खेबसेनो बारनानै फ्लाइं-किक् होयो।
इंगिनिया फोद्दा खांग्राङो।
नाथाय इंगिनिया सालाख्।
बेयो बुंनायसै-
रथ' फंबाय रथ',
फंसे बाथ्रा बुंनोसो फैदोँमोन आं।
खुसेँग्राया हां थिफुं थिफुं रागाजोँ सोँफिनो-
मा बाथ्रा? आंनो मानो खिन्थानो नांगोन?
- खोनासं फंबाय, खोनासं खैफोद जेरैबो खैफोद।
दै बानाया आंनि देराखौ सिलिँखार खालाम जोबथारबाय।
बे बाथ्राखौनो नोँनो खिन्थानो आरो नोँखौबो रैखा खालामनो थाखाय आं नोँनि दरजा सौब्लाना हाबफैनाय जादोँ।
नाथाय आं फांथेना गारबोफिन्दोँ फंबाय।
- हो नोँ आंनि दरजाखौ बोरै सौब्लाना फैनो हाखो?
आंथ' गिनांगौ गैयामोन।
खैफोदखौ नोँनो आंनि खाथियाव बोना लाबोबाय।
आंथ' आंनि बिसिखौ लानानै गोजोन एमावसो दंमोन।
नोँ जोबोद इनाय मावबाय।
ओँखारलां नोँ गोख्रै।
नोँनि मददनि सोलाय आं थैनायानो मोजां जागोन।
खैफोदखौ आंनि थाखाय नोँसो लाबोदोँब्ला बे खैफोदखौ होबथाना नोँनि गियानि हाबाखौ दादिन्थि नोँ।
बारनानै जोबावो फंनैसो।
इंगिनिया राहा गैयै जायो।
- निमाहा हो फंबाय।
आंखौ नोङो रैखा खालामथार।
आं नोँनि सिं जाना थाथारगोन फंबाय।
गाबो सिबाय गिनायजोँ आखाय खबजबै इंगिनिया।
- नाङा ओँखारलां।
जोरन हरो।
इंगिनिया गिनायजोँ हाखु-दाखु थंब्लेट बार'नो।
लोगो लोगो दरजाजोँ दैया बुर बुर हाबो।
इंगिनिया सानस्रि सानस्रि फांसे फिसा लाइफांआव गाखोयो।
दसे उनाव खसेँग्रानि देरा फारसे नायहरबाय-
खुसेँग्राया खांग्रांना दं।
हां दंना गैया मिथिनो हालिया।

अराय मुगा खोमसि खोमसि
बे गादबजानाय, बे सुसिजानायखौ
दिनै आरो गाबोन सहायनो हालिया,
फरायजायै खोमसियाव थानो हालिया।
बनजार दैखांदों गादब जानाय फोरजाफोर
बे गादबग्रा, बे सुसिगिरिजों जुजिदो
ब्लाव ब्लाव दुंनाय अर बिखायाव लानानै-
खोमसिनि जालामाखौ दिनैनो बोखावदो।
उदांस्रिया हब्रादों आयदै आयदै होन्नानै
अन्थाइ बिखा खुंगुरिनि आथिं सिङाव,
मोनजारोङैनि गाबनायखौ फोजावदों जोमैजों मोनजारोङैनि बिखाया खामग्लिदों दाहायाव।
रोजाबदो आंनि हे बिग्रायखांगिरि मोन्थाइनि
बेसेबा दाहार सिमना सिफायनायनि,
उदांस्रिखौ फसंनि मोन्थाइनि बिन्दोआव
गोजोन गायसननो अराय थांनानै थानायाव।
अराय मुगा खोमसि खोमसि
बेसेबा गाबनांनाय, बेसेबा हांमा सुरनाय
जोबनो रोङै दुखुथियानि मोदै गसरनाय
खोमसिखौ होखारनो बनजार दैखांदो।
गादबग्रा बे सोबखग्रानि हेंथायै
खुंगुरि बे सुसिगिरिनि बिखा खामफ्लंनो
रोजाब जारिमिननि मेथाइ मोन्थाइनि
रोजाब ब्लाव ब्लाव अर लानानै।

खोमसिया साग्लोबफैबाय
दान्दिसे बिरलांनायाव सोरांआ,
सान्दोँ आं गोरबो दर्खँआव दिनै।

जेरैबो खोमसि।
जेरैबो खोमसि।
आबुं सोरांआ गैया
जोँमानि मिनिनाय गैया
सांग्रेमा बिरदोँ
मोले सोरां सारदोँ
गोमोथिँ एम्फौफोर गाबदोँ
खोमा खोमा थिँ थिँ रिँदोँ
खोमसि जेरैबो।
खोमसि जेरैबो।

बिरिद बिरिद खोमसियाव
खोनादोँ आं खोमायाव
खोमसि जानाय हराव।

बिग्रायारि आंगोनि आंगो लोगोफोर
खौसेथिनि दौलेँ बोन्नाया जआखै,
बे बोथोरनि बारा बारगासिनो
आफाया दिन्थिनाय लामाजोँ दावगानि।
बे जोँनाय अरखौ आखायाव दैखांदो
जोमैया खोबथेनानै लायो सानखौ,
बे फैसालिनि खोमसिखौ होखारनो
बे जोँनाय अरखौ दैखांदो।
मुगानि सुसिनायखौ फेजेन्नो
बिखा फोरदान आथिँ फोलाव,
बेगेँखौ हा खालामनानै जुजिदिनि
उदांखौ मोखां सेराव लाबोनि।
मेगननि मोदैखौ हुगारै हुगारै
बेसेबां खोमसिआव थाबाय थानो?
आथिँ सिङाव मेमब्रायै मेमब्रायै
बेसेबां गादब जानायखौ सहायनो?
फानदावलाफ्रा जेरैबो दौलेँ सादोँ
जोख्लायहरनो नाजायो दैखर सिङाव,
बे गादबनायजोँ जुजिनो दावगादो
जोँनाय बिखानि अरखौ सुखांदो।
रोजाब रोजाब बे हज्रिख्रावनाय
मोनहां-मोनहां सफैबाय लामायाव,
बारबोगौ उदांस्रिनि गोजोन बारा
रोजाब मेथाइ खौसेथि गारांजोँ।

