Aik dam se khaamoshi.
Kia huwa? Kia kuch keh dia mein ne?
Kuch sakht, ya bay-hiss jo shayed bura lage
Logon ko… kher khwaahon ko.
Wo aik dou bars ke mehmaan… un ko.
Kia bad-ikhlaaq hon mein? Be-milaap?
Shayed bas yun hi, nagahaani mein
Waqt thehr jaata hai.
Chalte chalte, majoodgi, be-majoodgi.
La-parwah si aankhen,
Ye tang jism mera, ye paywand si awaaz,
Ye sehmi sehmi si sardi jo jaati hi nahi.
Shayed bas yun hi, kuch bhi nahi.
Ye khaamoshi shayed bazaahir hi nahi.
Wo… aae the, suna he.
Mera puchte bhi they: kaho soti hai abhi,
Kaho salam kehti he, kaho ke…
Un se kehna ke wo theek hai.
Mein nahi aaon gi.
Mera libaas theek nahi:
Mere rukhsaar pe be-bassi dam torti he.
Mere adam-e-wajood se wo uljha na jaen.
Naraazegi mein, wapis hi na chale jaen.
Un se kaho ke bethe rahen. Yu hi bolte rahen:
Kehkahe, taqraar, be sar-o-paa shor sharaaba.
Mein bhi band darwaaza paar se sunon gi.
Mehfil ka sajna, mehaq ban kar khil jaana.
Un ka mujhe bulaana…
Mera naam kia he? Kia unhe bataya?
Mujhe bhi batao. Mein bhi bulaaon gi.
Mein bhi…
Mehfil sajaaon gi, sab sunen ge mujhe.
Haina?
Sunen ge na?
Par mein kyun bulaon gi, kyun sunwaon gi?
Mujhe kuch nahi kehna.
Balke aisa karo keh… jaana chahen agar wo,
To unhe jaane dena.
Ye qaasir sa majma, larparwah,
Jo mujh se na-waaqif hai, na waaqif hi sahi.
Mein bhi koi mazayyan tamasha nahin.
Mein… gayyab hi sahi hon