जिउ अन्नायजोँ बुंफबनाय
जेराव बेसेबा सोरां
साननि गोजोँ मिनिनाय बायदि
जाय गुबुनखौ गावखौ बायदि सानो
.
जिउखौ बिखायाव बजबो
गुबुनखौ आंगो बिलिर बिलिर
बेनो जिउ गोजोँ आलारि
दुखुआव जाय खुसिखौ लाबोयो
.
जाय सोरनिबा थखन जायो
आन्दायनाय जिउनि फैसालियाव
जिउ दिङाखौ बारहोनो बैथा थुयो
बेयो गोगो मानसि
.
जाय गियान गोनां
जाय गियानखौ होयो
बियो सोर्गोखौ सोरजियो
सुबुंनि मोनसे गोरबोआव
.
गोथार बोसोनजोँ
जाय दैबायो गोबां गोरबो
गोरबोनि गोगो बारजोँ
गोरबोआव थायो सोर्गो

आं गोसो जायो
जिबौ फिथिगम जानानै
एखमबा बिखौ सौथारहैनो,
बिनि जिउखौ ग्लब मननो।
आं गोसो जायो
ददेरे ददेरे बिनि लाइमोन सोलेरखौ
बेन्दोँ जानानै फानफ्रेना लानो,
गोरबो हासुंआव माथेना लानो।
आं बिखौ मोजां मोनो
ओरैबायदि मोजां मोनोदि
आं बिखौ आंनि जिउ खालामथारगौ,
एबा आं बिखौ आंनि हां सानथारो।
सिबाय दुखु जायो गावनो गाव
अख्रां जानो हाया आं
बार जानो हाया आं
दै जानो हाया।
हा जानो हाया
आं अर जानो हाया
गोसोबायदि गोसो जानो हाया आं।

अखा बेबादिनो हाबाय था नोङो
बुहुम मिथिँगाया देलाइदोँ दुगैनानै
मुलुगनि मैलाखौ सुस्रां नोङो
अखा बेबादिनो हाबाय था नोङो
दाखोरखौ फोजावनो दैबाना लाबो नोङो
द्राम द्राम आरोबाव हानानै
अखा बेबादिनो हाबाय था नोङो
बुहुम मिथिँगाया देलाइदोँ दुगैनानै

मानास हाग्रामा सेर
दैसा रुगुंआव ओलैस्रो
दिदोम गसंना नायहरदों
दान्दिसे गोमोहाबना आं

लासैयै मोनहैब्ला साखाथि
सोलेरा समाइना आगरनि दखनाजों फांथेनाय
आरो आं "सोर" साननाङासै
खानाइ गोलाव मा हारि ?

खिन्थाबाय आंनो।

नाथाय साननांगौआ---
दायोसो देबोर नांदों---
बे हालोदनि, बे थासारिनि
जाथायनि थं गैया
सोरनि अगेन आखु
हाख'आखै बिजिरना संदाननो
अब्लाबो बुब्लिया सोंनो खावलायो आंनि गोसोआव

बिसोर नङाथ' ?
बैसोर नङाथ' ?

नङाबालाय सोरथो जानो ?

साननो गोनाङा बेबो---
सोलेराव नांनाय जेबो दागोयानो गैया

जानोहागौ जोंनि सुथुर---
जिनाहारि जुनार आखुजों
बेसेदि खास्रि बिस्रि !

बेखौ सानफ्रांनायाव सोलेरा गोजांस्रिव
मोदोमनि खोमोनफोर गसंख्राङो
मोन्थाइखौ सेख'ना लानो
गोसोआ खुन्द्रि खाङो।

बेफोर हालोदखौ नुनाब्लाबो
मानोदि गोर्बोआ अन्थाइ ??
मोन्थाइजों जुजिनाय उनफिननाय,सिगांनायनि उल्थायै।

बेसेदि मान हुखोमोरदों
"जोंनि बिमा हारिनि"

गावजों गाव दुसिलायनायावसो----
"गावजों-गाव मोसा"।

सहायबावनांगोन बेबादिनो इयुनाव
आरो नायबावनांगोन बेनिख्रुइ खास्रि-बिस्रि
सांग्रां नङाब्ला इयुननि नोजोराव।

मोननांगौआनो देरसिन मोन्थाइ
बेखौ खोमाना लानायानो पाप
पापआनो फोजोबस्रांलांनाय।

स'नानि मासि नोजोरथिनायाव
हारि-हादरखौ फानोब्ला
निमाहा होनायनि सम गैलिया

राज्योआ आखाइ सोमावोब्ला निजोरा बोहैयो
राज्योनि मोन्थाइखौ दाफान खर' गिदिरफोर
राज्योनि गेजेराव अर जोंखाङोब्ला---
खामब्लाबलांगोन नोंनि मासि
हांगारनिफ्राय-हाथफ्लासिम
इयुनाव आरो मोनफिननाय नङा।
खानाइ गोलावनि नुथाइयावनो
सानहोयो दिनै बयखौबो
बेयाव साननो रोङिया---
थाबावगोन जुनारनिख्रुइ जुनार आखुनि आरो मा ??

