हुरा हुरा सानफ्लाङोमोन आं-
हाबावगोन दा बायग्लिनाय आंनि गोसोखौ
फागुननि बारजोँ जरा फोनांनो,
बिखा गावनायनि गुथाला
दैदेनबायसो जोँमा साना,
गोरबोनि लाथिख' नोजोरजोँ
नायहरो जेब्ला गोबौ मेगनजोँ।
गोजाम बिसम्बि खामग्लिनायनि आलौनायाव
आं मोन्दांदोँमोन मुगैनायनि अर लगायनाय।
. . . . . . . . . . . . . . . .
दिनै गोदान अखाफोरनि सोरांआव
नोँदि हाबावगोन जोँनाय अराव सालाइ एरनो?
गोदान नोँनि आखायाव आंनि नोजोरा,
- बै थाइनै आखाया माबा बुंदोँ
जेराव लाजिगुसु थाइनै आखायजोँ जंखायलायदोँ
बेखौ बुंनो हागौदा
मोनसे रोखोमनि फावल'।
मोदै हुगारदोँ गामसानि दौबाजोँ
नाथाय फेलेँनिल' गाबनाय नङा
फैगोन रंजानायनि मोजोमसे मिनिनानैसो।
मोबायजोँ नायनानै जेब्ला नुयो
सुथि मोन्नायबादि अखाफोर ओँखारबोयो,
सोरांसि दरखंनि आन्दोआव
लाजि गुसु नोङो आमाय-जुमाय गेलेदोँ।