नोँनि मोदैयाव आङो गब'बाय
आंनि गोलोमदैयाव नोँनो गाद्लिनबाय
बिलाइ जानानै-
गोजाव गोजोनै मिनि नोँ
~
सियालनि हाबायाव
सानैजोँ रंजाथोँसै सना
नोँनि आंनि मोदैयाव
ना खुरस्रा जावरिथोँसै
~
लाथिख' मिथिँगा मुलुगाव
अन्थाइ बिखा बांग्रिँ सिमब्रेलांबाय
जुलिया जालांबाय गोरबोनि
गोसो लानाय होनायनि
~
नोँ दैसा आं दैमा
बोहैबो गोबाफै खुदुमफै
आं बार नोँ मिथिँगा
बिलिर बिलिर लागोन गोरबो
~
नोँ मुलुग आं सान
मिनि होगोन
रंजा होगोन
नोँखौ आं सोरां होगोन।

दाउ खौऔआ गाबफैदोँ
आंनि गोसोआ बोदोर जादोँ
जुथा लंफेन गान्नानै
देलाखब देलाखब देलायनानै
आंनि अनजालिजोँ मोसाफानो
बै ददेरेजोँ रंजाफानो
~
थोरसि लथा दामनानै
मिनिखैरो गोजोन मिनिनानै
फोरमायनो गोसो जायो
आमायसो खायलाबनि आलासिनो
थारला थुरलानो
फोरमायनो गोसो जायो
~
आयै-
आयैलै सयथिबो
गुफुर गावदां दां
मा मुं जाखो।

जब' जब'
दैज्लांनि दुब्लियाव
माय गायनो बोथोरा फैलायबाय
ओइ बाजै नायना होदोलै
माय गायनो गोरोँखौ
~
नागिरना मोनलिया आं
दखना गानग्राखौ
जेरावबो नुलिया आंलाय खानाय गोलावखौ
बाजै जेरावबो नुलिया खानाय गोसोमखौ
~
बेँफोर हाद्रि नांफैबाय
बै गामियाव
महर मुस्रि गुस्लायबाय
बै हायेनाव
सिनायनो हालिया आंलाय बर' सिख्लाखौ।

गां गोनां सना गां
सिखोला बैसोआ गां गोनां
ददेरे बैसोआ बिरहां बिरहां
हाबाब अनजालि-
आंनि अन्नायखौलाय दा बावलां
~
अखा हाहां हाहां
दैज्लांआ फैहां फैहां
बैसागुनि बारजोँलाय बिखा फांदां
बिलाइ गोरलैनि बार मोजां
~
दाउ खौऔआसो जंखाय हरदोँ
जंखाय हरदोँ सनालै-
जोँ लागोनि टेक्टर बोरायालाय फाम नांहां
~
खानाय बानाय आगैलै सैनाय
आंखौ दालां दाबावगारलां
इनाय बानाय
इनाय बानाय सना
आंनि अन्नायखौलाय दाबावलां।

सिरिमोन्ना मोकथांआव
मेगन बिलिरब्लानो नुवा नोँखौ
साया-माया सिमांआबो गोमालाङो
.
गले गले रायज्लायफैयो नोँ
सिमां आरो सिमांआवल' नोङो गेलेफैयो
गोमा लाङो बबेबा नुयै आन्दोआव
.
आं आन्दायो
आं आन्दायो
मेगनाव बेबादिनो---
बहा नोँ गोमोरलाङो
बहा नोँ आनज्रायलाङो
.
नोँ जंखाय फैयो
नोँ गेलेफैयो
नोँ खुदुम फैयो
जिउ बहा नोँ गोमोरलाङो।

गावदां अखाफोरा
मिनिसुलु नुजाफैबाय,
नायहरदोँ आंखौ
आं अखाफोरखौ।

गियानियासो मानसि
मिथिँगानि फोरोँनाय
सोलोँथाइनि जोबनाय सोलेर।

दिनै जोबोद गुसुसिन जादोँ

सान हाबनाय लोगो लोगो
गोबाख्रब फैयो बियो आंखौ
उन्दुफायो आंजोँ
आंदि बिखौ एसेबो मोजां मोना
आं जेब्ला लेब-कम्बल खाख्लुमो
बियो सेर सेराव नेनानै थायो
आं जेब्ला जोलुनो कम्बलखौ
बियो आरोबाव उन्दुफायो आंजोँ
गोदोहाय आबौआ गोदो गोदो
जिगाबनि एमाव उन्दुनो हायोमोन लान्थियाब्लाबो
इसानसालिनि सिमा खाख्लुमनानै
एबा दारहा सायाव थांगासुरि जोमनानै
इन्दिनि सि गुदुं साखोना
अरखिनि जेराव थानो हागौमोन
गोलाव हरजोँ जुजियै जुजियै
आबौजोँ उन्दुफानो हायामोन बियो
थिँनि उखुमजोँ सेरमायो निहिर
बेयावनो बाबथाबना फैयो बियो
आं जेराव उन्दुलाङो बेवहायनो
फिसा सिरि सिरि बामख्रब फैयो
फुंनि जायोब्ला आं जेकेट गानो
बियो गोबाख्रबनो हायैबादियै
अब्ला बियो दैसायाव एब्रेहैयो
आंनि मोखां सुहैनाय समखौ नेनानै थायो
गुसुआ आंनि खावलायाव गुस्थि फोनाङो

गुसु दैजोँ सोलेराव लुबाय
हमनो हाबाय आं बियो गोजांबाय,
दान्दिसेनो बियो गोर गोर खारलांबाय।

