Cauld-bluided, humphing ower the stark grey hills
Gowd een skinkle to an fro
Split tongue lappin at the wind-blown smells
Bog grass blackens whaur ye go
Smoke split shielings and the clammerin o bairns
Bone cracked mithers in yer wake
Heirt-scaud ruin fae the valleys tae the cairns
Driven by a drouth ye canny slake
Crib tale shapit unner creakin heather thatch
Howf born craitur o the nicht
Auld sangs spake aboot the maidens ye would ******
Fleggit bairns tae keep intil the licht
True? Naw, havers, juist the blaflum o wives
God nivver biggit ocht sae fell
But ae bairn crouchin in the ruins o its life
Can think o naethin else the tale tae tell
Blin, lost, forwandert fae the shattered faimly hame
Warslin wi fear tae unnerstan
White winds whistle as he gies the beast a name
And dragons whiles can take the form o man.