फुसनि निहिर
जोंथिदों फुंबिलिनि सोरां रोदाजों
दुब्रि हाग्रा समायदों।
आंनि नोजोरा
दायो नायगोमोदों,
सुदेम बुब्लियाव।

Okhrangni nijwm bikayao
Birbainai jwmwi ranini mohorao
Angni ransrao gwrbwa
Lubwiyw bininw okha bilainai
Besedi hainari jwmwi anjali
Besedi ansuli jwmwi hainari
Sohainw hayi sun rwdakhou
Gaoni dokhona phaili arw gwswm khanaijwng
Pangte pangte ladwng
Jaini jahwnao angni ransrao gwrbwa
Aseblabw sudem mwndwng,dwimuni dwiaosw jenoba.
Birbaiyw nwng udangwi
Baidi moho lana nujatiyw
Som arw bwthwrjwng gwbalaina
Onsainai gwrbw gwrbw,nwngni guwar bikha.

सिखारनाय एमनि उनाव
गोसोआ गोजान जायो
फरायसालि,फरायसालिमा,माख'बायदिनि
गामाखालिनि बादि हांखुर जाय
दिनैनि सानाव।


उन्दै उन्दै गथ'फोर
रंजायो खारदिङो फोथार गामि दुब्लि
जोबथेजानाय फानजारिनि दाउ
उदाङै बिरनाय बादि।
गावनि मावनां हाबाखौ दान्दिसे दोन्थ'ना।


गासै सुबुंआनो दिनै
गावनि मासिखौ एंगारथ'ना
जिरायथ'दों दिनै गोदान मासियाव दान्दिसे
दिनैनि बे उदांसार सानाव।


आंबो दिनै बावगारदों मुगासे
उन्दै गथ'फोरजों रंजाफादों गोसो हगारसारना
जिउनि बुब्लि दान्दिसे खुसि बोन्थुमना।

गोथार सान बर'नि
थुनलाइनि आबाद फोथांनो
1952 मायथाइनि 16 नभेमबर
बासुगाव गयबारिनि बिखायाव
सान अखाफोरनि साखियाव
बर' राव फोथांनो
बर' थुनलाइ जौगाहोनो
बर' हारिखौ मिथिसार होनो
नों बर'नि आगोमा आफाद
बर' थुनलाइनि बिगोमा
नोंनि थैथाब नांथाब नाजानाय
नोंनि थुनलाइखौ अनसाइनाय
थांना थाथों नों
अराय जुगामि जाना
फोथां नों बर' हारिखौ
खाबु हो नों
बर' थुनलाइ सोरजिनो

Som Som Mwdanw
Somaina Mohor
Hura Hura barbwyw
Mwdwmnai Mwdwmpru Bibar
Thwi Rwda Rwda kharsrayw
Mijingni Dengkhw.
Abad Thili Nagirw
Grou Grou Abad Khalamnw
Nuhurw Nwzwra Bwi Jaiga
........Oasis.
Jerao Grou Grou jagwn
Thaikhrigwn Pithai.

Swdwb Swdwb nagirw Khonthai.
Mablaba Ginai Pwiyw Gwrbwao
Beoanw Ang Dwithaihorw
Abadni Khwtha Dwnthona
Nwngnisim Thong Gwiyi Radab.
Gwrwnthi Janai Mwnw Gaonw Gwswao
Dunglub Gwswa Nwngkhou Jengnayao Narswmw
Nathai Raha Gwiya Angha.

Tharwinw Ang Hasthaiyw
Nwngkhounw Nainw Megon Bwdlathabna
Nathaidi Gwkhrwng Sanni Rwdaya
Angni thwngjwng Rethinayao Sougraopwiyw
Oblana Ang Gongsrina Thanangw.
Bekhou Nwng Sanwbla
Nwngkhou Mugwinaini Nerswn
Angni Gwrbwa Asebw Gwjwnnai Nonga.

Siriyw bilai bipang mwsayw
Gwthang pithaipwr lorhai langw
Rwdapwra rongzayw dalai ranzringw
Langdang hayao dakhwr japobw



Gwsw Birw okhrang gezerzwng dwimu
Sansriyw gwdan khiliyw jiu
Simangpwr thaiyw unduhabna thayw jiu
Akhai-Athing rubaiyw swlera mengru


Onthaiya dudruyw dwisa gathwn
Dinga gwzaow udang fhwisali gwzan
San habw dandise minina swnab gwzan
Dao palw birlangw bahayo gwdan



Bere bamblema birw bibarao
Sikhiri megon sayw nainw hayiao
Bidwipwra khathw zayw dikharao
Pithaini habilaya seolangw thasariao.

Jwimwi nwngni onsainaionwsw okha
Okhani mohoraosw swmkhwr abad
Okha gwiyabla khoran
Ranjringna lorhaigwn abad
Dalai bilai sirina swleralo longthongwi thagwn.
Nwng bekhou nunanwinw saglwbw okhrangao.
Angdi nwngkhou orai hasthaiyw sakhatiao
Raopwra nwngni sidwb gwdwi
Mohoradi nwngni bese somaina
Angni gwrbw swlera nwngni thakhainw thajim.
Nwng angni nwjwrnipry
     Datha nwng anjraina,andw-andw.
Dabung nwng-
"Angkhou nwjwrthinangla nwng
Nwjwrthidw Angnikhrui bangsin
Jai hagwn nwngnw onnai hwnw
Agni onnaia jerao lwrbang".
Angni bikhayao saronthai.Thwisam.
Angdi mwnakhwi nwngnikhrui somainasin onnai
Nwngni onnaiadi lwrbang be jathaoa
Angni thakhai thajim onnai nwngni.
Angdi nwngkhoulo hasthaiyw.
Nwngnw orai angni nwjwrao oraithi.

गिबियावनो नों लोगोनिसिम
मिजिंथिनि गोर्बो खेंब्लाना
अननायनि बिदै सरग'आखैब्लाबा
आंगोनि होनना अनसायना सावसुबदो
दायो बिथ'राइ गोरलैखौनो
जोंनि आबाद थिलियाव सैमा फालो हाबफैना
फारसेनिफ्रायनो गाफायनो लानायनि खौरां
खौरांआ बिखा खामहोदों;
राहाखौबो मोन्दों होबथानायनि
नंगौ जों बेरा होथेनो हायो
नाथाय जों मानो गावस्रालायनाय गोसोनि
मावबा-मावना आबादखौ
दिनैसोलाय मानोथो हारसिं हारसिं
मानोथो रावबो औवा थसे लाना फैया
मानोथो थिलियाव रावबो नुजाफैया
बुजिनाय गोर्बोखौ बहा दोनखुमाखो
बासिलायनाय दुसिलायनाय मानो लाबोखो
बे आबादा दायो
बिथ'राइयावनो बायलांबा
बिनि गेरेमसा मिजिंआ फैमाल।

सिदला गेजेरावनो मानिबा थै
सिखारग्रो मोना नुना आं बागदावखांदों
साखाथि फाखाथि नोजोर थिदों
सेरनि बिबार बागान सेरावनो सह'
मानि? मा बेलाय?
आं गिखांदों।
दान्दिसे निजोम उनाव जों नायबायदों
बेसेबा खास्रि-बिस्रि बुथारजादों
आंनिनो फिसिनाय सैमा।



खामसालियाव दामब्ले जदामब्लेना
सानहाबो आं बारग'लांनाय समफोर
गुलि-गुलि गेलेनाय बेजोंनो
जानाय लोंनायाव आथा-सिथा खालामग्रा
नाहा-मैहा थांब्ला थांफाग्रा
आंनि अनजालु सैमा
गोमाबाय नों दिनै
गोमाबाय!



