#paghilom
Banayad, halos walang galaw—
hindi hangin ang unang dumadampi,
kundi amoy ng lupang bagong gising
sa ilalim ng dating sugat.
May sinasabi ang liwanag
mula sa bilog na nakatanaw sa gabi,
hindi malinaw, hindi tuwiran,
ngunit tumatagos sa tubig na payapa:
“Hindi lahat ng nawala ay tuluyang lumubog.”
Samantala, ang araw—
hindi umatras sa kaniyang init,
ngunit hinayaan ang ulap
na bahagyang tumabing
sa mata ng lupang napagod tumitig.
Sa pagitan ng patak at pagkatuyo,
may lihim na galaw—
hindi nakikita,
ngunit unti-unting nagtatama
sa mga bitak na hindi na umimik.
Umaagos ang ilog,
hindi na tulad ng dati—
may bahid ng alaala ang tubig,
ngunit marunong nang magdala
nang hindi nalulunod.
Nababawasan man ang laman ng pasô,
may nananatili sa ilalim nito—
parang pangalang hindi binabanggit,
ngunit hindi rin kinakalimutan.
Kapag tigang ang lupa,
hindi lang ito uhaw sa ulan—
kundi sa pandama
na may darating pa.
At nang unti-unting lumitaw
ang munting lunti sa gilid,
hindi ito sigaw ng tagumpay,
kundi tahimik na paalala:
ang paghilom
ay hindi biglang pag-ayos,
kundi marahang pagbalik
sa sarili **** pagdaloy.
Apr 24
Apr 24, 2026 at 2:05 PM UTC
Ilang buwan
Ilang taon
Gaanong panahon na ba
Ang lumipas
Simula noong
Huli akong sumulat?
Ilang buwan
Ilang taon
Gaanong panahon na ba
Ang nagdaan
Matapos ang gabing
Itinigil ang paglathala?
Ilang buwan
Ilang taon
Gaanong panahon na ba
Ang lumipas
Matapos maghilom
Ang pusong nawasak?
Ilang buwan
Ilang taon
Gaanong panahon na ba
Ang lumipas
Nang matapos ang luha
Sa pagpatak?
Dalawang buwan
Isang taon
Ganoong kahaba na
Ang panahon na lumipas
Itinigil ang pagtangis
Pagtanggap pala ang siyang lunas
Aug 17, 2022
Aug 17, 2022 at 12:22 PM UTC
Sa mundo **** puno ng ingay,
Ako ay iyong pinatahimik.
Sa mundo kong alanganin ang lagay,
Ikaw ay hihintaying bumalik.
Mananahimik,
Upang gumaling.
Oct 28, 2018
Oct 28, 2018 at 8:59 AM UTC