(1)
रं नाम्बाराव गोसोथोनाय सिख्ला
बुंनायाबा हले गोदै गोदैखा
सिफिया लांदां जादों
रां सोना हरनांदों
नुबाय दाखालै हटेलाव फिसायानो सानैखा।
               (2)
थैलायबाय थादों जों बर'आ
खौसेथि गैया गोर्बोआव बिसोरहा
मैयाबो थैदों साथाम
दिनैबो लावदों मोनथाम
नांगौलै बिदिनो खौसेथि गैया साला।
              (3)
लाव जा फानथाव जा
जोंनि मोसौआ जा गिदिर जांगिला
दाजा बर' गियानि
जोंलाइ लाजिनो रोङि
गावजों गाव थगायलाय थैलायबाय था।
            (4)
सिथाब सिथाब बे सिख्ला सासेया
गोदै गोदैखा बुंनाय रावफोरा
बिमायाABWWFनि लिदार
फिसाझोआ **** आव मार
सयथिबो आंहा बदनाम जाबा गैखाला!
                (5)
राज्योनि मेगनाव मोदैनि निजोरा
गामि-गामि थैलायनायनि इसारा
लिदारफोरा मिनिदों
भ'टनि रां होफ'बदों
बा माबादि राजखान्थिगिरिफो
रनि फावथिनाया!
             (6)
आलु भाजाजों कापसे थुसो
अमा बेदरजों गंसे बोखो
फिसाखौ फोरोंनाङा
बिजाब बायनो रां गैया
दे बिब्दिनो लोंनानैनो राजा जाथारदो।
              (7)
बर'आ डाइना बुथारग्लुंदों
गुबुनफोरा नायनानै हालाला मिनिदों
मोजांब्लाबो डाइना
गासैबो खाना
देलै बर'फोर बिदिनो गावजों गाव थैग्लुं।
              (8)
नै सिरांआव थैलायबाय साथाम
क'क्राझाराव हमदोंलायनो मोनथाम
धर्ना होसोलायदों
पुलिसआ बुग्लुंदों
जाजोबबाय नामा बर'आ गासैबो मोनथाम!

नों मानो एरलुदों
आखाय खेबलुहोलाङै
मानो इन्जुर खेबलुबदों?
देरबाय लावबाय सिख्ला देलों जाबाय
नांगौ मानि नोंना आइ आफा
होफैबाय गोजोनहोनो।
आरोलाय मानोथो फेखन
मा नांबांगौ नोंनोलाय?
मा नांबावगौ?
जानांगौ सिख्ला गोसोआ
सोरबा जोहोलावखौ गोसोखां
बोराबदों आथा-सिथा।
फैगोन दे सना
नों हांखुर दाजा
नोंनि सिदला आं गाहैगोन
संसार गान्थिखौ खाबोगोन।
दाबोराबसै सना
दा बोराबसै।

सिखोला बैसो नोंनि
खानाइ रुम्बां,मेगन बेस्रां,जाहाबनाय खावलाइ
नों मिथियाखै ? सना नों मिथियाखैना?
नै जों सानैनि रादायनि गान्थि
गेवनायनि सम फैबाय सना, सम फैबाय।
आइ-आफाया हाबिला जाबाय
नोंखौ नायनो हांखुर जाबाय।
नों बावबाय नामा सना
नों बावबाय नामा ?
बुरै दैसायानो साखिथार
दावब' फालोआबो खाना नंथारा।
फोलानो सान्दों नामा नों सना
फोलानो सान्दों ?
उखुमब्रियाबो जोंखौ नायना मिनिदोंमोन
हाथर्खि-अलंबारफोराबो जंखायहरदोंमोन
नों बावबाय नामा सना ?
__नों बावबाय !
बावगोमोना दंब्ला गोसो खांफिन
हानहरफिन आखाइ फोलावना
नायफिन अख्रां सायाव
जिरायहैफिन बुरै थैसानि हाब्रांआव
खिन्थागोन फारि फारि
गोसोआव नुजाफैगोन।
थांदो गोख्रै थांदो
समा फैबाय सना,सम फैबाय।
रादाइखौ फेलें दाखालाम
मेगनाव निजोरा दालाबो
जोंखोल मोखांखौ सोमखे दाखालाम।
फैदो सना फैदो
आंनि देरानि दरखंआव गसंफैदो।

