बेरे फुंजानि
थ' थ' थ' औवा दानदोँ
थोर थोर गोजांनायखौ गारनानै
गस्ला गुदुं थपिखौ दोन्नानै
रोगा रोगा मोसौ गाड़ियाव जाबदोँ
गाड़िखौ होनानै जि के बिएसिम लांदोँ
-
न'आव सफैनानैबो गायखेर सेरदोँ बियो
साननि ओँखाम जाखांनानै
मोसौ दै दौहैदोँ बियो
बिनि उनाव रेन्दा हुदोँ
मैयानि आद्रा सौखिखौ दिनै फोजोबदोँ
-
फाथै खादोँ आयजोँ लोगोसे
बाजारआव लानानै थांगोन

आफाया जौ लोङो।
ओरैबादि लोङोदि थारैनो जोबोद गोदै गोथाव।
उन्दै समनिफ्रायनो आंनो दौआब्लाबो लुबैथि लुबैथि आंनि मेगन सिगाङाव लोँबोदोँमोन।
आंबो नायै नुयैनो लुबैनाया बांनायनिफ्राय बांबोदोँमोन।
सानसेखालि आं लोँबाय।
ओरैबादि लोँबाय आंबो ग्रद ग्रद ग्रद।
आंनि खर'आ गिदिँदोँमोन।
आं थावनाय मोनाखै एसेबां गोदैबो मोनाखै।
नाथाय ओरैबादि खुसि मोनबायदि-
आंनि गोसो, आंनि सोलेर गासैबो रंजाबाय मोसाबायबो।
आंनि खुगाजोँ मेथाइ ओँखारबोबाय।
मोसायै मोसायै आं मेंग्लिबाय।
लोरला जाबाय, आरो आंनि खर'आ गिलिरसिन जाबाय।
आं आरो सहायनो हालिया जानाय लोँनाय आं गोबाफिनबाय।
आंनाव दुखुआ फैबाय मानोना आं लोरबां जाबाय।
नंखायसो जौनि निसाया खहा खालामग्रा मेलेमनि सानस्रिखौ।
मेलेमनि एम्फौ फिसिग्रा जौ।
जौआ गोजौ नङा, बेयो नंगुबै सिंजौ।
फाथाल फुरिनि लामा दिन्थिग्रा सिंजौ राजा।
आंनि थाखाय नङा, नाथाय सोरनि थाखाय दाबो गोदै गोथाव जौआ?
थारैनो बिसोर मेलेम उनग्रा नङा,
मेलेमनि एम्फौ फिसिग्रा गोसोनि नेहाथ बान्दा।
जौआ जोँनि नङा, असुरफोरनिसो जौ।

गिदिँ गिदिँ सारि गिदिँ
सेजौनिबो बांसिन माय बजाखौ जाबनानै
दा आफाया माय मारा होदोँ
-
मानै जारसि मोसौखौ
दोँसे दिरुंजोँ संग्रायनानै
लासै लासै गंसे लावथिजोँ बुनानै
दा आफाया माय मारा होदोँ
-
लावथिजोँ बुस्रिबावदोँ
माय बिदां
सम सम सुखेनजोँ खायखांदोँ
गिदिँ गिदिँ बियो मारा होदोँ।

संकस आरो सदियानि खर' दांनानै
आफाया समाय लादोँमोन
बिसोरखौ फेजेन्नो होन्नानै
नाथाय बिसोर दिनै जौसिनबावबाय
जोँखौ गावसिनि रावजोँ फिदिँनानै
अख्रां गिदिँ गिदिँ सामेरु खोला मेरु
जोँखौ गावसोरनि बान्दा फोसावनानै
"आंनि थैनायाव आंहा दुखु गैया,
नाथाय आंनि सानस्रियाबो थैलांब्ला;
आं जोबनो गैयै दुखु थागोन।"
थैहां थैहां जाबाय आफानि सानस्रिया
जोँनिनो नारानाथा संबिदानखौ बोख्लाबलायनायाव
खायसे हामजायो खायसेबा बाजायो
गुन्दै होग्रा आरो गुन्दै जाग्राफोरनि रिभुल्युसनजोँ
संख्रि होग्रा संख्रि रोगाग्राफोरनि राजखान्थिजोँ
थोरफो थोरफो सामेरु खोला मेरु जाबाय
जोँनिनो फर्दा गोसोम मोखांनि रोजाबनायजोँ
आफाया समाय लादोँमोन
आलादा रायजो सोरजिनो
हारिखौ जेरैबो गेरेमसा खालामनो
गावनि राव गावनि हारामुदजोँ
दिनै हाया गाबोन हाया सानसे नङा सानसे
जोँ दिनै आफाखौ गोसोखांनो बायो!

मानसिया ना बेदर जायो।
बिसोरो बुजिनो गोरोँ, साननो बिजिरनो गोरोँ।
मालायनि जिउ फोजोबना दानख्लाब हाख्लाब सावनानै एबा रुनानै।
आयनि बिमाया आयखौ फोरोँदोँ,
आयनि बिफायानो आयखौ फोरोँदोँ।
बोराय बुरैहाबो दाय दं।
आयआ आंखौ फोरोँदोँ।
जिबनि मोदोम नानि मोदोम दानख्लाब हाख्लाब सावजानो- रुजानो आरो एवजानो।
आयआ जायखौ मोजां मोन्दोँ, आंबो बेखौनो।
आयआ जायखौ फोरोँदोँ आंबो बेखौनो सोलोँदोँ।
नाथाय आयआनो गासैबो नङा,
थांना थासान्दिल'सो आय।
बेनि उनाव रुंसारि आय?
सोर दंबावो रुंसारिनि आरोबाव?
आं देरबाय बुजिबायबो,
इयुनखौ आं मिथिबायबो थारैनो।
ना बेदरजोँ आङो थांना थायाखै।
नाथाय थांना थादोँ जायखिजाया गुबुन साबसिन आदारजोँ।
आं सानो आरो फोथायोबो।
जिबनि दरसे बेदरजोँ आंनि जिउआ रुजुजाया।
रुजुजायो होनोब्ला आंनि गुफुं आबुं सोलेर मोनसेजोँसो।
दा आं ना बेदर जालिया।
फाप जायो होननाबो आं सानाखै।
सान्दोँ आं- जायनि दाहार लानानै बे दाहारखौ सुखुफिन्नो हायाब्ला?
एबा दरसे बेदर जानायनि उनाव गावनि गासै गुफुं सोलेरखौनो गथायना होनो हायाब्ला?
गावनिखौ सना साननानै गुबुननिखौ नंथारै माबा मोनसे सान्नायानो जागोन।
आं दिनै समायलानोसो आवगायदोँ 'जायखौ आङो सोरजिनो हाया बेखौ आं खहा खालामा'।
अदेबानि 'जायनि जिउ आं होनो हाया बेनि थै आरो जिउखौ आंनो नाङा'।

रेगि-रिगां आगरनि समायना दखना
नोँ जेब्ला ज्राब दोन्ना गानो जेरबायाव सारि
अब्लानो आयआ जोबोद बोराबो
सुरिदार आरो लंफेन गान्नानै
राव आरोबाव हारिमु नेवसिना
नोँनि आखला सानफा-एफा सिमा बारदोँ
महरा गुस्लायदोँ आरो गोसोआ लोरिदोँ
बिनिखायनो आयनि मेगनाव मोदै
असमियाफ्राइ बुरैसिन जोँनि आयआ
अनजालि नोङो आयखौ दासोगाब
बयनिबो हिंसाइनाय आरो सुसिनाय
जोबनो गैयै दुखु आरो दाहा
बेसेबा अलखदजोँ जुजियै जुजियै
जोँनि आयआ दिनैबो थांनानै दं
रोजा रोजा फिसा गोमानायनि उनावबो
बेखायनो माबा गोमासि गोमासि
दिनै जोबोद बोराबसुलि जाबाय बियो
आरोबाव नोङो आयखौ दासोगाब
जोँखौ लानानैनो आयहा मिजिँ दं
बुफ्रुख' हायै जारिमिन गोबानानै गोरबोआव
असमिया सिख्लानि गोदै राव लानानै
आयनि मेगनाव हाद्रि दासार
आयखौ आरोबाव लाजि दाफोनां
अनजालि नोङो आंनि खोथाखौ ला
मानोना बियो आयनिनो बाथ्रा
आरो आं नोँनि खोथाखौ मानिगोन
जाहाथे आइया आरोबाव बोराबा
जेरै रावजोँबो लाजि फोनां जाया
बिनि थाखाय जोँ सानैजोँ गोरोब लायनांगोन
जिरि जिरि बोहैनाय दैसानि दैजोँ
जोँनि आइया देलाइनानै थानो हाथोँ
जखायसे जखायनै सान्नो हायै
आयनि बैसोआ बुरैलांब्लाबो
बिनि गेवलां मिनिनाय मोखां आरो
खुसि गोरबोआ सोमखोर जाथोँ
जेराव जोँ सानैजोँ गोबानानै थानो हायो
दाउसा फिसाया बिमानाव एब्रेनायबादि
जेरै अनसुलि आइनि आखायाव दिन्दौनानै
नैबे बुहुमखौ गिदिँनानै नायनो हायो
जोनोम मोनसे गावखौ आरो
जोँनि आयखौ सिनायथि होनानै
अनजालि जोँनि आयआ सिनाय जायोब्ला
जोँबो सिनाय जायो फिसा होन्नानै

