munting salamin sa ‘yong mga mata
sarili ko’y nakikita
salitan sa paghinga
puso mo’y kinikilala

babagsak ang mga luha
isa isa’t dahan-dahan
malayang magtatampisaw
tuwing sasapit ang ulan

panahon ang kalaban
sa bawat kinabukasan
hindi mag-aalinlangan
hindi rin magkukulang

tahimik ang gabi
puso minsa’y humihikbi
sa pagtulog ikaw ang dalangin
nag-iisang hiling sa mga bituin

ikaw ang tanging dahilan
kahapon, ngayon at kailan man
pangarap kong tahanan
ikaw at ako sa iisang larawan