गोरबो लानानै।
45
जा मोजां मोनहाबबाय जिउआव
लिरनाय थाबाय हांखोजोँ,
दुखु गैया नोँ नेवसिब्लाबो।
46
हरसान जेसेबांदि सानो
सिरि सिरि मोजां मोनहाबो,
बेसेदि मेथाइ गोरबोआव
खन्थाइ लिरो नोँनिनो।
47
नंथारगौ।नोँखौ बरायाखै अख्रायै
मोजां मोन्दोँ बेखौल' बुंगोन;
गोजोन होयो बेनो आबुं जोनोमाव।
48
गोसो आरो गोरबोखौ
नागिरो आं नोँजोँ गोरोबनो,
गोजोन सानसे गोजोमहैनो।
49
नोँ आंनि सान्नायखौ-
मोन्नायखौ नङा जेथो,
बुजिगोन खोनाब्ला देँखो गैयै गारांखौ,
बोखारनानै नायब्ला सोदोबखौ।
50
फारागनि सिगां सोदोबखौ
खोनानोल' मोनथोँ, बे बाथ्राखौ-
आंदि नोँखौ साजायो गावनिबादि;
मोजां मोनो आं।मोजां मोनो।
51
जाय बिबाराव थायो समायना
बेनि ओँथि मोनबाय आं,
सानो आं बिनिखायनो
मोजां सिरि थेवबोनो।
52
बेसेबांदि थाबोबाय दिन मेला
महर मुस्रि नुबाय आं नोँनि,
सानना नायबाय आं गावनि
थाइनै मेगन।
गोरबो दरजा खेवना।
53
जायखौ आं सानबायदोँ
बुंनो बुंनो गोरबोआव-
सोदोबा फुथिया ओँथियाव
गासैबो समायनाय थाखोमायो।

54
जौमोना बारग'ब्ला बेखौनो
हादोँ खोमायाव सारस्रिनो,
बुंगोन नङा फोरमायगोन-
गासिबो गोथौ ओँथियाव।
55
गोरबोआव सिखोमाना दोनो सोदोबखौ
एब्रेयो बियो अराय लाजिनायाव,
रैसुमै हाया फोरमायनो-
नोँनि लामा सोँनाय गैयाब्ला।
56
दिँग्रायनानै दङ लामाया
एब्रेनानै थानो सानो खाथियाव,
हाद्रि जानाय खोमसियाव
सोरबा दङ दरखंआव,
बोलो गैया आखायाव, मोजांल' मोनो।
57
नोँखौ बजबनानै गोरबोआव
सिरि सिरि सानो लामायाव,
थैनायनि बै फैसालियाव
नोँजोँ आंजोँ लोगोआव।
58
एसेबांदिन नुबाय सानाव
माला जाबाय सावगारिया,
बेसेबांदि साजायबाय
खन्थाइ जाबाय सोदोबफ्रा।
59
नोङोदि खालामो आंजोँ फारागखौ
खोमायाव नांफैयो बारजोँ,
नोङो आंखौ नेवसियो,
थेवबो आं मोजां मोनो।
60
आंनि अन्नायखौ नुवाब्लाबो
बिजिरनो हायो गोरबोजोँ,
नोँनि मुस्रिया बोलाङो खाथियाव
नोँदि सानो नामा गोजानाव।
61
आंहा मोजां मोनो नोँखौ
बेनिखायनो थाङो नायनो खाथियाव,
गिनाया गैया गोरबोआव
लाजिनाय मेवखाङो मोखांआव।
62
हर जाबोला मेसेबो आं
नोँजोँ लोगोआव बिबार बारि,
गैया गैया सिमांनि नोँ-
आंनि रानि नङा।
63
बेखौनो बुंगोन आं-
जुदि नोङो सोँबायोब्ला,
आं नोँखौ बावनो हाया।
64
आं सोँदोँमोन-
माबोरै दं?
बेखौनो नोँ फिनदोँ-
मोजां।मोजाङैनो दं,
आं गोजोनदोँमोन हरसे सान्नानै।
65
नोँनि सावगारिखौ आं नायदोँ,
आं गोजोनदोँ
नोँनि खौरां लानानै।
66
नोँ लोगो सान्नायाव
आं लाजिदोँमोन
बेनिखायनो बुंदोँ आं-
नोँ आंखौ आदा बुंफिनदोँ;
आं रंजादोँमोन सान्नानै।
67
आंखौ बावबाय नामा नोँ?
जेबो खौरां गैया,
बेखौ आं बुंदोँमोन;
नोँ लाजिदोँ?
आरोबाव आं सोँफिन्नायाव
नोँ नुदोँ-
लाजियाखै;
आं सिरि सिरि सानदोँ थारै...।
68
मोजां मोन्नायखौ मानसि
सुबुंङाल' मिथिगौ,
बे नङा;
मिथिँगानि बिफां-लाइफां
आरो...
दंमानियानो थारै मिथिगौ,
नोँबो बारजोँ मिथिबाय,
सानदोँ दिनै गोरबोआव।
69
नोँखौ मोजां मोन्नाया
दिनै लामा आंनि
सोरां आरो खोमसिनि अराय लोगो।
70
बावनाय जाया माब्लाबा
समनि मोनफ्रोम उदांआव,
मेथाइ खनो नोँनिनो-
मोजां मोनो नोँखौ।मोजां मोनो।
71
गोजाम बोथोरनि गोजाम बिलाइफोरा,
ज्रय ज्रय सिरिलाङो...
सानफ्लाङो आंनि गोसोआबो-
गोबालांगोन नामा?
मोजां मोनहाबनाय मिजिँफोरा।
72
बेनो आंनि मोजां मोन्नाय
फोरमायनो राव गैया खुगायाव
मोजां मोनोल' नोँखौ-
गोथौनिफ्राय गोथौसिन।
73
जिउनि गोबां ओँखारनाय सोदोबफोराव
नोँनि मुं ओँथियाव,
बेनो बावनो हायै आंनि
मोजां मोन्नायनि गनाय निजोरा।
74
मिथिँगानि गुसु बाराव
बिलिर जायै गोरबोआव,
मोजां मोन्नाय बेनो गोथार साजायनाय।
75
नोँनि अननाय मागियो,
नाथाय सिरि सिरि...
नोँनि गोरबोनि लुफावनाय गैया;
गोरबोआव बोजबनो मोनाखै-
सिदोब सिदोब थाजिम
अननाय नोँनिखौ।
76
रैसुमै मोजां मोननाय बे सना
मोदै हुगारो आं गावनो,
मादि जाखो हार्सिँङै...
सोरजिनि बे मोनसे सानो गोरबोआ।
77
खौरां लाबोदोँसो नामा-
सानो सिरियै...
बिरनाय आंनि मोखांजोँ
हानजासे दाउसिनखौ।
78
बे आंनि मोजां मोननायखौ
अनसायनाय नङा नोँ?
बेनिखायनो सिरि सिरि।
79
गोसोआव फैयो हरखाब सावगारिया
सानसे लायो सना गोरबोआव
फै गोरबोआव सिरियै।
80
गोरबो साग्लोब्बाय मोजां मोननाय
सिरि सिरिबोल' जिउ मोनसेआ।
81
दिँग्रायनानै दङ लामायाव
सौसि सौसि थांनो हाया गोसोआ
रैसुमै मोजां मोनो नोँखौ।
82
मोनफा मोनफा नोँनि सोदोबा
माला जाबाय आंनि गोरबोनि,
सुजुयो खन्थाइखौ नोँनि मुंजोँ।
83
आंनि उदां अख्रां गोसोनिफ्राय
नोँ बिरथिङो हार्सिँङै
बोजबो सना जोमै
गोरबोआव मिनिस्लुनायाव।
84
जेसे दं आंनि बे गोरबोआव
नोँनि मुं।सिँआव साजायनाय;
मोजां मोनो नोँखौ।बे सोदोब।
85
गोरबोखौ सानना खेवना होदोँ
हाबलांथोँ मोजां मोननाय सोदोबा
आंनि हादो हमदांना थारै-
बेखौनो सानो सना गोरबोआव।
86
माब्लादि फैखो सौग्रावना मुंआ
मोजां मोनबाय बेखौनो हास्थायना,
नोँनि अननायखौ मागियो-
बेखौ हमदांना बुंफै खोमायाव।
87
नोँनि अन्नायखौ हास्थायना थायो
खालिबोल' सिरि सिरि सिरि-
रैसुमै जौमोन बैसोनि सिङाव गोसो
- बे आंनि,
गोहो गैया खुसियाव फोरमायनो।
88
आन्दोनिफ्राय जेब्लाबो फोरमायो
फुथिया थेवबो खुगायाव,
लाजिनाय-गिनाय बे मा?
फोरमायो गोरबोजोँ
गोरबोआव सिरियै।
89
आंनि अन्नायखौ नोँनोनो होयो,
समायना नोँनि गोरबोआव बिजिरनाय,
नेयो सना लाजिस्लु खोमायाव आंनि
गोदै रैसुमै सोदोब नोँनि खुगानि।
90
रैसुमै, नोँखौ नुदोँमोन आं-
साजायनाय महर मोखांआव,
बेरायग्लां नोङो खुसियाव
सान्दोँमोन आं नोँखौ गोसोआव
बियोदि समायना आंनि जिउआव।
91
मिनिनानै नोङो लाजिस्लु
जेरैबादि सावरायदोँ आंजोँ,
एरायलांफिन्दोँ दान्दिसेनि उनाव-
मोजां मोनो आं रैसुमै;
सोरजिनो दैथारहरदोँ रादाबखौ।
92
नोँनि मोखांआव गोग्लैदोँमोन
खावलाबसे आंनि मोखांआव,
लोगोसे-
सना बेरलाव मेगन फारनैया।
93
गोसोआ सौसिलांदोँमोन आंनिया-
दाखा जोमै सिँखावना,
रैसुमै साजायना इयुन संसार मोनसे।
94
जौमोननि बारा बिलिरनायाव
सानहाबना बिजिरो गोरबोआव
सना सानो आं नोँखौल'-
मोजां मोनो।मोजां मोनो मानिया।
95
मिथिगोन मिथिगोन नोँ मिथिगोन
आंनि गासैबो सिखाव गोरबोखौ
आंखौ सानना नोङो बिजिरगोन।
96
नोँनि मुं मुस्रिया
बिजिरनो होया जेब्ला गोरबोखौ,
बिजिरना नायो गावनो साननायखौ।
97
आंनि जिउआव नोँनि गोरोबनाय
थाबथायो मोदोम बिगुराव,
एरायलाङो मुं मोनसे फारागआ
बेखौनो नोँ सानो दा नङो गोसोआ।
98
आंनि साननाय लोगो मोनसेया
आंनि लिरनाय दोँसे खन्थाइयाव
आंनि सौग्रावनाय सोदोब लामा मोनसेयाव
नोँ रैसुमै नोँ-
मोजां मोनो मुं बेखौनो।
99
नोँखौ आंनो मोजां मोनोब्ला
बेखौ आंनो बोजबगोन,
नोँखौ जिउआव हास्थायोब्ला
बेखौ आंनो साजायगोन
रैसुमै नोँनि खाफालाव सिन्दुर
आंनो फुनगोन।

