सान हाबनाय लोगो लोगो
गोबाख्रब फैयो बियो आंखौ
उन्दुफायो आंजोँ
आंदि बिखौ एसेबो मोजां मोना
आं जेब्ला लेब-कम्बल खाख्लुमो
बियो सेर सेराव नेनानै थायो
आं जेब्ला जोलुनो कम्बलखौ
बियो आरोबाव उन्दुफायो आंजोँ
गोदोहाय आबौआ गोदो गोदो
जिगाबनि एमाव उन्दुनो हायोमोन लान्थियाब्लाबो
इसानसालिनि सिमा खाख्लुमनानै
एबा दारहा सायाव थांगासुरि जोमनानै
इन्दिनि सि गुदुं साखोना
अरखिनि जेराव थानो हागौमोन
गोलाव हरजोँ जुजियै जुजियै
आबौजोँ उन्दुफानो हायामोन बियो
थिँनि उखुमजोँ सेरमायो निहिर
बेयावनो बाबथाबना फैयो बियो
आं जेराव उन्दुलाङो बेवहायनो
फिसा सिरि सिरि बामख्रब फैयो
फुंनि जायोब्ला आं जेकेट गानो
बियो गोबाख्रबनो हायैबादियै
अब्ला बियो दैसायाव एब्रेहैयो
आंनि मोखां सुहैनाय समखौ नेनानै थायो
गुसुआ आंनि खावलायाव गुस्थि फोनाङो

आं सिमां नुदोँमोन
अनजालिखौ लानानै सान बारहोनाय
रावबो फैयै लैथोमा गेजेराव
बेसेबा गोजोन बेसेबा रंजानायजोँ
सिमा गैयै गोजानाव मिजिँ खालामनानै
जिउनि दिङाखौ हगारनानै
नाथाय आंखौ फोजाफैयो होस्रिख्रावनाय
सोबखजानाय बे हानि हावरिया आबादारिफोर
गोमालांबाय गासैबो उन्दुनाय
आं आरोबाव मेसेबनो हालिया
अनजालिखौ लानानै सिमां नुलिया आं
बे होस्रिख्रावनायखौ आथिँ गासिन्नानै
बेसेबा मोजांमोनबाय आं बे जांख्रिथाइखौ
जोबोद गोथार दाबिनाय
बेसेबा गोगो लुबैनाय बियो
बे हानजानिनो आंबोदि दिनै सासे
बिग्रायारिफोर बियो गोथार दाबि
जोँ उदां जानो लुबैयो
समान बाहागो लुबैयो जोँ
बे हानिनो जोँ बिगोमा आबादारि

हाद्रिजोँ गेलेनाय रिउ रिउ बुब्लि
बै खुदियानि जिउ बिसम्बि
आंनि बांबुला लोगोफोरखौ
आं दिनै जोबोद गोसोखाङो।
गोसो आरो मोकथांनि हान्थिनायजोँ
जोबोद गोजान सफैबाय आं
आंनि लोगोफोरा थाबोबाय बबेवबा
आं बिसोरखौनो गोसोखाङो
जेराव आं दिनै थांफिननो हालिया।
जिउनि हान्थिनाय थुंगेनाय गैया
दंबावो गोबां आगान बेसेबा गोजान
आंनि थांखिनि इयुन बिदिन्था।
हे अनजालु आंनि लोगोफोर
नोँसोरखौ आं गोबाना लादोँ
आंनिनो गोसोनि अखाफोर बेँखनाव
नोँसोरजोँ हाद्रियाव गेलेनाय आरो
आमाय-जुमाय गेलेनाय बिबार बुंफबनाय
गोरबो गोरबो बयनिबो मोखांआव।
आंनि गोरबोआव गाबनाय आरो रंजानाय
बेखौनो जिउनि सुखु खालामना
हान्थियो आं दिनै जिउनि साघनाखौ लानानै।