गोदोनि बोखावै गवालफारा दानि सिरां जिल्ला सिलिकागुरियाव आयनि जोनोम जादोँमोन।
1972 मायथाइयाव बुंथिनाय जादोँ (भट होनाय बैसोजोँ गोरोबो)।
बिफानि मुंङा (आबौ) लक'नाथ बसुमतारी आरो बिमानि मुंङा (आबै) समबारि बसुमतारी।
गोदोनि सिख्ला समनि गांनैसो सावगारिनिफ्राय साननो हायो
बियो (आयआ) महर गोनां नायनो समायना सिख्लामोन (मादै-आयंमोनाबो सम सम रायखाङो सिख्ला समनि बाथ्रा बे रावैनो)।
खामानि, हाबा हुखा गोरोँ जाथ बर' सिख्लाथारमोन।
मानसिया जोनोम जायो,
खेबसे जुलि जायो,
जिउ थाजासे संसार जायो।
संसारनि मावनां हाबा मावो।
आयफानिफ्राय मिथिनाय जायो बिसोर 1989 (सो) मायथाइयाव जुलि जादोँमोन।
आफानि मुंआ लहेन: लहेन ब्रह्म।
बे बोसोरनि (जून,जुलाई,आगष्टसिम) सोदांनाय
लेगेसी डाटानिफ्राय मिथिनाय जायो आयनि बिफा लकनाथ।
जायखौ आं आबौ जायो।
बिनि बिफा बिष्टि।
जायखौ आं आजौ जायो।
आयनि थाखाय आबौ सोमोन्दो।
1972 मायथाइनि उन उन आमटेकायाव (दा आं-जोँ जेराव दं) गोदान हादान खुलिदोँमोन।
आफामोनहा गामि फसंफैयो सालगुरि।
आयनिया जमनागुरियाव।
बेनि उनावनो आयफानि जुलिया जादोँ।
दासिम आबौ लक'नाथआ दं।
बिनि बैसोआ दा स्नि-जिस्नि सो फ्राम जाबाय।
दाबो थखन थुवाखै,
लामा गोजान थाबायनो हानायनि अनगायैबो
साइकेल सालायनो हाबावो।
आबै समबारिया थैबाय।
2005-06 मायथाइनि बबेबा दानआव।
आबौनि न'आ आमायजोँ लोगोसे दासान्दि सान्तिफुराव।

लावदुमा जा मिनिदोँ मिनिदोँ
खखाबानो हायाव नांनो नागिरलायनाय
आंबो मिनिफानो गोसो जादोँमोन
नाथाय मिथिया हसिया
मिनिफानायावबो दाय थानो हागौ
बेखायनो सोँबाय आं
- माखौ मिनिखोब्रा?
- नायहरलाय नायहरलाय
- माब्रा माखौ बुंदोँ?
- नायहर हनै आलि सौखानायखौ
बेखि सौखानो हायो?
- नोँ जोबोद जाम्बालै
सावगारिखौ नायनानै मिनिबानो जाया
बिजिरनो रोँनांगौ।
मानोथो मानसि जाथारखो?
बियो आलिखौ सौखायाखैब्रा
आखाय गैयैखायसो खुरदोँ
खर'आ मानदोँ जानो हागौ बिनिया।
- हा हा हा...।

सान आरो अखाफोर
साना सोरां साननि,
अखाफोरा सोरां हरनि।
दै आरो अर
दैया गांगा होयो,
अरा उखैहोयो;
अरा उखैनाय सुफुङो।
हा आरो बार
हाया थांनानै थानो होयो,
बारा गोजोन होयो।
सोरां आरो खोमसि
सोरांआ जोँनि लोगो,
खोमसिया जोँनि सुथुर,
बेबादिनो थांनानै थायो।
फुं आरो बेलासि
फुंआ जोँनि जागायनाय,
बेलासिया जोँनि मेंरुनाय,
बेबादिनो जोँनि थांनानै थानाय।
मुं गोनां मुं गैयै
मुंनि थाखाय जोँ सिनायो,
मुं गैयैखौ जोँ सिनाया,
बेयावनो गियान आरो अगियान।
सुखु आरो दुखु
सुखुआ जोँनि थुलुंगा,
दुखुआ जोँनि फेलेँ,
जिउआव बेबादिनो जायो।
थांनाय आरो थैनाय
थांनानै थायो जोँ थैनायखौ नेनानै,
जोँ थैसुला बेखायनो थैयो।

आरोबाव ओँखारबोदोँ निजोरा
अनफावरि हुंगा हाजो,
जिरि जिरि दुब्लियाव।

मानसि खिखौ मुगैनायबादि रांखोखौ बुगालिया मुगैथारो।
जाहोना जाबाय रांखोनि महरा साबा,
आरो सासे नंखाय बैनानै जाग्रा दाहोनाबावसो।
बुगालिया बिउथि, जोबोद बिउथि।
भुटाननि नांदेरनायबादि गुफुर।
आखल आखुखौ बुङाब्लाबो जागोन।
गोसोथोनायाबो गैया नङा दंखायो बेहा।
सोरबा माहाजोननि फिसाफोरबो जानो हागौ।
नाथाय गोजाननिफ्रायनो रांखोखौ नुब्ला नायनो हाया बुगालिया।
थेवबो सान्नांगौआ बेसो जाबाय-
सानसेखालि बुगालिया रावबो गैयै समाव (हरनि सममोन) रांखोखौ बुंबाय-
" आदा आं जोबोद गिदोँ!
दामानि आर्मिफोर फैगासिनोथार।
आं दिनै नोँजोँसो उन्दुगोन।"
उन्दुमारदोँबो नंखाय नङा दर फांथेलायनानै।

आं आरो गाबनो हालिया
मोदैया जेराव रानलांबाय मेगननि,
आं दाबो रंजानो हालिया
जेराव बायफ्लेदोँ दिखाराव गोरबोआ।