आं उन्दैमोन गुदि फरायसालियाव
गोर गोर बिथ'राइ बिजाब फानोखंआव खिथेबना लानानै
हुरुद खुगाजोँ मटर साइकेल साखावलांनो हानाय।
निसिमा रायजो नाङैनो मुंदांखा नायल' जाल' दतमा गामिनि रनजिद माहाजोननि
"गैया मा खालामनो?" मुंनि टियाटारआ।
सानफ्रोमबो  नङा सम सम मोना मोनायाव जायो एबा दिन्थियो।
गोसो गुदुं जोँ गामिनि बोरायसा बुरैसाफ्रा सोरां बारां ओँखाम जानानै
मोनानाय लोगो लोगो नायनो हांखुर जालायथारो।
गान गोलाव जाथ्रा माबा माबि मानसि सावथुन होनब्लाथाय बारलायग्राखा।
आरोबाव सेंग्रा सिख्लाफोरखौ ओरैनोब्लाबो बुङाब्लाबो जाखासै।
आंनि सानै सनजिमा रनजिमा आब'मोनाबो बाज्ल' लायथारदोँ सानसेखालि
बिसोरनि सेर सेर आरो आंबो खम नङा।
आय आरो आफाया गावसोर नायनो ओँखाराखैब्लाबो आंखौ लाखिनो हायाखै ओइदिनखालि
"नाया मोना गुना,
देनां देरबा नायगोन होन्नानै।"
दैज्लां बोथोरा थांबाय
रावहाबो माय गायबावनांगौ दंब्लाबो बोथोर बारग'बाय।
अदेबानि  मायआ मोदोम गोरलै जासावनाय समसै।
मोनाबिलिनि जानाय लोँनायखौ थाबै जादोँब्लाबो थाबैनो मोनाबावदोँ ओइदिनखालि।
दतमा गामिसिम थांनांगौ जायोब्ला सालगुरि बालागारि मोन्नै गामिखौ बारना
आरोबाव दुब्लि मोनसे बारनांगौ जायो।
मोले मोले लेम आरो खायसे फाथि सिनजायाव अर ब्लाव ब्लाव लानानै
जोङो ज' जयै थांबाय लाफेर माहाजोननि माय दुब्लि गेजेरजोँ।
गाब्र' गुब्र आलि गेजेरनि लामाजोँ थाबाय लांनायनि सोरबा सोरबा गोलैगु लायदोँ।
गालुन गुलुन हाब्रुबो जालायबाय लामा (आलि) या।
जोँनि हानजानि सोरबा सोरबा लेवार बाजादोँ
सोरबा सोरबा गाहे गुहेजोँ हाब्रु गदा गदि जादोँ आथिँफोरा।
आंबो सेन्डेलखौ आखायाव लानानै थाबायदोँब्लाबो हाब्रुजोँ बोकथा जालायदोँमोन।
हराव थाबायब्ला गोजाबो खाथि जायो होन्नाय बाथ्रा दं।
जोँबो जेन' थाबैनो सहैनायसै रनजिद माहाजोननि सायनासालिसिम।
गोजौ जौसांआव दिन्थिनाय जायो
लान्दां फादां फैसालि बोलानो खोबनो थाखायबो जेबो गैया।
अदेबानि दिन्थिनांगौ जायोब्ला फावगिरिया गोजौआव गाखोयो
गावनि फावथिनाया जोबोब्ला गाहायाव ओँखारबोयो फिन उननि दिन्थिनांगौनि थाखाय थियारि जाना थायो।
सौहैबाय जोँ फालोसे मानि मिनि खुसि नायनो थाखाय।
आंबो नुफेरै गथ'ना
नुसिगोन एबार लोगोफोरजोँ सावरायनो हासिगोन
सान्नानै जोबोद खुसि।
नाथाय मा जाखो मिथिगौना?
"गैया मा खालामनो?" जानो गोनां फावखुंग्रिया अरजोँ खामजादोँ।
एसेयावनो थुंगेनायसै सिबाय फालोसे मानि उल्था मोखाङै
गैया मा खालामनो गिदिँफिननांबाय।

रायजोनि गिर्जा लांगोनायाव
गोजाम बोसोरखौ राबणनि महर होनाय जादोँ
बिनो उदै बुंजासे आदार जाहोनाय जादोँ
एटम बम फर्खा आसि
रकेट सांग्रेमा मोला बम
बायदि गारमा गुवार गारमा गुसेब बम
बिनि सोरगिदिँ मण्डलिनि गासैबो
गानफब जोमफब बेँदिँनाय जागोन
सोरबा बाइबेल बिजाब लागोन
सोरबा मेथाइ बहि लागोन
हर नङा सोरां नङा 12 रिँगायाव
2015 आरो 2016 नि गेजेराव
गोजाम बोसोरनि लानजाइयाव अर होगोन
लोगो लोगो बयबो आफा खबगोन
लोगो लोगो बमाया गोसोबादि हब्रागोन
गोजाम बोसोरा बेबादिनो थांगोन
मोदै हुगार हुगार दखना आंसोलजोँ
नुयैनिफ्राय नुयैयाव खोमसि एबा सोरांजोँ
बिनि उनाव मण्डलिनि बयबो रोजाबगोन-
.
अ' प्रभु नोँ अन्नानै
जोँखौ बासायना लाबोबाय
थांनाय बोसोरनिफ्राय नैबे बोसोरसिम।

गोजाम बोसोरा बिरलांबाय
बारदै सिख्ला सौफैबाय,
गोदान देलाइस्रि मिथिँगाया
बिफां लाइफां रंजाबाय जिबिया।

जोँनि आबादथिलिनि सेराव
जेराव जोँ थायो
बेयावनो गोजा लैथोआबो
गोजाव लाङो आबादारिफोर
-
सोमखोर जानाय आबादफोरा
गल' गल' नायहरो
लेवार बेलावनि गोजोमनाय
आबादारिनि गोथै सोलेर
-
सिगुण सिलानि होँगो दोँगो
अख्रां गंसे अखाफोर नुहरै
साना सौसिख' हायै
खोमसि बे मोनसे दुब्लि
-
मोकथां सिमां नुग्रानि जोनोम जालिया
सिमांबादिसो जाबाय
सिमांनिफ्राय मोकथां जालिया
गोजा लैथोनि सेर सेर

गोथार आरो गोदानावसो थायो ना
ओरैनो जेरावबो दं नोंलाइ?
जारलाजों नांलाय-खमलाय आंहा
ओरैनो नांलायनाय गावजोंनो गावनो,
नै लोगो नोंखौ मोनोब्ला सोरखौथो नांबावगौ जाखो?

