नेना थादोँ फैसालि गोग्लैनायसिम
अखाफोर ज'हाबनाय खोमसि हर
हाथासि हार्सिँङै।

सुबुंफोरा उजिदोँ एबा थैदोँ
जिबिफ्रा गाबदोँ एबा मोसादोँ
जोँनो आदार नांगौ जादोँ
जोँ गावनो थैनो ओँखारदोँ
नै अबं मादि मैया मैया
सोरजिबोल' गासैबो नोँनि।

बुहुमाव उजिनानै
मेगनजोँ आं नायनो सोलोँदोँ
बेसे गोग्लैदोँ आं समायनायै।
रं बिरं आं जेरैबो नुयो
आं आरो आंनि मोखां
गोरबोआव मोजां मोनो।
मेगनजोँल' आं मोजां मोन्दोँ
बे नङा गोरबो मोन्दांथि
आं सानस्रियै नायहाबो
मोजां मोन्ना मोन्दांथिफोरखौ
नोँनि महर जेब्ला नोँ-
आंनि गोरोन्थि खालामो
नङाब्ला बेसेबा आंनि गोग्लैनाय।
दा आंनि मेगना नुहरो
बेसेबा खोमसि साग्लोबदोँ बिसोरखौ
आरो आंनि मोन्दांथिया गुस्लायो
बेसेबा रिमोनद्ला मुलुगा
गिदिँदोँ सोरां जोँमानि अराय
आं बुंनो हायादि जेब्ला
गोजा जोँमानि सोरांआव गुफुर
जाथावै गिदिँनाय गोसोआव
गोसोम संसारि गोसोआव।

आं माब्लाबाबो नुफेराखैमोन।
अनथाव बाथाव, नायबाय- थाथाव।
आंनि गोसोआ गलिलांदोँमोन।
थारैनो आं बेखौ
मोजां मोन्दोँमोन।
(16 नबेम्बरनि सान)

" बावनो हाया... नोँनि आंनि
थैस' थांस' सतबांसा लानायखौ
नेवसि हाया नोँनि होनाय
जिउ थुलुंगा गासैबो
बावगार लांनाय नङा
जिउ थुलुंगा गासैबो"
..............
मेथाइखौ फोजोबनानै जौसांनिफ्राइ
लाजिसुलु ओँखार बोयो।
बियो बिखायाव बिखासे दाहा
लानानै सोमब्रोम गाबब्रुं मोखांङै
जिरायग्रा मासियाव जिरायफैयो।
बिनि मेथाइ खन्नायाव
बयबो सिरि थाहाबदोँमोन।
बाज्ल' बायनानै खुगाजोँ फेम्फा सुनो
आरो आखाय खबनोनो गासैबो
बावगारलांदोँमोन खोनासंग्राफ्रानो।
सोरबा सोरबाथ' आरो
मोदै ज्राम ज्राम सिरिदोँमोन मेगननिफ्राय।
सिख्लाया जौसांनिफ्राय ओँखार बोबासो
बयबो गोमलायनाय आखायखौ खबदोँमोन।
सिख्ला मेथाइ खन्नायाव
आंनि मेगननिफ्राय थरथिँ थरथिँ
मोदै बोहैदोँमोन।
सिख्लानि मेथाइखौ जागायनायनिफ्राय आं मोदै मोदै फसरैनो
बेसेबनोबो हायाखैमोन।
मोदै गदोँब्लाबो आं मेथाइखौ
मोजांङैनो खोनासंदोँमोन।
गोसोआव लानोबो नाजाथारदोँमोन।
नाथाय खोनासंनायजोँ लोगोसे
सिख्लाखौ लानानै आं बिबार
बारियावसो बिरलांदोँमोन।
गोदान संसार साजायनो
थि खालामदोँमोन।
जायनि थाखाय आं मेथाइखौ
आबुंङै गोसोआव सेबखांनो हायाखिसै।
सिख्लाया मासियाव गाबहां फावदुर फावदुर
मोखांखौ लानानै
जिरायब्लासो
आं मोदै हुगारनानै नायहरदोँ।
बेयो आरो फरायनो हाथावै खोमसि नङा।
गोसोआव गोजाम मिजिँआ
हाथासि महर रिफिनायसो।
बेयो दा आंनि मेगनाव
समायनासिनसो जादोँ।
सिख्लाखौ नायबाय थानानै आं
बिनि मेथाइनि गुबै रावखौनो
साननो हमदोँमोन।
थारैनो बिनि मेथाइया
गोथौ बिलोनिफ्राय सिखारनाय
मोदैनि खुवा आमै मै
सिखारनाय दं।
बेयो दुखु गोनां गोलाव रमान्टिकनिसो
सेबखांना रोजाबनाय मेथाइसो।
नाथाय मेथाइखौ रोजाबनानै
सिख्लाया मानो गाबखो?