सोरनि मा दाय मावामोन नों
सोरनि उदखाराव नों आंखौ बिदाय लाखो
एसेबो नेर्सोनथि आंनो गथाइलांआखैसै
एसेबो आंखौ रायदावलांआखैसो
सिरियै बिदाय आंनिफ्रायययय
आंनि मेगनाव मोदै फसरना
बिबार बागाननि गोथार जायगायाव नों
दिनै सलादें थाफैबायल'!



बिजिरगौमोन आं नोंनि फंसे फिन मोननायमोनब्ला
खिथेर होखारफिनगौमोन आं मिथिनायमोनब्ला
हगारथारामोन आं बैसोर दुथांफोरखौ
जायफोर नोंखौ खास्रि बिस्रि बुथारदों।

मानास हाग्रामा सेर
दैसा रुगुंआव ओलैस्रो
दिदोम गसंना नायहरदों
दान्दिसे गोमोहाबना आं

लासैयै मोनहैब्ला साखाथि
सोलेरा समाइना आगरनि दखनाजों फांथेनाय
आरो आं "सोर" साननाङासै
खानाइ गोलाव मा हारि ?

खिन्थाबाय आंनो।

नाथाय साननांगौआ---
दायोसो देबोर नांदों---
बे हालोदनि, बे थासारिनि
जाथायनि थं गैया
सोरनि अगेन आखु
हाख'आखै बिजिरना संदाननो
अब्लाबो बुब्लिया सोंनो खावलायो आंनि गोसोआव

बिसोर नङाथ' ?
बैसोर नङाथ' ?

नङाबालाय सोरथो जानो ?

साननो गोनाङा बेबो---
सोलेराव नांनाय जेबो दागोयानो गैया

जानोहागौ जोंनि सुथुर---
जिनाहारि जुनार आखुजों
बेसेदि खास्रि बिस्रि !

बेखौ सानफ्रांनायाव सोलेरा गोजांस्रिव
मोदोमनि खोमोनफोर गसंख्राङो
मोन्थाइखौ सेख'ना लानो
गोसोआ खुन्द्रि खाङो।

बेफोर हालोदखौ नुनाब्लाबो
मानोदि गोर्बोआ अन्थाइ ??
मोन्थाइजों जुजिनाय उनफिननाय,सिगांनायनि उल्थायै।

बेसेदि मान हुखोमोरदों
"जोंनि बिमा हारिनि"

गावजों गाव दुसिलायनायावसो----
"गावजों-गाव मोसा"।

सहायबावनांगोन बेबादिनो इयुनाव
आरो नायबावनांगोन बेनिख्रुइ खास्रि-बिस्रि
सांग्रां नङाब्ला इयुननि नोजोराव।

मोननांगौआनो देरसिन मोन्थाइ
बेखौ खोमाना लानायानो पाप
पापआनो फोजोबस्रांलांनाय।

स'नानि मासि नोजोरथिनायाव
हारि-हादरखौ फानोब्ला
निमाहा होनायनि सम गैलिया

राज्योआ आखाइ सोमावोब्ला निजोरा बोहैयो
राज्योनि मोन्थाइखौ दाफान खर' गिदिरफोर
राज्योनि गेजेराव अर जोंखाङोब्ला---
खामब्लाबलांगोन नोंनि मासि
हांगारनिफ्राय-हाथफ्लासिम
इयुनाव आरो मोनफिननाय नङा।
खानाइ गोलावनि नुथाइयावनो
सानहोयो दिनै बयखौबो
बेयाव साननो रोङिया---
थाबावगोन जुनारनिख्रुइ जुनार आखुनि आरो मा ??

फागुननि फाग्ला बारजों
जालांनाय लामब्र बिफां-लाइफां
गोदाव सोराव खाराव माराव गोसो
दिनैसो समायसारबाय
दिनैसो गोदान हां मोनबाय
बैसाग दाननि हांख्रायनायजों
हालांनाय जाख्रि जाख्रि अखा
समायनायै देलाइबाय बैसागि सिख्ला।
बर' हारिजों रंजानो
गानफ्राबाय दखना-फास्रा
जानजियाव आरनाय-गामसा।
हिनजाव गोदाननि महर लाबाय
बरायनायनि देंखो रिंखांदावबाय
खाम-सिफुं-जथा-तरखा
हायलालाइ-हुइलालाय बागुरुम्बा।
दाव खौवौनि मिलौदो मेथाइजों
गोमसारनाय बर'नि देंखोजों
नै नै बर' राज्योआ समायसारबाय।

आंनि मादै गेदेर
आइजोंनो समान अननाय
आइनि समान अनसायनाय
अब्लाबो आइया अरायग्रोसिन।

सोरांनाय उनाव एम नागारना
मोखां सुखांनाय उनावनो
आं गाबज्रिहरो-मादै !
मादै सहा !

दुंबायब्ला फैद' बुंहरो
दुंथ'आखैब्ला र' बुंहरो
आंहा मादैनि साहा लोंनो लुबैसोयो
गोथाव फुदुङो लोंथावथाव।

ओंखाम ओंख्रि मादैनि इसिंनि
आंहा ब्लिं-ब्लिं ख्लां-ख्लां जानो
फानलु-हालदै संख्रि-मसला ज्रोम
सालाइया बाददिंग्लायथारो आंहा।

रजे नों

दाजा दुखु
       गोर्बोखौ खामग्लिहोना
उसाव बादाव दाजा
      बिखायाव दाहा लाना।


दं आं रजे
     नोंखौनो अरायनि मिजिंथिना
नोंनि अननायखौ गोर्बोआव लाना।


हाया आं बाउनो
     नोंनिनो बुंनाय राव
नोंनिनो अननाय
   नोंनिनो महर।


गोरोन्थि जागोन आंहा
     बावगारोब्ला नोंखौ।


नोंनोनो अननाय आं
    गोर्बो बुंजासे
नोंखौनो फोथाइहोना
    लुसोमना होग्रोदोंमोन।

गोसोआ लुबैदों
ग्रौ-ग्रौ आबाद-फसल मावनो
जोलै नागिरदों
बै वेसिस्आवनो खालामनो
बेयावनो जाथारगोन
सोमखोर समायना
हैगोन दै लुनानै
सानफ्रामबो रोगा रोगा
मोन्थारथोंल' गोथाव फिथाइ।
नागिरै नागिरै
साबजानाय मोनथारबाय बेखौनो
बेखौनो थिहरबाय।