हुरा हुरा सानफ्लाङोमोन आं-
हाबावगोन दा बायग्लिनाय आंनि गोसोखौ
फागुननि बारजोँ जरा फोनांनो,
बिखा गावनायनि गुथाला
दैदेनबायसो जोँमा साना,
गोरबोनि लाथिख' नोजोरजोँ
नायहरो जेब्ला गोबौ मेगनजोँ।
गोजाम बिसम्बि खामग्लिनायनि आलौनायाव
आं मोन्दांदोँमोन मुगैनायनि अर लगायनाय।
. . . . . . . . . . . . . . . .
दिनै गोदान अखाफोरनि सोरांआव
नोँदि हाबावगोन जोँनाय अराव सालाइ एरनो?
गोदान नोँनि आखायाव आंनि नोजोरा,
- बै थाइनै आखाया माबा बुंदोँ
जेराव लाजिगुसु थाइनै आखायजोँ जंखायलायदोँ
बेखौ बुंनो हागौदा
मोनसे रोखोमनि फावल'।
मोदै हुगारदोँ गामसानि दौबाजोँ
नाथाय फेलेँनिल' गाबनाय नङा
फैगोन रंजानायनि मोजोमसे मिनिनानैसो।
मोबायजोँ नायनानै जेब्ला नुयो
सुथि मोन्नायबादि अखाफोर ओँखारबोयो,
सोरांसि दरखंनि आन्दोआव
लाजि गुसु नोङो आमाय-जुमाय गेलेदोँ।

लाइमोन सिख्लानि जारौ गुस्थिनिफ्रायबो समायनासिन
नोँनि गुस्थि
गहेना गानफबनाय हिनजाव गोदाननिफ्रायबो गोथारसिन
नोँनि गोरबो
दुखु गैया दाहा गैया नोँनाव
रंजाफ्लानाय आरो फोलानाय गैया
नोँखौ बयबो बरायदोँ
दैसा सेराव बाज्ल' बाज्ल' मोसानानै
नोँखौ बयबो बरायदोँ
थुम-थाम एटम बमा गावनानै
नोँ फैबाय बेसेबा खुसिजोँ
गोदान आरो इयुननि मिजिँ लानानै
गोजामनि इनाय अगेन बिसम्बिफोर
आरो बावनो हायै दिखारखौ
बहाबा नारगार हरना दिनै

आं सिमां नुदोँमोन
अनजालिखौ लानानै सान बारहोनाय
रावबो फैयै लैथोमा गेजेराव
बेसेबा गोजोन बेसेबा रंजानायजोँ
सिमा गैयै गोजानाव मिजिँ खालामनानै
जिउनि दिङाखौ हगारनानै
नाथाय आंखौ फोजाफैयो होस्रिख्रावनाय
सोबखजानाय बे हानि हावरिया आबादारिफोर
गोमालांबाय गासैबो उन्दुनाय
आं आरोबाव मेसेबनो हालिया
अनजालिखौ लानानै सिमां नुलिया आं
बे होस्रिख्रावनायखौ आथिँ गासिन्नानै
बेसेबा मोजांमोनबाय आं बे जांख्रिथाइखौ
जोबोद गोथार दाबिनाय
बेसेबा गोगो लुबैनाय बियो
बे हानजानिनो आंबोदि दिनै सासे
बिग्रायारिफोर बियो गोथार दाबि
जोँ उदां जानो लुबैयो
समान बाहागो लुबैयो जोँ
बे हानिनो जोँ बिगोमा आबादारि

बिदिन्थानि हाथासि मेगनाव
आं खोनायाखै रैसुमै,
नोँनि मिनिनायनि रिँनाय;
हरनि सोरांआव मोब्लिबगासे
बे हरा गोबादोँ दाबि अन्नायजोँ-
बेयो आंखौ गोबाख्रबदोँसो
जाय आं हां गहां।
अराय मेँग्लिदोँ अराय।

जिउ अन्नायजोँ बुंफबनाय
जेराव बेसेबा सोरां
साननि गोजोँ मिनिनाय बायदि
जाय गुबुनखौ गावखौ बायदि सानो
.
जिउखौ बिखायाव बजबो
गुबुनखौ आंगो बिलिर बिलिर
बेनो जिउ गोजोँ आलारि
दुखुआव जाय खुसिखौ लाबोयो
.
जाय सोरनिबा थखन जायो
आन्दायनाय जिउनि फैसालियाव
जिउ दिङाखौ बारहोनो बैथा थुयो
बेयो गोगो मानसि
.
जाय गियान गोनां
जाय गियानखौ होयो
बियो सोर्गोखौ सोरजियो
सुबुंनि मोनसे गोरबोआव
.
गोथार बोसोनजोँ
जाय दैबायो गोबां गोरबो
गोरबोनि गोगो बारजोँ
गोरबोआव थायो सोर्गो

आं सान्दोँ- गोनोखोनि सेर सेर
जोँ खारफानो रोँदोँ।
बिसोरजोँ सिनायथि जानो हायाखै।
आं सानो जोँ खारफायै खारफायै
सहैनो हागौ नाथाय
जोँनि सेन्डेल मोनसेनिबो समायना आगान थालाङाब्ला?
बहा जागोन जोँनि सिनायथिया?
नै बर' लाइमोनफोर जोँहा समा जाबाय।
सेकेन्ड मोनसेल' सम दंसै।
जोँ सल' खिन्थाग्रा रोखा रोखा जारिमिन खिन्थाग्रा
आबै आबौमोना गैलिया।
जोँ मोननाय थफ्लाखौ
जोँनो बुथुमना आरोबाव जथायाब्ला?
गोनोखोनि साग्लोबनायाव
सोर नागिरगोन गोदानै
आबै आबौनि बारियाव?
आरो आबै आबौनि बारिया थाबावगोनदा?
बिल्दीँनि होँगो-दोँगोआव।
सांग्रां जादो;
जोँनि मावनांगौ जोँनो मावनांगौ।

गोरबोनि थाखाय
जोँ गोरबोखौ मागियो
गुबुन मोनसे गोरबोआव
गोदान गोरबो
.
जोँनि गोरबोजोँ
दुखुनि बार बारलाङो
सुखुनि बार बारलाङो
बोथोरनि उनाव बोथोर
.
गोरबोनि थाखाय
गोरबोनि थाखायनो
जोँ थांनानै थायो
थांना नाथाय जिउनि थाखाय
.
मिजिँ सुजुयो
खबाम गोबां खन्थाइबादि
सिमां रनसायो
रंजानाय गोबां मोकथांबादि
.
गोरबोनि थाखाय
गोरबोनि थाखायनो जोँ जेनो
गोरबोनि थाखायनो
जोँ मिनि खुसि देरहायो
.
थांनाय आरो थैनाय
गोरबोनि थाखायनो
जिउ आरो सिमां
गोरबोनि थाखायनो
.
गोरबोखौ जोनोम होयो गोरबोआ
बेसेबा समायना समायना
मिजिँ गोबां सिमां गोबां