जाय गोरोन्थिखौ आं मावदोँ,
बे गोरोन्थिखौ आं नंखाय गोदै रावजोँ निमाहा बिआ।
बे गोरोन्थिखौ आं मावदोँब्ला,
आंनो रुजुनना लागोन।
आं जेब्लाबो सिमान जायो
गोथौ मेलेमनि गोगो सानस्रिनि
आं सासे नङा।
आंनाव मोनसे जिउ दं
बे जिउआ थुनलाइ,
बर' थुनलाइखौ गोथौ मेलेम,
थै हारा मेलेमजोँ
आंगोनिखा होननानै
मोजां मोन्नो समाय लाबाय।
जेखियानो जाया मानो
आं आंनि गामियाव।
आंनि जिउ सल'खौ
आंनो रनसायगोन,
मानोना आंनि सल'खौ
आंनि बांसिन
रावबो मिथिया।
नाथाय आंनि दुखुआ बेसो-
आंनि मावफ्लांनाय गोरोन्थिखौ
खालि फोनांनांगौ खुसियै,
गोरोन्थिखौ गासै खोमानानै गारोब्ला जुदि,-
आंनि अंगुबै जिउ सल'
जागोन ना?
बंङाइगाव (दा सिरां) जिल्लानि आमटेका,
आमटेकानि जमनागुरियाव आयनि न'मोन।
आमटेकानि सालगुरियाव आफानि न'मोन।
आयआ नायनो गावदां दां
हायलो- लो समायना गुफुरमोन,
जाद बर' सिख्लानि गासैबो गुण
रोँखा राखा दंजोबमोन।
आयआ बिफाजोँ लोगोसे
बर'नि बाथौ घोरोम सिबिग्रामोन
बियो सैथोमोन, दाबो।
सम बोथोर बैसो
लहेन ब्रह्मजोँ जुलिया जाबाय।
खाफालनि खोथा,
जुलिनि उनाव
बिदा फंबाय बुरजालाय
आयफाया जुदा जाबाय
नब'थिया रौमारियाव।
रौमारिया रौमारिनि सोरा
आय आफायानो बुंदोँ।
आंनि गामि रौमारिनि सल'खौ बयबो बुङो,
जायफोरा हालामनि गेदेमाफोर।
गोदो बंङाइगामि खाथिनि
रौमारिनिफ्राय खारबोना गोजोनै बेव
हादान लाफैदोँमोन।
बेवनो बिसोर रौमारि मुं
होना बुंदोँमोन गामिखौ।
बिसोर दा बेव गैलिया,
थैलांबाय नङाबा माखासे
सोरगोआरि जाबाय।
रौमारिया दा आमटेकानि फिसा
लिष्टआव लाथावै फिसा गामि।
लामाया सा खोला
लिँ लिँ 1 कि.मि जानाय नङा।
सोर गिदिँ रौमारिखौ समायना
बर' गामिया बेँखनदोँ,
सानजा फारसे सालगुरि, बालागारि बायदि...
सोनाब फारसे कुंगुरि बायदि...
साहाजोँ गोमोबिलि, थास'बारि बायदि...
खोला मोखांङै सेरफांगुरि, दैखरगुरि, अक्षिगुरि बायदि...
गोम गोम बर' गामि।
दा सिरां जिल्लानि सिङाव थानाय
मोनसे फिसा हालाम आमटेका
जेरावबो जेरैबो बयनिबो उन जानाय।
जौगानाय दावगानाय गैयै बायदि।
बेयाव मोजां लामा गैया
बेनि सुबुंफ्राबो फ्राय सोदोमस्रि गैयै
गोरिब, दादागिरि आरो
सेल्थाय देवानिफ्रा बांदोँ,
जायफोर गोरिबखौ आरो सोबख'दोँ।
दैज्लांनि समाव लामाया हाब्रु जायो
बबेवबा लामाया जाम्फैनि महर लायो,
मेसेँ बोथोराव हाद्रि जायो।
आमटेकायाव सिगां सिगां
गुबुन गुबुन हायेननिफ्राय
1966-68 मायथायनि गेजेराव
हादान महरै नब'थि गायसनदोँमोन।
आमटेकाया मोनसे दैसानि मुं
जाय हाथायनि सोनाबहा खोला मोखांङै
रा रा रि रि अराय बोहैदोँ।
जेखियानो जाया
आं आंनि गामियाव।
बर'लेण्डआ आसामनि सिङाव थानाय बादि
थादोँ रौमारिया सालगुरिनि सिङाव,
थादोँ थानांदोँ।
जाहोन दं बेनि-
गामिनि गोरा गैया आंनि
उन्दै रौमारि गामियाव।
दंमोन दुखु नांथाश!
जाय रौमारिनि दैदेनगिरि
जाथि ब्रह्म,
एन. डि. एप. बि. उटखारि सुथुरफोरा दायनिगिरि साजायना गावथारदोँ 2009 मायथायाव।
रौमारिनि जाय गेदेमामोन।
रौमारिनि बयखौबो सोगाबदोँ उटखारिफ्रा।
आं आंनि गामियाव।
लहेन ब्रह्म आरो सुमित्रानि थामथि फिसा
सेथि फिसा हौआ आं।
2 नबेम्बर 1994 मायथायाव आंनि जोनोम?
2000 मायथायाव आं गुदि सोलोँथाइखौ लाजेनो गामिनि सोनाबहा थानाय कुमगुरि गुदि फरायसालियाव।
1994 मायथाया आंनि थार गुबै जोनोम नङा।
2006 मायथायाव आं
कुमगुरि गुदि फरायसालिखौ उथ्रियो।
फोरोँगिरिया आंनाव सोँदोँ
नोँनि जोनोमनि अक्टआ?
आं मिथिया।
फोरोँगिरिया गावनि गोसोजोँ साजायो
जानो हागौ 1994।
दा बेनो आंनि जोनोमनि बोसोर।
नंगौ नङा साननो गोनां
आय आरो आफायाबो मोजांङै मिथिया,
मा बोसोरमोन?
मा अक्टमोन?
सानसे आयआनो बुंदोँमोन।
बेबो रोखा नंगौ नङा?
जानो हागौ 1995 मोन।
आं दिनै दुखु खालामो
आंनि जोनोमा थारै
माब्ला जामारामोन?
बेखौनो दिनैबो रोखायै मिथिया?
मानसि जोनोमनि बेनो मोकथां ने?
गावनि मोनसे उजिनि गुमुरखौ आद्रा गालांनो!?
नाथाय जाम्बा जाम्बि
आंनि गावनि आय आफाया।
आं दाय होनो?
नङा नङा जाम्बा जाम्बि आय आफानि दाय गैया?
बेयो आंनि बराद?
आं आंनि गामियाव।
रौमारिया दा फिसा गामि
नायनो समायना
गोजोन सुदेम बार गोग्लैनाय।
1.30 रिँगानि सिगां सान नुजायो।
फुंनि जारौ साना
सानजा फैसालिनिफ्राय मिनिस्लुबा समायना।
गय खान्थाल, थाइजौ
थालिर, गाम्बारि औआ
आरो बायदि बायदि...
सोमखोर उन्दै गोथां समायना
जोँब्लावखांनाय नुयो हायना।
गामिनि आदै मादैमोन
आयं आनै आदा आगैमोन
जेँना गैया सोँखारिलायनाय
नांलायनाय- खमलायनाय गैया
मिनि खुसि संसार सोलिदोँ।
ब्रह्म बाथौ खृष्टान जोँ असे
अनलायना दं फिसा गामि
बर' जोँ बर' हानजासे।
रौमारिनि ब्रह्म सिबियारिफ्रा
सालगुरिनि गासैबो फेंका,
बिसोर सालगुरिखौबो गोबादोँ
बिसोरनि मन्दिरा सालगुरियाव।
रौमारिनि ब्रह्म सिबियारिफ्रा
सालगुरियाव थाङो-
लैहोर लैहोर,
सावरि बादालि, हाबा-हुखा
रायजोयारि खामानिखौ जाफुं होयो।
रौमारिनि ब्रह्म सिबियारिफ्रा
बुंजायो मोन्नै गामियावनो दं,
बिसोर लिरो सोरबा रौमारि
आरो लिरो सोरबा सालगुरि।
नाथाय जाहोन दं
लिरनांदोँ।
दिनैबो सम सम
आमटेका भि सि दि सि
(Village Council Development Committee) आ
रौमारिखौ खैफोदआव खोख्लैनो नागिरो
जाहोन्ना बेनो-
रौमारि गामिया आलादा गोरा गैया
रौमारि गामिया उन्दै,
10/11 न'खरजोँ सोलिनाय।
- बेनि थाखायनो?
सम सम भि सि दि सि नि
नांगौ जानाय Certificte खौ
मोन्नो गोब्राब जायो
रौमारि मुंआव।
भि सि दि सि नि Chairman
माखासे लोगो मेम्बारफ्रा बुंनांगौ जायो
बिसोर बुंङो-
नोँसिना रौमारिया रेजिष्टार जायाखै,
खालामनाय जायाखै,
जाहोना गामिनि गोरा गैया।
बिसोर सालगुरिखौनो लिरना हरो।
जानो आं गाबनो ओँखारो
मोदैया लोमसाव फैयो मेगनाव?
नङा नङा गोरबोआव।
आसाम आरो बर'लेण्डनि
जेँना बाथ्रा खोथाखौ सानो।
रौमारिनि फरायसाफ्रा
गाबनो गोनां जायो।
आं आंनि गामियाव।
रौमारियाव जोनोम आंनि
रौमारिखौ आं लिरनो हायाब्ला?
दिनै आं आदैखौ गोसो खाङो!
रुंसारि जाथि ब्रह्म आदैखौ
जाय रौमारिनि देरहासाद लामामोन।

' आथोनानि सख्लेट बिरि
मोनो'
उन्दै समाव फंबाय सिरना
मेथाइखौ रोजाबोमोन।
आथिखालाव बेनि खुगायाव
बे मेथाइखौ खोनाया।
बावैसो 5/6 बोसोरनि सिगां
25 फैसा 50 फैसाया
गोबां बिनि आखाय
बिनि आखायाव गेलेदोँमोन।
दिनै 25 फैसाखौथ' दोन
(सोलिला)
50 फैसाखौबो नुनो थांलिया।
आमटेका गेजेर फरायसालियाव
जेब्ला आं (जोँ) फरायोमोन
50 फैसाखौ मेथाइ जानो मोनोमोन
अनसुलि आयनिफ्राय।
आफायाबो एखनबा बिथारोब्ला
बांसिन 2 रांखौ होयोमोन।
बेजोँनो आं (जोँ) साना गोरान
बुद खालाय गथाखौ
गोजोनै जानो हागौमोन।
आथोनानि बै समाव
सख्लेट मोनसे मोन्नानै
आरोबाव बिरि
(साल बिलाइनि थन्नाय)
मोननो हाबावोमोन।
जानांगौ फंबाय सिरननि खुगायाव
गोजौनि मेथाइया
गावनि खुगायावनो बेरखांग्रोयो।
(बेखौ मिथिया जे-
बेनो सोरबासो फोरोँदोँ
ना फोरोँङाखै?)
आथिखालाव जोनोम जाना
रायज्लायस्लिँनो रोँनाय उन्दै
गथ'नि आखायावनो 10 निफ्राय
50 रांसिम गोग्लैयो।
बिसोरो 25 आरो 50 फैसा
मेगनजोँ नुनांगौआबो गोब्राबसै।
जानो हागौ बेखायनो
फंबाय सिरननि मेथाइ जेन'
गोमालांथारसिगोनस?
बेनिखायनो लिरखांनाय जाबाय
जायखौआं खोमाजोँ खोनादोँ
गावनि मेगनजोँ नुथारदोँ।

जेसेबां गोदानै सोलोँदोँ
थेवबो थाबोनाय गोजामखौबो
थैजासिम जोँ गोसोखाङो।
दिनै आंहा गोसोआव फैदोँ
गासैबो रोखा रोखा बेरखांदोँ।
थालिर बिफां।
उन्दै समाव थालिर मादाखौ
साखा साखा हानानै
गारि मटर बानायोमोन जोँ।
टेक्टर, ट्राक, लाइलन ट्राक
बायदि रोखोमनि गारि।
आंनि गामिनि लोगोफ्रा
गासैबो रोँजोबथारगौमोन।
थालिर बिफांखौ जोफायनाय
(जोना सिफायनाय)
सम सम सौफायनाय
जोँनि हुदा नंथारगौमोन।
गुना लानानै गान्थि गान्थि
खालामनानै
ओरै सासे ओरै सासे
दंफां हानाय बादि हाफायोमोन।
जोँनाव मोनसे गोसो दंमोन
अब्ला आयं देवबारहा
ग्रोम ग्रोम थालिर बागान दंमोन।
थालिर फिथाइ गोमोन थाब्ला
जोँ बांद्राय लुबैयोमोन
समाव जोँ खावनानै एब्रे खोमायोमोन
जिगाब नङाबा बहाबा
हाग्रायाव आरो
हाखर जावनानै जिगाब होना
फबना फोमोनोमोन।
बेसेबा गिदिर गिदिर
आदै दाबदं लांहानाव
थालिर आथिया दंमोन,
सम सम जोँ बेखौनो
जोफायनो बादि लायोमोन।
माब्लाबा होसो जानायबो
जायोमोन।
दिनै नाथाय थालिर मुराखौनो
सोरनावबा नुलिया,
सोरनावबा फांनै फांथामसो दं।
जाहुहा नङाबा आथियानि
फस्लाखौ ओंख्रि जायो,
बांसिन अमा बेदरजोँ लुबैयो
सोरनिबा सारादु जायोब्ला
अमाजोँ नङाब्ला दाउजोँ
थालिर फस्ला जायो
आंनि गामियाव दाबो
बेजों गोजोनो।

