फै आंजोँ मोनाबिलियाव
आबिर गाबनि गोरबोजोँ
बेबादि आं लेँहराखै
ओरैबादिसो बुंदोँ-
रजे नोङो गोजोनैनो था
.
आंखौ दाबोराब
मानोना खबाम दोरोददोँ जिउ
नोँनि आंनिनो दिनैसिम
जुलिनि ललिनायखौ
आंबो खोनायो रजे
.
फैमाल नङा
नोँनि आंनि मेथाया
बै गाथोनाव जोँ रोजाबनाय
आखायखौ आखायाव होनानै
गोरबोजोँ गोरबो---
.
बेसेबा मिजिँ आंहा
बिफां-लाइफांफोरबादि
दैसा निजोराफोरबादि
नोँनिनो अरायबो गोरबोआव
.
गुसुथियाव आल्टा फुन्नानै
मिनिखैरो मिनिस्लुयै था
मोखां आरो गोरबोआव
जिनिरखौ मानो लानो
मिथिँगाजोँ अरायबो लोगोसे

लामाया हाद्रि जायोब्ला
अखा जाना नोङो फै
थिँ थिँ सान्दुं जायोब्ला
बार नोङो फै लामायाव
.
गोसोनि देँखो बोनानै
मुलुगनि गारां हगारनानै
बेबादिनो जोँ थाबाय लांगोन
थांना थानायनि खबाम गानानै
.
थांना थागोन सैथोबादि
दिनै दुखु गाबोन सुखुजोँ
बारहो हरगोन खोमसिखौ
फिन सोरांखौ हांख्रायनानै
.
सोरजिगिरि मुंखौ लानानै
गोथार सिबिनायजोँ
बेबादिनो जोँ थाबाय लांगोन
गोथार गोरबो गोगो गोसोजोँ
.
संसारनि मैया मैया
जिउनि मोकथां मिथिनायजोँ
मुलुगखौ बेबादिनो अनगोन
जोँ बयबो बेबादिनो साननांगोन
.
समायना मोकथांनि महरजोँ
गोरबोखौ गुवारै फुवारगोन
गोथौ सानस्रिनि गोथौ लैथोजोँ
जोँ बयबो लोहाबनांगोन
.
जोँ मुलुगनि दावबायारि
गोथार बिजिरगिरि जानानै
गोसोखौ गोजोन खालामगोन
बेबादिनो जोँ थाबाय लांगोन
.
जोनोम बेनो मोकथांनि
गाबनाय आरो मिनिनायजोँ
बेबादिनो गेलेयो जोँ दान्दिसे
नोँ आंनिनो आंगो सान्नायजोँ।

थिँ थिँ दुंखावनाय सान्दुंजोँ
गोलोम बोथोराव गोलोमखायो
फ्रि फ्रि बारनाय बारजोँ
गोजोँ बोथोराव गोजांखायो
.
मोनैखौ गाबाखै आं
बिनाय मोन्नायजोँबो
गोजोना दिनै जोबथायाखै
मुलुगाव बेबादिनो दिनै नोँनि गाबोन आंनि
.
मिनिनाय रंजानाय
थैनाय उजिनाय
नोँनि आरो आंनि आंगोनि
दागाब नोङो बेनो जोबथा नङा
.
सैथो सोरां आरो सैथो खोमसिया
सैथो सैथो सान अखाफोरा
बै अखोरां बे बुहुमा
बेबादिनो थांनानै थायो
.
मोनैखौ गाबाखै आं
मोननायजोँ अराय गोग्गायाखै
रंजानायजोँ रावखौबो फेजेनाखै
दुखुखौ लानानै अराय जेनाखै
.
बेबादिनो बार बारबोगोन
बेबादिनो सान्दुं दुंबोगोन
थिवरिया सानब्लाबो जोबथा सानाखै
अनसुला सानब्लाबो जोबथा सानाखै
.
नोँ आंखौ मुगैयो
बेबादिनो आं नोँखौ मोजां मोनो
आं नोँखौ सुथुर सानोब्लाबो
नोङो आंखौ आंगो सानथारो
.
जिउ जोनोम जोनोम
थैनाय आरो थांना थानाय
बेबादिनो हर आरो खोमसि
दिनै नोँनि गाबोन आंनि।

रायजोनि गिर्जा लांगोनायाव
गोजाम बोसोरखौ राबणनि महर होनाय जादोँ
बिनो उदै बुंजासे आदार जाहोनाय जादोँ
एटम बम फर्खा आसि
रकेट सांग्रेमा मोला बम
बायदि गारमा गुवार गारमा गुसेब बम
बिनि सोरगिदिँ मण्डलिनि गासैबो
गानफब जोमफब बेँदिँनाय जागोन
सोरबा बाइबेल बिजाब लागोन
सोरबा मेथाइ बहि लागोन
हर नङा सोरां नङा 12 रिँगायाव
2015 आरो 2016 नि गेजेराव
गोजाम बोसोरनि लानजाइयाव अर होगोन
लोगो लोगो बयबो आफा खबगोन
लोगो लोगो बमाया गोसोबादि हब्रागोन
गोजाम बोसोरा बेबादिनो थांगोन
मोदै हुगार हुगार दखना आंसोलजोँ
नुयैनिफ्राय नुयैयाव खोमसि एबा सोरांजोँ
बिनि उनाव मण्डलिनि बयबो रोजाबगोन-
.
अ' प्रभु नोँ अन्नानै
जोँखौ बासायना लाबोबाय
थांनाय बोसोरनिफ्राय नैबे बोसोरसिम।

