बोथोर हमै हमै बिबार बारग्रा
मान्दार बिबारा बारबाय
फागुणनि गुसु आरो दुंब्रुद बिलिरनायजोँ
जोँनि गामिखौ बेसेबा समाय होबाय
मिलौहाब गारां लानानै दाउलुर दाउसिनफोरा
हानजा हानजा बिबाराव बिदै सोबफैबाय
जोबोद खुसि जिउनि मेथाइ रोजाब्बाय
मिथिँगानि गोरान गोरान बिफांनि बिलाया
दिनै ज्रय ज्रय सिरि गारबाय
गोदान महर लानानै बिलाइ खिलिदोँसै
फिसा फिसा दुब्लियाव बायदि गांसोफोर
गाम्बारि बिबारा बारबाय समायनायै
थाइजौआ गोसो खुसियै मावलिबाय
जेरैबो बेरे बेरेमा ब्रंब्रं बिरबोबाय
बैसागुआ फैयोब्ला बेसेबा खुसिजोँ
जोँनि गामिया सोमखोर महर लागोन
गोरबो बुंफबनाय जिउनि खुसिजोँ
जोँ बयबो बैसागु रंजागोन

रेगि-रिगां आगरनि समायना दखना
नोँ जेब्ला ज्राब दोन्ना गानो जेरबायाव सारि
अब्लानो आयआ जोबोद बोराबो
सुरिदार आरो लंफेन गान्नानै
राव आरोबाव हारिमु नेवसिना
नोँनि आखला सानफा-एफा सिमा बारदोँ
महरा गुस्लायदोँ आरो गोसोआ लोरिदोँ
बिनिखायनो आयनि मेगनाव मोदै
असमियाफ्राइ बुरैसिन जोँनि आयआ
अनजालि नोङो आयखौ दासोगाब
बयनिबो हिंसाइनाय आरो सुसिनाय
जोबनो गैयै दुखु आरो दाहा
बेसेबा अलखदजोँ जुजियै जुजियै
जोँनि आयआ दिनैबो थांनानै दं
रोजा रोजा फिसा गोमानायनि उनावबो
बेखायनो माबा गोमासि गोमासि
दिनै जोबोद बोराबसुलि जाबाय बियो
आरोबाव नोङो आयखौ दासोगाब
जोँखौ लानानैनो आयहा मिजिँ दं
बुफ्रुख' हायै जारिमिन गोबानानै गोरबोआव
असमिया सिख्लानि गोदै राव लानानै
आयनि मेगनाव हाद्रि दासार
आयखौ आरोबाव लाजि दाफोनां
अनजालि नोङो आंनि खोथाखौ ला
मानोना बियो आयनिनो बाथ्रा
आरो आं नोँनि खोथाखौ मानिगोन
जाहाथे आइया आरोबाव बोराबा
जेरै रावजोँबो लाजि फोनां जाया
बिनि थाखाय जोँ सानैजोँ गोरोब लायनांगोन
जिरि जिरि बोहैनाय दैसानि दैजोँ
जोँनि आइया देलाइनानै थानो हाथोँ
जखायसे जखायनै सान्नो हायै
आयनि बैसोआ बुरैलांब्लाबो
बिनि गेवलां मिनिनाय मोखां आरो
खुसि गोरबोआ सोमखोर जाथोँ
जेराव जोँ सानैजोँ गोबानानै थानो हायो
दाउसा फिसाया बिमानाव एब्रेनायबादि
जेरै अनसुलि आइनि आखायाव दिन्दौनानै
नैबे बुहुमखौ गिदिँनानै नायनो हायो
जोनोम मोनसे गावखौ आरो
जोँनि आयखौ सिनायथि होनानै
अनजालि जोँनि आयआ सिनाय जायोब्ला
जोँबो सिनाय जायो फिसा होन्नानै

खोमसि खोमसि जोबोद सान बारलांबाय
दिनैबो खोमसिया आनज्रायलाङाखै
जोबोद बैसो जानाय आयनि मोखांआव
आयनि मेगननि मोदैया रानलाङाखै
बेखायनो खोमसिखौ बोरै बुस्रांनो हागोन
दैसारि आं दिनै उन्दुलाङा
जोँनि गोथार जुलिया जागोन होन्नानै
गोजोनै संसार जालांगोन होनोब्लाबो
आं फोथायो अनजालि दैसारि
बे खोमसिखौ होखार हरनो थाखाय
आंनो नोँनि आखाय नांगौ
नोँनि दुंबुर गोरबोनि बावनाय नांगौ
आरो नांगौ नोँनि रोजाबनाय मेथाइ
मेंनाय गैयै उदांस्रिनि रोजाबनाय
बानाय गैयै आखायनि हेफाजाब
हिंसानाय गैयै गोरबोनि थुलुंगा
आरो आंगायनाय गैयै रैसुमै खबाम
अनजालि नोँ हुगारनांगोन आयनि मोदै
गावनि गोथार गुरै आखायजोँ
बे खोमसिखौ सोरां होनो
नोँबो दैनांगोन मुथासे बनजार
दैसारि दिनै आं उन्दुलाङा
सोरांखौ जेब्लाबो गाबज्रि गाबज्रि
उदां आरो गोजोनखौ गाबज्रिनानै
दाबो मेँङाखै उदांनि मेथाइ रोजाबनानै