'थिँन्थिँ खालाय खा खा
आयौ हनै साखन्द्रा'
माघ फागुन दानाव
मटर डालि, मुसुर डालिनि गेजेराव
जाथोसे रज'नाय थिन्थिँ खालाय
खायै खायै रुजायोमोन जोँ।
औवा मेवाइ देरनाय
(फारसेजोँ गान्थि फारसेजोँ गुदुं)
बेयाव सोनानै
फारसे गुदुंखौ बिलाइ गोथां
माथुनानै
सावना जायोमोन जोँ।
गोजौनि खानदा मेथाइया
थिन्थिँ खालाय खानायाव रोजाबनाय
जाथोसे गथ' मेथाइ।
बै समाव जोबोरैनो गामि गफायाव
हाग्रामोन बांसिन,
माय फोथार दुब्लिनि सेराव
बांसिन दंग'मोन (दाबो)
जाखुमा हाग्रा।
बे समाव उन्दै गथ'फोरखौ लांखारग्रा
साखन्द्र ओँखारोमोन।
आं (जोँ) आय-आफानिफ्राय
खोनायोमोन साखन्द्रयालायनो
गथ'फोरनि मेगनखौ दाड्टारफोरनो फानहैयो।
नङाबा दालां बानायनायाव
बिसोरनि थैखौ होयो।
बेरायनाय थाबायदिँनाय
(हाग्रा-बंग्रा)
बारगा होबथानो थाखाय
आय आफामोना
जोँनो साखन्द्रानि सल'
खिन्थायोमोन।
साखन्द्राफोरालायनो-
जेब्लाबो बाष्टा लानानै बेरायो
बेसोरो गथ'फोरखौ मोनब्ला
बष्टायाव सोनानै लाङो।
आरो मेगन एख्लनो थाखाय
(सिखा) दाबासुरिबो लाफायो।
सानसेखालि 9/10 बोसोरनि सिगां
आफाया खिन्थानाय दिनै
गोसोआव फैदोँ-
सानसेखालि साखन्द्राया
गथ'फोरखौ बष्टायाव
सोनानै लांदोँ,
बाननानै बियो लामा लामा
थाबाय लांदोँ।
थिख लामायाव सासे मानसिया
सोँदोँ-
- मा लाखोब्रा आदा?
- नैलै फंबाय,
लाव फिथाइ लादोँ आं।
बे समावनो गथ'आ
बाब्राबना राव होबाय।
अब्लासो बियो थाल मोनना
गावनो साखन्द्राया गिना
खारबाय।
गथ'खौ बेबादिनो
मोनफिनबाय।
सानसेखालि आरोबाव
7/8 बोसोरनि सिगाङावनो
आफाया खिन्थानायखौ गोसोआव नांदोँ।
' सानसेखालि-
साखन्द्राया सानै गथ'खौ
बष्टायाव सोनानै उनजोँ सासे
सिगांजोँ सासे
बावखाजोँ बानना लांदोँ।
बेसेबांबा सिरियै गामिनि
खना खना
बानना लांबाय,
नाथाय सासे गथ'आ
बष्टाखौ ब्लेडजोँ
लासै लासै हासिबाय
उनाव बारनना खारबाय
आरो खिन्था हैबाय।
होनबासो गोख्रैनो साखन्द्राखौ
ज' ज' होसोलांबाय-
बेबादिनो गथ'फोरखौ साखन्द्राया गारना
खारबाय,
गावनि जिउ बासायनो थाखाय।
बेयाव मिथिनांगौ दंदि
सानै गथ'फोरा गेलेदोँमोन
गामिनि खनाजोँ दुब्लियाव।
गथ'आ सासे जेब्लाबो
गस्ला सिफियाव नङाबा
फेन सिफियाव
ब्लेडखौ लाबाय थायोमोन।
(आं) जोँखौ आय आफाया
बुङोमोन-
साखन्द्रायालायनो मुलिबो लायो।
बियो गाबनो हायैनि
एबा बबा जानायनि
मुलिबो लाफाखायो।
फुननो थाखाय।
उन्दै समाव साखन्द्रा
होसोनाय खोनायोमोन आं।
फुरागासे समाव
मोनाबिलि जाब्लानो
साखन्द्रानि दावराव सोलियोमोन।
दिनै बेखौनो गोसोआव
नांनायखायनो
जिउ सानरेबाव दोनबाय।

दिनै आं गोसो खाङो-
गासैबो फारि फारि
समनि बिसम्बि जाखां फैब्ला
गावनि जारिमिन गावनो
फिथ फिथ बिलाइयाव
गोसो जायो लिरनो।
उन्दै समाव दैज्लां फैब्ला
बेसे रंजायोमोन आं बोथोराव
बेसेबा बहा थांखो दिनै?
आंहा गोसोआव दं-
दैज्लां बोथोर, हुर राव बाना दै अखा
भुटान हाजो मावरियानि बोहैबोनाय
हुर हुर दैज्लांआव बाना जायो
बाज्ल बाज्ल दैया मोसाबोयो
गांगा थफा ना खान्दा
ना बालाखावा नास्राय निस्ला
बायदि खुसियाव गोजाव बोयो।
जोबोर अखा जोबोर गुसु
अब्लाबो साथेयो गन्था मारा
गामिनि दुब्लि सेरजोँ बोहैनाय
हुर हुर दै, दंग'आव।
थोर थोर खौखाब मावनाय
गुसु सोलेर गोजांनाय
अब्लाबो खुसि दुब्लियाव
ना खान्दा गोग्रोमनाय।
आफाया रायोमोन जोँखौ,
मानोना आरोबाव थायामोन गाननो
फेन गस्ला।
आंनि गामियाव बयबो आबादारि
दुलाराय सुबुंआ आबाद मावो
थेर थेर आबादजोँ जिउ खाङो।
गोरिब हालुआ आफाया मुखुब
दैज्लां दुब्लियाव, दैज्लां हाब्रुआव
थोर थोर गोजांनाय थाम्फैजोँ अंखाजोँ
लावथिजोँ नांगोलजोँ मोसौजोँ
दाउज्ला गेसेरनायनिफ्राय दुब्लियाव
सानफा थोलो सान हाबजासे।
आयआ थिननाय आफानि बोसोन
सानेरै सानेरै अलसिया मोदोमै
आलि दान्नाय आलि खोनाय
बेजोँनो थाङोमोन आंनि सानआबो।
जोलुर गेलेनाया आंनि हुदा नङा
थेवबो गेलेनो मोजां मोनो
सालगुरि फोथाराव गेलेयोमोन
सम सम साना दोबैलाङोमोन।
आं दाबो सानस'नो हाया
आंहा मोनसे लोगोजोँ हुदा दंमोन
जेब जेब अखा बांखायाव
मोले मोले थर्स फोजोँना
बारि खनायाव एम्बु नागिरनाय
नाथाय मोजांमोन दाबि?
आंनि दिनै हमदांबाय गावनो
बे हुदाखौ आं गारबाय
आरो बयखौबो गारजानो लुबैयो।
दैज्लांनि बानायाव फुख्रि बिलो
हाखर जाम्फै उसिब्ला
गोसो जायोमोन बारसोमनो।
गोसोआव दं आंहा दाबो-
आलो जाम्फैनि गोथौ बिखायाव
बिफां सानिफ्राय ज्रुम बाज्रुमनाय
थब्लयै थब्लयै सानस्रिनाय
लोगो लेवाजोँ बादुंगा गेलेनाय
थब्लनो बादि लायनाय।
हाबाब गोदोनि दैज्लां दा बहा?
आंनि मिजिँनि सानस्रिया दा हनै
लामाजोँसो लेँहरदोँ जेरै
रोजा रोजा अरन
बेसेबा गोथौ गुवार
लैथो हाबाब मुलुग लैथो।

प्र'जि।बे खन्थाइयारि पेन-नेइम लानाय सासे सुबुं
'जायनि बाथ्रा बुंनाइयानो खन्थाइ जायो' (नीलकमल ब्रह्म बुंनाय),
बिथांआ जाबाय जोँ बयजोँबो सिनायजानाय प्रसेनजित ब्रह्म।
जखानि गोजौ, माजिला देहा।
फुरसबसब।
गन्थं-मोखां गेबेँ।
गोदनाखं गुदिसिम बाग्लायनाय
मोनज्लां जाइला खानाय।
मोखांआव हुमासे दारि।
बेबो मोनग्लांनाय।
मोदोमआव गुफुर पायजामा- पानजाबि।
फाफ्लियाव सम नायै सम एखनबा आर'नाइ,
एखनबा हारसा गामसा।
मेगन थाइनैखौ मोजाङै नोजोर होआब्ला मंग'लियान फोलेरनि
बर' होननानै हमनो गोब्राब।
माबा मोनसे नङा माबा मोनसे बाथ्रा लानानै
जेन' गोर्बो सिं-सिं सावलिनायआव हरदम मुखुब-
निजोम गोमजोर।
नाथाय जाबब्रुं दारिनि गेजेरजोँ जेबोला स्राय मिनियो,
अब्ला बेयो जेन' ग्रौ ग्रौ रज'नाय गांसोबारिआव बारगोमानानै थानाय
साइलाख बारसे आजोला बिबारसो।
मेथेँ- दावथेन जायनि बिबुंसार होनायाव नाइजाबारि गारां रिँखाङो;
जायनि रायज्लायनायाव खन्थाइ सेरेबनि आखाय बेरखाङो।
बिनो जाबाय प्रसेनजित ब्रह्म।
खन्थाइयारि साद गोनां मुङै- 'प्रजि'।
(रायथाइहाला: ब्रजेन्द्र कुमार ब्रह्म निफ्राय)