Kwmsi jabai noao sofwibai
bati pwjwngnanwi
de de leka poraidw de
karkrao karsi gelenaikow baodw
~
giyani jagwn leka porai
bati pwjwngnanwi
de de gwsw hwdw de
boijwngbw sinai jagwn oblasw
~
dlab dlab tangbai sana
bwiswabw halw dwilw tangbai
bati pwjwngnanwi
de de gwswao ladw
~
daoha pwigwn melemni
jambapwra jengwn
bati pwjwngnanwi
de de siyan jadw
~
megon kana jerwi
mansi jamba erwi
bati pwjwngnanwi
de de butum giyan de
~
mitiywikow mitiyw bijabao
nuywikow nuyw gwrwng jabla
bati pwjwngnanwi
de de hangkw hala sinaidw.

Swrgiding dwima dwisa
gaigra mai dubli
benw jwngni gami
Goi patwini bari
~
no no mai bakri
maihung **** mwswo goli
benw jwngni gami
gwmkangw magw-bwisagu
~
dwikorniprai dwi kaonai
nosim janjiyao paperna labwnai
benw jwngni gami
grwm grwm raijw janai
~
swrangsi swrangsi daola gesernai
hal huronlangnai
benw jwngni gami
hal kodaljwng abad maonai
-
bari kona kona mwigongni bari
lai lapa baidi mulani
benw jwngni gami
angkal gwiya megong taigongni
~
mandir girja bathou puja
switw jwngni sibisali
benw jwngni gami
goi taijow kantal bari mungni.

नोँनि मोदैयाव आङो गब'बाय
आंनि गोलोमदैयाव नोँनो गाद्लिनबाय
बिलाइ जानानै-
गोजाव गोजोनै मिनि नोँ
~
सियालनि हाबायाव
सानैजोँ रंजाथोँसै सना
नोँनि आंनि मोदैयाव
ना खुरस्रा जावरिथोँसै
~
लाथिख' मिथिँगा मुलुगाव
अन्थाइ बिखा बांग्रिँ सिमब्रेलांबाय
जुलिया जालांबाय गोरबोनि
गोसो लानाय होनायनि
~
नोँ दैसा आं दैमा
बोहैबो गोबाफै खुदुमफै
आं बार नोँ मिथिँगा
बिलिर बिलिर लागोन गोरबो
~
नोँ मुलुग आं सान
मिनि होगोन
रंजा होगोन
नोँखौ आं सोरां होगोन।

जब' जब'
दैज्लांनि दुब्लियाव
माय गायनो बोथोरा फैलायबाय
ओइ बाजै नायना होदोलै
माय गायनो गोरोँखौ
~
नागिरना मोनलिया आं
दखना गानग्राखौ
जेरावबो नुलिया आंलाय खानाय गोलावखौ
बाजै जेरावबो नुलिया खानाय गोसोमखौ
~
बेँफोर हाद्रि नांफैबाय
बै गामियाव
महर मुस्रि गुस्लायबाय
बै हायेनाव
सिनायनो हालिया आंलाय बर' सिख्लाखौ।

दाउ खौऔआ गाबफैदोँ
आंनि गोसोआ बोदोर जादोँ
जुथा लंफेन गान्नानै
देलाखब देलाखब देलायनानै
आंनि अनजालिजोँ मोसाफानो
बै ददेरेजोँ रंजाफानो
~
थोरसि लथा दामनानै
मिनिखैरो गोजोन मिनिनानै
फोरमायनो गोसो जायो
आमायसो खायलाबनि आलासिनो
थारला थुरलानो
फोरमायनो गोसो जायो
~
आयै-
आयैलै सयथिबो
गुफुर गावदां दां
मा मुं जाखो।

गां गोनां सना गां
सिखोला बैसोआ गां गोनां
ददेरे बैसोआ बिरहां बिरहां
हाबाब अनजालि-
आंनि अन्नायखौलाय दा बावलां
~
अखा हाहां हाहां
दैज्लांआ फैहां फैहां
बैसागुनि बारजोँलाय बिखा फांदां
बिलाइ गोरलैनि बार मोजां
~
दाउ खौऔआसो जंखाय हरदोँ
जंखाय हरदोँ सनालै-
जोँ लागोनि टेक्टर बोरायालाय फाम नांहां
~
खानाय बानाय आगैलै सैनाय
आंखौ दालां दाबावगारलां
इनाय बानाय
इनाय बानाय सना
आंनि अन्नायखौलाय दाबावलां।