लाइमोन सिख्लानि जारौ गुस्थिनिफ्रायबो समायनासिन
नोँनि गुस्थि
गहेना गानफबनाय हिनजाव गोदाननिफ्रायबो गोथारसिन
नोँनि गोरबो
दुखु गैया दाहा गैया नोँनाव
रंजाफ्लानाय आरो फोलानाय गैया
नोँखौ बयबो बरायदोँ
दैसा सेराव बाज्ल' बाज्ल' मोसानानै
नोँखौ बयबो बरायदोँ
थुम-थाम एटम बमा गावनानै
नोँ फैबाय बेसेबा खुसिजोँ
गोदान आरो इयुननि मिजिँ लानानै
गोजामनि इनाय अगेन बिसम्बिफोर
आरो बावनो हायै दिखारखौ
बहाबा नारगार हरना दिनै

रायजोनि गिर्जा लांगोनायाव
गोजाम बोसोरखौ राबणनि महर होनाय जादोँ
बिनो उदै बुंजासे आदार जाहोनाय जादोँ
एटम बम फर्खा आसि
रकेट सांग्रेमा मोला बम
बायदि गारमा गुवार गारमा गुसेब बम
बिनि सोरगिदिँ मण्डलिनि गासैबो
गानफब जोमफब बेँदिँनाय जागोन
सोरबा बाइबेल बिजाब लागोन
सोरबा मेथाइ बहि लागोन
हर नङा सोरां नङा 12 रिँगायाव
2015 आरो 2016 नि गेजेराव
गोजाम बोसोरनि लानजाइयाव अर होगोन
लोगो लोगो बयबो आफा खबगोन
लोगो लोगो बमाया गोसोबादि हब्रागोन
गोजाम बोसोरा बेबादिनो थांगोन
मोदै हुगार हुगार दखना आंसोलजोँ
नुयैनिफ्राय नुयैयाव खोमसि एबा सोरांजोँ
बिनि उनाव मण्डलिनि बयबो रोजाबगोन-
.
अ' प्रभु नोँ अन्नानै
जोँखौ बासायना लाबोबाय
थांनाय बोसोरनिफ्राय नैबे बोसोरसिम।

उफ्ले उफ्ले गोजोमबोनाय
गोजाम हाद्रिखौ नागारना
आखायाव आसान सांखा
खाफालाव गोजा निस्थार
सिन्दुरनि फोथा लाना
दखना थावसिजों
गावदां गोदान महर लाना
बिरबोनाङो गोदान हाजों
गोरोबनो।
जोनोमनि उननि माखासे
गोजाम बिथिंखौ नागारना।
गोदान संसार जुरिनो
गोदान आगान होफैयो
गोदान न'खर।
गोरोबथि रादाय
सोलोंनो ओंखारनांफिनो।
रैरुब संसारनि राव
बिथा खालामना उन्दुयो।
मिजिंनि फिथाइ
बेयावबो सोलायो।

सिरि मोनखां जों
मुगानि जोंखोल महरजों,
            आवगायलां थिखानाय थावनियाव
            मोननायनि मिजिं हाबिलायाव।
उन-सिगां नाय सान-हर
बिष फिथाइनिफ्राय गोजानाव था नोंसोर,
            जेसेबांखि फान्दाइयारिया फान्दायाथों
            गुबुंले दैमायाव दा बाज्रुमथों।
खारलुं एटमनि बिखा सोमावग्लुंनायाव
दासान दं माबा गोमोथाव,
            सुबुंस्रिनि गोदान गस्ला जोम
            पापनिफ्राय गोदानै जा जोनोम।

(मायथाइ मोनसेनि उनाव)
दिनैलाय मानि मिनिनाय
मोनजारोङै आबै फावगिनि?
थाफ्लि फेन्दा दामै दामै
मेथाइ रोजाबनाय बिनि
-
(आद्रि आद्रि गन्द्राय बोराया थैबाय
थखन थुना
मायरं बिबाय बिबाय
फावगि बुरैखौ फोथांबाय बियो
-
मोन्नाय मानि
दान बिबाननि
सानफानि
बुरैनो गथाय फैबाय)
-
बोराय
थैदोँना थैदोँ
मायरं फेन्दासे एरदोँ होन्ना
खरलेब मनालिसानि मिनिबावो बियो
थांखु लाजानाय खावलाय
-
सिलिम खुगायाव बावगोमायो
म' म' थांखु आलुवा-
सोमो नाङो दाउखा दन्दा लागोआ
फोर फोर गाव गाबागाव बिरलाङो।
===========

दिनै गोदान बोसोरनि
गोदान बारजोँ
दिनै गोदान बोथोरनि
गोगो अखाजोँ
दुलाराइ मिथिँगाया रंजादोँ
आंनि जोँनाय मेगनाव।

हुरा हुरा सानफ्लाङोमोन आं-
हाबावगोन दा बायग्लिनाय आंनि गोसोखौ
फागुननि बारजोँ जरा फोनांनो,
बिखा गावनायनि गुथाला
दैदेनबायसो जोँमा साना,
गोरबोनि लाथिख' नोजोरजोँ
नायहरो जेब्ला गोबौ मेगनजोँ।
गोजाम बिसम्बि खामग्लिनायनि आलौनायाव
आं मोन्दांदोँमोन मुगैनायनि अर लगायनाय।
. . . . . . . . . . . . . . . .
दिनै गोदान अखाफोरनि सोरांआव
नोँदि हाबावगोन जोँनाय अराव सालाइ एरनो?
गोदान नोँनि आखायाव आंनि नोजोरा,
- बै थाइनै आखाया माबा बुंदोँ
जेराव लाजिगुसु थाइनै आखायजोँ जंखायलायदोँ
बेखौ बुंनो हागौदा
मोनसे रोखोमनि फावल'।
मोदै हुगारदोँ गामसानि दौबाजोँ
नाथाय फेलेँनिल' गाबनाय नङा
फैगोन रंजानायनि मोजोमसे मिनिनानैसो।
मोबायजोँ नायनानै जेब्ला नुयो
सुथि मोन्नायबादि अखाफोर ओँखारबोयो,
सोरांसि दरखंनि आन्दोआव
लाजि गुसु नोङो आमाय-जुमाय गेलेदोँ।