नै अनजालु फरायसाफोर-
एबार आं नोँसोरनो फंनैसो खिन्थानि।
जिब-जुनारा जोँनि आंगो लोगो।
जोँनि बेसेबा बानजायग्रा अनजाथाव माहि।
जिब-जुनारखौ नेहाथ सान्ना
बुथारनो नाङा।
बिसोरहा दाय गैया।
अब्ला जोँहा मानि हिंसानाय?
माहारिनि बिफा गान्दीया बुंदोँमोन-
अहिंसा परम घर्म।
अदेबानि हिंसा खालामियानो सोरजिगिरि
जिउमानि गियान।
बेनो नंगैबै दोहोरोम।
जोँ मानसि माहारिया बुजिनो हायो
अब्लाबो मानोदि उन्दै उन्दै
जिब-जुनार आरो दाउसिन-दाउलाखौ बुथारो?
बिनि जाहोनखौ दिनै नोँसोरनो खिन्थानि।
जिब-जुनारा जोबोद बुजि गोरोँ जिबि
बिसोरो गियानि नाथाय राव रोङा।
राव रोङैनि थाखायनो बिसोरखौ सुबुंआ नेहाथ सानो।
बिसोरो राव रोङैनि थाखायनो उदांस्रि गैयै बादि जायो।
बिसोरो जेब्लाबो मानसिनि बादि राव रोङैनि थाखाय
लाजियो थाखोमाबायो
अब्लाबो बुजि रोङै मानसिया बिसोरखौ
होसोयो गावथारो, बुथारो बायदि
हिंसा खालामो।
फंबायफोर नोँसोर दिनैनिफ्राय
बेबादि हिंसा सान्नायखौ दाला
मोजां आखु सोलोँ गियानि जानो सोलोँ।
रामायाण खन्थाइमायाव मखनाय रामचन्द्र
आरो लक्षन मोना
गिलु बालु फोजोबस्रांनो हानाय
गोहोआ दंमोन अब्लाबो बिसोर
जिब-जुनारखौ हाग्रायाव थानाय समावबो बुथाराखै।
अर्जुनमोनबादि हाथियारनि बिगोमाफोरा
जिब हिंसा खालामामोन
बिसोरबादि अनसुला घोरोमिनि सल'खौ खोनासं।
बिसोरनि जिउमिन फराय।
हायोबा सम सम नोँसोरनि फोरोँगिरिफोरनाव सोँना ला।
गावनि जिउआ जेसेबां अनजाथाव
गुबुननि जिउखौबो अन।
जिउआ महर गैया जेरै
बयनिबो जिउआ समान अनजाथाव।

जेखाय आरो खबाया बर'फोरनि जरासे आयजेँ
बर'फोरा बेखौ औवाजोँ बानायो
जेखाया खुगा गुवार महरनि
आरो लानजाइ बादि देन्था गोनां
बे देन्थायावनो आखायखौ हमगोन
ना गुरनाय समाव जेखायजोँ लोगोसे
दिरुं दोँसे थाफायो
ना गुरनायाव बर' आयजोफोरा
जेखायजोँ लोगोआव लाफायो खबाय
बिसोर ना गुरनाय समाव
गावसोरनि जानजियाव खाना लायो
आरो जेखायजोँ ना हायखांना मोन्नायखौ
खबायाव सोना लायो
जोङो जेखाय होनना बुंब्ला
खबायनि मुंखौनो थाब गोसो खांफायो
अदेबानि बेयो थारदि
जेखायनि मुंखौल' गोसोखांनानै
खबायखौ गोसो खाङा लाबानो थानो हाया
बर'फोरहा जेसेबां संसार जानायाव
मुंख'नो गोनां आयजेँफोर दं
बैफोरनि गेजेराव जेखाय आरो खबायनि मुंआबो मख' गोनां
आथिखालाव जेखाय खबायजोँ ना गुरनाया
खम जालांबाय
जानो हागौ बिनि जाहोना
1. होँगो-दोँगो नानि अनजिमाया सेंलांनाय
2. दैमा-दैसानि दैया मेसेँआव थाब थाब रानलांनाय
3. गोबां नाखौ खेबसेनो मोन्नो हास्थायना मुलि होनाय
4. इलेकट्रिक मोब्लिबनि गेजेरजोँ ना हमनाय
5. सोदोमस्रि गुस्लायनाय लोगो लोगोनो
बर' हिनजावफोरनि गोरबोआव लाजिनाय फैबाय
मानोना ना गुरग्रा मानसिखौ आथिखालाव गोरिब थाखोआव दोननो लुबैयो

दिनै बर'फोरा हारिमुनि आयजेँ महरै
मोसानाय एबा मेलाफोराव
जेखाय आरो खबायखौ दिन्थियो
मानोना बर'फोरा गावनि असे सोदोमस्रि हारिमु दं।
============

जोबाखै रिँनाया होख्रावनायनि
बेयो हाद्रिनि मुलुगावसो;
सोगोमाखै सिदोमा जोमैया,
ओँखारदोँ सुथुरनि रागायावसो
नाथाय सोरनि जादोँ बहा सैथोआ?

हाद्रिजोँ गेलेनाय रिउ रिउ बुब्लि
बै खुदियानि जिउ बिसम्बि
आंनि बांबुला लोगोफोरखौ
आं दिनै जोबोद गोसोखाङो।
गोसो आरो मोकथांनि हान्थिनायजोँ
जोबोद गोजान सफैबाय आं
आंनि लोगोफोरा थाबोबाय बबेवबा
आं बिसोरखौनो गोसोखाङो
जेराव आं दिनै थांफिननो हालिया।
जिउनि हान्थिनाय थुंगेनाय गैया
दंबावो गोबां आगान बेसेबा गोजान
आंनि थांखिनि इयुन बिदिन्था।
हे अनजालु आंनि लोगोफोर
नोँसोरखौ आं गोबाना लादोँ
आंनिनो गोसोनि अखाफोर बेँखनाव
नोँसोरजोँ हाद्रियाव गेलेनाय आरो
आमाय-जुमाय गेलेनाय बिबार बुंफबनाय
गोरबो गोरबो बयनिबो मोखांआव।
आंनि गोरबोआव गाबनाय आरो रंजानाय
बेखौनो जिउनि सुखु खालामना
हान्थियो आं दिनै जिउनि साघनाखौ लानानै।

आं मानो रंजादोँ दिनै?
गोरबोआव रादाब जाखांदोँ-
मिथिँगानि गोदान बार नांनानै
मिथिया मिथिँगाया गुस्लायनायखाय?
अब्लाबो बुङो समायना, जेरैबो हाद्रि
बिफांनि बिलाइयाव दाउसिन गाबोब्ला
जोमै अख्रांनि ज्रय ज्रय मोदैया
नुहोयो नायनो इनायनो हायना,
जेब्ला मुलुगाव हाद्रिया गोग्लै सोयो।
आं मानो रंजादोँ दिनै?
बेल' नङा मिथिँगानि देलायनाय
सोमखोर मुलुगा मिनिस्रांब्ला
जोँ मोजां मोनहाबो संसारखौ,
जोमै अख्रांनि मोदैया बोहैब्ला।

गोलाव दालां बिखायाव
जिरि जिरि दैया,
जोँथि हायना बाला सेरेफ मेगनाव।

बयनिबो गोबां गामि मुलुगाव,
जोँनि गामिया बयनिबो उन्दै।
आंनि गामिया दाबो सिबस्राङाखै,
जोँनि गामिया दाबो नायसन जायै।
जोँहा गय बागान दं,
लारि- लारि सारि सारि
खान्थाल- थाइजौ फाथैनि बारि।
ग्रोम ग्रोम बागान
फालो फालो मोसौ, मैसो बोरमा फालो।
दाउ, फारौ, हांसो फालो।
जोँनि गामिया खन्थाइनि गहेना
समायना रमायना आवनायनाय सोदोबनि
जोँनि गामिया दाबो जुमायनि हाखर।
जोँ सिबियो गोजोन नागिरनानै
बाथौ, सिजौ गुदियाव
ब्रह्म, मन्दिर फुर्णिमा अमाबस्याव
आरो गिर्जा सालियाव।
जोँनि गामिया दाबो खारो
अप्रि दो आरो खोमोन गैयै बेदरा।
जोँहा दाबो गोग्गानो गोनां गैया
जेब्लाबो जोँ उरि हाफावनिनो सिं
जोँनि गामिया बयनिबो उन्दै।
जोँ दाबो दुगायै फोरमायो
जौगानाय मुलुगाव आंगो हारिमु,
नाथाय जोँहा दाबो गोहो गोलोन्दां
उरि, मोस्रोम, खुसेँग्रा जोँखो अरदोँ
जोँनि रोदा बिलाइफोराव
जोँनि गामिया बयनिबो उन्दै।
अप्रि दोआ दाबो थायोब्ला,
गय, खान्थाल थाइजौ फाथैनि बारि
मोसौ- मैसो, बोरमा लारि
माय- बेसर, फाथो
फैलाव फोथार आबाद दुब्लि स्राय-
गासैबो गोमालाङोब्ला
जोँनि गामिया थाबावगोन दाबि?