बियो गावनि अंगुबै सल' नङाथ'?
आरो खोनासंग्रा गासैबो
फरायसा- फोरोँगिरि गासैबोनो
बिनि मेथाइआव दुखु जाफादोँ।
सोरबा सोरबा मोदै हुगारदोँ।
आंबोथ' आरो बारग'नो हायाखै।
जानांगौ बिनि दुखुआ बिनि सल'आनो।
गोसोआव बायदि सानबाय आं,
सानबाय थानायावनो आंनि लोगो
बिलिफांआ बायजोआव हासुनो होननानै लेँबाय।
जोबोरैनो लोगो बायदियै
आंबो बिनि रावखौ फेलेँ खालामाखिसै।
खेबसे मोजांङै मोखांआव नोजोर होनानै
सिख्लानि सेरजोँनो थाबायो आं।
बे समाव सिख्लाया एसेबांमानि हाथासि जानाय
खोमसि मोखां गैलियामोन।
बियो एसे मिनिसुलु मिनिसुलु
लोगोफोरजोँ सावरायदोँसैमोन।
कलेजनि साहाजोँ थानाय जिरायग्रायाव
जिरायनानै जोँ बायदि
खोथा रायज्लायदोँमोन।
सासे लोगो सोमदोनाव सोँदोँमोन आं
- सोरनावबा दहाय सिख्लानि मेथाइ
रिकर्ट खालामबायनाय दं नामा?
होननानै।
लोगो लोगोनो बागदावखांलायजासे बिरना बुङो
- आंनाव दंलै।
दाम खमनि मबाइलखाय बारा मोजां खोनायाखै।
- जागोन दे।
खोमायाव होथाबनानै खोनासंबा खोनायाबे।
मिनिसुलुनानै आं बुंदोँमोन।
बिरना आंनो ब्लुटुतनि गेजेरजोँ
सेन्दिँ खालामना होयो।
खुसिजोँनो आं बिरनखौ रोजासेमानि
साबायखर होदोँमोन।
दान्दिसे उनाव जोँ
अडटरियाव सिंआव हाबहैफिनो।
बेलासिथार समाबो जाबोनो हमबायमोन।
बे समाव हारिमुयारि दिन्थिग्लांनाया गेवसारबायमोन।
लाइटा साथिनायजोँ
सिख्लाखौ आं मेगन फिदिँब्लाबो नुआखिसै।
गोसोआव सानबाय बियो थांबाय जानांगौ।
बियो नंगौ मोनाजाफामानि जेरावबो
थानो मोजां मोना।
सोरांबारां जेब्लाबो बियो सांग्रांखा।
सिख्लाखौ आं नागिरबाबो नुयिलाय आं गोजोन्नाय मोनाखिसै।
थाथिरनो गोसोआ मानोबा
खहाबा खहाबा आंहा।
समायना रमायना सिनायजोबनो हायि
सिख्लाफोरा हायलालाय हुयलालाय मोसादोँब्लाबो
नायबाय थानो गोजोनाखिसै आं।
बे समावनो बिलिफांआबो गोजान
जाथारनायलाय आंखौ थांदिनो
होननानै लिँनायाव जोँ
अडटरियाम सिंनिफ्राय
ओँखारो।
लजिँ न'आव सफैब्ला
सिख्लाया माब्लाबानो साजाय आजाय
बिजाब फरायबायमोन जानांगौ।
बिनि खोथा सानबाय सानबायैनो
मोनाबिलिनि जानांगौ आदारखौ जाखांनानै
दो उन्दु लांबाय आं।
मबाइलाव बिनि मेथाइआ रिँबाय थाबाय।

आफाया देग्लाय द्लाम बोरायबाय
मै- जुंगालखौ बानखांनोनो हालिया
बोथोरावनो आयआबो थाबद्राय बुरैबाय
दैहु थाइसेखौनो फाफेर हालिया;
लाइमोन सनाखि- सनास्रिमोनजोँ
एदावजा- जंखायजा आबौआ हले
बियो दाना अमिताभ बसन बाराबा
दरमेन्दर बादिसै गोसोआव।
दैहु फाफेरना दुहु दुहु
सुरि जालांनाय दखना सुरिया आयनि,