सोरखौ सोर मा बुंनो
राजा जानोल' हुरा हुरा
होख्रावो गोरा गोरा
मासिया मोनब्ला बावबाय
गारामाया थसेब जाबाय
सोरथो बुंदों-
सोरथो बुङाखैमोन
फोरजा जाना थानाय समावलाय
बयबोसो बुंदोंमोन जुजिदोंमोन।
बोरो माथो दिनैलाय गैला
गारामा देरगालायनाय हब्रानाया।
मा जाखो ?
बुङोल' बुङोल' बयबो बुङोल'
बिमा रावजों सोलोंथाइ होसो
नै माथो आदाराम,गयाराम,आयाराम
आलाइस्रि मैनास्रि गयस्रि बिबारि
फोरोंगिरि दैदेनगिरि थुनलाइगिरि दोहोनि
होसोलायदों मालाय गुबुन बिजोंआवसो
बिसोरनि बिबुंथि खोनासंना
गामिनि गोरिब दुखुथिया जामबा जामबि
नाब्ला मेब्ला हंला हालां मोनहा
सोमबे हंले नाब्ले गायदे मोनहा
हरबाय फोथांनो बर' राव
बायला-जिला फरायसालि बर' बिजोंआव।
बिसोरखौलाय दिनै सोर नायसनदों
बिसोरनि दुखु सोर मिथिदों
मेगन मोदैखौ सोर नायसनदों।
बिसोरनोथ'मोन नोंसोरखौ राजा खालामनाया
बिसोरनोथ' हारिनि खौसेथि लुबैग्राया
बिसोरनोथ' बिमानि मोदै हुगारनो सिगांनाया
बिसोरनोथ' हारिनि अलंबार नागिरनाया।
सोरथोलाय बुङा-
गुबुनारि हाबनो मोना
सोरथोलाय बुङा-
गुबुनारिजों भ'ट गेलेया
बयबोसो गेलेदों
बयबोसो हाबहोदों।
दिनै सोर भुगिनांदों उदिस लारोंदों?
बर' हारिनि निखाउरि फिसायासो।
सोरनि थाखाय दाङाबाजि हारियारि
नोंसोरबादि राजानि मासि सेलायनायावसो
नोंसोरबादि आखुआवसो।
माब्लाथो बुङा सोरथो
बर'हा खौसे गैया
बर'हा खौसे जानांसिगौ
अब्लालाय मानोथो अननो रोङा गुबुनखौ
अब्लालाय मानोथो निमाहा गैया
अब्लालाय मानोथो बोज'बना लानो उदायरोङा??
दिनै नोंसोरबादि अनलायनो रोङै
गावजों गाव गेजेन जालायनो रोङै
मासिनि थाखायल' सानग्रा दैदेनगिरिफोरनि थाखायनो
गामियारि जाम्बा-जाम्बि आइ-आफा आदै-मादै
आबै-आबौ,आमाइ-आनै बिदा-फंबाय गावजों गाव
गोजोन गैया जुगुमलायनाय गावस्रालायनाय।

बैसागो बोथोरनि बरायनायाव
बैसागि सिख्लाया देलाइस्रि महर लाबोबाय
फैदो आइ-आफामोन
आबै-आबौ,आदै-मादैमोन
बिब-बिनानाव,बिदा-फंबाय
जान्जियाव आर'नाय खाफ्राना
दखना-गामसा गानफ्राना
बरायनोसैलाय बैसागु रंजानायजों
दिन्थिनोसै बर'नि हारिमु
बर'नि मोसानाय रंजानाय
खाम-सिफुं जथा थरखानि देंखोजों।.....

उफ्ले उफ्ले गोजोमबोनाय
गोजाम हाद्रिखौ नागारना
आखायाव आसान सांखा
खाफालाव गोजा निस्थार
सिन्दुरनि फोथा लाना
दखना थावसिजों
गावदां गोदान महर लाना
बिरबोनाङो गोदान हाजों
गोरोबनो।
जोनोमनि उननि माखासे
गोजाम बिथिंखौ नागारना।
गोदान संसार जुरिनो
गोदान आगान होफैयो
गोदान न'खर।
गोरोबथि रादाय
सोलोंनो ओंखारनांफिनो।
रैरुब संसारनि राव
बिथा खालामना उन्दुयो।
मिजिंनि फिथाइ
बेयावबो सोलायो।

दावज्ला बेरहानि सौलायनायाव
रिंखांनाय सोदोब
आं खोनाना नायहरो
अब्ला मानैबो
जाहाबलांबायमोन आरो मेंग्लिबायमोन
अब्लाबो उनथाया
सौलायनायानो सौलायनाय
बेबो जेना बैबो जेना
आंनि गोसोआसो दावथ्रोद लांफायो
बिखाया सोदोब होयो
मिनिनो लुबैयो
मिनियोबो
नाथाय बे मिनिनाया
नङा गोसोनि दरखं खेंब्लाना मिनिसारनाय

थै थां जुजिगोन !
           थै होगोन
                   जिउ बाउगोन
                      अराय देरहागोन।
मोनाब्ला जों जिराया !
          बेयो जोंनिनो मोन्थाइखा
                  मोननांगौआव जों फावस'या
                         गिनानै जों थाया।
जोंनो गोजोनलेण्ड नांगौ !
          जोंनो जौगानाय नांगौ
                 थांना थानायनि रैखा नांगौ
                        हगारना हो उदां अख्रांखौ।
हाया,
        हाखाया,
            गादबना दोनजानो
               फिसा हारिबाबो।
जुजिगोन,
         सिगांगोन,
                मोन्थाइनि थाखाय
                     थांना थानायनि थाखाय।
जोंबो हारि
     बुहुम बिखानि
           मोन्थाइ जोंनि
                 नङा गुबुननि।
जों जिराया
     जों मेङा
          हारिखौ फोजाखांनायाव
                आबुं जांख्रिथाइयाव।।
जेसेबांखि फान्दाया
      जों गेजेन जाया
              जों दलरै जिराया
                    जों हगारा।
बिखायाव गुलियानो नांआथों
       मोदोमा थैसाम खायाथों
             थादवा जों थादवा
                 होसिख्रावनाय जों दोनथ'वा।।
मुगैयो जोंखौ बिसोर
          उन्दै हारि नोंसोर
              अब्ला,
                    जोंनो उदां होदोना।।
सासे थैगोन
       सान्थ्रिनि गुलियाव
             थै जिरिगोन
                  बर'नि सिदलायाव
                     अजिफिनगोन
                         सान्थ्र'हायै बिग्रायारि
                              रैखागिरि हारिनि।
सोदोमस्रिनि मुखा
        नोंसोर अन्थाइ बिखा
             फिसा हारिनिखौ
                 फोजोबस्रांनो सिगांग्रा
                    गायसंनो नाजायो
                         गावनिल' गोहोखौ
                            देरहा हारि होनना
                               गुबुनखौ मुगैयो।।

