#paglaya
Banayad, halos walang galaw—
hindi hangin ang unang dumadampi,
kundi amoy ng lupang bagong gising
sa ilalim ng dating sugat.
May sinasabi ang liwanag
mula sa bilog na nakatanaw sa gabi,
hindi malinaw, hindi tuwiran,
ngunit tumatagos sa tubig na payapa:
“Hindi lahat ng nawala ay tuluyang lumubog.”
Samantala, ang araw—
hindi umatras sa kaniyang init,
ngunit hinayaan ang ulap
na bahagyang tumabing
sa mata ng lupang napagod tumitig.
Sa pagitan ng patak at pagkatuyo,
may lihim na galaw—
hindi nakikita,
ngunit unti-unting nagtatama
sa mga bitak na hindi na umimik.
Umaagos ang ilog,
hindi na tulad ng dati—
may bahid ng alaala ang tubig,
ngunit marunong nang magdala
nang hindi nalulunod.
Nababawasan man ang laman ng pasô,
may nananatili sa ilalim nito—
parang pangalang hindi binabanggit,
ngunit hindi rin kinakalimutan.
Kapag tigang ang lupa,
hindi lang ito uhaw sa ulan—
kundi sa pandama
na may darating pa.
At nang unti-unting lumitaw
ang munting lunti sa gilid,
hindi ito sigaw ng tagumpay,
kundi tahimik na paalala:
ang paghilom
ay hindi biglang pag-ayos,
kundi marahang pagbalik
sa sarili **** pagdaloy.
Apr 24
Apr 24, 2026 at 2:05 PM UTC
sa pagnakaw ng tingin,
atensyon mo ay bumaling.
hindi mo ba pansin?
malas ko, sayo pa ako nahumaling.
habang minamasdan ang buwan
na humimlay sa tapat ng araw na sikat,
tanging nasabi ko na lang ay ewan
at lumaki na lalo ang agwat.
kahit asamin ko na maging akin ka,
ipasasalo na lang lahat sa hangin.
walang ibang salita kundi baka,
nararamdamang dapat itapon na sa bangin.
kaya't sa paglaya ng buwan
sa araw na maliwanag.
maging akin ka man,
mahirap mabanaag.
Feb 18, 2021
Feb 18, 2021 at 10:09 AM UTC
Paulit - ulit na sinasambit ang salitang mahal kita
Pareho pa ba tayo ng nadarama?
Tila ika'y nanlalamig na
Mayroon na nga bang iba?
Ako'y handa nang palayain ka
Ramdam na tila wala na talagang halaga
Nawa'y makita kitang masaya sa iba
Iyo na rin sanang bitawan ang puso kong pagod na
May 23, 2019
May 23, 2019 at 8:56 AM UTC
Ako'y nakatitig sa kawalan
Iniisip ang laman ng iyong puso't isipan
Ni hindi mo na ako magawang tingnan
Ikaw pa ba ang aking unang minahal?
Sana'y linawin ang tunay na nararamdaman
Kung ako pa ba ang iyong minamahal
Nang magawa ng palayain pusong nasasaktan
Maari na bang lumayo at tumahan?
May 2, 2019
May 2, 2019 at 9:47 AM UTC
Isang manunulat,
Isang panulat,
Humanda para sa gyera,
Ito ay labanan gamit ang mga letra.
Hindi papaawat,
Nakahandang sumisid sa dagat,
Walang pakialam sa kahahantungan,
Buhay ay ilalaan.
Lilikha na mga kataga,
Panigurado itong maiiwan sa puso ng madla,
Ano nga ba ang pakay?
Alisin sainyong mata ang tamlay!
Uubusin ang bawat salita,
Na posibleng tumugma,
Sa sakit,
Pait,
Galit,
Hinanakit,
Ng bawat taong sa rehas ay nakapiit.
Isang manunulat,
Isang panulat,
Humanda para sa paglaya,
Huwag hahayaang muling tumulo ang mga luha.
Mar 7, 2018
Mar 7, 2018 at 11:53 AM UTC