बे अरनाव साननि मोखां नुजाया
जोबोद खोमसि गावजोँगाव सौग्रावलायो
मोसा-लख्रानि जोबोद अदखार
जिउखौ आलो-गोजोनै खांनो हाया
बेखायनो अरन सिँखावनायनि मेथाइ
दिनै रोजाब्बाय आं गोसोनि बोलोजोँ
जिउखौ आलो-गोजोनै खांनो जुनै
मोसा-लख्रानि गले गले अदखाराव
जखम जानाय हे आंनि लोगोफोर
रोजाब अरन सिँखावनायनि मेथाइ
उदां फोथार गोजोन बै थिखिनियाव
गोसो होसारना दावगानो माबार रोजाब
जेसेबां हायो गोदै मिलौनाय गारांजोँ
बिबारनि फाइलि गेवलांनाय खबामजोँ
बारदै सिख्लानि जेरैबाबो सिमब्रे-सिमब्रा
बे अरनखौ सिफायगोन गोजाम बोसोरबादि
गोदान खबामजोँ बेसेबा मिलौनाय
रोजाब अरन सिँखावनायनि मेथाइ
हानजा हानजा दावगालांनो हरै
गोदान गोथार बारआव जिउ खांनो
जेराव जोबोद सोरां आरो उदां
जेरै नोँखौ आं सिनायनो हायो
आरो नोङो सिनायनो हायो आंखौ
गावनिनो गोजोँ बेस्रां मेगनजोँ

गोथार जिउमानि गोख्रोँ गेदेमाफोरा
गोगो मिहि सिमां नुनायबादिनो
आंबो सिमां नुयो लैथोमानि सिङाव
साम' खिँखिरिनि गोसो होसारना जिउ सुजुनायबादि
बयनिबो जोबोद गोजौआव एभारेष्टनि थिखिनियाव
आं गाखोहैनो लुबैयो अरन सिँखावनानै
बयनिबो गोथारसिन अख्रांनि जोमै जानानै
आं बुहुमखौ फिसिनो जोबोद लुबैयो
गोगो आरो गोथार मिथिँगा सोरजिनो
आं सिमां नुयो बयनिबो गोजोँसिन गावदांसिन
सोरां फुर्णिमा अखाफोराव बिरखं गाखोनो
नाथाय आं दिनै जोबोद गुदु अरन गेजेराव दं
आं जाय अरनाव दुखु-हांमाजोँ गाबदोँ
बे अरना रुगुंमोनै लैथोमा गेजेराव
बिनिफ्रायनो आंनि दावबायनाया जागायजेन्दोँ
आं थांखियाव सहैथारगोन आं फोथायो
मानोना आं जुजिगासिनो दं जेँनाजोँ
आंनि गोसोनि गिनाय-बानायफोरखौ
आं होखारगासिनो दं आंनिनो गियानजोँ
आं थांगोन आंनि गोथार थांखियाव
समायना बेसेबा गोजोन उदां थिलियाव
जेराव रोजाबनो हायो गावनिनो मेथाइ
बिबारनि गुरै फाइलि गेवलांनायनि

बे हादोरनि गासैबो हाब्रु-हाद्रिखौ
गावनि मोदोमाव फुन्नानै लागोन
आरो गोगो बे हादोरनि दैसानि दैजोँ
गावनि मैलाखौ गावनो सुनानै लागोन
समाय लायो आयै आंबो
नोँनि दुखुनि मेगननि मोदैखौ
आरो नोँनि गोसो-गोरबोनि मोदैखौ
आंनिनो आखायजोँ हानायमानि हुगारनो
बे हादोरनि मोनजारोङै हावरियाफोरनि
दुखुनि गाबनायखौ जेरैबाबो होखारनानै
हालुवाफोरनि नांगोलजोँ सुजुनाय जारिमिनखौ
मुलुगाव जेरैबाबो फोसावना होगोन
जाय मोन्थाइखौ सेखनानै लादोँ सुसिगिरिया
जेरैबाबो हा बिगोमानो गथायना होगोन
जोबोद सैथोथार बे जारिमिनखौ
माब्लाबाबो सोबखग्राया खोमोरनो हाया
बे हादोरनि बार आरो दैसाया रोजाबो
बे हादोरनि जिबि आरो दाउसिना रोजाबो
बे हादोरनि मिथिँगाया सल' खिन्थायो
समाय लायो आयै आंबो
बिगोमानो गथायना होगोन गासै मोन्थाइ
थिखोना होगोन गादब जानाय गिरिनो
बिसोरनि मोखांआव मिनिनाय लाबोगोन
आरो समायना खालामगोन आबाद दुब्लिखौ
जेराव रसा नाङा बे हादोरनि फिसाफोर

सानजानि साना सोनाब फैसालियाव
लासै लासै दोबै लांनायनि उनाव
दाउसिन-दाउलाफोरा गावसोरनि बासायाव उन्दुयो
बेबादिनो खोमसियाव उन्दुस्रियो बयबो
गोजां बोथोरनि बे हर गेजेराव
आं जेब्ला बायजोआव ओँखारो
अख्रांआव जोँदोँ रिथि-रिथाव
सोरगिदिँ जेरैबो समायना हाथर्खि
सोरबा अनजालिनि मिहि हाथाइबादि
हाथर्खिनि गेजेराव सना गाबनि अखाफोर
जोबोद खुसि जेन'बा बियो रंजालि
बिखौ दिनै समायनासिन नुदोँ
बिनि खुसियानो सोरांनि महर लादोँ
सानखौ गावनि बिखुंजोँ फांथेनानै
बुहुमा दा जोबोद खोमसि
नाथाय अखाफोरा सोरां होनो नाजायो
बेसेबा सुदेम गोजोन मोखांजोँ
निहिर गोग्लैयो बे हराव थर थर
दा बिफां-लाइफांआ जोबोद सिजायो
गोदान फुंखौ नेनानै थायो बयबो