थावोनाव लजिँ थाबायनाय आब'मोनहा
सोरनि बिघ्दा मोनखोथाय-
आयनि दखना सुरिखौल' नङा
लाइटार लगायबाय सालामाटानिखौनो,
बुरै आयाबो गानसै दाना सिख्रि मेगन
नङाबा हारसा मेलेमनि आर्टिँ आगर।
मोसौ दामब्राजोँबो रुजु जायै
आंनि देरसिन आदाया
लावमुरा आफानि मोसौ हालुवाखौ
मानोबा खेब खेब नायनो हालिया,
मुम्बाइ- बेँलरनि बारा बेनाव नांदोँ।
थिफुद्लीलि आयनि फिसाजो
बैसोआव बेसेबा आंनि उन्दै
बियो जोनोमावनो उल्टाखा नामाथाय-
दाउखि हनाय एबा गोबोर गारनाय
दैहु फाफेरनाय
बाराबा दैज्लांआव बिसन फुनाय
माय गायनायखौनो बाद हो,
संग्रा अकदाबाव ओँखाम दो जाननो
सि: सि: बियो लाजियो;
मिसनाव फरायना सोरनि रोँबोखोथाय-
खाल्साराल' नङा
आसार आखु थाल्ला सोलायबाय।
सासे फंबाय दं
बेबो राव रोँनाय मेडियामाव
मेडियाम माने स्पेसियाल मेडियाम,
नांगोल जुंगालखौथ' सिनाया सिनाया
खोमायावनो खोना बावथ्राखैनो-
उन्दैयावनो दोनहर जानायथ'-।
आय आफानि आंबो सासे
बयनिबो गेजेर फिसा हौवा
गन्थं दाब्ला, मोदोम बन्दा
मेँख्ल'-ख्ल, मोखां खावब्ला- ब्ला,
नांगोल जुंगालखौथ' रोङा नङा
लाइजामखौबो लिरनो रोङा नङा
सुखु- दुखु हास्थायनाय- बोराबनाय
मबाइलजोँ खौरांबो हरनो हागौ आं
आंनि सोमोन्दोआव नाबोथिनो आरो
सोरबा सोरबा खुरमा आमाय- आनैमोननो,
लावख्रिगुरि- बाथारमारि- बिरहांगामि
नङाबा कक्राझार, बंङाइगामि, बिजनि
Hero Honda एबा टेक्टरबो सालायनो हागौ
सान्नांगौआ बेसो जाबाय टेनसना
बादायलायनाय गोनोखोनि मुगायाव
कमफुटार- इन्टारनेटखौ सिनायनो
हाबावगोनदाबि?
जाहाज- इर'प्लेन गाखोनायनि
सिमांथ' गैयानो।

थार्ला- थुरला बुंनायानो मोजां।।
जोँनि न'आव मावजि मासे दं
आब'आ फिसिनाय
गावनि जाखोन्दा बेदर हाराखौ
जेब्लाबो बियो होयो।
थनि मुंनि मासे सैमाया
भुटाननि लाबोनाय,
फंबाया अनै बामै फेदेरनाय
गावनि ओँखाम खालायखौनो
जाहोयो बियो बुरखायै बुरखायै।
गय बागान सिङाव बुरैरै
अमा मासे दं फिसिनाय
आयआ- गुन्दै माब्लाबा अफ्रि
जाहोयै जाहोयै फेदेरनाय।
लावमुरा आरो गं मेना
बोराय बोराय हालुवा मोसौआ
नांगोल बोग्रा आफानि,
माय बजा रोगानो गारि बोग्रा;
दैज्लां मेसेँ खामानिया आफानि
दै- दौनाय खाहैनाय आरो लायनाय।
दाउसा, फारौ आरो हांसोआ
आय, आब' आरो आनावनि
गावबा- गाव मालाय बाहागो,
माथामसो बोरमा खासिया फंबायनि,
फुख्रि बिलोआव थब्ल'लाय- दावलाय
ना मागुर, ना रौआ आफानि।
उन्दुग्रा खथायाव बेमा- खांखमा
फालो फालो एन्जर इंगिनिया
- बेफोरो गासैबो आंनि?