अननाय बेयो गोर्बोनि
आंगोनि आंगो सानना----
बे अननायननि खरागजों जों
खारदों आन्थोर आन्थोर
सोमखोर गसंथानो----
जिउनि बुब्लियाव----
*
आबादथिलियाव हाल एवना आबाद मावनो
आबादनि बेसेन दैखांनो
होनाय गोदै बिदिन्थियाव
जों ओंखारो आबाद थिलियाव
*
साननायनि अनजिमा फारियाव
जों सोलोंयो-बिदिन्थियाव
फारि फारि साननो
आबादनि बेसेन हुखांनो।
*
सोद्रोमथिनि खुद्रिनायाव
अहंनिफ्राय जों जानगारनो सोलोङो
अहिंसाथि लुबैनायाव ।

गासैबो दिन्थियाव जों गंग्लायो
सिबियो गंसे रेबगनजों।।
**
मान होयो दिनै दोंसे खन्थाइजों
नोंसोरनिनो मावदिन्थिजों
रेबगन गंसेनि लिरथिजों ।।।

खोमसि हरनि उनाव
फुंबिलिनि सुदे बारजों
दावसिन दावलानि मेथाइजों
समायदों फुंबिलि सम।
जोमै साग्लोबनाय अख्रां
आं नायदावना गिखांदों
हरनि समा आंखौ सिगिदों
फैबावबाय फैबावबाय नै दानो
खोमसिया सोंथेफैबावबाय।
फैदो नों बिबारि
सानजाहा मिनि खैरेना
होफैदो सोरां आंनि मेगनाव
फै सना
फैदो खैना
सान जाना जोंब्लाव फैदो।
बिबारि गावदां गेवलांफैदो
नोंनो होफैदो
सैथो सोरां सैथो स्रां।

आंहा दिनै हराव
मेसेब हालिया मेगनखौ
बुरै दैसानि दालां
मिनिस्लु लाजिस्लुयै मिनिनाय
रोमा-रोमै दाबो
सायखं बादि बिरग्लांदों
सेंग्रा गोसोखौ
थानो हायै बादि रंजाहोदों।
नोंनि समायना महरजों
जोंथिनाय आगरनि दखना-फास्राजों
मा एसेदि समायदों
जेनबा नों लक्ष्मी देवी
बोरैबा नायोब्ला दुगा बिमा
आरो बोरैबा नायोब्ला स्वरास्वती आरो पार्बथी आइ।
आंहा आरो दिनैनि हरा
सिमां सुजुनायनि नंलिया
मोखथां सिमां नुनायनिसो।

जोनोमा नोंनि जेराव
आंबो दिनै बेयाव,
नुआखै नाथाय
जौस्रां देरस्रां दाद जांगिला नोंनि मुस्रि।
खोनादोंल' गामियारिनिफ्राय
आइ-आफा,आदै-मादै,आबौ-आबै,आमाय-आनैमोननिफ्राय
हारिमु­ फोथाराव नों
जिरायना थायाखै दलरै नों
थुनलाइ सोलोंथाइ गासैयाव जेना
सिफुंनि देंखो रिंदावहोयोमोन नों।
नोंनि हारिमुनि सोरजि
बैसागु आरो हारिमु
आंनि थाइनै मेगननि रेटिनायाव जिरायो दलरै।
नोंनि अनसुलि बिमाया
अननायनि रावजों गाबज्रियोमोन
नै ! फिसा लावगा
फै ओंखाम जाफैदो
आथिं आखाय सुना बिजाब फरायदो
बिमा जाम्बियाबो लुबैयो
सोलोंथाइ लाहोनो।
नोंनि सोरजियानो नोंनि मावदिन्थि
नों मावसोमनायानो नोंनि मेंनोरोङै गुन।
फरायसाफोरनो मा फोरोंनाय
आंथ' मिथिला
नोंनि सोलोंसाफोरखौ मिथिब्लासो सोंनो हागौमोन।
बैसागोनि खुंखा ओंख्रि
स्नि साननि उनाव स्नि मैगंनि गलाय ओंख्रि
बुरै थखन,थाराइ गाज्लि,लाफा साइख',मायसुन्द्रि,दौस्रेम,दिंखिया,बेसर सोरा,सिब्रु मैगं
जानाय बर'नि गाहाम हास्थायना
मायथाइयाव बेराम आजार दाफैथों होनना।
आंहा दिनै
हारिमुनि आगजु गैया
नोंनि थिलियाव उजिनानैबो
रांखाउरि गैया बेफोरखौ सोरजिनो
दिनै खनसायबाय आं गोथार थांखिजों
स्नि मैगं खुंखा संनो
बैसागुनि रंजाखांनाय उनाव
नोंनि जिउमाया गोजोनदो बेजोंनो
नोंनि गामिनि फिसा
बसुमतारीआ बाउहरबाय बेखौनो
संख्रि फानलु हालदै नांदोंना नाङाखै
गोथाव बिदैगोनां जादोंना जायाखै
बेखौबो आं मिथिरोङासै
अब्लाबो बेजोंनो गोजोनदो
सानजारां लावगा !
नोंनि अबथिरा रुंसारि जानायाव
फस'रनाय अनजालि बिसि आरो
हावरिया फिसाफोरनि मोदै
जानोहागौ नों दाबो गोसोखाङो।
नोंनि गोसोखांथियाव
गायसंदों नोंनि गामियाव
सोलोंथाइनि बाख्रि।
नाथाय बे बाख्रियाव
आं जेब्ला हाबहैयो
सानथाम(बोसोर) खुसियै
अब्ला बेंगिरियानो
साथामल'मोन।
बिसोरमालाय माबोरैथो हानो
थाइसे उदैखौ सुफुंनो
एसेबो देगाव मोनाब्ला!
आं सिबियो बैसोर साथामखौ
नोंनि मुंनि बाख्रियाव
जायफोर बिखा फोरदानना हाबसोनानै दंमोन
नोंहा बेयाव दाय गैया।
जायफोरनि मावसोमनायाव आं
जायफोरनि मोजां बोसोनाव
थुलुंगा फैयो दावगानो
बैथा हमना दिङा जावनो।
हालि बुरखांनो
नोंनि गासै सावगारि
आद्रा जाबाय गोरोन्थि थाबाय
अब्लाबो खेमा होदो
एसेयावनो दोनथ'बाय
नोंनि उजिथिलिनि
बसुमतारी।
सानजारां-उजिथिलिया सोरां जाथों!
हारिनि अख्रांआव सोरां फैथों
लावगा-उजिथिलिनि फिसाफोरा जिउ लावथों
हारिया अराय जोंनि थांना थाथों!
जों बाउनो हाया नोंखौ।

