#sarili
Banayad, halos walang galaw—
hindi hangin ang unang dumadampi,
kundi amoy ng lupang bagong gising
sa ilalim ng dating sugat.
May sinasabi ang liwanag
mula sa bilog na nakatanaw sa gabi,
hindi malinaw, hindi tuwiran,
ngunit tumatagos sa tubig na payapa:
“Hindi lahat ng nawala ay tuluyang lumubog.”
Samantala, ang araw—
hindi umatras sa kaniyang init,
ngunit hinayaan ang ulap
na bahagyang tumabing
sa mata ng lupang napagod tumitig.
Sa pagitan ng patak at pagkatuyo,
may lihim na galaw—
hindi nakikita,
ngunit unti-unting nagtatama
sa mga bitak na hindi na umimik.
Umaagos ang ilog,
hindi na tulad ng dati—
may bahid ng alaala ang tubig,
ngunit marunong nang magdala
nang hindi nalulunod.
Nababawasan man ang laman ng pasô,
may nananatili sa ilalim nito—
parang pangalang hindi binabanggit,
ngunit hindi rin kinakalimutan.
Kapag tigang ang lupa,
hindi lang ito uhaw sa ulan—
kundi sa pandama
na may darating pa.
At nang unti-unting lumitaw
ang munting lunti sa gilid,
hindi ito sigaw ng tagumpay,
kundi tahimik na paalala:
ang paghilom
ay hindi biglang pag-ayos,
kundi marahang pagbalik
sa sarili **** pagdaloy.
Apr 24
Apr 24, 2026 at 2:05 PM UTC
Kung pwede lang gumawa ng sariling hukay
tatalon ako rito't pagsisihan ang mga kasalanan ko
Hindi ko gusto maging isang bomba
nauubusan ng oras at pasensya
Hindi ko hiling makasakit ng tao
sa oras na pumitik ang orasan ko
Kung ako ay may pagkakataong mabuhay muli
mas gugustuhin ng paa kong tumakbo palayo
Natatakot sa isipin
na mauulit ang mga desisyon ko
-ousson
Jan 19
Jan 19, 2026 at 1:57 PM UTC
Damdaming walang katumbas na salita
Maging sa diksyonaryo'y di ko makita
Waring humahagilap ng mga kataga
Na aangkop sa ginagawa kong tula
Ang isip ay nagtatalo at nagwawala
Ang bawat isa'y nais makawala
Aking gagapusin ng mga tanikala
Mga anyo na ako rin ang gumawa
Sapagkat hindi nga sila kayang patayin
Waring mga aninong di na kayang alisin
At sa pagdaay pinipilit ko na lamang mahalin
Kahit na taliwas pa ang aming adhikain
Jan 27, 2023
Jan 27, 2023 at 1:16 PM UTC
Gaano kana kalakas
Sa dami ba ng mga bakas
Na iyong mga dinanas
Sa mundo na marahas
Gaano kana katatag
Hindi na ba binabagabag
Pader ba'y di na matibag
Mahusay na mapagpanggap
Lakas na saan kinukuha
Limot maging pagluha
Sa sakit o kirot natutuwa
At di na namamangha
Sa napaka tagal na mag-isa
Di na kailangan ng iba
Umaasa sa iba
O inaasahan ng iba?
Ang mamon ay bato na
Ito'y matagal na
Lumalakad mag isa
Nang walang pangamba!
Walang mapapala
Kahit ipilit ang salita
Ang lahat waring abala
Sa taong nasanay mag-isa
-JGA
Dec 21, 2021
Dec 21, 2021 at 6:50 PM UTC
Tuwing dapit hapon nagsisimulang umalingawngaw ang mga tinig.
Mga alitaptap ay nangingimasok sa mga bukas na sugat.
Maaligasgas na mga tunog ay maririnig sa duguang trumpeta.
Hindi mawari ang pagsilay ng buwan sa mga matang nakapikit ngunit nakatingin.
Pagiyak ng punong kahoy sa pagkabali sa bagyo ng mga pasanin ay siyang namamayani sa gitna ng gabi.
Ang bawat pagpunit ay kasabay ng pagikli ng mga pahina.
Kumpas ng orasan sa takipsilim naghahayag ng taglagas nang kaunting saya sa isang linggong kalumbayan.
