Submit your work, meet writers and drop the ads. Become a member
Mar 2016
So aye
We wir watchin
that David Attenborough
or tryin tae -
fower weans tearin up the joint,
an she's like,
See if youse dinny shut it...!
an aw that, ken -
You no gonny tell thum?
So ah'm like,
Wheesht, youse."

But it wis amazin, like.
These fish.
Years oot at sea.
Tiny wee at first,
dodgin sharks an jellyfish
an aw sorts,
awa oot, miles fae land.
(God!  Youse!  Take it up the stair!
Tell thum, you!

"Aye, boys.  Listen tae yir ma.")

Then wan day, like
they get the urge, ken?
Got tae go.
An in they come,
surgin fae the sea,
these sleek, silver bullets
fat wi feedin.
(I'll no tell yis again!)

Nothin, an ah mean nothing
is gonny stop them.
Waterfalls?  Nae bother.
Just pure hungry
fir the lassies, ken?
The boy Attenborough sais
they dinny even eat!
(That's it!  Ah tellt ye!
Here you!  Take some responsibility,
wull ye?

"Eh?  Oh, aye.
Away tae yir rooms, boys -
yir ma tellt ye.")

These pure ***** divils
will loup up sheer cliffs,
baws burstin, bi the look ay it.
Poetry in motion, ken?
Like, ah dinny ken, pure water
brought tae life, an that.
Jist pure savage.

An then, haw -
they find the lassies!
An it's jist, like,
Done the deed.
Gemme ower,
job done,

An there's this shot.
Ripplin shallows,
just fill ay the twitchin bodies.
Craws an bears an that,
queuin up fir the bonanza.
Jist, like,

An she's aw,
Here, is that no terrible?
Pair buggers!
Eifter aw that!

An ah'm like,

But see inside,
ah'm thinkin,
lucky *******."
Alan McClure
Written by
Alan McClure
     KM Abbott, ---, Joe Bradley and PJ Poesy
Please log in to view and add comments on poems