maaaring pwede at maaaring hindi,
lungkot laban sa ngiti,
ikaw laban sa ako,
tayo laban sa mundo.

sa bawat sandali na nakakasama ka,
ang mga ngiti sa labi’y ‘di maipinta,
ngunit sa kabila nito’y may mga humuhusga,
mabuting itigil daw ito dahil hindi tama.

ano nga bang dapat na gawin?
sa mga alaalang ginawa natin,
mga bugso ng ating damdamin,
itutuloy pa ba o pipilitin na lamang pigilin?

Minsan napapaisip ako,
Bakit parang 'di patas ang mundo,
Sinubukan ko naman pero yun ang totoo—
Hanggang dito na lang ba talaga ang kaya ko?

Pilit lumalaban sa mga bagay na mahina,
Kahit may humuhusga'y 'di na alintana,
Ngunit tila bingi ang tadhana,
Sa bawat pahina ng aking kabanata.

Sana ihip ng hangin ay minsan sa akin,
Sana 'di pa huli ang lahat para hubugin,
Masabi sa sariling kaya ko rin,
At 'wag sumuko bagkus ito'y tuparin.