आं मानो रंजादोँ दिनै?
गोरबोआव रादाब जाखांदोँ-
मिथिँगानि गोदान बार नांनानै
मिथिया मिथिँगाया गुस्लायनायखाय?
अब्लाबो बुङो समायना, जेरैबो हाद्रि
बिफांनि बिलाइयाव दाउसिन गाबोब्ला
जोमै अख्रांनि ज्रय ज्रय मोदैया
नुहोयो नायनो इनायनो हायना,
जेब्ला मुलुगाव हाद्रिया गोग्लै सोयो।
आं मानो रंजादोँ दिनै?
बेल' नङा मिथिँगानि देलायनाय
सोमखोर मुलुगा मिनिस्रांब्ला
जोँ मोजां मोनहाबो संसारखौ,
जोमै अख्रांनि मोदैया बोहैब्ला।

नोँ आंनि समखौ खोमाबाय
आंनि सोलेर आंनि गोरबो गोबाख्रबबाय,
आंनि सान्दांथि आंनि गासै-
नोँ आंनि समखौ खोमाबाय,
आंनि गोरबो बोहाबबाय।

बिग्राय दानि मेथाइया रिँफैयो
मुहिहाबो जेखाय थुनिया दाउनि मुसुरनाय;
मिथिँगानि फैलाव फोथाराव
(बिफां-लाइफां जिबि-जिराद
दाउसिन दाउलानि गासैबो दुब्लि)
जारां जोँमानि मिनिस्लु हरनाया
गोदो हाबो आंनि लाजिस्लु गोजोन्नाया।
जोँमानि रिफिनाय आंनि इन्जुराव
समायनायै सिरि सिरि बिबारफोरा
लामा नायदोँ सिखिरिखौ,
समायनायै दाउसिनफोरा देँखो हगारदोँ
अब्लाबो रिँफैयो बिग्राय दानि मेथाइया
(नेथ' जारां सान दान्दिसे
.......दसे नेथ')
खोमसिया साग्लोबफैब्ला सानसुनि उनाव
दाउसिना बिरलांगोन बासायाव
लह्रायलांगोन बिबारनि गोसोआ।

बिदिन्थानि हाथासि मेगनाव
आं खोनायाखै रैसुमै,
नोँनि मिनिनायनि रिँनाय;
हरनि सोरांआव मोब्लिबगासे
बे हरा गोबादोँ दाबि अन्नायजोँ-
बेयो आंखौ गोबाख्रबदोँसो
जाय आं हां गहां।
अराय मेँग्लिदोँ अराय।

जोबाखै रिँनाया होख्रावनायनि
बेयो हाद्रिनि मुलुगावसो;
सोगोमाखै सिदोमा जोमैया,
ओँखारदोँ सुथुरनि रागायावसो
नाथाय सोरनि जादोँ बहा सैथोआ?

बियो सिरियैनो गिदिँफिनबाय
नाथाय मा रादाबमोन बिनि
- सोरनि?
मिथिँगाया सोलायदोँ बेबादिनो।

आं आंनि गोरोन्थि नङा
आं आंनि सुथुरबो नङा,
आं आरो आं
आंहा मिजिँ दं
आंनो आंनि लामा
जेराव आं लामायावनो दं।
आं सोलोँदोँ सैथोआ मा?
आं मिथिगौ आं आरो सोर?
आं आरो आं
आंनो आं
सेँग्रा नङा अन्थाइ महरनि
गोसो गैया गोरान बिलाइनि,
बेँगा नङा जायनि राव खोनाया
खाना नङा जेखौ आं नुआ
नाथाय आं दाबो जाम्बा,
आं सोलोँदोँ सैथोआ मा?

बुंथि बायदोँ सुबुंनो
नाथाय बहा फोथायनो सल'खौ?
आवनायनायसो जादोँ खन्थाइया
बाहां बिरहां ओरैनो थादोँ गहेना
दिन्दां फादां खबामफ्रा?

(जोँ नोँखौ गोसो खाङो
फै जोँखौ फोरोँफै खुसियै।)

दिनै फिसाफोरा आन्दायनानै
लेम्प साथि नागिरदोँ सोरांआव,
खावलायो दिनै गथ'फोरा
फैफिन गुरुदेब खेबसे आरोबाव,
नै गुरुदेब ब्रह्म आफा!
फोरोँगुरु नोँ घोरोम आरो
सोलोँथाइ, राजखान्थि, रांखान्थि
जौगानाय हारिनि सोदोमस्रि सिनायथि।
बाखनायथाव आरोबाव गले गले
खौसेथि आरो जौगाथायनि
नोँनि हारिनि होनाय मोनफ्रोम दलिलफ्रा।
फोरोँनाय खौसेथि, अनसायनाय आरो
गासैबो समानथाइ,
मिथिँगा घोरोम गोथार सिबिनाय।
नै गुरुदेब ब्रह्म गुरु!
नायहर जोँनि आखाय खबजबनायखौ
बावाखै नोँनि फोरोँनाय आयदाखौ,
नायहर जोँनि आगान लामाखौ।
नै गुरुदेब सोरांहर नोँ आफा!
बर'नि थरसे गिदिरथार सोरां
जोँनाय अलंबार जानानै।
दिनै फिसाफोरा आन्दायनानै
लेम्प साथि नागिरदोँ सोरांआव,
सुबुंफ्रा जाबाय आरोबाव गोदोनाय
बावगारबाय बयनिबो समानथायखौ।
नै गुरुदेब ब्रह्म आफा!
खावलायो दिनै गथ'फोरा
फैफिन गुरुदेब खेबसे आरोबाव।
नै सिबिजाथाव गेदेमा गुरुदेब!
जोँ नोँखौ गोसो खाङो
फै जोँखौ फोरोँफै खुसियै।