आंनि सोलेरखौ नेवसिनानै
आंनि मुस्रिखौ बावगारलांब्लाबो,
नोँखि हादोँ दाबि आंनि गोसोखौ..!
आंनि समायखौ सिफायनानै
आंनि गोजान जालांब्लाबो
नोँखि हादोँ दाबि दुखुखौ फोजोबनो..!
मिथिगौ आंबो सना-
नोङो मोखांआव रंजादोँब्लाबो
उन्दुना दं नोँबो गोरबो सौखियाव,
जेराव मोदै; गान्दु सिग्लाबनाय।
बैसागु बोथोरनि गोरलै बिलाइजोँ
सोलेरा मिनिसुलु मोसाब्लाबो
सार अन्थाइनि सोगोमनायाव
नोँखि आंखौ गोसोखाङाखै-?
गोदानाल'नो सिबिजाथाव नङा
गोजामखौ थाल्ला बावगारना,
नोँखि सना बेखौ मिथिया?
हाबाब सना आंबो थांङाखै बावनानै।
नोँबो आंखौ थाल्ला बावगाराखै।

गोरबो हाथासि मेगनाव
सांग्रेमा बिरदोँ सोरांआव,
नागिरदोँ सानस्रि सिमब्रेना
- सोरांखौ अराय।

गोलाव खोमसि हराव
साननो हमदोँ आं मेसेबा
जेब्ला आं उन्दैमोन
सावगारिया फैयो गोसोआव।

मोजां मोनो होननानैनो
सना जिउ ददेरे
बेबादिनो बेसेबा बाखोनायो
रंगिना संगिना होननानै
.
मेगन बेस्रां
जानजि सेरेरे सैनाय
जोनोम जोनोमनि नोङो
बेसेबां अनो जिउ नोँखौ
.
थांना थानाय जिउ मोनसे
एबा जोनोम मोनसेयाव
नोँखौ बेसेबांदि हास्थायो
गोथार गोरबोजोँ गोरबो
.
अब्लाबो
नोँ आंखौ सोगाबो
आंखौ जंखायो नोङो
सनालै बेबादिनोथार नोङो

थार्ला- थुरला बुंनायानो मोजां।।
जोँनि न'आव मावजि मासे दं
आब'आ फिसिनाय
गावनि जाखोन्दा बेदर हाराखौ
जेब्लाबो बियो होयो।
थनि मुंनि मासे सैमाया
भुटाननि लाबोनाय,
फंबाया अनै बामै फेदेरनाय
गावनि ओँखाम खालायखौनो
जाहोयो बियो बुरखायै बुरखायै।
गय बागान सिङाव बुरैरै
अमा मासे दं फिसिनाय
आयआ- गुन्दै माब्लाबा अफ्रि
जाहोयै जाहोयै फेदेरनाय।
लावमुरा आरो गं मेना
बोराय बोराय हालुवा मोसौआ
नांगोल बोग्रा आफानि,
माय बजा रोगानो गारि बोग्रा;
दैज्लां मेसेँ खामानिया आफानि
दै- दौनाय खाहैनाय आरो लायनाय।
दाउसा, फारौ आरो हांसोआ
आय, आब' आरो आनावनि
गावबा- गाव मालाय बाहागो,
माथामसो बोरमा खासिया फंबायनि,
फुख्रि बिलोआव थब्ल'लाय- दावलाय
ना मागुर, ना रौआ आफानि।
उन्दुग्रा खथायाव बेमा- खांखमा
फालो फालो एन्जर इंगिनिया
- बेफोरो गासैबो आंनि?
आफानि माय दुब्लियाव
एन्जर दांसुलिया, एन्जर बुंगा
नङाबा बाथासिरा- इंगिनि
बेफोरो गासैबो आंनि?
बिरि- सिगारेड्- सादा
फाल्सार- जौ- गानजा
बेसोरो गासैबो आंनि?
हाय गशाइ!
नोँनो बयनिबो गिरिब्ला
होदो बयनिबो खर'आव,
बिजिरनो बिसोरखौ मेलेमाव;
आंहादि मा मावनांगौ दं?
मा सोलोँनांगौ दं?
आंदि अलसिया एबा
आंदि मावनांगौ खामान- मावगासिनो दं।

थुरि उखुमनि गिजि देरायाव
थरथिँ थरथिँ अखा गसरब्लाबो
आं खाफाल हमाखै,
रुम्बां रुम्बां मायदां जावरिनायाव
आंनि गोसोआ बेसेबा खुसियावसो।
थखन थुनो सम सनाय
खामानियाव उदायै आबौ हान्थुआ
जौनि अफ्रियाव गोजोमना दुब्ला थैलांबाय
आंहा बेयाव खहा जायाखै
खहाया मोनसेल', आबौआ सल' रोँगौमोन
थेवबो खिन्थानो अलसिया थारब्ला?
गियाखै आं मोफ्लाम-मोसि
जोमैजोँ जोमै अखा खोरोमनायखौ
बाग्दाव-फ्लांदोँ ए.के 47नि
मान सन्मान गैयै गाबज्रि हरनायखौसो।
मेगन खानाबादि गोसो खाना
मोन्नैजोँ मोनसेयानो रुजुनाय नङा
मेगन नुनानैबो सान्नो रोङैया खानासिन
फंसे रावै मुगैथावसिन (जाम्बा)
जाय अन्नाय गैया मुलुगनि।

