खोथा दं सिरियै
नों खोनासंनोथ' माब्लाबा फै,
गोसो अख्राङा दं सिरियै
नों दाव मैना जानानैथ' बिरफै,
दैसायाबो दं निजोम सिरियै
आमाइ-जुमाइ गेलेनोथ' फै।

दानसोरां निजोम हराव
अखाफोरनि गावदां महराव
हाथरखिफोरनि जोंथि-माथियाव
नोंखौसो गोसो खांफ्लांदों अनजालि
सिरियै हारसिं फाग्ला फाग्लानो।

दाखा जोमैनि आन्दोआव
हाबसो-हाबसो थाखोमादों सिरियै
आंखौ लाजिनानै.......।

मिनिखैरो मिनिना, जोंथि हाथाइखौ दिन्थिना
थाबाइ लांदोंलाइनो बालें-बालेङै
आंहासो नाइगोमादों गल'ल'नो
जाम्बाबादि लरग'ग'नो
निजोम हराव सिरि-सिरियै।