फै आंजोँ मोनाबिलियाव
आबिर गाबनि गोरबोजोँ
बेबादि आं लेँहराखै
ओरैबादिसो बुंदोँ-
रजे नोङो गोजोनैनो था
.
आंखौ दाबोराब
मानोना खबाम दोरोददोँ जिउ
नोँनि आंनिनो दिनैसिम
जुलिनि ललिनायखौ
आंबो खोनायो रजे
.
फैमाल नङा
नोँनि आंनि मेथाया
बै गाथोनाव जोँ रोजाबनाय
आखायखौ आखायाव होनानै
गोरबोजोँ गोरबो---
.
बेसेबा मिजिँ आंहा
बिफां-लाइफांफोरबादि
दैसा निजोराफोरबादि
नोँनिनो अरायबो गोरबोआव
.
गुसुथियाव आल्टा फुन्नानै
मिनिखैरो मिनिस्लुयै था
मोखां आरो गोरबोआव
जिनिरखौ मानो लानो
मिथिँगाजोँ अरायबो लोगोसे

दुंबुर साननि बिलिरनाय
रैसुमै बारनाय बारजोँ
बिलिरदोँ सुदेम
सुदेम आंनि सोलेराव
.
बेसे गोजोन
रैसुमै दाउनि मेथायाव
बिफांनि गोरलै गोरलै बिलाइ
रोजाबदोँ दाउसिन बायदि गारांआव
.
आं गोमोहाबो
गोदान जाबोबाय मिथिँगा
रंगिना समायना जेरैबो
नायनो बेसेबा मुहिनां
.
सोमखोर मोकथां
निला अख्रांआव
फुरसब जोमै माखा
बिरबायदोँ मानसि लांखार
बेसेबा खुसि बे समाव

लामाया हाद्रि जायोब्ला
अखा जाना नोङो फै
थिँ थिँ सान्दुं जायोब्ला
बार नोङो फै लामायाव
.
गोसोनि देँखो बोनानै
मुलुगनि गारां हगारनानै
बेबादिनो जोँ थाबाय लांगोन
थांना थानायनि खबाम गानानै
.
थांना थागोन सैथोबादि
दिनै दुखु गाबोन सुखुजोँ
बारहो हरगोन खोमसिखौ
फिन सोरांखौ हांख्रायनानै
.
सोरजिगिरि मुंखौ लानानै
गोथार सिबिनायजोँ
बेबादिनो जोँ थाबाय लांगोन
गोथार गोरबो गोगो गोसोजोँ
.
संसारनि मैया मैया
जिउनि मोकथां मिथिनायजोँ
मुलुगखौ बेबादिनो अनगोन
जोँ बयबो बेबादिनो साननांगोन
.
समायना मोकथांनि महरजोँ
गोरबोखौ गुवारै फुवारगोन
गोथौ सानस्रिनि गोथौ लैथोजोँ
जोँ बयबो लोहाबनांगोन
.
जोँ मुलुगनि दावबायारि
गोथार बिजिरगिरि जानानै
गोसोखौ गोजोन खालामगोन
बेबादिनो जोँ थाबाय लांगोन
.
जोनोम बेनो मोकथांनि
गाबनाय आरो मिनिनायजोँ
बेबादिनो गेलेयो जोँ दान्दिसे
नोँ आंनिनो आंगो सान्नायजोँ।

थिँ थिँ दुंखावनाय सान्दुंजोँ
गोलोम बोथोराव गोलोमखायो
फ्रि फ्रि बारनाय बारजोँ
गोजोँ बोथोराव गोजांखायो
.
मोनैखौ गाबाखै आं
बिनाय मोन्नायजोँबो
गोजोना दिनै जोबथायाखै
मुलुगाव बेबादिनो दिनै नोँनि गाबोन आंनि
.
मिनिनाय रंजानाय
थैनाय उजिनाय
नोँनि आरो आंनि आंगोनि
दागाब नोङो बेनो जोबथा नङा
.
सैथो सोरां आरो सैथो खोमसिया
सैथो सैथो सान अखाफोरा
बै अखोरां बे बुहुमा
बेबादिनो थांनानै थायो
.
मोनैखौ गाबाखै आं
मोननायजोँ अराय गोग्गायाखै
रंजानायजोँ रावखौबो फेजेनाखै
दुखुखौ लानानै अराय जेनाखै
.
बेबादिनो बार बारबोगोन
बेबादिनो सान्दुं दुंबोगोन
थिवरिया सानब्लाबो जोबथा सानाखै
अनसुला सानब्लाबो जोबथा सानाखै
.
नोँ आंखौ मुगैयो
बेबादिनो आं नोँखौ मोजां मोनो
आं नोँखौ सुथुर सानोब्लाबो
नोङो आंखौ आंगो सानथारो
.
जिउ जोनोम जोनोम
थैनाय आरो थांना थानाय
बेबादिनो हर आरो खोमसि
दिनै नोँनि गाबोन आंनि।

