राजखान्थिनि जोंब्लावनाय अरजों
सोमजिनाय लुंगा-लुंगि उखुन्दैफोरा
दाखा-दाखा जोमै खादों बर'नि अखोराङाव।
.
गिथाव-बाथाव सारअन्थाइ
गुर्लुब, बिखा गावथाव खोरोमदावनाय
दावराव-दावसि बर'नि राज्योआव।
.
जुब-जुब अखा दाम्ब्रा आरो अन्थाइफोरा
बुथाबदों फोगोदान बेगर आरो खिलिजेननाय
बर'नि आबादथिलियाव।
.
बाना जाना लोमसावदों राजखान्थि
खुरखादों आरो खुरखादों दाहारफोरा
बर' हारिनि बिथा आरो आबादथिलिखौ।

दैसा सेरनि हाब्रां सायाव
जनानै नायहरदों आं हरै मारुआव
दुब-दुब मानिबा सोदोब बिखा खनायाव
बानाबादि मेगन फैसालियाव
बोहैबोदों मनिबा जाहोनाव
मानि इसारा जाखो बिलाय?

सोनाबनि बै जारौरौ आबिरानो
जिरि-जिरि बोहैनाय बे दैसायानो
खोन्थागोन आंनि गोसोनि खोथाखौ
फोरमायगोन बै इसाराखौ
माबादि दुखुनि सुंद' जारिमिन!

बै जारौरौ आबिरबादिनो
अनजालिनि हाइना महराबो
खावना लांदोंमोन आंनि गोसो-गोर्बो
गोसो थोदोंमोन आं मोथो-मोथो
नाथाइबा दिनै लाथिख' अनजिमासो!

बेलासेनि जारौ आबिराव
अनजालिनि हाइना महराव
गोजावदोंमोन आं अन्नायनि लैथोआव
नाथाइ दिनै खोमसिनि आन्दोआव
नागारलांबाय अनजालिया बै आबिरबादिनो।

जिरि-जिरि बोहैनाय दैसाबादिनो
आंनि मेगननि मोदैआबो
बोहैबोदों बाना बादिनो
मा थांखिजों, सोर मा मिथिनो?
बियो बै जाहोननि थाखायनो।

बे बुब्लियानोमोन, जेराव
अनजालिजों आंजौ दैसा सेराव
स्रें जिरायनानै रायज्लायदोंमोन
अब्ला बियो दुफां बोथोरनि बेलासि सममोन।

बे बुब्लियानोमोन, जेराव
सोमलि बिबाराबो उदां बाराव
गोसो खुसियै बिरथिंदोंमोन
बिब्दिनो जोंनि गोसोआबो बिरथिंदोंमोन।

जेब्ला गाथोन जिङाव आं बेरायनो थांदोंमोन
अनजालिजों आंजों लोगो मोनलायदोंमोन
जों सानैजों गोसोथोलायजेन्दोंमोन
अब्लाबो बे बुब्लियानोमोन।

बे बुब्लियानोमोन, जेराव
बेलासि समाव, दैसा गाथोनाव
सानफ्रोम्बो लोगो हमलायदोंमोन
गोसोनि खोथाखौ फोरमायलायदोंमोन
             अनजालिजों आंजों।

खोथा दं सिरियै
नों खोनासंनोथ' माब्लाबा फै,
गोसो अख्राङा दं सिरियै
नों दाव मैना जानानैथ' बिरफै,
दैसायाबो दं निजोम सिरियै
आमाइ-जुमाइ गेलेनोथ' फै।

दानसोरां निजोम हराव
अखाफोरनि गावदां महराव
हाथरखिफोरनि जोंथि-माथियाव
नोंखौसो गोसो खांफ्लांदों अनजालि
सिरियै हारसिं फाग्ला फाग्लानो।

दाखा जोमैनि आन्दोआव
हाबसो-हाबसो थाखोमादों सिरियै
आंखौ लाजिनानै.......।

मिनिखैरो मिनिना, जोंथि हाथाइखौ दिन्थिना
थाबाइ लांदोंलाइनो बालें-बालेङै
आंहासो नाइगोमादों गल'ल'नो
जाम्बाबादि लरग'ग'नो
निजोम हराव सिरि-सिरियै।

नै सफैलाइबाइ मागोआ
फिथा-सौराइ जानाइ समा,
बे समावलाइ आंखाल गैखाया
माइब्रानि माइब्रा जोसानि जोसा
बाख्रियै बाख्रि आबुंजोबखा
जाब्लाबो लोंब्लाबो जोबनो थांआ,

बेनिखाइनो बाजै सना
लावदुम, एन्थाब, सिथाव फिथा
बानाइदोलाइ गोसो होना
जानोसैलाइ अरखा-अरखा |

दानि जुगनि सुबुंफ्रालाइ
नाइफिन थारला माथोलाइ
मागो दमासिनि फिथा-सौराइ
जाब्लाबो अहाया माथो आंहालाइ |

08/01/2016

गासैबो थार नङा
सैथोआनो जोब्लायबो देरहासार
नंथारगौ होन्ना सोर बुङा?
गासैबो थार नङा
मानिबा थाखाय सुबुङा
नंखायजोंबो माब्लाबा देरहासार,
गासैबो थार नङा
सैथोआनो जेब्लायबो देरहासार।

02/05/2017