मोनगोन साजा नंखाय फोलाबोला
इनाय गुबुनखौ खालामबोला,
इयुन समा फोरमान जाबोला।
हाबाब! फै लामाजोँ जेरै सोरांजोँ
नंखाय माया अगेन नेवसिनायजोँ,
होदो आगानखौ गेबेँ सान्नायजोँ।
फांथेनाय गैयै गोगो गोसोनि
हगार बाना देँखो निजोरा
रुगुं गैयै अनसायनायजोँ
बे जिउआ गोथार गोजोँ समायना।
बे दिन्थिगासे सायना सालियाव
थाबायनो हानायबादि सोरबा सायाजोँ
नुनाय लामा जोँखोल मेगनजोँ
देँखो बोनाय सोरां लामायाव
थाया जिनिद मोनसेबो गियानाव।
दावबायलु बे मुगाया दिनै
मिथिँगानि सोलायसुलि मुस्रियाव
होदो सोरां गोसो आगानखौ
सोरांनि थखनजोँ दावबायनायखौ।

नै जिउ आंनि लोगो
आं बुंनो हागौ जायखौ आं बुंबाय
बेनो ओँथिया हम आंनि आखायाव
बेसेबा मोजां, जिउ अनसुला नोँ
आंखौ साजायो बेसेबा समायना मोन्दांनाय
जेब्ला लोगोसे आं नोँजोँ, आंहा मिजिँ
नोँनो मिथिगौ, बेसे गोथौदि आर'जआ
थारैनो ओँथि नोँ बिजिरो-
नोँनो गासैबो जाहोना मानोदि आं
सिखारो एमनिफ्राय फुंआव
बेनो जाहोना गासैबो
मावनोदि गासैबो साजायो सान्ना
मानोना बेसेबां नोँदि दैबायो।
नोँ आंनि अनसुला सोलेरनि
लोगोसे नोँ जिउ आंनि गोरबोआव
सैथो बियो आंदि सासे नोँनि।
आं मोन्दांथियो जेबो समफोराव
बेनिखायनो नै नोँखौ मोजां मोनो
नोँनो आंनि जिउ बिसुखे,
आंनि जेरैबो नोँनि
आंनि सोलेर थासान्दि मुलुग,
नोँनो सासेल' जाय गासैबो,
नै जिउ आंनि लोगो
हो गोजोँ लामा सोरां
नोँखौ मोजां मोन्नो अराय
नोँनि बोसोन सोलेर फालिनो।

हाबानि बेम फार्टिनि रिँनाय देँखोआ
बयनिबो गोसोखौ सिमब्रेना होयो।
बियो हाजासे हिनजाव गोदानखौ
मानोबा सोगाबो।
हिनजाव गोदानखौ हाबानि समाव
हिनजाव लागोआ गाबनाय नुयोब्ला
रावबो गाबा लासे थानो हाया।
बयबो फे- फु हाजासे गाबो।
हिनजाव गोदाननि बिफा आरो बिनि बिब' बिनानावफ्राथ'
गोगो थरथिँ थरथिँ मोदै फसरना गाबो बाराद्रायबाव।
अनसुलाजोँ फैसालिजोँनि जुलिया दिनै जै जै है है जाना थांबाय।
हिनजाव गोदान महरै फैसालिया
हाजासे गाबलांबाय।
बिनि मेगना मोदै गनानै रानथाबलांनाया गोब्राब जालांबाय।
हाबानि समाव अनसुलाया हिनजाव गोदाना
एसेबां गाबसेयावबो गाबाखै।
बियो सान्दोँसो नामाथाय-
हाबानि समाव हिनजाव गोदाना गाबोब्ला
बांसिन जुलिनि साजायनाया बांसिन समायो।
जुलिनि अराबो रोहो रोहो मिनिस्लुयो।
गोथार गोसोजोँ होनाय
गोदै गोथाव फ्रसादखौ मिनिस्लुयैनो जायो।
ओजोँ बेम फार्टि दामग्राफ्राबो मुजिनाय मोनो।
बिसोरहा बिदिब्ला बानाय मेँनाय नागोबोर लाङो।
बैराथिफ्रा गोदै गारांजोँ साबसिन
ललिनो खहाबो।
नाथाय फैसालिया एसेबां गाबनो माब्रै हाखो?
