सोर नों आंनि जिउनि आन्दोआव
अरायबो आंखौ नायहरग्रा?
नोंनो आंनि जिउनि लामा,
नोंखौ नागारना हाया मावनो जेबो
दङ' नों जेरावबो जेरैबो सुबुंनि लोगोआव।
मावगोमा नोंनि
मिथिस'हाया रावबो,
जायो आं नागिरना नोंखौ हांखुर।
नाथाय मोना- नुवा नोंखौ
खोनायोल' नोंनि गोदै मुं।
नुयोल' नोंखौ गोसो सिङाव साया माया,
नागिरबायो नोंखौ दैमा दैसा, हाग्रा बंग्रा
मोनगोन साननानै बहाबा।
लायो आं नोंनि गोदै मुंखौ
रोजाबो आं नोंनि मुङैम मिलौदो मेथाय।
आनला आं सुबुं माहारि
नागिरो नोंखौ खुरखाव खुरसि
मोनगोन सानना बहाबा।
फैदो नों आंनि सेराव
लांफैदो आंखौ नोंजों लोगोआव
थाहैगोन आं नोंनि देरायाव आलो आलो
खालमहैगोन नोंजों गुलि गुलि,
निमाहा बियो नोंनि सेराव
मावनाय गोरोन्थिनि।

बिदिन्थानि फाखनाव जाबाय आं सासे दावबायारि,
थाखिया लैथो बारै गुबुन गोदान रायज्योआव आगान आंनि,
जेराव गैया मुगैलायनाय, नासयनाय, नाख्रेबनाय आरो आंखाल,
दङ खालि मोनसेल' गारांजों गोजोन आरो खुसिनि बयबो रंजानाय।
बेसेबांबा समनिफ्रायनो बारनो नाजाबोदों आं लैथोनि बे बिखाखौ,
नाथाय दिनैसिमबो लैथोनि खावसे बिखाखौनो बारगजोबनो हायाखै।
आय' जिवनि फिसा दिङा आंनि
थोलौ-थोफौ
गोदोहां गोदोआहां
गोब्राब लैथोनि गुथालाव....
बिब्दियैनो
बेसेबांबा सम थांबाय जिवनि हास्थायनायखौ मोनफुंनायनि मिजिंङा,
जिवनि लोगो मोनाबिलियाबो आंखौ नेयाखै....
बियो जेब्लाबो अं... अं....
थारैनो बिदिन्थानि फाखनाव आं सासे गेजेन दावबायारि....

रोजा रोजा फिसाफोरनि नों बर' बिमा
नुयो आं नोंनि मेगनाव आसार सावननि अखा
अमबासि हरबादि बेसेबा खोमसि गोसो
खामग्लिजानाय हांगारबादि गोसोम मोखां
गैया मिनि सोरां।
आयलि जायलि स्नि दान्दालि खानाय नोंनि
नङा थारायलाय स्राय हसारनाय।
गुरलुब गुरलुब मावनाय नोंनि जारौ गुष्टि
गोर्बो बिखा, देहा सोलेर दुंग्लाबनाय,
उसाव-बादाव, खालाव-खासाव मानिबा इसारा।
आय' बर' बिमा....
गैया नोंहा दाबोनो खौसेथिनि गोहो
आखाइ मुथियाव
गैया गोबां बिखा फोरदानना आवगायग्रा नोंहा बर' फिसाफोर।
दङ बिसोर.....
सेरखाय बेरखाय गाव गाबागाव जुदा जुदा।
नासयनाय-सुसिनान,
नाख्रेबनाय-थैनाय
दावहा गाव गावनि मुलाम्फानि।
आय' बिमा....
दङसै नों बेफोरखौ नुनानैबो सिरियै उन्दुस्रिना।
जागोन माब्ला-
फुंबिलिनिबादि जारौ महर नोंनि,
दानसोरां हरनि बादि गावदां मोखां,
मैना खबारिनि जारौ गुष्टि,
सासे अनजालि बादि बेसेबा हायनारि???

(क)
जोंनि गामि खाथिनिलाय नायनो बिउटि
मुंङा बिनि रुपाथि
सेंग्रा गोदान नुब्लानो गोसो थोब्रबो सयथि
बिनिखायनो, थायोल बियो सेंग्राफोरनि खाथि-खाथि
हाबा हुखायावबाहले एसेबो उदायथारा सयथि।

(ख)
आं गोसो थोफ्रामनाय सैनाय
महराहले बिनिया नांगौनि बांद्राय
सिगाङावब्ला आंखौ अनसोगारोमोन
दाबा आंनि सायखंखौनो नायनो बाबाय
बे जोनोमाव हिन्जावखौनो नांला नंबाय।

(ग)
जोंनि बर' हारिनि रैखागिरि
बिसोरनो जाबाय बर' फोरनि लेदारगिरि
सिगांनि बायदि बुजिनो रोंलिया बिसोर
नंलिया बिसोर गोदोनि बायनि रैखागिरि
दा जाबाय बिसोर हारिनि उदखारि।

(घ)
आथिखाल जुगावनि सेंग्रा जालिया
खामानियावथ' बिसोर उदाय रोंलिया
नांगौल' बिसोरनो गोदान दिजाइननि मथर-गारि
लिरनाय फरायनायावबोथ' आदा खावनिया
मन'गोन बिसोर दुनिया।

नों खेबसे गोथार गोसोयै ईशोरखौ गाबज्रि
मोनगोन गोसोआव दसेनि थाखायब्लाबो सुखु
बायलांनो हमनाय दुखु दाहानि बान्दोखौ
गोग्गोमै नारदबना दोननो गोर्बो इसिंङाव।

नों खेबसे ईशोरनि मुंखौ लाननै आखाय फोलावहर
मोनगोन बायग्लिनाय गोसोआव गोहो बोलो
बायलांनो हमनाय जिवनि मिजिंनि देराखौ
गोग्गोमै गायसंफिनना दोननो गोर्बो मिजिंआव।

नों गावखौनो उन सिगां नायहर-
जागोन जिवआव जेब्लाबो देरहासार
गोरोन्थि गैयाजासे मावनो लानाय खामानिखौ
उथ्रि हागोन फोजोबनायाव गावनि नाजानायबादि।