रजे नों

दाजा दुखु
       गोर्बोखौ खामग्लिहोना
उसाव बादाव दाजा
      बिखायाव दाहा लाना।


दं आं रजे
     नोंखौनो अरायनि मिजिंथिना
नोंनि अननायखौ गोर्बोआव लाना।


हाया आं बाउनो
     नोंनिनो बुंनाय राव
नोंनिनो अननाय
   नोंनिनो महर।


गोरोन्थि जागोन आंहा
     बावगारोब्ला नोंखौ।


नोंनोनो अननाय आं
    गोर्बो बुंजासे
नोंखौनो फोथाइहोना
    लुसोमना होग्रोदोंमोन।

सम सम मोदानो बिबारि फामे
सानजौफुनि गोरा सोरां रोदाजों
जोंथि-माथि दैनि गुथालजों
समाइयो हायनारियै आंनि बिखासे।


गुफुर उदांनि दुखारु दाउथु
फानजारिनि लामा मोनस' दाबो
बिरग्लांनायनि हाबिलाया जाफुंआखै दिनैबो
गोजोननि मिजिआं जोबथेजानाय सनालु।


हारि-माहारिनि हांगामायाव गोमालांनाय
खास्रि-बिस्रियै हां गोमानांनाय
जिउ बुलि दावहारुफोरा दाबोनो
सुथि मोनाखै जानांगौ अरायसेनो।


गोमो सिनि जाथाया दिनैबो
बारनि बुबथिंनायाव बिरनो हाख' जाबायदों
आरो सिदोब अखानि मेगन सानायजों
सुथि मोनाखै मुंख्लं जोहोलाउ-जोहालाउजो।

खोमसि हरनि उनाव
फुंबिलिनि सुदे बारजों
दावसिन दावलानि मेथाइजों
समायदों फुंबिलि सम।
जोमै साग्लोबनाय अख्रां
आं नायदावना गिखांदों
हरनि समा आंखौ सिगिदों
फैबावबाय फैबावबाय नै दानो
खोमसिया सोंथेफैबावबाय।
फैदो नों बिबारि
सानजाहा मिनि खैरेना
होफैदो सोरां आंनि मेगनाव
फै सना
फैदो खैना
सान जाना जोंब्लाव फैदो।
बिबारि गावदां गेवलांफैदो
नोंनो होफैदो
सैथो सोरां सैथो स्रां।

दायो बिफां रानज्रिंदों
दालाय गोरानाव बादों
दाउखा सिला-सिगुन गुगा ब्लां ब्लां
मेगन फेदेरना ख्लां ख्लां


दैसा सेरनि आगानफोरा
देरबोनाय दैनि बोहैनायजों
लासै लासै गोमोरबोदों
सुबुंनि आगन दायो हमनो हाया।


सानजौफुनि खाब्रां सोरां रोदाया
मेगनाव गोग्लैना आन्दायबायदों
साखाथिनि माय नारायाबो सेरेम लांदों
गुमाफोरा बिरबायना हमजादों
जिउ मोनसेयाव बेयावनो थुंगेबाय
बाथा गोरानफोराव अर नांबाय
लांदां जाबाय फारि फारि खामना।


सोदोब मोन्थाव जेबा खनदों
जोमैफोरा बेयावनो गोसारदों
अन्थाइफोरा गोरा जासिनबाय
दाउथुआ बेयावनो बाब्राबबाय
अर जोंब्लावबाय अरदाबाव दायो
फ्रि-फ्रि अखाया खोमोरनो हायाखै दाबो।