बियोथ' बुंदोँमोन-
आंनि हाबायाव आं मोसागोन।
हौवा गोदानखौ आथिँआव गुगुरुब खुलुमना मिनिसुलु अर सेराव
आर'ज गाबगोन।
सुखु- दुखुनि संसार जानो समाय लागोन।
नाथाय! नाथाय! गासैबो बिनि उल्टा।
हाबानि जोबनाय समावबो बियो मोसायाखिसै।
एसेबां आहुजानि बोदोर गाबखांनायाव
बिखायादि दुरलुब दुरलुब मावदोँ।
अब्लाबो बियो मानो मोसानो गोसो जायाखिसै?
आरो मोनसे जानाङै जाथायाबोदि जालांबाय,
बेयो माब्रै?
मानो जानो मोनखो?
खुंगुर फंबाय मेटरा बिखौथ' मोसानोसो बोदोँमोन।
बिखौ मानो लाजि फोनांनो हिनजाव गोदाना सोबाखो?
बेथ' लाजिनांथाव हाबानि जाफैरै जाथाय।
नाथाय हिनजाव गोदाना मानो सोबाखो
बेखौ सोँनायानो मोजां जागोन।
बिबारि एमाव गाबै गाबै
हांमा सुरदोँ फैसालिया।
सानफा हाबायाव हिनजाव लागो,
हिनजाव गोदान आरो मेटरिनि गाबनायावबो गाबाखै अनसुलाया।
नाथाय दा मानोबा गाबनो ओँखारदोँ।
गाबदोँबो सिरि सिरि।
गाबब्रुं गारांजोँ बियो हिनजाव गोदाननाव सोङो-
सना, बिबारि एमाव बेबादि हांमा सुरनाया
मोजां नाङाखै।
दे सना जालांनाय नंखाय नंखाय
जाथायफोरखौ बावलांदो।
- अनसुला! आंहा नोँनो फंनैसो
बाथ्रा बुंनांगौ दं।
- नाङा सना दिनै हरथौबाय।
उनाव बुंबाबो जागोन।
- ओहो, दिनैनो आं नोँनो फोरमायगोन।
आंनि फेरलेबसे बिसम्बिफोरखौ।
जायनि थाखाय दिनै आंनि मेगनाव
मोदैया सानफा हानाय अखानिफ्रायबो
साननो गोनांसिन मोदै गदोँ।
- बिदिब्ला बुंदो।
आं खोनासंलांगोन।
- खोनासं,
आं बांद्राय सान्नायावनो दिनै
हाबायाव बांद्राय गाबबाय।
बिनि जाहोना हाबानि मेटर
खुंगुरानो बुंजायो।
दिनै थांनाय फुंआव आं खुंगुरखौ नुजेनदोँमोन।
थांनाय बोसोरथामनि उनाव।
बिनि मोखां आरो मेगनानो आंखौ गोजाम बिसम्बिखौ एरखांदोँ।
आंखौ बांद्राय सोगाबदोँ।
थांनाय जानाङै जाथायाबो एसेल' लाजिनांथाव नङा।
नोँबो नुनायमोनब्ला मा सानगौमोन आं मिथिया।
आं सानैसो आलासिनो साहा
लुना होदोँमोन।
बेयावनो बियो आंखौ मोसानो
बोना लायदोँ।
बेयाव बिजिरनांगौ गैया नाथाय
आं मोसाया होनना सिमब्रेनायाव बियो आंखौ
मुगैथावै बिखायाव दांना थिखोदोँमोन।
बेयावसो आं बेखौ गोसायै सोबानाय जादोँ।
- थारैनो नंमारगौ?
- नंगौ नंखाय खुगानि राव नङा।
बोसोरथामनि सिगां जोँ बंङाइगाव कलेजाव फरायनाय समाव
मोजां मोनलायदोँमोन।
बियो आंखौ गावनि सान्नायखौ फोरमायदोँमोन।
आंबो गोरोबलायदोँमोन।
जोँ मोजां मोनलायदोँमोन।
नाथाय लाइमोन गोरबो सोलेरनि अख्रा लुबैनाय।
बियो सानसेखालि आंखौ गावनि लजिँआव लेँलांना
गाज्रि सोमोन्दैयै गोरोबनो
हाबिला जादोँमोन।
बेयाव आंहा सानै हयै
बिनि उल्टा बाथ्रा बुंदोँमोन।
बै साना बेबादिनो फैमाल थांदोँमोन।
नाथाय बियो बांद्राय लाजिदोँमोन आंखौनो।
सिख्ला जानानै आं सिख्लायैनो
गोसो गोरबो सोलेर गोथारैनो
थाबोदोँ।
बे समनिफ्राय बियो आंखौ जेबो खौरां लायाखैमोन।
सानसेखालि बियो आंखौ सोमोन्दो नागारनायनि मिसेस लिरहरो।
- थारैनो बेयो नंगौ फैसालि!?