(1)
रं नाम्बाराव गोसोथोनाय सिख्ला
बुंनायाबा हले गोदै गोदैखा
सिफिया लांदां जादों
रां सोना हरनांदों
नुबाय दाखालै हटेलाव फिसायानो सानैखा।
               (2)
थैलायबाय थादों जों बर'आ
खौसेथि गैया गोर्बोआव बिसोरहा
मैयाबो थैदों साथाम
दिनैबो लावदों मोनथाम
नांगौलै बिदिनो खौसेथि गैया साला।
              (3)
लाव जा फानथाव जा
जोंनि मोसौआ जा गिदिर जांगिला
दाजा बर' गियानि
जोंलाइ लाजिनो रोङि
गावजों गाव थगायलाय थैलायबाय था।
            (4)
सिथाब सिथाब बे सिख्ला सासेया
गोदै गोदैखा बुंनाय रावफोरा
बिमायाABWWFनि लिदार
फिसाझोआ **** आव मार
सयथिबो आंहा बदनाम जाबा गैखाला!
                (5)
राज्योनि मेगनाव मोदैनि निजोरा
गामि-गामि थैलायनायनि इसारा
लिदारफोरा मिनिदों
भ'टनि रां होफ'बदों
बा माबादि राजखान्थिगिरिफो
रनि फावथिनाया!
             (6)
आलु भाजाजों कापसे थुसो
अमा बेदरजों गंसे बोखो
फिसाखौ फोरोंनाङा
बिजाब बायनो रां गैया
दे बिब्दिनो लोंनानैनो राजा जाथारदो।
              (7)
बर'आ डाइना बुथारग्लुंदों
गुबुनफोरा नायनानै हालाला मिनिदों
मोजांब्लाबो डाइना
गासैबो खाना
देलै बर'फोर बिदिनो गावजों गाव थैग्लुं।
              (8)
नै सिरांआव थैलायबाय साथाम
क'क्राझाराव हमदोंलायनो मोनथाम
धर्ना होसोलायदों
पुलिसआ बुग्लुंदों
जाजोबबाय नामा बर'आ गासैबो मोनथाम!

आं फोथाइया
राजखान्थिखौ फोथाइनो
आंहा गोसो गैया
राजखान्थिजों नेवसिजानो
आंहा एसेबो गोसो गैया
राजखान्थिजों गेजेन जाना
आं एसे जिरायना थानो लुबैया।
खुगा दं बुंगोन
मेगन दं नायगोन
आखाइ दं लिरगोन
आथिं दं गाग्रोमगोन।
राजखान्थिगिरिफोरानो खुगा फारब्रै फारबा गोनां
राजखान्थिगिरिफोरानो मेगन थाइसे खना
जानांगौ मेगना थारैनो खाना नङा
बेयो बिसोरनि फावसो
बिसोर दफा मुफा राव बुङो।
गद गैयै राव बुंना
फोरजाफोरखौ खुसि गोजोन गैयै खालामो
बिसोर थगायसुला।

नैबे लांथिया खाखोराव
रंजालु,मोसालु रेबगनजों
आं मानो आगर एरो?
मानो एरो?
गोसोनि बिदैखौ एरनना
सानबोलावरिखौ फोजाना
उखैनाय खाखोरखौ एसे उखैगाहोनो
लांथियायै समायिखौ एसे देलाइहोनो
आं एरो आगर,आं एरो।
नोंसोरबो लिरोने बिदि सानना?
ना बिदि नङा?
जौमोननि उरां फारां गोसोआबो
गोजोननार मोनो एरना
नबथि लुयो बेजोंनि
सानस्रिनि समायना नबथि।
गोजामखौ दोननो
गोमाखौ खिन्थानो
गोसोनि रावखौ फोरमायनो
सानस्रिनि आगरखौ खिन्थानो
आं एरो
आं लांथिया खाखोरनो
जिख्लाबसे गस्ला फिनो।

सान अखाफोर हाथर्खिनि सायखं
सान मोना रंगिना-संगिना।
जोमै अख्रांनि गाब
सोमखोर सिदोब
दैमा-दैसा लैथो लैथोमानि
स्राय-स्राय बोहैनाय सोदोब।
दाउसिन-दावला मि-जुनार
खौसेयै अनलायनायनि सावगारि।
बिफां लाइफां सोमखोर गावदां
बिबार फिथाइ गेवलां गेवथां रिदि रिदां
हाजो हायेन जौयेननि साया
आंनिनो खाखोराव
रेबगननि बिलिरनायाव
दुखु-दाहा गाबनाय मिनिनाय
रंजा खुसि राज्यो जानाय
आंनिनो लांथिया खाखोराव
गोजोन हिसां-हिसिं मोहेरलायनाय
दावहा-थगायलायनाय,सोबखलायनाय गादबलायनाय
गासैबो आंनि रेबगननि मोसानायाव
बेफोरखौनो आगर एरना
फाख्रा-सिख्रा आगर एरबाय
समायो समाया आं मिथिया
गोजोन बेजोंनो आं
सोरबा साबजानाय सोरबा साबजायि
आं जेबो उदिस लाया।
नायो नाया आं बिजिरा
सोलोंगोन सोलोंआ आं नाया।
बेखौल' लुबैयोदि
आंनि आगरा खाना नांदोंब्ला
खिन्थागोन आसि थुनानै।
ग्रह-नखत्र अक्ष लामानि
गिदिंनाय हांखो लामानि
आन्थोर आन्थोर आगान
गाग्रोमनो आंहाबो हाबिला जायो।
फ्ला-फ्लि सांग्रेमा
हमनो होसोयोब्ला स्रोब।
फोथार-दुब्लि बेसे समायना
फुस माघ फागुन
सैत्र बैसाग जेत
आसार सावन फादोर
आसिन खाथि आघोन
बायदि बोथोराव बायदि गाब
बायदि रोखोमनि फसल
बेफोरबो आंनि खाखोराव
रेबगननि मोसानायनि आगानाव।

सिरि मोनखां जों
मुगानि जोंखोल महरजों,
            आवगायलां थिखानाय थावनियाव
            मोननायनि मिजिं हाबिलायाव।
उन-सिगां नाय सान-हर
बिष फिथाइनिफ्राय गोजानाव था नोंसोर,
            जेसेबांखि फान्दाइयारिया फान्दायाथों
            गुबुंले दैमायाव दा बाज्रुमथों।
खारलुं एटमनि बिखा सोमावग्लुंनायाव
दासान दं माबा गोमोथाव,
            सुबुंस्रिनि गोदान गस्ला जोम
            पापनिफ्राय गोदानै जा जोनोम।