हारिनि थांनाय सिनायथि
नोँनि बे गेदेर नाजानाय,
गुरु ब्रह्म, ब्रह्म गुरुदेब
गेदेमा बेनो नोँनि सिनायथि
हारि हादोद मेच गान्दी मुंङै।
जोँ बुङो गेदेमा
जोँ बुङो गुरुदेब
हारि हादोदनि गोथां लामा।
कालिचरण नोँ गेदेमा
बेसे सिबिजाथाव आगोमा
दावगानो फोरोँनाय अनसायना
सिनायथि होनो ओँखारनाय
हारिखौ मुलुगाव,
सैथो लामानि मेगन बेखेवगिरि
हारि घोरोम राव-थुनलाइनि
समायनायै फोसावगिरि हारिमुनि।
सोमावसारनाय दावगानाय
सोलोँनाय हान्थिनाय जोँनि
जोँ नोँनि लामायाव गुरुदेब
जोँ नोँनि बोसोनजोँ आगानाव।

सोरदि आंखौ मा बुङो
सोरदि मा रावै बाख्नायो
बेखायनो आंबो सानो-
बेसे समायना
बेसे अनसुला आंदि,
बेसे माल्दां दां
बेसे सुथुर आंदि
बोलोआबो गैया नङा आंहा।
सोरबा फैगोन देला माला
सोरबा फैगोन खावसाव दुमसाव
बावनोदि हाया जायफोर आंगो आंनि।
नाथाय आंबो एखनब्ला गाबो
समाव फेँफोना महरै रंजायो
आंनि मुंखौ सोरबा दुसियो
आंखौ सुथुर जोबोद सानथारो।
नाथाय आं अनसायो
जायफोरा आंखौ खबर लायो
आंनि मुस्रिखौ जेब्लाबो नायो
बिसोरो आंखौ नागार हायै गोबायो
अनसुला आंबो हगारनो बायो।
सोरबा आंखौ अनसाय अनसाय
सोरबा आंखौ नागिर नागिर
मेगनजोँ मोदै ज्रय सिरि लाङो
दिखाराव बिसोरो हांमा सुरो
अब्ला आंबो दुखु मोनो।
बिसोरनि सुखु-दुखु
बिसोरनि बायदि रैसुमै
गोमो-गोथां, गुफुर-गोसोम
बायदि गोसोनि गाबआ
आंखौबो सोगाबो, दुखु होयो
बिसोरनि जिउ जारिमिन खनसाय खनसाय
बिसोरनि सावगारि बुथुम बुथुम
दुखुआव आंबो गोजावो
आंहाबो गयो मोदैया।
नाथाय बिसोरो बुजिथारा
आंखौ अनसायोल' बिसोरो
आंनि अननायखौ बिसोरनो नांगौ
अब्ला आंबो अनसुला
बिसोरखौ आंबो गोबायो।
फारसेथिँ बिसोरनि बिसिफोरा
आंखौ दुसियो
आंखौ इनायनो सुथुर सानो
अब्लानो आं लाजिसो गारो
बिसिखौनो रागा जोँथारो।

थरथिँ थरथिँ अखाया
गांगा थफा मोसादोँ हायाव,
बोदोर खुसि बाराव
सिमब्रे सिमब्रे मोसादोँ बिफांआ।

हिराबायदि गोजोँ गोजोँ थरथिँ
फ्रि फ्रि हानाय अखानि,
थरथिँ थरथिँ गसरदोँ समायनायै
गेरेमसा बिफांनि बिलाइनिफ्राय।
नोँ जोबोद समायना मोदैबायदि
मिनिजि मिनिजि गेलेदोँ बिलाइयाव,
आंनि आसि फारनैजोँ आजावो आं
फुंनि गुसु बाराव गोरोबफानानै।
फ्रि फ्रि अखा नोँ समायना
दुलाराइ मुलुगनि अरनाव,
रंजाखाङो मिथिँगानि गासै जिउ-जिबिया
दाउसिन-दाउला बिफां-लाइफांआ।
हे जोमै आंखौबो देनां लोगोआव लाफा
गोरान जाब्ला सोमखोर मिथिँगाया,
मुलुगाव गले गले बाज्रुमनो आं
थरथिँ थरथिँ थरथिँ।

थागौ आरोबाव बे मुलुगाव
- बहा मोनबावो बैसोआ लरहायो,
बेयो नाव दैसानि
रानलाङो जिउ दैसाया बोथोराव।

जेसेबांखि बारहुंखायानो बारा मानो
थांनानै थानो लुबैयो जोँ
जेसेबांखि सार-अन्थायानो गावा मानो
जेसेबांखि दैबानायानो फैयाथोँ मानो
थांनानै थानो लुबैयो जोँ
बे मुलुगानो मोनसे दावहाथिलि जेराव
बे दावहाथिलि दावहा फोथारनिनो
जोँ साफा साफा उदांस्रिनि फायखि
जुजिनाय आरो देरहानायानो जोँनि गुबै थांखि
मोन्नो लुबैनाय आरो होनो लुबैनाय
बेबादिनो थांनानै थानो लुबैयो जोँ
एसेल' नङा मोजोमसे जिउनि बेसेना
जोँनि दुखु आरो दाहाजोँ सिथाबनाय
एसेल' नङा मोदै आरो गोलोमदैनि बेसेना
जोँनि गोजोन आरो रंजानायजोँ सिथाबनाय
नंखाय नङा जोँनि खुसि आरो बाज्लनायनि ओँथिया
गोथारै होनाय आरो खुसियै आजावनाय
बेबादिनो थांनानै थानो लुबैयो जोँ
गोरबोनि रैसुमै मेथाइ रोजाबै रोजाबै
जिउनि थांखिखौ गायसन्नो लुबैयो
मोजोमसे जिउमानि गोथार खनायाव
थांनाय आरो फैनायनि गेजेराव
सुदेम खोलो खोलो बारनाय बारनि
मिलौहाब दाउसिननि गोदै गारांआव
थांनानै थानानै लुबैयो जोँ
बेसेबा उदां आरो खौसेथिनि गेजेराव

1
दाद्रा-दुद्रा अन्थाइफ्रानो
मोसायै मोसायै स्लिम जायोब्ला,
नंखायथार सान्नायनि बोलोजोँनो
गोसोनि मिजिँआ जाफुंबायोब्ला?
2
खिग्राया लाजिया
नुग्रायासो लाजियो,
हाय हाय-
आंलाय मानो गाबफ्रांङासै
मानोथो लायो मिनिबायसै?
3
जेथ' जाबाय गासैबो
जोनोमानो फोरोँबाय मानसि सान्नो,
मेगन मोदै जायालासै
हर- सान थाबायनो हायोमोनब्ला?
4
आदुआनि खियाव थाम्फैयानो
बाया होनो,
सियाननि आगानाव लेवारानो गियोनो,
हाखरानो लेँहरदोँसो नामा
आंखौ गोबानो?
ना -गोदोना सेरथेनो बिफांआसो?
5
अब्लाबो
सानफ्लांबायो सिमां-मोकथां
गोजाननि हाजोआ नायनो समायना
खाफालाव थायोब्ला ना खान्दाया
बालाबारियावनो दावो होन्नायबादि।
6
आरोबाव जेब्ला सिरि मोनो
बुजिबायसै गोनो-गोथो
"दैस्लुंआवबो अख्रां थायो जाम्बा
बुजिगोन गोथौ मोजां सान्ना नायबा"।

