सैथोआनो जेब्लायबो देरहासार
नंथारगौ होनना सोर बुङा?
गासैबो थार नङा
मानोना,
नंखायजोंबो जायो माब्लाबा देरहासार।

गावदां अखाफोरा जोबोर समाइना
नंथारगौ होनना सोर बुङा?
गासैबो थार नङा
मानोना,
समाइना नङा अखाफोराबो, थांनानै नायहैयोब्ला।

अननाइ होब्लासो अननाइ मोनो
नंथारगौ होनना सोर बुङा?
गासैबो थार नङा
मानोना,
अननाइ होब्लाबो माब्लाबा अननाइ मोनफिना।

दावखिबाद फंस्लदबाद
सुवा बायसेथ्रा
बेफोर मोनफा मोनफा खान्थि,
संसाराव, समाजाव
गावबा-गावनि राज्योआव
दानानै लानाय मोनफा आयेनखान्थि
बेजोंनो लाखियो सुबुंनि आब्रुथि।
इनाय हाबा, गाज्रि हाबा
बेफोरनिफ्राय बारगनो, सुबुंखौ हमथानो
दं जोंहा गोरा गान्थि, नेमखान्थि
बेनो जादों पाप!

18/05/2017

जोमै
गुफुर जोगां
खोरोमदाव खोरोमना
हायो नों बुहुम बिखायाव
अखा।

17/09/2016

आदै मद' बिखा फांदां
नों हाइनारि समाइसारनाय
हाबाब! सैनाय गुफुर गावदां
आदै मद' बिखा फांदां;
जान्जि सेरे खानाइ रुम्बां
रिजि हाथाइ मिनिस्लुनाय
आदै मद' बिखा फांदां
नों हाइनारि समाइसारनाय।

18/09/2016

आघोननि दुब्लियाव सनाथि
माइसालि माइनाव रुम्बां बिदां
बेसेदि हाइनारि नोंनि समाइनाथि,
आघोननि दुब्लियाव सनाथि
फुंबिलि आरो मोनाबिलिनि निहोर जोंथि
जोगां-जोगां रिगि-रिगां माइबिदां,
आघोननि दुब्लियाव सनाथि
माइसालि माइनाव रुम्बां बिदां।

17/09/2016

बिनि सोमखोर बिलाय सेरजोंनो
आं बिरबायदोंमोन
बिनि मोदोमनाय मोननानैबो
आं आनदायदोंमोन
अब्ला बैयो आंनिनो
जिउनि फुंबिलिमोन।

जेबोला लासै लासैनो
गोर्लै साना जौबोदोंमोन
लाइमोननि दुंलोबनायावनो
साहायनो हायाखैमोन
दुंलोबनाय गोसोखौ गोजोननो
सायानि नोजोर बोदोंमोन।

थारैनो आंनि नोजोरा
बिनि सोमखोर बिलायाव गोग्लैदोंमोन
लोगो लोगो गां फुवारना
बिनि साया सिङाव एब्रेहैदोंमोन
सिमां मोक्थां जाना
आं दाबोरसे गोमोहाबदोंमोन।

गमामायैनो जोबोर समाइना
जायखौ आं नुस'नाखैमोन
हाव हाव दुंलोबनाया
हां खनसेयावनो सुग्लायदोंमोन
बेसेबा गोथाव गोजोनथावना
मोदोमफ्रु मोदोमदोंमोन।

बारग्लांनाय रैरुब माहि फाइलि
बारसे गावदां बिबारमोन
मोदोमफ्रु हाइना महराव बिनि
आं गोजावदोंमोन
गोदै बिदैखौ अननाइनि
बियो आंनो लुफावदोंमोन।

सिमां मोक्थां मुगानैसो
समफोरा बारलांदोंमोन
बै सोमखोर बिलायानो
आंनि जिउ सायागिरि जाबोदोंमोन
बै बारग्लांनाय बिबाराबो
आंखौ आद'रै अनबोदोंमोन।

नाथाइ दिनै समनि फाख'नाव
अब'थिरा सिरिबाय जिउ सायागिरि
बारग्लांनाय समाइना अन्थाव बाथाव
नागारलांबाय आंनि अनसुलि
दानिया आलादिङा, फैलाव, खाराव माराव
बिरबायो आं सिरि सिरि....।

जोंनि सोदोमस्रि लांगोनानि सेर-सेरजों
आजै-आजौनि गोजाम न'ब्थि बिथायाव
खुगा ब्लां-ब्लां खोमसि-दरसिनि आन्दोवाव
सेर फाखाय फाखाय खायदा बोराय-बुरैजों
हारायबांखो आरो बुहुत-बिराफोरा
लामा आन्दायहोदों रासि उन्दैफोरखौ
आदुवा आरो राहा गैजायैफोरखौ,
लोंदों थै-बिथै, सावसुबदों हारा-मुरा।
बे खैफोदनिफ्राय बारग'नो नाजायाब्ला
जोबस्रांलांगोन जों गासै सानसे-बेलासे
बर'हारि, जायाब्ला जों बयबो खौसे
थाबावगोन बबाव जोंनि सिनायथि अब्ला?
जानांगोनसो जों बिसोरनि खाजा अराय
मन'गोन जोंखौ, उदै फेदेरनो थाखाय!