आफानि माय दुब्लियाव
एन्जर दांसुलिया, एन्जर बुंगा
नङाबा बाथासिरा- इंगिनि
बेफोरो गासैबो आंनि?
बिरि- सिगारेड्- सादा
फाल्सार- जौ- गानजा
बेसोरो गासैबो आंनि?
हाय गशाइ!
नोँनो बयनिबो गिरिब्ला
होदो बयनिबो खर'आव,
बिजिरनो बिसोरखौ मेलेमाव;
आंहादि मा मावनांगौ दं?
मा सोलोँनांगौ दं?
आंदि अलसिया एबा
आंदि मावनांगौ खामान- मावगासिनो दं।

बोसोरे बोसोरे सालगुरि लाइमोन आफादनि
खुंफुंनाय रंजालि बैसागु फोरबो
देँखो मोनाबिलियाव
अनला बुगबा देँखो
मोनाबिलिखौ गावनि खुगा मेथाइजोँ बेखेववो।
देग्लायबो अनला दाया फुरा फुरि बारगवाखै।
थांनाय बोसोराव बिनि
मेथाइया फुरा फुरि
खाट्रा हिट जादोँ होनबा
बुंद्रायनायनि गोरोन्थि जाया।
बेनि मेथाइखौ सोरबा सोरबा
रिकर्ट खालामखोमानाया
दाबो दं।
आमटेका लेँग्रा बर' फ्लिम सोना हरग्रा
कमफुटार गलायाव
हुरा हुरा दामनाय दाबो खोनानो मोनो।
अनला दानि मेथाइखौ।
देग्लायबो अनला बुगबानो बेखेवनायनि
स्टेज फार्टखौ मोनदोँ।
बियो देग्लाय स्टेज फार्टखौ
लाट्रामोननो होननानै
आफादनि मोनसे सुलुंनिफ्राय खोना हांदोँमोन।
देग्लाय सालगुरियाव देँखो मोनाबिलि
खुंफुं जानाया बाथि खेब जाबाय।
देग्लाय आरो साबसिन जागोनहाय
होननानै आमलाइगुरि, थास'बारि, गोमोबिलि
आरो माबा माबि बिटिनि बबेबा बबेबा
गोजान गोजाननि सिख्लाफोर मानि दंफै खासै।
मोसाखावरिबो देग्लाय गोजान गोजाननि रां होनानै लाबोदोँ।
मेथाइ रोजाबगिरि मुंदांखा थरला गाहारारीया फैगोननो
होननानैबो खोनाखादोँ।
समाबो जाया नङा जाबायानो।
अनला बुगबा देग्लाय आन्दायदोँ
माबादि मेथाइ खन्नांगौ
बेखौनो सानै सानै।
गामाखालि बेयो दानसे नङाबा
जिबा सानहालागै सिगां सोलोँखायामोन।
खिनाय हासुनाय मानि बियो जाया जाया
थालिम होबाय थायोमोन।
देग्लाय नाथाय बियो मानोबा माबा फुरा फुरि
गोसो गैथारै बादि।
राहाथ' गैया माबा नङा माबा
मेथाइ रोजाब खानांसिगोन।
आफादनि अख्रायै नारसोमनायाव।
अनलाया स्टेजाव गाखोबाय।
अब्लाहालागै रायजोफोरा
सायनेमा सालियाव बुंजोबलायथारबायमोन।
रायजोफ्रा बेखौनो उसु खुथु
जालायगासिनो दंथारोमोन।
मानोना अनला दाया देँखो मोनाबिलिखौ
बेखेवा मानि समाबो फावसायलांगौसो।
अनलाया जौसांआव गाखोबाय
लोगो लोगो आखाय खबना
होबाय बयबो।
सोलोँखानाय नङै अनला दाया
खिन्थु खैफोदाव गोग्लैबाय।
मा मेथाइ रोजाब बावनो?
मालाय खनखानाय केसेट
एबा मेमरिनि मेथाइखौ
बोरै रोजाबनो?