दुखुआ फैयो आरो थाङो
जिउजोँ गेलेनाय आरो सावरायनायाव
जिउखौ आं मोजां मोनो
आं गोसो जाब्ला गाबो
सेरजा हुनाय दुखुनि राङियाव
खाम दामनाय दावबायनाय हान्थिनायनि
गासै मेथाइ आंनि खोमायाव रिँफैयो
गोदान आरो गोदान जेब्लाबो
आगर फालि मेगन बिलाइयाव
बायदि बायदि गाब समायना
आंनि गोरबोआव गेलेफैयो
रिउ रिउ सुफिननि देँखोआव
खोलो खोलो बार बारनायाव
बेखायनो गले गले जेब्लाबो
आं गोसो जाब्ला गाबो

आं गोसो जायो
जिबौ फिथिगम जानानै
एखमबा बिखौ सौथारहैनो,
बिनि जिउखौ ग्लब मननो।
आं गोसो जायो
ददेरे ददेरे बिनि लाइमोन सोलेरखौ
बेन्दोँ जानानै फानफ्रेना लानो,
गोरबो हासुंआव माथेना लानो।
आं बिखौ मोजां मोनो
ओरैबायदि मोजां मोनोदि
आं बिखौ आंनि जिउ खालामथारगौ,
एबा आं बिखौ आंनि हां सानथारो।
सिबाय दुखु जायो गावनो गाव
अख्रां जानो हाया आं
बार जानो हाया आं
दै जानो हाया।
हा जानो हाया
आं अर जानो हाया
गोसोबायदि गोसो जानो हाया आं।

गोजोन आरो बेसेबा खुसिजोँ
आं जेब्ला उन्दुलाङो
बावगारलाङो आं खुसिजोँ-
गोजाम दुखु-दाहाखौ खोमालाङो
.
गोदानै सिमां नुयो
बेसेबा खुसिजोँ
मुलुगखौ गोबानानै
मुलुगनि गासैखौबो आंगोजोँ
.
आं जेब्ला उन्दुलाङो
मिथिँगानो होलांगोन खुसि
आंनि सोलेराव जेरै-
बिसोरनि अराय खुसिया बिलिरो
.
थागोन मुलुगनि गोरबोआव
मोनसे थाजिम थुलुंगा जानानै
आंनि गोरबो गासै
बिसोरनो आंगो जिउ होना

उखैनायजोँ आं गाबो
मेगननि मोदै हुगारै हुगारै
अलसियाखौ फेजेन्नो हायाखै
गसाइ बिनिनो गोरबो नागिरनाय
.
अन्थायनि हाजोखौ
बारलांनो जेरै जुजियो
गोहो नागिरना मोना
बेबादिनो गाबो आं
.
आंखौ आं सिनायनो
बेखौल' नायनो होदो नोङो
जेरै नोँखौ आं नुयो
आंनि गोरबो इसिँआव
.
निदान गोनां जिउआ
नोँखौ जेरैहाय नागिरो
आंनि मोखांआव खुसियै
नोँखौ आं जेब्लाबो जेरै नुयो
.
बेबादिनो नोँनि गोरबोखौ
मोन्थि मोनै जायो आं
सुखु मोना गावखौ सिनायै
नै गिरि नागिरो दिनै
.
सहायनो हायै जायो
मोन्दांङै गोरबोआव
बेखायनो खेँखाय बायो आं
नोँ फैदो बेखायनो सिगांआव
.
खालौ बिलौ गोसोआ
नोँखौ मोननो हास्थायथारो
नोँ आंखौ गोबाफै गसाइ
आंनि गाबनायखौ हमथानानै
.
नोँनि बिथोन फालिनो
आं गोसो जायोब्ला
बेखौनो होदो गिरि आंनो
जेरै नेवसिनो हायो दुगानायखौ
.
नोङो गोसोआव खोख्लैना हो
जेरै आं बावनो हालिया
जिउआ जेराव अनसायो
मोकथां संसारनि रंजानायजोँ।

नांगोलजोँ गावनि थांखिखौ जाफुं होयो
आबाद खालामो बोथोरनि उनाव बोथोर
हाजोँ आफाया दिनैबो बेसेबा गेलेयो
मावथि आंनि आफाया हालुवा।
मिथिँगानि दाउसिन-दाउलाबादिनो
बियो बोथोरनि मेथाइ रोजाबो
आबादनि बिबार फिथाइ हास्थायनानै।
दैज्लां फैयो आफानि रोजाबनायजोँ
मेसेँ फैयो आफानि मुसुरनायजोँ
बेसेबा सोमखोर जायो मिथिँगाया
थाजिम आरो गोजोन जायो मिथिँगाया।
मावथि आंनि आफाया हालुवा
बिनि अन्नायजोँनो थांनानै थायो जिबि
गामि सेरजोँ दैसाया खुसियै बोहैयो
आरो खोलो खोलो बारबाय थायो बार।
जोबोद गोथार आफानि गोरबो
गुवार आरो गोथौ बिनि सानस्रिया
आइया जेब्ला रुखु रुखु गाबो
अब्ला बियो आयनि मोदैखौ हुगारो।
आं जुदि आंखालाव गोग्लैयोब्ला
आफाया आंनि आंखालखौ सुफुंङो
आफाया जेब्ला गावनि राफोद देहाजोँ-
रुरु गोगो गोलोमदै बोहै-होयो
आं बुजियो आंनि आफानि बोलो।
आफाहा मिजिँ दं आंखौ लानानै
आं मा लुबैयो मा हास्थायो?
बियो मिथिगौ जेब्लाबो आंनि गाबनाय।

आंनि आय आंनि आफा
बेसेबां अनो गावनि आंखौ
बेसेबांनि अख्रा अब्लाबोदि आं।
आंनि गोरोन्थि आयै
आंनि नंखाय दाख्रायनाय आफा
नोँसोरनि गोलोमदै बेसेन मोन्दांथियैआ।
बेसेबा सिमां आयै नोँहा
गिदिरथार मिजिँ दं आफा नोँनि
गासैबो मिजिँ जोनोम आंनि।
आंनि गोरोन्थि आयै
आंनि नंखाय साजायनाय आफा
बेसेबा अख्रा दाबो आं।
नोँसोर गोथार मिजिँआव
गोथार मेगन थांखियाव
सोमखे नुवाखै सोरांआव
अलसिया आं बोरै बिजिरनो?
गाबदोँ दिनैसो थेवबो
अन्थाइया मोदै हुगारनायबादि,
दुखु- दाहा नोँसोरनि सहायनाय
नोँसोरनि मेगन देग्रं जालांनाय
हामख्रेँ सोलेरनि सावगारिया
आबाद दुब्लिनि गोरान फसलाव।
साननो होदोँ उल्टायै आंखौ
जेरै बेसेबा गुबुनथारमोन
आंदि बेसेबा जाम्बा
बेसेबा मेलेम गुद्राथारमोन
दिनै मेलेमखौ बेखायनो
उनै उनै फोजोँनो नाजाथारदोँ
अलसिया गोलाव सोलेरखौ
गोख्रोँ राफोद खालामनो।

आंनि आय आंनि आफा
बेसेबां अनो गावनि आंखौ
बेसेबांनि अख्रा अब्लाबोदि आं।
आंनि गोरोन्थि आयै
आंनि नंखाय दाख्रायनाय आफा
नोँसोरनि गोलोमदै बेसेन मोन्दांथियैआ।
बेसेबा सिमां आयै नोँहा
गिदिरथार मिजिँ दं आफा नोँनि
गासैबो मिजिँ जोनोम आंनि।
आंनि गोरोन्थि आयै
आंनि नंखाय साजायनाय आफा
बेसेबा अख्रा दाबो आं।
नोँसोर गोथार मिजिँआव
गोथार मेगन थांखियाव
सोमखे नुवाखै सोरांआव
अलसिया आं बोरै बिजिरनो?
गाबदोँ दिनैसो थेवबो
अन्थाइया मोदै हुगारनायबादि,
दुखु- दाहा नोँसोरनि सहायनाय
नोँसोरनि मेगन देग्रं जालांनाय
हामख्रेँ सोलेरनि सावगारिया
आबाद दुब्लिनि गोरान फसलाव।
साननो होदोँ उल्टायै आंखौ
जेरै बेसेबा गुबुनथारमोन
आंदि बेसेबा जाम्बा
बेसेबा मेलेम गुद्राथारमोन
दिनै मेलेमखौ बेखायनो
उनै उनै फोजोँनो नाजाथारदोँ
अलसिया गोलाव सोलेरखौ
गोख्रोँ राफोद खालामनो।

खन्थाइखौ आं लिरो
आंनि बुजिनाय आंनि मोन्दांथिजोँ
खेबसे खेबनै आवरायना नायो
बिनि देँखो खबाम सानस्रिखौ
-
आंनि खन्थाइखौ नोँसोर बुजिगोन
बुजियाब्ला आं बुजिहोनो हाया
सम आरो बोथोरानो फोरोँगोन
थिक थिक खारनाय घड़िनि खाथाखौ
नोँसोर मोजाङै खोनासंनांगोन
-
रंजायो नंगौ गाबोबो आंनो
नाथाय आंनि सोलेरा नङा
आंनि गोसोआसो गाबो
सम सम गोरबोआव बांग्रिँ मावो
-
थोलौ थोफौ खर'नि मेलेमा
सम सम मोन्दांथिजोँ सोमावग्लुंजायो
गोसोआदि आदुवा समाव
गोरबोनि गियानजोँ समाव
साप्रेलाय मेफबलाय खालामजायो
-
हाथाय बायलायनाय सोदोबजोँ
एबा दैबादि लाव लाव गुरै
एखमबा एखमबा मोनसे आयदा
खन्थाइखौ आं लिरो।

