जिउनि गासै गुमुरखौ संदान्नो
इसोरनि गोथार मुं दहाय लायो आं
उदां अखोरांआव साननि खौरांखौ लायो
नुयै मोखांनि खोमसिखौ होखारनो
इसोरनि मुं गाबज्रियै गाबज्रियै
मांखरसालिया जेब्ला फावसायलाङो गोजानाव
एसेबांदि आरो हाथासि गोसोआ
थाथिरनाय गैयै नागिरो गोसो मेगननि नोजोर
आरोबाव आं लुबैयो रोजाबनो-
इसेबां जिउनि रंगिना सानफोरजोँ गेलेनो!

उरायदोँ आलाइ-सिलाइ दिनैबो
दाउफ्रि जरासे
आंगोनि गंसे अख्रांनि जोमै गेजेराव
सान्दुं खामजा अखा सिजा सिजा
रुरु मेगननि मोदैजोँ दाहायाव
इनायनो नागिरदोँ सासे दावहारु

नांगोलजोँ गावनि थांखिखौ जाफुं होयो
आबाद खालामो बोथोरनि उनाव बोथोर
हाजोँ आफाया दिनैबो बेसेबा गेलेयो
मावथि आंनि आफाया हालुवा।
मिथिँगानि दाउसिन-दाउलाबादिनो
बियो बोथोरनि मेथाइ रोजाबो
आबादनि बिबार फिथाइ हास्थायनानै।
दैज्लां फैयो आफानि रोजाबनायजोँ
मेसेँ फैयो आफानि मुसुरनायजोँ
बेसेबा सोमखोर जायो मिथिँगाया
थाजिम आरो गोजोन जायो मिथिँगाया।
मावथि आंनि आफाया हालुवा
बिनि अन्नायजोँनो थांनानै थायो जिबि
गामि सेरजोँ दैसाया खुसियै बोहैयो
आरो खोलो खोलो बारबाय थायो बार।
जोबोद गोथार आफानि गोरबो
गुवार आरो गोथौ बिनि सानस्रिया
आइया जेब्ला रुखु रुखु गाबो
अब्ला बियो आयनि मोदैखौ हुगारो।
आं जुदि आंखालाव गोग्लैयोब्ला
आफाया आंनि आंखालखौ सुफुंङो
आफाया जेब्ला गावनि राफोद देहाजोँ-
रुरु गोगो गोलोमदै बोहै-होयो
आं बुजियो आंनि आफानि बोलो।
आफाहा मिजिँ दं आंखौ लानानै
आं मा लुबैयो मा हास्थायो?
बियो मिथिगौ जेब्लाबो आंनि गाबनाय।

फरायथौनो हाया नोँनि गोरबोखौ
आंदि बेसे नाजायो मिथिनो
गोसोआ बोदोर जाफायो आंनि
उसुं सेराव मान्दार बिबारनि बिदै सोबनाय दाउसिनफोरजोँ
नोँ लाबोयो मान्दार बिबार जुलिनि सिन्दुर

महर-मुस्रि आंदि नुयो नोँनि
इनायनो गोमोथाव जोबोद मुहिनां
थारैनो एखमबा जिउ गोनांबादि
इनायजों सोबखजानाय जिउ गैयैबादि एखमबा
गासै नोंनि बिखायावनो मिथिंगा
आंनि थैनाय आरो थांनानै थानो लुबैनाय

सिमां दं आंहा मोकथां जिउनि
इनाय-अदखारनिफ्राइ अराय बारगनो
मिथिँगाया आंनो बोलो होयो
आं बारगगोन बे फानजारिनिफ्राइ

जेसेबांखि बारहुंखायानो बारा मानो
थांनानै थानो लुबैयो जोँ
जेसेबांखि सार-अन्थायानो गावा मानो
जेसेबांखि दैबानायानो फैयाथोँ मानो
थांनानै थानो लुबैयो जोँ
बे मुलुगानो मोनसे दावहाथिलि जेराव
बे दावहाथिलि दावहा फोथारनिनो
जोँ साफा साफा उदांस्रिनि फायखि
जुजिनाय आरो देरहानायानो जोँनि गुबै थांखि
मोन्नो लुबैनाय आरो होनो लुबैनाय
बेबादिनो थांनानै थानो लुबैयो जोँ
एसेल' नङा मोजोमसे जिउनि बेसेना
जोँनि दुखु आरो दाहाजोँ सिथाबनाय
एसेल' नङा मोदै आरो गोलोमदैनि बेसेना
जोँनि गोजोन आरो रंजानायजोँ सिथाबनाय
नंखाय नङा जोँनि खुसि आरो बाज्लनायनि ओँथिया
गोथारै होनाय आरो खुसियै आजावनाय
बेबादिनो थांनानै थानो लुबैयो जोँ
गोरबोनि रैसुमै मेथाइ रोजाबै रोजाबै
जिउनि थांखिखौ गायसन्नो लुबैयो
मोजोमसे जिउमानि गोथार खनायाव
थांनाय आरो फैनायनि गेजेराव
सुदेम खोलो खोलो बारनाय बारनि
मिलौहाब दाउसिननि गोदै गारांआव
थांनानै थानानै लुबैयो जोँ
बेसेबा उदां आरो खौसेथिनि गेजेराव