सोरखौ सोर मा बुंनो
राजा जानोल' हुरा हुरा
होख्रावो गोरा गोरा
मासिया मोनब्ला बावबाय
गारामाया थसेब जाबाय
सोरथो बुंदों-
सोरथो बुङाखैमोन
फोरजा जाना थानाय समावलाय
बयबोसो बुंदोंमोन जुजिदोंमोन।
बोरो माथो दिनैलाय गैला
गारामा देरगालायनाय हब्रानाया।
मा जाखो ?
बुङोल' बुङोल' बयबो बुङोल'
बिमा रावजों सोलोंथाइ होसो
नै माथो आदाराम,गयाराम,आयाराम
आलाइस्रि मैनास्रि गयस्रि बिबारि
फोरोंगिरि दैदेनगिरि थुनलाइगिरि दोहोनि
होसोलायदों मालाय गुबुन बिजोंआवसो
बिसोरनि बिबुंथि खोनासंना
गामिनि गोरिब दुखुथिया जामबा जामबि
नाब्ला मेब्ला हंला हालां मोनहा
सोमबे हंले नाब्ले गायदे मोनहा
हरबाय फोथांनो बर' राव
बायला-जिला फरायसालि बर' बिजोंआव।
बिसोरखौलाय दिनै सोर नायसनदों
बिसोरनि दुखु सोर मिथिदों
मेगन मोदैखौ सोर नायसनदों।
बिसोरनोथ'मोन नोंसोरखौ राजा खालामनाया
बिसोरनोथ' हारिनि खौसेथि लुबैग्राया
बिसोरनोथ' बिमानि मोदै हुगारनो सिगांनाया
बिसोरनोथ' हारिनि अलंबार नागिरनाया।
सोरथोलाय बुङा-
गुबुनारि हाबनो मोना
सोरथोलाय बुङा-
गुबुनारिजों भ'ट गेलेया
बयबोसो गेलेदों
बयबोसो हाबहोदों।
दिनै सोर भुगिनांदों उदिस लारोंदों?
बर' हारिनि निखाउरि फिसायासो।
सोरनि थाखाय दाङाबाजि हारियारि
नोंसोरबादि राजानि मासि सेलायनायावसो
नोंसोरबादि आखुआवसो।
माब्लाथो बुङा सोरथो
बर'हा खौसे गैया
बर'हा खौसे जानांसिगौ
अब्लालाय मानोथो अननो रोङा गुबुनखौ
अब्लालाय मानोथो निमाहा गैया
अब्लालाय मानोथो बोज'बना लानो उदायरोङा??
दिनै नोंसोरबादि अनलायनो रोङै
गावजों गाव गेजेन जालायनो रोङै
मासिनि थाखायल' सानग्रा दैदेनगिरिफोरनि थाखायनो
गामियारि जाम्बा-जाम्बि आइ-आफा आदै-मादै
आबै-आबौ,आमाइ-आनै बिदा-फंबाय गावजों गाव
गोजोन गैया जुगुमलायनाय गावस्रालायनाय।

सोलेरा लंथं सुबुंस्रि गैयै
मिजिंफोरा गोथै सेवग्लेबनाय
मेगना जाखर गोजा गिथावना
देंखोफोरा खाब्रां बिखा खामथावना
रावफोरा खाथो सोदोब रिंखांहोनाय।
सिरियै गसंब्ला आथिंआ लोहो लोहो मावो
उन्दुयोब्ला सिमांआनो थैना गोग्लैयो
माब्ला एमब्रायो जिउ मैखुन।


देलाइस्रि देलाइबायो समायहोनो,
मोदोम गंसे मोदोमफ्रु सारफावनाय
सना गहेना गानफ'ब जोमफ'ब
अब्लाबो इसेबो सोलायरोङा।
सोदोमस्रि मुखा बेयावनो गोमायो
अन्थाइफोर हालो दैलो गेलेयो रंजायो।


सिदोबनाय हायाव गाजा हरनाय
फसलफोरा रानज्रिंओ गाबस्राव गाबस्राव
अखा रानो अख्रांआव,साग्लोबो खुवा
दाउफोरा बिरबोयो बाहायाव,हाबफैयो फलाननि फानजारियाव
फैसालि लामा आन्दायना हां हरगारो।

अन/जा/लि  /आं/नि
गो/सो  /रं/जा/लि  /नों/नि
आं  /बो/दोर  /बाव/लि।

उफ्ले उफ्ले गोजोमबोनाय
गोजाम हाद्रिखौ नागारना
आखायाव आसान सांखा
खाफालाव गोजा निस्थार
सिन्दुरनि फोथा लाना
दखना थावसिजों
गावदां गोदान महर लाना
बिरबोनाङो गोदान हाजों
गोरोबनो।
जोनोमनि उननि माखासे
गोजाम बिथिंखौ नागारना।
गोदान संसार जुरिनो
गोदान आगान होफैयो
गोदान न'खर।
गोरोबथि रादाय
सोलोंनो ओंखारनांफिनो।
रैरुब संसारनि राव
बिथा खालामना उन्दुयो।
मिजिंनि फिथाइ
बेयावबो सोलायो।