- नंगौ, बेयो गासैबो सैथो।
नाथाय खुंगरा नोँ मा जायो?
- बियो आंनि लोगो, फैसालि!
आंनि असेथार लोगो बादि।
गोजौ फरायसालियाव फरायनाय समनिफ्रायनो जोँ लोगो।
उनाव जोँ गावगाबाव कलेजनि सोलोँथायखौ लायो।
गावगाबागाव गोसोयै।
- अनसुला, बियो थारैनो गोसोआ मोजां नङा।
गोगो गोरबोआ बेनाव गैया।
बियो सिख्लाफोरनि सोलेरखौ गाज्रि खालामनो नाजायो।
नाजानायल' नङा बियो साब्रैसो सिख्लाफोरखौ मोजां मोन्ना
नागारबाय।
मुगैथाव बिनि आखुआ
आंनि खोमायाव गोग्लैबाय।
- फैसालि थारैनो बाथ्राया सैथो?
आंनि लोगोआ एसेबां गाज्रि?
बिदिब्ला गाज्रि लोगोजोँ गोरोबनानै
आंबोदि गाज्रि!
- अनसुला नोँ- थारैनो नङा।
हरथौबाय सना,
अनसुला जिउ आंनि।
फैदो- आं गोथारैनो दं।
- फैसालि!
नोँ- नोँ -नोँ- !

गोसो हाथास बिखायाव
दं बिरो मेगनाव
सिमानि फैसालि मोना मोना
गोसोम आरो गुफुर लामानि
थांनाय फैनाय गैया अनजिमानि
बिरोल' मेगनाव सिनाय मोनैबादि
सुजुलां सोरखिलां मिजिँजोँ
गिदिँ गिदिँ बुङो गोसो सक्रआ
खरलेब आयनानि मोदाननाय
फ्लां- प्लिँ गोसो बायगर मोनसे
हायाखै सिनायनो बहानि
खामखोन्दा अरनि बियोदि हांगारसो?
एबा जिगाबनि फ्राव सान्दुंजोँ
बिजिर जायै बेरफ्रावनाय फाग्ला मैखुनसो?
दंङ फिसिनाय मिजिँ
बुग्लि जाना दैज्लांनि अखाजोँ
एबा सावोननि गोसा दुंनाय सान्दुंजोँ
नुहरो रोमै रोमै
सिनाय मोना उदां मेगनजोँ।

गोमो गोथां बाथ' गां दखना गान्नानै
हायला- हुयला समायना मोसा बायनानै
दे बराय बयबो दे बैसागु बोथोर
दे रंजा बयबो दे मेथाइ खन्नानै।
बैसागु बैसागु बैसागु
बिखा बिख्लोनि आमाय थख्ल'
समायना- समायना रंगिना- संगिना
खौऔआनो लेँहरबाय मेथाइ खन्नानै
एम्बुआनो हांख्रायबाय मोन्थोर आवरायनानै
सिफुं दामै दामै जोमैया
मिनिबाला- बाला समायदोँ बिफां- लाइफांआ
दे बराय बयबो दे बैसागु बोथोर
दे रंजा बयबो दे मेथाइ खन्नानै।
ज्राब गारहरदो गोजाम गोसोखौ
गोजाम बोसोरनि एना एनिखौ
ज्राब बावगारदो गोजाम सबिखौ
नांलाय- खमलाय हिंसाइलायनायखौ
गोमो- गोथां गोदान गोसो लानानै
जोँखोल- समायना मिनिस्लुनानै
दे बराय बयबो दे बैसागु बोथोर
दे रंजा बयबो दे मेथाइ खन्नानै।

ओरैनोसोमोन नोँनि मोजां मोनफ्लानाया
सिरि सिरियै नोँनो नेवसिलांबाय
गोरबोआव बुजि मोनै हांमाया आंहासो थाबाय
ओरैनोसोमोन नोँनि मोजां मोनफ्लानाया
सोफै सोफै सिमांआवनोँ
नांफै नांफै लामायावनोँ
गुलि गुलि नंखाय माया
बेयो गासैबो नोँनि जिग्रोद साया।
बै साननि बैफोर गासैबो
गोसोखांथिया हाहांहां अखा दिनै
हाब्रुजोँ बुंफबनाय बै दिनै सावगारिया
गुसेब गोसोनि गुसेब नोँनि मासिया
ओरैनोसोमोन नोँनो मोजां मोनफ्लानाया
सिरि सिरियै नोँनो नेवसिलांबाय
गोरबोआव बुजिमोनै हांमाया आंहासो थाबाय
ओरैनोसोमोन ओरैनोसोमोन ओरैनोसोमोन
नोँनि मोजां मोनफ्लानाया।

सल'खौ आं लिरनोनो सानाखैमोन।
लिरनांगौ जाथारबाय।
बिरगोस्रिनि लोगो सुजुगिरि
