जेब्लाबो बुङो-
नै आंनि अनसुला गिरि
मा आंनि गुमुरा?
मा आंनि जोनोमा?

नोँनि आफा-
बहा आंनि थावनिया?
आरो बहा आंनि खुलुमनाया?
नोँखौनो गाबज्रिसे जेब्लाबो।

आंनि अलसिया मेलेमाव
नै गिरि लुफावफै गोगो थै,
आंनि अख्रा गोरबोआव
लुफाव गिरि गोगो दै;
नै गिरि नोँनोल' जिउ राहानि
नोँनोल' आंनि बिगोमा गोरबोनि।

दिनै बे हरथौ गेजेराव
हरखाबनो गोसो खाङो नोँखौ,
आर'ज आंनि दान्दिसे
बिलिर बिलिर गोबाफै आंनि गोरबोआव;
नै अनसुला जिउनि आर'ज आंनि।

नोँखौ बुङो आंनि गोसोआ
गाबज्रियै जिउनि आर'आव;
नै गिरि हान्थिगिरि जिउनि
हां मोन्नाय होदो बारआव।
बेसेबा बावगारना थाबाय नोँखौ
गोसोआव आंनि खोमसिया जाबाय,
आंनि गोसोआव एब्रेफै आफा
गले गले दिनै आर'ज गाब्बाय।
नोँनि गोथार आखायजोँ
बिलिरलांफै आंनि गोसोआव,
दंनायमानि आंनि गोरोन्थिखौ
सिबगारलांफै आफा बार-हुंखायाव;
दिनै बिनिनो आर'ज आंनि।

नै अबं आजाव आंनि आर'जखौ
होदो गंग्लायनायाव आंनि गोसोखौ
आंनि खाफालाव होदो नोँनि बिलिरनाय
समायना गोजोन बोर सास्रिनाय।

नोँखौ खुलुमहरदोँ गोसोजोँ
नै आफा होदो गोजोनखौ,
आंखौबो नायहरदो सोरांजोँ
होखारदो आंनि मैला साननायखौ।

दिनै नोँखौ खावलायो
गोसो गोथार साजायना
आंखौ हमथा अख्रा गोरबोआव
जेब्लाबो आन्दायनाय अगेन खोमसियाव।