Kada sinusubukan kong sumulat sa wika ng aking ina,
nariyan pa rin ang sa ama, tila nagbabantay,
tila ingay na pumupuslit sa gabing malumanay.
Tila ito konsensiyang kakatok sa aking pinto,
sa gitna ng mahimbing na tulog mga alas tres pasado.
Ang pangalan ng mga kalye sa aking siyudad,
ang pangalan ng mga kalsada sa pamayanan,
ano ang sa wika ko, alin ang sa'yo, at sa dayo?
Kada sinusubukan kong umawit sa Tagalog,
bubulong ang mga rondalla, gitara't iba pang instrumento:
"anong wika ng pangalan naming ito?"
Kaunti na lang ay tutula na rin ang aking kama:
"hindi ba't oras na para sa banyo?"
Ang pangalan ng mga bayani sa labanan,
ang pangalan ng mga ninuno ng angkan,
alin dito ang salin, ano ang sa Tagalog?