हांफुला गयारी आदाया
लिरथार लिरथार नारसोमबाय थानायावनो।
सानसे साननै सानथाम सानब्रै रुंगलांब्लासो
मिनिस्लु नंद्रायै सोमब्ला सोमब्ला मोखांङै।
सल'आथ सल'आनो जाबाय
सल'नि माबा माबि
गान्नाय जोमनायखौसो
आदा खावया लिरगिरिया आन्दायथारबायबादि।
सुजुगिरि आदाया सान्नो हासिगौ खोमा
लिमारिक खन्थाइखौनो लिरबानो जागौमोनना।
माब्लानिफ्रायथो सल' लिरफेरखो बेलाइ?
आं गोसो थोखोमानाय रैसुमै मायनावाबो हले
मिनिया नङा देँखो होआब्लाबो
खुगा मुथेथारखासिगोन।
आंहा सन्देह गैया।
हे रैसुमै मायनाव आंनि सल'खौ फरायदो!!...
मानसिखौ नुग्रोमोन्ना गाबज्रिहरदोँ आं
- ओइ मैदा नाग्रा। होन्नानै।
आसरिद मानसिया लाजिसुलु आंनि मोखां थोँजोँ आवगायबोयो।
बियो आंखौ थारैनो बावथाराखै।
आंनि लोगो सिख्लाफ्रा
बेखौनो खे, खे, खै, खै,
हि: हि: हि: जाय हागौ जेरैनो मिनिदोँ।
बिसोर सान्दोँ जानांगौ
- मानसिनि मुंङानो मैदा नाग्रा!
मा नामसै बेलाइ?
बेनो मिनिनायनि आसोल मुलिया।
पि. इउ. आनजादखौ फोजोबनानै
बेंगालरआव थांदोँमोन आं।
बेयावनो जोगोर माहल्डारनि गंसे हटेलाव
बिथांजोँ आंजोँ लोगो मोनलायो।
माहल्डारनि बेसेबा गिदिर हटेलाव जोँ
खामानिखौ रानना लालायदोँमोन।
बिथांआ लादोँमोन मैदा नानाय खामानिखौ।
बियो बेखौनो मोजां मोनोमोन।
आं जानाय लोँनायनि बायदि
थोरसि लटा सुग्रा जादोँमोन।
नै बोसोर बंङाइगामियाव लजिँ थानाय
आं गोरोँखामोन।
दरमाहाया दानफायाव थाम रोजाफ्राम।
बेनोबा मबाइल रिसार्ज सोनो आग्लाय थारबावो।
आं बांसिनै रं नंबर रायज्लायामोन।
थानाय Facebook आव हले
जायखौनो बेखौनो आइ लाभ इउ होन्नाया हुदाथारमोन।
सिख्लाफोरनि सावगारिखौ मोजां मोजां
नुब्ला डाउनलड खालामना लायोमोन।
आरो सोरनिबा गाड़ि मटर गोदान गोदानाव
सावगारि खेबजानानैबो गावनि
फ्रफाइलखौ सानफा मोनफा
गोदान सोलायनो बावखा थारामोन।
नाथाय बिथांआ माब्ला सोरांङै हरथौओ
मिथिस्लाब लायै रं नंबर रायज्लायोमोन।
बांसिन गावनि कक्राझारखौ बाखोनाय बाखोनाय
खिन्थाहरनो लाजिथारामोन।
फोथाय जायो फोथाय जाया गावसो मिथिगौ।
आंखौ हले सिख्लाफ्रा मुम्बाइआव
आमिर नङाबा सलमान आरो
सारुक खान मोनजोँ फाइटिँ खालामग्राबादि
नुदोँ होन्नानै सिख्लाफ्रा कमेन होनो
बावथारखायामोन।
आदाया मा साख्रि मावो होन्नाबो
गोबांआनो सोँफ्लायबाय थायोमोन।
सिगां समाव जोँ मैदा नाग्राजोँ आंजो
मिथिलायामोन।
बेयो बर' ना आं बर' जोँ
गाव गावनो सिनायथि गैलायामोन।
स्नि- डाइननि उनावसो जोँ
सिनायलायदोँ माने रायथिलायदोँ।
जोँजोँ लोगोसे आरो सासे हारया दंबावोमोन।
बिनि मुंखौ बिकास सिं होन्ना बुंदोँमोन।
सानसेखालि जोँ हटेलावनो ओँखाम जानाय समाव रायज्लायदोँ।
सिगां सिगां मैदा नाग्रायानो गावनि सिनायथिखौ होदोँ
ओरै होन्नानै
- आं कक्राझारनि।
आंनि मुंखौ बुंख ब्रह्म होनोलै।
बि टि सि नि गाहाय मन्ट्रि हाग्रामा महिलारिखौ सिनायोदा?