Papatayin ng unti unti at iiwang sugatan ng mga pangungusap na hindi maawat.
Mapagkunwaring uwak na suwail sa hangin ay hindi na makalilipad.
Ang pagwawagi ay bihira lamang.
Aug 19, 2021
Aug 19, 2021 at 10:34 PM UTC
Gusto kong gumawa ng kanta
pero hindi ko alam paano sisimulan
Gusto kong magsulat ng tula
pero hindi ko alam ang tamang salita para magsimula
Gusto kong kumanta
pero hindi ko kayang abutin ang mga gusto kong awitin
Gusto kong sumayaw
pero wala akong lakas para humataw
Gusto kong gumuhit at magpinta
ngunit hindi ako kasing galing ng iba
Ang dami kong gustong gawin at aralin
ngunit hindi ko magawa
dahil ang daming kulang sa akin
Ni hindi ko alam kung may iaangat pa ba ang talento ko
Baka hanggang dito nalang kasi talaga ang kakayahan ko
Baka nga naniwala lang ako sa ilusyon na magaling ako
Kasi ang totoo ay hindi ako mahusay
Hindi ako matalino
Sakto lang ako.
May 30, 2021
May 30, 2021 at 12:40 PM UTC
"Nagbago ka na"
salitang pagbinitiwan
ng mga taong mahalaga sayo
sobrang laki ng epekto
kadalasan huhulaan ko pa
kung masama ba ang pagbabagong
nakikita nila sa pagkatao ko
o maganda ba naman ang dulot nito
hindi masabi ng harapan
kaya idinadaan na lang
sa maliliit na komento
ibubulong kuno para kahit paano
hindi marinig at iwas argumento
pahapyaw lang pero
tagos hanggang buto
ang tanong, mali bang magbago?
mga pagbabagong
sinanay ng panahon
pagsubok sa pananampalataya
at temptasyon
sa huli ay natuto din ng mga leksyon
pero kahit ano pa sabihin niyo
kung kilala niyo talaga ako
ako pa din naman 'to
may ilang nagbago
pero lahat naman tayo
dumaan sa ganito
hinahanap yung totoong silbi
ng buhay na 'to?
Oo nagbago na ako.
Nahanap ko na kasi ang sagot
sa huling tanong ko.
Aug 19, 2019
Aug 19, 2019 at 11:34 AM UTC
hindi ko na mabilang
kung ilang beses na ako
nabasa sa ulan
may mga panahong
dahil sa aking katangahan
biglang bumuhos ang
napakalakas na ulan
may mga pagkakataong
sinasadya din magpaulan
wala gusto ko lang
kailangan ba laging
may dahilan?
simula nang araw ay
makulilim na langit ang bungad
ang payong na isinantabi
pagdinila ko'y walang ulan
na nangyayari
nagbibiro na naman ang langit
sa panahong gusto kong magbabad
at maglakad sa ilalim ng ulan
hindi lumapat sa tuyong lupa
na siyang aking apak
Jul 29, 2019
Jul 29, 2019 at 12:13 AM UTC
hindi mawari kung ano't sino ang totoo
dito sa ating magulong mundo
tunay nga't ang mga tao'y magkakaiba
at hindi maaring mapagkumpara
tunay nga't tayo ay may ugaling hindi nais
kapatid, ano pa't magmalinis pa.
May 30, 2019
May 30, 2019 at 1:43 PM UTC
ako'y pupungas-pungas
ngunit pinili ang mata'y isarado
pinilit matulog, nagbabakasakaling
ang payapang panagip ay bumalik;
ako'y nasa lugar na nais
sa lugar na lahat ay tunay,
sa lugar kung saan walang madla,
sa lugar na malaya at walang nakakakita ng tunay na nadarama
sa likod ng ngiting pinapakita.
nakaupo sa pino
ngunit puting buhangin,
pinagmamasdan ang tulog na ulap
sa likod ng mga kumikinang na bituin,
at pinapakinggan ang tila walang sigla
na hampas ng alon sa dalampasigan
isip ko'y binabaha
ng mga salitang hindi mailabas,
sa tahimik na lugar na nais
nagtanong sa sarili,
"mayroon pa bang saysay
itong buhay na walang halaga?"
Feb 12, 2019
Feb 12, 2019 at 1:02 AM UTC