गोथार सान बर'नि
थुनलाइनि आबाद फोथांनो
1952 मायथाइनि 16 नभेमबर
बासुगाव गयबारिनि बिखायाव
सान अखाफोरनि साखियाव
बर' राव फोथांनो
बर' थुनलाइ जौगाहोनो
बर' हारिखौ मिथिसार होनो
नों बर'नि आगोमा आफाद
बर' थुनलाइनि बिगोमा
नोंनि थैथाब नांथाब नाजानाय
नोंनि थुनलाइखौ अनसाइनाय
थांना थाथों नों
अराय जुगामि जाना
फोथां नों बर' हारिखौ
खाबु हो नों
बर' थुनलाइ सोरजिनो

सिरि मोनखां जों
मुगानि जोंखोल महरजों,
            आवगायलां थिखानाय थावनियाव
            मोननायनि मिजिं हाबिलायाव।
उन-सिगां नाय सान-हर
बिष फिथाइनिफ्राय गोजानाव था नोंसोर,
            जेसेबांखि फान्दाइयारिया फान्दायाथों
            गुबुंले दैमायाव दा बाज्रुमथों।
खारलुं एटमनि बिखा सोमावग्लुंनायाव
दासान दं माबा गोमोथाव,
            सुबुंस्रिनि गोदान गस्ला जोम
            पापनिफ्राय गोदानै जा जोनोम।

आंनि जोनोमा आयनि मिजिँ
नंखाय नङा आयनि मोदैया
फैमाल नङा आयनि दाबिया
बेसेबा दैज्लां- मेसेँ
बेसेबा फागुन- बैसागु
सिमां साजायनाय गिदिर
मिजिँ सुजुनाय गोथार
बहा आंनि रंजानाया?
आयखौ गारनानै-
आयनि मिनिनायाव हाद्रि सारनानै।
फिसा जानानै असे बिमानि
रंजानाय- मिनिनाय थांना थानायनिब्ला
आंनि जोनोमा आयनि मिजिँ
सिमां- मिजिँ जिउनि आबिर
आयनि गासैबो सोरांब्ला
आंनोथ' आयनि नङा होनब्ला साथि?
बेनो जोनोम नङा होनब्ला आंनि?
अब्लानोथ' आं बिजिर मोनो
गुसु मेलेमजोँ हमना मोनो
आंनि जोनोमा आयनिनो जिउ खावसे।