खोमसिया साग्लोबफैबाय
दान्दिसे बिरलांनायाव सोरांआ,
सान्दोँ आं गोरबो दर्खँआव दिनै।

गोरबो हाथासि मेगनाव
सांग्रेमा बिरदोँ सोरांआव,
नागिरदोँ सानस्रि सिमब्रेना
- सोरांखौ अराय।

सानसे जोङो उन्दै समाव
बेसे रंजायोमोन
बेसे गेलेयोमोन
बेसेबांदि मिनि खुसियाव,
बहा थांखो बेफोर दिनै?
बबाव गोबा जोबखो?
समनि बाबेन्नाय गान्थियाव।
आंनि लोगोफोर
आंनि आबै आबौमोना
बहा थांखो दिनै हाबाब!
गोदान बोथोराव?
आंखौ गासैबो नागार नागार
रंजानो आंजोँ रावबो गैलिया।
हय हय खोनासंना
बेसेदि आं गोजोनोमोन
आबै आबौनि खुगायाव
सल'बाथा;
आय आफानि खुगायावबो आद्रियै
गोमालांबाय हाबाब!
गोमालांबाय,
बहा थांखो दिनै-
बबाव गोमा जोबखो?

मुसुरदोँ सोरांसि समाव
रिँफैयो गोदै दाउसिननि
बेसेबा गोजोन बिखायाव।

बेनो बोथोरा गोदान
बायदेमलाय रुम्बां रुम्बां बिफां,
बेनो मिथिँगाया हायना
मोकथांखोर आंनि मिथिँगा।

दे सुबुंफोर मुलुगनि
देँखो बोदो गोजोन खौसेनि
नोँनि आंनि सोलेरनि
रंजानाय खुसियाव हां मोन्नायनि,
आय मिथिँगाखौ गोजोननि
देँखो हगारना जिबिखौ मोसानि
दे सुबुंफोर मुलुगनि
बिफा सोरजिनि बोर लानि
आखाय हमलायना थांदिनि।

गोमो गोथां संसारनि
रिथि रिथाव आर्टिँफोरा,
रिदि रिदां बाफबफैयो देँखोआ
एवखाङो मोसानो दल बुनाया;
आय' सोमो गोनां फुरिया।