नैबे लांथिया खाखोराव
रंजालु,मोसालु रेबगनजों
आं मानो आगर एरो?
मानो एरो?
गोसोनि बिदैखौ एरनना
सानबोलावरिखौ फोजाना
उखैनाय खाखोरखौ एसे उखैगाहोनो
लांथियायै समायिखौ एसे देलाइहोनो
आं एरो आगर,आं एरो।
नोंसोरबो लिरोने बिदि सानना?
ना बिदि नङा?
जौमोननि उरां फारां गोसोआबो
गोजोननार मोनो एरना
नबथि लुयो बेजोंनि
सानस्रिनि समायना नबथि।
गोजामखौ दोननो
गोमाखौ खिन्थानो
गोसोनि रावखौ फोरमायनो
सानस्रिनि आगरखौ खिन्थानो
आं एरो
आं लांथिया खाखोरनो
जिख्लाबसे गस्ला फिनो।

बर'नि बिग्रायारिखौ नागिरनो
हरनाय सान्थ्रि हान्जा
बर' ओनसोलाव हाबग्लुंदों
बर' फिसाफोरानो गिलुं-गिलुं
जानाय लोंनाय खहाबा
मावनो दांनो गोसो जवा।
दाय गैयैखौबो बुख्रुब सुख्रुब खालामदों
गावथारदों बुथारदों खास्रि-बिस्रि
जिनाहारि खालामदों
माखासे बर' आइजोफोरखौ।
बर'नि सायाव उदखारसो खालामदों
अपारेस्वननि मुङाव गामि गामि हाबना।
आंनि ओनसोलावनो
नै खास्रि बिस्रि बुथारबाय
आंनि खोमायावनो रिंसारबाय
नंखाय दाय गैयैखौनो जिउ फोजोबबाय।
निउस मेडियाफोराबो फोसावबाय
नंखाय बांसावबाय
बर'नि सायाव गासैबो गाग्लोबबाय।
गोर्बोआव थानाय आइजोखौबो जिनाहारि खालामबाय।
गासैखौबो अग्रुपनति साजायबाय
बिग्रायारिनि हेंथा दैथाइनाय
भारत सान्थ्री हानजा।
बर'हाल' बिदि जाबाय
आनै गालियाबो मोदै हुगारबाय
आबै गाब्रुआबो होसो लांबाय
गोबाख्रब गोबाख्रब होसिख्रावना गाबबाय।
बे हारियालाय मानोथो
एसेबां आलाय सिलाय
गुबुन हारिजों मोहेजानाय।
दुखुआनोसै बर'नि बिलोगो,
असे बिसुगे दासानदै बर'नि।।

मिथिंगा सिख्लाजों रुजुना
सिखिरिजों बरनायना
आं रोजाबो मेथाइ
नोंखौनो लाना।
मेथाइनि देंखोआ
गोदै एबा गोफायानो जायाथों
रोजाबो आं जावलियाबादि मेथाइ।
नोंनि महरा आंनि सायख्लुम
नोंनि महरखौनो आं नुनो हास्थायो;
जेराव माब्लाबा आंनो थाखुमाफिनो।

बे दाहाया माब्लाबानिनो
जोंनि सहायनांनाय जिउनि
मेगन थासेयावबो
जों सानैसोआ खाना
गोर्बो थासेयाव अन्थाइ बिखा
आखाइ दंब्लाबो बेंगुरा
आथिं दंब्लाबो लेंग्रा
खोमा थासेयावबो खोमानि फरदा फांथेनाय
आरोलाय बिसोर पेरेलाइसिस् जाबाय।
नाथाय जों जिराया
नोंसोरनि पेरेलाइसिसनि खुगा फेननायाव
जोंनि आथिंआ रुबायरोङा
जोंनि मोननांगौखौ मोनाब्ला
मानोना,
जोंहा दखरसे सायख्लुम गैया
मेंनाय सोलेरखौ दलरै दोननो।
जोंनि हब्रानाय गारामाया रानखांरोङा
रानखांरोङा,गर'दसे दैनि फुंखा गैयि।
आखाइ जोंनि खान्दा नङा
उदां अख्रां दांनो मोनियाव
मेगन जोंनि हाइपारमेट्रपिया नङा
थावनि मोनहैयियाव
खोमा जोंनि बेंगा नङा
फंसे सोदोब होयियाव
आरो जोंहा पेरेलाइसिस् जायाखै
बेराम साग्लोबदों नाथायबा
दलरै जिरायना थानो सुखुयै
सिरियै जुथे जना थानो हायै।
जों दावबायगोन दावबायथारगोन
जों होसोगोन होसोथारगोन
जों जिराया मानोना
थांखिया जोंनि लोरबां नङा
जोंनो उदांसो नांगौ।

आं बिदाय लाबाय
दिनैनि सानाव
नोंजों बिदाय लाबाय
आरो आं दाना रेबलिया
लांथिया खाखोरनो गस्ला फिनलिया
रेबगनखौ मोसाहोलिया
आं आरो आगर एरलिया
खाखोरफोरखौ समायहोलिया
गोरोन्थि जादोंब्ला
माबाफोर जादोंब्ला
थाथोंसै आं आरो रेबलिया

(1)
बिसायख'थिनि बार बांरबोहांलायगौ
राज्यो राजाया ओंखार बोलायगौ
खामानि दोनथ'नोसैलाय(सिगोन)
समखौ हगारहरनोसैलाय
गामि गामि मिटिं जागायहांलायगौ।
               (2)
जौ बेदरजों फोरजा बुथुमनाय
बिसायख'थिनि थाखाय दाहोना बुथुमनाय
लोंना दुम दाखाल
गामि गामि गोजोननि आंखाल
बिदा-फंबाय,बिफा-फिसा गावजों गावनो जुगुमलायनाय!

फागुननि बारजों लामब्र जानाय
बिफां-लाइफांनि गेजेरजों
नुहुरो आं नोंनि महर।
बैसागि सिख्लानि आखाइ खबजबनायाव
रोदोमफिननाय सोमखोर लाइफांनि बिलाइ
खोमथेयो नोंनि महर।
नुनो मोना जायो
नोंनि लाजिस्लु मिनिस्लुनाय।
गोसोआ उरां-फारां जायो
बैसागि सिख्लाजोंसो लोगोआव
रंजाफानो गोसो जायो
बुरै दैसानि ओरै फारैनि
सोमखोर जग्रबसे गामियाव।
बेनो गामि नोंनि
नोंनो आंनि अनजालि।

खोमसि साग्लोबदों आंनि देरायाव
खोमसि ! खोमसि !
जोमै गैया अख्रां सायाव
खोरोमाखै अखा,सौग्रावलायाखै जोमै
अखा हादों अखा !
आंनि देराया लोमसावदों
आंनि सिफोरा सिग्लाबदों !