आफाया देग्लाय द्लाम बोरायबाय
मै- जुंगालखौ बानखांनोनो हालिया
बोथोरावनो आयआबो थाबद्राय बुरैबाय
दैहु थाइसेखौनो फाफेर हालिया;
लाइमोन सनाखि- सनास्रिमोनजोँ
एदावजा- जंखायजा आबौआ हले
बियो दाना अमिताभ बसन बाराबा
दरमेन्दर बादिसै गोसोआव।
दैहु फाफेरना दुहु दुहु
सुरि जालांनाय दखना सुरिया आयनि,
थावोनाव लजिँ थाबायनाय आब'मोनहा
सोरनि बिघ्दा मोनखोथाय-
आयनि दखना सुरिखौल' नङा
लाइटार लगायबाय सालामाटानिखौनो,
बुरै आयाबो गानसै दाना सिख्रि मेगन
नङाबा हारसा मेलेमनि आर्टिँ आगर।
मोसौ दामब्राजोँबो रुजु जायै
आंनि देरसिन आदाया
लावमुरा आफानि मोसौ हालुवाखौ
मानोबा खेब खेब नायनो हालिया,
मुम्बाइ- बेँलरनि बारा बेनाव नांदोँ।
थिफुद्लीलि आयनि फिसाजो
बैसोआव बेसेबा आंनि उन्दै
बियो जोनोमावनो उल्टाखा नामाथाय-
दाउखि हनाय एबा गोबोर गारनाय
दैहु फाफेरनाय
बाराबा दैज्लांआव बिसन फुनाय
माय गायनायखौनो बाद हो,
संग्रा अकदाबाव ओँखाम दो जाननो
सि: सि: बियो लाजियो;
मिसनाव फरायना सोरनि रोँबोखोथाय-
खाल्साराल' नङा
आसार आखु थाल्ला सोलायबाय।
सासे फंबाय दं
बेबो राव रोँनाय मेडियामाव
मेडियाम माने स्पेसियाल मेडियाम,
नांगोल जुंगालखौथ' सिनाया सिनाया
खोमायावनो खोना बावथ्राखैनो-
उन्दैयावनो दोनहर जानायथ'-।
आय आफानि आंबो सासे
बयनिबो गेजेर फिसा हौवा
गन्थं दाब्ला, मोदोम बन्दा
मेँख्ल'-ख्ल, मोखां खावब्ला- ब्ला,
नांगोल जुंगालखौथ' रोङा नङा
लाइजामखौबो लिरनो रोङा नङा
सुखु- दुखु हास्थायनाय- बोराबनाय
मबाइलजोँ खौरांबो हरनो हागौ आं
आंनि सोमोन्दोआव नाबोथिनो आरो
सोरबा सोरबा खुरमा आमाय- आनैमोननो,
लावख्रिगुरि- बाथारमारि- बिरहांगामि
नङाबा कक्राझार, बंङाइगामि, बिजनि
Hero Honda एबा टेक्टरबो सालायनो हागौ
सान्नांगौआ बेसो जाबाय टेनसना
बादायलायनाय गोनोखोनि मुगायाव
कमफुटार- इन्टारनेटखौ सिनायनो
हाबावगोनदाबि?
जाहाज- इर'प्लेन गाखोनायनि
सिमांथ' गैयानो।

दा आं जौमोनाव फैबाय
आंनि देहा सोलेरा गोरासिन जाबाय,
आंनि सान्नाय सानस्रि रोँग'थिया जेथोसिन जाबाय।
दा आं जौमोनाव फैबाय
आं सान्नो नागिरसै गुवारै मुलुगखौ,
आं हास्थायसै रावनिबो उदांस्रिखौ।
दा आं जौमोनाव फैबाय
आं लासै लासै सोलोँदोँ,
आं बियो दाना सोरजिनाव थुलुंगा।
दा आं जौमोनाव फैबाय
गासैबो सुबुंनि गाबनाय मिनिनायखौ
मुलुग जिउ जिबिनि मोन्थाइखौ
आं दाना बिजिरनो नाजासै।
दा आं जौमोनाव फैबाय
आं गावनो साजायनो नाजासै गोथार जिउखौ,
आं गावनो अन्नो ओँखारसै बिमाखौ
जोथोन, रैखा, सांग्रां होनो मुलुगखौ।
दा आं जौमोनाव फैबाय
गावनो गावखौ बिजिरनो हाबाय
गावनो गावनि लामाखौ सिबस्रांबाय।

नै दाउखा- दारोजाबसै दुखुनि मेथाइ
गोदान आलायारननि सोरांआव,
बिफांनि दालाइयाव बानानै
दा रोजाबसै गा गा होन्नानै।
जेबो गैया हावरिया आङो
नोँनो बेदर दरसे हरनो,
नै दाउखा थांदो बहाबा
नागिरना आदार उदै सुफुंदो।
दिनै गोदान फुंनि सोरांआव सानदुं सायदोँ आं
साननि सोरां रोदाजोँ- मुलुगखौ खेबसे दावबायनो सान्दोँ
उनजोँ दागाबज्रिसै आंनि हान्थिनायाव।
नै दाउखा- दारोजाबसै दुखुनि मेथाइ
खबाम गोनां आंनि दावबायनायाव,
नै दाउखा थांदो बहाबा
नागिरना आदार उदै सुफुंदो।

दाउखा, दाउखा गाबदोँ
नोँलाइ मानो दिखार नांदोँ?
हाबाब जोँनि बारियाव गैया बेदर
मावजि सैमायानो दं सान हर।
दाउखा, दाउखा गाबदोँ
नोँलाइ मानि रादाब लाबोदोँ?
हाबाब आय- आफाया गैया दिनै
थांफिन्दो नोङो गोख्रैनो अन्नानै।

अराय बे खोमसिखौ होखारनो
गोजोँ गोदान फैसालिखौ बोलानो
रोजाब मेथाइ रायजो दाफुंनांगौनि
गोदान सान गोदान सोरां फैनायनि।
मुगानि उनाव मुगा नासय जानाय
बे थगाय जानायखौ दिनै गोसोखां,
दावगालु इयुनखौ दिनै सानखां
गोदान मेथाइजोँ थांनानै थानाय।
खोमसियाव मोखां खाथेजानानै
आरोबाव बेसेबां आन्दायनो फैसालियाव?
बे सुसिनाय बे अदखारखौ हमथानो
दिनै माबार उदांस्रिखौ रोजाब।
दावगानो हायै बे बेँथेनायखौ
बे गोरा दरजाखौ जोखावनो
ओँखार बयबो सुसिजानाय फिसाफोर
हार्सिँङै हाया हानजायै हाथारगोन।
आखायाव बनजार लानानै ओँखार
बे खोमसिखौ होखारनो लामा गेजेराव,
अराय उखै जानायखौ सहायनो हाया
जांख्रिखां दिनै आरो इयुन मोनथाइनि।
अराय उदाङै अख्रांआव बिरदावनो
अराय मिलौहाब मेथाइ रोजाबनो
रोजाब दिनै खोमसिखौ होखारनो
गादबग्रा बे सुसिगिरिखौ फेजेन्नो।

सुखे नोङो एवथु एवथु खालामो
नंखायनो आं एब्रेनायनिफ्राय एब्रेसिनो
लेब थांगासुरि फानफ्रेनानै थायो
-
लोगो नोङो एवथु एवथु खालामो
आंखौ गोदो उन्दुलांहोयो
हरसेमानि थानाङो आं उन्दुनानैनो
-
हे सुखे नोँखौ साबायखर
गोमानाय अनजालिनि सावगारिखौ
सिमांनि सिमांआव आं मोनफिनबाय
-
नाथाय थरथिँ थरथिँ निहोरासो
आंखौ फोजाखाङो आरो
लोगो खावलाबसेल' एमावनो
नोङो आंजोँ उन्दुफायो
गांसे कम्बल सानैजोँनो सेलायनाङो
-
हाबाब सुखे
नोङो जोबोद अख्रालै सयथिबो
हरावबो उन्दुफायो हरसे
एवथुलाय बिलिरलाय खालामो
-
दाबो सोरांब्लाबो नै नोङो
आंखौनो गारनो हाया
आंखौ गोबायो नोङो
जेराव आं बेयावनो नोङोथार।

नोँखौनो गोसो खांनानै
बे हराव आं लेलायो,
बेसेबा जिउ गैयैबायदि
ओलैस्रो जायो आं।
दाहानि जायख्लं सिङाव
आंनि जोबथा सिमांनि जिउ,
गोजोन आरो दाहानि गेजेराव।
दिनै आंनि मिजिँ गोनां मोकथां
बेसेबां आरोबाव सुजुनो हायो-
दाहाखौ लानानै इयुननि रंजानाय।
नाथाय गोबां गाबनि सिङावनो
आंनि थांनानै थानाय सिमां,
थांनानै थायो आं दाहानि गेजेराव।

आं थाबगासिनो थाबायो थावनिखौ सहैनायसिम
बेसेबा गोजान लामा दिउआ दिउआ,
मानोना थाबायनायानो आंनि जागायनाय बेनो जागोन
बेबादि आं थाबायो थाद'नो गोनां जानाय समसिम।

आं खारनानै जिउनि थांखिआव सहैगोन माब्लाबाबो साना
नाथाय आं सहैगोन सानो थाबायनानै आरो
आं फोथायो सहैथारगोनखि सहैथारगोन सानसेब्लाबो।

दाउसिन-दाउलानि मेथाइ खोनायो आं थुलुंगाजों रोजाबनाय
दैमा-दैसानि देंखो खोनायो आं अरायबो बोहैनाय
जिउ थासान्दि गोसो-गोरबो थासान्दि बोहैबाय थागोन आंबो
आरो थाद'नाय नङा दिनैदि आं जागायबाय गोसो फोरानानै

दिनै गोदान बोसोरनि
गोदान बारजोँ
दिनै गोदान बोथोरनि
गोगो अखाजोँ
दुलाराइ मिथिँगाया रंजादोँ
आंनि जोँनाय मेगनाव।

बेलासि जोमै साग्लोबनाय समाव
नायहरो बिदाय जोँमाखौ।

दे सुबुंफोर मुलुगनि
देँखो बोदो गोजोन खौसेनि
नोँनि आंनि सोलेरनि
रंजानाय खुसियाव हां मोन्नायनि,
आय मिथिँगाखौ गोजोननि
देँखो हगारना जिबिखौ मोसानि
दे सुबुंफोर मुलुगनि
बिफा सोरजिनि बोर लानि
आखाय हमलायना थांदिनि।