मुगासे सिमां नुनानै सिरिमोन्ना
आरोबाव आं मुगासे कम्बल सिङाव
सिरि मोनहां मोनहां जाब्लानो
बियो बिरबोदोँमोन गांखं फुवारनानै
बेसेबा गुसु दोमैलु बारजोँ लोगोसे
दा बियो बिरलांबाय सोनाब फारसे
बिनि सायखंआ आंनाव नांदोँ
आरो गासै आंनि सोरगिदिँ खोमसि जादोँ
हांसो सिलारिया माब्ला बिरलांखो?
आं उदिस मोनस्लाबाखिसै
जानजि हमलाय खेबफा सानेरलाय
बाबांसिन आंनि बेसर फुनायखौ बियो नायदोँमोन
आं मुसुरदाव मुसुरदाव दुब्लियाव मोसौ लायना
नआवनि गेग्रेब गलियाव खाफैनायखौबो
बियो नायहरदोँमोन आं उदिस मोनै
दा बियो बिरलांबाय सोनाब फारसे
बिनि सायखंआ आंनाव नांदोँ
आरो गासै आंनि सोरगिदिँ खोमसि जादोँ

खि एसेबो फरायनो रोँथ्रा
थगायनो रोङा फोलानो रोङा
सादु नङा सिखाव नङा आदा गालर
गोगो बिफांनि गोगो फिथाइ
नाथाय बै समनि
नांगोल दामै दामै उदै सुफुंनाय
जालाय गारलाय सावरिजोँ-बादालिजोँ
थाफ्लि बुद्रु बुद्रु सान बारहोहरनाय समा गैलिया
आदा गालरा मिथिगौ
संख्रि फानलुनि दाम बारायबाय
ना बेदरनि बेसेनाव अर नांबाय
खारै खलं गैलिया थाव नांसिगौ
सोँदावनो हायै दाम गानग्रा-जोमग्रा
सोँदावनो हायै बेसाद-मुवा
आरो मा मिचन-ग्लबेल जासिगोन
जावलिया जादोँ बुहुमा
हे गसाइ! सार अन्थाइ गावनानै
दुब्ला फोथैदो आंखौ नोङो
बांग्रिँ जानानै फैदो माबार
थ्रोब हाबलांनोसै आं सिङाव

आंनि मेगननि गोफार नोजोरा
नोँनि बिखायाव नांबाय
मानोना आंनि गोसोआ
नोँखौ मोन्नो हास्थायथारो
नोँनि खबाम गोनां आगान
आरो नोँनि मिलौहाब गारां देँखो
आं बेसेबा मोजां मोनो
बेवहायनो आंनि मेगननि सु
नोँनि मिनिखैरौ मिनिनाय आरो
नोँनि समायना देलाइनाय मुस्रि
आं गासैखौबो मोजां मोनो
बेखायनो आं गावनि खालामनो
नोँखौ जोखोम खालामनो लुबैयो
बिनिखायनो आंनि मेगननि सुआ
नोँनि गोरबो आरो गोथार आगानाव

मोन्थाइखौ लानानै आंहा दाबिनांगौ दं
गोथार गोरबो आरो जिउ थासान्दियाव
मानोना जाय आंनियाव दंमोन
दिनै गासैबो गैलिया जाबाय
बेखायनो आंहा दाबिनांगौ दं
जोनोम जानायनि उनावनो
जाय हाद्रिजोँ आं गेलेयोमोन
बे हाद्रिजोँ आंहा सोमोन्दो दं
बे मिथिँगाजोँ आंहा सोमोन्दो दं
बे बुहुमनि दै बार आरो अखोरां
दाउसिन-दाउला आरो जिउ-जिबि
बिसोर गासैजोँबो आंहा सोमोन्दो दं
बिसोर गासैबो थारैनो आंनि
बेखायनो आंहा मोन्थाइ दं
बिसोरखौ अननो आरो सिबिनो
बिसोरजोँ गेलेनो मोन्थाइ दं
बेखायनो आंहा दाबिनांगौ दं
जाहाथे बिसोर गोमालाङा
आंनि मेगन सेरनिफ्राय
जाहाथे बिसोर रावनिबो मेगन नाङा
बेखौ होबथानो थाखायनो
आंहा दाबिनांगौ मोन्थाइ दं