उखैनायजोँ आं गाबो
मेगननि मोदै हुगारै हुगारै
अलसियाखौ फेजेन्नो हायाखै
गसाइ बिनिनो गोरबो नागिरनाय
.
अन्थायनि हाजोखौ
बारलांनो जेरै जुजियो
गोहो नागिरना मोना
बेबादिनो गाबो आं
.
आंखौ आं सिनायनो
बेखौल' नायनो होदो नोङो
जेरै नोँखौ आं नुयो
आंनि गोरबो इसिँआव
.
निदान गोनां जिउआ
नोँखौ जेरैहाय नागिरो
आंनि मोखांआव खुसियै
नोँखौ आं जेब्लाबो जेरै नुयो
.
बेबादिनो नोँनि गोरबोखौ
मोन्थि मोनै जायो आं
सुखु मोना गावखौ सिनायै
नै गिरि नागिरो दिनै
.
सहायनो हायै जायो
मोन्दांङै गोरबोआव
बेखायनो खेँखाय बायो आं
नोँ फैदो बेखायनो सिगांआव
.
खालौ बिलौ गोसोआ
नोँखौ मोननो हास्थायथारो
नोँ आंखौ गोबाफै गसाइ
आंनि गाबनायखौ हमथानानै
.
नोँनि बिथोन फालिनो
आं गोसो जायोब्ला
बेखौनो होदो गिरि आंनो
जेरै नेवसिनो हायो दुगानायखौ
.
नोङो गोसोआव खोख्लैना हो
जेरै आं बावनो हालिया
जिउआ जेराव अनसायो
मोकथां संसारनि रंजानायजोँ।

बेसे समायना नोङो
बिलाइ सा सा थाबायबोनाय
ज्राव ज्राव बिलाइ गोराननि साजोँ
गोजोँ नोँनि मेगन जरासे
.
आंनि बिखायाव नांफैयो
गोजोँ गोफार नोजोरा
बेसे समायना नोङो
अरननि सिखोला
.
दाउलुर दाउसिन-दाउला
मै सेसा
नोँनि सेर सेर बेसे समायना
लाइमोन नोङो अरननि सिख्ला
.
मोदोमफ्रु बारखोलो बारजोँ
नोँनि गोजोँ मिनिनाय
सोमखोर अरनजोँ
मेथाइ रोजाबबोयो खुसिजोँ
.
अरननि सिख्ला
आंखौ गोबाफै नोङो
नोँनि अन्दरसिम-
आंखौ आलासि लानानै थां
.
नोँजोँ रायज्लायगौ
नोँनि देरायाव दान्दि जिरायगौ
गोमोबाय आं लाइमोन
नोँनि गासैबो समायनायाव
.
अरननि नोँ सिख्ला
हाजोआव नामा नोँनि गामि
एबा बिलाइ बिलाइ
नोँ दालाइ दालाइ थायो---

रंजाखाङो खुसिजोँ
जोबोद गोजोनग्लायना
समायना सुदेम सुदेम गोरबोआ
नोँनि मिनिसुलु सोरांजोँ
.
बे सोरांजोँ बार बारबोयो
बे बारजोँनो-
दालाइ बिलाइफोरा मोसायो
बेसेबा रंगिना संगिना बिबारि
.
बेसे समायना नुयो
गोसोनि खुसिजोँ
गोरबो गोजोन्नाय मिनिनायजोँ
गोगो गोजोँ आलायारन
रैरुब फुंबिलि सनाबिलि
.
जोँमा नोँखौ खुलुमो आं
नोँनि अननायनि फिन होना
जोबोद मान होनायजोँ
जोँमा आंदि बोर आजावो
.
बेबादिनो नोङो फै
बयनोबो गोथार बिलिरनायजोँ
बयनोबो गोरबोखौ सोरां होनानै
दाउसिन दाउला सिरि मोनना
.
बेसे गोजोन मिथिँगाया
मिथिँगानि गासै खुसिजोँ
बेसे समायना बुहुमा
दुंबुर गोरबो दुंखाङो निजोरा
.
फुरसब जोमै अखोरांआव
हाथर्खिखौ नुयै फांथेयो
बेसे समायना जायो
फैलाव सोमखोर अखोरांआ
.
गोजोन मोनो बुहुमनि गासैबो
रंजाखाङो बाज्लखाङो
बेसेदि समायखाङो गोसोआ
खुसि जायो आं गेवलां मिथिँगानि
मिनिखैरो मिनिनायाव।