दिनै आं गोसो खाङो-
गासैबो फारि फारि
समनि बिसम्बि जाखां फैब्ला
गावनि जारिमिन गावनो
फिथ फिथ बिलाइयाव
गोसो जायो लिरनो।
उन्दै समाव दैज्लां फैब्ला
बेसे रंजायोमोन आं बोथोराव
बेसेबा बहा थांखो दिनै?
आंहा गोसोआव दं-
दैज्लां बोथोर, हुर राव बाना दै अखा
भुटान हाजो मावरियानि बोहैबोनाय
हुर हुर दैज्लांआव बाना जायो
बाज्ल बाज्ल दैया मोसाबोयो
गांगा थफा ना खान्दा
ना बालाखावा नास्राय निस्ला
बायदि खुसियाव गोजाव बोयो।
जोबोर अखा जोबोर गुसु
अब्लाबो साथेयो गन्था मारा
गामिनि दुब्लि सेरजोँ बोहैनाय
हुर हुर दै, दंग'आव।
थोर थोर खौखाब मावनाय
गुसु सोलेर गोजांनाय
अब्लाबो खुसि दुब्लियाव
ना खान्दा गोग्रोमनाय।
आफाया रायोमोन जोँखौ,
मानोना आरोबाव थायामोन गाननो
फेन गस्ला।
आंनि गामियाव बयबो आबादारि
दुलाराय सुबुंआ आबाद मावो
थेर थेर आबादजोँ जिउ खाङो।
गोरिब हालुआ आफाया मुखुब
दैज्लां दुब्लियाव, दैज्लां हाब्रुआव
थोर थोर गोजांनाय थाम्फैजोँ अंखाजोँ
लावथिजोँ नांगोलजोँ मोसौजोँ
दाउज्ला गेसेरनायनिफ्राय दुब्लियाव
सानफा थोलो सान हाबजासे।
आयआ थिननाय आफानि बोसोन
सानेरै सानेरै अलसिया मोदोमै
आलि दान्नाय आलि खोनाय
बेजोँनो थाङोमोन आंनि सानआबो।
जोलुर गेलेनाया आंनि हुदा नङा
थेवबो गेलेनो मोजां मोनो
सालगुरि फोथाराव गेलेयोमोन
सम सम साना दोबैलाङोमोन।
आं दाबो सानस'नो हाया
आंहा मोनसे लोगोजोँ हुदा दंमोन
जेब जेब अखा बांखायाव
मोले मोले थर्स फोजोँना
बारि खनायाव एम्बु नागिरनाय
नाथाय मोजांमोन दाबि?
आंनि दिनै हमदांबाय गावनो
बे हुदाखौ आं गारबाय
आरो बयखौबो गारजानो लुबैयो।
दैज्लांनि बानायाव फुख्रि बिलो
हाखर जाम्फै उसिब्ला
गोसो जायोमोन बारसोमनो।
गोसोआव दं आंहा दाबो-
आलो जाम्फैनि गोथौ बिखायाव
बिफां सानिफ्राय ज्रुम बाज्रुमनाय
थब्लयै थब्लयै सानस्रिनाय
लोगो लेवाजोँ बादुंगा गेलेनाय
थब्लनो बादि लायनाय।
हाबाब गोदोनि दैज्लां दा बहा?
आंनि मिजिँनि सानस्रिया दा हनै
लामाजोँसो लेँहरदोँ जेरै
रोजा रोजा अरन
बेसेबा गोथौ गुवार
लैथो हाबाब मुलुग लैथो।