गोरासिन राफोदाया
हांना अराव
गलिबाय लाव-लाव
फुवारना दोननाय
गोदान टेकन'ल'जिनि जलंगायाव
गोदान महर लाबाय।
नाथाय दा मा मुं दोननो?
गोसोआव फैया
गिलुं गोसोआ फैयोब्लाबो
दिनै गिदोंसै गोदानै मुं होनो
सोरखौ सोर फोथायनो हानो
दिनै फोथाइनायनि दाहा
सोरदि बेसेबां रुजुनख' हायै रुजुननांखो।
बेखायनो गिखांदों आं
गोरासिन राफोदायनि
गोदान मुं होनो
बेयावनो आं थादवाखै अब्लाबो
सिरि सिरि नागिरखुमादों
सिब्बा सिं गान्दु सिं आं नागिरदों
सिमां-मोखथां नायदिंदों।
मोन्दोंमोनबो ,
आरांगा सायाव
थगायसुलानि साव
दोननोबो सान्दोंमोन
बे थिफुदला राफोदायनि
गावनि गुस्लाइरोंयैनि दुगानायाव।
दिनै गुस्लाइना मा जाखो
हांगारखौनो जाबाय बुंब्लाबोथ'
बुंद्रायदोंनि सोदोब फैया।

मिनिस्लुयो लाजिस्लुयै
आंखौ बोदोर खालामो
जिउ सानस्रिया सिरि मोनो
लाबोयो मानिबा खराग
आंनिनो गोर्बो इसिंआव।


हाबिलानि आबाद-फसलाव
लाबोयो सिदोब अखा
सोमखे जोमैखौ सिंखावबोना
सोमखोर रजहोयो जोलै बेगर
दुखारु गोसोखौ गोजोनग्लाय होयो।


निजोम हरनि एमाव
जंखायफैयो महर साया-माया
निन खोमायो आंनि मेगनाव
लाबोयो दावगालु खबामजों
दावगानायनि सिरिसे मेथाइ।


फुंबिलिनि खोमसियाव
दखना-फाइलिजों स्राय सोमखोर गोलाव खानाय
मोसायो आंखौ एमनिफ्राय बोखाङो
मोखां स्रुस्रानायनि उनावनो
नों आंखौ नागारना आन्दोआव थाखुमायो
लाजिगुसु रजे नों।


सानजौफुनि गोरा सोरां रोदाया
आंनि नोजोराव हेंथा होयो
नोंनि थाइनै मेगनखौ नोजोर थिनो
बेखौनो नों सानोब्ला,नोंखौ नेवसिनाय
आंनि गोर्बोआसो लैथोआव थब्लना जाखांरोंनाय नङा
सिमांफोरा फासि नांना थैना ओलैस्रो गोग्लैसोगोन।


मोनाबिलिनि समायसारनाय सान जारां रोदा
नोंनि दखना-फास्रा मोदानो आंनि मेगनाव
अब्लाना मेगनजों मेगन सौग्रावलायो
बेयावनो लाजिनायनि सावगारि बोयो
गाबखौ सानैबो फुनो समायना
मोनाबिलि सिख्ला मिनियो जंखायना।

आं आलासि साननैनि
आंनो हो जिरायथ'नो
दखरसेल' जायगा।
बेयोलाय माबोरै !
आंखौ हो थब्ल'नो
सानस्रिनि लैथोआव
आंखौ मोसाहोनो हो
फिसा रेबगन
खाखोरनो समायहोनो।
नंङालायनो!!
आंनि बुंनाया !
सोरजिगिरि !!
मायाथिलि !!!