आं हमनो हादोँ गारांखौ
बाफैदोँ दाउथु मासे,
जेराव जुगु जुगु हार्सिँङै गाबदोँ।

सावगारि: दैज्लां दुब्लिनि मोनसे लामायाव
- - - - - - - - - - - - - - -
आसि- हा बहा ना मोनबायनांगौ जाखो फाग्लि?
खोमास्रि- आयौ फाग्लिया बहा थांनो ओँखारदोँ?
बेन'थि लालायनानै?
आसि- (मिनिस्लुयै) नै फाग्लि!
इ.एम लेँहरदोँहाय।
जोँनि सेल्प- हेल्प आफादनि आर'जलाइ होनाय दंमोन।
50 रोजा मोन्नांगौ दं।
हा बेखौनो लायनो थांनो आरो।
खोमास्रि- फाग्लि नोँहा आफादारि(आफादगिरि)
जाबायनालाय।
आसि- औ हाय; जेरैबो प्रलेम(फ्रब्लेम)।
फा नोँहालाय बहा जेखाय लानानै
ना गुरहैनांगौ जाखो?
खोमास्रि- माबाहाय आगै,
थावथाल दुब्लियाव ना
रोनावसो गारदोँनो।
बेखौनो दाहाय मायरं सेरनैसो
मोनोखोमा गुरनो थांनां।
आसि- फाग्लि! बेलाव
ओँखारसो गारदोँनोहाय।
गिथाव बाथाव गिदिर गिदिर थारनो।
फाग्लि बेलावनिसो आदार जाहैगोन नोँ।
खोमास्रि- बेलावखौनो गिबाय आगै?।
आसि- फाग्लिया लेखा रोङैखायनो जेबो बुजिथारा।
बेलाव मानि गुन्दाफोर ओँखारसो गारदोँनोहाय।
दाखालि बुगालियानबा
जेखाय खबाय गारना खारबाबो आगोर मोनाखैनो।
खोमास्रि- आयौ नंमारगौ आगै!?
आसि- औ हाय आब'।
गुरहैयैआनो
मोजां जासिगोन।
खोमास्रि- आयौ थु,थु,थु।
मायरंआनो गैयामोन आंहा।
माखौ जागोनदे फिसाफ्रा?
बिफायाबो नै बोसोर जाहैबाय
मेगालयआव,
गदसेबो रांखौनो हरा।
आसि- ना गुरनाय, मेगं खानाय,
खामला- हाजिरा
मावनायखौ गारनांगौसिगौहाय
बर' आयजोफ्रा।
नङाब्ला देभाब(देबलप)
जानो रोँथारनाय नंला।
नायहरसाय आब'
मालाय हेनथामनि बिसि आरो
लामबुनि बिसिमोनखौ-
मालाय सुथुटि (स्कुटि)
सालायलायनायखौ।
खोमास्रि- जोँ गोरिबफ्रालाय बहा सालायनो
हानोबाल आगै'?
गावनि जानायखौनो सुफुंनो हायाखै।
न' बां गलि गग्राफ्रानो गैजाबाया।
गारि मटरनि सिमांखौ
हांगुबुर जानाय एमाव बहा नुनो?
फिसा फिसौफोर लानानैनो
बेसेबांबा जिँगा आंहा।
फोरोँनो हायाखै,
मोजाङै फेदेरनो हायाखै।
आसि- गिदिर गिदिर सिमां नुनांगौहाय आब'।
बयजोँबो सिनायथि
जानांगौ।
जोँफोरखौथ' रावबो सिनायि गैला आब'।
इ.एमनि बडिगार्ड, बिसि फिसा
आंखौ गासैबो सिनायगौ।
खोमास्रि- नोँ आफादारि जाबाय नालाय आगै।
आसि- आं बायदिनो जानो नाजादोहाय आगै।
सिनाय जानायनि सास(सान्स)
दं।बेफोरबादि
ना गुरनाय, मेगं खानायखौ
गारदोहाय आब'।
बादायारि मुगायाव जाम्बि नुसो गारो।
आयौ समासो बाराजाथारबाय
थांनोसैहाय आब'।
खोमास्रि- दे आगै आंबो न'आवनो
थांफिननोसै।
(साफा-फारफा मोखां जायो।)

खि एसेबो फरायनो रोँथ्रा
थगायनो रोङा फोलानो रोङा
सादु नङा सिखाव नङा आदा गालर
गोगो बिफांनि गोगो फिथाइ
नाथाय बै समनि
नांगोल दामै दामै उदै सुफुंनाय
जालाय गारलाय सावरिजोँ-बादालिजोँ
थाफ्लि बुद्रु बुद्रु सान बारहोहरनाय समा गैलिया
आदा गालरा मिथिगौ
संख्रि फानलुनि दाम बारायबाय
ना बेदरनि बेसेनाव अर नांबाय
खारै खलं गैलिया थाव नांसिगौ
सोँदावनो हायै दाम गानग्रा-जोमग्रा
सोँदावनो हायै बेसाद-मुवा
आरो मा मिचन-ग्लबेल जासिगोन
जावलिया जादोँ बुहुमा
हे गसाइ! सार अन्थाइ गावनानै
दुब्ला फोथैदो आंखौ नोङो
बांग्रिँ जानानै फैदो माबार
थ्रोब हाबलांनोसै आं सिङाव

आंनि सान्दांथि बिजिरथि
आंनि बेखेवथि फोरमायथि
आंदि मिथिगौ बेनो बिदिन्थि
आं बावनो हायाखै दिन्थिथि
आं सानबाय जिउ जोबलांथोँसै खेबसे
आं नेवसिलिया नोँखौ बेयो फोरमायथि।

आंनि अलसिया मेलेमाव
नै गिरि लुफावफै गोगो थै,
आंनि अख्रा गोरबोआव
लुफाव गिरि गोगो दै;
नै गिरि नोँनोल' जिउ राहानि
नोँनोल' आंनि बिगोमा गोरबोनि।

जेब्लाबो बुङो-
नै आंनि अनसुला गिरि
मा आंनि गुमुरा?
मा आंनि जोनोमा?

दिनै नोँखौ खावलायो
गोसो गोथार साजायना
आंखौ हमथा अख्रा गोरबोआव
जेब्लाबो आन्दायनाय अगेन खोमसियाव।

दिनै बे हरथौ गेजेराव
हरखाबनो गोसो खाङो नोँखौ,
आर'ज आंनि दान्दिसे
बिलिर बिलिर गोबाफै आंनि गोरबोआव;
नै अनसुला जिउनि आर'ज आंनि।

नै अबं आजाव आंनि आर'जखौ
होदो गंग्लायनायाव आंनि गोसोखौ
आंनि खाफालाव होदो नोँनि बिलिरनाय
समायना गोजोन बोर सास्रिनाय।

नोँखौ खुलुमहरदोँ गोसोजोँ
नै आफा होदो गोजोनखौ,
आंखौबो नायहरदो सोरांजोँ
होखारदो आंनि मैला साननायखौ।

