बे हादोरनि गासैबो हाब्रु-हाद्रिखौ
गावनि मोदोमाव फुन्नानै लागोन
आरो गोगो बे हादोरनि दैसानि दैजोँ
गावनि मैलाखौ गावनो सुनानै लागोन
समाय लायो आयै आंबो
नोँनि दुखुनि मेगननि मोदैखौ
आरो नोँनि गोसो-गोरबोनि मोदैखौ
आंनिनो आखायजोँ हानायमानि हुगारनो
बे हादोरनि मोनजारोङै हावरियाफोरनि
दुखुनि गाबनायखौ जेरैबाबो होखारनानै
हालुवाफोरनि नांगोलजोँ सुजुनाय जारिमिनखौ
मुलुगाव जेरैबाबो फोसावना होगोन
जाय मोन्थाइखौ सेखनानै लादोँ सुसिगिरिया
जेरैबाबो हा बिगोमानो गथायना होगोन
जोबोद सैथोथार बे जारिमिनखौ
माब्लाबाबो सोबखग्राया खोमोरनो हाया
बे हादोरनि बार आरो दैसाया रोजाबो
बे हादोरनि जिबि आरो दाउसिना रोजाबो
बे हादोरनि मिथिँगाया सल' खिन्थायो
समाय लायो आयै आंबो
बिगोमानो गथायना होगोन गासै मोन्थाइ
थिखोना होगोन गादब जानाय गिरिनो
बिसोरनि मोखांआव मिनिनाय लाबोगोन
आरो समायना खालामगोन आबाद दुब्लिखौ
जेराव रसा नाङा बे हादोरनि फिसाफोर