आं माब्लाबाबो नुफेराखैमोन।
अनथाव बाथाव, नायबाय- थाथाव।
आंनि गोसोआ गलिलांदोँमोन।
थारैनो आं बेखौ
मोजां मोन्दोँमोन।
(16 नबेम्बरनि सान)

" बावनो हाया... नोँनि आंनि
थैस' थांस' सतबांसा लानायखौ
नेवसि हाया नोँनि होनाय
जिउ थुलुंगा गासैबो
बावगार लांनाय नङा
जिउ थुलुंगा गासैबो"
..............
मेथाइखौ फोजोबनानै जौसांनिफ्राइ
लाजिसुलु ओँखार बोयो।
बियो बिखायाव बिखासे दाहा
लानानै सोमब्रोम गाबब्रुं मोखांङै
जिरायग्रा मासियाव जिरायफैयो।
बिनि मेथाइ खन्नायाव
बयबो सिरि थाहाबदोँमोन।
बाज्ल' बायनानै खुगाजोँ फेम्फा सुनो
आरो आखाय खबनोनो गासैबो
बावगारलांदोँमोन खोनासंग्राफ्रानो।
सोरबा सोरबाथ' आरो
मोदै ज्राम ज्राम सिरिदोँमोन मेगननिफ्राय।
सिख्लाया जौसांनिफ्राय ओँखार बोबासो
बयबो गोमलायनाय आखायखौ खबदोँमोन।
सिख्ला मेथाइ खन्नायाव
आंनि मेगननिफ्राय थरथिँ थरथिँ
मोदै बोहैदोँमोन।
सिख्लानि मेथाइखौ जागायनायनिफ्राय आं मोदै मोदै फसरैनो
बेसेबनोबो हायाखैमोन।
मोदै गदोँब्लाबो आं मेथाइखौ
मोजांङैनो खोनासंदोँमोन।
गोसोआव लानोबो नाजाथारदोँमोन।
नाथाय खोनासंनायजोँ लोगोसे
सिख्लाखौ लानानै आं बिबार
बारियावसो बिरलांदोँमोन।
गोदान संसार साजायनो
थि खालामदोँमोन।
जायनि थाखाय आं मेथाइखौ
आबुंङै गोसोआव सेबखांनो हायाखिसै।
सिख्लाया मासियाव गाबहां फावदुर फावदुर
मोखांखौ लानानै
जिरायब्लासो
आं मोदै हुगारनानै नायहरदोँ।
बेयो आरो फरायनो हाथावै खोमसि नङा।
गोसोआव गोजाम मिजिँआ
हाथासि महर रिफिनायसो।
बेयो दा आंनि मेगनाव
समायनासिनसो जादोँ।
सिख्लाखौ नायबाय थानानै आं
बिनि मेथाइनि गुबै रावखौनो
साननो हमदोँमोन।
थारैनो बिनि मेथाइया
गोथौ बिलोनिफ्राय सिखारनाय
मोदैनि खुवा आमै मै
सिखारनाय दं।
बेयो दुखु गोनां गोलाव रमान्टिकनिसो
सेबखांना रोजाबनाय मेथाइसो।
नाथाय मेथाइखौ रोजाबनानै
सिख्लाया मानो गाबखो?
बियो गावनि अंगुबै सल' नङाथ'?
आरो खोनासंग्रा गासैबो
फरायसा- फोरोँगिरि गासैबोनो
बिनि मेथाइआव दुखु जाफादोँ।
सोरबा सोरबा मोदै हुगारदोँ।
आंबोथ' आरो बारग'नो हायाखै।
जानांगौ बिनि दुखुआ बिनि सल'आनो।
गोसोआव बायदि सानबाय आं,
सानबाय थानायावनो आंनि लोगो
बिलिफांआ बायजोआव हासुनो होननानै लेँबाय।
जोबोरैनो लोगो बायदियै
आंबो बिनि रावखौ फेलेँ खालामाखिसै।
खेबसे मोजांङै मोखांआव नोजोर होनानै
सिख्लानि सेरजोँनो थाबायो आं।
बे समाव सिख्लाया एसेबांमानि हाथासि जानाय
खोमसि मोखां गैलियामोन।
बियो एसे मिनिसुलु मिनिसुलु
लोगोफोरजोँ सावरायदोँसैमोन।
कलेजनि साहाजोँ थानाय जिरायग्रायाव
जिरायनानै जोँ बायदि
खोथा रायज्लायदोँमोन।
सासे लोगो सोमदोनाव सोँदोँमोन आं
- सोरनावबा दहाय सिख्लानि मेथाइ
रिकर्ट खालामबायनाय दं नामा?
होननानै।
लोगो लोगोनो बागदावखांलायजासे बिरना बुङो
- आंनाव दंलै।
दाम खमनि मबाइलखाय बारा मोजां खोनायाखै।
- जागोन दे।
खोमायाव होथाबनानै खोनासंबा खोनायाबे।
मिनिसुलुनानै आं बुंदोँमोन।
बिरना आंनो ब्लुटुतनि गेजेरजोँ
सेन्दिँ खालामना होयो।
खुसिजोँनो आं बिरनखौ रोजासेमानि
साबायखर होदोँमोन।
दान्दिसे उनाव जोँ
अडटरियाव सिंआव हाबहैफिनो।
बेलासिथार समाबो जाबोनो हमबायमोन।
बे समाव हारिमुयारि दिन्थिग्लांनाया गेवसारबायमोन।
लाइटा साथिनायजोँ
सिख्लाखौ आं मेगन फिदिँब्लाबो नुआखिसै।
गोसोआव सानबाय बियो थांबाय जानांगौ।
बियो नंगौ मोनाजाफामानि जेरावबो
थानो मोजां मोना।
सोरांबारां जेब्लाबो बियो सांग्रांखा।
सिख्लाखौ आं नागिरबाबो नुयिलाय आं गोजोन्नाय मोनाखिसै।
थाथिरनो गोसोआ मानोबा
खहाबा खहाबा आंहा।
समायना रमायना सिनायजोबनो हायि
सिख्लाफोरा हायलालाय हुयलालाय मोसादोँब्लाबो
नायबाय थानो गोजोनाखिसै आं।
बे समावनो बिलिफांआबो गोजान
जाथारनायलाय आंखौ थांदिनो
होननानै लिँनायाव जोँ
अडटरियाम सिंनिफ्राय
ओँखारो।
लजिँ न'आव सफैब्ला
सिख्लाया माब्लाबानो साजाय आजाय
बिजाब फरायबायमोन जानांगौ।
बिनि खोथा सानबाय सानबायैनो
मोनाबिलिनि जानांगौ आदारखौ जाखांनानै
दो उन्दु लांबाय आं।
मबाइलाव बिनि मेथाइआ रिँबाय थाबाय।