नोँखौ बुङो आंनि गोसोआ
गाबज्रियै जिउनि आर'आव;
नै गिरि हान्थिगिरि जिउनि
हां मोन्नाय होदो बारआव।
बेसेबा बावगारना थाबाय नोँखौ
गोसोआव आंनि खोमसिया जाबाय,
आंनि गोसोआव एब्रेफै आफा
गले गले दिनै आर'ज गाब्बाय।
नोँनि गोथार आखायजोँ
बिलिरलांफै आंनि गोसोआव,
दंनायमानि आंनि गोरोन्थिखौ
सिबगारलांफै आफा बार-हुंखायाव;
दिनै बिनिनो आर'ज आंनि।

नोँनि आफा-
बहा आंनि थावनिया?
आरो बहा आंनि खुलुमनाया?
नोँखौनो गाबज्रिसे जेब्लाबो।

बेसेबा खुसि आं बे समाव
बेनो नामा आंनि जिउआव?
गुर गुर खारलाङो फरायसालियाव
फिन बेबादिनो फैयो न'आव।
बेसेबा समायना बुहुमा
बेनो नामा आंनि जोनोमा?
दावबायारि आं लामानि
हरै बेसेबा लैथो मोनहैनायनि।
आंनि आफाया बोसोन होयो
दाय मोनब्ला बियो बुयो
आंनि आयआ बोर सास्रियो
गोरोन्थि मोनब्ला बेबो रायो
आय' बेसे गोजान आंनि थांखिया-
आदा-आब'आ आंखौ लेङो
थौ सोलोँ बिघ्दा मोजां नोङो।
बेसेबा समायना अखानि दैस्लुंआ
सावगारि नुनाय सोमखोर अख्रांनि
नायहरो आं खुन्थेँहां गोदोना फोलावना
बेसेबा गिना बिखा हमना।
रंगिना-संगिना बोथोरासो थाङो
हालो-दैलो बैसोआ थाङो
आंनि सिमांआ अख्रांआव
आंनि मिजिँआ बुहुमाव
गोसोआ मोन्दां हरा रोमै रोमै
दावबायनाय अब्लाबो बे समाव।

मेगननि गोफार जिलिदजोँ
थुफ्लंहरो दाखा दाखा जोमैखौ
दसेनो ज्रय ज्रय
सोर्गोनि निजोरा बोहैबोयो
.
मिथिँगा थिलियाव नोजोर फोलाव हरना
बेसेबा रिउ रिउ
खोमसि बिखाजोँ
सिमब्रे लांदोँ गोरबोनि मिजिँआ
.
जिउनि बायजाबथु खन्थाइफ्रा
लामा एवस्रांदोँ दैलो खबामनि
जिउनि देरा गोजोन सायख्लुमाव
.
हाबिलास
महर होनो गंसे मुलुगाव
गोथां मिथिँगानि बेसेबा फैलाव
बेसेबा गोजोन सुदेम

जिउनि गासै गुमुरखौ संदान्नो
इसोरनि गोथार मुं दहाय लायो आं
उदां अखोरांआव साननि खौरांखौ लायो
नुयै मोखांनि खोमसिखौ होखारनो
इसोरनि मुं गाबज्रियै गाबज्रियै
मांखरसालिया जेब्ला फावसायलाङो गोजानाव
एसेबांदि आरो हाथासि गोसोआ
थाथिरनाय गैयै नागिरो गोसो मेगननि नोजोर
आरोबाव आं लुबैयो रोजाबनो-
इसेबां जिउनि रंगिना सानफोरजोँ गेलेनो!