सिरि मोनग्रो मोना
मोखां सुनाय सिगांनो
बाज्ल'-बाज्ल' थाबायबोयो
माखासे सानस्रि
गोजावबोयो सानबोलावरि लैथोआव
जिउनि रानखांनाय सोलेरनो
गथायनो बिदैनि फिथिखा।

मोदैनि मोदाननायजों मेगना
साया माया नुहुरबावो
खारलिंनाय थैसाम दुब्रि हाग्रानि
गारबोनाय माखासे बोसोर आरो दानि।


सिगुननि गुन्थुथ्रि आंनि रेटिनायाव
रानज्रिंनाय दालाइ गोरान बिफांआव
ख्लां-ख्लां मेगना जोंखोल
गिखांदों सोलेरा गोजांस्रिवदों।


गाब्रु खुन्दानि सल'आ
आंनि गोर्बो इसिंआव हाबखुमा फैदों
नागिरलांनो गोसो जादों
थैनाय बै सोलेखौ।


गोसोआव फैदों बावस्रोम दायो
फरायबोनाय उन्दै समनि
बर'नि बिर-जोहोलाउ-जोहोलाउजो
थानायमोनब्ला दिनैबो
उजिफैफिननायमोनब्ला दाबो!


गोसोआव फैदों बावस्रोम दायो
फरायबोनाय उन्दै समनि
बर'नि बिर-जोहोलाउ-जोहोलाउजो
थानायमोनब्ला दिनैबो
उजिफैफिननायमोनब्ला दाबो!


अनलायनो रोङै हारिया
साग्रिद नङै माहारिया
गोमाजानांदों राज्यो माब्लाबानो
जुजिफिनदों दिनै गोदानै सोरजिनो
नाथाय सोरबाय गैया।

दायो बिफां रानज्रिंदों
दालाय गोरानाव बादों
दाउखा सिला-सिगुन गुगा ब्लां ब्लां
मेगन फेदेरना ख्लां ख्लां


दैसा सेरनि आगानफोरा
देरबोनाय दैनि बोहैनायजों
लासै लासै गोमोरबोदों
सुबुंनि आगन दायो हमनो हाया।


सानजौफुनि खाब्रां सोरां रोदाया
मेगनाव गोग्लैना आन्दायबायदों
साखाथिनि माय नारायाबो सेरेम लांदों
गुमाफोरा बिरबायना हमजादों
जिउ मोनसेयाव बेयावनो थुंगेबाय
बाथा गोरानफोराव अर नांबाय
लांदां जाबाय फारि फारि खामना।


सोदोब मोन्थाव जेबा खनदों
जोमैफोरा बेयावनो गोसारदों
अन्थाइफोरा गोरा जासिनबाय
दाउथुआ बेयावनो बाब्राबबाय
अर जोंब्लावबाय अरदाबाव दायो
फ्रि-फ्रि अखाया खोमोरनो हायाखै दाबो।

सान मोखांआरि राजालामा जाना
ओंखारबो नों उखुमब्रि जाना
अननाय बिलाइफै नों सना
गोदान मिजिंनि हाबिला लाना
उखैहाब खाखोरफोरनो जामुं गथाइफै
जारौ मिनिनाय मोखांआव लानानै होफै
आंहाबो हाबिला दंमोन गोर्बोआ
बिदुं आरो सोरां होनो
लाथा खानाय बरफ आरो दैसानो
फेलेंनि लैथो रुगुंआव
आं दिनै गबहां गबहां
सोरबा नारसोमहरब्लानो आं गबबाय
बेखायनो नोंखौ खावलायबाय
सान नङा उखुमब्रि जानाब्लाबो
फैदो नों खोमसि खथायाव
लुफावफैदो दान्दिसे सोरां।