आंनि जोनोमा आयनि मिजिँ
नंखाय नङा आयनि मोदैया
फैमाल नङा आयनि दाबिया
बेसेबा दैज्लां- मेसेँ
बेसेबा फागुन- बैसागु
सिमां साजायनाय गिदिर
मिजिँ सुजुनाय गोथार
बहा आंनि रंजानाया?
आयखौ गारनानै-
आयनि मिनिनायाव हाद्रि सारनानै।
फिसा जानानै असे बिमानि
रंजानाय- मिनिनाय थांना थानायनिब्ला
आंनि जोनोमा आयनि मिजिँ
सिमां- मिजिँ जिउनि आबिर
आयनि गासैबो सोरांब्ला
आंनोथ' आयनि नङा होनब्ला साथि?
बेनो जोनोम नङा होनब्ला आंनि?
अब्लानोथ' आं बिजिर मोनो
गुसु मेलेमजोँ हमना मोनो
आंनि जोनोमा आयनिनो जिउ खावसे।

आंनि मेगननि गोफार नोजोरा
नोँनि बिखायाव नांबाय
मानोना आंनि गोसोआ
नोँखौ मोन्नो हास्थायथारो
नोँनि खबाम गोनां आगान
आरो नोँनि मिलौहाब गारां देँखो
आं बेसेबा मोजां मोनो
बेवहायनो आंनि मेगननि सु
नोँनि मिनिखैरौ मिनिनाय आरो
नोँनि समायना देलाइनाय मुस्रि
आं गासैखौबो मोजां मोनो
बेखायनो आं गावनि खालामनो
नोँखौ जोखोम खालामनो लुबैयो
बिनिखायनो आंनि मेगननि सुआ
नोँनि गोरबो आरो गोथार आगानाव

गुन्डा बार मोदाया
आंनि उन्दुनाय समाव खोमसि खोमसि
अनजालिखौ खावनानै लांबाय
आफार आसामाव बुरलुंबुथुरनि सरायघादजोँ बोनानै
~
अनजालिनि मोनफा मोनफा स्लकफोरा
दुखुनि समाव आंनि खोमाखौ थुफ्लंसिनदोँमोन
~
आं सहायनो हाया
जायनो गोसो होबायमोन
बैनियाव आंनि गोसोआल' नङा
आंनि अनजालु जिउआ थांफाथारदोँ
~
हाद्रि आरो बेँफोरजोँ
बार मोदाया अख्रां सायाव जे सोँब्ला
बोरै थांनानै थानो संसार होन्नानै
आं बनजार दैगोन बेखायनो
~
निलादब लंकानि राबणआ
अख्रां साजोँ सीताखौ लांखोमाब्ला
आंबो नुहरदोँमोन बिफां गाखोनाय समाव
अब्लाबो सुफिन दामनाखौ नागाराखैमोन आं
~
नाथाय बार मोदाय
मेगननि जिलितआ खोमसिखौ बारननो हायाब्लाबो
गोसोआ अरखि बेरखांसिनो
नोँनि फरायथावै गोरबोखौ सुफ्लुंनो
अरखिनि जिलितआ होसो लाङो
~
खबरदार बार मोदाय
सीतानि हायनाखौ राबणआ अनसायदोँल'
आद्रि खालामाखै
बुं नोङो अनजालिनि हायनायाव जावलिया जामारदोँ?
~
आं दावहा नांगोन
थरसे अन्थाइ जानानै
खोमसि गोरबोनि हायेननि राबण
नोँनि हेँथायै सान जानानै सावगोन।

आं बायजोआव, खोमसि हर
थरथिँ थरथिँ अखा
बिलिरदोँ गुसु सोलेराव,
सुदेम जेन' अनजालि एमाव।
सुहाबना फैयो सिँङाव उन्दुनो
बबे मोनसेया आंनि आन्दायनाय
थाबायो आं उल्टायै
मानोना समा अखाफोर थैहाबनाय।

आं बुजि मोनस्लाबा मानो
नोँदि आंखौ गाबनो होयो,
आंखौ बिखा खैसिब मोनो
थैनायखौदि आं एसेबां गियो।
मानो आंनि मोदैखौ होबथायो
जिरि बोनाय मेगननिफ्राय,
नोँ आंखौ रंजाहोयो-
बेयावनोदि आं हार्थखिजोँ रुजुफ्लाङो।
आं मुलुगखौ आन्दायो जेब्ला
खोमसिखौ नोँनो हरो
अब्ला मानोदि जोँसार बोयो हार्थखि
बिजिरख'नो हायै जौमा अख्रांआव।
नोँखि मिथिया जिउनि गिरि
आंनि बिखायादि फांथेनाय
नाथाय बेनि राहाखौदि नोँनो होयो
नोँ जेब्लाबो आंखौ दैदेनो
अब्ला आं नोँखौ खुलुमो।
मानो मानो नांबावगौ नोँखौ
नाथाय अनसुला नोँखौ नांगौ
सोरबा, नोँ माब्लाबा जुदा नङा।
फोरमायना आंनि सिमां रोबैखौ
आं बेखौ दाफुंनि
माब्रै माब्रै आं बैहाय-
नोँ मिथिगौ लामाखौ।
आं मिथिया, मानो आंनि जोनोमा
लोगोसे नोँखौ सिबिनानै
जोँ सानैबो मिथिलायगौ-
नोँजोँ आंजोँ बिफा-फिसा।
आं थारैनो मिथिया
माब्रै आंनि सेराव नोँदि थायो
मानो आंनि उन्दुनाय-सिरि मोन्नाय,
साननि उनाव आरो सान जाखो।
दा लोगोसे बे रेबगन,
आंनि नंगौ सोँनायनि हांखो-
बेयो आंनि मोन्दांथिफोर
नङा सावगारिनि थाखायल' महर।
आं लासै लासै थांगोन-
बुंनांगौ आंनि आं बुंगोन
आंनि सोलेरा गोग्लैसोब्ला, गोसोआव हो
नोँ आरो आं रावबो नङा
नोँनि आं लोगो, आं लोगो।

आं मासे दाउसिन जानायमोनब्ला
अब्ला आं बहा बिरलांगौमोन-
माउण्ट एभारेष्टनि जौसिन थिखिनियाव
बिरलांगौमोन आं बर'फनि गेजेराव
बयनिबो जौसिन थिखिनि
दुलाराइ मुलुगनि
जौसिन गासै हाजोफोरनि
आं गाहायाव नायहरगोन
सारिगिदिँ मुलुगखौ
सावगारि एरखांगोन
बेसेदि समायना नुयो बुहुमखौ
हिमालय हाजोनि सारि
नेपाल आरो तिब्बेत
गाखोगोन आरो गाखोगोन थाखो थाखो
जेब्लासिम थिखिनि मोना
एभारेष्टनि थिखिनि गोजौसिन
अख्रां मोनहैजासिम गोजौआव
आं मासे दाउसिन जानायमोनब्ला
अब्ला आं बिरलांगौमोन एभारेष्टआव

आं मोजां मोन्दोँ, मादि आं नुदोँ
आं मोजां बिजिरदोँ, मादि आं मोन्दाङो
लामा लामा गेङो दर्जाया
मोनो आं गोदान लामा
बारलाङो लैथो आरो लैथो।
जाम्बा आं सासे
गोग्लैबोयो हाज्रिजोँ गियानाव?
नाथाय आं मोजां मोनो
बेसेबा आं गोदान मोन्दाङो
आं मोजां मोन्दोँ, बेसेबा मिनिस्लुयो
जेब्ला आं मिथिँगाखौ रंजायो
बेसे समायना, गोमो-गोथां मोन्दांथिया
नाथाय बियोदि जाथावना?
बेयो नंगुबै सैथो नङाना?
आं मिथिया, आं जोबोद मिजिँथियो-
आं थारै बिजिरनो नाजायो
नाथाय आंनि गोरोन्थि जायो
आरोबाव बेखौनो बिजिरो
बेयोदि फैनो हागौ देलायना
नाथाय बियो बेयोनो
जेब्लाबो आंनि गोरबोआव
नोङो मादि राय होयो?
आंदि आरोबाव जाम्बा,
जाम्बा आं सासे
जायखौ मोन्दांथियो-
नाथाय बियो बेयोनो
जेब्लाबो आंनि गोरबोआव
आंनि गोफार जोनोम मोनसे।

आं लिरो नोँनि मुं
सोमखोर अख्रांआव,
नाथाय अखा मोफ्लामना
थेर बेथेर जायो।
आं लिरो नोँनि मुं
गोरान हाद्रियाव
नाथाय जोफुं लाङो बारमोदाया।
आं लिरो नोँनि मुं
आंनि गोरबो इसिँआव
आरो गोजोँ दं दाबो,
थागोन जिउ
जेब्ला नेवसिया सोलेर।

