नोंनि जारौ, देलोंलों महर समाइसारनाय
बावनो हाया आं गोर्बो बुंजासे अन्नाय होनाय
बोजबना लागोन आं अनजालि रजे
थैस'-थास' बे जिउ मोनसे।
जाइख्लं सिमां सोरजिनो मोक्थाङाव
साजायनो थाखाय आबिर जिवाव
नाजागोन अराय नोंजों लोगोसे
थैस'-थांस' बे जिउ मोनसे।
दुखु-दाहा बावगारनानै
बिखायाव अराय नोंखौ बोजबनानै
जालांगोन संसार सानैजों आंगोसे
थैस'-थांस' बे जिउ मोनसे।
नोंनि जारौ, देलोंलों महर समाइसारनाय
बावनो हाया आं गोर्बो बुंजासे अन्नाय होनाय।

17/09/2016

जिउनि जागायजेन्नाया
सुखु आरो दुखुजों,
जिउनि जागायजेन्नाया
सान आरो हरजों।
सिमां-मोक्थां जुजिबायो
सुखु आरो दुखुजों
थांखिखौ जाफुंसारनो नारा-नाथा नाजाबायो;
खनफ्रोम्बो बोनाय हाङाव
सिमां-मोक्थां जुजिबायो
सुखुयै थांना थानो जिउनि लामायाव।
मोदोम्फ्रुनाय रैरुब बिबारनि थांखि
खनफ्रोम्बो बोनाय हाङाव
जाफुंसारनो नाजायो अराय सुखि।
लरहायोब्ला सायख'नाय
मोदोम्फ्रुनाय रैरुब बिबारनि थांखि
दुखुनि लोगोरि जागोन अराय;
जिउनि जागायजेन्नाया
लरहायोब्ला सायख'नाय
जिउनि जागाजेन्नाया।

**
खनफ्रोम्बो बोनाय हां= थांना थानाय सम।

आंनि खुन्थलाय जोमै गोसोया
अख्रां बिखाव बिरबाय बिरबाय
गोजोन रादाब बिलायनायखौ
नों खोनायाखै नामा रजे..?
मिथिगौना.....
आं नोंनि थाखाय
आंनि गोर्बो थिलायाव
सनानि गंसे देरा लुखाबाय
अननायनि फागाखौबो मेराय-मेराय
नोंनि मुं लाना साखाबाय।
नोंखौ आं अराय
अननायनि फागाजों
खाजाबना लासिगोन सना
आंनि गोर्बो थिलानि देरायाव
राजखुंग्रि साजायसिगोन सना
नों खोनायाखै नामा रजे..?
नोंनि रानस्राव गोर्बो हादाबाव
आं अखा जाना फिसिगोन सना
गोदान जोलै बेगर फोगोन
बिथ'राय गोर्लै मद' खिलिखांगोन,
जों सानैबो नांगौबादि
हासार दै होगोन
इयुन फिथाइ जोंनि
बेसे मोजां जागोन।
नों खोनायाखै नामा रजे..?

खोमसि-दरसि
बे मुलुगनि संसार मायायाव,
खोमसि-दरसि
सहाय हायै दुखु-दाहा, जेंना-जेंसि;
आन्दायबाय जिउनि लामायाव,
मायाथिलि सुबुंनि फावथिनायाव
खोमसि-दरसि।

16/09/2016

सान-अखाफोर सोरां
सुखु-दुखु जिउनां,
थैनाय-थांनाय सुबुंनि
माया मुलुग अबंनि,
सम-बेसम मुलुगाव
थाइसे उदैनि आखाय सोमाव,
गोखा रोदा सोलोंथाइ
मिलौनां गोदै इयुन फिथाइ,
आखुखौ सोलाय नोरोम
अब्लानो सैथो सुबुंनि धोरोम,
आबां जिउनि लामा
सायख'ना हान्थि आगोमा॥

10/11/2016

जानो हागौ, नों नोंनि सोलेरनि
दागिरि नङा;
जानो हागौ, नों नोंनि जिउनि
बिगोमा नङा;
आरो नों नोंनि सोर्जिगिरिनि
जेबो गुमुर मिथिया.....।
.
खोनादों 'इसोर' होननाय दं
बियो आरो सासेल'.....!
.
माखासे धोरोम बिजाबनि रावै-
"बियो गावनो गोहोफुं
नुजानाय-नुजायै, जिउ गोनां-जिउ गैयै
मुलुगनि दंनायमानि, जेरावबो-जेरैबो
आबुं महरै गोसारद्लाना दं...।"
.
अब्ला बिजिरना नायदोनि-
"मुलुगनि दंनायमानिया
गुबुन-गुबुन महरनिब्लाबो
नोंनि-आंनि आंगोसे
बुंनो थाङोब्ला गासैबो मोनसे
होमब्ला जों बयबो सासे।
आरोबाव बिसोरो.....
गावनो सोमजियो-गावनो गोमायो
मानोना बियो गावनो गोहोफुं....।"
.
बेखायनो.........
जानो हागौ नोंबो इसोर
आरो 'इसोर= बियो सोर'
बिबो इसोर....।
.
नाथाइ बिखौ सिबिनो
गुबै (थार) धोरोमनि गोनांथि
बेनो जाबाय-'आखल'...।
जाय धोरोमा रोखोमनै-
सैथो (मोजां) आरो पाप (गाज्रि)।
.
सैथो (मोजां) धोरोमखौ बोज'बब्ला
सोर्गोफुरिनि लामा;
पाप (गाज्रि) धोरोमखौ लायोब्ला
नोरोगफुरियाव जायगा......।

12/12/2016