फेसाया ब्लिं-ब्लिं गाबफैदों
दालाइ गोरानाव बाना
आंनि देरा फारसे नायहरदों।
आं दुखु मोन्दों
फेसानि नेरखांनायाव गोर्बोआ गाबखांदों
मा दायनि बिथायाव आंनि देरायाव।



फंबाय बिनानाव मोखां सोम सोम
जों गासै दुखु आरो साननायनि लैथोआव
जिउ दिङायानो गोदोहां गोदोहां
थांनायनि थि बिन्दोनि थावनियाव
मोनहैगोननि मिजिं होसोना गुमुर मोना।

दिनैनि सुदेम बिलियाव
आंनि मेगनाव नोंनि मुस्रि
नोंनिनो थार सायख्लुम
गोसोआ सुग्लाय मोन्दों
रंजाखांनाय मोन्दों।
थार सायख्लुम नोंनिनो
अराय हास्थायो मोखथां रेटिनायाव।
गावदां महर नोंनि
आंनि गोसो गोर्बोआव
उन सिगां नों
सान हर नों
अराय गोसो रेटिनायाव।
दिनैनि सुदेम बिलि
मा एसे समायदों
जोंगा मागा दखना-फास्राजों
सिखिरि बादि गावदां।
लाइतनि सोरांजों
मोदानसारदों गावदां महर
मिनिस्लु मिनिनाय समायसारदों।
नाथाय खोनायाखैसै रैसुमै गारां
अब्लाबो गोर्बोआ गोजोन्दों
नोंखौ नुनानै
बे बिलियाव।

सम सम मोदानो बिबारि फामे
सानजौफुनि गोरा सोरां रोदाजों
जोंथि-माथि दैनि गुथालजों
समाइयो हायनारियै आंनि बिखासे।


गुफुर उदांनि दुखारु दाउथु
फानजारिनि लामा मोनस' दाबो
बिरग्लांनायनि हाबिलाया जाफुंआखै दिनैबो
गोजोननि मिजिआं जोबथेजानाय सनालु।


हारि-माहारिनि हांगामायाव गोमालांनाय
खास्रि-बिस्रियै हां गोमानांनाय
जिउ बुलि दावहारुफोरा दाबोनो
सुथि मोनाखै जानांगौ अरायसेनो।


गोमो सिनि जाथाया दिनैबो
बारनि बुबथिंनायाव बिरनो हाख' जाबायदों
आरो सिदोब अखानि मेगन सानायजों
सुथि मोनाखै मुंख्लं जोहोलाउ-जोहालाउजो।

नों मानो एरलुदों
आखाय खेबलुहोलाङै
मानो इन्जुर खेबलुबदों?
देरबाय लावबाय सिख्ला देलों जाबाय
नांगौ मानि नोंना आइ आफा
होफैबाय गोजोनहोनो।
आरोलाय मानोथो फेखन
मा नांबांगौ नोंनोलाय?
मा नांबावगौ?
जानांगौ सिख्ला गोसोआ
सोरबा जोहोलावखौ गोसोखां
बोराबदों आथा-सिथा।
फैगोन दे सना
नों हांखुर दाजा
नोंनि सिदला आं गाहैगोन
संसार गान्थिखौ खाबोगोन।
दाबोराबसै सना
दा बोराबसै।

सान्दोंमोन आं
नोंनि खाफालाव
आंनि आखाइनि गोजा सिन्दुर
नुथारगोन होनना।
दिनै नुबाय
गैयानो माथो
आंनि हाबिलानि नेर्सोन।
सानबावदोंमोन
सोरबा अनजालिनि
रुइदुब आखाइनि बिबार लु
गानहोनो मोनगोन नोंनि गोरनायाव !
बेबो गैया माथो !

अन/जा/लि  /आं/नि
गो/सो  /रं/जा/लि  /नों/नि
आं  /बो/दोर  /बाव/लि।

"आंनि जिउ"
नख'रा निखाउरियाव गबनांनाय जोंहानि
मालायनाव हाजिरा खामला मावाब्लानो बोथिसेया रसा नांनाङो
रानथाब-सेरथाब उदैया गेसट्रिकजों बेंग्लिजायो



दख्लाबसे हा गैया आबादनि
खावख्लाबसे बिघा गैया फसलनि
दरलाबसे बे गंसे न'नि अनगा।



फंबाय-बिनानाव आरो बिमा बिफा
नख'रा गोगोम गेदेर-सुबुं अनजिमाजों
हाथा-हामा सामलायनायाव आफाया नख'रखौ।



गुबुननि आबाद-फसलाव खामला हाजिरा मावबायो
आंबो आफाजों उन उन आथा-सिथा मावफानाङो
हायिखौबो हानांगौ जाना फैयो।



हाग्रा सननाय,हाखर जावनाय,फाथो सुनाय,गिलिर गिलिर लाइफां-बिफां दैखोनाय
अब्लाबो थोआ मोननाय रांआ नख'राव।



दिनै गोजांनाय सम फैबाय
गाननाय गैया जोमनाय गैया आंनि मोदोमाव
आनजाद खाथियाव दं आं बिदिनो सहायना।



दा नुथोंल' बिनानाव फंबायनि गोजांजानाय
आंनि नैबे हाइपारमेट्रफियानि मेगन थाइनैया
ससम गानब्लाबो दानुथों बिसोरनि गोजांनाय।



गोजोननाय दं आंहा बिनानाव-फंबायनि खुसियाव
दाहा दं आंहा गोर्बो खनासेयाव
माब्लाबा मोनजाया सिबाय बोथिसे ओंखाम।



जानांनाय उन्दै समनि ओंखाम गैयियाव थासिमलि रुना
दाबो गाबखांङो आंहा बेफोर जेंनायाव
हालाय-हाफाय जानांनाय बिनानाव फंबाय।



गाबखांङो आं फंबाय गेदेरनि मोदैयाव
जेब्ला आं लोमजानायाव मोसौ फानग्लुंनायाव नों गाबखांदोंमोन
नख'रनि दोहोन आंबो खावसे बोजोबबायहम।



आरो आइनि सोलेरा खावथाम फोजोबबाय
दुखुआ आंहा बेयावनो बांसिन जाबोबाय
बिमानि थैज्रब सोलेराव,आं जेबो राहा हायियाव।



नाजानायनि फिथाइखौ आं मोनबाय
मेट्रिक पास जाबाय दिनै कलेज फरारबाय बिगियानाव
अब्लाबो आंहा एसेबो मिनिनो ओंखाराखै।



माखासे सुबुंनि आंखौ बाखोनायनाय आंहा खोमा साबाय
रागा जोंनो ओंखारग्रा जाबाय आंहा दिनै
बेखायनो दिनै आंखौ रावबो दा बाखोनायसै।

मैयानि सावगारि खास्रि बिस्रि
दिनैबो आंनि बिखाया
गाबखांदों।
रिंखांदों हब्रा हब्रा गाबख्रावनाय
आंनि खोमायाव दिनैबो
गोर्बो गोसोआ थेर बेथेर।
मानो आरो मा दायाव
मोननांखो आस'खान्दा जिउ संसार?
दाखालैसो फैदोंमोन
दान्दिसे बुहुमखौ नायस्रानो।
दिनैनो मानो थांनांफिनखो!
गैया माथो नुलांदियासै(नो)
बिमानि खुसिनि मिनिनाय
नुलांबायल' गाबखांनाय गोर्बोनि मोदै।