आं लुबैयो बिरलांनो उदाङै
गां फुवारना दाउसिनबादि उदां गोसोजोँ-
हिमालय हाजोनि थिखिनियाव,
बर'फजोँ बुंफबनाय खोला मेरुआव।
आं लुबैयो बिरलांनो उदाङै
जोबोद गोख्रै मेंनाय गैयैबादि-
सोरांजोँ बुंफबनाय गोजोनफुरियाव,
रिथि-रिथाव ग्रह-नक्षत्रनि रायजोआव।
मुलुगनि गासैखौबो गुमुर संदान्नानै
मुलुगनि गासैनोबो फोरमायना होनो-
आं गोसो जायो लैथोमा सानस्रिनो,
जोबोद रंजासुला ना जानानै।
सिमां बुंफबनाय आंनि गोरबो गंसे
जेसेबां हास्थायो एसेबांनो सिमां-
नाथाय मोकथांआव गां गैया आंहा,
उदां अखोरांआव एसेबां बिरदावनो।
लैथोमाजोँ बुंफबनाय गंसे मुलुग
होँगो-दोँगो रंजानायजोँ बुंफबनाय,
बेवहायनो आं रंजायो लोगोसे।
एखमबा गावदां जायो अखाफोर
एखमबा बियो खोमसियाव थाखोमायो-
दिनै रंजानाय गाबोन गाबनाय,
बेसेबांदि गेलेनाय आंनि जिउआव बिनि!
थेवबो थांनानै थानो लुबैयो बेबादिनो
मिनिनाय आरो गाबनायनि गेजेराव,
बेसेबा मिजिँ आरो सिमांजोँ-
आं लुबैयो बिरलांनो उदाङै

आं आंनि गोरोन्थि नङा
आं आंनि सुथुरबो नङा,
आं आरो आं
आंहा मिजिँ दं
आंनो आंनि लामा
जेराव आं लामायावनो दं।
आं सोलोँदोँ सैथोआ मा?
आं मिथिगौ आं आरो सोर?
आं आरो आं
आंनो आं
सेँग्रा नङा अन्थाइ महरनि
गोसो गैया गोरान बिलाइनि,
बेँगा नङा जायनि राव खोनाया
खाना नङा जेखौ आं नुआ
नाथाय आं दाबो जाम्बा,
आं सोलोँदोँ सैथोआ मा?

उन्दै समनिफ्रायनो आंहा सासे मोजां गेलेगिरि जानायनि थांखि आरो मिजिँ दंमोन।
बे मिजिँ खानाय गोरबोनि दुमायनाय मोनसे जिरादआ आंखौ उसु-खुथु खालामबाय थायोमोन।
आं सम सम बेबादिनो गामिनि लोगोफोरजोँ बायदि रोखोमनि गेलेनाय आयदाखौनो गेलेयोमोन।
नाथाय आं जेरावबो रोँद्रायै नङा।
मोनफ्रोम गेलेनाय आयदाखौनो आं मोजांबो मोननो हायोमोन।
नाथाय थेवबो आं बांसिन मोजां मोन्नाय गेलेनाया केरेत् (सौनाय, जोनाय, बारनाय बायदि) मोन।
उन्दै समनिफ्रायनो आं बे रोखोम गेलेनायखौ टि. भि. सेनेमा (सावथुन) फोराव सम सम नायनो खाबु मोन्दोँमोन।
बे इसेल' खाबुआनो आंखौ आरोबाव बांसिन मोजां मोन्नो गोसोखौ होबावदोँमोन।
आंहा बारा बारा सासे मार्टियेल आर्टिस (Martial Artist) गेलेगिरि जानो गोसो थौहाबसिनदोँमोन।
बेबादिनो आं सानसेखालि आमटेकानि फुर्णिमा फोथाराव गेलेग्रा Wushu मुंनि गेलेनायाव गेलेजेन्नायसै।
आरो उनाव आं 2 अक्ट 2010 मायथाइनि नबेम्बर (2/11/2010) आव बेँटलाव थानाय Wushu Assiociation of Chirang आव गावनि माखासे लोगोमफोरजोँ मुं थिसन्नायसै।
नाथाय एसेबां गोसो थासेयावबो आं फुरायै बे गेलेनायखौ गेलेनो मोनाखिसै।
इं 2012 मायथाइआव गोजौ फरायसालिखौ उथ्रिनाय लोगो लोगो बङांइगामियाव लजिँ थानानै फरायनांनायाव नागारनो गोनां जाबाय।
लोगो लोगो आं सान्नायसै आंनि मोनसे मिजिँआनो बायबाय।
मानोना आं फरायनायखौबो खम खालामनो हाया।

आंबो सासे गथ'मोन
जायनि जोनोमा गोरान सिलायाव।
दाउस्रि बासा गाखोनाय एबा थुख्लायनाय
बेरे, गुमा हमनाय नागिरनाय
सेसा नेवलाइ नागिरनाय
दाउ-दाउसिन गावबायनाय
एन्जर जावनाय खुसेंग्रा लुनाय
आंनिबो मोनसे गिदिर हुदामोन।
आंबो सासे गथ'मोन
जायनि जोनोमा उनफिन्नाय बर' गामियाव
गस्ला गोदान मोनब्ला
सान्नै रंजायो आरो
बिजाब गोदान मोनब्ला
सान्नै बोद्लायो
बेयो उन्दै समनि दोहौमोन।
सिलर गोबाथुम गोबाथुम मेँख्ल'-ख्ल'
फरायसालियाव थाङोमोन
खसर-मसर एदावलायोमोन
दुब-दुब दाब-दाब बुलालायोमोन
आमाय-जुमाय थाखोमालायनाय
जल्दं-माल्दं आरो बाथा बुलायनाय
आंबो गेलेयोमोन लोगोफोरजोँ
बायदि गोमो-गोथां आब'मोन-आदा फोरोँनाय।

मोन्थाइखौ लानानै आंहा दाबिनांगौ दं
गोथार गोरबो आरो जिउ थासान्दियाव
मानोना जाय आंनियाव दंमोन
दिनै गासैबो गैलिया जाबाय
बेखायनो आंहा दाबिनांगौ दं
जोनोम जानायनि उनावनो
जाय हाद्रिजोँ आं गेलेयोमोन
बे हाद्रिजोँ आंहा सोमोन्दो दं
बे मिथिँगाजोँ आंहा सोमोन्दो दं
बे बुहुमनि दै बार आरो अखोरां
दाउसिन-दाउला आरो जिउ-जिबि
बिसोर गासैजोँबो आंहा सोमोन्दो दं
बिसोर गासैबो थारैनो आंनि
बेखायनो आंहा मोन्थाइ दं
बिसोरखौ अननो आरो सिबिनो
बिसोरजोँ गेलेनो मोन्थाइ दं
बेखायनो आंहा दाबिनांगौ दं
जाहाथे बिसोर गोमालाङा
आंनि मेगन सेरनिफ्राय
जाहाथे बिसोर रावनिबो मेगन नाङा
बेखौ होबथानो थाखायनो
आंहा दाबिनांगौ मोन्थाइ दं

उरायदोँ आलाइ-सिलाइ दिनैबो
दाउफ्रि जरासे
आंगोनि गंसे अख्रांनि जोमै गेजेराव
सान्दुं खामजा अखा सिजा सिजा
रुरु मेगननि मोदैजोँ दाहायाव
इनायनो नागिरदोँ सासे दावहारु

आफाथालाल' आज्लंनाय
सुमलि थप्टानि जलस्कियाव
हेन्दां बोराया बेवहायनो लेक्सार होदोँ
सोर्गो नोरोकनि उल्टां फाल्थां
-
जावैसो बिमाया हेबदोँ
मालाय जेरबासे गोजौआवसो लेक्सार होयो
नोँहा आरो खामफ्लाय सायाव
खुरै लथा दामै दामै-
राजानि सियार राजायानो जिरायनो हाया
मा बेलाइ?
-
एमावजोँ उन्नाय मेलेम
माखौथो हाया?
सोरनि गोजोन जाबावनो?
आंनो राजा आंनो
दं दं थांमारदोँ हेन्दांआ
-
गामसानि सारामाय
थाफ्लि नुजालायनाय लेन्सा थेबनानै
राजानि सियाराव
जिरायमारदोँ बियो
नाथाय---।

दाबो आं गोसो खाङो,
मानो गोसो खाङा जानो?
गोसोआवदि फैयो।
बेब-बेब बब-बब खिबु उन उन रिक्सा।
ब्लड थांदोँ फिन गुबुन बेबादिनो बेल दामलांदोँ।
सिख्लाया बनरगावनि, जोबोद समायना, गोसोथोथावथार।
बिजोँ ससे लामायाव लोगो मोनलायनायावनो गोबां रायलायदोँ आं।
मा मादि रायलायदोँ जोँसो मिथिसिगौ।
थेवबो रमान्टिकनि बाथ्राया हले गोसोआव फैफ्लां बायाखै।
कक्राझार सोरकारि फरायसालिमानि एइस एस नैथि बोसोरनि फरायसा।
मुङा निजोरा ब्रह्म मोन।
नाथाय बिनि रावदायलु नंबर लानो हानायमोनब्ला दाहालागै जोँनि बर'लेण्ड मोखां साफागुरियाव
लोगो हमलायनो हालायसिगौमोन खेबथामसो।
जेखियानो जाया उनफ्राव लोगो मोनफ्लांबा
आं बेखौ " आइ लाभ इउ" होन्नासो खारगोन।
थाबाय थाबाय फारलंगासेफ्राम जोँ सानैजोँ रायलायदोँ खालि सिनायथिनि थाखायल'।
उनाव बियो आंखौ बुंबाय-
" नोँ थांदो, माब्लाबा बहाबा नुबा रायलाय।
आं जारौमोनाव थांनोसै-"
" जागोन" होन्ना बियो थांनाय फारसे नायहरो आं।
गोमोथाव ना-मा होन्नांगौ जाखोथाय.....
एफा समायना सिख्लाया थांबावबाय 'जारौ बिउथि फार्लार' आवसो।
थाबाय थाबाय बिदिनो साथाम बोरायसा लोगो मोन्दोँ आं।
स्निजि, स्निजिबा आरो स्निजिद' बैसोनि बोरायसाफोर।
सासेया बुंबाय-
" ओँखाम उखैबायलै बुदां,
सोरनाव जाहैनोब्रा?"
आरो सासे नैथिया बुंबाय-
" मादैमोनाव जाहैनो नामा?
ना बिनानावमोननियाव जाहैनो?"
थामथिया बुंबाय-
" मादैमोनाव जाहैदिनैलै आदा दाबदं-"
थांबाय बिसोर खुसियैनो,
बिसोरनि उन उन आं।
मा फाग्ला मानसिफोर-रा बिसोरलाय!
सानबाय आं गोसोजोँ गोसो।
गावसोरनो एफा बोराय बोराय जाबाय बिसोरहाखि दासिमबो बिमादै दंबावो?
दंङब्ला माबादि जागोनफालाय?
नाथाय दान्दिसे उनाव नुबाय,
बिसोर 'मादै हटेल' आवसो थ्रोब।
इसस.....!! गोमोबाल' आं।