दै दै दै दै दै
बुहुम ब्रै बाहागोनि थाम दै,
दै दै दै दै दै
दैयानो जादोँ जिबिनि जिउ खान्थै;
दै दै दै दै दै
जेब्ला सोलेरा गोरान जायो
जेब्ला गारमा फिसिनो ख्लां ख्लां गाङो
नांगौ अब्ला आंनो गर'दसे दै।
दै दै दै दै दै
जेरैबो- जेरावबो दै, दै;
अखा महरै दै
खफ' महरै दै
बिफांनिफ्राय- बिलाइनिफ्राय
हाजोआव हायेनाव
बिलो- निजोरा- जाम्फै
हा- अख्रां- अर जेरावबो दै।

नाथाय दै नोँखौ लानानै दुखु
नोँखौ लानानैनो सुखु
जिँगा- दाहा- हाथास,
आंनि गामियाव मेसेँ बोथोर
फैयो फाला बदल दैज्लां मेसेँ,
मेसेँ बोथोराव दैनि आंखाल
दैज्लां बोथोराव बाना,
आग्लाय- बिग्लाय लोमसावनाय,
फैयो अखा महरै
लैथो, बिलो, दैसा उसिनानै
हाखर- हाला बुंहोनानै
खालामो हुलुं- हुथुं अन्नाय गैयै।
नाथाय नोँ अराय अनसुलाबो।
दै दै दै दै दै
मोनसेल' सोदोब रैसुमै गोदै
हाइड्रजेन आरो अक्सिजेन गलायनाय
सानफ्रोमबो नांनाय लाव लाव दै।

दैज्लांआ अलसिया हालुवाफोरनि थाखाय
जोबोद सुनिबादि बोथोर।
बिसोरो सानो मानो फैलायखो दैज्लां?
एबा माब्ला थांबावोब्रा दैज्लांआ?
गायनो फुनो अलसियाफ्रा बायो।
बिसोरनि बादिब्ला दैज्लांआ
जोबोद दुखु गोनां बोथोर।
अलसियाफ्रा लामा सामा थाबायना
सम खाथायनो मोजां मोनो।
आलो गोजोन उन्दुना सान हर
जायै लोँङैनो बिसोर
रंजाना बोथोर थांहोनो लुबैयो।
नाथाय जायफोर मावनो दांनो अलसिया
जानो लोँनो थाखाय बिसोर अलसिया नङा।
बिसोरो ओरैनोसो मोनजानो
ओरैनोसो मोनलोँनो लुबैयो।
बिसोरनि बादिब्ला जानाय लोँनाय उन्दुनायनि
जेबो देरसिन गैया।
बेखौनो बिथांमोना घोरोम आरो
बेनो सोर्गो होन्नाबो सान्ना लायो।
अलसिया जाबानो मानसिया सिखाव जायो।
बिसोरो मालायनि जिराद बेसाद
मुवाफोरखौ ओरैनो मोनजानो लुबैयो।
बिसोरनि गोसोआ जेब्लाबो
सिखाव लामा फारसे आवगायलाङो।
थगायनाय नासयनाय हुदाया
बिसोर बादि सुबुंनाव सोमजियै नङा।
नाथाय बिसोर बादि मानसिया
थांनानै थादोँब्लाबो जेबो ओँथि गैया।
बिसोर बादि मानसिया
गोथार मोनसेबो मिजिँ थाया।
थायो होन्ना बुंथारोब्लाबो
बिसोरनियाव सोरखौबा थगायनाय एबा नासयनाय।
मिथिस्लाबै सोरनिबा गोसो आरो
मोकथां घोन खावनाय।
माफ्रोम जुनारानो अलसिया नङा,
माफ्रोम जुनारानो माबा मोनसे मिथिँगानि
आरो गियानि मानसिनि नोजोराव लोगो
मददगिरि आरो थार सम्फद।
नाथाय मानसि अलसियानि आखल आखु
हाबा गासैबो बिष गोनांथार।
बिसोरनि रावआ सुबुंनि गोरबोखौ
गुनजेर अरनायबादि नोरजिया खालामो।
बिसोरो गावसोरनि गुबुंले सोलेरनि गेजेरजोँ
मिथिँगाखौ गोरान खालामनो हागौ।
अदेबानि बेखौ बुंजायोदि मासे जुनारा
बेसेबां मोजां बानजायो
अलसिया मानसिया उदायथारा।
बिसोरो गाज्रिसो खालामथारो।
गोसोआनो गाज्रिथारबा बिनि देहायाबो
सम्फद जागोन होन्ना सानजाया।
जायनि गोसो मिजिँ गासैबो गाज्रि,
बिनि देहा सोलेर गुबुन आरो जानो हाथावा।
गोसोआनो गाज्रिब्ला बियो
माब्लाबाबो मोजां हाबा मावनो हाया।
नायै बेदरै जाब्लाबो बिसोरनि
खियानो हासार गैया।
अदेबानि दखरसे हायानो
उल्थायै गोरान जानो हागौ।
दखरसे मानि मोनामनायजोँ
माखासे बिफां बेन्दोँफोरा सहायनो हायैयाव
लरहायगोनबो साननो गोनां जायो।
जेसेबांखि बाथ्रा बुङा
बिसोरनि रावआ मोजां खामानियाव सौहाया।
मानोना मोजां खामानिखौ माबोरै मावनांगौ
बिसोर मोजाङै मिथिया।
बेखौनो बुंनो हायोदि
अलसियानि आखायजोँ बिफांनि फुलिया
गेरेमसा जाया जेसेबांखि हासार होआ।
जेसेबांखि बाथ्रा बुङा बिसोरनि बाथ्राया
मोजांनि थाखाय थुलुंगा होनायनि ओँथि गैया।
हासार गैयै हाजोँ बिसोरनि सोलेर,
थुलुंगा गैयै बाथ्राजोँ बिसोरनि गोरबो।
न' लेरनाय मुथि दानायावबो सोलिथारै
बिरथिँबायनायबादिसो हाद्रि बिसोरो।

खोमसि खोमसि जोबोद सान बारलांबाय
दिनैबो खोमसिया आनज्रायलाङाखै
जोबोद बैसो जानाय आयनि मोखांआव
आयनि मेगननि मोदैया रानलाङाखै
बेखायनो खोमसिखौ बोरै बुस्रांनो हागोन
दैसारि आं दिनै उन्दुलाङा
जोँनि गोथार जुलिया जागोन होन्नानै
गोजोनै संसार जालांगोन होनोब्लाबो
आं फोथायो अनजालि दैसारि
बे खोमसिखौ होखार हरनो थाखाय
आंनो नोँनि आखाय नांगौ
नोँनि दुंबुर गोरबोनि बावनाय नांगौ
आरो नांगौ नोँनि रोजाबनाय मेथाइ
मेंनाय गैयै उदांस्रिनि रोजाबनाय
बानाय गैयै आखायनि हेफाजाब
हिंसानाय गैयै गोरबोनि थुलुंगा
आरो आंगायनाय गैयै रैसुमै खबाम
अनजालि नोँ हुगारनांगोन आयनि मोदै
गावनि गोथार गुरै आखायजोँ
बे खोमसिखौ सोरां होनो
नोँबो दैनांगोन मुथासे बनजार
दैसारि दिनै आं उन्दुलाङा
सोरांखौ जेब्लाबो गाबज्रि गाबज्रि
उदां आरो गोजोनखौ गाबज्रिनानै
दाबो मेँङाखै उदांनि मेथाइ रोजाबनानै

आं माब्लाबाबो नुफेराखैमोन।
अनथाव बाथाव, नायबाय- थाथाव।
आंनि गोसोआ गलिलांदोँमोन।
थारैनो आं बेखौ
मोजां मोन्दोँमोन।
(16 नबेम्बरनि सान)