गोसो बिबार
थफियो बोथोराव समाव
गेवलाङो गोथार बार हुब्लिदनायजों समायना
मोदोमो अनथाव बोज'बथाव
हाबिला जोमैयाबो
बिरग्लांनो हाबिला जायो
उदां अख्रांनि बिखा नागिरना
उदाङै रंजा-मिनि बिरबायथिंनो।
थावरिनो हाया हाया मोनो
जोमै फाग्लाफोरनि साग्लोबनायाव।
दायो उदां अख्रांआव उदां गैया
दखरसे जोमैनि थाखाय
जेराव गैया गोजोननि जाख्रिसे अखा
गैया गोजोननि खुवा
दायो गोरलै फुलिफोरा रानज्रिंनो लादों
उखैनाय गांनाय सोलेरनि गाबख्रावनायजों।

हाथाइसालि बुहुम बिखायाव
खुग्लुंनाय हाद्रि-बालाजों
हमथेनांनाय गन्थं-खुगा,
जेराव बाग्लाबनो हागौ
गिलु-बालु बायदि बेराम ।
गावजों गावनो मिनिलायनाय
गोर्बोआव दाहानि थफला
मेगनाव मोदैनि मना,
जेराव गैया फाहामथाइनि सोदोब
जाउनाव,हाद्रि-बालाखौ फोजोबस्रांनो  
नांगौ जादों उदां गंसे अख्रां
जाख्रिसे अखा हाना सिदोब होनो ।
नाथाय नंङा-
एसिड अखा लाबोना आबाद फोजोबस्रांनायनि,
बे अख्रांआ हाद्रि-बालाखौ फोजोबस्रांनायनि
गंसे उदां अख्रांसो ।
जाय गिलु-बालु बेरामखौबो फोजोबस्रांगोन ।
बेखायनो नांथारगौ-
बै उदां गंसे अख्रांखौ
लामा हान्थिनायाव हमथेनांनाय नङा गन्थं-खुगा।

सोलेरा लंथं सुबुंस्रि गैयै
मिजिंफोरा गोथै सेवग्लेबनाय
मेगना जाखर गोजा गिथावना
देंखोफोरा खाब्रां बिखा खामथावना
रावफोरा खाथो सोदोब रिंखांहोनाय।
सिरियै गसंब्ला आथिंआ लोहो लोहो मावो
उन्दुयोब्ला सिमांआनो थैना गोग्लैयो
माब्ला एमब्रायो जिउ मैखुन।


देलाइस्रि देलाइबायो समायहोनो,
मोदोम गंसे मोदोमफ्रु सारफावनाय
सना गहेना गानफ'ब जोमफ'ब
अब्लाबो इसेबो सोलायरोङा।
सोदोमस्रि मुखा बेयावनो गोमायो
अन्थाइफोर हालो दैलो गेलेयो रंजायो।


सिदोबनाय हायाव गाजा हरनाय
फसलफोरा रानज्रिंओ गाबस्राव गाबस्राव
अखा रानो अख्रांआव,साग्लोबो खुवा
दाउफोरा बिरबोयो बाहायाव,हाबफैयो फलाननि फानजारियाव
फैसालि लामा आन्दायना हां हरगारो।

रमान्सनि गुवार लैथोआव
आं दिङा जावो
नोंनि गुमुर मोनना
रुगुं नागिरै नागिरै
सान-हर,सान्दुं-अखा सहायना
हान्थियो आं।
नोंनि लाजिस्लुयै मिनिनाय
लाजिबांसिन गंस्रिना रायज्लायनाय
बोदोर जायो आंहा।
नोंनि बे मेगन बेस्रां
जान्जि सेरे खावलाइ फावदुर
गन्थं जंज्रि आरो बे
गन्थं बिजौनि सबायबिमा
आरोलाइ खानाय रुम्बां।

रंजालि बैसागोखौ बरायनानै,
सिम,
      गिबियावनो बरायबाय गोदान बोसोर
रंजालि बैसागोखौ।
गोदान बोसोर रंजालि बैसागोनि
गाहाम हामलायनायखौ नोंनिसिम
आंनि गोसो गोर्बोनिफ्राय
गोथार मिजिंथिनायजों लोगोसेयै
जासिहरनाय थाबाय।
आफा बोराइ बाथौनियाव
हान्थुखराइयै आखाइ खबज'बै
आर'ज गाबो-
बे बोसोराव नोंनि जिउआ
खुसिजोंनो बाबेनलांथों।
नोंनि जिउआव अराय दुखु दाफैथों!
मिजिं थियो-
नों आरो नोंसिनि आइ-आफा आरो बिनानाव
गासैबो गाहामैनो दं।
लाइजामखौ नोंनिसिम दैथाइहरनायनि थांखिया बेनोदि-
गोदान बोसोरखौ बरायनायजों लोगोसे
नोंनिसिम गाहाम हामलारनारखौ जासिहरबाय।
एसेयावनो आंनि लोरबां आखाइनि
रेबगन हमनायखौ दोनथबाय।
मानोना दायो समनि आंखाल।
जोमनायाव लाइजामखौ दैथाइहरनायाव
आंहा गोरोन्थिफोर जादोंब्ला निमाहा बिनाय थाबाय।
आरो बेखौनो सिमान लायोदि
लाइजामनि रावफोरा-
इसेबो बिदै गोनां जायाखै।
मानोना आंहा-
लाइजाम लिरनायनि हुदा गैयामोन।
एसेयावनो गोजोन्थों
नोंनि साखाथियाव
बि दावगासार।

-------------------------------
नों जोनोम लाफैनाय हरनि उनफ्राव
सिरि मोनगोन बिसोरबो सानसे
खोमसि हरखौ साजायगोन फोर्बोसालि बादि
जोंथि माथि रिथि रिथा

खुगा मुथेरोंगोन गेब्रेंनाय बाराव
खोमा हमथेनो सोलोंगोन गेब्रेंनाय सोदोबाव
गोग्गो देहा दानो सोलोंगोन ।

फुसनि हराव निहिरनि सोदोबाव
सोंख्रावनाय सैमाफोरनि दावरावाव
उन्दुलांनो हाया जागोन

गोर्बोफोराव गाजा खिलिगोन
बोथोरनिनो हालामाव
देलों देलों देरनो नाजागोन
सोमखोर सोमखोर गसंख्रांगोन

निजोरा बादि बोहैबाय थाथों
स्राय-स्राय
नोंनि थार मोजां मोननायाबो
आंनि गोर्बो लैथोआव
बोहैबोना गोरोब फैथों।
नोंनि अननायनि बोहैनायावनो
थांनानै थाथों गोर्बो लैथो !
बोहैनो दाबाव नों
आं गोर्बो लैथोसिम।
दाहा थागोन
गोर्बो लैथोआ रानज्रिंगोन
अब्ला आं बुंस' रोंनाय नङा।
मानो आस'खान्दा समनि थाखायल'
आंनि गोर्बो लैथोसिम बोहैयामोन?