गोदो खोनायोमोन
मिना दैमारिनि गारांआव जावले जावले
- सानसेदि सम सफैगोन
आं होनबा गोमोरलांफिनगोन-
निलुआ हुरा हुरा रोजाबोमोन
- बिबारि मोनबारि बिबोनां गदाय
.....
फै मोसानि बयबो सारि सारि-
सानजारां आयंआबो सानसेखालि
अल-इन्डीया-रेडिअ सेन्टाराव
मेथाइ दैथारहरदोँमोननो-
दाउ खौऔ दीपाली बरटाकुरा
रोजाबदोँमोन-
साल सिरिनि गायहेनजोँ
दुमबुर खावसानि उवालजोँ
सौलायबाय हनै आनावमोनहा।
निलुनि सेर सेर बिग्राय दायाबो रोजाबदोँ
- दाया आंनि नङा रजे
आंनि नङा.....
गोदो जानजि सेरे सेरे बर' सिख्लाफ्रा
बिसन फुयोमोन
गंस्रो गंस्रो मायखौ गायोमोन।
दानिया- बुंथाव जालिया.....
दाहोनाफ्रानो गैलिया जेराव
गोदान दाहोनाफ्रा बेन्दोँ लाना
हाब्रु नांसि नांसि आलि खोनाय।
सोनाबनि बार बारबोदोँ
अब्लाबो साफ्रे सुफ्रे मडेला सोमोनांसिन
बहाबा खोनादोँमोन आं-
सेक्सि सेक्सि नोँनि सोलेर
.....
खालाव खासाव सना-
बेयो मा मेथाइ?
बेयो मा मुगा??
दानि सेंग्रा सिख्लाफोरा बिजिरनो हाया
थार्ला बुङो जाबा दाजा
बादायलायनायनि मुगा; जा हायो।

नोँ आंनि समखौ खोमाबाय
आंनि सोलेर आंनि गोरबो गोबाख्रबबाय,
आंनि सान्दांथि आंनि गासै-
नोँ आंनि समखौ खोमाबाय,
आंनि गोरबो बोहाबबाय।

बर'नि गिबिसिन लाइसि 'बिबार' ओँखारनायनि बोसोरसे सिगां इं 1923 मायथायाव रुपनाथ ब्रह्म आरो मदाराम ब्रह्मआ जथायै सुजुना दिहुनदोँमोन।
बिजाबखौ गेदेमा गुरुदेब कालिचरण ब्रह्मनि मुंआव बावनाय जादोँमोन।
खन्थाइ आरो मेथाइजोँ जथायनाय बे 'खन्थाइ-मेथाइ' बिजाबा गांसे फिसा महरनि।
बेयाव साबा खनथाइगिरिनि खनथाइफोर दं।
बिसोर खनथाइगिरिफोरा जाबाय फारियै-
रुपनाथ ब्रह्म, मदाराम ब्रह्म, सतिश चन्द्र बसुमतारी,
सुरेन्द्रनाथ ब्रह्म आरो रथिराम ब्रह्म।
खन्थाइ-मेथाइ बिजाबा फिसा बिजाब थेवबो आबुं बिजाब होनना बुंनो नांगोन।
खनथाइ आरो मेथाइ मोननै बाहागोआव रान्नाय बे बिजाबआव दं दोँगु........
.......
फिसा महरनि ओँखार गिबि बर' बिजाबनि माखासे खनथाइ आरो मेथाइनि सानस्रिफोरा जाबाय-
: गसाइनि अबंलावरिखौ आर'ज गाबनाय।
: बोसोन होनाय एबा हारि फोजाखांनाय।

थांलाय-फैलाय लामाजोँ
बबेनिबा गोदान सिख्लाफोर
सानै
थाबाय बोदोँ।
लाजि गुसु जेरबायाव
गानस्लिँनाय सिख्लाफोर
सिरि सिरि नायदेरा नायदेरा
थाबायलांदोँ।
एसे गोजान सौहैब्ला
फुंखा, अर्जुन लावगामोना
माबा माबि होनना जंखाय
हरदोँ।
लाजि गुसु सिख्लाफोरा
खोनादोँब्लाबो सिरि सिरि
मिनिस्लु थांगासिनो थाङो।
फुंखा- खोनायाखिसैलै दां!
लावगा- खोनाया जायो
मिनिस्लु जालांलायदोँ हनै
फुंखा- खररा बुंहरलाय,
खररा बुं खोना हैनायनि।
बिरखां- (गारमा फुवारनानै)
खररा-
थाबायलांबाय थानाय
सिख्लाफ्रा उनथिँ
नायहरफिन्ना
ग्लाब ग्लाब मिनियो।
गासैबो मिनियो।

आयै बिमाबो लष्ट जाबाय
हिर' हन्दायावबो गाखोआमोन
फाल्सार बुलेटआवबो गाखोआमोन
ब्लद फाग्लि फाग्लि
साइनिस मबाइलजोँसो बियो खारफालांबाय।
फैमाल जाबाय गासैबो
ओरैनो माइनास थांबाय।
थांनाय दामासियाव दखना बायना हरबाय
फैगौ बैसागुआव जुलिनि खोथा होबाय
थांनाय फागुन दानाव फार्कआव थांबाय
फैगौ सानाव सेनेमा नायनो बुंबाय
फेलेँ थांबाय आय'
ओरैनो निलाम थांबाय।

ओरैनोसोमोन नोँनि मोजां मोनफ्लानाया
सिरि सिरियै नोँनो नेवसिलांबाय
गोरबोआव बुजि मोनै हांमाया आंहासो थाबाय
ओरैनोसोमोन नोँनि मोजां मोनफ्लानाया
सोफै सोफै सिमांआवनोँ
नांफै नांफै लामायावनोँ
गुलि गुलि नंखाय माया
बेयो गासैबो नोँनि जिग्रोद साया।
बै साननि बैफोर गासैबो
गोसोखांथिया हाहांहां अखा दिनै
हाब्रुजोँ बुंफबनाय बै दिनै सावगारिया
गुसेब गोसोनि गुसेब नोँनि मासिया
ओरैनोसोमोन नोँनो मोजां मोनफ्लानाया
सिरि सिरियै नोँनो नेवसिलांबाय
गोरबोआव बुजिमोनै हांमाया आंहासो थाबाय
ओरैनोसोमोन ओरैनोसोमोन ओरैनोसोमोन
नोँनि मोजां मोनफ्लानाया।

खुगायाव बुंदोँ हारि हारि
जानाय समाव बिसिनाव सोँखोमादोँ मा इंख्रि?
सोरखार जालाय हाबाब सोरखार जालाय
बैसागु बोथोराव बाराबाव देलाखब देलाखब।
थाव नालेँखरखौ दाफबलिया हाबाब
मल मल मोदोमनाय अइलसो दाम दाफब
बुंनो थांब्ला बियो बारिनि मैखुन थंग्ला
ओरैनो हनै लरला लरथा।
हाबाब हाबाब आदैया
बिखायाव बुयै बुयै बुंना लायो
आंनि समान संसाराव सोरो दं
जौ बेदर खाफालाव मोन्नो गोनां।
लेखाबो फुद्दा रोङा
अ आ क ख सिनाय रोङा
सानस्रिया बुङो हाबाब
गोदोनाय हारिया उदै बुङा
नोँबोथ' आदै जेबो रोङा।

गोमो गोथां बाथ' गां दखना गान्नानै
हायला- हुयला समायना मोसा बायनानै
दे बराय बयबो दे बैसागु बोथोर
दे रंजा बयबो दे मेथाइ खन्नानै।
बैसागु बैसागु बैसागु
बिखा बिख्लोनि आमाय थख्ल'
समायना- समायना रंगिना- संगिना
खौऔआनो लेँहरबाय मेथाइ खन्नानै
एम्बुआनो हांख्रायबाय मोन्थोर आवरायनानै
सिफुं दामै दामै जोमैया
मिनिबाला- बाला समायदोँ बिफां- लाइफांआ
दे बराय बयबो दे बैसागु बोथोर
दे रंजा बयबो दे मेथाइ खन्नानै।
ज्राब गारहरदो गोजाम गोसोखौ
गोजाम बोसोरनि एना एनिखौ
ज्राब बावगारदो गोजाम सबिखौ
नांलाय- खमलाय हिंसाइलायनायखौ
गोमो- गोथां गोदान गोसो लानानै
जोँखोल- समायना मिनिस्लुनानै
दे बराय बयबो दे बैसागु बोथोर
दे रंजा बयबो दे मेथाइ खन्नानै।