बिनि नसुंसेब्रा जोँनि न'आ।
उर्खाउआ आंनि आदै असेथार जायो।
नंगौना नङा आं मिथिया
थेवबो आं फोथायदोँ।
बिथांआ आरो बुंबावदोँमोन
जोँना आफायाबो सासे माष्टार।
आंखौ हगार हरथारामोन बेँगालरआव।
आंसो हिन्दी सोलोँनो होन्नानै
अख्रायै फैथारदोँ लोगोफोरजोँ।
लोगोफ्रा दा सिकुरिटि थालाबायदोँ।
हारसा बिकासाबो गावनि सिनायथिखौ होदोँ ओरै
- जोँना न'आव माहाजोनथारलै
आंसो जोबोद अख्रा।
आं बेयाव बैयाव थालाबायनो मोजां मोनो।
गाव गाबागाव खामायनांगौलै।
बिथांआ बुंबावदोँमोन
- ससिन हेनदुलकारखौ सिनायगौदा?
बिसिनि खाथियावब्रा जोँनि न'आ।
ज ज हनि सिँ मेँथाइगिरिया
आंनि आदा जायो।
बायदि बायदि।
आंबो खिन्थाना लादोँमोन
- जोँना आफाया जौ फाग्लाथार।
दाहार सुखनो थाखाय आंखौ
बेँगालरआव थिनहरदोँ होन्नानै।
दान मोनसे जालांलायबाबो बुंखआ हिन्दी रायज्लायनो रोङाखै।
आंबो रोङा।
थेवबो आं एसे गोरोँसिन।
सानसेखालि मोनसे जाथायखौ आं दाबो
उदै बिगुर सालायो गोसो खांब्ला।
माहाजोना मोनसे मेगं थाइगंनि थफ्ला
थिखोनो होदोँमोन।
बियो मिनिस्लु माहाजोननि मोखांआवनो बुङो
- सार, बेखौ देखोनोके लिए
आदमी चायि क्या?
मा होन्नाय जाखो गावसो मिथिगौ।
माहाजोना हले ससमा बखनानै दिउ दिउ मोसेरसेर रागा जोँदोँमोन।
बेराफारसे आं आरो बिकास सानैजोँ
गोन्दो गोन्दो मिनिदोँमोन।
सानफ्रामबो सोरांस्लाब मोनै मैदा
नानांबाय थानायखायनो
आंनि जंखायनाय रावै बुंखनि मुंङा
मैदा नाग्रायानो जालांदोँ।
फारसे आंखौबो बुखंआ लाय लथर सुग्राखाय
लटर होन्ना गाबज्रिदोँमोन।
मैदा नाग्राया आंखौ रायदाव फैयो
- मा नोँथाङा बेयाव?
- औ आं बेयावनो फरायखायोमोन।
- आं नोँखौ जोबोद थगायफ्लांदोँलै नोँथां।
गाज्रि दामोन।
आंबो सिरांनिसो,
दागगिरि भुटान खाथिनि आंबो।
- आं नोँखौ बेबादिनो सानखादोँमोन।
मोजाङैनो दङ ने?
- औ मोजाङानो खौरांआ।
सानैजोँ मिनि मिनि आखाय दाख'लायो।
सिख्लाफ्रा दाबो सिरियै मिनिदोँ।
जारौ जारौ मिनिसुलु मिनिसुलु
गावजोँगाव मोखां मोखां नायलायदोँ।