मान सन्मानानो थानाय नङा।
बियो दसे सानहाबनाय आरो खावब्ला
मेथाइया जाबायानो गोसोनि दाइरियाव।
बावैसो सिगांआव मोनसे
जाथाय जालांबाय।
जाथाया बिफाजोँनो जादोँ।
नंगुबैथार जाथाय।
बेखौनो रोजाबनोसां होनना
बेयो सानबाय।
लोगो लोगो खर्पन दैना
रोजाब्बाय-
" आंनि हिनजावखौ आफाया फसायाखै-
लाबोनायालाय आं लाबोबायमोन
सान्दोँमोन आं सयथिनिबो-
देग्लाय बैसागुआव जलायनोसै "....
बयबो ग्रोम ग्रोम आफा खबना होदोँ।
बयबो रंजायै जेन'
बोदोर बैसागुखौ बरायथारबायसो।
सोरबा सोरबा नाथाय
रागाया जोँखांदोँ।
मेथाइया गाज्रिद्राय जाबाय बायदि
गोसोआव नांदोँ।
ओजोँ अनला बिफा
थाथाव हादानारिया
जोबोद गोथौयै लाजिथारबायसो।
बियो फिसाज्लानि मेथाइखौनो ससायनो
हायाखिसै।
मोसागिरिफोरनो बान्था होनो
लाबोनाय बेसेबा बुरजा मेथाइखौ
बियो गारसाव जोबो।
आरोबाव मा खालामगोन
मा खालामा गाबगांनाय
आहुजा बक्ळखौ जोख्रेबनो
गोसो जायो।
नाथाय मा खालामनो?
एसेबां रायजोफोरनि गेजेराव।
माथाव माहाजोन गासै
मान सन्मानानो थानाय नङा।
ओरैनोबाबो फिसाज्लाखौ दिउ दिउ
रागा जोँना दंखायोमोन माथावआ।
आरोबाव बेबादि मेथाइआ बिखौ
ब्लाव ब्लाव अराव गिहि
लुना होथारबावबाय।
रागा जोँनानै बियो लावथाइनि न' फारसे थांबाय।
मा खालामनो मा खालामा जानानै
सिखावैनो
बियो खदाल गंसे लानानै
हा सिङाव थौले फबनानै
लाबोनाय थारखौ थबस्र
जावसबाय आरो फबफिनबाय नुयैबादि।
लोगो लोगो जेरैबो
खोमसि।
अनलायाबो एफा मोजां
मेथाइ खन्नाया खान्दा।
रायजोफ्रा हख्राव जोबबाय
मा जाखो?
खारेन गैला नामा?
ना थावानो गैला?
ओजोँहाय नाथाय सालाय खान्दा
आबौनि लोखोना बारियाव एब्रेनाय
सोदोब बह्रा जेनेथरा
दाबो गोसो होना गाबगासिनो दं।
थार जबाय।
सोरबा मोसानायाव जोस फ्रांबाय होनना
आफादा सानबाय।
भलनथियारफ्रा थर्स सुयै सुयै
नोजोर होबाय आर्टिँफोरखौ।
नाथाय नागिरोसो नागिरो
फिसा जदोँ थाल मोनाखिसै।
बेसेबा गोबाव जेनेथरखौनो गाज्रिजाबाय
सानगारना गाबहोलाय बन्द
खालामलाय खालामनायबो जाबाय।
थाराबो जेरावबो जवाखै
जेनेथाराबोथ' गाज्रि जायाखै
मा जाखो साननोनो हायाखिसै।
जेबो राहा जायाखिसै
समा बारग' लांथारबाय माब्लाबानो।
हाहां जाना थानाय जोमैयाबो
खुसिसो मोनखोना माखोथाय
द्राम द्राम अखा फसरहरबाय।
बांद्राय अखा हानायलाय
सायनेमा सालिया
थावरियाखिसै।
बयबो रायजोफ्रा सोरबा
खर' हमथा हमथा
सोरबा गोजांजानानै
खारसार लांबाय।
ओरैहाय खुफुंनो हायैनि
दुखुआव आफादा थिँग्रिँ थिँग्रिँ
दाबो थर्स सुगदाव बायदोँ।
सायनेमा सालिया लांदां जालांबाय।
हरनि जिनै रिँगानि बारा
बाग्लाय लांबाय समाबो।
बेसेबा थिँग्रिँ थिँग्रिँ खोमसियाव
थर्स सुनानै अनला दाया
बहा मा जादोँ
नाजाबाय थाबाय।
बिगियान आदबै नागिरै नागिरै
उनथाराव मोनबाय बियो।
- सि: सि: सोर जावस'
लांखोसै !?