बर'फोर, जोँ दिनै दावगाबाय
जोँ दिनै खौसेथि साजायबाय
फै सिबिनि जोहोलाव-
आलारि फोजोँना मान होनि
जोबोद अनसायनायजोँ मान बावनि
गुरुदेब, बर'फा, आरो
आवलुरि बर' बिमानि फिसा
जोहोलाव सोमदोन, दैमालु
मुगानि थान्दै बिनेस्वर
जोहोलाव नीलु आरो जोहोलावजो
बिरगोस्रि, गाम्बारि, थिँफाख्रि आरोबाव
मुंख्लं आगोमा जोहोलाव- जोफोरनो
बारसे बिबार, आलारि फोजोँनि।
जोँनि अख्रांआव थाथोँ खुसियै
जोँनि हाबायाव सोरां होनानै,
जोँनि बाथौ गुदियाव
जोँनि मन्दिर सालियाव
जोँनि गिर्जा सालियाव।
गुरुदेबा जोँनो लामा होबाय
बर'फाया जोँखौ खौसेयै दैबाय
मिनिस्लु दान्दिसे नोँसोरनि मिनिनाय
नाथाय अखा मोफ्लामगासे जिउ।
आवगाय नांगोन दिनै गावस्राया
ज' ज' ग्रिद ग्रिद
माखा माखा हानजा हानजा
सैथो आरो बिजिरनाय आगानजोँ
ब्रह्म, बाथौ, खृष्टान आरो
गोबां जोँ बर' आनो।
जोँ गोसोआव लानांगोन
उदांस्रियानो जोँनि गासैनिबो मोनसे गिदिरथार
जुदि जोँ हारि माहारि जिउ दंङब्ला
बर'फोर, जोँ दिनै खौसे जाबाय।

आंनि सान्दांथि बिजिरथि
आंनि बेखेवथि फोरमायथि
आंदि मिथिगौ बेनो बिदिन्थि
आं बावनो हायाखै दिन्थिथि
आं सानबाय जिउ जोबलांथोँसै खेबसे
आं नेवसिलिया नोँखौ बेयो फोरमायथि।

मालायजोँ मुगैजानाय
जेरावबो- जेरैबो गोग्लैसोनानै थानाय,
बोखां हादोँ गुरुदेब नोँ हारिखौ,
दुलाराय बर' फिसाफोरखौ।
हारिनि जेँनाफोरखौ सुस्रांनानै
आन्दायनाय हारिनो सोरां होआब्ला
जौगानाय लामायाव दैबायाब्ला
सिनायथिनि मुस्रियाव आगान सुरनो
हानाय नङा अरायबो।
बेयो नोँनि गासैबो गुदि,
घोरोमारि, रांखान्थि, राजखान्थि
बायदि बायदि सोलोँथाइ बिथिँ
गासैबो बर'नि जेँना नोँ सुस्रांगिरि।

जेब्ला घड़िनि समा गोग्लैयो
कलेज फारसे आं आगान सुरो,
जेब्लाबो सहरनि गोमफबनाय सोदोब
लामायाव मटरनि होँगो दोँगो बेल।

जेब्ला फेलेँनि खोथाखौ सानो
मोदै बोहैबोयो मेगनाव,
सौग्राव फैयो आंनि बिखायाव
हाजोनि दाहारजोँ दुद्रुनाय अन्थाइफ्रा।

दै दै दै दै दै
बुहुम ब्रै बाहागोनि थाम दै,
दै दै दै दै दै
दैयानो जादोँ जिबिनि जिउ खान्थै;
दै दै दै दै दै
जेब्ला सोलेरा गोरान जायो
जेब्ला गारमा फिसिनो ख्लां ख्लां गाङो
नांगौ अब्ला आंनो गर'दसे दै।
दै दै दै दै दै
जेरैबो- जेरावबो दै, दै;
अखा महरै दै
खफ' महरै दै
बिफांनिफ्राय- बिलाइनिफ्राय
हाजोआव हायेनाव
बिलो- निजोरा- जाम्फै
हा- अख्रां- अर जेरावबो दै।

नाथाय दै नोँखौ लानानै दुखु
नोँखौ लानानैनो सुखु
जिँगा- दाहा- हाथास,
आंनि गामियाव मेसेँ बोथोर
फैयो फाला बदल दैज्लां मेसेँ,
मेसेँ बोथोराव दैनि आंखाल
दैज्लां बोथोराव बाना,
आग्लाय- बिग्लाय लोमसावनाय,
फैयो अखा महरै
लैथो, बिलो, दैसा उसिनानै
हाखर- हाला बुंहोनानै
खालामो हुलुं- हुथुं अन्नाय गैयै।
नाथाय नोँ अराय अनसुलाबो।
दै दै दै दै दै
मोनसेल' सोदोब रैसुमै गोदै
हाइड्रजेन आरो अक्सिजेन गलायनाय
सानफ्रोमबो नांनाय लाव लाव दै।