बुहुमाव उजिनानै
मेगनजोँ आं नायनो सोलोँदोँ
बेसे गोग्लैदोँ आं समायनायै।
रं बिरं आं जेरैबो नुयो
आं आरो आंनि मोखां
गोरबोआव मोजां मोनो।
मेगनजोँल' आं मोजां मोन्दोँ
बे नङा गोरबो मोन्दांथि
आं सानस्रियै नायहाबो
मोजां मोन्ना मोन्दांथिफोरखौ
नोँनि महर जेब्ला नोँ-
आंनि गोरोन्थि खालामो
नङाब्ला बेसेबा आंनि गोग्लैनाय।
दा आंनि मेगना नुहरो
बेसेबा खोमसि साग्लोबदोँ बिसोरखौ
आरो आंनि मोन्दांथिया गुस्लायो
बेसेबा रिमोनद्ला मुलुगा
गिदिँदोँ सोरां जोँमानि अराय
आं बुंनो हायादि जेब्ला
गोजा जोँमानि सोरांआव गुफुर
जाथावै गिदिँनाय गोसोआव
गोसोम संसारि गोसोआव।

मिथिगौ बेसे उन्दै आं
आंनि आथिँआ दाबो हाब्रुआव गब्रयो,
आंनि आखाया हाद्रियाव थाबथायो,
खोमसिया साग्लोबनाय मेगनाव
बुबथिँ जादोँ हाद्रिनि बाराव,
जेथो गोनां लाइमोन समा
सानबायो आं आगोर गोमा गोमा,
नारसिनथायनि लिरथाइया आंनि गोरोन्थि?
आंनि खाना बिजिरथि?
आं दाबो गिदिँफिन्नो हाया उल्टायै
आंनि गंगार गोसोआ फायखनो,
आंनि गुसु आखाया हमथुमनो हायाखै
खोल खोल जोँनाय सोरांनि थखनखौ,
नाथाय नागिरदोँ एरायलांनो-
मिथिगौ बेसे उन्दै आं।
आंनि आथिँआ मिजौ हाबनाय
गिदोँ आं नै इंसिनि गोथौ हाखरखौ,
आं दिनै गोरोन्थियै उन्दुआखै ने?
आरो थैनाय जागोन बेजोँनो?
आं गिदिँफिन्नो हायो-
आंनि गुसु आखायजोँ हमनानै थखन
लासै लासै सोरां लामाजोँ
जुदि आं अख्रां फारसे नायहरो।

हारिनि थांनाय सिनायथि
नोँनि बे गेदेर नाजानाय,
गुरु ब्रह्म, ब्रह्म गुरुदेब
गेदेमा बेनो नोँनि सिनायथि
हारि हादोद मेच गान्दी मुंङै।
जोँ बुङो गेदेमा
जोँ बुङो गुरुदेब
हारि हादोदनि गोथां लामा।
कालिचरण नोँ गेदेमा
बेसे सिबिजाथाव आगोमा
दावगानो फोरोँनाय अनसायना
सिनायथि होनो ओँखारनाय
हारिखौ मुलुगाव,
सैथो लामानि मेगन बेखेवगिरि
हारि घोरोम राव-थुनलाइनि
समायनायै फोसावगिरि हारिमुनि।
सोमावसारनाय दावगानाय
सोलोँनाय हान्थिनाय जोँनि
जोँ नोँनि लामायाव गुरुदेब
जोँ नोँनि बोसोनजोँ आगानाव।

बेयो मानसिनि जिउ
नाथाय सिमां आरो मोकथां
बेयो मा जोँ मिथिगौ
मिथिगोन जोँ मिथिगोन।
बेयो गोरबोनि सानस्रियाव
बिजिर जानाय मेलेमाव
बिबार बारियाव समायना
जेरैबादि सिखिरि बिरबोयो।

अबंआ सोर?
अबंआ मा?
आं बोरै मिथिनो अबं?
नोङो आंखौ सोरजिबाय
नोङो आंखौ फेदेरबाय
नोङो आंखौ फोरोँबाय
अबंआ सोर?
थेवबो आं मिथिया जाबाय।

