बिनि सोमखोर बिलाय सेरजोंनो
आं बिरबायदोंमोन
बिनि मोदोमनाय मोननानैबो
आं आनदायदोंमोन
अब्ला बैयो आंनिनो
जिउनि फुंबिलिमोन।

जेबोला लासै लासैनो
गोर्लै साना जौबोदोंमोन
लाइमोननि दुंलोबनायावनो
साहायनो हायाखैमोन
दुंलोबनाय गोसोखौ गोजोननो
सायानि नोजोर बोदोंमोन।

थारैनो आंनि नोजोरा
बिनि सोमखोर बिलायाव गोग्लैदोंमोन
लोगो लोगो गां फुवारना
बिनि साया सिङाव एब्रेहैदोंमोन
सिमां मोक्थां जाना
आं दाबोरसे गोमोहाबदोंमोन।

गमामायैनो जोबोर समाइना
जायखौ आं नुस'नाखैमोन
हाव हाव दुंलोबनाया
हां खनसेयावनो सुग्लायदोंमोन
बेसेबा गोथाव गोजोनथावना
मोदोमफ्रु मोदोमदोंमोन।

बारग्लांनाय रैरुब माहि फाइलि
बारसे गावदां बिबारमोन
मोदोमफ्रु हाइना महराव बिनि
आं गोजावदोंमोन
गोदै बिदैखौ अननाइनि
बियो आंनो लुफावदोंमोन।

सिमां मोक्थां मुगानैसो
समफोरा बारलांदोंमोन
बै सोमखोर बिलायानो
आंनि जिउ सायागिरि जाबोदोंमोन
बै बारग्लांनाय बिबाराबो
आंखौ आद'रै अनबोदोंमोन।

नाथाइ दिनै समनि फाख'नाव
अब'थिरा सिरिबाय जिउ सायागिरि
बारग्लांनाय समाइना अन्थाव बाथाव
नागारलांबाय आंनि अनसुलि
दानिया आलादिङा, फैलाव, खाराव माराव
बिरबायो आं सिरि सिरि....।