100
साननायजोँनो बुंफबनाय सोदोब आंनि
अननाय जासिगोन जिउ मोनसे
हास्थायनाया जासिगोन हां मोनसे,
नोँनोनो होयो रैसुमै आंनि
बावबाय।
101
दिनै नोँनि दखनायाव
जोमग्रा फास्रा रोबैयाव
दङ आंनो सिरि सिरि...
आंगायनाय गैया नायनो महराव।
102
खाफालाव मोनसे लिरनाय दं
बे मोजां मोननाय सिखावै,
हास्थायो आन्दोआव-
नोँखौ साजायनो गावनिबादि।
103
नोँनि रागाया जोँखांथोँ गोरबोआव
हेँथा आंनि अख्रा हास्थायनायाव,
अब्लाबो बुंगोन गोरबोआ-
नोँ आंनि।नोँ आंनि।
104
फेनाय नङा आंनि मोजां मोनहाबनाय
जागायनायसे जौमोननि-
नोँ आंनि
नोँ आंनि
साजायो बेखौनो मोनसे लामायाव।
105
जेसे दं सोदोबा
गासैबो फानफ्रेनाय बिखानि,
मोजां मोननाय बेयो,
मोजां मोननाय आंनि-
थबस्र' जलाङा सानसेनो,
बेरफ्रुथोँ सानसे जाबासो समा
बेसो आर'ज जिउनि।
106
नोँ जेब्ला सिगां रायदावो-
आं सानग्रोयो बाथ्राखौ,
रैसुमै नोँनो फिन्नायखौ होयो;
मिनिस्लु मोखाङाव मेगना।
107
नोँनि अननाय मोनाखै आं
गोसोजोँ सानो बेखौनो,
नोँनि फिन्नाय मोनाखै आं
सोँनायखौ आंनो होआखै,
रैसुमै गोजोनो आं अब्लाबो।
108
बेबादि नोँखौ सानै सानै
उन्दुलाङो आं गोजोनै,
मोजां मोनो सना नोँखौनो।
109
नोँनि मुं लानानै सुजुयो खन्थाइखौ
नोँनि देँखो बोनानै रोजाबो-
आं मेथाइखौ।
110
मिथिया मिथिया आं
नोँदि मा सानो आंखौबा-
मोजां मोनो रैसुमै आं।
111
दिनै आं हमदांबाय गावखौ
नंखाय नङा गावनि हास्थायनाया,
जिउनि बाना मोजां मोननाया।
112
फुर्णिमा दिनै अखाफोरा गावदां दां,
रुजुयो समायना खावलाय फावदुर
रैसुमै, खन्थाइ सुजुयो गोरबोआव।
113
माब्ला हमदांगोन सना नोँ?
आंनि सिखाव गोरबोखौ,
सिरि सिरि मोजां मोननायखौ।
114
गोबां बाना जिउनि-
- आंनि मोजां मोननायखौ,
हागोन माबे समाव?
फोरमायनो खाबु गेबेँङै-
बेखौनो सानदोँ दिनै गोरबोआ।
115
सुखुआव-दुखुआव-मिजिँआव
थायो नोङो गोरबो इसिँआव,
रैसुमै बावगारा दिनै नोँखौ जिउआव।
116
गाज्रि मोजां बिजिरनायखौ
सान्नो हागौ आंनि गोरबोखौ-
मानोदि बियो मोजां मोनखोमायो।
117
जेब्ला नोँ साफियो आंजोँ-
- सोँगोन आं नोँनाव,
जिउआव सायख'खो सोर लोगोआव
आंखौ दोनगोन गोजानाव?
118
जिउआ आंनि लाइजौ बिखुंआव?
गोसोआ आंनि बांग्रिँ गाथोनाव?
सोङो आं अबंनाव-
मोजां मोनो नोँखौ मानो जिउआव?
119
गोरबोआ आंनि रमान्टिक रायजोआव
नोँखौ फोरमायनाय बह्रा सोदोबाव
मोजां मोननाय राव गोरबोआव
गैया फोरमायनाय खुगायाव।
120
माब्ला नोँनि जुलि समा फैगोन
सोरनि गोरबोजोँ गोरोबनायाव
सानो दुखु गोरबोआव।
121
बै आंनि मोजां मोननायखौ
फोथांना लाखिथोँ नोँनि-
गासैबो आंनि गनाय सोदोबा।
122
नोँ दुखुआव गाबगोन-
अख्रा आंनि मोजां मोननायखौ,
बेनिखायनोसो आं फोरमायाखै?
गावनि गोथार हास्थायनाय-
जिउनि मोजां मोननायखौ।
123
नोँ आंनि मोखांआव खोमसि
- आं नोँखौ लुबैयाखै;
नोँनि मिनिस्लु महर-
बेखौनो लुबैदोँ नायनो,
समायना मुं मुस्रि मोजां मोन्नो
सिरि सिरि सिरि।
124
सानदोँ आं नोँनि सायखंआव
सिरि सिरि नोँखौ-
नायना गोजोन्नो
जेराव नोँनि खुसि आंदि दुखुआव
गोजोनो आं बेवहानो।
125
आं लाइजाम नोँनो फोरमायगोन
गोबाव जाबाय समा-
गोजाम सोदोब दिनै खोमायाव
रिँबाय थायो गोरबोआव।
126
सेरेफुन्जियाव नोँजोँ आंजोँ-
बेवनो मिथिगोन गासैखौबो
सोदोब बह्रा बिखायाव।
127
मोजां मोन्नाया बिबार बादि
थफियो गेवलाङो-
मोदोमफ्रु बारजोँ गिदिङो
गोरबोनि बारसे बिबारा
- दा गेवलाङाखै,
खाबुखौ आंनो होआखै,
दै नोँनो लुवाखै बिथ'आव;
बेयो थाखोमादोँ बारि आंनि
- गोथौ हाखर गोरबोआव।
128
जेरैबादि नोँ सानो लामायाव
आं साना बेबादि मिजिँआव
बिबारबादि महरै नोँ मिनियो-
दुखु गोनां सानहाबो आं मुस्रियाव।
129
बारसे बिबारा आंखौ सानहोयो
सम गैया बेहा आरोबाव-
लरहायो सिरियै...
दुखु नाङो मालिया;
आंहा दुखु फैयो ने?
130
मिनिनाय जेबो गैया मोखांआव
फैगोन फेलेँ फारागआव,
बेखौनो सानहाबो लामायाव।
131
आंनि जिउआव मोजां मोननाय
बेयो सानसे रुगुं गैयैआव-
बेरखांनाय गोरबोआव सोदोब
- अरायसमनि जागोन हास्थायनायाव।
132
गाबनो नागिरो गोरबोआ
जागोन जाया इयुननि
- सना साननानै नोँखौनो।
133
आबुं जाबाय अननायजोँ
सोदोब बह्रा ओँथियाव?
मादि सानगोन मिथिया नोँनो।
134
मिजिँ बाफबनाय जिउआव
साजायो साजायो महर नोँनि-
लु गोरबोनि मुं सुना।
135
सानबाय थाना लुबैनायनि थाखाय
दाखोन जाबाय गोरबोआव,
खेबख्लाब जाया अननाय।
136
नोँनि गोरबो दांग्रोम बायनानै
मोनबाय आं गोथौ निजोरा-
बिरखांनो हाया खुवा महराव
मोजां मोनो बेवनो गोजोमनानै।
137
नोँखौ आं गोसो खाङो मुंआव
बावनो हाया मुस्रियाव,
मोजां मोनो हाबायाव।
138
मोखांआवनो नायहाबो सानना
नोँ फैब्ला मोखांसे मेगननाव,
आंनि गोरबोनिफ्राय ओँखारनाय रावआ
सोदोब गैया बुंफोरनाय हास्थायनायाव।
139
नोँनि मिनिस्लु मिनिनाय
गोजोन होयो गोरबोनि सोदोबाव
- गोरबोजोँ गोरबोआव।
140
बेबादिनो आं सानहाबो
नोँनि साननायखौ बिजिरना,
नोँनि दरखंआव थाङो-
आंनि गोसो बायगर मेगना।
141
बिखानि खामग्लिनाय अरा
जोँखांफिनो साननायनि बारजोँ
लाजिनाय मेवखाङो उनफिनब्ला
गोरबो सिङाव गोथौ नागिरो।
142
खोमसि हराव मिनिग्लाबो
उन्दै उन्दै एम्फौफोरा,
गोसोआव फैयो आंहा-
जुलिनि ललिनाय गोरबोआव।
143
हेँथा नङा नोँनि साननायनि
गोरोबनो लुबैयो जिउ गोरबोआव,
अरायबो हास्थायो सानैजोँ-
दुगा नङा गोसो मिजिँआव।
144
होदो नोँनि गोरोबनाय
साननायखौ
सिरियै सानहाबनो बेखौ,
अरायबो मोजां मोनहाबनो।
145
नोँनो फोरमायनो मानोबा
आंहा फैयो गिनाय-
फिसियो मोजां मोननायखौ,
देरबाय हालो- दैलो जिउआव।
146
जिउआव जेसेबां सान
लोगो मोनबाय मेगन लामायाव
जायाखिसै फोरमायनाय-
आं नोँखौ मोजां मोनो।
147
जिउआव दिनै जाय थाखोमादोँ
बेनो जादोँ नोँनो-
आं फोरमायाखै बेखेवना,
आं बुङाखै खोमा बिलाइयाव।