आं मानो रंजादोँ दिनै?
गोरबोआव रादाब जाखांदोँ-
मिथिँगानि गोदान बार नांनानै
मिथिया मिथिँगाया गुस्लायनायखाय?
अब्लाबो बुङो समायना, जेरैबो हाद्रि
बिफांनि बिलाइयाव दाउसिन गाबोब्ला
जोमै अख्रांनि ज्रय ज्रय मोदैया
नुहोयो नायनो इनायनो हायना,
जेब्ला मुलुगाव हाद्रिया गोग्लै सोयो।
आं मानो रंजादोँ दिनै?
बेल' नङा मिथिँगानि देलायनाय
सोमखोर मुलुगा मिनिस्रांब्ला
जोँ मोजां मोनहाबो संसारखौ,
जोमै अख्रांनि मोदैया बोहैब्ला।

बेनो बोथोरा गोदान
बायदेमलाय रुम्बां रुम्बां बिफां,
बेनो मिथिँगाया हायना
मोकथांखोर आंनि मिथिँगा।

गोजा जारौ बिबार
हायला हुयला सिखिरि
बैसागु सोमखोर अखोरां।

मालायजोँ मुगैजानाय
जेरावबो- जेरैबो गोग्लैसोनानै थानाय,
बोखां हादोँ गुरुदेब नोँ हारिखौ,
दुलाराय बर' फिसाफोरखौ।
हारिनि जेँनाफोरखौ सुस्रांनानै
आन्दायनाय हारिनो सोरां होआब्ला
जौगानाय लामायाव दैबायाब्ला
सिनायथिनि मुस्रियाव आगान सुरनो
हानाय नङा अरायबो।
बेयो नोँनि गासैबो गुदि,
घोरोमारि, रांखान्थि, राजखान्थि
बायदि बायदि सोलोँथाइ बिथिँ
गासैबो बर'नि जेँना नोँ सुस्रांगिरि।

बिग्राय दानि मेथाइया रिँफैयो
मुहिहाबो जेखाय थुनिया दाउनि मुसुरनाय;
मिथिँगानि फैलाव फोथाराव
(बिफां-लाइफां जिबि-जिराद
दाउसिन दाउलानि गासैबो दुब्लि)
जारां जोँमानि मिनिस्लु हरनाया
गोदो हाबो आंनि लाजिस्लु गोजोन्नाया।
जोँमानि रिफिनाय आंनि इन्जुराव
समायनायै सिरि सिरि बिबारफोरा
लामा नायदोँ सिखिरिखौ,
समायनायै दाउसिनफोरा देँखो हगारदोँ
अब्लाबो रिँफैयो बिग्राय दानि मेथाइया
(नेथ' जारां सान दान्दिसे
.......दसे नेथ')
खोमसिया साग्लोबफैब्ला सानसुनि उनाव
दाउसिना बिरलांगोन बासायाव
लह्रायलांगोन बिबारनि गोसोआ।

दा आं जौमोनाव फैबाय
आंनि देहा सोलेरा गोरासिन जाबाय,
आंनि सान्नाय सानस्रि रोँग'थिया जेथोसिन जाबाय।
दा आं जौमोनाव फैबाय
आं सान्नो नागिरसै गुवारै मुलुगखौ,
आं हास्थायसै रावनिबो उदांस्रिखौ।
दा आं जौमोनाव फैबाय
आं लासै लासै सोलोँदोँ,
आं बियो दाना सोरजिनाव थुलुंगा।
दा आं जौमोनाव फैबाय
गासैबो सुबुंनि गाबनाय मिनिनायखौ
मुलुग जिउ जिबिनि मोन्थाइखौ
आं दाना बिजिरनो नाजासै।
दा आं जौमोनाव फैबाय
आं गावनो साजायनो नाजासै गोथार जिउखौ,
आं गावनो अन्नो ओँखारसै बिमाखौ
जोथोन, रैखा, सांग्रां होनो मुलुगखौ।
दा आं जौमोनाव फैबाय
गावनो गावखौ बिजिरनो हाबाय
गावनो गावनि लामाखौ सिबस्रांबाय।

गोलाव दालां बिखायाव
जिरि जिरि दैया,
जोँथि हायना बाला सेरेफ मेगनाव।

थागौ आरोबाव बे मुलुगाव
- बहा मोनबावो बैसोआ लरहायो,
बेयो नाव दैसानि
रानलाङो जिउ दैसाया बोथोराव।

बिबारि गावदां बिबार
नायगोमोदोँ सिखिरि गोदान
लाजिस्लु गोसो बिनि मेगन।

बिरिद बिरिद खोमसियाव
खोनादोँ आं खोमायाव
खोमसि जानाय हराव।