mula pa noon ganyan ka na
katatag humarap sa mga
tipak nitong naglalakihang bato
na pilit ipinupukol sa iyo
itinatago niyang kulay mo
ang kasaysayan ng mundo
bahagi mo ako at ako ay sa iyo
kahit na bakal pa ang iyong puso
pilit na hahanap ng butas
ang dumadaloy kong dugo
upang tayo ay pag-isahin
hanggang lumambot ang iyong damdamin

Nagsasayaw
Ang ilaw sa tabi ko
Sa gilid sa harap paikot
Naghalo sa kisameng kasama
Ang antok-hilo kong ulirat
Bingi na ako sa tunog
Ng patagilid-pakalat na musika
Habang pinapaypayan ako
Ng higanteng bentilador
Naisip ko
Mas mainam siguro
Nasa bahay lang ako

pitik bulag na katahimikan
sa gitna ng kaguluhan.
maupo na muna.
magpahinga.
itikom ang nangangalay na paa
malapit na.
maglakad at ubusin
ang oras na mabagal pa rin,
hindi pwedeng matulog
walang magagawa kundi maghintay.

ang kulay ng mga halaman
sa hardin ng paraiso
na kung saan ay nagkikiskisan
ang mga hubad na katawan ng tao
ito rin ang kulay ng mundong
nabuo sa malikot na isip ko
dahil pakiramdamdam ko
ay nag-iinit ako
sa tuwing madarama ang alindog mo.
ewan ko ba
siguro tama ka
berde ako.