" बावनो हाया... नोँनि आंनि
थैस' थांस' सतबांसा लानायखौ
नेवसि हाया नोँनि होनाय
जिउ थुलुंगा गासैबो
बावगार लांनाय नङा
जिउ थुलुंगा गासैबो"
..............
मेथाइखौ फोजोबनानै जौसांनिफ्राइ
लाजिसुलु ओँखार बोयो।
बियो बिखायाव बिखासे दाहा
लानानै सोमब्रोम गाबब्रुं मोखांङै
जिरायग्रा मासियाव जिरायफैयो।
बिनि मेथाइ खन्नायाव
बयबो सिरि थाहाबदोँमोन।
बाज्ल' बायनानै खुगाजोँ फेम्फा सुनो
आरो आखाय खबनोनो गासैबो
बावगारलांदोँमोन खोनासंग्राफ्रानो।
सोरबा सोरबाथ' आरो
मोदै ज्राम ज्राम सिरिदोँमोन मेगननिफ्राय।
सिख्लाया जौसांनिफ्राय ओँखार बोबासो
बयबो गोमलायनाय आखायखौ खबदोँमोन।
सिख्ला मेथाइ खन्नायाव
आंनि मेगननिफ्राय थरथिँ थरथिँ
मोदै बोहैदोँमोन।
सिख्लानि मेथाइखौ जागायनायनिफ्राय आं मोदै मोदै फसरैनो
बेसेबनोबो हायाखैमोन।
मोदै गदोँब्लाबो आं मेथाइखौ
मोजांङैनो खोनासंदोँमोन।
गोसोआव लानोबो नाजाथारदोँमोन।
नाथाय खोनासंनायजोँ लोगोसे
सिख्लाखौ लानानै आं बिबार
बारियावसो बिरलांदोँमोन।
गोदान संसार साजायनो
थि खालामदोँमोन।
जायनि थाखाय आं मेथाइखौ
आबुंङै गोसोआव सेबखांनो हायाखिसै।
सिख्लाया मासियाव गाबहां फावदुर फावदुर
मोखांखौ लानानै
जिरायब्लासो
आं मोदै हुगारनानै नायहरदोँ।
बेयो आरो फरायनो हाथावै खोमसि नङा।
गोसोआव गोजाम मिजिँआ
हाथासि महर रिफिनायसो।
बेयो दा आंनि मेगनाव
समायनासिनसो जादोँ।
सिख्लाखौ नायबाय थानानै आं
बिनि मेथाइनि गुबै रावखौनो
साननो हमदोँमोन।
थारैनो बिनि मेथाइया
गोथौ बिलोनिफ्राय सिखारनाय
मोदैनि खुवा आमै मै
सिखारनाय दं।
बेयो दुखु गोनां गोलाव रमान्टिकनिसो
सेबखांना रोजाबनाय मेथाइसो।
नाथाय मेथाइखौ रोजाबनानै
सिख्लाया मानो गाबखो?
बियो गावनि अंगुबै सल' नङाथ'?
आरो खोनासंग्रा गासैबो
फरायसा- फोरोँगिरि गासैबोनो
बिनि मेथाइआव दुखु जाफादोँ।
सोरबा सोरबा मोदै हुगारदोँ।
आंबोथ' आरो बारग'नो हायाखै।
जानांगौ बिनि दुखुआ बिनि सल'आनो।
गोसोआव बायदि सानबाय आं,
सानबाय थानायावनो आंनि लोगो
बिलिफांआ बायजोआव हासुनो होननानै लेँबाय।
जोबोरैनो लोगो बायदियै
आंबो बिनि रावखौ फेलेँ खालामाखिसै।
खेबसे मोजांङै मोखांआव नोजोर होनानै
सिख्लानि सेरजोँनो थाबायो आं।
बे समाव सिख्लाया एसेबांमानि हाथासि जानाय
खोमसि मोखां गैलियामोन।
बियो एसे मिनिसुलु मिनिसुलु
लोगोफोरजोँ सावरायदोँसैमोन।
कलेजनि साहाजोँ थानाय जिरायग्रायाव
जिरायनानै जोँ बायदि
खोथा रायज्लायदोँमोन।
सासे लोगो सोमदोनाव सोँदोँमोन आं
- सोरनावबा दहाय सिख्लानि मेथाइ
रिकर्ट खालामबायनाय दं नामा?
होननानै।
लोगो लोगोनो बागदावखांलायजासे बिरना बुङो
- आंनाव दंलै।
दाम खमनि मबाइलखाय बारा मोजां खोनायाखै।
- जागोन दे।
खोमायाव होथाबनानै खोनासंबा खोनायाबे।
मिनिसुलुनानै आं बुंदोँमोन।
बिरना आंनो ब्लुटुतनि गेजेरजोँ
सेन्दिँ खालामना होयो।
खुसिजोँनो आं बिरनखौ रोजासेमानि
साबायखर होदोँमोन।
दान्दिसे उनाव जोँ
अडटरियाव सिंआव हाबहैफिनो।
बेलासिथार समाबो जाबोनो हमबायमोन।
बे समाव हारिमुयारि दिन्थिग्लांनाया गेवसारबायमोन।
लाइटा साथिनायजोँ
सिख्लाखौ आं मेगन फिदिँब्लाबो नुआखिसै।
गोसोआव सानबाय बियो थांबाय जानांगौ।
बियो नंगौ मोनाजाफामानि जेरावबो
थानो मोजां मोना।
सोरांबारां जेब्लाबो बियो सांग्रांखा।
सिख्लाखौ आं नागिरबाबो नुयिलाय आं गोजोन्नाय मोनाखिसै।
थाथिरनो गोसोआ मानोबा
खहाबा खहाबा आंहा।
समायना रमायना सिनायजोबनो हायि
सिख्लाफोरा हायलालाय हुयलालाय मोसादोँब्लाबो
नायबाय थानो गोजोनाखिसै आं।
बे समावनो बिलिफांआबो गोजान
जाथारनायलाय आंखौ थांदिनो
होननानै लिँनायाव जोँ
अडटरियाम सिंनिफ्राय
ओँखारो।
लजिँ न'आव सफैब्ला
सिख्लाया माब्लाबानो साजाय आजाय
बिजाब फरायबायमोन जानांगौ।
बिनि खोथा सानबाय सानबायैनो
मोनाबिलिनि जानांगौ आदारखौ जाखांनानै
दो उन्दु लांबाय आं।
मबाइलाव बिनि मेथाइआ रिँबाय थाबाय।

दै बाना जादोँ
दैज्लांनि दुब्लियाव
ना बाथोन जादोँ
आदै लांहानि दुब्लियाव
-
दा बेयाव रावबो गैया
आं आरो बाथोन मोनसे
ना खान्दा
हाजो मावरियानिफ्राय ओँखारबोनाय
-
जेसेबां ना हमनो हायो
एसेबांनो बाखोनाय जागौ
आमोखाया जि बुरजा ना मोन्दोँ
मालाय बेहासो-
बायदि बायदि
-
लान्थिया मोदोम
थाफ्लि फैखोनाय गामसा गान्दोँ
खुसिया बाग्ला जादोँ
कातिकनि आलियाव सबाय बेन्दोँआनो जेन'
माफा माफा हमजोबथारगोन ना
-
बिसोर आंजोँ काबादिसो गेलेदोँ?
लानजाइ सोमावना गिदिँदोँ आरो
गिदिँदोँ
हालि हालि सारि सारि
दुब्लिनि दब्लायसेल'
बोहैनाय दैखौ दान्थेदोँ
दालाबसे हाब्रुजोँ Sluise बानायदोँ
-
माफानि उनाव माफा हमदोँ
मिनि खुसि
गस्ला हिजोँ बोन्ना लाबोदोँ
मुगाया मोसा-मोसि दा
फालोसे दाउलिँआ सिख'दोँ
-
फालो फालो आंखौ खेबफैदोँ
खेबै खेबै
सुमलि दंफांसिम बोखोदोँ
आं आरो बिसोरजोँ बुलायनो हायाखिसै
-
रना-रनि थैजोँ
मोनसे दैसा बोहैयो
जिरि जिरि सुमलि दंफांनि सेरजोँ
-
इनाय-बानाय खेबै खेबै
बिसोर आंखौ बुङो-
नोँनि मावनां बेवहायनो जाबाय
थैनाया फैयो जेब्ला फैबाय
नंगौ थैनाया फैयो खेबसे
बेनो जायोब्ला जिउनि गोजोन्नाय??