दिनैसो नोँखौ लोगो मोनदोँ
नाथाय माब्लानिफ्रायनो
बेसेबा मोजां मोनदोँ
बेखौ आं बेखेवनो हालिया
.
सैनाय
सिमांनि बाथ्राखौ फोरमायना
दुखु होनो साना आं
सिमांआ सिमाङैनो थाथोँ
.
मोकथांनि बाथ्रासो
मोजां मोन्नाया
नोँखौ लोगो मोन्नाया
बेबादिनो मोकथांआव नागिरो
.
दिनै जोँ रादाय खानि
नोँनि थाखाय आं
आरो आंनि थाखाय नोँ
जोँ थांनानै थालायनि
.
सना बाथ्राया बेनो
जोँनि जिउ मोनसे
गोथार मोजां मोनलायनायनि
नोँबो फै आंबो थांगोन
.
आंनि दुखुयाव फै
नोँनि उखैनायाव आं थांगोन
जिउ मोनसे बेबादिनो
जोँ गोजोनै थागोन

गोजोन आरो बेसेबा खुसिजोँ
आं जेब्ला उन्दुलाङो
बावगारलाङो आं खुसिजोँ-
गोजाम दुखु-दाहाखौ खोमालाङो
.
गोदानै सिमां नुयो
बेसेबा खुसिजोँ
मुलुगखौ गोबानानै
मुलुगनि गासैखौबो आंगोजोँ
.
आं जेब्ला उन्दुलाङो
मिथिँगानो होलांगोन खुसि
आंनि सोलेराव जेरै-
बिसोरनि अराय खुसिया बिलिरो
.
थागोन मुलुगनि गोरबोआव
मोनसे थाजिम थुलुंगा जानानै
आंनि गोरबो गासै
बिसोरनो आंगो जिउ होना

मोजां मोनो होननानैनो
सना जिउ ददेरे
बेबादिनो बेसेबा बाखोनायो
रंगिना संगिना होननानै
.
मेगन बेस्रां
जानजि सेरेरे सैनाय
जोनोम जोनोमनि नोङो
बेसेबां अनो जिउ नोँखौ
.
थांना थानाय जिउ मोनसे
एबा जोनोम मोनसेयाव
नोँखौ बेसेबांदि हास्थायो
गोथार गोरबोजोँ गोरबो
.
अब्लाबो
नोँ आंखौ सोगाबो
आंखौ जंखायो नोङो
सनालै बेबादिनोथार नोङो

फै आंजोँ मोनाबिलियाव
आबिर गाबनि गोरबोजोँ
बेबादि आं लेँहराखै
ओरैबादिसो बुंदोँ-
रजे नोङो गोजोनैनो था
.
आंखौ दाबोराब
मानोना खबाम दोरोददोँ जिउ
नोँनि आंनिनो दिनैसिम
जुलिनि ललिनायखौ
आंबो खोनायो रजे
.
फैमाल नङा
नोँनि आंनि मेथाया
बै गाथोनाव जोँ रोजाबनाय
आखायखौ आखायाव होनानै
गोरबोजोँ गोरबो---
.
बेसेबा मिजिँ आंहा
बिफां-लाइफांफोरबादि
दैसा निजोराफोरबादि
नोँनिनो अरायबो गोरबोआव
.
गुसुथियाव आल्टा फुन्नानै
मिनिखैरो मिनिस्लुयै था
मोखां आरो गोरबोआव
जिनिरखौ मानो लानो
मिथिँगाजोँ अरायबो लोगोसे

दुंबुर साननि बिलिरनाय
रैसुमै बारनाय बारजोँ
बिलिरदोँ सुदेम
सुदेम आंनि सोलेराव
.
बेसे गोजोन
रैसुमै दाउनि मेथायाव
बिफांनि गोरलै गोरलै बिलाइ
रोजाबदोँ दाउसिन बायदि गारांआव
.
आं गोमोहाबो
गोदान जाबोबाय मिथिँगा
रंगिना समायना जेरैबो
नायनो बेसेबा मुहिनां
.
सोमखोर मोकथां
निला अख्रांआव
फुरसब जोमै माखा
बिरबायदोँ मानसि लांखार
बेसेबा खुसि बे समाव

लामाया हाद्रि जायोब्ला
अखा जाना नोङो फै
थिँ थिँ सान्दुं जायोब्ला
बार नोङो फै लामायाव
.
गोसोनि देँखो बोनानै
मुलुगनि गारां हगारनानै
बेबादिनो जोँ थाबाय लांगोन
थांना थानायनि खबाम गानानै
.
थांना थागोन सैथोबादि
दिनै दुखु गाबोन सुखुजोँ
बारहो हरगोन खोमसिखौ
फिन सोरांखौ हांख्रायनानै
.
सोरजिगिरि मुंखौ लानानै
गोथार सिबिनायजोँ
बेबादिनो जोँ थाबाय लांगोन
गोथार गोरबो गोगो गोसोजोँ
.
संसारनि मैया मैया
जिउनि मोकथां मिथिनायजोँ
मुलुगखौ बेबादिनो अनगोन
जोँ बयबो बेबादिनो साननांगोन
.
समायना मोकथांनि महरजोँ
गोरबोखौ गुवारै फुवारगोन
गोथौ सानस्रिनि गोथौ लैथोजोँ
जोँ बयबो लोहाबनांगोन
.
जोँ मुलुगनि दावबायारि
गोथार बिजिरगिरि जानानै
गोसोखौ गोजोन खालामगोन
बेबादिनो जोँ थाबाय लांगोन
.
जोनोम बेनो मोकथांनि
गाबनाय आरो मिनिनायजोँ
बेबादिनो गेलेयो जोँ दान्दिसे
नोँ आंनिनो आंगो सान्नायजोँ।