बैसागोनि बरायलु बारजों
बर' आइजोफोरा मोसाफादों
नै !
_समायना-रमायना दखना गानना
हायलालाय-हुइलालाय बागुरुम्बा ।
-
बर' हौवाफोराबोसो नै जोंनि
खाम-सिफुं-जथा-थरखा दामदों
मिलौहाब देंखोनि खबाम रिंहोदों
बर'नि हारिमु बेसेदि समायदों
गोमोथाव हारिमु बेनो लोगो बर'नि।
-
आबै लामब्रेयाबोसो नै
मोदोम दैखोनो हायिखौ लानानैबो
_साफ्रे-सुफ्रे हनै!
गावनि आंगो हारिमुआव दिनै
बेखौसो आं गोमोसिन्दों लोगो।
-
नै लोगो आरोबाव-
आबौ गबदामोननि खाम दामनाय
हां थिफुं-थिफुं सिफुं सुनाय
गैथारलिया गावसोरनो
बारग'लांसै सोलेरानो
अब्लाबो लोगो नुदों बिसोरखौ
रंजादों मालाय गोसो होफ्रानानै
दिन्थिदों गावनि आंगो हारिमुखौ।
-
आरोबाव नायबावलाय लोगो
नायबाव नै हारिमु फोथाराव
बिहामजो आफादनिल' ग्रोम ग्रोम
जोंलाय मानोथो सिरि निजोम
_लोगो नुबाय
जोंहादि गैया बेयाव जायगा
ओंखारनाङासै जों बिदियाव?
गुबुनखौ मा बुंनो लोगो
नै आंबो उदायरोङा।
देलागब नायदोंल' लोगो।
रोङा होनानै थायोब्ला
जेबो उदिस लायाब्ला
जोबलांगोन सानसे जोबलांगोन।
_आं रोङाबालाय
थिननांआ गुबुनखौ?
उन्दैफोरनो खिन्थागोन
रेक'र्दिं खालाम खालाम
बेखौनो नायना सोलोंगोन।
बयबो सिनायगोन जोंखौ।।
-
आगै रुमबांमोनहा रोंब्ला
फंबाय राखेबमोनहा सोलोंब्ला
बेसे गोजोनगोन
आबै-आबौमोनहा,
बुंस'नोनो हानाय नङागोन!!
-
गोदोनाय हारिमुआ सिरि मोनगोन
गोमानाय देंखोआ रिंखांदाव फैगोन!
बैसागि सिख्लाया रंजाखांगोन
बर' गामिया समाय सारगोन!!

आं दिनै उजिफैजानो लुबैयो
बैसोर अगेन दुथांफोरनि थाखाय
जायफोरा मुलुग अख्रांव
जोमै साग्लोबहोदों सोमखे जोमै
जायफोर मुलुग लैथोआव
गाफुंना गुबुंले जाहोदों
जायफोर मुलुग लामायाव
हाखर ब्रे ब्रे खालामदों
जायफोर अन्थाइ बिखा
जायफोर मेगन गोसा
जायफोर थगाय सुला
बैसोरनि थाखाय उजिफै
गोहोगोरा सुबुंस्रि थान्दै
गसंफै सैथोनि रेबगन
लिरथिफै गुफुर खाखोराव
बारहुंखानि मेथाइ
बुखारलांथों हाद्रि-बाला।

सिखोला बैसो नोंनि
खानाइ रुम्बां,मेगन बेस्रां,जाहाबनाय खावलाइ
नों मिथियाखै ? सना नों मिथियाखैना?
नै जों सानैनि रादायनि गान्थि
गेवनायनि सम फैबाय सना, सम फैबाय।
आइ-आफाया हाबिला जाबाय
नोंखौ नायनो हांखुर जाबाय।
नों बावबाय नामा सना
नों बावबाय नामा ?
बुरै दैसायानो साखिथार
दावब' फालोआबो खाना नंथारा।
फोलानो सान्दों नामा नों सना
फोलानो सान्दों ?
उखुमब्रियाबो जोंखौ नायना मिनिदोंमोन
हाथर्खि-अलंबारफोराबो जंखायहरदोंमोन
नों बावबाय नामा सना ?
__नों बावबाय !
बावगोमोना दंब्ला गोसो खांफिन
हानहरफिन आखाइ फोलावना
नायफिन अख्रां सायाव
जिरायहैफिन बुरै थैसानि हाब्रांआव
खिन्थागोन फारि फारि
गोसोआव नुजाफैगोन।
थांदो गोख्रै थांदो
समा फैबाय सना,सम फैबाय।
रादाइखौ फेलें दाखालाम
मेगनाव निजोरा दालाबो
जोंखोल मोखांखौ सोमखे दाखालाम।
फैदो सना फैदो
आंनि देरानि दरखंआव गसंफैदो।

हाब्रां गिसिगादों
नों मानो बेयाव गसंदों?
नुवाखै नामा नों
मानो एसे सानासै?
नोंहा रावबो गैयाना?
मानो गैया जानो?
दं; दंथारो?