Gusto kong maging patas sayo
Hindi yung tipong nakikipag-patintero.
Ayoko nang maging taya,
Pagkat hindi ako nakikipaglaro.
Hinahabol mo ako
Na para bang alam mo ang lahat
Ang mga alaalang pilit ko nang kinalimutan
Ay kusang mong sinungkit sa Kalangitan
Hindi bilang isang magnanakaw
Kundi bilang isang ekstrangherong
Gumawi sa mga pahinang
Nalusaw na ang mga letra.
Sambit mo’y
Tila ba naroon ka sa aking mga nakaraan
Na parang sa palabas ko lang ito nasilayan.
Siguro nga, mali ako —
Mali ako na buksan ang pahinang ito
Pero alam kong hindi mo ako pinilit.
Nagugulat ako —
Sa mga salaysay na binibigkas mo
Na para bang kilalang-kilala mo na ako.
Na parang nanirahan ka
Sa puso kong ilang beses nang
Pinatikom ng hapdi, ng pait,
Ng galit na hindi ko alam
Kung saan nagmula.
Lumipas ang mga araw
Ngunit Ang paglubog ng araw
Ay sabay tayong sinasalubong.
Wala —
Wala na akong masabi pa.
Huminto —
Huminto muna ako.