ना गोरबोआ ना गोसोआ
अननायखौ लुबैयो सोरनिबा
मोदाननाय महरखौ नुना
अनजालिखौ गावनि थाखै।
रावदावनो सानो ना लाजियो
मेगननि नोजोर बायगरै
दोनहरो सोलेरनि सायाव
गावखौ उसु खुथु खालामना।
नाथाय मानो
मानि थाखै मै फेलेंगिनि नोजोरजों
अनजालिनि थाखै मैहुर खालामो,
आंबोथ बेदिनो
राव गैया गोसो सिंआव नोंखौ लाना
सिरियै रोन जायो बेआवनो
अबोला आंबो फागोलाबादि
आवनायला बायो बोदोर जायो।
अबोलाबोथ नों आंजोंनो
गोरबो खनायाव सिमां रनसाय जादों,
नाथाय नोंहा खौरां गैया
आंदि नोंखौ मोजां मोनखोमादों।

बर'नि थैजोंनो
नै बर' बिग्रायारिफोर
दा गेलेसै थैनि फाखुआ।
बे मुगाया
जों खौसे जानायनिसो
बे हाया जोंनिनो
बड'लेण्डखौ लाना बर' फिसानो
सुथुरनि गसोलाखौ दा गानहो।
बर'फोर देरहासार
जै बर' हारिनि...जै,
बे हाया जोंनिखा
बे हायावनो आबै आबौमोननि
रोदा बेगें रायजो खुंबोनायनि नेरसोन दं।
गोसोआव दा गेलेहोबावसै
साव नङा फोथायखेबसनि
बिर दैमालुनि खुगानि रावआ,
दावखाया फुरआखै दावखायालाय सोमाखै
बेयो साव नङा,साव नंथारा
खौसे जानायनिसो बोसोनथि राव।
फैदो फै गनसि गंसेनि बोलोजों सिफाय हाया
आसामनिफ्राय 50/50
जों खौसे जांनांगोन
जाबथुफा गनसिनि बोलोखौ जोंनो नांगोन।
नों दा नागार दा नागार
गावनि मासिखौ ओरैनो
गोसोनि थुलुंगाखौ हर बर' बिमानो
दा थाबाय थासै थगाय जाना
बड'लेण्डनि हेथा दा बुंसै।

गोसोखौ बुरखायहायै
गावखौ सोगाबदों हाजासे
एखनबा जौनि मदिराजों बुरखायबायदों।
हमथा हायै गोरबोआ
नोंखौ गोसोखांना खामग्लिदों
मेगनाव मोदै बोहैदों।
आं हायासै नोंनि लोगोसे
गावखौ दाजाबफानो,
मानोना हारिनि अलखदआ
सम नोंनि बैसोखौ
फोलावनो खाबु होयैआव
आंबो बजबनो गोहो मोनाखैमोन।
नाथाय नोंहा दाय गैयामोन
मोनथाय गैया आंहा नोंखौ सोंखारिनायनि,
मानोना
आंनि बुंनाय बादिनो सिरिबाङै
बेसेदि हारसिङै फागुन बैसाग बारहोबोखो
बेनि खारि गैया आंनि सिगांआव।
दिनै नोंनि हिनजाव गोदाननि मोदाननाया
सारनथायजों गावखौ संखिहोदों
गिनायनि नागारजाहांनायनि संखिनाया
आंखौ गाग्लोबदों सोलेर गंसे।
राव गोयै बिदायनि बुब्लिया
खालामदों आंखौ नोरजिया
हमथा हायै गोरबोखौ सोगाबदों
आंनि नोंखौ मोजां मोननायआव।
अबोलाबोथ बिदाय होनांसिगोन
अननायनि थफोलाखौ नोंनोनो हरनो
इउन जिउ लामानि थाखै
गोजोन संसारनि थाखै।

ना गोरबोआ ना गोसोआ
अननायखौ लुबैयो सोरनिबा
मोदाननाय महरखौ नुना
अनजालिखौ गावनि थाखै।
रावदावनो सानो ना लाजियो
मेगननि नोजोर बायगरै
दोनहरो सोलेरनि सायाव
गावखौ उसु खुथु खालामना।
नाथाय मानो
मानि थाखै मै फेलेंगिनि नोजोरजों
अनजालिनि थाखै मैहुर खालामो,
आंबोथ बेदिनो
राव गैया गोसो सिंआव नोंखौ लाना
सिरियै रोन जायो बेआवनो
अबोला आंबो फागोलाबादि
आवनायला बायो बोदोर जायो।
अबोलाबोथ नों आंजोंनो
गोरबो खनायाव सिमां रनसाय जादों,
नाथाय नोंहा खौरां गैया
आंदि नोंखौ मोजां मोनखोमादों।