जायै जायै जानानै रांआनो जोबगुलायनोसैमोन
गुब्लां फंबायनिया,
आदै मेब्लानियाथ' दहायनो जोबबाय।
दंथारोब्लाबो थायबा गथा (खुस्रा)
गरसेल'सो दंसै खोमा।
फैसाया सना गाबनि सनाबादिथार
बेखौबा बाहायनो हालिया बियो।
गाड़ी गाखोनायाव आंसो अनथाव-बाथाव
बाजि रांखौ होथ'नांलायदोँ।
गलाघाटनि मायनाव फोथारखौ गिदिँनानै
आब' लांहेमोननियाव थांगोन जोँ।
बोसोरसे सिगां आब'आ रं नाम्बारजोँ जुलि जाफैदोँ।
गाड़ीथारैनो मोथो मोथो रौता सारिआलिनि
फुरिखौसो गोसोखांफ्लांदोँ गुब्लांआ।
बियो बुंदोँबो-
- आदै मेब्ला,
हाब रौता सारिआलिनि फुरिया गोथावब्रा,
माब्लाबा फैबावथारगोन दे जानो।
बियो आंखौ नायनानै बुंबावो-
- हाब, आदा जोँथ' बुरलुंबुथुरखौ बारबोथारबाय,
बेयोथ' सानजा जाबाय।
सानजानि मानसिफोरखौ सानजारि होनो नङाहोनबा?
माथो फुरियालाय खारदैजोँ संनाय नङा नामाब्रा?
ना खारदैजोँनो संनायमार फालाय??
- खारदैब्रा खारदैसो,
- हाब, बिदिब्ला खारदैजोँ फुरिया गोथाव जायोब्रा।
नसिम गिदिँफिनबा खारदैखौनो
जगसे लांनांगौ जाबायलै।
-----------