खन्थाइगिरि नङा बियो
उन्दै समफोराव लिरदोँमोन नामा
दिनैसिम आं मिथिया खिन्थायाखैबो
अदेबानि आं फरायनो मोनफेराखै
-
सानथामसो सिगांआवसो
गांसे बिजाब साफायदोँ बियो
दुलाराय सुबुंनो फरायनो थाखाय
गावनि रोँनाय आरो स्टाइलखौ मिथिहोनो
-
बिजाब मुङा दिन्थिना
गिदिर महरनि बिजाब
सलमा नङाबा जारिमिनानो जानो हागौ
नायनि मा बिजाब बेलाइ
फरायनि-
-
आरांगायाव बिजाबखौ मोन्ना
मिनिसुलु मिनिना सान्दोँ निला
रोजा खोमसि हरा मेगन सोरखि हायै
हरथौबाय जेरैबो सिरिसै
खोरखिखौ फाङो बियो
-
ससमाखौ आरामै हमना लायो मेगनाव
बिजाबखौ बोद्लाना फरायनो सिगां
बियो-
-
बिजाबनि समायना बिखं महरखौ नायबावो
समायना आलायारननि सावगारि
फुंनि जारां सान ओँखारनाय बुब्लि
गेवलां गेवथां बिबार बारनाय
-
आरामै जिरायो निला
बिजाबखौ मेगन सेराव लायो
सिरि सिरि फरायलाङो--
-
बयजोँबो बाखोनाय जायो
रावबो बाखोनाया लाबा थानो हाया
जोबोद समायना मेगन बिनि
बिखा गुवार गोसो गुदुं
-
जाय जाय सोलोँथाइ मोनो
बियो हमनो हायो बबे मोजांसिन?
एबा बबे सोर गाज्रिसिन
बेबादि सोलोँथाइ बेयो फोरोङो
-
हायना गोनां एबा हायनामुलिबादि
बिनि फोरोँनाया गासैबो गेबेँ
सोरबा नेवसिनो हागौ?
रावबो हाया बिनि रोँमोन गियानखौ
-
बिनि महर मुस्रिया समायना
बिनि गोगो गोसो आरो
बिखा गुवार गोथौ गियाननि थाखाय
बोलो दं बेहा सोलेराव आरो
गावनि मोन्दांथि गोहोखौ लानानै
-
बेयो एसेबां गुरैदि
सना बाना रावखौबो सोँखारिया
बियो थुलुंगा गोनां
समान सोलोँथाइ होनो लुबैयो
आंगोबादि बयखौबो आंगो सानो बियो
-
से दान बारा जालांबायमोन आं
बिनि सेर सेर मागिबायनाया
अन्नाय मोन्नाय आय'
फाग्लिबादि जालांदोँ आं
-
नाथाय हमथायो हमथाथारो
अब्लाबो जौमोना मानिया
आं बिनि खाथियाव थांगौ थांगौ
सान हर बेबादिनो थांदोँमोन
-
बिनि आयदाखौ आं मोजां मोन्दोँ
मानोना आं बिखौ गोसो थोबाय
गोसो थोनाया बेनो नामा?
जायखौ मोजां मोनो
बिनि फंफ्रोमबो रावखौनो गोदै मोनो
-
आं बिखौ हास्थायो
नाथाय जाम्बिनि हास्थायनाय बादि?
बियो सासे फ्रपेसार
आरो आं सासे फरायसा
निला सारनि सासे फरायसा
-
फारागआ बेसेबा गोजौ गाहाय
लाजिनांगौ जाब्लाबो लाजिया आं
मानोना मोजां मोन्नाया बेनो
आंनि बैसोआ नैजिल'मोन अब्ला
जानो हागौ बिनि बैसोआ थामजिबा
-
आरिमु जालिया सेथि खोन्दोआव
बे सारखौ लोगो मोन्दोँ आं
आं जेन'बा खाफाल गोनां
नाथाय आं सानफ्राङो-
-
सुदेम आं निजोरा अब्लाबो
बियोदि गोजोम फैगोन?
बियो जोमै जाब्लाबो
थमेन्नाय आं बिबार जाब्लाबो
बियो बिलिर फैमारगोन?
-
गोरबोआव बेखौल' जायगा होदोँ
बेनो आंनि गासैबो
आं आरो रावखौबो नुवाखै
दैमा-दैसा बिफां-लाइफां
-
बिनो गासैबो आंनि
हा-दै-अर-बार-अख्रां
बिनि सेराव थांब्लानो
सानसे बिखौ नुब्लानो गोजोनो आं
-
आं बिखौ मोजां मोनो
बिखौनो मोजां मोनबाय था होन्ना
सान हरा आंखौ खारदिँबाय थादोँ
समबार मंगलबारमोना जंखायबाय थादोँ
-
हे गसाइ!
आंनि थांखिया जाफुंबाय दिनै
बै रजेया दिनै आंनिसै
बियो दिनै आंनि सिन्दुर
-
दिन्थिनानि सल'खौ जागायनोसै-
गोसो गुदुं निला
समबादि गावनि पेरियटखौ फोजोबदोँ
समा नै रिँगासो जाबायमोन
-
लामायाव लासै लासै थाबायदोँ
नायफा नायफा उनथिँ नायहरदोँ
गोजोन्नाय गैयामोन दिन्थिनाहा
जोमैना निजोरामोन बिनि गोसोआ
रावबो हमनो हानाय नङामोन
-
बियो सोरखौबा लामा नायदोँ
लानो बाबांसिन बेन'टि बेग
फाफ्लियाव नङा आखायावनो लादोँ
रावबो लोगो गैया बिजोँ
-
गावनि मारुटि सुजुखिखौ
लासै लासै सालायबाय निला
लामायाव थाथे थाथे लासै थाबायनाय
दिन्थिनाखौ बेल होदोँ
-
दिन्थिनाखौ निला सिनायगौ
सानफ्रोमबो रायज्लायोआनो लोगो मोनब्ला
माबादि फरायसा दिन्थिनाया
मोजाङैनो निला मिथिगौ
-
लामाखौ हगाराखै बियो
लासैनिफ्राय लासैसिन थाबायदोँ
बेप बेप बेलखौ दामदोँ निलाबो
गले गले बेल दामब्लाबो फेलेँ
-
गाड़िखौ लाखिदोँ आरो
मिज्लौ मिज्लो नायदोँ दिन्थिनाखौ
दिन्थिनायाबो मिजोलौ नायदेरदोँ
सोमोनांथाव बिजिरख' हायै ओँथि

आं नुनायमानि बुहुम मिथिँगानि गासैखौबो मोजां मोनबाय।
बुहुम मिथिँगानि बिफां-लाइफां, जिबि-जुनार, दाउसिन-दाउला,
दैमा-दैसा, हाजो-हायेन,
हारि-माहारि सुबुं गासैखौबो।
मोजां मोनबाय दंनायमानि नुनायमानि सान-अखाफोर-ख्रां,
हार्थखि-अलंबार, जोमै अखा सान्दुं।
मोजां मोनबाय मानसिनि राव फाव महर मुस्रि।
मोजां मोनबाय जिब जुनारनि गाबनाय रोजाबनाय गासैखौबो।
नाथाय अब्लाबो जायखौ आं दासिमबो नुवाखै।
जायखौ खोनादोँ मिथिदोँ बैयो सोर बेलाइ?
सोर बेलाइ माबादि जाखो?
एसेबां नुबाय बुहुमाव गोजोनबाय रंजाबायबो।
थेवबो सोरखौबा दाबो नुवाखै।
दा आं नुनायखौ नङा नुयैखौसो।
गोसो जादोँ नायनो, गोसो जादोँ बिजोँ मोखांजोँ मोखां रायज्लायनो।
जायनि बाथ्रा खोनाब्लानो गोजोन्नाय मोनो।
जायनि माया महिमा गोमो नाङो।
सोर बेलाइ?
बेसे अनसुला बेयो?
गोसो जायो आं बिनि आथिँआव।

नै जिउ आंनि लोगो
आं बुंनो हागौ जायखौ आं बुंबाय
बेनो ओँथिया हम आंनि आखायाव
बेसेबा मोजां, जिउ अनसुला नोँ
आंखौ साजायो बेसेबा समायना मोन्दांनाय
जेब्ला लोगोसे आं नोँजोँ, आंहा मिजिँ
नोँनो मिथिगौ, बेसे गोथौदि आर'जआ
थारैनो ओँथि नोँ बिजिरो-
नोँनो गासैबो जाहोना मानोदि आं
सिखारो एमनिफ्राय फुंआव
बेनो जाहोना गासैबो
मावनोदि गासैबो साजायो सान्ना
मानोना बेसेबां नोँदि दैबायो।
नोँ आंनि अनसुला सोलेरनि
लोगोसे नोँ जिउ आंनि गोरबोआव
सैथो बियो आंदि सासे नोँनि।
आं मोन्दांथियो जेबो समफोराव
बेनिखायनो नै नोँखौ मोजां मोनो
नोँनो आंनि जिउ बिसुखे,
आंनि जेरैबो नोँनि
आंनि सोलेर थासान्दि मुलुग,
नोँनो सासेल' जाय गासैबो,
नै जिउ आंनि लोगो
हो गोजोँ लामा सोरां
नोँखौ मोजां मोन्नो अराय
नोँनि बोसोन सोलेर फालिनो।

नोङो जारौ समायना फैयोब्ला
नोजोर खुबैहरनानै आं सानो-
मोखांनि अख्रांआव जेन' समायनाया
मिनिसुलु गावदां अखाफोर।
इसेबांदि नायबाय आं गोमोनानै
आलौनाय गैया थाइनै मेगना लाजिनायाव,
आंनि गोसोआ थांगौ
नोँनि बिखानि सेराव
नोँनि मोखांनि सेराव मोखां दैखांना।
नै सना सोरां जिउनि
लामा गियान गोसो मेगननि,
नै लोगो सान्नाय हाबा सोलेरनि
हर बोलोखौ नाजानायाव।
बेवनो बेवनो लोगो आंनि
नोँनि दिन्थिनाय हाबायाव
नोङो मिनिसुलु बिबानखौ होबायब्ला
नै लोगो होदो आंनो हाबाखौबो।
मावनो हानाय गियानजोँ
गोबौ जानाय सानस्रि मेलेमजोँ
नै सना होदो आंनो जाफुंनाय
आंनो मावनो गिदिर हाबाखौ।

नोंखौ नुनानै आंनि गोसोआ
एखेबारे नोँखौल' नायनो लुबैयो,
ओरैबादि लुबैयो नोङो आंनि मेगन सेराव
अरायबो थाबाय थाथोँ; आं नुबाय थाथोँ।
नोँ बबेनि आंनि गोसोखौ बोग्रा
आरो नोँनि मुस्रियाव नोजोर नांबाय आंनि मेगन,
दा आं नोँखौ बेसेबा मोजांमोनो
ओरैबादि नोँजोँ गासै जिउखौ खुसिजोँ दैदेनगोन।
लामायाव नोँखौ साया-माया नुयो
माब्लाबा नुनायनिफ्राइनो आं गोसोथोयो,
दैसा बोहैनायबादि नोँनि मिनिनायखौ
आं गले गले खोनाबाय थायो।
बिबारबादि गेवलांनाय महरावनो नुदोँमोन आं
नोँखौ नुजेन्नायाव गोमोहाबदोँमोन गोसोआ,
नोँखौ लोगोमोन्नाय सानसेखालिनि आगान
आरो नोँनि थाबायनायनि आगानखौ
आं दाबो नागिरबावो दिनैबो।

हांगारनि दामोल जानाय हरआ
नोँनि मोखांखौ लाखोमाबोला
आं लेँहरगोन आंनि लोगो सोरांखौ
हाथर्खि अखाफोरजोँ बुंफबनाय अखोरांखौ
त्रिपाल गोसोम जोमैया
नोँनि मिनिनायखौ फरायजायै खालामबोला
आं लेँहरगोन आंनि लोगो बारहुंखाखौ
नोँनि मिनिनाय सुजुगोन मेथाइजोँ
हार्सिँङै जेरै आं फबजाया हाखराव
नोँखौ एंगारना थाङा खैफोदाव
अनजालि आंनि आखायाव हम
आंखौ गोबाना ला बिखायाव
नोँ थायोब्ला बालाहामायाव बोहैयो निजिरा
नोँ थायोब्ला सिमांआ सिमां जाया
हार्सिँङै जेरै आं फबजाया हाखराव
नोँखौ एंगारना थाङा खैफोदाव

