अनजालि
दिनैनि नोँनो फोरमायनो गोनांआ बेनो
माने बाथ्राया जाहैबाय
जोँ जुलिसे सानैजोँनि
.
ओरैबादि
जोँ सानैनि जुलिया जादोँमोन
जेराव थोरसि आजावफैदोँमोन
हाग्रानि गासै जिउ जिबि
मिथिँगानि दाउसिन दाउलाफोर
.
मिथिगौना
जोँलायनो सानैजोँ संसार जादोँ
ओरैबादि गोजोन संसार
समायना मिथिँगानि खान्थिबादियै
.
जेरै
फेरेँगा गाबोब्ला
सिरि मोनो हाल हुरनो
नोँबो आंनो ओँखाम संङो
.
जेरै
एम्बुनि गाबनायजोँ
अखा खोरोमनायजोँ
बेसेबा मोजां आबाद मावो
.
अनजालि
ओरैबादि सानैजोँ
मिनि खुसि जोँनि अनलायनाय
बेसरथिलि सिबिँ सबायथिलि
मायबारि फाथोबारि दैज्लां मेसेँ
.
मिथिगौना
सिमां नुदोँमोन आं सिमांआव
नोँजोँ आंजोँ संसार जानाय
बोथोरनि उनाव बोथोर

आं गोसो जायो
जिबौ फिथिगम जानानै
एखमबा बिखौ सौथारहैनो,
बिनि जिउखौ ग्लब मननो।
आं गोसो जायो
ददेरे ददेरे बिनि लाइमोन सोलेरखौ
बेन्दोँ जानानै फानफ्रेना लानो,
गोरबो हासुंआव माथेना लानो।
आं बिखौ मोजां मोनो
ओरैबायदि मोजां मोनोदि
आं बिखौ आंनि जिउ खालामथारगौ,
एबा आं बिखौ आंनि हां सानथारो।
सिबाय दुखु जायो गावनो गाव
अख्रां जानो हाया आं
बार जानो हाया आं
दै जानो हाया।
हा जानो हाया
आं अर जानो हाया
गोसोबायदि गोसो जानो हाया आं।

अखा बेबादिनो हाबाय था नोङो
बुहुम मिथिँगाया देलाइदोँ दुगैनानै
मुलुगनि मैलाखौ सुस्रां नोङो
अखा बेबादिनो हाबाय था नोङो
दाखोरखौ फोजावनो दैबाना लाबो नोङो
द्राम द्राम आरोबाव हानानै
अखा बेबादिनो हाबाय था नोङो
बुहुम मिथिँगाया देलाइदोँ दुगैनानै

दिनैसो नोँखौ लोगो मोनदोँ
नाथाय माब्लानिफ्रायनो
बेसेबा मोजां मोनदोँ
बेखौ आं बेखेवनो हालिया
.
सैनाय
सिमांनि बाथ्राखौ फोरमायना
दुखु होनो साना आं
सिमांआ सिमाङैनो थाथोँ
.
मोकथांनि बाथ्रासो
मोजां मोन्नाया
नोँखौ लोगो मोन्नाया
बेबादिनो मोकथांआव नागिरो
.
दिनै जोँ रादाय खानि
नोँनि थाखाय आं
आरो आंनि थाखाय नोँ
जोँ थांनानै थालायनि
.
सना बाथ्राया बेनो
जोँनि जिउ मोनसे
गोथार मोजां मोनलायनायनि
नोँबो फै आंबो थांगोन
.
आंनि दुखुयाव फै
नोँनि उखैनायाव आं थांगोन
जिउ मोनसे बेबादिनो
जोँ गोजोनै थागोन

गोजोन आरो बेसेबा खुसिजोँ
आं जेब्ला उन्दुलाङो
बावगारलाङो आं खुसिजोँ-
गोजाम दुखु-दाहाखौ खोमालाङो
.
गोदानै सिमां नुयो
बेसेबा खुसिजोँ
मुलुगखौ गोबानानै
मुलुगनि गासैखौबो आंगोजोँ
.
आं जेब्ला उन्दुलाङो
मिथिँगानो होलांगोन खुसि
आंनि सोलेराव जेरै-
बिसोरनि अराय खुसिया बिलिरो
.
थागोन मुलुगनि गोरबोआव
मोनसे थाजिम थुलुंगा जानानै
आंनि गोरबो गासै
बिसोरनो आंगो जिउ होना

मोजां मोनो होननानैनो
सना जिउ ददेरे
बेबादिनो बेसेबा बाखोनायो
रंगिना संगिना होननानै
.
मेगन बेस्रां
जानजि सेरेरे सैनाय
जोनोम जोनोमनि नोङो
बेसेबां अनो जिउ नोँखौ
.
थांना थानाय जिउ मोनसे
एबा जोनोम मोनसेयाव
नोँखौ बेसेबांदि हास्थायो
गोथार गोरबोजोँ गोरबो
.
अब्लाबो
नोँ आंखौ सोगाबो
आंखौ जंखायो नोङो
सनालै बेबादिनोथार नोङो

फै आंजोँ मोनाबिलियाव
आबिर गाबनि गोरबोजोँ
बेबादि आं लेँहराखै
ओरैबादिसो बुंदोँ-
रजे नोङो गोजोनैनो था
.
आंखौ दाबोराब
मानोना खबाम दोरोददोँ जिउ
नोँनि आंनिनो दिनैसिम
जुलिनि ललिनायखौ
आंबो खोनायो रजे
.
फैमाल नङा
नोँनि आंनि मेथाया
बै गाथोनाव जोँ रोजाबनाय
आखायखौ आखायाव होनानै
गोरबोजोँ गोरबो---
.
बेसेबा मिजिँ आंहा
बिफां-लाइफांफोरबादि
दैसा निजोराफोरबादि
नोँनिनो अरायबो गोरबोआव
.
गुसुथियाव आल्टा फुन्नानै
मिनिखैरो मिनिस्लुयै था
मोखां आरो गोरबोआव
जिनिरखौ मानो लानो
मिथिँगाजोँ अरायबो लोगोसे