गावनि गोसोबादिनो
नोँ गाबो आरो रंजायो
हास्थायो नोँ आरो मुगैयो
आंबो आं बादिनो
सिमां नुयो आं बेसेबा गिदिर
बयनिबो गोजौसिन आरो गोथारसिन
बयनिबो गोफारसिन आरो गोबौसिन
हमथा जायै आं आंबादिनो

नोँ दागाब आयै
आंथ' मोजाङैनो दङ'ना
नोँ माखौ जिँगा सियो?
आं थांना थागोन आयै।

आं आजै आबैमोनखौ गोसोखांलिया
बै समनि गाम्बारि बिरगोस्रिमोनखौ
दाउरि सिख्लामोनखौ गोसोखांलिया
बिसोरनि गोसो आरो मेगना गुबुनखा
-
सिनाय जानाय दानि साकिरा बियनसे
अन्जलिना जलि
मादुरि इस्वरियामोनखौ
मख'यैआनो गाहाम जागोन
-
आं नोँखौ सोनाबारिजोँ रुजुनो नागिराखै
मानोना बिसोरहा मान दं
आं चिन तिब्बेत करियान
माल्दीब मालायसिया नेपालखौ मख'नो नागिराखै
बिसोरहा मुलुगनि जौसां सोमावनो गोहोआ दं
-
आं सोर्गोनि मेन'का
उर्बसि मेन'का तिल'त्तमामोन
बै समनि नांगोल सिड़ाजोँ एरखांजानाय
सति सीता
साबा पाण्डबनि बिसि
द्रौपद राजानि फिसाजो
द्रौपदिजोँ रुजुवा
फाप एबा दायफोर नांनो हागौ
-
नाथाय पष्ट-मर्दाननि सायनासालियाव
गल'ल' नायहोनो हायो नोँबो
नोँ नकल सोनाबारिनि देलायमांग्रि
अब्लाबो आखाय खबनोसै आङो
ख्रब ख्रब ख्रब
दाउखा सिगुणफोरा फोर फोर बिरलांथोँसै।

फै आंजोँ मोनाबिलियाव
आबिर गाबनि गोरबोजोँ
बेबादि आं लेँहराखै
ओरैबादिसो बुंदोँ-
रजे नोङो गोजोनैनो था
.
आंखौ दाबोराब
मानोना खबाम दोरोददोँ जिउ
नोँनि आंनिनो दिनैसिम
जुलिनि ललिनायखौ
आंबो खोनायो रजे
.
फैमाल नङा
नोँनि आंनि मेथाया
बै गाथोनाव जोँ रोजाबनाय
आखायखौ आखायाव होनानै
गोरबोजोँ गोरबो---
.
बेसेबा मिजिँ आंहा
बिफां-लाइफांफोरबादि
दैसा निजोराफोरबादि
नोँनिनो अरायबो गोरबोआव
.
गुसुथियाव आल्टा फुन्नानै
मिनिखैरो मिनिस्लुयै था
मोखां आरो गोरबोआव
जिनिरखौ मानो लानो
मिथिँगाजोँ अरायबो लोगोसे

दं बिखासे नोँनि गोरबोनि,
गोगो साजायनाय महर।
हाया नोँ बेखौ बावनो?
रैसुमै अनजालि नोँ बावगारा।
जुलिया जागोन नोँनि आंनि
जोँ सानैनि;
गोरोबगोन खुसियाव सना
फै फै
गोबा लायगोन सानैजोँ
गोथार सान फैबोला सानसे।
नोँल' आंनि नोँल' आंनि
बेखौल' बुं नोँ आंनि
मिजिँ खालामना फैसालि।
जागोन गोथार जुलि सना
नोँनि आंनि- सानैनि
रंजानाय बोदोर गोदान।

उन्दै समनिफ्रायनो आं नुदोँ
आं मोन्दांथियो जेब्लाबो
बेसेबा रंजाथाव सानफोरा
अनसुलि बिमानि अन्नाया।
बियो जेब्लाबो मिथिगौ
माब्रै अन्नांगौ?
बोरै बुरखायनांगौ?
आरो गोनां आंनोदि।
बियो जेब्लाबो आंखौ बुङो
बेसेबा समा बारलांबायबो,
जोबोद रंजाथाव आरो रुइदोब।
आयै नोँ आरो आं
रागा आरो गाबनाय
नाथाय मोदै हुगारनो नोँदि फोरोँदोँ।
मोजां मोनो आयै
गोरबो गोसो गासैबो आंनि।
नोङो सानफ्रोमबो आंखौ नुयो
आंहा गोसोआव दं,
उन्दैनिफ्राइ लाइमोन दिनैबो,
सुंद' सम आरो बोथोरा थांबाय।
नोँ समायना आंनि आय
नोङो जेब्लाबो मिनिसुलि
नोङो जेब्लाबो गोहो गोनां
मोजां मोनो नोँखौ बिमा
नोँनो आंनि जिउ मुलुग।
साबायखर गोरबोनि गासैबो
मिनिसुलि रंजानायजोँ,
आं मिथिया नोँ मानो मोदै हुगारो!
आरो मानो हरखाब गंस्रियो
नाथाय मिथिगौ आं
नोँनि मोजां मोन्नाय
नोँनि आंखौ खुदुमनाय।

नंगौ नङा आं हले मिथिया
बाथ्राया नाथाय खुगानिल' नङा।
आयंनि आयंआ सानसेखालि
सानफा-थोलो खिन्थादोँमोन फुजाखालि
आंहा गोसोआव दं
मानोना आंनि दाइरियावनो दाबो दं।
आयंनि आयंआ बुंदोँमोन-
1
सैमा नुब्ला सैमाया
हमथा हायै गारमा मानो
बेखायनो नामा सोङालाबा थाया।
2
मोसौ दामब्राया मोसौ दामब्रा नुब्ला
सिथोर-बाथोर गं मानो
बेखायनो आलि सौखुनो मोजां मोनो।
3
दाउला थाइगिर दाउला गेरगेरे
हर जाब्लाथाय गोदोना थाबथायो
बेसोर माब्ला सोराङो लामा नायो
ग- गेरे- ग सोरांस्लाब मोना।
4
हाब्रु नुब्ला अमायालायनो
गोलोमस्राव लायो
बेखायनो बिसोर हाब्रुखौ अनो (नागिर बायो)।
5
मैसोआबो एसेल' रागा गैया
गोदो बाथौ बोराया मैसोनो
गलि, माबा जेबो हाउजिँ होआखैलायनो!
बेखायनो अनथाव-बाथाव थालिर लाइफांआ...
सिबाय दाना मैसोनि नंबर 1।
6
मानसिखौ सोरबाया गाज्रिसिन सोरजिदोँ।
नाथाय मोजां मानसियाबो,
थोदस् थोदस् बुङाब्लाबो जागोन
अब्लाबो बुंजायो-
सिख्ला गोदान नुब्ला सेँग्राफ्रा
मेव मेव मोनलायो नो
नंखायनो जंखायनो हांखुर जायो
आरो
....... सिख्लाफ्रालाय??

फरायथौनो हाया नोँनि गोरबोखौ
आंदि बेसे नाजायो मिथिनो
गोसोआ बोदोर जाफायो आंनि
उसुं सेराव मान्दार बिबारनि बिदै सोबनाय दाउसिनफोरजोँ
नोँ लाबोयो मान्दार बिबार जुलिनि सिन्दुर

(मायथाइ मोनसेनि उनाव)
दिनैलाय मानि मिनिनाय
मोनजारोङै आबै फावगिनि?
थाफ्लि फेन्दा दामै दामै
मेथाइ रोजाबनाय बिनि
-
(आद्रि आद्रि गन्द्राय बोराया थैबाय
थखन थुना
मायरं बिबाय बिबाय
फावगि बुरैखौ फोथांबाय बियो
-
मोन्नाय मानि
दान बिबाननि
सानफानि
बुरैनो गथाय फैबाय)
-
बोराय
थैदोँना थैदोँ
मायरं फेन्दासे एरदोँ होन्ना
खरलेब मनालिसानि मिनिबावो बियो
थांखु लाजानाय खावलाय
-
सिलिम खुगायाव बावगोमायो
म' म' थांखु आलुवा-
सोमो नाङो दाउखा दन्दा लागोआ
फोर फोर गाव गाबागाव बिरलाङो।
===========

हरनि फैलाव अखोरांआव
जोँथि- जोँथा मिनिस्लु हार्थखिफोर
बेसोर अराय जुगे जुगे आलारि बाथि;
हरनि रानि गावदां अखाफोरा
बयनिबो गेजेराव मिनिसुलि,
सोरां हरदोँ थुरि उखुमनि न'
बिखा फुवारनाय आंनि सिलायाव।
नायनो बेसे हायनारि नोँदि
नायहरो लाइमोनस्रि नोँनि महरखौ
सांग्रेमा एम्फौमानि थाखोमायै,
आरो आं बोजबनो बोदोर जायो।
नै, लाइमोनस्रि गावदां-
बैसागुआव फै सना खुसियै
आंनि सिलायाव नायहरै नोँ
मोसागोन आं दैज्लां बरायनानै,
नोँ खोनागोन हायनारि सना
मेथाइ खनगोन दाउ खौऔआ
खाम दामगोन जोमैया
सिफुं सुगोन बार हुंखाया
जथा, थरखा, गंगोना, सेरजा
मिथिँगानि जिबिफ्रा दामगोन
दाउसिन- दाउला रंजागोन
ना खुरस्रा रंजागोन
लोगोआव बेजोंबो सोरबा सोरबा
एम्बु बंग्ला मोसागोन,
आरो मोसागोन आं बोदोर खुसियाव
नोँ नायहरदे सना हायनारि
लाइमोनस्रि गावदां आंखौ खुसियै।